1, 2. (a) Na cakacaka cava e vakaliuca o Jisu, na vuna? (b) Ena vuavuaivinaka vakacava noda “cakacaka vata kei na Kalou”?

O JISU Karisito e matai, e italatala tale ga. (Mari. 6:3; Roma 15:8) E kenadau ena rua na cakacaka qori. Ni matai, e vulica na ivakavakayagataki ni iyaya ni cakacaka me taya kina na iyaya kau. Ni dau vunau, e maqosa ni vakayagataka nona kilaka vakaivolatabu me vukei ira na lewenivanua mera kila na ka dina ena Vosa ni Kalou. (Maciu 7:28; Luke 24:32, 45) E biuta na cakacaka vakamatai o Jisu ni sa yabaki 30, e kila ni bibi sara na nona cakacaka vakavunau. Ni vakamacalataka na vunautaki ni Matanitu ni Kalou, e kaya ni qo e dua na vuna e talai koya mai kina na Kalou. (Maciu 20:28; Luke 3:23; 4:43) E vakaliuca sara ga o Jisu na cakacaka vakaitalatala, e vinakata tale ga mera tomani koya eso tale.—Maciu 9:35-38.

² De dua eda sega ni matai, ia eda italatala ni itukutuku vinaka. E bibi na itavi qori ni vakaitavi kina na Kalou. Oya na vuna e tukuni kina nida “cakacaka vata kei na Kalou.” (1 Kor. 3:9; 2 Kor. 6:4) Eda kila ni ‘usutu ni vosa i Jiova na ka dina.’ (Same 119:159, 160) Eda vinakata gona meda “wasea vakadodonu na ivakavuvuli dina” ena cakacaka vakaitalatala. (Wilika 2 Timoci 2:15.) Na iVolatabu e iyaya ni cakacaka bibi duadua meda vakavulica kina na ka dina me baleti Jiova, Jisu, kei na Matanitu ni Kalou.  Eda na saga tiko ga meda maqosa nida vakayagataka. Na isoqosoqo i Jiova e vakarautaka eso tale na iyaya se ivukevuke me vuavuaivinaka kina noda cakacaka. E bibi meda kila vinaka na kedra ivakavakayagataki. Qori e vakatokai me iVukevuke ni Veivakavulici.

3. Na cava me noda isausau ena cakacaka vakaitalatala? Ena uqeti keda vakacava na Cakacaka 13:48?

³ De o na vaqaqa na vuna e vakatokai kina me iVukevuke ni Veivakavulici, sega ni iVukevuke ni Vunau. Na ibalebale ni “vunau,” oya meda vakarogoya e dua na itukutuku. Ia nida “veivakavulici,” eda vakamacalataka vakamatata e dua na itukutuku, me uqeta e dua me muria sara. Sa lekaleka na gauna meda vunau kina, me noda isausau gona me tauyavu e levu na vuli iVolatabu, meda vakavulica tale ga na ka dina. Meda vaqarai ira na yalomalumalumu era via “muria na sala mera bula tawamudu kina” da qai vukei ira mera qaravi Jiova.—Wilika Cakacaka 13:44-48.

4. Eda na kilai ira vakacava na yalomalumalumu era via “muria na sala mera bula tawamudu kina”?

⁴ Eda na kilai ira vakacava na yalomalumalumu era via “muria na sala mera bula tawamudu kina”? Me vaka ena imatai ni senitiuri, eda na qai kila ga qori nida vunau vua e dua. E bibi gona meda muria na ka e tukuna o Jisu: “Ena koro lelevu kece se koro lalai dou curu kina, dou vakasaqarai koya ena ciqomi kemudou kei na nomudou itukutuku.” (Maciu 10:11) Eda sega ni namaka mera kauaitaka na itukutuku vinaka na dauveidabui, dokadoka, se o ira na sega ni kauaitaka na ka vakayalo. Meda vaqarai ira na lomadina, yalomalumalumu, era via kila na ka dina. Na noda vaqaqara ena via vaka na ka e dau cakava o Jisu ni digia na kau veiganiti me taya kina na iyaya ni vale, katuba, ivua, se so tale na ka. Ni sa kunea na kau veiganiti, ena vakayagataka nona iyaya ni cakacaka kei na kila me ta iyaya kina. Nikua tale ga, eda na vaqarai ira na yalomalumalumu qai vakayagataka na iVukevuke ni Veivakavulici kei na noda kila vakaivolatabu meda vukei ira kina mera tisaipeli.—Maciu 28:19, 20.

5. Na cava meda nanuma tiko me baleta na iVukevuke ni Veivakavulici? Vakamacalataka. (Raica na imatai ni iyaloyalo.)

⁵ Na iyaya ni cakacaka kece e tiko na kedra yaga. Vakasamataka mada na iyaya vakamatai e dau vakayagataka o Jisu. * Ena tiko na iyaya me vakarautaka se makataka kina na kau, varota, qiva se tocia, vakatautauvatataka, vakadodonutaka qai vakota. E tiko tale ga na kedra yaga na veika e vakarautaki ena iVukevuke ni Veivakavulici. Meda dikeva mada qai vulica na kedra ivakavakayagataki.

6, 7. (a) O dau vakayagataka vakacava na JW Card? (b) Na cava e rua na sala e yaga kina na ivola ni veisureti ni soqoni?

⁶ JW Card. E ka lailai toka ga ia e vakarawarawataka nodra kilai keda na lewenivanua, ra dusimaki tale ga ina noda website. Era na vulica kina e levu tale na ka me baleti keda, rawa nira kerea mada ga mera vulica na iVolatabu. Me yacova mai qo, sa sivia ni 400,000 era kerea ena jw.org mera vulica na iVolatabu. E ciqomi e veisiga e drau vakacaca na kerekere! E vinaka gona mo kauta tiko e vica na JW Card ena veisiga, mo rawa ni vakayagataka ena gauna veiganiti.

⁷ iVola ni Veisureti. E rua na sala e yaga kina na noda ivola ni veisureti ni soqoni. E tukuni kina: “O sureti mo vuli iVolatabu kei keimami na iVakadinadina i Jiova.” Sa qai  tukuni na kena iwalewale me digitaki, dua e caka ‘ena noda soqoni’ se ‘me dua sara ga e tuberi ira ena iVolatabu.’ E yaga gona na ivukevuke qo mera kilai keda kina na lewenivanua, e sureti ira tale ga na “kauaitaka nodra bula vakayalo” mera vulica na iVolatabu. (Maciu 5:3) Era sureti kece na lewenivanua ina noda soqoni ke ra mani vulica na iVolatabu se sega. Nira gole yani, era na vulica e levu na ka ena iVolatabu.

8. Na cava e bibi kina mera gole mai na soqoni na lewenivanua, ke mani vakadua mada ga? Tukuna e dua na ivakaraitaki.

⁸ E bibi meda sureti ira tiko ga na lewenivanua ina soqoni, ke ra mani gole mada ga yani vakadua. Na vuna? Era na kila kina nida vakavulica tiko na iVakadinadina i Jiova na ka dina, eda vukea tale ga e levu mera kila na Kalou. Qori na ka e sega ni cakava tiko o Papiloni na ka Levu. (Aisea 65:13) Erau talanoataka e dua na veiwatini mai Merika na ka e yaco ena vica na yabaki sa oti, na yacadrau o Ray kei Linda. Dua na siga, rau nanuma me rau sa lai lotu. Rau vakabauta ni bula na Kalou, rau kauaitaka tale ga na ka vakayalo. Erau mani gole ina valenilotu kece ena siti rau tiko kina, dua na ka na levu ni lotu. E rua na ka rau vinakata ena lotu me rau na lewena. Kena imatai, me rau vulica e dua na ka ena gauna ni lotu. Kena ikarua, me laurai ena nodra isulusulu nira qarava tiko na Kalou. Vica vata na yabaki nodrau cakava tiko qo ni levu na matalotu. Erau rarawa ni rau sega ni vulica e dua na ka, e sega tale ga ni rakorako nodra isulusulu na lewenilotu. Ni rau biubiu mai na iotioti ni lotu, e lesu i vale o Ray qai gole i cakacaka o Linda. E raica sara o Ray na Vale ni Soqoni, e nanuma me lai rai mada ga se na vakacava tu. E marautaka dina na ka e raica! Era veikauaitaki kece, e rakorako tale ga na nodra isulusulu. E dabe sara o Ray ena iyatu dabedabe e liu qai marautaka na ka e vulica! Eda vakasamataka kina na ka e tukuna na yapositolo o Paula ni dua e gole yani ena imatai ni gauna ena soqoni qai tukuna: “E tiko dina kei kemuni na Kalou.” (1 Kor. 14:23-25) E tekivu soqoni o Ray ena Sigatabu kece, gole tale ga ena lomanimacawa, oti sa qai tomani koya o Linda. Rau sa yabaki 70 vakacaca tiko ni rau vulica na iVolatabu, rau papitaiso sara.

9, 10. (a) Na cava e rawarawa kina me vakayagataki na tikidua? (b) Me vakayagataki vakacava na tikidua Na cava na Matanitu ni Kalou?

⁹ Tikidua. E vakarautaki e walu noda tikidua me vakarawarawataka na kena tekivu na veivosaki. A sevutaki e vica ena 2013 qai tabaki na kena vo ni toso na gauna. Nikua sa tabaki oti e rauta ni lima na bilioni! E tautauvata na ituvatuva ni ka e volai kina. Ni o kila gona na ivakavakayagataki ni dua na tikidua, sa na rawa ni o vakayagataka na kena vo. O na tekivutaka vakacava na veivosaki ena tikidua qo?

¹⁰ Kaya mada ke o vakayagataka na tikidua Na cava na Matanitu ni Kalou? Vakaraitaka na taro ena waqana e liu qai taroga: “O bau vaqaqa tu se cava na Matanitu ni Kalou? O na tukuna ni . . . ?” Vakaraitaka sara na tolu na isaunitaro, me qai digia na kena e nanuma. Kua ni tukuna ke donu se cala nona isaunitaro, cega sara na ulutaga e loma “Ka e Kaya na iVolatabu,” qai wilika na kena tikinivolatabu, oya na Taniela 2:44 kei na Aisea 9:6. Tomana na veivosaki ke rawa. Tinia nomu ivakamacala ena taro ena waqana e muri, ena ulutaga “Vakasamataka Mada”: “Ena vakacava tu mada na bula ni sa veiliutaki na Matanitu ni Kalou?” Qori sara ga na yavu ni veisiko tarava. Ni o sikovi koya tale, o rawa ni vakaraitaka na  lesoni 7 ena brochure iTukutuku Vinaka Mai Vua na Kalou! Qori e dua na iVukevuke ni Veivakavulici me tauyavu kina na vuli iVolatabu.

11. E vakarautaki vakacava na mekesini qo, ia na cava meda kila tiko?

¹¹ Mekesini. E vakadewataki qai veisoliyaki vakalevu duadua e vuravura na mekesini Na Vale ni Vakatawa kei na Yadra! Levu ena veiyasa i vuravura era dau wilika na mekesini qo, e dau vakarautaki gona na kena ulutaga me taleitaki ena veivanua kece. Meda vakayagataka na ivukevuke qo mera kauaitaka kina na lewenivanua na veika e bibi duadua. Ia ni bera nida solia, e bibi meda kila mada e tabaki me baleti cei na mekesini ruarua qo.

12. (a) E tabaki me baleti cei na Yadra!, cava e kena inaki? (b) Tukuna eso na irogo ni o vakayagataka na ivukevuke qo?

¹² Yadra! E tabaki na mekesini qo me baleti ira na sega ni kila na iVolatabu kei ira na bau kila toka vakalailai. Era na rairai sega ni kila na ka eda vakabauta na lotu vaKarisito, ra sega ni nuitaka na lotu, de dua era sega tale ga ni kila na yaga ni iVolatabu ena nodra bula. Na inaki levu ni Yadra! oya me vakadeitaka vua e wilika ni bula tiko na Kalou. (Roma 1:20; Iper. 11:6) Ena vukei koya tale ga me vakabauta ni “vosa dina ni Kalou” na iVolatabu. (1 Ces. 2:13) Qo na tolu na ulutaga ni Yadra! ena 2018: “Ena Rawati Vakacava na Marau?,” “12 na Sala me Marau Kina na Vuvale,” kei na “Nodra Vakacegui na Lolosi.”

13. (a) E vakarautaki me baleti cei na Vale ni Vakatawa e tabaki me baleti ira na lewenivanua? (b) Tukuna eso na irogo ni o vakayagataka na ivukevuke qo?

¹³ Na Vale ni Vakatawa. E vakabibitaki ena kena e tabaki me baleti ira na lewenivanua na ivakavuvuli vakaivolatabu mera wilika o ira na bau kila toka na Kalou kei na iVolatabu. Era na rairai kila toka vakalailai na iVolatabu, ia era sega ga ni kila vinaka na kena ivakavuvuli. (Roma 10:2; 1 Tim. 2:3, 4) Qo na tolu na ulutaga e tabaki ena 2018: “Vuna se Yaga Tiko ga Kina na iVolatabu,” “Na Cava ena Yaco ena Gauna se Bera Mai?,” “E Kauaitaki Iko na Kalou?”

14. (a) Na cava na inaki ni va na vidio e tiko ena iVukevuke ni Veivakavulici? (b) Tukuna eso na irogo ni o vakaraitaka na vidio qo?

¹⁴ Vidio. E tiko na iyaya vakamatai e dau vakayagataki ena gauna i Jisu. Nikua, sa vakayagataki tale ga na iyaya vakalivaliva e varota na kau, e qiva, tocia, vakota, kei na levu tale. E vakarautaki gona e levu na vidio totoka me ikuri ni noda ivola tabaki. Qo e va na vidio e tiko ena iVukevuke ni Veivakavulici: Vuna mo Vulica Kina na iVolatabu, Na Cava e Caka ena Vuli iVolatabu?, Na Cava e Caka ena Vale ni Soqoni?, O Cei o Keimami na iVakadinadina i Jiova? Ena imatai ni veisiko, e vinaka me vakayagataki na kena e sega ni sivia e rua na miniti. Na kena e balavu toka e rawa ni vakayagataki vei ira na veisikovi lesu kei ira na sega ni osooso. E laulau dina na vidio qo ni uqeti ira na lewenivanua mera vulica na iVolatabu, mera tiko tale ga ena soqoni.

15. Ena uqeti ira vakacava na lewenivanua nira sarava ena nodra vosa na noda vidio? Tukuna e dua na ivakaraitaki.

¹⁵ Kena ivakaraitaki, e vakaraitaka e dua na tacida yalewa na vidio Vuna mo Vulica Kina na iVolatabu ena vosa vakaYap vua e dua na marama e gole mai Micronesia. Ni se qai tekivu ga na vidio, e kaya na marama ya: “Qo noqu vosa. Sa yawa sara ga! O koya e vosa tiko qo keirau yanuyanu vata. Au kila ga ena nona ivosavosa. E vosa tiko vaka  neitou!” E tukuna sara ni na wilika qai sarava na ka kece e vakarautaki ena vosa vakaYap ena jw.org. (Vakatauvatana Cakacaka 2:8, 11.) Dua tale na ivakaraitaki. E vakauta ena imeli e dua na tacida yalewa e tiko e Merika na isema (link) ni vidio vata ga qori vei vugona e valagi, me sarava ena nona vosa. Ni sarava oti, e vakauta lesu o vugona na imeli qo: “Au kauai sara ga ni tukuni ni lewa tiko na vuravura na vunica. Au mani kerea ena jw.org meu vulica na iVolatabu.” E vakatabui tu noda cakacaka ena vanua e tiko kina o vugona!

16. Vakamacalataka na inaki ni brochure: (a) Vakarorogo Vua na Kalou mo Bula Tawamudu. (b) iTukutuku Vinaka Mai Vua na Kalou! (c) O Cei Era Cakava Tiko Nikua na Loma i Jiova?

¹⁶ Brochure. O na vakavulica vakacava na ka dina vua e dua e sega ni kila vinaka na wilivola, se vua e vosataka na vosa e se bera ni tabaki kina noda ivola? E tiko na ivukevuke mo vakayagataka, oya na brochure Vakarorogo Vua na Kalou mo Bula Tawamudu. * Dua tale na ivukevuke vinaka me tauyavu kina na vuli iVolatabu na brochure iTukutuku Vinaka Mai Vua na Kalou! Rawa ni o vakaraitaka vua e tataleitaki na 14 na ulutaga ena waqana e muri me digia na kena e taleitaka, me tekivu kina na vuli. O sa bau tovolea qori ena veisikovi lesu? Na ikatolu ni ivukevuke na brochure O Cei Era Cakava Tiko Nikua na Loma i Jiova? E kena inaki mera kila kina na gonevuli na isoqosoqo. Raica na Noda iVola ni Soqoni ni Bula Vakarisito kei na Cakacaka Vakaitalatala ni Maji 2017, mo kila kina na kena ivakavakayagataki ni o caka vuli iVolatabu.

17. (a) Tukuna na inaki yadua ni ivola ni vuli iVolatabu. (b) Ke dua e toso me lai papitaiso sara, na cava se vinakati tiko ga vua?

¹⁷ iVola. Ke sa tekivu na vuli ena brochure, rawa ni drau lewa na gauna mo drau dewa kina ina ivola Na Cava Eda Vulica ena iVolatabu? Ena vulica kina e levu tale na ka me baleta na yavu ni ivakavuvuli vakaivolatabu. Ke sa vulici oti na ivola qori qai toso vinaka vakayalo o gonevuli, e rawa ni tomani na vuli ena ivola Sala Meda Tiko ga Kina ena Loloma ni Kalou. Ena vulica ena ivola qori na sala me bulataka kina e veisiga na ivakavuvuli vakaivolatabu. Meda nanuma tiko ni bibi mera vakaotia na ka vou na ivola ruarua qori, ke ra sa papitaiso mada ga. Ena vukei ira me dei nodra vakabauti Jiova ra qai yalodina tiko ga vua.—Wilika Kolosa 2:6, 7.

18. (a) Na cava e tukuni ena 1 Timoci 4:16 meda cakava na qasenivuli ni ka dina? (b) Cava me noda inaki nida vakayagataka na iVukevuke ni Veivakavulici?

¹⁸ E noda itavi na iVakadinadina i Jiova meda vakavulica “na ka dina me baleta na itukutuku vinaka” ena rawati kina na bula tawamudu. (Kolo. 1:5; wilika 1 Timoci 4:16.) Oya na vuna e vakarautaki kina na iVukevuke ni Veivakavulici. (Raica “ iVukevuke ni Veivakavulici.”) Meda kenadau mada ga ena kena ivakavakayagataki. Ena vakatau vua na dautukutuku yadua na ivukevuke e via vakayagataka ena gauna veiganiti. Ia meda nanuma tiko ni sega ni noda inaki meda soli ivola ga, eda sega tale ga ni via solia na ivola vei ira na sega ni taleitaka na ka eda vunautaka. E noda inaki meda vukei ira na lomadina, yalomalumalumu, era via kila na ka dina mera mai tisaipeli. Qori o ira na yalomalumalumu era via “muria na sala mera bula tawamudu kina.”—Caka. 13:48; Maciu 28:19, 20.