1, 2. (a) Mɛɛ nitsumɔ Yesu bu lɛ akɛ ehe miihia fe nitsumɔi krokomɛi fɛɛ? Ni mɛni hewɔ? (b) Mɛni esa akɛ wɔfee koni wɔtsɔmɔ “Nyɔŋmɔ nanemɛi nitsulɔi” kpakpai?

YESU KRISTO tsu nitsumɔi enyɔ. Etsu kapinta nitsumɔ lɛ, ni sɛɛ mli lɛ, etsɔɔ mɛi nii. (Mar. 6:3; Yoh. 13:13) Ekase nitsumɔi enyɔ nɛɛ fɛɛ jogbaŋŋ ni ehe basa yɛ fɛɛ mli. Be ni etsuɔ kapinta nitsumɔ lɛ, ekase bɔ ni akɛ kapintafoi adɛŋdadei tsuɔ nii kɛkpɛɔ okpɔlɔi, sɛii, kɛ nibii krokomɛi. Be ni etsɔɔ mɛi nii lɛ, ekɛ nilee ni ená yɛ Ŋmalɛ lɛ mli lɛ tsu nii jogbaŋŋ kɛye ebua mɛi koni amɛnu anɔkwalei ni yɔɔ Nyɔŋmɔ Wiemɔ lɛ mli lɛ ashishi. (Mat. 7:28; Luka 24:32, 45) Be ni Yesu ye afii 30 lɛ, ekpa kapinta nitsumɔ lɛ ni ebɔi nitsɔɔmɔ, ejaakɛ ele akɛ shiɛmɔ kɛ nitsɔɔmɔ nitsumɔ lɛ he miihia kwraa fe kapinta nitsumɔ lɛ. Ewie akɛ Nyɔŋmɔ Maŋtsɛyeli lɛ he sane kpakpa lɛ shiɛmɔ ji yiŋtoo kome hewɔ ni Nyɔŋmɔ tsu lɛ kɛba shikpɔŋ lɛ nɔ. (Mat. 20:28; Luka 3:23; 4:43) Yesu hãaa nɔ ko nɔ ko he ahia lɛ fe shiɛmɔ nitsumɔ lɛ, ni eshwe ni mɛi krokomɛi abafata ehe kɛtsu nitsumɔ nɛɛ.​—Mat. 9:35-38.

² Wɔteŋ mɛi pii jeee kapintafoi, shi wɔ fɛɛ wɔshiɛɔ sane kpakpa lɛ ni wɔtsɔɔ mɛi nii. Nitsumɔ nɛɛ he miihia aahu akɛ, Nyɔŋmɔ po tsuɔ eko. Biblia lɛ kɛɛ “Nyɔŋmɔ nanemɛi nitsulɔi ji wɔ.” (1 Kor. 3:9; 2 Kor. 6:4) Wɔkɛ lalatsɛ lɛ kpãa gbee akɛ, “[Yehowa wiemɔ] lɛ fɛɛ lɛ, anɔkwale sɔŋŋ ni.” (Lala 119:159, 160) Enɛ hewɔ kɛ́ wɔtee shiɛmɔ lɛ, esa akɛ wɔbɔ mɔdɛŋ fɛɛ ni wɔbaanyɛ ni ‘wɔhiɛ anɔkwale lɛ wiemɔ lɛ mli pɛpɛɛpɛ’ lɛ. (Kanemɔ 2 Timoteo 2:15.) Ni no hu hewɔ esa akɛ wɔya  wɔhiɛ be fɛɛ be yɛ bɔ ni wɔkɛ Biblia lɛ tsuɔ nii wɔhãa lɛ mli lɛ, ejaakɛ no ji wolo titri ni wɔkɛtsuɔ nii kɛtsɔɔ mɛi anɔkwalei ni kɔɔ Yehowa, Yesu, kɛ Maŋtsɛyeli lɛ he. Bɔ ni afee ni wɔnyɛ wɔtsu shiɛmɔ nitsumɔ lɛ jogbaŋŋ lɛ, Yehowa asafo lɛ ehã wɔ woji kɛ nibii krokomɛi ni baanyɛ aye abua wɔ, ni esa akɛ wɔle bɔ ni akɛ enɛɛmɛi hu tsuɔ nii jogbaŋŋ. Woji kɛ nibii nɛɛ ji nɔ ni wɔtsɛɔ amɛ akɛ Nibii Ni Wɔkɛtsuɔ Nii Kɛtsɔɔ Mɛi Nii lɛ.

3. Amrɔ nɛɛ ni eshwɛ be fioo ni naagbee lɛ baaba lɛ, mɛni nɔ titri esa akɛ wɔkɛ wɔjwɛŋmɔ ama? Ni mɛɛ gbɛ nɔ Bɔfoi 13:48 lɛ baanyɛ aye abua wɔ ni wɔfee nakai?

³ Ekolɛ obaabi akɛ, ‘Mɛni hewɔ atsɛɛɛ nibii nɛɛ akɛ, Nibii Ni Wɔkɛtsuɔ Nii Kɛshiɛɔ, shi moŋ atsɛɔ amɛ akɛ, Nibii Ni Wɔkɛtsuɔ Nii Kɛtsɔɔ Mɛi Nii lɛ?’ Kɛ́ akɛɛ mɔ ko miishiɛ lɛ, etsɔɔ akɛ eejaje sane ko eetsɔɔ mɛi. Shi kɛ́ akɛɛ mɔ ko miitsɔɔ nii lɛ, etsɔɔ akɛ eeye eebua mɛi koni amɛnu sane ko shishi jogbaŋŋ, ni eta amɛtsuiŋ koni amɛkɛtsu nii. Eshwɛ be fioo pɛ ni jeŋ fɔŋ nɛɛ baaho aya. No hewɔ lɛ, nɔ titri ni esa akɛ wɔkɛma wɔhiɛ ji, ni wɔkɛ mɛi baaje Biblia mli nikasemɔi ashishi ni wɔtsɔɔ amɛ anɔkwale lɛ. Dani wɔbaanyɛ wɔshɛ oti nɛɛ he lɛ, esa akɛ wɔkɛ hiɛdɔɔ atao “mɛi fɛɛ ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ,” ni wɔye wɔbua amɛ ni amɛbasɔmɔ Yehowa.​—Kanemɔ Bɔfoi 13:44-48.

4. Mɛni baatsɔɔ akɛ mɔ ko yɛ ‘anɔkwale lɛ he tsui kpakpa’? Ni te wɔbaafee tɛŋŋ wɔnine ashɛ mɛi ni tamɔ nakai lɛ anɔ?

⁴ Te wɔbaafee tɛŋŋ wɔnine ashɛ ‘mɛi ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ’ anɔ? Tamɔ bɔ ni eji yɛ Kristofoi ni hi shi yɛ blema lɛ agbɛfaŋ lɛ, gbɛ kome pɛ ni wɔbaanyɛ wɔtsɔ nɔ wɔnine ashɛ mɛi nɛɛ anɔ ji, ni wɔbaashiɛ. No hewɔ lɛ, esa akɛ wɔkɛ gbɛtsɔɔmɔ nɛɛ ni Yesu kɛhã lɛ atsu nii, akɛ: “Maŋ fɛɛ maŋ loo akrowa fɛɛ akrowa mli ni nyɛbaabote lɛ, nyɛtaoa mɔ ni sa yɛ jɛmɛ.” (Mat. 10:11) Wɔle akɛ, mɛi ni woɔ amɛhe nɔ, ni nuuu he akɛ Nyɔŋmɔ he miihia amɛ, ni agbɛnɛ hu, amɛbɛ he miishɛɛ akɛ amɛbaasɔmɔ Nyɔŋmɔ lɛ boŋ sane kpakpa lɛ toi. Kɛ́ wɔtee shiɛmɔ lɛ, mɛi ni wɔtaoɔ titri ji mɛi ni baa amɛhe shi, ni miitao amɛle anɔkwale lɛ, ni miisumɔ ni amɛfee nɔ ni sa Nyɔŋmɔ hiɛ. Wɔbaanyɛ wɔkɛ wɔshiɛmɔ nitsumɔ lɛ ato bɔ ni Yesu tsu ekapinta nitsumɔ lɛ ehã lɛ he. Eeenyɛ efee akɛ, dani ebaakpɛ sɛi, shinaa, kɔɔŋtso, loo nɔ kroko lɛ, etaoɔ tso kpakpa ni ebaanyɛ ekɛkpɛ. Kɛ́ ená tso lɛ eko lɛ, agbɛnɛ lɛ ekɛ edɛŋdadei lɛ kɛ nilee kɛ ŋaa ni eyɔɔ lɛ tsuɔ nii kɛkpɛɔ nɔ ni etaoɔ ekpɛ lɛ. Nɔ ko tamɔ nakai nɔŋŋ esa akɛ wɔfee; esa akɛ wɔtao mɛi ni hiɛ tsui kpakpa lɛ, kɛkɛ lɛ, no sɛɛ lɛ, wɔbaanyɛ wɔkɛ woji kɛ nibii ni wɔyɔɔ lɛ aye abua amɛ ni amɛbale anɔkwale lɛ.​—Mat. 28:19, 20.

5. Mɛni esa akɛ wɔle yɛ Nibii Ni Wɔkɛtsuɔ Nii Kɛtsɔɔ Mɛi Nii lɛ ahe? Okɛ enɛ he nɔkwɛmɔnɔ ahã. (Kwɛmɔ mfonirii ni yɔɔ nikasemɔ lɛ shishijee lɛ.)

⁵ Dɛŋdade fɛɛ dɛŋdade kɛ nɔ ni akɛtsuɔ. Akɛ nɔkwɛmɔnɔ lɛ, Yesu kɛ dɛŋdadei srɔtoi tsu nii be ni etsuɔ ekapinta nitsumɔ lɛ. * Ehe bahia ni ená dɛŋdadei ni ekɛbaakadi tsei ahe, nɔ ni ekɛbaafolɔ, nɔ ni ekɛbaagbulɔ fɔji, kɛ nɔ ni ekɛbaasaa tsei lɛ ahe. Agbɛnɛ hu, ehe bahia ni ená dɛŋdadei ni ekɛbaasusu tsei lɛ akɛlɛmɔ kɛ amɛlɛɛmɔ, kɛ nɔ ni ekɛbaakala nii. Nakai nɔŋŋ Nibii Ni Wɔkɛtsuɔ Nii Kɛtsɔɔ Mɛi Nii lɛ ateŋ eko fɛɛ eko yɛ nɔ ni akɛtsuɔ. No hewɔ lɛ, nyɛhãa wɔkɔlɔa nibii ni he hiaa nɛɛ ekomekomei ni wɔkwɛ nɔ ni akɛtsuɔ.

6, 7. (a) Mɛɛ gbɛ nɔ okɛ jw.org kaadii lɛ etsu nii? (b) Mɛɛ yiŋtoi enyɔ ahewɔ afee asafoŋ kpeei ninefɔɔ wolo lɛ?

⁶ JW.ORG Kaadii. Wɔbaanyɛ wɔkɛ kaadii bibii nɛɛ aye abua mɛi koni amɛle mɛi ni wɔji, ni amɛya wɔwɛbsaiti lɛ, ni ji jw.org lɛ nɔ. Kɛ́ amɛtee wɔwɛbsaiti lɛ nɔ lɛ, amɛbaale wɔhe saji babaoo, ni amɛbaanyɛ amɛbi po ni akɛ amɛ abakase Biblia lɛ. Mɛi fe 400,000 etsɔ jw.org lɛ nɔ amɛbi ni akɛ amɛ abakase Biblia lɛ, ni daa gbi lɛ, mɛi ohai abɔ feɔ nakai! Obaanyɛ ohiɛ jw.org kaadii lɛ eko  yɛ ohe be fɛɛ be ni okɛtsu nii kɛye mɛi odase be fɛɛ be ni ebaahi nakai feemɔ.

⁷ Ninefɔɔ Woji. Wolo ni bei pii lɛ wɔkɛtsuɔ nii kɛfɔ̃ɔ mɛi nine kɛbaa wɔsafoŋ kpeei lɛ ashishi lɛ hiɛ yiŋtoi enyɔ. Aŋma yɛ sɛɛ akɛ: “Wɔmiifɔ̃ bo nine koni okɛ Yehowa Odasefoi akase Biblia lɛ.” Kɛ́ ogbele mli lɛ, obaana akɛ atsɔɔ akɛ obaanyɛ ofee nakai “yɛ wɔkpeei ashishi” “loo okɛ tsɔɔlɔ ko.” No hewɔ lɛ, wolo nɛɛ hãa mɛi leɔ mɛi ni wɔji, shi kɛfata he lɛ, ewoɔ “mɛi ni le akɛ Nyɔŋmɔ he miihia amɛ lɛ” hewalɛ ni amɛhã wɔkɛ amɛ akase Biblia lɛ. (Mat. 5:3) Shi no hu etsɔɔɔ akɛ kɛ́ mɔ ko ekpɛlɛɛɛ ni wɔkɛ lɛ akase Biblia lɛ, belɛ enyɛŋ eba wɔsafoŋ kpeei lɛ; ebaanyɛ eba. Ni kɛ́ eba lɛ, ebaakase nibii pii kɛjɛ Biblia lɛ mli.

8. Mɛni hewɔ ehe miihia ni mɛi aba kɛ́ hooo kwraa lɛ, wɔkpeei lɛ ateŋ ekome lɛ? Okɛ enɛ he nɔkwɛmɔnɔ ahã.

⁸ Ehe miihia ni wɔya nɔ wɔfɔ̃ mɛi nine ni amɛba asafoŋ kpeei lɛ, kɛ́ asafoŋ kpeei lɛ ekome pɛ amɛbaanyɛ amɛba po. Mɛni hewɔ? Ejaakɛ kɛ́ amɛba lɛ, amɛbaana akɛ esoro Yehowa Odasefoi kwraa yɛ amale jamɔi ahe, ejaakɛ wɔjɛɔ Biblia lɛ mli wɔtsɔɔ mɛi anɔkwale lɛ, ni wɔyeɔ wɔbuaa mɛi koni amɛle Nyɔŋmɔ. (Yes. 65:13) Naa niiashikpamɔ ko ni nuu ko ni yɔɔ United States ni atsɛɔ lɛ Ray lɛ kɛ eŋa Linda ná. Nuu nɛɛ kɛ eŋa lɛ heɔ Nyɔŋmɔ nɔ amɛyeɔ, ni amɛshwe akɛ amɛle lɛ jogbaŋŋ. No hewɔ lɛ, afii komɛi ni eho nɛ lɛ, amɛkpɛ amɛyiŋ akɛ amɛbaabɔi sɔlemɔ yaa. Amɛtee sɔlemɔtsu fɛɛ sɔlemɔtsu ni yɔɔ maŋ lɛ mli lɛ mli. He fɛɛ he ni amɛbaaya lɛ, nibii enyɔ amɛkwɛɔ. Klɛŋklɛŋ lɛ, amɛkwɛɔ akɛ amɛbaakase nɔ ko lo, ni nɔ ni ji enyɔ lɛ, amɛkwɛɔ kɛji mɛi ni yaa sɔlemɔ yɛ jɛmɛ lɛ esaa amɛhe bɔ ni sa Nyɔŋmɔ tsuji lo. Ehe amɛ afii saŋŋ, ejaakɛ sɔlemɔtsui lɛ fa. Shi fɛɛ sɛɛ lɛ, amɛnaaa nɔ ni amɛtaoɔ lɛ. Amɛna akɛ amɛkaseko nɔ ko nɔ ko, ni agbɛnɛ hu, sɔlemɔi lɛ amli bii lɛ esaaa amɛhe bɔ ni sa Nyɔŋmɔ tsuji. Be ni amɛje kpo kɛje naagbee sɔlemɔtsu ni amɛto akɛ amɛbaayasara lɛ mli lɛ, Linda tee nitsumɔ, ni Ray ku esɛɛ akɛ eeya shĩa. Be ni eyaa lɛ, ena Maŋtsɛyeli Asa ko. No hewɔ lɛ, egba jɛmɛ koni eyakwɛ nɔ ni yaa nɔ yɛ jɛmɛ. Nɔ ni ena lɛ hã emii shɛ ehe pam! Mɛi fɛɛ ni yɔɔ Maŋtsɛyeli Asa lɛ nɔ lɛ tse amɛhiɛ amɛhã lɛ ni amɛhere lɛ hiɛmɛɛ. Agbɛnɛ hu, ena akɛ sane ko kwraa bɛ amɛhesaamɔ lɛ he. Ray yata hiɛgbɛ tuuntu ni enya nɔ ni ekase lɛ he waa! Ani Ray niiashikpamɔ lɛ kaiii wɔ nɔ ni bɔfo Paulo wie yɛ mɔ ko ni be klɛŋklɛŋ ni ebaaba Kristofoi akpee ko shishi lɛ ebaawie akɛ: “Nyɔŋmɔ yɛ nyɛteŋ lɛɛlɛŋ” lɛ he lɛ? (1 Kor. 14:23-25) Kɛjɛ nakai gbi lɛ nɔ lɛ, Ray tee asafoŋ kpeei daa Hɔgbaa, ni sɛɛ mli lɛ, ebɔi otsi-teŋ kpeei lɛ fɛɛ yaa. Linda hu bɔi asafoŋ kpeei yaa, ni eyɛ mli akɛ amɛ fɛɛ amɛye fe afii 70 moŋ, shi amɛhã akɛ amɛ bɔi Biblia lɛ kasemɔ ni abaptisi amɛ.

9, 10. (a) Mɛni hewɔ tratii lɛ kɛ nitsumɔ waaa kwraa? (b) Tsɔɔmɔ bɔ ni akɛ trati ni ji, Mɛni Ji Nyɔŋmɔ Maŋtsɛyeli Lɛ? tsuɔ nii ahãa.

⁹ Tratii. Tratii kpaanyɔ fata Nibii Ni Wɔkɛtsuɔ Nii Kɛtsɔɔ Mɛi Nii lɛ ahe. Tratii nɛɛ kɛ nitsumɔ waaa, ni kɛ́ okɛ eko miije sanegbaa shishi lɛ, eyeɔ omanye waa. Kɛjɛ be ni ajie tratii nɛɛ kpo yɛ afi 2013 lɛ, akala aaafee akpekpe toi akpei enumɔ! Nɔ ni hi waa yɛ tratii nɛɛ ahe ji akɛ, kɛ́ okase bɔ ni akɛ ekome tsuɔ nii ahãa lɛ, obaanyɛ okɛ eko fɛɛ eko atsu nii, ejaakɛ bɔ ni ato saji lɛ anaa ahã yɛ ekome mli lɛ, nakai nɔŋŋ eyɔɔ yɛ ekrokomɛi lɛ amli. Te obaafee tɛŋŋ okɛ tratii lɛ eko atsu nii kɛje sanegbaa shishi?

¹⁰ Ŋɔɔ lɛ akɛ, ootao okɛ trati ni ji, Mɛni Ji Nyɔŋmɔ Maŋtsɛyeli Lɛ? atsu nii. Te obaafee lɛ ohã tɛŋŋ? Klɛŋklɛŋ lɛ, okɛ sanebimɔ ni yɔɔ trati lɛ hiɛ lɛ atsɔɔ mɔ lɛ, ni obi lɛ akɛ: “Kɛ́ mɔ ko bi bo akɛ, ‘Mɛni ji Nyɔŋmɔ Maŋtsɛyeli lɛ,’ mɛni obaakɛɛ? Ani obaakɛɛ eji . . . ?” Kɛkɛ lɛ, ohã etsɔɔ hetoi etɛ ni ahã lɛ ateŋ nɔ ni esusuɔ akɛ no ja. Ehetoo lɛ ja jio, ejaaa jio, gbelemɔ trati lɛ mli ni okane Daniel 2:44 kɛ Yesaia 9:6 lɛ, ni ji ŋmalɛi enyɔ ni yɔɔ saneyitso fioo ni ji, “Nɔ Ni Biblia Lɛ Kɛɔ” lɛ shishi lɛ ohã lɛ. Kɛ́ hegbɛ yɛ lɛ, obaanyɛ okɛ lɛ atsa sanegbaa lɛ nɔ. Shi dani nyɛbaamu  naa lɛ, gbalamɔ ejwɛŋmɔ kɛya sanebimɔ ni yɔɔ trati lɛ sɛɛ, yɛ saneyitso fioo ni ji, “Kɛhã Hesusumɔ” lɛ shishi lɛ nɔ. Ebiɔ akɛ: “Te shihilɛ baatamɔ ahã tɛŋŋ be ni Nyɔŋmɔ Maŋtsɛyeli lɛ yeɔ nɔ lɛ?” Be kroko kɛ́ otee mɔ lɛ ŋɔɔ lɛ, obaanyɛ okɛ lɛ asusu sanebimɔ nɛɛ he. Kɛ́ oku osɛɛ otee lɛ, obaanyɛ ogbala ejwɛŋmɔ kɛya broshuɔ ni ji, Sane Kpakpa Ni Jɛ Nyɔŋmɔ Ŋɔɔ! lɛ nikasemɔ 7 lɛ nɔ. Broshuɔ nɛɛ fata woji ni wɔkɛfeɔ Biblia mli nikasemɔ lɛ ahe.

11. Mɛɛ yiŋtoo hewɔ afeɔ Buu-Mɔɔ lɛ kɛ Awake! lɛ? Dani wɔbaanyɛ wɔkɛ wɔmagazin lɛ atsu nii jogbaŋŋ lɛ, mɛni esa akɛ wɔle yɛ amɛhe?

¹¹ Magazin. Magazin ko kwraa bɛ je nɛɛ mli ni akaneɔ yɛ maji srɔtoi anɔ ni atsɔɔ shishi kɛtee wiemɔi pii amli fe Buu-Mɔɔ lɛ kɛ Awake! lɛ! Akɛni mɛi ni yɔɔ maji srɔtoisrɔtoi anɔ ni kaneɔ wɔmagazin lɛ hewɔ lɛ, saji titrii ni awieɔ he yɛ wɔmagazin srɔtoi lɛ amli lɛ ji saji ni mɛi ni yɔɔ je lɛŋ he fɛɛ he lɛ baanya he. Esa akɛ wɔkɛ wɔmagazin lɛ atsu nii kɛye wɔbua mɛi ni amɛsusu nɔ ni he hiaa waa yɛ shihilɛ mli ŋmɛnɛ lɛ he. Dani wɔbaanyɛ wɔfee nakai lɛ, esa akɛ wɔle mɛi pɔtɛi ni afee Buu-Mɔɔ lɛ ahã, kɛ mɛi pɔtɛi ni afee Awake! lɛ ahã.

12. (a) Namɛi ahewɔ afee Awake! lɛ? Ni mɛɛ yiŋtoo hewɔ afee? (b) Mɛɛ niiashikpamɔi ni ŋɔɔ oná yɛ Awake! lɛ kɛ nitsumɔ mli?

¹² Afee Awake! lɛ ahã mɛi ni leee Biblia lɛ he nɔ ko kwraa loo mɛi ni le Biblia lɛ he nɔ ko fioo pɛ. Mɛi nɛɛ ateŋ mɛi komɛi leee nibii ni Kristofoi heɔ amɛyeɔ lɛ he nɔ ko kwraa, amɛnuɔ he akɛ jamɔi fɛɛ ehiii, ni ekolɛ amɛsusuɔ po akɛ Biblia lɛ he bɛ sɛɛnamɔ. Yiŋtoo titri hewɔ ni afee Awake! lɛ ji, koni eye ebua mɛi ni kaneɔ lɛ ni amɛna akɛ Nyɔŋmɔ yɛ. (Rom. 1:20; Heb. 11:6) Agbɛnɛ hu, eyeɔ ebuaa amɛ koni amɛna akɛ Biblia lɛ ji ‘Nyɔŋmɔ wiemɔ lɛɛlɛŋ.’ (1 Tes. 2:13) Awake! etɛ ni ba yɛ afi 2018 lɛ mli lɛ ayitsei ji: “The Way of Happiness” (Bɔ Ni Obaafee Oná Miishɛɛ), “12 Secrets of Successful Families” (Nibii 12 Ni Hãa Wekui Náa Miishɛɛ), kɛ “Help for Those Who Grieve” (Nibii Ni Baanyɛ Aye Abua Mɛi Ni Yeɔ Awerɛho Lɛ).

13. (a) Namɛi ahewɔ afee Buu-Mɔɔ ni ji maŋbii anɔ lɛ? (b) Mɛɛ niiashikpamɔi ni ŋɔɔ oná yɛ Buu-Mɔɔ lɛ kɛ nitsumɔ mli?

¹³ Afee Buu-Mɔɔ ni ji maŋbii anɔ lɛ koni akɛgbala nibii ni Biblia lɛ tsɔɔ lɛ amli ahã mɛi ni le Nyɔŋmɔ kɛ Biblia lɛ he nɔ ko. Eyɛ mli akɛ mɛi nɛɛ le Biblia lɛ he nɔ ko moŋ, shi amɛnuuu nibii ni Biblia lɛ tsɔɔ lɛ ashishi jogbaŋŋ. (Rom. 10:2; 1 Tim. 2:3, 4) Buu-Mɔɔ etɛ ni ba yɛ afi 2018 lɛ mli lɛ ayitsei ji: “Ani Biblia Lɛ He Yɛ Sɛɛnamɔ Lolo?,” “Mɛni Baaba Wɔsɛɛ?,” kɛ “Ani Nyɔŋmɔ Susuɔ Ohe?”

14. (a) Mɛɛ yiŋtoo hewɔ afee vidioi ejwɛ ni fata Nibii Ni Wɔkɛtsuɔ Nii Kɛtsɔɔ Mɛi Nii lɛ ahe lɛ? (b) Mɛɛ niiashikpamɔi ni ŋɔɔ oná yɛ vidioi ejwɛ nɛɛ kɛ nitsumɔ mli?

¹⁴ Vidioi. Yɛ Yesu beiaŋ lɛ, kapintafoi bɛ dɛŋdadei ni kɛ sarawa hewalɛ tsuɔ nii. Shi ŋmɛnɛ lɛ, kapintafoi yɛ dɛŋdadei ni akɛfolɔɔ tsei, nɔ ni akɛgbulɔɔ fɔji, nɔ ni akɛkalaa plɛkoi, kɛ ekrokomɛi ni tamɔ nakai ni kɛ sarawa hewalɛ tsuɔ nii. Wɔwoji lɛ tamɔ dɛŋdadei ni kɛ sarawa hewalɛ tsuuu nii lɛ, ni wɔvidioi lɛ tamɔ dɛŋdadei ni kɛ sarawa hewalɛ tsuɔ nii lɛ. Vidioi fɛfɛji nɛɛ ateŋ ejwɛ fata Nibii Ni Wɔkɛtsuɔ Nii Kɛtsɔɔ Mɛi Nii lɛ ahe. Nomɛi ji: Mɛni Hewɔ Esa Akɛ Okase Biblia Lɛ?, Mɛni Yaa Nɔ yɛ Biblia Nikasemɔ Feemɔ Mli?, Mɛni Yaa Nɔ yɛ Maŋtsɛyeli Asa lɛ Nɔ?, kɛ Yehowa Odasefoi​—Namɛi Ji Wɔ? Vidioi lɛ ateŋ nɔ ni shɛɛɛ minitii enyɔ lɛ hi waa kɛhã klɛŋklɛŋ sanegbaa. Nɔ ni sɛɛ kɛ fioo lɛ hi kɛhã sɛɛkuukɛsaramɔi loo kɛ́ wɔkɛ mɔ ko ni yɔɔ dekã bɔ ni sa lɛ yakpe. Vidioi nɛɛ hi waa ni amɛbaanyɛ amɛkanya mɛi ni amɛkpɛlɛ ni wɔkɛ amɛ akase Biblia lɛ ni amɛba asafoŋ kpeei.

15. Gbaa niiashikpamɔ ko ni hãa wɔnaa akɛ, kɛ́ mɛi kwɛ wɔvidioi lɛ eko yɛ amɛmaŋ wiemɔ mli lɛ, ebaanyɛ ená amɛnɔ hewalɛ waa.

¹⁵ Naa niiashikpamɔi ni nyɛmimɛi komɛi ená. Nyɛmi yoo ko nyiɛ shiɛmɔ nɔ ni ekɛ yoo ko ni jɛ  Micronesia ni wieɔ Yapese lɛ yakpe. Ejie vidio ni ji, Mɛni Hewɔ Esa Akɛ Okase Biblia Lɛ? ehã yoo lɛ yɛ yoo lɛ maŋ wiemɔ mli. Be ni ebɔi vidio lɛ jiemɔ lɛ, yoo lɛ wie akɛ: “Mimaŋ wiemɔ nɛ. Minaa ekpɛ mihe eei! Bɔ ni ewieɔ lɛ po hãa minaa akɛ ekɛ mi fɛɛ jɛ ŋshɔkpɔ kome nɔ. Ewieɔ mimaŋ wiemɔ lɛ!” No sɛɛ lɛ, ekɛɛ nyɛmi yoo lɛ akɛ ebaaya jw.org lɛ nɔ ni eyatao nibii fɛɛ ni afee yɛ ewiemɔ lɛ mli, vidioi jio, woji jio, koni ekwɛ ni ekane. (Okɛto Bɔfoi 2:8, 11 lɛ he.) Nyɛmi yoo ko hu ni yɔɔ United States lɛ kɛ vidio kome too nɛɛ nɔŋŋ he link maje ewekunyo ko ni yɔɔ maŋ ko ni atsĩ wɔnitsumɔ lɛ naa yɛ jɛmɛ lɛ nɔ lɛ. Ewekunyo lɛ kwɛ vidio lɛ, ni sɛɛ mli lɛ esɛndi lɛ e-mail akɛ: “Efã lɛ ni kɛɔ akɛ je lɛ kã mɔ fɔŋ ko hewalɛ mli lɛ hã mijwɛŋ waa. Mibi ni akɛ mi akase Biblia lɛ.”

16. Tsɔɔmɔ nɔ tuuntu ni akɛ broshuɔi ni nyiɛ sɛɛ nɛɛ eko fɛɛ eko tsuɔ: (a) Bo Nyɔŋmɔ Toi Koni Ohi Shi Kɛya Naanɔ. (b) Sane Kpakpa Ni Jɛ Nyɔŋmɔ Ŋɔɔ! (d) Namɛi Feɔ Yehowa Suɔmɔnaa Nii Ŋmɛnɛ?

¹⁶ Broshuɔi. Mɛɛ wolo baanyɛ aye abua bo ni onyɛ otsɔɔ mɔ ko ni nyɛɛɛ akane nii jogbaŋŋ loo mɔ ko ni abɛ woji ni wɔkɛkaseɔ Biblia lɛ eko kwraa yɛ ewiemɔ mli lɛ anɔkwale lɛ? No ji broshuɔ ni yitso ji, Bo Nyɔŋmɔ Toi Koni Ohi Shi Kɛya Naanɔ lɛ. * Broshuɔ ko ni hi waa ni wɔbaanyɛ wɔkɛje Biblia mli nikasemɔ shishi ji, Sane Kpakpa Ni Jɛ Nyɔŋmɔ Ŋɔɔ! lɛ. Obaanyɛ okɛ saneyitsei 14 ni yɔɔ broshuɔ nɛɛ sɛɛ lɛ atsɔɔ mɔ lɛ ni obi lɛ emli nɔ ni ebaasumɔ ni nyɛsusu he. Eko fɛɛ eko ni ebaahala lɛ, obaanyɛ okɛ lɛ aje nikasemɔ shishi yɛ nakai saneyitso lɛ mli. Ani oka enɛ okwɛ pɛŋ be ni oyaafee sɛɛkuukɛsaramɔ? Broshuɔ ni ji etɛ ni fata Nibii Ni Wɔkɛtsuɔ Nii Kɛtsɔɔ Mɛi Nii lɛ ahe ji, Namɛi Feɔ Yehowa Suɔmɔnaa Nii Ŋmɛnɛ? lɛ. Afee broshuɔ nɛɛ koni wɔkɛtsɔɔ wɔ-Biblia mli nikaselɔi lɛ Yehowa asafo lɛ he nii. Be fɛɛ be ni okɛ mɔ ko baakase Biblia lɛ, esa akɛ okɛ broshuɔ nɛɛ atsu nii. Kɛ́ ootao ole bɔ ni obaafee lɛ ohã lɛ, kwɛmɔ March 2017 Wɔshiɛmɔ Kɛ Wɔshihilɛ Akɛ Kristofoi​—Kpee Nifeemɔ Wolo lɛ mli.

17. (a) Tsɔɔmɔ nɔ tuuntu hewɔ ni afee woji enyɔ ni wɔkɛ mɛi kaseɔ lɛ ateŋ eko fɛɛ eko. (b) Kɛ́ abaptisi Biblia mli nikaselɔ ko po lɛ, mɛni esa akɛ eya nɔ efee? Ni mɛni hewɔ?

¹⁷ Woji. Kɛ́ okɛ mɔ ko je Biblia mli nikasemɔ shishi yɛ broshuɔi lɛ eko mli lɛ, obaanyɛ otsake ni okɛ lɛ abɔi wolo ni ji, Mɛni Wɔbaanyɛ Wɔkase Kɛjɛ Biblia Lɛ Mli? lɛ kasemɔ be fɛɛ be ni osumɔɔ. Wolo nɛɛ baahã mɔ lɛ ale Biblia mli tsɔɔmɔi ni esa akɛ ale klɛŋklɛŋ lɛ jogbaŋŋ. Kɛ́ okɛ mɔ lɛ kase wolo nɛɛ ogbe naa ni ona akɛ eeya ehiɛ lɛ, obaanyɛ okɛ lɛ atsa nikasemɔ lɛ nɔ yɛ wolo ni ji, Bɔ Ni Ooofee Ohi Nyɔŋmɔ Suɔmɔ Lɛ Mli lɛ mli. Wolo nɛɛ baahã nikaselɔ lɛ ale bɔ ni ebaafee ekɛ Biblia mli shishitoo mlai atsu nii yɛ eshihilɛ mli daa gbi. Kaimɔ akɛ, kɛ́ abaptisi nikaselɔ lɛ po lɛ, esa akɛ oya nɔ okɛ lɛ akase nii kɛyashi ebaagbe woji enyɔ lɛ fɛɛ anaa. Kɛ́ ofee nakai lɛ, no baahã ehe awa yɛ hemɔkɛyeli lɛ mli ni eye Yehowa anɔkwa.​—Kanemɔ Kolosebii 2:6, 7.

18. (a) Mɛni 1 Timoteo 4:16 lɛ woɔ mɛi fɛɛ ni tsɔɔ mɛi anɔkwale lɛ hewalɛ ni amɛfee? Ni mɛɛ yibii kpakpai enɛ baawo? (b) Mɛɛ oti esa akɛ wɔkɛma wɔhiɛ?

¹⁸ Akɛni Yehowa Odasefoi ji wɔ hewɔ lɛ, eji wɔsɔ̃ akɛ wɔtsɔɔ mɛi “sane kpakpa lɛ he anɔkwale sane lɛ” koni amɛná naanɔ wala. (Kol. 1:5; kanemɔ 1 Timoteo 4:16.) Ahã wɔ nibii fɛɛ ni he baahia wɔ koni wɔnyɛ wɔtsu sɔ̃ nɛɛ he nii, ni nomɛi ji Nibii Ni Wɔkɛtsuɔ Nii Kɛtsɔɔ Mɛi Nii lɛ. (Kwɛmɔ akrabatsa ni ji, “ Nibii Ni Wɔkɛtsuɔ Nii Kɛtsɔɔ Mɛi Nii” lɛ.) Nyɛhãa wɔ fɛɛ wɔkɛ nibii nɛɛ atsua nii jogbaŋŋ. Kɛ́ wɔkɛ mɔ ko ni yɔɔ wiemɔ lɛ he miishɛɛ kpe lɛ, wɔbaanyɛ wɔkwɛ Nibii Ni Wɔkɛtsuɔ Nii Kɛtsɔɔ Mɛi Nii lɛ ateŋ nɔ ni wɔkɛbaatsu nii kɛ be ni wɔbaafee nakai. Kɛ̃lɛ, esa akɛ wɔhã ehi wɔjwɛŋmɔ mli akɛ, wɔjaraaa wɔwoji lɛ kɛkɛ, ni asaŋ, wɔkɛhãaa mɛi ni bɛ sane ni wɔshiɛɔ lɛ he miishɛɛ. Oti ni ma wɔhiɛ ji, ni wɔye wɔbua ‘mɛi ni yɔɔ tsui kpakpa lɛ,’ ni ji mɛi ni baa amɛhe shi, ni miitao amɛle anɔkwale lɛ, ni miisumɔ ni amɛfee nɔ ni sa Nyɔŋmɔ hiɛ lɛ, koni amɛbatsɔmɔ Kristo kaselɔi.​—Bɔf. 13:48; Mat. 28:19, 20.