1, 2. (1) O maanan ko kalimlaan no kaˈorip ni Yis hani? Misamaanay hani? (2) Malo “kapot no Kawas”, samaanen ita midemak ngaˈ macakat ko pasifanaˈay a tayal hani?

O MISASAYHOAY ato singsi ci Yis. (Marko 6:3; Yohani 13:13) Malefotay ko taneng ningra toniya tosa a tayal. Malo misasayhoay, mafanaˈay cingra misaka dademak to lalosidan no sayho, tano kilang misangaˈ to dafong. O roma, malo pasifanaˈay to ngaˈayay lihaf a singsi, maenepay cingra to Sinael, mansa ngaˈay padama to tamdaw cipinang to Kimad no Kawas. (Matay 7:28; Luka 24:32, 45) 30 ko mihecaan, sawadan ni Yis ko misasayhoay a tayal, samanen mafanaˈay cingra to kalimlaan ko pasifanaˈay to soˈlinay kimad. Sowal ningra miocoran no Kawas cingra tayni hekal, milasil to ngaˈayay lihaf no Hongti Kitakit. (Matay 20:28; Luka 3:23; 4:43) O kalimlaan no kaˈorip ni Yis, wa mitenak to soˈlinay kimad, mitokelay cingra mirienang ko roma tamdaw toniya tayal.​—Matay 9:35-38.

² Cowa ko sayho kita alatek, kawra o mitenakay to ngaˈayay lihaf a singsi kita. Masakalimlaan a tayal koni, mirienangay ko Kawas tonini, mihaenay o “kapot no Kawas” kita a matayal. (1 Korinto 3:9; 2 Korinto 6:4) Pakasoˈlinay kita ‘o sowal ni Yihofa o soˈlinay kimad’. (ˈOlic 119:159, 160) Mihaenay, pasoˈlinen ita to wa ngaˈay ko niyah, ‘matatodong ko pipasifanaˈ to sowal no Kawas.’ (ˈOsien ko 2 Timoti 2:15.) O kalimlaan a lalosidan ko Fangcalay Cudad, pasifanaˈ to tamdaw mafanaˈ ci Yihofaan, ci Yisan ato Hongti Kitakit no Kawas, mihaenay papadotoc kita pacakat to inaneng misaka dademak to Fangcalay Cudad. O  roma, wa minanam kita misaka dademak to misadayan no likakawa no Kawas a sapasifanaˈ a lalosidan, oniya lalosidan wa padama kitaanan macakat ko pitenak to soˈlinay kimad. Oniya lalosidan icowaay hani? Itiniay i Lalosidan no Sapasifanaˈ.

3. (1)Ano cowato ka hakowa ko toki milasil to soˈlinay kimad, mamisaˈicel kita midemak to maanan? (2) Sinael i Dmak 13:48 pakalalokay kitaanan midemak to maanan?

³ Hano panganganen to Lalosidan no Sapasifanaˈ, cowa ko Lalosidan no Sapitosil hani? Pakayniay sapasifanaˈ to soˈlinay kimad ko pisafaco. Tatodong no “mitosil” i, o milasilay to lihaf sanay, kawra o mitosilay mahawpay ko pasifanaˈ. Tatodong no “pasifanaˈ” pacalepen i falocoˈ no tamdaw ko lihaf, ho saka dademaken nangra ko mananamay a kimad. Cowato ka hakowa ko toki ita a milasil to soˈlinay kimad, mihaenay o mamisaˈicel kita padama to tamdaw micada to picekiw to Fangcalay Cudad, pasifanaˈ cangranan mafanaˈ to soˈlinay kimad. Ano hatiraay i, wa misaˈicel kita mikilim to ‘citatodongay milifok to tahadaˈocay ˈorip a tamdaw’, padama cangranan malo nisawawaan ni Yis.​—ˈOsien ko Dmak 13:44-48.

4. Samaan kita mikilim to o cima ko ‘citatodongay milifok to tahadaˈocay ˈorip a tamdaw’ hani?

⁴ Samaan kita mafanaˈ to o cima ko ‘citatodongay milifok to tahadaˈocay ˈorip a tamdaw’ hani? Mahecad o saka 1 hahekalan a Krisciyang, pakayni i pitosil a mikilim to hatiniay a tamdaw. Tooren ita ko sakayat ni Yis: “Ano micomod kamo to tataˈangay a niyaroˈ ano eca i, o mamangay a niyaroˈ i, [kilimen ko o cima ko matatodongay a tamdaw.]” (Matay 10:11) Oya cowa ka soˈlin ko waywayan, misatakalaway anca caka olah to noˈadingoan a tamdaw, cowa ko mamilongoc kita to mamicada cangra to ngaˈayay lihaf. Oya soˈlinay ko harateng, misapoeneray ko falocoˈ, makalimay to soˈlinay kimad a tamdaw ko kilimen ita. Ano mahela ita ko hatiniay tamdaw, sasamaan ko hademak hani? Haratengen ko pakayraan ni Yis misasayho, salakatay cingra mikilim to matatodongay a kilang, dotoc sangaˈen pala dafong, o fawahan, taloˈodan anca roma dafong. Ano mahela ko matatodongay a kilang i, mihadakay ci Yis to lalosidan misaka dademak to inaneng no sayho a misangaˈ to dafong. Mahecaday, wa misaˈicel kita ngaˈ padama to moecelay ko falocoˈ a tamdaw malo Krisciyang.​—Matay 28:19, 20.

5. Misamaanay hano sakafanaˈaw kita to lalosidan itini i Lalosidan no Sapasifanaˈ? Patinakoen hena. (Nengnengen ko satapangan coka.)

⁵ O cecacecay lalosidan masaˈosiay to aicowa a saka dademaken. Misasayho ci Yis i, iraay kono sayho a lalosidan. * Tinakoen o sapilalat, sapikonis, sapikerit, sapiolit, sapitoˈtoˈ, milalat to dafdaf anca moecel, iraayho ko sapakaketing to kilang a lalosidan. Mahecaday, itini i Lalosidan no Sapasifanaˈ iraay ko masakenaay a lalosidan, nengnengen ita koniya lalosidan hako, iraay ko maanan a sapafeli no likakawa no Kawas kalimlaan a lalosidan.

6, 7. (1) Sowalen samaanay kiso misaka dademak to kato no JW. (2) Ngaˈay kita tano satahidang no saˈopo pakalalok to tao midemak to maanan hani?

⁶ Kato no JW. Kaemingay a kato iraay ko taˈangayay epoc, oniya lalosidan wa padama to tamdaw mafanaˈ to Misawacayay Tamdaw ni Yihofa, ato misiwkay to wangcan no mita. O micadaay to kato a tamdaw ngaˈay tayra i wangcan misolap, wa matongal ko kafanaˈ kitaanan, ato pangangan i wangcan minanam to Fangcalay Cudad. Tahanini, itini i jw.org wangcan macadaayto ko 40 ˈofad panganganay minanam to Fangcalay Cudad, to romiˈamiˈad mataˈlifay ko semoˈot a panganganay. Ano miˈorong kiso to pina kato no JW, wa ngaˈay misaka dademak toni lalosidan, misawacay to tamdaw.

⁷ Satahidang. O satahidang no saˈopo matiliday: “Mahemekay mitahidang tisowanan malacafay to Misawacayay Tamdaw ni Yihofa minanam to Fangcalay Cudad.” Ngaˈayay saka dademaken ita ko satahidang pakalalok to tao mirienang to saˈopo no mita, anca micada to pinanam to Fangcalay Cudad. O satahidang cowa ko pisiwkay aca  to kasacefang no mita, ngaˈayho mitahidang to ‘misaaliay to noˈadingoan a tamdaw’ kalacafay kitaanan minanam to Fangcalay Cudad. (Matay 5:3) Ano micada ko tamdaw to pinanam to Fangcalay Cudad hokira, mahemekay kita mirieneng cangra to saˈopo. Ano mirienang cangra, wa cipinang o soˈlinay a kimad no Fangcalay Cudad ko misadakan no mita.

8. Hano kinacecay aca mirienang to saˈopo, wa ira ko taˈakayay a pilingat hani? Tinakoen mitadtad.

⁸ Padadotoc kita mitahidang to tamdaw mirienang to saˈopo, tada masakalimlaan koni, ano kinacecay aca mirienang wa materek i ponoˈ ningra ko ngaˈayay. Maˈaraway nangra to kadofahay i noˈadingoan ko saˈopo ita, caka hecad toya Taˈangayay Papilon manikaway ko noˈadingoan nangra. (Isaya 65:13) ˈAyaw no pina miheca, itini i Padaka cecay mararamoday ci Riy aci Linta, pakasoˈlinay cangra to iraay ko Kawas, mansa sakatayraaw i kiyokay, makalimay sapirenecaw to noˈadingoan no niyah. Misaˈosiay cangra misatapang mirienang to cecacecay kiyokay no niyaroˈ. ˈArawhan adihayay ko kiyokay itira, harateng noniya mararamoday, ano matatodong to tosa a palinian kora kiyokay i, wa padotoc cangra mirienang tora kiyokay. Saka cecay, papasifanaˈ koniya kiyokay cangranan to sifanaˈ, saka tosa, o caˈedong no mirienangay matatodong to malo Krisciyangay a caˈedong. Lalomaˈ no pina miheca, tayraayto cangra i romaroma a kiyokay, kawra matoleday cangra. Awaay ko mananamay a sifanaˈ, o caˈedong no mirienangay cowa ka sanengseng. Ikorto, liyas sanayto koniya mararamoday to salikoray a kiyokay, mawmahayto ci Linta, ci Riy misadayay minokay. Parakat to tosiya ci Riy mitaˈlifay to cecay Hongti Kitakit kasaˈopoan, sanay ko harateng ningra: “Hano caka picomod minengneng to mimaanay cangra hani?” Teloc i, o sangaˈayay a mirienangan ningra a saˈopo konini! O tamdaw i kasaˈopoan damsayay, lopayˈay, hanaca sanengsengay ko caˈedong nangra. Itini kaˈayaw a maroˈ ci Riy, tada maolahay cingra to mananamay a sifanaˈ. Mahecaday to misowalan ni Pawlo ko saka cecay mirienang to saˈopo no Krisciyang, sanay ko sowal ningra: “Soˈlinay, ira ko Kawas a mikapot i tamowanan.” (1 Korinto 14:23-25) Mikitiya misatapang, to lipalipay mirienangay ci Riy to saˈopo, ikor mirienangay to polong a saˈopo, hanaca misatapangay ci Linta mirienang. Soˈlin 70 ko mihecaan nangra, kawra micadaay cangra to pinanam to Fangcalay Cudad, ikor micadaay to inoˈ.

9, 10. (1) Misaka dademak to cowantan hano o madoloay a lalosidan hani? (2) Tadtaden to sasamanen misaka dademak ko Wa Samaan ko Kaˈorip Noikor Hani? a cowantan.

⁹ Cowantan. Faloay ko cowantan no mita ngaˈay padama kitanan madolo a masasowal to tao. Oniya cowantan mikitini 2013 miheca misatapang a mitepang, nohatini 50 walwalan ko miinsacan. O ciepocay a lalosidan koniya cowantan, mahecaday ko pisafaco, mihaenay ano mafanaˈ kita misaka dademak to cecay, wa mafanaˈto misaka dademak to roma pito a cowantan. Mihaenay, wa samaan kiso misaka dademak to cowantan a masasowal to tao hani?

¹⁰ Ano misaka dademak kiso to Wa Samaan ko Kaˈorip Noikor Hani? a cowantan, ngaˈayay paˈarawen iso to potal no cowantan a salicay, licayen ko cilomaˈay: “Na miharatengay kiso to sasamaan ko hano ikor han? O pakayraan no hekal . . . ” Dotoc licayen cingra, o maanan a caˈof ko papiliˈen. Maharek pacaˈof cingra, hamaan pasowalen to matatodongay ko caˈof ningra hokira, fohaten ko cowantan ilalomaˈ“Sowal no Fangcalay Cudad” pasowalen cingra to Paˈarawan 21:4 a sinael. Ano matatodong ko toki i, ngaˈayay padotoc a malalengo cingranan. ˈAyaw no miliyas, ngaˈayay saka dademaken iso ko kaikoray no cowantan tiya ilaenoay no “Haratengen Hena”sanay a salicay, licayen cingra: “Wa samaanen no Kawas misakapah koniya hekal?” Mihaen, wa ngaˈay tanonini a salicay malo lalengoen miliyaw milisoˈ. Ano miliyaw kiso milisoˈ cingranan i, ngaˈayay saka dademaken ko Naitiraay i Kawas a Ngaˈayay Ratoh!, saka 7 fedengan misatapang malalengo to Fangcalay Cudad.

11. (1) O casi no mita, pakayniay i maanan araaw a misafaco hani? (2) Pakayni toniya tosa casi, cacipinang kita to maanan hani?

¹¹ Casi. Mikecolay ato Katalipaˈelal! o saadihayay ko mitepangan toniya hekal, saadihayay ko sowal a casi. O miˈosiay a tamdaw toniya tosa casi mikitiniay icowacowa pala, mihaenay o potal no casi pakayniay sapisolot to kalim no miˈosiay ko pisafaco. O sasongilaˈen ita misaka dademak ko casi padama to tamdaw misinanot to kalimlaan a demak i nokaˈorip. Kawraan, cacipinang kita toni tosa casi pakayniay cimaanan ko pitilid, mihaen ngaˈ ira ko epoc palilam i matatodongay a tamdaw toniya casi.

12. (1) O Katalipaˈelal! pakayniay i masamaanay miˈosiay ko pitilid? Sakakaay patosokan no casi o maanan? (2) Palilam kiso toniya casi iraay ko maanan ngaˈayay milifetan hani?

¹² Katalipaˈelal! pakayraay toya cowa ka nanam anca cowa ka fanaˈ to Fangcalay Cudad a tamdaw ko pitilid. O hatiniay miˈosiay awaay ko kafanaˈan to kimad no Kristokiyo aletek, cowa pakasoˈlin to pihakelongan anca cowa ka fanaˈ to epoc no Fangcalay Cudad i tamdaw. O sakakaay patosokan no Katalipaˈelal!, o papadama to miˈosiay pakasoˈlin to iraay ko Kawas. (Loma 1:20; Hipray 11:6) Tokel noniya casi padama to tamdaw pakasoˈlin to Fangcalay Cudad ‘soˈliˈlinay o kimad no Kawas’. (1 Tisalonika 2:13) 2018 miheca a Katalipaˈelal!, potalay a lalangian “Romakat i Saka Lipahak a Lalan,” “12 a Pakayraan Padama Tisowanan Lipahak ko Paro no Lomaˈ,” ato “Samaan misiˈayaw to kapatay no salawina?”

13. (1) O Mikecolay sakiˈalomanay pakayniay i masamaanay miˈosiay ko pitilid hani? (2) Palilam kiso toniya casi iraay ko maanan ngaˈayay milifetan han?

¹³ Mikecolay, sakiˈalomanay misamacayay milengo to noˈadingoan a demak, pakayraay toya mangodoay to Kawas ato Fangcalay Cudad a miˈosiay ko pitilid. O hatiniay miˈosiay mimingay ko kacipinang to Fangcalay Cudad alatek, kawra cowa ka tatodong ko kacipinang nangra to kimad no Fangcalay Cudad. (Loma 10:2; 1 Timoti 2:3, 4) 2018 miheca a Mikecolay sakiˈalomanay potalay a lalangian pacaˈofay to laenoay salicay: “Matelangayto ko Fangcalay Cudad Han?,” “Wa Samaan ko Hano Ikor Iso?,” ato “Soˈlinay ci Harateng ko Kawas Tisowanan Han?”

14. (1) O sepatay a ika i lalosidan a hako pakayniay i masamaanay a araaw a misangaˈ hani? (2) Paˈaraw kiso to ika a mitosil, iraay ko maanan ngaˈayay a milifetan han?

¹⁴ Ika. Itini i lintad ni Yis, misaka dademakan no sayho sahtoay tano kamayan a lalosidan, nohatini adihayay ko no tingki a lalosidan no sayho, ngaˈayay mirosaros, miolit, mirenac, mipacek. Cowa ko miinsacan aca a cudad, iraayho ko ngaˈayay a ika ita, ngaˈay paˈarawen ko cilomaˈay i pitosilan, o sepat a ika itiniay i lalosidan a hako, oniya ika i: Misamanay Hano Miasip to Fangcalay Cudad?, Misamaan Kiso Minanam to Fangcalay Cudad?, Samaanay ko Saˈopo Itini i Hongti Kitakit Kasaˈopoan?, O Cima ko Misawacayay Tamdaw ni Yihofa Hani? O koˈdaw no roma ika cowa pakaala to tosa ehon, ngaˈayay saka dademaken isalakatay a pilisoˈ. O roma ika koˈdaway ko toki, ngaˈayay itini pilisoˈ anca ciromiˈaday a cilomaˈay. Ngaˈayay a lalosidan konini, ngaˈayay saka dademaken a pakalalok to tamdaw minanam to Fangcalay Cudad ato mirienang to saˈopo.

15. Tinakoen mitadtad, minengneng to nowina a sowal a ika hakowaay ko kataˈangay no pilingat.

¹⁵ Iraay ko cecay tinakoan, o cecay fafahiyan salikaka malitemohay ko mikitiniay i Mikeronisiya a fafahiyan, o sowal noniya fafahiyan o Yapo. Paˈarawan no salikaka tano Yapo a sowal Misamanay Hano Miasip to Fangcalay Cudad? a ika, misatapang ko ika i, sanay ko sowal ningra: “Ono Yapo a sowal koni! Fahkaˈay kako, tengilen koniya ngiha mafanaˈayto kako, o itiniay i potipot niyam a tamdaw, oniya tamdaw somowalay tono Yapo a sowal!” Ikorto, sowal noniya fafahiyan wa misolap cingra to jw.org a wangcan tano Yapo sowal a lalakaw. (Nengnengen ko Dmak 2:8, 11.) O roma tinakoan, o cecay i Padakaay fafahiyan salikaka palakatan ningra i tingnaw ko Misamanay  Hano Miasip to Fangcalay Cudad?, paˈaraw ko wawa no kaka, oniya ika tano wina a sowal noniya wawa a lokoingen. Maharek koniya wawa minengneng to ika patikamiay to salikaka, sanay ko sowal: “Lalomaˈ no ika somowalay to iraay ko cecay mariˈangay a ˈicel ko mikowanay toniya hekal, caay ka pawan kako, panganganayto kako minanam to Fangcalay Cudad.” Tada o ngaˈayay a milifetan konini, samanen itiniay i macongeday ko mitosilay demak a kitakit ko kitiraan noniya wawa.

16. Tadtaden ko laenoay kihpicay cudad o maanan ko araaw mitilid: (1) Tengilen Mihakelong ko Kawas Tahadaˈoc maˈorip. (2) Naitiraay i Kawas a Ngaˈayay Ratoh! (3) Cima ko Midofdofay to Araaw ni Yihofa?

¹⁶ Kihpicay Cudad. Ano caka hakowa ko kafanaˈan a tilid anca awaay ko nowina sowal ningra a mitepangan cudad, wa samaan kiso pasifanaˈ cingranan to soˈlinay kimad hani? Ngaˈayay saka dademaken ita ko Tengilen Mihakelong ko Kawas Tahadaˈoc a Maˈorip. * O roma ngaˈayay sapacekiw to Fangcalay Cudad a lalosidan i Naitiraay i Kawas a Ngaˈayay Ratoh! Ngaˈayay paˈarawen iso i lalikoray no cudad 14 a salicay, licayen cingra, o maanan ko kaolahan ningra, dotoc malalengo toni lalakaw. Itini pilisoˈ na misaka dademakan iso koniya pakayraan han? O saka tolo a kihpicay cudad i lalosidan hako i Cima ko Midofdofay to Araaw ni Yihofa? O araaw mitilid toniya cudad sapadama to minanamay to Fangcalay Cudad a tamdaw, mafanaˈ to likakawa no Kawas. Sakafanaˈaw to sasamaan misaka dademak toniya cudad, nengnengen ko 2017 miheca 3 folad a Taˈarawan no Mitosilay ato Nokaˈorip a Saˈopo.

17. (1) O araaw mitilid to Cipinang to Kimad no Fangcalay Cudad ato Samaan Materek i Olah no Kawas, o maanan hani? (2) Soˈlin micadato ko pacekiwan to inoˈ wa midemakho to maanan? Misamanay?

¹⁷ Cudad. Misatapang kiso tano kihpicay cudad malalengo to tao to Fangcalay Cudad ikor i, ngaˈay falicen milengo to Cipinang to Kimad no Fangcalay Cudad. Oniya cudad padamaay cangranan minanam to adihayay taˈenengan a kimad no Fangcalay Cudad. Ikor malaheci minanam i, ano padotoc cingra macakat i noˈadingoan, wa ngaˈay dotocen milengo to Samaan Materek i Olah no Kawas. * Oniya cudad papadama to pacekiwan sasamaan misaka dademak i nokaˈorip to safalod no Fangcalay Cudad. Haratengen, ano micada to ˈino ko pacekiwan misaaliayho cingra, milaheci micekiw toniya tosa a Cudad ngaˈ, tanoktokay ko kora i soˈlinay kimad.—ˈOsien ko Kolosay 2:6, 7.

18. (1) Pakayni i pitosilan, 1 Timoti 4:16 palimoˈotay kitanan samaan ko demak hani? Mihaen ko demak wa ira ko maanan a minaroˈan? (2) Pakayni misaka dademak to Lalosidan no Sapasifanaˈ, o maanan ko patosokan no mita hani?

¹⁸ Malo Misawacayay Tamdaw ni Yihofa, patorodan kita mitenak to “soˈlinay kimad no ngaˈayay lihaf,” oniya ngaˈayay lihaf wa padama to tamdaw milifok to tahadaˈocay ˈorip. (Kolosay 1:5; ˈosien ko 1 Timoti 4:16.) Sapilaheciaw toniya demak, o misadayan no likakawa no Kawas to Lalosidan no Sapasifanaˈ, iraay ko masakenaay a lalosidan. (Nengnengen ko sapatongal lalakaw, “ Lalosidan no Sapasifanaˈ.” Nanay misaˈicel kita minanam misaka dademak toniya lalosidan. Wa misaˈosi ko mitosilay to hahacowa toki, misaka dademak to maanan a lalosidan a pasifanaˈ to soˈlinay kimad i tamdaw. O araaw ita mitosil, cowa ko palilam aca to cudad, cowa ko mamiterek to cudad i cowa ka olah a tamdaw. O araaw ita papadama to soˈlinay ko harateng, misapoeneray ko falocoˈ, makalimay to soˈlinay kimad a tamdaw malo nisawawaan ni Yis, o hatiniay tamdaw ‘citatodongay milifok to tahadaˈocay ˈorip a tamdaw,’ sanay.—Dmak 13:48; Matay 28:19, 20.