1, 2. (a) Ewe utom ke Jesus akada nte ata akpan utom, ntak-a? (b) Nso ke ana inam man inam utom emi Abasi ọdọn̄de nnyịn ọfọn?

JESUS CHRIST ekedi kapenta, afiak edi ọkwọrọikọ. (Mark 6:3; Rome 15:8) Enye ama ọdiọn̄ọ utom mbiba emi etieti. Ini enye edide kapenta, enye ama ọdiọn̄ọ ndida n̄kpọutom mme kapenta nnam eto edi ata ndiye n̄kpọ. Ini enye ekpepde mme owo Ikọ Abasi, enye ama ada ifiọk Ikọ Abasi emi enye ekenyenede anam Ikọ Abasi enen̄ede an̄wan̄a mme owo. (Matt. 7:28; Luke 24:​32, 45) Ini enye esịmde isua 30, enye ama ọkpọn̄ utom kapenta ọtọn̄ọ ndikwọrọ ikọ sia enye ama ọdiọn̄ọ ke utom enye oro ọfọn akan. Enye ọkọdọhọ ke ntak kiet emi Abasi ọkọdọn̄de imọ idi isọn̄ ekedi man idikwọrọ eti mbụk Obio Ubọn̄ Abasi. (Matt. 20:28; Luke 3:23; 4:43) Jesus akada ndikwọrọ ikọ ye ndikpep owo n̄kpọ ke ata akpan n̄kpọ, enye ama onyụn̄ oyom mbon en̄wen ẹtiene ẹnam utom emi.​—Matt. 9:​35-38.

² Ata ediwak nnyịn idịghe kapenta, edi kpukpru nnyịn idi mme ọkwọrọ eti mbụk. Utom emi edi ata akpan utom sia Abasi enyene ubọk ke esịt. Nnyịn idi “nsan̄autom Abasi.” (1 Cor. 3:9; 2 Cor. 6:4) Imokụt ke “ofụri ikọ [Jehovah] edi akpanikọ.” (Ps. 119:​159, 160) Oro anam idomo nte ikekeme ‘nditịm nsiak ikọ akpanikọ’ ke ini ikwọrọde ikọ inyụn̄ ikpepde mme owo n̄kpọ. (Kot 2 Timothy 2:15.) Ntre ana ika iso idomo ndidiọn̄ọ nte ikpadade Bible inam utom emi sia enye edi ata akpan n̄kpọ emi isidade inam mme owo ẹnen̄ede ẹdiọn̄ọ Jehovah, Jesus, ye Obio Ubọn̄ Abasi. Esop  Jehovah ẹnọ nnyịn mme n̄kpọ en̄wen ẹdian do, emi ẹdin̄wamde nnyịn inam utom emi ọfọn, edi ana inen̄ede idiọn̄ọ nte ididade mmọ inam n̄kpọ. Mme n̄kpọ emi ẹsịne ke otu mme akpan n̄kpọutom nnyịn.

3. Nso ikpenen̄ede ibehe nnyịn ke ekpri ini emi inyenede ndida n̄kwọrọ ikọ? Utom 13:48 owụt ke ikpoyom nso utọ mme owo?

³ Mme akpan n̄kpọutom nnyịn ẹsin̄wam nnyịn ikwọrọ ikọ inyụn̄ ikpep mme owo n̄kpọ. Ndikwọrọ ikọ ọwọrọ ndinam ẹfiọk akpan etop; ndikpep owo n̄kpọ ọwọrọ ndinam etop oro odụk owo esịt man enye ananam se enye okopde. Se ikpenen̄erede ibehe nnyịn ke ekpri ini emi inyenede ndida nnam utom emi ekpedi nditọn̄ọ ukpepn̄kpọ Bible nnyụn̄ n̄kpep mme owo akpanikọ. Emi ọwọrọ ke ana isịn idem iyom kpukpru mbon oro “ẹnyenede eti esịt oro edinamde mmọ ẹnyene nsinsi uwem” inyụn̄ in̄wam mmọ ẹdikpono Jehovah.​—Kot Utom 13:​44-48.

4. Idinam didie ikụt mbon oro “ẹnyenede eti esịt oro edinamde mmọ ẹnyene nsinsi uwem”?

⁴ Idikụt mbon oro “ẹnyenede eti esịt oro edinamde mmọ ẹnyene nsinsi uwem” ke ini ikwọrọde ikọ. Se mbon eyo mme apostle ẹkenyụn̄ ẹnamde edi oro. Ana inam se Jesus ọkọdọhọde ke Matthew 10:11 ete: “Ke obio m̀mê obio-in̄wan̄ ekededi eke mbufo ẹdụkde, ẹyom owo eke odotde ke esịt, ẹnyụn̄ ẹtie do tutu mbufo ẹnyọn̄ọ.” Nnyịn idorike enyịn ke mbon n̄kari, mbon ntan̄idem, m̀mê mbon oro mîyomke-yom ndidiọn̄ọ n̄kpọ ndomokiet mban̄a Abasi, ẹyenam se Bible ekpepde. Iyom mbon esịt akpanikọ, mbon emi ẹsụhọrede idem, ye mbon emi ọdọn̄de-dọn̄ mmọ ndidiọn̄ọ n̄kpọ mban̄a Jehovah. Se nnyịn inamde ebiet se ikerede ke Jesus ama esinam ini enye ekedide kapenta. Anaedi enye ama esika okoyom eti eto emi edifọnde se ẹdade ẹnam usụn̄ufọk, n̄kpọ mbanaufọk, ọkpọnọ, ye mme n̄kpọ eken. Enye ama okụt eti eto, enye ayada ifiọk esie ye n̄kpọutom esie anam mme n̄kpọ oro. Ana nnyịn n̄ko ibem iso iyom mbon oro ẹnyenede eti esịt, ekem ida ifiọk ye n̄kpọutom nnyịn in̄wam mmọ ẹdi mbet Jesus.​—Matt. 28:​19, 20.

5. Nso ke ana idiọn̄ọ iban̄a mme akpan n̄kpọutom nnyịn? Nam an̄wan̄a. (Se akpa ndise ibuotikọ emi.)

⁵ Kpukpru n̄kpọutom ẹnyene utom. Ẹyak ise ndusụk n̄kpọ emi ikerede ke Jesus ama akama anam utom. * Ekeme ndidi enye ama enyene n̄kpọ emi ẹsidade ẹdomo eto, enye emi ẹdade ẹnịm idiọn̄ọ, ẹsịbe, ẹtịbi odudu, ẹnam fansi, ẹdomo ẹse m̀mê enen, ye enye emi ẹdade ẹkọn̄ eto ẹdian kiet. Mme n̄kpọ emi ẹsịnede ke otu mme akpan n̄kpọutom nnyịn ẹnyene utom n̄ko. Ẹyak ise se ikemede ndida mmọ kiet kiet nnam.

6, 7. (a) Didie ke afo esinọ mme owo kad jw.org? (b) Nso ye nso ke isida n̄wedikot mbono esop nnyịn inam?

⁶ Kad jw.org. Kad emi ikponke, edi imekeme ndida enye nnam mme owo ẹdiọn̄ọ nnyịn ye ikpehe Intanet nnyịn. Mme owo ẹkeme ndika n̄kokot mban̄a nnyịn ke ikpehe Intanet nnyịn, ẹnyụn̄ ẹkeme ndida do ndọhọ ẹdikpep mmimọ Bible. Tọn̄ọ mme owo ẹkekeme ndida do ndọhọ ẹdikpep mmimọ Bible, se ibede owo 400,000 ẹnam ntre, ediwak mbon en̄wen ke ẹnyụn̄ ẹnam ntre kpukpru usen. Emekeme ndikama kad emi idem ifan̄ ini akade n̄kpọ man ekeme ndinọ owo edieke enyenede ifet ọkwọrọ ikọ.

⁷ N̄wedikot. Nnyịn isidaha n̄wedikot emi ikot mme owo mbono esop kpọt. Ẹwet ntem ke n̄wedikot oro: “Mbọk di di kpep Bible ye Mme Ntiense Jehovah.” Ẹwụt do ke  owo ekeme ndimek ndidi ndikpep Bible ke mbono esop nnyịn mîdịghe nnyịn ikekpep enye ke ufọk esie. Ntre imesida n̄wedikot emi inam mme owo ẹdiọn̄ọ nnyịn, inyụn̄ ida ikot mbon oro “ẹkerede ẹban̄a unana mmọ ke n̄kan̄ eke spirit” ẹdikpep Bible. (Matt. 5:3) Edi owo osụk ekeme ndidụk mbono esop nnyịn m̀mê enye enyịme ikpep enye Bible m̀mê inyịmeke. Edieke enye edide, enye eyekpep ekese n̄kpọ ke Bible.

8. Ntak emi ọfọnde ika iso ikot mme owo mbono esop nnyịn, ọkpọkọm edi usen kiet? Nọ uwụtn̄kpọ.

⁸ Ọfọn ika iso ikot mme owo mbono esop nnyịn, ọkpọkọm edi usen kiet, sia emi ayanam mmọ ẹkụt ke Mme Ntiense Jehovah kpọt ẹkpep se isịnede ke Bible ẹnyụn̄ ẹn̄wam mme owo ẹdiọn̄ọ Abasi. (Isa. 65:13) Se Ray ye Linda an̄wan esie ke United States ẹkekụtde edi oro isua ifan̄ emi ebede. Mmọ ẹma ẹbiere nditọn̄ọ ufọkabasi. Mmọ ẹma ẹnịm ke Abasi do, ke edi se ikperede enye. Ntre mmọ ẹma ẹbiere ndika kpukpru ufọkabasi ke edem mmọ mbemiso ẹmekde enye emi mmọ ẹdidụkde. Ufọkabasi ama awak etieti, edi enyene n̄kpọ iba emi mmọ ẹkeyomde. Akpa, akana osụk enyene se mmọ ẹkpepde, ọyọhọ iba, ana mbon ufọkabasi oro ẹsịne n̄kpọ nte nditọ Abasi. Mmọ ẹma ẹsan̄a ke nsio nsio ufọkabasi ke ediwak isua tutu ẹka kpukpru ufọkabasi ke edem mmọ ẹma. Mmọ ikekpepke n̄kpọ ndomokiet, ikonyụn̄ ikwe mbon ufọkabasi ẹsịnede n̄kpọ nte nditọ Abasi. Usen emi mmọ ẹwọrọde ke akpatre ufọkabasi emi mmọ ẹkekade, Linda ama oto do aka itieutom, Ray ebe ọnyọn̄ ufọk. Nte Ray awatde aka, enye ama okụt Ufọkmbono Obio Ubọn̄ onyụn̄ ọdọhọ ke esịt esie ete, ‘Yak ndụk n̄kese nte enye emi etiede.’ Se enye okokụtde ama enem enye tutu. Kpukpru owo do ẹketie ufan ufan ẹnyụn̄ ẹsịne ọfọn̄ nte nditọ Abasi. Ray eketie ke iso, ama onyụn̄ ama se enye okokopde. Okonyụn̄ etie nte se apostle Paul eketịn̄de ete ke akpa ini emi owo edide mbono esop nnyịn ke enye edidọhọ: “Ke akpanikọ Abasi odu ke otu mbufo.” (1 Cor. 14:​23-25) Tọn̄ọ usen oro, Ray ama odụk mbono esop kpukpru Sunday, ekem odụk kpukpru eke ufọturua. Linda ama etiene ọtọn̄ọ. Kpa ye oro mmọ ẹkebede isua 70, mmọ ẹma ẹnyịme ẹkpep mmimọ Bible ẹnyụn̄ ẹna baptism.

9, 10. (a) Nso inam emem utom ndida mme tract nnyịn n̄kwọrọ ikọ? (b) Tịn̄ nte ẹkemede ndida tract Nso Idi Obio Ubọn̄ Abasi? n̄kwọrọ ikọ.

⁹ Tract. Imenyene tract itiaita emi mîsọn̄ke ndida ntọn̄ọ ukwọrọikọ. Tọn̄ọ ke 2013 emi ẹketọn̄ọde ndisio mme tract emi, ẹmịn̄ n̄kpọ nte idem biliọn ition. Se ifọnde edi ke ama ọdọdiọn̄ọ nte ẹkpenọde owo tract emi kiet, ọyọdiọn̄ọ nte ẹnọde mbon eken sia ẹwet kpukpru mmọ ukem ukem. Didie ke ekeme ndida tract ntọn̄ọ nneme ye owo?

¹⁰ Yak idọhọ ke oyom ndinọ owo tract Nso Idi Obio Ubọn̄ Abasi? Wụt enye mbụme emi odude ke akpa page nyụn̄ bụp enye ete: “Ndi akananam emekere m̀mê Obio Ubọn̄ Abasi edi nso? Ndi ọkpọdọhọ ke . . . ?” Ekem wụt enye ibọrọ ita oro, dọhọ enye emek kiet. Enye ama emek, kûdọhọ enye m̀mê enen m̀mê inenke, kụbọde ka “Se Bible Etịn̄de” kowụt enye Daniel 2:44 ye Isaiah 9:6. Emekeme ndika iso ke nneme oro edieke enye enyenede ini. Ndien ke utịt, afo obụp enye mbụme emi odude ke “Kere Ise” emi ọdọhọde, “Uwem editie didie ke Obio Ubọn̄ Abasi?” Oro ayanam fi enyene se edifiakde ikeneme ye enye. Ama afiak aka, emekeme ndiwụt enye ọyọhọ ukpepn̄kpọ 7 ke n̄wed Eti Mbụk Emi Otode Abasi! emi isidade ikpep mme owo Bible.

11. Nso ke Enyọn̄-Ukpeme ye Ẹdemede! ẹdin̄wam nnyịn inam, edi nso ke ọfọn idiọn̄ọ iban̄a mme magazine emi?

¹¹ Magazine. Enyọn̄-Ukpeme ye Ẹdemede! ke ẹkabade ẹnyụn̄ ẹsuan ẹkan ke ofụri ererimbot. Sia edide ẹkot mmọ ke ediwak itie ke ererimbot, ẹsimek mme ibuotikọ ikpædem emi ẹdinemde ata ediwak owo. Akpana isida mmọ in̄wam mme owo ẹdiọn̄ọ ebiet emi mmọ ẹdikụtde nnennen ndausụn̄ ke uwem. Ọfọn idiọn̄ọ m̀mê ẹwet Enyọn̄-Ukpeme ẹnọ mmanie, m̀mê ẹnyụn̄ ẹwet Ẹdemede! ẹnọ mmanie man idiọn̄ọ utọ mbon oro idiyakde mmọ inọ.

12. (a) Ẹwet Ẹdemede! ẹnọ mmanie, ntak emi ẹwetde enye? (b) Didie ke akada Ẹdemede! an̄wam owo ndondo emi?

¹² Ẹwet Ẹdemede! ẹnọ mbon emi mîdiọn̄ọke n̄kpọ ndomokiet iban̄a Bible m̀mê emi ẹdiọn̄ọde ata ekpri. Ekeme ndidi mmọ idiọn̄ọke n̄kpọ ndomokiet iban̄a se mme Christian ẹnịmde, inen̄ekede ibuọt idem ke ido ukpono, mîdịghe idiọn̄ọke ke Bible enyene ufọn. Akpan ntak emi ẹwetde Ẹdemede! edi man ẹn̄wam owo enịm ke Abasi odu. (Rome 1:20; Heb. 11:6) Ntak efen edi man ẹn̄wam owo okụt ke Bible enen̄ede edi “ikọ Abasi.” (1 Thess. 2:13) Ibuotikọ ikpædem Ẹdemede! ita emi ẹsiode ke 2018 ẹdi: “Se Akpanamde Man Okop Inemesịt,” “N̄kpọ 12 Emi Ẹsinamde Ubon Enem,” ye “Se Idin̄wamde Mbon Emi Ẹfụhọde N̄kpa Owo Mmọ.”

13. (a) Ẹwet Enyọn̄-Ukpeme ofụri owo ẹnọ mmanie? (b) Didie ke akada enye an̄wam owo ndondo emi?

¹³ Ẹsida Enyọn̄-Ukpeme ofụri owo ẹnam Bible an̄wan̄a. Ẹwet enye ẹnọ mbon emi ẹdiọn̄ọde ke Abasi odu ẹnyụn̄ ẹmade Bible. Kpa ye ekemede ndidi mmọ ẹdiọn̄ọ Bible ekpri, se Bible etịn̄de inen̄ekede in̄wan̄a mmọ. (Rome 10:2; 1 Tim. 2:​3, 4) Mbụme ita emi ke ẹbọrọ ke ibuotikọ ikpædem ita emi ẹsiode ke 2018: “Ndi Bible Osụk Enyenyene Ufọn?,” “N̄kpọ Editie Didie ke Ini Iso?,” ye “Ndi Abasi Okụt Se Iwọrọde Fi?”

14. (a) Nso inam ẹsịn vidio inan̄ oro ke otu akpan n̄kpọutom nnyịn? (b) Didie ke akada mmọ an̄wam owo ndondo emi?

¹⁴ Vidio. Idahaemi ediwak n̄kpọutom mme kapenta ẹdidi eke ilektrik, utọ nte uyọkn̄kpọ, n̄kpọ utịbi ndudu, n̄kpọ ukọn̄n̄kpọ, n̄kpọ emi ẹsidade ẹnam eto ọdọnọ, ye ntre ntre eken. Ikesidịghe ntre ke eyo Jesus. Idahaemi imenyene mme vidio emi isiwụtde mme owo. Inan̄ ke otu oro, emi ẹsịnede ke otu mme akpan n̄kpọutom nnyịn ẹdi emi: Ntak Emi Ekpekpepde Bible?, Ẹsikpep Owo Bible Didie?, Nso ke Ẹsinam ke Ufọkmbono Obio Ubọn̄?, ye Nnyịn Mme Ntiense Jehovah Idi Mmanie? Ke otu vidio inan̄ emi, ọkpọfọn isiwụt mme owo enye emi mîyọhọke minit iba ini ikwọrọde ikọ, edi iwụt mbon emi ẹniọn̄de edieke owo enyenede ini mîdịghe ke ini ifiakde ika ibịne mbon oro ikọkwọrọde ikọ inọ. Mme vidio emi ẹkeme ndinam ọdọn̄ owo ndikpep Bible nnyụn̄ ndụk mbono esop nnyịn.

15. Nọ uwụtn̄kpọ ndiwụt ke owo ndise vidio nnyịn ke usem esie esitụk owo.

¹⁵ Yak inọ uwụtn̄kpọ. Sista kiet ama osobo mma kiet emi otode Micronesia edi edem mmọ. Mma oro esisem Yapese. Sista oro ama owụt enye Ntak Emi Ekpekpepde Bible? ke usem Yapese. Ini vidio oro ọtọn̄ọde ndibre, mma oro ama ọdọhọ ete: “Usem nnyịn edi emi. Ẹkpetetịn̄ ẹnọ mi n̄kpenịmke! Uyo ikọ esie ke nda ndiọn̄ọ ke enye oto edem nnyịn. Usem nnyịn ke enye esem oro!” Ke enye ama ekese vidio oro ama, enye ama ọdọhọ ke imọn̄ ika jw.org ikese kpukpru vidio inyụn̄ ikot kpukpru n̄wed nnyịn ke usem mmimọ. (Men Utom 2:​8, 11 domo.) Sista en̄wen ke United States ama  ọ-kọpi itie emi vidio oro esịnede ke usem mmọ ọnọ eyen eyeneka esie ke e-mail. Akparawa oro ama ese vidio oro, ekem ọnọ enye etop ke e-mail ete: “Itie oro ẹkedọhọde ke idiọk owo akara ererimbot emi ekenem mi akan. Mmọdọhọ ẹdikpep mi Bible.” Akparawa emi odụn̄ ke idụt emi ukara mîyakke inam n̄kpọ Abasi nte akpanade inam!

16. Tịn̄ ntak emi ẹkesiode: (a) Kpan̄ Utọn̄ Nọ Abasi Nyụn̄ Du Uwem ke Nsinsi. (b) Eti Mbụk Emi Otode Abasi! (c) Mmanie Ẹnam Uduak Jehovah Mfịn?

¹⁶ Ndiye n̄kpri n̄wed. Edieke osobode owo emi mînen̄ekede idiọn̄ọ ndikot n̄wed m̀mê emi n̄wed nnyịn mîdụhe ke usem mmọ, edinam didie ikpep enye akpanikọ? Da Kpan̄ Utọn̄ Nọ Abasi Nyụn̄ Du Uwem ke Nsinsi kpep enye. * Eti Mbụk Emi Otode Abasi! enen̄ede ọfọn se ẹdade ẹtọn̄ọ ukpepn̄kpọ Bible. Emekeme ndiwụt owo ibuotikọ 14 emi odude ke edem n̄wed oro onyụn̄ ọdọhọ enye emek enye emi enye amade akan. Tọn̄ọ ke ibuotikọ oro enye emekde do. Ndi ama anam se itịn̄de emi ini akafiakde aka ebịne owo emi ọkọkwọrọde ikọ ọnọ? Ekpri ediye n̄wed efen emi esịnede ke otu akpan n̄kpọutom nnyịn edi Mmanie Ẹnam Uduak Jehovah Mfịn? Ẹwet enye man ẹn̄wam nditọ ukpepn̄kpọ Bible nnyịn ẹdiọn̄ọ esop Jehovah. Se N̄wed Mbono Esop Uwem ye Utom Nnyịn Mme Christian, eke March 2017 man ọdiọn̄ọ nte akpadade n̄wed emi an̄wam eyen ukpepn̄kpọ fo.

17. (a) Tịn̄ akpan ntak emi ẹsiode nsio nsio n̄wed emi isidade ikpep owo Bible. (b) Nso ke kpukpru mbufa owo ẹkpenam idem ke mmọ ẹma ẹkena baptism, ntak-a?

¹⁷ N̄wed. Ke ama ọkọtọn̄ọ ndida ediye ekpri n̄wed n̄kpep owo n̄kpọ, emekeme ndikpụhọ n̄ka n̄wed Nso ke Bible Ekpep Nnyịn? ini ekededi emi okụtde ke ọfọn anam ntre. N̄wed enye emi ayanam enye enen̄ede ọdiọn̄ọ mme akpan n̄kpọ emi Bible ekpepde. Ama okụre n̄wed enye oro, ndien eyen ukpepn̄kpọ oro anam se enye ekpepde onyụn̄ aka iso esịn idem ke n̄kpọ Abasi, tọn̄ọ kpep enye n̄wed Du Uwem Emi Edinamde Abasi Ama Fi. * N̄wed emi ayan̄wam enye ọdiọn̄ọ nte enye akpadade item Bible odu uwem kpukpru usen. Idem ke enye ama akana baptism, kụt ete ke enye ekpep n̄wed mbiba emi ama. Oro ayan̄wam enye enen̄ede ọsọn̄ idem ke esop.​—Kot Colossae 2:​6, 7.

18. (a) Akpa Timothy 4:16 ọdọhọ ke nnyịn emi isikpepde akpanikọ ikpanam nso, ndien nso ufọn ke idibọ? (b) Nso ikpenen̄ede ibehe nnyịn ke ini iyomde ndida mme akpan n̄kpọutom nnyịn n̄kwọrọ ikọ?

¹⁸ Edi utom nnyịn Mme Ntiense Jehovah ndikwọrọ eti mbụk nnọ mme owo nnyụn̄ n̄kpep mmọ akpanikọ, sia emi edinam mmọ ẹnyene nsinsi uwem. (Col. 1:5; kot 1 Timothy 4:16.) Oro anam ẹnọ nnyịn mme akpan n̄kpọutom emi ẹdin̄wamde nnyịn inam utom emi. (Se ekebe emi, “ Mme Akpan N̄kpọutom Nnyịn.”) Akpana isịn idem ida mmọ inam utom emi adan̄a nte ikekeme. Asuanetop kiet kiet edibiere m̀mê ewe n̄wed ke otu akpan n̄kpọutom nnyịn ke ikpọnọ owo emi amade ukwọrọikọ, ye ini emi imọ ikpọnọde. Edi se ibehede nnyịn idịghe ndisan̄a nnọ owo n̄wed, nnyịn ikponyụn̄ iyakke n̄wed inọ mbon emi mîmaha ukwọrọikọ nnyịn. Akpan ntak emi ikwọrọde ikọ inọ mbon esịt akpanikọ, mbon emi ẹsụhọrede idem, ye mbon emi ọdọn̄de-dọn̄ mmọ ndidiọn̄ọ n̄kpọ mban̄a Jehovah edi man in̄wam mmọ ẹdi mbet Christ. Utọ mbon emi ‘ẹnyene eti esịt oro edinamde mmọ ẹnyene nsinsi uwem.’​—Utom 13:48; Matt. 28:​19, 20.