1, 2. (a) Anong gibuhon an panginot na pokus kan buhay ni Jesus, asin taano? (b) Ano an kaipuhan niyatong gibuhon tanganing magin mapanggana bilang “mga kapwa trabahador nin Diyos”?

SI Jesu-Cristo sarong karpintero asin paratukdo. (Mar. 6:3; Juan 13:13) Asin lubos siyang nagin eksperto sa duwang iyan. Bilang karpintero, nanudan niyang gamiton an mga kasangkapan sa trabaho tanganing gibuhon na kapaki-pakinabang na mga produkto an tablon. Bilang paratukdo kan maugmang bareta, epektibo niyang ginamit an saiyang hararom na kaaraman sa Kasuratan tanganing tabangan an ordinaryong mga tawo na masabutan an mga katotoohan sa Tataramon nin Diyos. (Mat. 7:28; Luc. 24:32, 45) Sa edad na 30, binayaan ni Jesus an pagigin karpintero huling aram niya na mas importanteng trabaho an pagigin ministro. Sinabi niya na an pagpahayag kan maugmang bareta kan Kahadian nin Diyos an sarong dahilan kaya isinugo siya nin Diyos sa daga. (Mat. 20:28; Luc. 3:23; 4:43) Ginibo ni Jesus na panginot na pokus kan saiyang buhay an ministeryo, asin gusto niya na mag-iba sa saiya an mga tawo sa gibuhon na iyan.—Mat. 9:35-38.

² Tibaad bako man kitang karpintero, pero mga ministro kita kan maugmang bareta. Mahalagang marhay an trabahong iyan huling nakikikabtang diyan an Diyos; inaapod kitang “mga kapwa trabahador nin Diyos.” (1 Cor. 3:9; 2 Cor. 6:4) Minimidbid ta na “an kabilugan kan [tataramon ni Jehova] katotoohan.” (Sal. 119:159, 160, NW) Kaya gusto niyatong masigurado na “ginagamit [ta] sa tamang paagi an tataramon nin katotoohan” sa  satong ministeryo. (Basahon an 2 Timoteo 2:15.) Tanganing magibo iyan, padagos niyatong pinapauswag an satong mga kakayahan sa paggamit nin Bibliya na iyo an panginot na kasangkapan ta sa pagtukdo kan katotoohan dapit ki Jehova, ki Jesus, asin sa Kahadian. Tanganing tabangan kita na magin mapanggana sa satong ministeryo, nagtao an organisasyon ni Jehova nin mahalagang marhay na mga kasangkapan na kaipuhan tang kabisaduhon na marhay. Yaon iyan sa inaapod tang Toolbox sa Pagtutukdo.

3. Sa natatadang panahon na kaipuhan tang magpatotoo, sa ano kita dapat na magpokus, asin paano nakakatabang sa sato an Gibo 13:48 na magibo iyan?

³ Tibaad ihapot mo kun taano ta inaapod iyan na Toolbox sa Pagtutukdo imbes na Toolbox sa Paghuhulit. An “paghulit” nangangahulugan na ipahayag an sarong mensahe; pero an “pagtukdo” nangangahulugan na itadom an mensaheng iyan sa isip asin puso nin saro tanganing mapahiro siya kauyon kan nanunudan niya. Sa natatadang panahon na kaipuhan tang magpatotoo, dapat na magin pokus niyato na makapuon nin mga pag-adal sa Bibliya asin itukdo an katotoohan sa mga tawo. An buot sabihon, dapat niyatong maigot na hanapon an gabos na “igwang pusong nasa tamang kamugtakan para sa buhay na daing katapusan” asin tabangan sinda na magin parasamba ni Jehova.—Basahon an Gibo 13:44-48.

4. Paano niyato maaaraman kun sairisay an “igwang pusong nasa tamang kamugtakan para sa buhay na daing katapusan,” asin paano ta sinda mahahanap?

⁴ Paano niyato maaaraman kun sairisay an “igwang pusong nasa tamang kamugtakan para sa buhay na daing katapusan”? Arog kan inot na siglo, an solamenteng paagi na mahanap sinda iyo an pagpapatotoo. Kaya dapat niyatong sunudon an instruksiyon ni Jesus: “Sa ano man na siyudad o baryo kamo maglaog, hanapon nindo kun siisay diyan an maninigo.” (Mat. 10:11) Dai kita nag-aasa na aakuon kan mga bako sinsero, mga mapalangkaw, o kan mga bako mapagpahalaga sa espirituwal na mga bagay an maugmang bareta. An hinahanap niyato iyo an mga sadiyosan, mapakumbaba, asin an mga gutom sa katotoohan. Puwede tang iagid an paghanap na ini sa posibleng ginibo kaidto ni Jesus bilang karpintero—an paghanap kan angay na kahoy para makagibo nin mga muwebles, pinto, sakal, o iba pang bagay. Pag nahanap na niya an angay na materyales, puwede na niyang kuanon an saiyang toolbox, gamiton an saiyang kasanayan, asin hamanon an proyekto. Arog man kaiyan an dapat niyatong gibuhon mantang hinihinguwa tang gibuhon na disipulo an mga tawong may sadiyosan na puso.—Mat. 28:19, 20.

5. Ano an dapat niyatong maaraman dapit sa mga kasangkapan sa satong Toolbox sa Pagtutukdo? Iilustrar. (Hilingon an mga ritrato sa kapinunan kan artikulo.)

⁵ Arog kan sa iba pang mga toolbox, may espesipikong katuyuhan an lambang kasangkapan diyan. Halimbawa kaini an mga kasangkapan sa pagkarpintero na posibleng ginamit ni Jesus. * Kaipuhan niya an mga kasangkapan sa pagsukol asin pagmarka sa tablon; sa pagputol, paglabot, saka sa pagporma nin kahoy; asin sa pagpantay, pagtanos, saka sa pagsugpon kan mga pidaso nin kahoy. Sa kaagid na paagi, igwa nin espesipikong katuyuhan an lambang kasangkapan sa satong Toolbox sa Pagtutukdo. Kaya siyasaton ta an satong toolbox asin pag-ulayan niyato kun paano gagamiton an mahalagang marhay na mga kasangkapan na ini na itinao sa sato.

6, 7. (a) Paano mo ginagamit an contact card? (b) Ano an duwang katuyuhan kan imbitasyon para sa pagtiripon kan kongregasyon?

⁶ Contact Card. Sadit ini alagad epektibong kasangkapan na puwede tang gamiton sa pagpamidbid niyato asin sa pagtukdo sa mga tawo kan satong website na diyan dakul pa sindang maaaraman dapit sa sato asin makaka-request pa ngani sinda nin pag-adal sa Bibliya. Labi nang 400,000 an nag-request online nin pag-adal sa Bibliya sa jw.org, asin ginatos pang request an pinapadara aroaldaw! Puwede ka pirming magdara nin nagkapirang contact card tanganing makapagpatotoo sa lambang oportunidad sa mga aktibidad mo aroaldaw.

 ⁷ Imbitasyon. May duwang katuyuhan an satong imbitasyon para sa pagtiripon kan kongregasyon. Sinasabi kaiyan: “Imbitado ka na makipag-adal nin Bibliya sa mga Saksi ni Jehova.” Dangan nagtatao iyan nin pagpipilian kun gigibuhon iyan “sa [satong] pampublikong mga pagtiripon” “o paagi sa personal na pagtutukdo.” Kaya dai sana kita kaiyan ipinapamidbid bilang Saksi ni Jehova kundi iniimbitaran man kaiyan na makipag-adal sa sato nin Bibliya an iba na “nakakamating kaipuhan ninda nin espirituwal na mga bagay.” (Mat. 5:3) Siyempre, puwedeng mag-atender sa satong mga pagtiripon an mga tawo sinda man makipag-adal nin Bibliya o dai. Kun mag-atender sinda, mahihiling saka madadangog ninda an inaalok tang tunay na edukasyon sa Bibliya.

8. Taano ta mahalagang marhay na makaatender an mga tawo sa kisiyera saro sa satong mga pagtiripon? Magtao nin halimbawa.

⁸ Mahalaga na padagos niyatong imbitaran an mga tawo na mag-atender sa satong mga pagtiripon nin kisiyera sarong beses. Taano? Huling mahihiling ninda an dakulang pagkakalain kan abunda sa espirituwal na mga pagtiripon niyato asin kan kahirak-hirak na kamugtakan sa espirituwal sa Dakulang Babilonya. (Isa. 65:13) Pirang taon na an nakaagi, narisa iyan ni Ray asin Linda, sarong mag-agom sa Estados Unidos. Nagdesisyon sinda na kaipuhan nindang magsimba giraray. May pagtubod sinda sa Diyos saka nakakamati na kaipuhan ninda nin espirituwal na mga bagay kaya saro-saro nindang dinumanan an gabos na simbahan sa saindang siyudad. Dakulon an simbahan asin mga sekta sa lugar ninda. Sa inot pa sana, pinag-ulayan na kan mag-agom na maiba sana sinda sa sarong relihiyon sa duwang kondisyon. Inot, dapat na may manudan sinda sa pagsimba ninda, asin ikaduwa, dapat na mahiling sa itsura asin paggawi kan mga miyembro kan simbahan na sinda talagang mga representante kan Diyos na hinihingako nindang sinasamba ninda. Pagkatapos nin nagkapirang taon, nadumanan ninda an gabos na simbahan sa lugar ninda, pero nadisganar sindang marhay. Mayo sindang nanudan, asin bako lamang kagalang-galang an itsura kan mga nag-aatender. Pagkatapos magluwas sa huring simbahan na nasa listahan ninda, naglaog na sa trabaho si Linda asin nagpuli na si Ray. Kan papuli na si Ray, naagihan niya an sarong Kingdom Hall asin naisip niya, ‘Ano daw kun maglaog ako para hilingon kun ano man an ginigibo ninda?’ Siyempre, iyan an nagin pinakamagayon na eksperyensiya niya! Mabuot asin mainamigo an gabos sa Kingdom Hall saka angay nanggad an saindang pagbado. Nagtukaw si Ray sa inutan asin nagustuhan niyang marhay an nanudan niya! Arog mismo iyan kan sinabi ni apostol Pablo dapit sa sarong tawo na nag-atender sa sarong Kristiyanong pagtiripon sa inot na pagkakataon asin nakapagsabi: “An Diyos talagang yaon sa saindo.” (1 Cor. 14:23-25) Pagkatapos kaiyan, nag-atender na si Ray kada Domingo; dangan nag-atender na man siya sa kada pagtiripon sa tahaw kan semana. Nag-atender na man si Linda, asin dawa labi na sindang 70 anyos, nagpa-Bible study sinda dangan nagpabawtismo.

9, 10. (a) Taano ta pasil gamiton an mga tract? (b) Ipaliwanag kun paano gagamiton an tract na Ano an Kahadian nin Diyos?

⁹ Tract. Igwa kita nin walong tract na pasil gamiton asin epektibong marhay na kasangkapan tanganing makapuon nin pag-uulay. Puon kan i-release an inot sa mga tract na ini kan 2013, mga limang bilyon nang kopya kan mga iyan an naimprenta! An kagayunan kan mga kasangkapan na ini iyo na pag nanudan mo nang gamiton an saro sa mga tract, su gabos na iba pa pasil na sanang gamiton huling parareho an format kaiyan. Paano mo magagamit an tract tanganing makapuon nin pag-uulay?

¹⁰ Halimbawang napili mong gamiton an tract na Ano an Kahadian nin Diyos? Ipahiling sa kaulay mo an hapot sa inutan kan tract asin haputon siya: “Napag-isip-isip mo na daw kun ano an Kahadian nin Diyos? Sa hiling mo, iyan daw . . . ?” Dangan papilion siya sa tulong simbag na pagpipilian. Dai sabihon na tama o sala an simbag niya, imbes buksan an tract sa “An Sabi kan Bibliya” asin ipahiling an tampok na mga teksto, Daniel 2:44 asin Isaias 9:6. Kun posible, ipadagos an pag-uulay. Panghuri, ipahiling an hapot sa  “Pag-isipan” na nasa likod kan tract: “Ano an magigin buhay pag namamahala na an Kahadian nin Diyos?” Iyan an pag-uulayan nindo sa sunod. Pag nagkaulay giraray kamo, puwede mong gamiton an leksiyon 7 kan brosyur na Maogmang Bareta Hale sa Dios! na saro sa mga kasangkapan sa pagpuon nin pag-adal sa Bibliya.

11. Para sa ano dinisenyo an satong mga magasin, alagad ano an kaipuhan tang maaraman dapit sa mga iyan?

¹¹ Magasin. An Torrengbantayan asin Gumising! an pinakamahiwas na ipinupublikar asin itinatradusir na mga magasin sa kinaban! Huling iinaalok iyan sa dakul na nasyon, dinisenyo an mga tema kaiyan para makua an interes kan mga tawo sa manlain-lain na lugar. Dapat niyatong gamiton iyan bilang mga kasangkapan tanganing mapukaw an interes nin saro sa kun ano an talagang mahalaga sa buhay ngunyan. Pero tanganing maipasakamot ta an mga magasin na iyan sa mga tawong maninigo, kaipuhan tang maaraman kun para kiisay dinisenyo an lambang magasin.

12. (a) Para kiisay dinisenyo an Gumising! asin ano an katuyuhan kaiyan? (b) Magsaysay nin magayon na eksperyensiya sa paggamit mo kan kasangkapan na ini.

¹² An Gumising! dinisenyo para sa mga parabasa na tibaad diit sana o mayo ngani nin aram sa Bibliya. Tibaad mayo sindang aram dapit sa Kristiyanong mga katukduan, tibaad diskumpiyado sa relihiyon, o tibaad dai aram na may praktikal na pakinabang palan an Bibliya. An sarong panginot na katuyuhan kan Gumising! iyo na makumbinsir an parabasa na nag-eeksister an Diyos. (Roma 1:20; Heb. 11:6) Katuyuhan man kaiyan na tabangan an parabasa na magtubod na an Bibliya ‘talagang tataramon nin Diyos.’ (1 Tes. 2:13) An tulong tema para sa 2018 iyo an: “Ang Daan ng Kaligayahan,” “12 Sekreto ng Matagumpay na Pamilya,” asin “Tulong Para sa mga Nagdadalamhati.”

13. (a) Para kiisay dinisenyo an pampublikong edisyon kan An Torrengbantayan? (b) Magsaysay nin magayon na eksperyensiya sa paggamit mo kan kasangkapan na ini.

¹³ An pampublikong edisyon kan An Torrengbantayan nakapokus sa espirituwal na mga bagay para duman sa igwa na man nin paggalang sa Diyos asin sa saiyang Tataramon. Dawa igwa na man sindang aram sa Bibliya, mayo sinda nin tamang pakasabot sa mga katukduan kaiyan. (Roma 10:2; 1 Tim. 2:3, 4) Sinisimbag kan tulong tema para sa 2018 an mga hapot na: “Praktikal Pa Daw Ngunyan an Bibliya?,” “Ano an Nakatagama sa Maabot?,” asin “Nagmamakulog Daw sa Saimo an Diyos?”

14. (a) Ano an katuyuhan kan apat na video sa satong Toolbox sa Pagtutukdo? (b) Magsaysay nin magayon na eksperyensiya sa pagpahiling mo kan mga videong ini.

¹⁴ Video. Kan panahon ni Jesus, mano-mano sanang mga kasangkapan an gamit kan mga karpintero. Pero ngunyan, an mga karpintero igwa na nin mga kagamitan na de-kuryente—lagadi, panglabot, pang-is-is, pampako, asin dakul pang iba. Apuwera sa imprentadong mga publikasyon, igwa na man kita nin magagayon na video na puwedeng ipahiling sa mga tawo—an apat kaiyan yaon sa satong toolbox: Ta’no ta Kaipuhan Mag-adal nin Bibliya?, Paano Ginigibo an Pag-adal sa Bibliya?, Paano Ginigibo an Pagtiripon sa Kingdom Hall?, asin Mga Saksi ni Jehova—Siisay Kami? Epektibong gamiton sa inot na pagdalaw an mga video na dai maduwang minuto. An mas huruhalawig puwedeng gamiton sa pagdalaw liwat asin sa mga nanunumpungan na puwedeng makaulay nin medyo haloy-haloy. An marahayon na mga kasangkapan na ini puwedeng makapahiro sa mga tawo na makipag-adal nin Bibliya asin mag-atender sa satong mga pagtiripon.

15. Magsaysay nin halimbawa kan epekto sa mga tawo kan paghiling sa saro sa satong mga video sa sadiri nindang lengguwahe.

¹⁵ Estudyari an sarong halimbawa. Nanumpungan nin sarong sister an sarong babayi na nagbalyo hali sa Micronesia asin Yapese an panginot na lengguwahe kaini. Ipinahiling kan sister sa babayi an video na Ta’no ta Kaipuhan Mag-adal nin Bibliya? sa lengguwahe kaini. Kan pig-play na an video, nasabi kan babayi: “Lengguwahe ko ini. Dai ako makapaniwala! Sa pagtaram niya, masasabi kong taga duman siya sa isla mi. Lengguwahe ko an tinataram niya!” Pakatapos kaiyan, sinabi kan babayi na babasahon saka hihilingon  niya an gabos na nasa lengguwahe niya sa jw.org. (Ikumparar an Gibo 2:8, 11.) Hilinga an saro pang halimbawa. Sarong sister sa Estados Unidos an nagpadara nin link kan video man sanang iyan sa saiyang pamangkin na lalaki na nasa ibang nasyon sa lengguwahe kaini. Hiniling iyan kan pamangkin niya asin nag-e-mail saiya: “Nagustuhan ko lalo na idtong dapit sa maraot na espiritu na nagkokontrol sa kinaban. Nag-request ako nin pag-adal sa Bibliya.” Nakaistar siya sa nasyon na may restriksiyon sa satong gibuhon!

16. Ipaliwanag an espesipikong katuyuhan kan brosyur na: (a) Magdangog sa Dios Asin Mabuhay nin Daing Katapusan. (b) Maogmang Bareta Hale sa Dios! (c) Siisay an Naggigibo kan Kabotan ni Jehova Ngonyan?

¹⁶ Brosyur. Paano mo itutukdo an katotoohan sa saro na dai gayo tataong magbasa o mayo nin literatura sa lengguwahe niya? Igwa kita nin angay na kasangkapan para diyan—an brosyur na Magdangog sa Dios Asin Mabuhay nin Daing Katapusan. * Para sa pagpuon nin pag-adal sa Bibliya, marahayon na kasangkapan an brosyur na Maogmang Bareta Hale sa Dios! Puwede mong ipahiling sa kagharong an 14 tema na nakalista sa likod kan brosyur asin haputon siya kun arin diyan an pinakainteresado siya. Dangan punan an pag-adal sa leksiyon na iyan. Napurbaran mo na daw an pamamaaging ini sa saimong pagdalaw liwat? An ikatulong brosyur sa toolbox iyo an Siisay an Naggigibo kan Kabotan ni Jehova Ngonyan? Dinisenyo iyan tanganing giyahan an tinutukduan pasiring sa organisasyon. Tanganing maaraman kun paano iyan gagamiton sa lambang pag-adal sa Bibliya, hilingon an Marso 2017 na isyu kan An Satong Kristiyanong Pamumuhay Asin Ministeryo—Workbook Para sa Pagtiripon.

17. (a) Ano an espesipikong katuyuhan kan lambang librong ginagamit sa pagtutukdo sa Bibliya? (b) Ano an kahagadan sa gabos pagkatapos na mabawtismuhan, asin taano?

¹⁷ Libro. Pag nakapuon na nin pag-adal sa brosyur, puwede mo nang ibalyo an pag-adal sa librong Ano Man Nanggad an Itinotokdo kan Biblia? kun nuarin mo gusto. Makakatabang an kasangkapan na ini na mapahiwas an kaaraman nin saro sa pundamental na mga katukduan sa Bibliya. Pag tapos na an librong iyan asin nag-uuswag na sa espirituwal an tinutukduan, ipadagos an pag-adal sa librong Magdanay Kamo sa Pagkamoot nin Diyos. * Paagi sa kasangkapan na ini manunudan kan tinutukduan kun paano iaaplikar an mga prinsipyo sa Bibliya sa pang-aroaldaw na buhay. Tandaan na dawa nabawtismuhan na, kaipuhan na ipagpadagos sagkod na matapos kan mga baguhan an pag-adal sa duwang librong ini. Makakatabang ini sa sainda na magkaigwa nin pusog na pundasyon sa katotoohan.—Basahon an Colosas 2:6, 7.

18. (a) Dinadagka kita kan 1 Timoteo 4:16 na gibuhon an ano bilang mga paratukdo nin katotoohan, asin ano an resulta kaiyan? (b) Sa paggamit niyato kan satong Toolbox sa Pagtutukdo, ano an dapat na katuyuhan ta?

¹⁸ Bilang mga Saksi ni Jehova, ipinagkatiwala sa sato an “mensahe nin katotoohan na iyo an maugmang bareta” na puwedeng maggiya sa mga tawo pasiring sa buhay na daing katapusan. (Col. 1:5; basahon an 1 Timoteo 4:16.) Huli kaiyan, tinawan kita nin Toolbox sa Pagtutukdo na igwa nin dakul na kasangkapan na iyo mismo an kaipuhan ta. (Hilingon an “ Toolbox sa Pagtutukdo.”) Lugod na gamiton niyato an mga kasangkapan na ini sa pinakaepektibong paagi. Puwedeng magpili an parahayag kun anong literatura sa toolbox an gagamiton sa sarong interesado asin kun nuarin iyan gagamiton. Alagad bako sanang basta pagdistribwir nin literatura an katuyuhan niyato asin dai ta man ipapasakamot an literatura sa mga tawo na bako interesado sa satong mensahe. An katuyuhan ta iyo na gibuhon na disipulo an mga tawong sadiyosan, mapakumbaba, asin gutom sa espirituwal—mga tawo na “igwang pusong nasa tamang kamugtakan para sa buhay na daing katapusan.”—Gibo 13:48; Mat. 28:19, 20.