1, 2. 1) ¿Jesusatakejj kun lurañas taqe kunat sipansa nayrankäna, ukat kunatsa? 2) ¿Kunsa ‘Diosamp chika sum trabajiñatakejj’ lurañasa?

JESUCRISTOJJ carpinterönwa, suma yatichirirakïnwa (Mar. 6:3; Juan 13:13). Carpinterjamajja, herramientanakap sum apnaqañwa yateqäna, ukhamat kunayman suma yänak maderat lurañataki. Maysa toqetjja, Qollan Qellqatanak sumwa uñtʼarakïna, ukhamatwa jaqenakarojj Diosan Arupa sum amuyapjjañapatak yanaptʼäna (Mat. 7:28; Luc. 24:32, 45). Jesusajj 30 maranëjjäna ukhaw carpinterot trabajiñ jaytjjäna, ukatsti Diosan Reinopat yatiyañwa nayrar uchjjäna. Diosajj ukatakiw khitanitu sasaw sarakïna (Mat. 20:28; Luc. 3:23; 4:43). Jupatakejj taqe kunat sipansa Diosan arunakap yatiyañaw nayrankäna, taqenis jupjam lurapjjaspa ukwa munaraki (Mat. 9:35-38).

² Jiwasat jilapartejj janiw carpinteröktanti, ukampis taqeniw Diosan suma yatiyäwinakap yatichirïtanjja. Cheqas Bibliat yatichañajj wali wakiskiriwa, kunattejj Dios pachpaw ukan pʼeqtʼaski. Jiwasajj ‘Diosamp chika trabajirïpjjtanwa’ sasaw Bibliajj qhanañchi (1 Cor. 3:9; 2 Cor. 6:4). Diosan ‘taqpach arunakapajj cheqapawa’ uk sum yattanjja (Sal. 119:159, 160). Ukatwa yatiykasajj “Diosan arunakapsa cheqaparjam apnaqañataki” chʼamachastanjja (2 Timoteo 2:15 liytʼañataki). Ukhamajja, Bibliat jukʼamp sum yatichañatakiw chʼamachasiñasa, Jehová Diosatsa, Jesusatsa, Reino toqetsa ukampiw yatichtanjja. Ukatakejja, Diosan markapajj  yaqha yanaptʼanakwa churistu, ukanakarojj ‘Bibliat yatichañatak yanaptʼanaka’ sasinwa uñtʼasi. Ukanakamp sum yatichañwa yateqañasa.

3. 1) Akapachajj niya tukusiñampïkipanjja, ¿kunatakis jukʼamp chʼamachasiñasa? 2) ¿Kunjamsa Hechos 13:48 textojj uk phoqañatak yanaptʼistu?

³ Bibliat yatichañatak yanaptʼanakajja, jaqenakar yatichañataki wakichtʼatawa. “Yatichaña” siski uka arojja, jaqenakar kuntï yatiyktan uk amuyapjjañapataki, yateqapki ukarjam lurapjjañapatak yanaptʼaña sañwa muni. Niyakejjay akapachajj niya tukjatäjjchinejja, jaqenakar Bibliat yatichañ qalltañataki, kunatï cheqäki uk yatichañatakiw jukʼamp chʼamachasiñasa. Ukhamajja, ‘taqe khitinakatï wiñay jakañatak suma chuymanïpki’ ukanakar jikjjatañatakiw chʼamachasiñasa, Jehová Diosaru servipjjañapatakis yanaptʼañasarakiwa (Hechos 13:44-48 liytʼañataki).

4. ¿Kunjamatsa ‘wiñay jakañatak suma chuymanïpki’ ukanakar jikjjatsna?

⁴ ‘Wiñay jakañatak suma chuymanïpki’ ukanakar ¿kunjamatsa jikjjatsna? Kunjamtï nayrïr patak maranakan jakir cristianonakajj lurapjjerïkänjja, ukhamarakiw Diosan arunakap yatiyasaki jikjjatsna. Jesusajj jupanakar akham sänwa: “Jachʼa markar mantasasa jiskʼa markar mantasasa, khititï jumanakar sum katoqapkätam ukar thaqtapjjam” sasa (Mat. 10:11). Khitinakatï jan suma chuymanïpki, jachʼa jachʼa tukurïpki, jan ukajj Diosat jan yatiñ munapki ukanakajj janiw istʼañ munapkaniti. Jiwasajja, suma chuymanïpki, humilde chuymanïpki, Diosan cheqa yatichäwinakap wal yatiñ munapki ukanakaruw thaqtanjja. Ukatakejj Jesusat parltʼañäni. Jupajj carpinterot trabajkäna ukhajja, mesanaka, sillanaka, punkunaka, yukunaka lurañatakejj suma maderanakwa thaqerïpachäna. Suma madera jikjjatasajja, lurañatakejj herramientanakap sum apnaqpachäna. Jiwasajj ukhamarakiw nayraqatajj suma chuyman jaqenakar thaqañasa, jikjjatasajja kawkïr yanaptʼanakatï utjkistu ukampiw Jesusan arkiripar tukupjjañapatak yanaptʼañasa (Mat. 28:19, 20).

5. Bibliat yatichañatak yanaptʼanakajj utjkistu ukanak ¿kunjamsa sum apnaqañ yateqañasa? Uk qhanañchtʼma. (Página 11 ukankir fotonak uñjjattʼäta).

⁵ Sapa herramientajj mä amtamp luratawa. Ukatakejja, Jesusajj carpinterot trabajkäna uka herramientanakat parltʼañäni. * Yaqhepajj mediñataki, mader marktʼañatakïnwa, yaqhepasti khuchjañataki, pʼiyjañataki, sum tukuyañatakïnwa, yaqhepasti niveltʼañataki, cheqaptayañataki, jan ukajj maderanak mayachthapiñatakïnwa. Bibliat yatichañatak yanaptʼanak utjkistu ukanakajja, niya ukhamarakiw sapa maynejj sum yanaptʼistu. Niyakejjay uka yanaptʼanakajj wali wakiskirïchejja, kunjamsa sum apnaqañ yateqsna ukwa jichhajj uñjaskañäni.

6, 7. 1) ¿Kunjamsa tarjetanakampejj jaqenakar yatiyirïta? 2) Tantachäwinakatak invitacionajj ¿kuna pä amtampi luratasa?

⁶ Tarjetanaka. Uka yanaptʼanakajj jiskʼäkchisa, ukampiw Diosan servirinakapajj khitïpjjtansa uk yatipjjañapatakisa, Internetan utjkistu uka cheqar mantapjjañapatakis jaqenakar yanaptʼsna. Ukar mantasajj jukʼampwa jiwasat yatjjatapjjaspa, Bibliat yatichayasiñatakis mayipjjarakispawa. Jichhakamajja, 400.000 ukhats jila jaqenakaw jw.org sat cheqar mantasajj Bibliat yatichayasiñatak mayipjje. Sapürojj waljaniw ukham mayipjje. Ukhamajj uka tarjetanak apasiñjja janiw armasiñasäkiti. Ukhamatwa kawkjankkasasa kawkir sarkasas Diosan arunakap yatiyañäni.

⁷ Invitacionanaka. Tantachäwinakatak invitacionajj pä amtampi luratawa. Jaqenakar akham siwa: “Jehová Diosan Testigonakapampi Bibliat yatjjatañamatakiw invittʼapjjsma” sasa. Ukatjja, kunjamsa tantachäwinakan yatjjatapjjaspa,  jan ukajj Bibliat maynimpi yatichayasipjjaspa ukwa qhanañcharaki. Ukhamajja, invitacionanakajj janiw jiwasaruki uñtʼaykistuti, jan ukasti “Diosat yatjjatañajj kunja wakiskirisa uk amuyasirinaka[rojj]” Bibliat jiwasampi yatjjatapjjañapatakiw yanaptʼi (Mat. 5:3). Cheqas tantachäwinakasar jutirinakajj Bibliat yatjjatañ iyaw sapjjpas janisa, taqeniw suma katoqtʼatäpjje. Tantachäwinakasar jutasajja, Bibliat qhawqsa yateqapjjaspa ukwa amuyapjje.

8. ¿Kunatsa jaqenakajj tantachäwinakasar mä kutikis jutapjjañapajj wakisispa? Uk mä experienciampi qhanañchtʼma.

⁸ Tantachäwinakasar mä kutikis jutapjjañapatakejj jaqenakar invittʼaskakiñasawa. ¿Kunatsa? Tantachäwinakasar jutasajja, jaqenakajj akwa amuyapjjani: kʼari religionanakat sipansa, Testigonakajj Bibliat kunatï cheqäki ukwa yatichtanjja, Diosar uñtʼapjjañapatakis yanaptʼaraktanwa (Is. 65:13). Estados Unidos markankir Ray chachampiru Linda esposapampirojj ukaw pasäna. Jupanakajj Diosan utjatap creyipjjänwa, Diosar jukʼamp uñtʼañatakiw mä iglesiar sarañ munapjjäna. Ukatwa markapankir taqe iglesianakar visitañ amtapjjäna. Ukanjja, iglesianakas religionanakas waljaw utjäna. Jupanakajj akham sapjjänwa: “Mä iglesiaru sarjjañatakejja, nayraqatajj kuntï uka iglesian yatichapki uk mä jukʼsa yateqañasawa. Ukatsti uka iglesiankirinakajj Diosan servirinakapjam suma isthaptʼatäpjjañapawa” sasa. Taqe iglesianakar walja maranakan mayat maya visitasajja, janipuniw kunsa yateqapkänti ni uka iglesiankirinakas suma isthaptʼatäpkänti, ukatwa jan kuns yatiñ munjjapjjänti. Listapankkäna ukanakat qhep qhepa iglesiat mistunisajja, Lindajj trabajoparuw sarjjäna, esposopasti utaparuw sarjjarakïna. Ray chachajj sarkasajja, mä Tantachasiñ Utwa uñjäna, ukatsti akhamwa chuymapan säna: “¿Kunsa ukan lurapjje uk yatiñatakejj janit mantkiristjja?” sasa. Mantasajj wal musparäna, taqeniw munasiñampi katoqtʼapjjäna, suma isthaptʼatäpjjarakïnwa. Uka chachajja, nayraqat filaruw qontʼasïna, kuntï yateqkäna ukanakatsa wal kusisïna. Kunjamtï apóstol Pablojj tantachäwinakar nayrïr kuti saririt siskänjja, ukhamarakiw “cheqapuniw Diosajj jumanakampïski” sasin säna (1 Cor. 14:23-25). Ukat aksarojja, Ray sat chachajj sapa domingow tantachäwinakar jan faltasis sarjjäna, semanan apaski uka tantachäwinakarus qhepat sarjjarakïnwa. Esposapas jupamp chikaw sarjjarakïna. Jupanakajj 70 jila maranëjjapjjchisa panpachaniw Bibliat yatichayasiñ amtapjjäna, ukat bautisasjjapjjarakïnwa.

9, 10. 1) ¿Kunatsa tratadonakampi yatiyañajj jan chʼamäki? 2) ¿Kunas Diosan Reinopajja? sat tratadompejj kunjamsa yatiysna, uk qhanañchtʼma.

⁹ Tratadonaka. Diosan markapanjja, kimsaqallqo tratadonakaw utjistu, ukanakampi yatiyañajj facilakiwa, ratukiw parlañ qalltaraksna. Uka tratadonakajj 2013 maran mistkäna ukhat jichhakamajja, mä phesqa waranq millonanakaw imprimisjje. Niyakejjay mä kikpak luratächejja, mä tratadompi yatiyañ yateqasajj mayni tratadonakampejj facilakiw yatiyjjsna. ¿Kunjamsa uka yanaptʼampejj parlañ qalltsna?

¹⁰ ¿Kunas Diosan Reinopajja? sat tratadompis yatiyañ amtksna ukham sañäni. Nayrïr página uñachtʼayasajja, akhamwa jaqenakar sissna: “¿Kunas Diosan Reinopajja? sasin jisktʼasirïtati, ¿akanakat kawkïriw cheqajj sasmasa?” sasa. Janis sum qhanañchkchinejja, payïr paginan “¿Kunsa Bibliajj yatichi?” siski uka cheqwa uñachtʼayañasaraki. Ukat Daniel 2:44; Isaías 9:6 uka textonakajj copiaqatäki ukwa liytʼarapiñasa. Wakischejja, parltʼaskakiñasawa. Tukuyañatakejj qhep qhepa paginan “Lupʼiñataki” siski ukan “Diosan Reinopajj apnaqkani ukhajja, ¿kunjamsa jakasiñäni?” siski uka jisktʼwa uñachtʼayañasa. Ukhamatwa mayan parltʼaskakiñäni. Wasitampi kuttʼasajj ak amtañasawa:  uka tratadojj Diosan apayanit suma yatiyäwinaka sat folleton 7 yatichäwip uñjjattʼam siwa. Uka folletojja, Bibliat jaqenakar yatichañ qalltañataki luratawa.

11. ¿Revistanakajj kuna amtampi luratasa, ukat uka revistanak jaytañatakejj kunsa amuytʼañasa?

¹¹ Revistanaka. Yatiyañataki ukat ¡Sartapjjañäni! sat revistanakajj walja arunakaruw jaqokipasi, aka oraqpachanwa lakirasiraki, janiw yaqhajj ukham utjkiti. Niyakejjay walja markanakan liyipjjchejja, pʼeqeñchäwipajj taqe jaqenakan yatjjatañ munapjjañapatak luratawa. Uka revistanakampejja, kunas jukʼamp wakiskiri uk yatjjatañ munapjjañapatakiw jaqenakar yanaptʼañasa. Ukatakejja, sapa revistajj khitinakatak luratasa ukwa nayraqat amuytʼañasa.

12. 1) ¡Sartapjjañäni! sat revistajj ¿khitinakatak luratasa, ukat kuna amtampi wakichtʼatasa? 2) ¿Uka revistampi yatiyasajj kuna experiencianaksa jikjjatawayta?

¹² ¡Sartapjjañäni! sat revistajja, Bibliat mä jukʼa yatipki jan ukajj jan kuns yatipki uka jaqenakatak luratawa. Inas jupanakajj kuntï cristianonakajj yatichapki uk jan yatipkchiti, religionanakat inas mä jukʼa pächasipjjchi, jan ukajj Bibliajj kunjamsa jakäwipan yanaptʼaspa uk jan yatipkchiti. Cheqas uka revistajja, ‘Diosajj cheqapuniw utjaski’ sasin amuyapjjañapatak amtampi luratawa (Rom. 1:20; Heb. 11:6). Ukatjja, ‘Bibliajj cheqapuniw Diosan Arupäski’ sasin confiyapjjañapatakis yanaptʼarakiwa (1 Tes. 2:13). Aka 2018 marataki wakichtʼat revistanakan pʼeqeñchäwinakapajj akanakawa: “¿Kunjamatsa kusisit jakassna?”, “Familian sum jakasiñataki 12 yanaptʼanaka” ukat “Ayuda para quienes están de duelo”.

13. 1) Yatiyañataki (yatiyir sarañataki) revistajj ¿khitinakatak wakichtʼatasa? 2) ¿Uka revistampi yatiyasajj kuna experiencianaksa jikjjatawayta?

¹³ Yatiyañataki (yatiyir sarañataki) revistajja, Diosarusa, Bibliarus mä jukʼa respetapki ukanakaruw Biblian yatichäwinakap qhanañchi. Inas jupanakajj Bibliat mä jukʼa yatipjjchi, ukampis janiw kunsa cheqpachapuni yatichi uk sum amuyapkiti (Rom. 10:2; 1 Tim. 2:3, 4). Aka 2018 marataki wakichtʼat revistanakan pʼeqeñchäwinakapajj aka jisktʼanakaruw qhanañchi: “¿Biblian ewjjanakapajj yanaptʼistaspati?”, “¿Kunas jutïr urunakan pasani?”, “¿Diosajj jumat llakisiti?”.

14. 1) ¿Bibliat yatichañatak yanaptʼanakan utjki uka pusi videonakajj kunatakisa? 2) ¿Uka videonakampi yatiyasajj kuna experiencianaksa jikjjatawayta?

¹⁴ Videonaka. Jesusajj aka oraqenkkäna uka tiemponjja, carpinteronakan herramientanakapajj amparamp apnaqañakiw utjäna, ukampis jichha tiemponjja, luzampi funcionir herramientanakaw utj-jje, sañäni, sierra mecánica, taladro, lijañ máquina ukat clavonak uchañ máquina. Bibliat yatichañ yanaptʼanakajj utjkistu ukampejj niya ukhamarakiwa, janiw imprimitak utjkiti, jan ukasti wali suma videonakas utjarakiwa. Ukanakat pusejj akanakawa: ¿Kunatsa Bibliat yatjjatañama?, ¿Kunjamsa Bibliat yatichasi?, ¿Kunjamsa tantachäwinakajj apasi? ukat ¿Jehová Diosan Testigonakapajj kunjam jaqenakäpjjesa? Pä minutonakat minusäki uka videonakjja, yatiyañ qalltañatakiw uñachtʼaysna. Pä minutonak jiläki uka videonaksti, revisitanakasaru, tiemponïsipki ukanakaruw uñtaysna. Uka wakiskir herramientanakajja, jaqenakarojj Bibliat yateqañ munapjjañapataki, tantachäwinakasar jutapjjañapatakiw yanaptʼani.

15. Pachpa arupat lurat videonak uñtañajj ¿kunjamsa jaqenakar yanaptʼi? Uk experiencianakampi qhanañchtʼma.

¹⁵ ¿Kunjamsa videonakajj jaqenakar yanaptʼi? Mä kullakajja, Micronesia markat jutir mä warmiruw ¿Kunatsa Bibliat yatjjatañama? sat video yapés sat arupat uñtayäna. Videojj qalltäna ukhajja, uka warmejj akham sänwa: “¡Akajj arujatawa, janiw cheqaw sañjamäkiti! Videon parlki  uka chachajj islajankirjamaw parli. ¡Parlkta uka arwa parlaraki!” sasa. Ukatjja, ‘Internetan jw.org cheqajj yapés arut utjki ukar mantasaw qellqatanak liyï videonaksa uñtarakïwa’ sänwa (Hechos 2:8, 11 uñjjattʼarakïta). Jichhajj Estados Unidos markankir mä kullakat parltʼarakiñäni. Jupajja, yaqha markan jakir sobrinoparuw kunjamsa Internetar mantasajj uka video pachpa arupat uñtaspa ukwa apayäna. Uka video uñtasajja, akham sasaw tiapar mä correo qellqäna: “Wali chʼamani jan sinttʼasiri ñanqha Supayaw akapach apnaqaski siski uka cheqaw chuymajar jukʼamp purtʼawayitu. Jichhajj Bibliat yatichayasiñatakiw mayta” sasa. Jupajja, kawkjantï Diosan markapajj jarkʼatäki uka markanwa jakasi.

16. 1) Diosar istʼañäni ukat wiñayatakiw jakañäni sat folletojj ¿kuna amtamp luratasa? 2) Diosan apayanit suma yatiyäwinaka sat folletojj ¿kuna amtamp luratasa? 3) ¿Khitinakas Jehová Diosan munañap lurasipki? sat folletojj ¿kuna amtamp luratasa?

¹⁶ Folletonaka. Mä jaqetï jan sum liytʼasiñ yatkchi jan ukajj Bibliat apstʼat qellqatanakajj arupat jan utjkchi ukhajja, ¿kunjamsa Diosan arunakap yatichsna? Ukatakejj Diosar istʼañäni ukat wiñayatakiw jakañäni sat folletow utjistu. * Yaqha yanaptʼajja, Diosan apayanit suma yatiyäwinaka sat folletorakiwa. Ukanjja, 14 yatichäwinakaw qhep qhepa paginapan utji, ukhamajj ‘kawkïritsa yatjjatañ munasma’ sasaw jaqenakar jisktʼsna. ¿Uka folletomp Bibliat yateqañ munirinakar yatichañ qallttanti? Bibliat yatichañatak yanaptʼanakajj utjkistu ukankir kimsïr folletojj ¿Khitinakas Jehová Diosan munañap lurasipki? satawa. Uka folletojj Diosan markapar mantapjjañapatakiw yateqerinakar yanaptʼi. Kunjamsa ukampejj yatichsna ukatakejj Cristianjam Jakañataki ukat Yatiyañataki marzo, 2017 qellqatwa liytʼasma.

17. 1) Aka parrafon qhanañchaski uka libronakajj ¿kuna amtampi wakichatasa? 2) Taqe bautisasirinakajj ¿kunsa lurapjjañapa, ukat kunatsa?

¹⁷ Libronaka. Mä folletompi Bibliat yatichañ qalltstan ukhajja, ¿Kunsa Bibliajj yatichistu? sat librompiw qhepat yatichjjsna, uk kunapachas cambiaksnawa. Uka yanaptʼampejja, yateqerejj Bibliat jukʼampwa yateqani. Yateqeritï uka libro tukuyjjasin Diosar serviñan nayrar sartaskakchi ukhajja, “Diosan munasiñapan jakasipxañäni” sat librompiw yatichjjañasa. Uka librojj Biblian yatichäwinakaparjam sarnaqañapatakiw yateqerir yanaptʼani. Cheqas Bibliat taqe yateqerinakaw uka paypach libronak tukuyapjjañapa, janïr tukuykas bautisasjjchi ukhasa, tukuyañapawa uk janipuniw armañasäkiti. Ukaw Bibliat yateqerinakarojj Jehová Diosar jukʼamp confiyañataki, Jupar jan jitheqtas serviñatak yanaptʼani (Colosenses 2:6, 7 liytʼañataki).

18. 1) ¿Kunsa 1 Timoteo 4:16 textorjamajj lurañasa, ukat kunanaksa jikjjatañäni? 2) Bibliat yatichañatak yanaptʼanakampejj ¿kuna amtampis jaqenakar yatichañasa?

¹⁸ Jehová Diosan Testigonakapajj Bibliat kunatï cheqäki ukwa jaqenakar yatichañasa, ukhamat wiñay jakañ katoqapjjañapataki (Col. 1:5; 1 Timoteo 4:16 liytʼañataki). Ukatakejj Bibliat yatichañatak kuna yanaptʼanakatï munaski ukanakwa Diosan markapajj churistu (“ Bibliat yatichañatak yanaptʼanaka” siski uka recuadro uñjjattʼäta). Uka yanaptʼanakampi sum yatichañatak chʼamachasipjjañäni. Sapa yatiyiriw kawkïr yanaptʼampisa, kuna pachas Bibliat jaqenakar yatichani uk amtaspa. Ukampis ak amtañasawa: janiw Bibliat apstʼat qellqatanak lakiririki sarktanti ni jan istʼañ munapki ukanakarus qellqatanak churktanti. Jan ukasti, ‘taqe khitinakatï wiñay jakañatak suma chuymanïpki’, humilde chuymanïpki, Diosan arunakap yatiñ munapki ukanakajj Criston arkiriparu tukupjjañapatak yanaptʼañwa muntanjja, uka amtampiw yatiyir sartanjja (Hech. 13:48; Mat. 28:19, 20).