1, 2. (a) Iesu ena mauri lalonai edena gaukara ia laloa bada, bona dahaka dainai? (b) ‘Dirava ida ita gaukara hebou taudia’ ai ita lao totona, dahaka ita karaia be namo?

IESU KERISO be kapenta tauna bona hadibaia tauna ta. (Mar. 6:3; Roma 15:8, NWT) Unai gaukara ruaosi ia diba namonamo. Ia be kapenta tauna dainai, tulu idauidau gaukaralaia dalana ia diba bona au idauidau be taunimanima ese gaukaralaia diba gaudia ai ia halaoa. Danu ia be sivarai namona hadibaia tauna dainai, Toretore Helagadia amo ia dibaia gaudia ia gaukaralaia namonamo unai amo taunimanima ia durua Dirava ena Hereva momokani idia lalopararalaia totona. (Mat. 7:28; Luka 24:32, 45) Ena mauri lagani be 30 neganai, kapenta tauna ena gaukara ia rakatania badina ia diba hadibaia tauna ena gaukara be mai anina bada. Ia gwau Dirava ese tanobada dekenai ia siaia ena badina be Dirava ena Basileia sivarai namona do ia harorolaia totona. (Mat. 20:28; Luka 3:23; 4:43) Iesu be ena mauri lalonai haroro gaukarana ia laloa bada, bona ia ura ma haida danu ese unai gaukara idia karaia.​—Mat. 9:35-38.

² Ita ibounai be kapenta taudia ai ita lao diba lasi, to ita be sivarai namona harorolaia taudia ai ita lao diba. Unai gaukara be mai anina bada badina ita be ‘Dirava ida ita gaukara hebou taudia.’ (1 Kor. 3:9; 2 Kor. 6:4) Ita abia dae Iehova ena “hereva ibounai edia anina be momokani.” (Sal. 119:159, 160) Unai dainai, ita ura  iseda haroro gaukara ai ‘hereva momokani ita hadibaia maoromaoro.’ (2 Timoteo 2:15 duahia.) Danu iseda tulu badana Baibel ita gaukaralaia Iehova, Iesu, bona Basileia edia hereva momokani be taunimanima dekenai ita hadibaia namonamo. Iseda haroro gaukarana ita karaia namonamo totona, Iehova ena orea be haroro gaukara ai ita gaukaralaia tulu idauidau idia halasia. Unai dainai gaukaralaia daladia ita diba namonamo be namo. Idia be Hadibaia Gaukara Ena Tulu Idauidau.

3. Nega ia do noho lalonai dahaka be mai anina bada, bona edena dala ai Kara 13:48 ese ita ia durua unai ita karaia totona?

³ Reana do oi laloa dahaka dainai ia be Hadibaia Gaukara Ena Tulu Idauidau, to ita gwau lasi Haroro Gaukara Ena Tulu Idauidau. Badina inai hereva “haroro” ena anina be sivarai ta ita gwauraia, to inai hereva “hadibaia” ena anina be sivarai ta be tau ta ena lalona bona kudouna dekenai ita atoa, unai amo ia dibaia gauna ia badinaia. Nega ia do noho lalonai, mai anina bada gauna be Baibel stadi ita hamatamaia bona taunimanima dekenai hereva momokani ita hadibaia. Unai ena anina be “mauri hanaihanai idia ura kudou-maoro taudia ibounai” ita tahua bona ita durua Dirava idia abidadama henia totona.​—Kara 13:44-48 duahia.

4. Edena dala ai ita diba daidia be “mauri hanaihanai idia ura kudou-maoro taudia” bona edena dala ai idia ita davaria diba?

⁴ Edena dala ai ita diba daidia be “mauri hanaihanai idia ura kudou-maoro taudia”? Aposetolo edia negai, unai bamona taudia be haroro gaukara ai idia davaria. Unai dainai, Iesu ese ia gwauraia herevana ita badinaia, ia gwau: “Umui vareai taoni bona hanua ibounai dekenai kamonai taudia umui tahua.” (Mat. 10:11) Namona be ita diba koikoi taudia, hekokoroku taudia, eiava idia ura lasi Dirava idia badinaia taudia ese sivarai namona do idia abia dae lasi. Ita be mai momokani, manau bona hereva momokani idia ura diba taudia ita tahua. Unai tahua karana be kapenta tauna ena gaukara bamona, hegeregere Iesu ese au maorona ia tahua unai amo ia gaukaralaia iduara, ruma kohudia bona gau ma haida ia karaia totona. Au maorona ia davaria neganai, iena tulu idauidau ia abia bona ena diba ia gaukaralaia gau ta ia karaia totona. Unai hegeregerena, kudou-maoro taudia ita tahua bena iseda hadibaia tulu idauidau ita gaukaralaia, unai amo idia ita durua hadibaia taudia ai idia lao totona.​—Mat. 28:19, 20.

5. Hadibaia Gaukara Ena Tulu Idauidau ai idia noho gaudia amo dahaka ita diba? Haheitalai gwauraia. (Laulau ginigunana itaia.)

⁵ Tulu idauidau be mai edia gaukara idauidau. Hegeregere, mani Iesu ese kapenta gaukara ai ia gaukaralaia tulu idauidau ita laloa. * Au do ia makaia, ia utua, ia dril, ia karaia gauna ena toana hegeregerena ia utua, ena lata bona ena lababa ena bada ia makaia, bona ia utua gaudia ia hakapua hebou totona, tulu idauidau ia gaukaralaia. Unai hegeregerena, Hadibaia Gaukara Ena Tulu Idauidau be mai edia gaukara. Mani inai tulu idauidau gaukaralaia namonamo dalana ita herevalaia.

6, 7. (a) Contact kadi be edena dala ai oi gaukaralaia? (b) Kongrigeisen hebou totona invateisen pepana ena gaukara be dahaka?

⁶ Contact kadi. Inai tulu ese dala ia kehoa taunimanima dekenai ita idia gwauraia hedinarai bona websait idia diba totona. Websait ai idia vareai neganai, diba ma haida idia abia bona Baibel stadi totona idia noinoi diba. Danu jw.org ai taunimanima 400,000 mai kahana be Baibel stadi totona idia noinoi, bona dina ta ta ai handred mai kahana be unai bamona idia karaia! Contact kadi haida oi abia hegaegae diba unai amo dala ia kehoa neganai taunimanima oi haroro henia diba.

⁷ Invateisen pepadia. Kongrigeisen heboudia  dekenai taunimanima ita boiria pepana be mai ena gaukara rua. Ia gwau: “Oi ai boiria Iehova ena Witnes taudia ida Baibel oi stadilaia.” Bona ia hahedinaraia kamonai tauna ta ia ura neganai, “kongrigeisen heboudia dekenai” o “hadibaia tauna ta ida” Baibel ia stadilaia diba. Danu, unai tulu ese ita idia gwauraia hedinarai sibona lasi, to “Dirava dibaia totona idia hitolo taudia” dekenai dala ia kehoa ita ida Baibel idia stadilaia totona. (Mat. 5:3) Herevana Baibel stadi idia abia dae o lasi, to taunimanima be iseda kongrigeisen heboudia dekenai idia lao diba. Bema hebou dekenai idia lao, Baibel amo gau momo do idia dibaia.

8. Taunimanima ita boiria hebou dekenai idia lao ena namo be dahaka? Haheitalai gwauraia.

⁸ Taunimanima ita boiria hebou dekenai idia lao be mai anina bada. Dahaka dainai? Badina bema hebou dekenai idia mai do idia itaia Iehova ena Witnes taudia be Baibel amo hereva momokani idia hadibaia bona taunimanima idia durua Dirava idia dibaia totona, to Babulonia Badana be unai bamona lasi. (Isa. 65:13) Lagani haida gunanai United States ai, headava tau bona hahine ta, Ray bona Linda dekenai unai ia vara. Idia laloa dubu dekenai idia lao be namo. Dirava idia abia dae bona idia ura Ia idia dibaia dainai, edia siti dekenai idia noho dubu ibounai dekenai idia lao. Dubu bona tomadiho idauidau be momo herea. Matamanai Ray bona Linda be tomadiho ta dekenai idia do vareai lasi neganai, gau rua idia ura diba. Gau ginigunana be, tomadiho lalonai gau ta do idia dibaia, bona iharuana be dubu taudia ese idia hadibaia gaudia be edia kara ida ia hegeregere be namo. Herevana lagani momo lalonai edia siti ai idia noho dubu ibounai dekenai idia lao, to idia moale lasi. Badina gau ta idia dibaia lasi, bona dubu idia lao taudia be hemataurai dabua idia hahedokilaia lasi. Edia lista ai ia noho dubu dokona idia lao henia murinai, Linda ia lao gaukara bona Ray ia giroa lou ruma dekenai. Ray be motuka amo ia heau noho lalonai Kingdom Hall ta ia itaia bona ia laloa, ‘Mani unuseniai lau vareai bona lau itaia dahaka idia karaia?’ Ia dekenai ia vara gauna ia laloaboio diba lasi! Kingdom Hall lalonai idia noho taudia ibounai be idia moale bona hemataurai dabua idia hahedokilaia. Ray be vairana kahana ai ia helai bona ia dibaia gaudia ia moalelaia! Aposetolo Paulo ese ia hahedinaraia, tau ta be nega ginigunana Keristani heboudia dekenai ia lao neganai, do ia gwau: “Momokani, Dirava be umui huanai ia noho.” (1 Kor. 14:23-25) Unai nega amo Ray be Sunday ibounai hebou dekenai ia lao, bena wiki ena hebou iboudiai dekenai ia lao danu. Linda danu be hebou ia lao matamaia, bona ena be edia mauri lagani be 70 bamona Baibel stadi idia abia dae bona bapatiso idia abia.

9, 10. (a) Dahaka dainai ia auka lasi pepapepa ita gaukaralaia totona? (b) Pepapepa ladana, Dirava Ena Basileia be Dahaka? be edena dala ai ita gaukaralaia diba?

⁹ Pepapepa. Auka lasi dalanai herevahereva hamatamaia pepapepa eit idia noho. Lagani 2013 ai unai pepapepa idia halasia bona unai nega amo ema bona hari faiv bilioni mai kahana idia printaia vadaeni! Unai tulu ena namo be pepapepa tamona hariharilaia dalana oi diba neganai, pepapepa ibounai do oi hariharilaia diba badina idia ibounai edia sitaelo be tamona. Pepapepa ta be edena dala ai oi gaukaralaia diba ta dekenai hamatamaia herevana oi gwauraia totona?

¹⁰ Reana inai pepapepa, Dirava Ena Basileia be Dahaka? oi gaukaralaia diba. Unai pepapepa ena vairanai ia noho henanadai oi hahedinaraia noho lalonai oi henanadai: “Oi laloa Dirava ena Basileia be dahaka? Do oi gwau . . . ?” Bena oi nanadaia edena haere do ia abia hidi. Ita gwau lasi ena haere be maoro o kerere, to pepapepa ena lalonai inai hereva, “Baibel Ia Gwau” oi hahedinaraia, bona unuseniai idia torea siri Daniela 2:44 bona Isaia 9:6 oi herevalaia. Bema ia hegeregere, oi hereva noho. Dokonai, pepapepa ena murinai kahana, “Mani Oi Laloa” henunai ia noho  henanadai: “Dirava ena Basileia henunai mauri be edena bamona?” oi gaukaralaia. Unai amo lou henia oi karaia diba. Lou henia oi karaia neganai, Dirava Ena Sivarai Namona! ena buklet ai ia noho karoa 7 oi hahedinaraia, unai buklet be ita gaukaralaia Baibel stadi ita hamatamaia totona.

11. Magasin idia karaia ena badina be dahaka, bona dahaka ita laloatao be namo?

¹¹ Magasin. Gima Kohorona bona Noga! magasin be tanobada hegegemadai idia halasia bona idia hahanaia momo. Tanobada hegegemadai ai taunimanima idauidau ese idia duahia dainai, inai magasin ese idia herevalaia gaudia be taunimanima idauidau edia lalona ia veria. Unai tulu ita gaukaralaia taunimanima ita durua hari inai negai mai anina bada gaudia idia laloa bada totona. Laloatao, kamonai taudia dekenai magasin ita do henia lasi neganai, namona be ita diba edena magasin ita henia be maoro.

12. (a) Noga! magasin be daidia totona idia karaia, bona ena badina be dahaka? (b) Inai magasin oi gaukaralaia amo dahaka gau namodia haida oi davaria?

¹² Noga! magasin idia karaia dalana be Baibel idia diba namonamo lasi o diba lasi taudia idia durua totona. Reana idia be Keristani taudia ese idia hadibaia herevadia idia diba lasi, o tomadiho idia abidadama henia lasi, eiava idia diba lasi Baibel ena hakaua herevadia be mai ena namo edia mauri ia durua totona. Noga! magasin idia karaia ena badina be duahia tauna do durua ia laloparara Dirava ia noho. (Roma 1:20; Heb. 11:6) Danu duahia tauna ena abidadama ia hagoadaia bona ia abia dae Baibel “be momokani Dirava ena hereva.” (1 Tes. 2:13) Lagani 2018 ena Noga! magasin edia sinado toi be inai: “Ita Moale Dalana,” “Ruma Bese Ia Moale Daladia 12” bona “Mase Taudia Dainai Idia Lalohisihisi Taudia Durua Daladia.”

13. (a) Gima Kohorona magasin, pablik gauna be daidia totona idia karaia? (b) Inai magasin oi gaukaralaia amo dahaka gau namodia haida oi davaria?

¹³ Gima Kohorona, pablik gauna idia karaia ena badina be Dirava bona ena Hereva idia matauraia taudia totona. Ena be Baibel amo diba haida idia abia, to ena hadibaia herevadia ibounai idia lalopararalaia momokani lasi. (Roma 10:2; 1 Tim. 2:3, 4) Lagani 2018 ena Gima Kohorona toi ese inai henanadai do idia haerelaia: “Hari, Baibel be Ita Ia Durua Diba, A?,” “Vaira Negai be Dahaka Do Ia Vara?,” bona “Dirava be Ita Ia Laloa, A?”

14. (a) Hadibaia Gaukara Ena Tulu Idauidau ai idia noho vidio foa edia gaukara be dahaka? (b) Inai vidio oi gaukaralaia amo dahaka gau namodia haida oi davaria?

¹⁴ Vidio. Iesu ena negai, kapenta tauna be imana amo idia gaukaralaia tulu sibona ia gaukaralaia. Hari iseda negai, kapenta taudia be paua amo idia gaukaralaia tulu​—iri (saw), dril, sander, ikoko kokoa gauna, bona gau ma haida idia gaukaralaia. Idia printaia pablikeisen sibona lasi, to ita be mai iseda vidio namodia haida taunimanima dekenai ita hahedinaraia totona. Inai vidio foa be: Dahaka Dainai Baibel Oi Stadilaia?, Baibel Stadi ai Dahaka Ia Vara?, Kingdom Hall Lalonai Dahaka Ia Vara?, bona Iehova Ena Witnes Taudia​—Idia be Daidia? Vidio haida be haroro ginigunana ai bona haida be lou henia dekenai ita gaukaralaia diba. Unai vidio be namo herea badina taunimanima edia lalona ia veria Baibel idia stadilaia bona iseda hebou dekenai idia mai totona.

15. Ta be ena gado dekenai iseda vidio ta ia itaia ena ekspiriens oi gwauraia.

¹⁵ Haheitalai ta be inai, taihu ta ese Micronesia ia rakatania hahine ta, ena gado be Yapese, ia davaria neganai, taihu ese Dahaka Dainai Baibel Oi Stadilaia? vidio be unai hahine ena gado dekenai ia hahedinaraia. Taihu be unai vidio ia hahedinaraia neganai, unai hahine ia gwau: “Inai be egu gado. Lau moale bada! Inai vidio dekenai ia hereva tauna ena gadona be egu gabu amo ia mai tauna ena gadona bamona! Ia be egu gado ia herevalaia!” Unai murinai, ia gwau ia ese jw.org ai ena gado ai idia noho gaudia do ia itaia bona  duahia. (Kara 2:8, 11 hahegeregerea.) Ekspiriens ma ta oi laloa. United States ai taihu ta be ena kakana ena natuna mero dekenai unai vidio be ena gado dekenai ia siaia. Unai mero ese ia itaia murinai ena lalana dekenai e-mail ia siaia, ia gwau: “Vidio lalonai inai kahana, Diabolo ese inai tanobada ibounai ia biagua, ese egu lalona ia veria. Baibel stadi totona lau noinoi.” Ia be haroro gaukara idia taravatua gabuna ta dekenai ia noho.

16. Inai buklet idauidau edia gaukara oi herevalaia: (a) Dirava Oi Kamonai Henia Bena Oi Mauri Hanaihanai. (b) Dirava Ena Sivarai Namona! (c) Daidia be Hari Iehova Ena Ura Idia Karaia Noho?

¹⁶ Buklet. Edena dala ai hereva momokani be duahiduahi ia diba namonamo lasi o Baibel amo idia hahanaia pablikeisen be ena gado ai ia noho lasi tauna ta dekenai oi hadibaia? Unai bamona taudia durua totona, buklet ladana Dirava Oi Kamonai Henia Bena Oi Mauri Hanaihanai ia noho. * Baibel stadi hamatamaia buklet namona ta be, Dirava Ena Sivarai Namona! Kamonai tauna dekenai buklet ena rau dokonai ia noho karoa ibounai 14 oi hahedinaraia bona oi nanadaia edena karoa ese ena lalona ia veria. Bena ia abia hidi karoa amo stadi oi hamatamaia diba. Lou henia oi karaia neganai, unai dala oi tohoa vadaeni, a? Hadibaia Gaukara Ena Tulu Idauidau ai ia noho buklet ihatoina be, Daidia be Hari Iehova Ena Ura Idia Karaia Noho? Inai buklet ese Baibel stiuden ia durua Iehova ena orea ia heau dalana ia lalopararalaia totona. Baibel stadi ta ta ai unai buklet gaukaralaia dalana oi diba totona, March 2017 Iseda Haroro Bona Mauri Dalana​—Hebou Pepana oi itaia.

17. (a) Unai stadi buka ruaosi edia gaukara be dahaka? (b) Bapatiso idia abia taudia ese dahaka idia karaia be namo, bona dahaka dainai?

¹⁷ Buka. Buklet ta amo stadi oi hamatamaia murinai, inai buka What Can the Bible Teach Us? oi gaukaralaia diba. Unai ese Baibel stiuden do ia durua Baibel ena hadibaia hereva badadia dekenai ena laloparara do ia habadaia. Unai buka umui haorea bona bema stiuden be hereva momokani dekenai ia goada ia lao, How to Remain in God’s Love bukana umui stadilaia diba. * Unai tulu ese stiuden do ia hadibaia edena dala ai ena mauri lalonai Baibel ena hakaua herevadia do ia badinaia. Laloatao, idia bapatiso murinai, namona be unai buka ruaosi idia stadilaia ela bona idia haorea. Unai ese idia do ia durua edia abidadama Dirava dekenai do ia goada bona Ia do idia badinaia noho.​—Kolose 2:6, 7 duahia.

18. (a) Timoteo Ginigunana 4:16 ese ita ia hagoadaia dahaka ita karaia, bona dahaka namo do ia vara? (b) Hadibaia Gaukara Ena Tulu Idauidau ita gaukaralaia neganai, iseda tahua gauna be dahaka?

¹⁸ Ita be Iehova ena Witnes taudia dainai, iseda maduna be taunimanima dekenai “hereva momokani ena sivarai namona” ita hadibaia, unai amo mauri hanaihanai ena dala dekenai idia ita hakaua lao. (Kol. 1:5; 1 Timoteo 4:16 duahia.) Unai ita karaia totona, ita dekenai Hadibaia Gaukara Ena Tulu Idauidau idia noho. (“Hadibaia Gaukara Ena Tulu Idauidau” itaia.) Namona be unai tulu idauidau ita gaukaralaia namonamo. Pablisa ta ta do idia abia hidi kamonai tauna dekenai edena tulu bona edena negai unai do idia gaukaralaia. To ita laloatao, iseda tahua gauna be iseda pablikeisen ita hariharilaia sibona lasi, to ita ura lasi idia kamonai lasi taudia dekenai iseda pablikeisen ita rakatania. To ita ura kara maoromaoro, manau, bona hereva momokani dekenai idia hitolo taudia be hadibaia taudia ai ita halaoa, unai be “mauri hanaihanai idia ura kudou-maoro taudia.”​—Kara 13:48; Mat. 28:19, 20.