1, 2. a) ¿Achkë samaj ri kan xuyaʼ ran Jesús chrij, chqä achkë rma? b) ¿Achkë kʼo chë nqaʼän rchë nq-ok utziläj taq samajel chrij Ruchʼaʼäl Dios?

JESUCRISTO xok carpintero chqä tijonel chrij Ruchʼaʼäl Dios (Marcos 6:3; Romanos 15:8). Chë kaʼiʼ samaj riʼ kan tzʼaqät kibʼanik xuʼän chkë. Ryä xeruʼän utziläj taq samaj kikʼë cheʼ rma xtamaj xeruksaj ri samajbʼäl rchë ri carpintería. Chqä rkʼë ri retamabʼal chrij ri Ruchʼaʼäl Dios, ryä xerutoʼ ri winäq rchë xqʼax chkiwäch ri naʼoj ye kʼo chpan (Mateo 7:28; Lucas 24:32, 45). Taq 30 wä rujunaʼ, xuyaʼ qa ri carpintería rchë xchäp rutzjoxik Ruqʼatbʼäl Tzij Dios. Ryä retaman wä chë ya riʼ ri samaj más ruqʼij, rma riʼ xuʼij chë ya riʼ jun rma ri xtaq pä rma Dios chwäch le Ruwachʼulew (Mateo 20:28; Lucas 3:23; 4:43). Ryä xuyaʼ ronojel rukʼaslemal rchë xutzjoj Ruchʼaʼäl Dios y xrajoʼ chqä chë ri nikʼaj chik xkiʼän ta riʼ (Mateo 9:35-38).

² Tapeʼ röj ma yoj ta carpinteros, jontir röj yoj ajtzjöy Ruchʼaʼäl Dios. Re samaj reʼ janina ruqʼij, rma riʼ Dios kan nqrtoʼ pä chubʼanik (1 Corintios 3:9; 2 Corintios 6:4). Qataman chë ri Ruchʼaʼäl Dios ya riʼ ri kantzij (Juan 17:17). Rma riʼ nqatäj qaqʼij rchë ütz ruksaxik nqaʼän che rä taq nq-el chutzjoxik (taskʼij ruwäch 2 Timoteo 2:15). Le Biblia ya riʼ ri nimaläj qasamajbʼal rchë nqakʼüt ri kantzij chrij Jehová, chrij Jesús chqä chrij Ruqʼatbʼäl Tzij Dios. Y rchë pa rubʼeyal nqaksaj, ri rutinamit Jehová ruyaʼon pä nikʼaj  chik samajbʼäl chqë rchë yojkitoʼ, y rchë riʼ nkʼatzin nqatamaj ütz ütz kiwäch. Chkë ri samajbʼäl riʼ xtqaʼij «samajbʼäl rchë nyaʼöx tjonïk» chkë.

3. a) Chkipan ri rukʼisbʼäl taq qʼij ri yoj kʼo komä, ¿achkë nkʼatzin nqaʼän? b) Achiʼel nuʼij Hechos 13:48, ¿achkë winäq ri kʼo chë yeqakanuj?

³ Ri publicaciones ye kʼo chpan ri samajbʼäl rchë nyaʼöx tjonïk xebʼan rchë yeqatjoj ri winäq chrij le Biblia. Ri chʼaʼäl tjonïk ntel chë tzij, chë pa rubʼeyal nqaqʼalajsaj jun tzij chwäch ri winäq rchë nqʼax pa rujolon chqä ke riʼ xtsmajij ri xtqakʼüt chwäch. Chkipan ri rukʼisbʼäl taq qʼij yoj kʼo komä, nkʼatzin nqayaʼ kitjonïk ri winäq chrij le Biblia chqä nqakʼüt ri kantzij chkiwäch. Riʼ ntel chë tzij chë kʼo chë nqatäj qaqʼij rchë yeqakanuj winäq ri nkajoʼ nkismajij ri nqä chwäch Dios chqä nkajoʼ nkïl ri kʼaslemal chwäch ri kʼakʼakʼ Ruwachʼulew. We xtqaʼän riʼ xkeqatoʼ rchë xkeʼok rusamajelaʼ Jehová (taskʼij ruwäch Hechos 13:44-48).

4. ¿Achkë rubʼanik yeqïl ri winäq ri nkajoʼ nkismajij ri nqä chwäch Dios?

⁴ ¿Achkë rubʼanik yeqïl ri winäq ri nkajoʼ nkismajij ri nqä chwäch Dios? Achiʼel wä xbʼan pa naʼäy siglo, xkeqïl ri winäq riʼ we xtq-el chutzjoxik le Biblia. Rma riʼ nkʼatzin nqasmajij ri naʼoj xuyaʼ qa Jesús, ryä xuʼij: «Xa bʼa achkë tinamït o aldea xkixok wä, tikanuj kʼa ajän xtiwïl ri taqäl chrij» (Mateo 10:11, TNM). We jun winäq xa nnimirsaj riʼ o xa rma jun utzil nrajoʼ nqrkʼoxaj, nqʼalajin chë ma kantzij ta nrajoʼ nutamaj chrij Dios. Rma riʼ keqakanuj winäq ri nkiqasaj kiʼ chqä kantzij nkajoʼ nkitamaj ruwäch Dios. Tqayaʼ jun tzʼetbʼäl. Taq Jesús carpintero wä, xerukanuj ri utziläj taq cheʼ rchë xeruʼän ri mesas, puertas o xa bʼa achkë chik na jun. Ye kʼa rchë ütz xekanaj rusamaj xkʼatzin chë ütz ruksaxik xuʼän chkë rusamajbʼal. Röj chqä ke riʼ ütz nqaʼän. Naʼäy kʼo chë keqakanuj ri winäq ri nkajoʼ nkitamaj ruwäch Dios, chrij riʼ, ütz kiksaxik tqabʼanaʼ chkë ri samajbʼäl ye kʼo qkʼë rchë yeqatoʼ ri winäq (Mateo 28:19, 20).

5. Tatzjoj rkʼë jun tzʼetbʼäl achkë rubʼanik yeqaksaj ri samajbʼäl ye kʼo chpan ri samajbʼäl rchë nyaʼöx tjonïk (tatzʼetaʼ ri achbʼäl ye kʼo pä pa naʼäy che rä re tzijonem reʼ).

⁵ Jojun chkë ri samajbʼäl ye kʼo, kʼo jun rma ri xebʼan. Qchʼobʼon chkij ri samajbʼäl rchë carpintería ri rkʼë jubʼaʼ xeruksaj Jesús * (tatzʼetaʼ ri nota). Kʼo jojun xeruksaj rchë xeretaj o rchë xuyaʼ ketal ri cheʼ; jojun chik, rchë xeruqpij, xeruʼän jül o rchë xuyaʼ kibʼanik ri cheʼ; y jojun chik, rchë xuʼän jïk chkë o rchë xerutzʼäm. Ke riʼ bʼaʼ chqä komä, jojun chkë ri samajbʼäl ri yaʼon pä chqë rchë yeqatjoj ri winäq kʼo jun rma ri xebʼan pä. Rma jontir ri samajbʼäl riʼ janina kiqʼij, tqatzʼetaʼ achkë rubʼanik yeqaksaj.

6, 7. a) ¿Achkë rubʼanik yeʼaksan rït ri tarjetas ri yarutäq pa jw.org? b) ¿Achkë kaʼiʼ rusamaj nuʼän ri wuj rchë yeqaʼän invitar ri winäq pa qamoloj?

⁶ Ri tarjetas ri yarutäq pa jw.org. Tapeʼ re samajbʼäl reʼ xa ye koköj ok, janina yekʼatzin chqë rchë nqaʼij chkë ri winäq yoj achkë riʼ röj chqä rchë yeqatäq pa jw.org. Chpan ri página riʼ, ri winäq xtkitamaj más chqij röj chqä xkekowin xtkikʼutuj jun kitjonïk chrij le Biblia. Komä, más ye 400 mil winäq kikʼutun kitjonïk chrij le Biblia pa jw.org. ¡Y ronojel qʼij kan pa ciento winäq yekʼutun rchë! Rma riʼ, ronojel mul tqakʼwaj ri tarjetas riʼ qkʼë, ke riʼ xtqkowin xtqatzjoj le Biblia xa bʼa akuchï yoj kʼo wä.

⁷ Ri wuj rchë yeqaʼän invitar ri winäq pa qamoloj. Ri wuj riʼ kaʼiʼ rusamaj nuʼän. Nuʼij chkë ri winäq chë tkitjoj kiʼ qkʼë chrij le Biblia chqä chë ri tjonïk riʼ xtkïl we xkebʼä qkʼë  pa moloj o we xtqayaʼ jun kitjonïk pa kiyonïl. Achiʼel nqatzʼët, re samajbʼäl reʼ ma xa xuʼ ta nuʼij chkë ri winäq yoj achkë riʼ röj, chqä yeruʼän invitar ri winäq ri nkajoʼ nkitamaj ruwäch Dios chë tkitjoj kiʼ qkʼë chrij le Biblia (Mateo 5:3). Kantzij na wä, xa bʼa achkë winäq ütz napon pa qamoloj tapeʼ ma nrajoʼ ta jun rutjonïk pa ruyonïl. We ryeʼ yeʼapon pa qamoloj, xtkitzʼët chë kan kʼïy xtkitamaj chrij le Biblia.

8. ¿Achkë rma janina ruqʼij chë ri winäq yeʼapon pa qamoloj tapeʼ xa jmul? Tayaʼ jun tzʼetbʼäl.

⁸ Janina ruqʼij chë ma nikʼo ta qakʼuʼx nqaʼij chkë ri winäq chë keʼapon pa qamoloj tapeʼ xa jmul. ¿Achkë rma? Ke riʼ xtkitzʼët chë ri testigos de Jehová ma yoj junan ta kikʼë ri nikʼaj chik religiones. Röj nqakʼüt ri kantzij chrij le Biblia chqä yeqatoʼ ri winäq rchë nkitamaj ruwäch Dios (Isaías 65:13). Ya riʼ xbʼanatäj kikʼë jun kʼulaj winäq aj Estados Unidos ri kibʼiniʼan Ray y Linda. Ryeʼ nkinmaj wä chrij Dios chqä nkinaʼ wä chë nkʼatzin yebʼä pa jun iglesia rchë nkitamaj más ruwäch. Rma riʼ xkiyaʼ chkiwäch chë nkisolij jontir iglesias ri ye kʼo pa kitinamit. Tapeʼ kan ye kʼïy iglesias chqä religiones ye kʼo, ryeʼ xkiyaʼ chkiwäch chë ma xa bʼa achkë ta iglesia xkekanaj wä. Xkiʼij chë xkekanaj chpan jun ri kan kʼo xtkitamaj chpan chqä chë ri winäq ri yebʼä chpan ri iglesia riʼ kan nkikʼüt rkʼë rubʼanik nkiwäq kiʼ chë kan nkiyaʼ wä ruqʼij Dios. Pa jun kayoxiʼ junaʼ, ryeʼ xkisolij jontir iglesias ri ye kʼo pa kitinamit. Ye kʼa janina xebʼison rma majun xkitamaj ta y ri winäq ri yebʼä pa taq iglesias riʼ kan itzel rubʼanik nkiwäq kiʼ. Taq xeʼel äl chpan ri rukʼisbʼäl iglesia ri kibʼin wä chë yebʼä, ya Linda xbʼä pa rusamaj y Ray xtzolin chrachoch. Taq Ray bʼenäq wä pa bʼey, xqʼax chwäch jun Salón del Reino chqä xuchʼöbʼ qa: «Yinok na kʼa aweʼ y ntzʼët achkë nkiʼän». Ray kan xqä chwäch ri xutzʼët. Jontir ri qachʼalal kan jaʼäl kinaʼoj xkiʼän rkʼë chqä kan jaʼäl rubʼanik kiweqon äl kiʼ. Ray kʼa chwäch xebʼetzʼyeʼ wä y kan xqä chwäch ri xtamaj. Kan xbʼanatäj achiʼel xuʼij ri apóstol Pablo chrij ri winäq ri napon naʼäy mul pa jun moloj y nuʼij: «Kantzij na wä chë Dios kan kʼo chikojöl rïx» (1 Corintios 14:23-25). Chrij riʼ, Ray ronojel domingos xbʼä pa taq moloj, jubʼaʼ chik chrij riʼ xbʼä pa taq moloj ri yebʼan chkojöl qʼij. Ri rixjayil xbʼä chqä rkʼë. Tapeʼ más chik 70 kijunaʼ, chë kaʼiʼ xkichäp jun tjonïk chrij le Biblia chqä xeqasäx pa yaʼ.

9, 10. a) ¿Achkë rma ma kʼayewal ta kiksaxik ri tratados? b) Tatzjoj achkë rubʼanik nqaksaj ri wuj ¿Achike ri Rajawaren o ru-Reino ri Dios?

⁹ Ri tratados. Ye kʼo 8 tratados ri yojkitoʼ rchë ma kʼayewal ta nqachäp tzij kikʼë ri winäq. Kan pa 2013, ri junaʼ ri xeʼel pä ri tratados riʼ, yebʼanon imprimir jun 5 mil millones. Ri ütz chkë re wuj reʼ ya riʼ chë xa rkʼë nqatamaj nqaksaj jun, ya nqkowin yeqaksaj ri nikʼaj chik, rma xa junan kibʼanik bʼanon pä. ¿Achkë rubʼanik yeqaksaj re wuj reʼ rchë nqachäp tzij kikʼë ri winäq?

¹⁰ Tqabʼanaʼ che rä chë nqajoʼ nqaksaj ri tratado ¿Achike ri Rajawaren o ru-Reino ri Dios? Ütz nqakʼüt apü ruwäch ri tratado y nqaʼij che rä ri winäq: «¿Kʼo jmul akʼutun qa chawäch rït achkë riʼ ru-Reino ri Dios? ¿Achkë chkë re oxiʼ naʼoj ye kʼo aweʼ naʼij rït chë ya riʼ ruqʼalajsaxik ri kʼutunïk?». Xa bʼa achkë xtuʼij pä ri winäq, tqajaqaʼ ri tratado y tqakʼutuʼ ri peraj «Ri Loqʼoläj Wuj nubʼij». Chrij riʼ tqaskʼij Daniel 2:44 chqä Isaías 9:6 ri yaʼon pä chwäch ri tratado. We ütz nuʼän, qtzjon qa más rkʼë ri winäq. Pa rukʼisbʼäl tqakʼutuʼ qa chwäch ri kʼutunïk kʼo kʼa chrij ri tratado chpan ri peraj «Takʼutuj qa chawäch reʼ»: «¿Achike rubʼanik xtubʼän ri kʼaslem toq ja ri Rajawaren ri Dios ri xtqʼaton tzij pa qawiʼ?». Ke riʼ qataman chik achkë xtqatzjoj rkʼë ri winäq taq xtqakamluj ruchʼbʼexik. Taq xtqaʼän  riʼ, ütz nqaksaj ri lección 7 rchë ri wuj Ri utziläj taq rutzijol yeruyaʼ ri Tataʼixel. Re wuj reʼ jun chkë ri samajbʼäl rchë yeqayaʼ tjonïk chrij le Biblia.

11. ¿Achkë rma yebʼan pä ri revistas, chqä achkë kʼo chë nqatamaj naʼäy?

¹¹ Ri revistas. Ri wuj La Atalaya chqä ¡Despertad! ya riʼ ri revistas ri yeqʼaxan pa más chʼaʼäl chqä más kʼïy yejachon chwäch jontir le Ruwachʼulew. Rma jalajöj kiwäch ri winäq yeskʼin kichë, ri temas yeyaʼon pä chkiwäch bʼanon pä rchë chë ri winäq nkajoʼ nkitamaj más. Rma riʼ keqaksaj ri revistas rchë yeqatoʼ ri winäq rchë nqʼax chkiwäch achkë kʼo más ruqʼij pa qakʼaslemal komä. Ye kʼa naʼäy kʼo chë nqatamaj achoq chkë bʼanon wä pä La Atalaya y achoq chkë bʼanon wä pä ri ¡Despertad!

12. ¿Achoq chkë bʼanon wä pä ri ¡Despertad!, chqä achkë rma xbʼan pä?

¹² Ri revista ¡Despertad! bʼanon pä chkë winäq ri kitaman jubʼaʼ o kan majun kitaman ta chrij le Biblia. Rkʼë jubʼaʼ ma kitaman ta achkë xukʼüt qa Jesús, ma kan ta nkikʼuqbʼaʼ kikʼuʼx chkij ri religiones o ma kitaman ta chë le Biblia yeruyaʼ pixaʼ ri yekʼatzin pa qakʼaslemal komä. Jun rma ri bʼanon pä re revista reʼ ya riʼ yerutoʼ ri winäq rchë nkinmaj chë kʼo Dios (Romanos 1:20; Hebreos 11:6). Chqä yerutoʼ rchë nkikʼuqbʼaʼ kikʼuʼx chë le Biblia ya riʼ Ruchʼaʼäl Dios (1 Tesalonicenses 2:13). Ri oxiʼ temas ri kikʼamon pä ri ¡Despertad! rchë ri junaʼ 2018 ya riʼ: «El camino de la felicidad», «12 claves para una familia feliz» chqä «Ayuda para quienes están de duelo».

13. ¿Achoq chkë bʼanon wä pä La Atalaya rchë nyaʼöx chkë ri winäq?

¹³ Ri revista La Atalaya rchë nyaʼöx chkë ri winäq, nuqʼalajsaj ri naʼoj ye kʼo chpan le Biblia chkiwäch ri winäq ri, tapeʼ kitaman jubʼaʼ chrij Dios chqä chrij Ruchʼaʼäl, ma kan ta nqʼax chkiwäch ri naʼoj ye kʼo chpan (Romanos 10:2; 1 Timoteo 2:3, 4). Ri oxiʼ temas ri kikʼamon pä La Atalaya rchë nyaʼöx chkë ri winäq rchë ri junaʼ 2018, nkiqʼalajsaj re oxiʼ kʼutunïk reʼ: «¿Sigue siendo útil la Biblia?», «¿Qué encierra el futuro?» chqä «¿Piensa Dios en usted?».

14. a) ¿Achkë yerutoʼ wä ri winäq ri kajiʼ videos ri ye kʼo chpan ri samajbʼäl rchë nyaʼöx tjonïk? b) ¿Achkë experiencias awilon rït rma yeʼaksan ri videos riʼ?

¹⁴ Ri videos. Pa ruqʼij qa Jesús, ri carpinteros xa xuʼ wä samajbʼäl rkʼë qʼabʼaj yekiksaj. Ye kʼa komä, ri carpinteros kʼo chik samajbʼäl kikʼë ri yesamäj rkʼë luz, achiʼel ri yeruqpij cheʼ, ri yerubʼajij laʼux o achkë chik na jun. Ke riʼ chqä xbʼanatäj kikʼë ri publicaciones, ojer qa xa xuʼ wä wuj ye kʼo qkʼë, ye kʼa komä ye kʼo utziläj taq videos ri yojkitoʼ. Kajiʼ chkë ri videos riʼ ye kʼo chpan ri samajbʼäl rchë nyaʼöx tjonïk. Ri videos riʼ ya riʼ: ¿Achike ruma nqatijoj qiʼ chi rij ri Loqʼoläj Wuj?, ¿Achike rubʼanik jun tijonïk chi rij ri Loqʼoläj Wuj?, ¿Achike nbʼan ri pa qamolojriʼïl? chqä ¿Achike ri testigos de Jehová? Jojun chkë re videos reʼ kan ütz yeqaksaj taq nqtzjon naʼäy mul rkʼë jun winäq, ye kʼa jojun chik rkʼë jubʼaʼ ütz yeqaksaj taq nqaʼän revisitas. Re utziläj taq samajbʼäl reʼ yekitoʼ ri winäq rchë nkajoʼ nkitjoj kiʼ chrij le Biblia chqä yebʼä pa qamoloj.

15. Tatzjoj rkʼë jun tzʼetbʼäl ri rubʼanik yerutoʼ ri winäq taq nkitzʼët ri videos pa kichʼaʼäl.

¹⁵ Tqatzʼetaʼ rkʼë jun tzʼetbʼäl achkë rubʼanik yekitoʼ ri winäq ri videos. Jun qachʼalal ixöq xukʼüt ri video ¿Achike ruma nqatijoj qiʼ chi rij ri Loqʼoläj Wuj? chwäch jun ixöq aj Micronesia ri nchʼö yapés. Taq xchapatäj ri video, ri ixöq xuʼij: «¡Kan ma nnmaj ta chë kan pa  nchʼaʼäl kʼo wä! Ri achï ri ntzjon pä chriʼ kan achiʼel yetzjon ri nuwinaq chpan ri nu-isla kan ke riʼ ntzjon. ¡Kan pa nchʼaʼäl rïn ntzjon wä!». Ri ixöq riʼ xuʼij che rä qachʼalal chë xtskʼij chqä xttzʼët jontir ri kʼo chpan ri jw.org chpan ri chʼaʼäl yapés (tajnamaj rkʼë Hechos 2:8, 11). Jun chik tzʼetbʼäl. Jun qachʼalal ixöq aj Estados Unidos xutäq ri video riʼ che rä ruchʼutiʼal ri kʼo jukʼan chik tinamït. Taq ruchʼutiʼal xutzʼët pa ruchʼaʼäl ri video riʼ, xuʼij reʼ che rä ruchʼututeʼ chpan jun correo electrónico: «Kan xel nkʼuʼx xintzʼët ri peraj ri nuʼij chë ri itzel winäq kan ruyaʼon ruchqʼaʼ pa ruwiʼ le Ruwachʼulew. Xinkʼutuj äl jun ntjonïk chrij le Biblia». Ri ruchʼutiʼal ri qachʼalal riʼ kʼo chpan jun tinamït ri akuchï ma nyaʼöx ta qʼij chkë ri qachʼalal nkitzjoj le Biblia.

16. Tatzjoj achkë rma xebʼan pä re folletos reʼ: a) Tawakʼaxaj ri Tataʼixel, ke riʼ xtawïl akʼaslem man kʼisel ta. b) Ri utziläj taq rutzijol yeruyaʼ ri Tataʼixel. c) ¿Achike yebʼanon rurayibʼal ri Jehová wakami?

¹⁶ Ri folletos. We jun winäq ma kan ta retaman nskʼij ruwäch wuj o majun ta publicaciones pa ruchʼaʼäl, ¿achkë rubʼanik xtqakʼüt ri kantzij chrij le Biblia chwäch? Ri folleto Tawakʼaxaj ri Tataʼixel, ke riʼ xtawïl akʼaslem man kʼisel ta janina xtqrtoʼ * (tatzʼetaʼ ri nota). Jun chik utziläj samajbʼäl rchë nqachäp tjonïk chrij le Biblia ya riʼ ri folleto Ri utziläj taq rutzijol yeruyaʼ ri Tataʼixel. Ütz nqakʼüt chwäch ri winäq ri 14 temas ri kʼo kʼa chrij ri folleto chqä tqakʼutuj che rä achkë tema más xqä chwäch. Chrij riʼ tqachapaʼ runukʼuxik ri lección riʼ rkʼë. ¿Qabʼanon riʼ taq yeqaʼän qa revisitas? Ri rox folleto ri kʼo chpan ri samajbʼäl rchë nyaʼöx tjonïk ya riʼ ¿Achike yebʼanon rurayibʼal ri Jehová wakami? Ri folleto riʼ bʼanon pä rchë chë ri tijoxelaʼ nkitamaj ruwäch rutinamit Jehová. Rchë nqatamaj achkë rubʼanik nqaksaj ri folleto riʼ, ütz nqatzʼët ri wuj Qakʼaslem chuqaʼ Qasamaj Röj ri Nimanelaʼ. Wuj richin Qasamaj, rchë marzo 2017.

17. a) ¿Achkë rma xebʼan pä jojun chkë ri libros rchë tjonïk? b) ¿Achkë kʼo chë nkiʼän jontir tijoxelaʼ tapeʼ xeqasäx yän pa yaʼ, chqä achkë rma?

¹⁷ Ri libros. We rkʼë jun folleto xqachäp wä jun tjonïk chrij le Biblia, xa bʼa achkë peraj yoj kʼo wä, ütz nqqʼax chpan ri libro ¿Achike qas nukʼüt ri Biblia? Rkʼë re samajbʼäl reʼ, ri tijoxelaʼ xtkitamaj más chkij ri naʼoj ye kʼo chpan le Biblia. We ri tijoxel xkʼïs yän rutjonïk rkʼë re libro reʼ y nqʼalajin chë najin nkʼuqeʼ pä rukʼuʼx pa ruchʼaʼäl Dios, ütz nqachäp ri libro «Kixkʼojeʼ chupam rajowabʼäl ri Dios» rkʼë. Re libro reʼ xtutoʼ ri tijoxel rchë nretamaj yerusmajij pa rukʼaslemal ri naʼoj ye kʼo chpan le Biblia. Ma tqamestaj chë jontir tijoxelaʼ kʼo chë nkitjoj kiʼ rkʼë ri kaʼiʼ libros riʼ tapeʼ ya xeqasäx yän pa yaʼ, ke riʼ, xkekowïr más pa ruchʼaʼäl Dios (taskʼij ruwäch Colosenses 2:6, 7).

18. a) Achiʼel nuʼij chpan 1 Timoteo 4:16, ¿achkë kʼo chë nqaʼän, chqä achkë utzil xtukʼän pä? b) ¿Achkë rma nkʼatzin chë pa rubʼeyal yeqaksaj ri samajbʼäl rchë nyaʼöx tjonïk?

¹⁸ Röj, ri testigos de Jehová, kʼo chë nqatzjoj Ruchʼaʼäl Dios chkë ri winäq rchë chë ryeʼ chqä xtkïl ri kʼaslemal ma nkʼis ta (Colosenses 1:5; taskʼij ruwäch 1 Timoteo 4:16). Rchë nqkowin nqaʼän riʼ, yaʼon pä ri samajbʼäl rchë nyaʼöx tjonïk chqë (tatzʼetaʼ ri recuadro « Ri samajbʼäl rchë nyaʼöx tjonïk»). Rma riʼ ütz kiksaxik keqabʼanaʼ. Jojun publicador kʼo chë nutzʼët achkë samajbʼäl nuksaj chqä ajän nuksaj. Ye kʼa ma tqamestaj ta chë ri qasamaj ma ya riʼ ta yeqajäch wuj. Chqä ma tqayaʼ ta qa chkë ri winäq ri ma nkajoʼ ta yojkikʼoxaj. Ri qasamaj yaʼon ya riʼ yeqatoʼ ri winäq ri ütz kinaʼoj chqä nkiqasaj kiʼ rchë yeʼok rutzeqelbʼëy Jesús (Hechos 13:48; Mateo 28:19, 20).