1, 2. a) Kʼaru li kʼanjel kixbʼaanu li Jesus, ut kʼaʼut? b) Kʼaru tento tqabʼaanu re naq laaʼaqo «aj tenqʼ re li Yos»?

LI JESUKRIIST kiwank chaq choʼq aj peechʼ ut choʼq aj Tzolonel (Mar. 6:3; Juan 13:13). Li wiibʼ chi kʼanjel aʼin kixbʼaanu chiʼus. Naq kiwank choʼq aj peechʼ kixtzol roksinkil ebʼ li kʼanjelobʼaal re xyiibʼankil li meex, li tem malaj junaq chik. Ut naq kixkʼut li chaabʼil esil, kiroksi ajwiʼ chiʼus li xnawom chirix li Santil Hu re xtenqʼankilebʼ li qas qiitzʼin chi xtawbʼal ru li yaal li wank saʼ li Raatin li Yos (Mat. 7:28; Luc. 24:32, 45). Naq wank chaq 30 chihabʼ re, kixkanabʼ kʼanjelak choʼq aj peechʼ ut kixqʼaxtesi li xyuʼam re xpuktesinkil resil li Xʼawabʼejilal li Yos. Chʼolchʼo chiru naq aʼin li kʼanjel li wank tzʼaqal xwankil, joʼkan naq kixye naq aʼin xyaalal naq kitaqlaak chaq saʼ Ruuchichʼochʼ (Mat. 20:28; Luc. 3:23; 4:43). Li puktesink kiwank xbʼeenwa saʼ li xyuʼam ut kiraj naq ebʼ li junchʼol teʼxbʼaanu ajwiʼ aʼin (Mat. 9:35-38).

² Usta maawaʼo aj peechʼ, abʼan chiqajunilo aj kʼanjel chirix li chaabʼil esil. Li kʼanjel aʼin wank xwankil, ut li Yos ajwiʼ natzʼaqonk chisaʼ. Joʼkan naq, li Santil Hu naxye naq «laaʼo aj tenqʼ re li Yos» (1 Cor. 3:9; 2 Cor. 6:4). Naqanaw naq li yaal aʼan li xxeʼ li Raatin li Yos (Sal. 119:159, 160). Joʼkan naq, naqakʼe qachʼool chi roksinkil «chi us li Aatin re li yaal» (taayaabʼasi 2 Timoteo 2:15). Saʼ xkʼabʼaʼ aʼin, tento tqakʼe qachʼool re roksinkil chiʼus li Santil Hu xbʼaan naq aʼan li xnimal ru li qakʼanjelobʼaal re xkʼutbʼal li yaal  chirix li Jehobʼa, li Jesus ut li Xʼawabʼejilal li Yos. Re naq us t-elq chiqu li kʼanjel aʼin, li xmolam li Jehobʼa naxkʼe qe wiibʼ oxibʼ li kʼanjelobʼaal li tento tqatzol roksinkil ut natawmank saʼ xyanq li kʼanjelobʼaal re kʼutuk.

3. a) Saʼ xkʼabʼaʼ naq yook chi nachʼok li rosoʼjik, chirix kʼaru tento tqakʼe qachʼool? b) Joʼ naxye saʼ Hechos 13:48, ani tento tqasikʼebʼ?

³ Maare naqakʼoxla kʼaʼut nayeemank re, kʼanjelobʼaal re kʼutuk ut inkʼaʼ kʼanjelobʼaal re puktesink. Naq nokooʼaatinak chirix li puktesink, yooko chi aatinak chirix xkʼebʼal li esil. Abʼan, naq nokooʼaatinak chirix li kʼutuk, yooko chi aatinak chirix xchʼolobʼankil li esil re naq li qas qiitzʼin tixtaw ru ut traj xyuʼaminkil li yook xtzolbʼal. Saʼ xkʼabʼaʼ naq yook chi nachʼok li rosoʼjik, tento tqakʼe qachʼool chi xtzolbʼalebʼ li nekeʼraj xnawbʼal ru li Yos ut xkʼutbʼal li yaal. Re xbʼaanunkil aʼin, naʼajmank naq tookʼanjelaq chi kaw re xsikʼbʼalebʼ li qʼunebʼ xchʼool re naq teʼxtaw li junelik yuʼam ut re naq teʼwanq choʼq xmoos li Jehobʼa (taayaabʼasi Hechos 13:44-48).

4. Chanru tooruuq xtawbʼalebʼ li «xaqabʼanbʼilebʼ chi xtawbʼal li junelik yuʼam»?

⁴ Chanru tooruuq xtawbʼalebʼ li «xaqabʼanbʼilebʼ chi xtawbʼal li junelik yuʼam»? Joʼ kikʼulmank saʼ xkutankilebʼ li Apostol, kaʼajwiʼ rikʼin li puktesink. Joʼkan bʼiʼ, tento tqabʼaanu li kixye li Jesus: «Saʼ li tenamit malaj kʼalebʼaal toxexʼokaq wiʼ, patzʼomaq aran ani xkʼulubʼ ulaʼaniik» (Mat. 10:11). Chʼolchʼo chiqu naq inkʼaʼ teʼxkʼulubʼa li esil li inkʼaʼ qʼunebʼ xchʼool, li qʼetqʼetebʼ malaj li inkʼaʼ nekeʼraj xnawbʼal chirix li Yos. Naqasikʼebʼ bʼaan li qʼunebʼ xchʼool ut inkʼaʼ nekeʼxnima xwankil, ut li nekeʼchaqik re chi xsikʼbʼal li yaal. Qakʼehaq jun li eetalil. Naq li Jesus xwank chaq choʼq aj peechʼ, maare toj kixsikʼ chiʼus kʼaru li cheʼ tkʼanjelaq chiru re xbʼaanunkil li meex, li okebʼaal ut li bʼitcheʼ. Naq ak xtaw li cheʼ, kiroksi chiʼus ebʼ li kʼanjelobʼaal re xyiibʼankil li naraj. Joʼkan ajwiʼ tento tqabʼaanu laaʼo, xbʼeenwa tento tqasikʼ li qʼunebʼ xchʼool, ut chirix chik aʼan tqoksi chiʼus li kʼanjelobʼaal re naq ebʼ li qas qiitzʼin teʼoq choʼq xtzolom li Jesus (Mat. 28:19, 20).

5. Chʼolobʼ rikʼin jun li eetalil kʼaru tento tqanaw chirix li junjunq chi kʼanjelobʼaal (taawil ebʼ li jalam u saʼ xtiklajik).

⁵ Ak wank xkʼanjel li junjunq chi kʼanjelobʼaal. Jun eetalil, qakʼoxlaq rix ebʼ li kʼanjelobʼaal li kiroksi tana li Jesus naq xwank chaq choʼq aj peechʼ. * Wank re bʼisok malaj re juchʼuk; wank ajwiʼ, re yokʼok, re jopok malaj re xbʼaanunkil junaq li eetalil, ut wank ajwiʼ, re xtuqubʼankil, re xtiikobʼresinkil malaj re xlaqʼabʼankil. Ut joʼkan ajwiʼ nakʼulmank rikʼin li kʼanjelobʼaal re kʼutuk, ak re re li junjunq. Saʼ xkʼabʼaʼ naq chixjunil wank xwankil, qilaq chanru tooruuq roksinkil.

6, 7. a) Chanru nakaawoksi ebʼ li hu chirix jw? b) Bʼar wank li wiibʼ chi kʼanjel li naxbʼaanu li hu li nabʼoqok saʼ li chʼutam?

⁶ Ebʼ li hu chirix jw. Usta kachʼin ebʼ li kʼanjelobʼaal aʼin, nakʼanjelak chiʼus re xyeebʼal rehebʼ li qas qiitzʼin aniho ut re xkʼutbʼal li qanaʼaj saʼ Internet. Saʼ li naʼaj aʼin, naru nekeʼxtaw xkomon li naʼlebʼ chiqix joʼ ajwiʼ xpatzʼbʼal junaq li tzolok chirix li Santil Hu. Chalen anaqwan, naxqʼax kaahibʼ siʼeent mil chi qas qiitzʼin li ak xeʼxpatzʼ xtzolbʼal chirix li Santil Hu saʼ jw.org. Ut wulaj wulaj chi siʼeent yookebʼ xbʼaanunkil aʼin! Us raj naq junelik wanq qikʼin ebʼ li kokʼ hu aʼin. Chi joʼkan, yalaq joqʼe tooruuq chi aatinak chirix li yaal maakʼaʼ naxye bʼar wanqo.

⁷ Ebʼ li hu re bʼoqok. Ebʼ li hu re xbʼoqbʼalebʼ li qas qiitzʼin saʼebʼ li chʼutam wank wiibʼ xkʼanjel. Naxye re li qas qiitzʼin: «Naqaj naq laaʼat taatzol li Santil Hu rikʼinebʼ laj Testiiw re li Jehobʼa». Chirix chik aʼan, naxye re,  naq truuq xbʼaanunkil saʼebʼ li qachʼutam malaj rikʼin xkʼulubʼankil xtzolbʼal li Santil Hu rikʼin jun aj Testiiw. Joʼkan bʼiʼ, li kʼanjelobʼaal aʼin moko kaʼaj tawiʼ nakʼanjelak re xyeebʼal aniho, nakʼanjelak ajwiʼ re xbʼoqbʼalebʼ «li nebʼaʼebʼ li xchʼool» malaj li chʼolchʼo chiruhebʼ naq aajel ru xnawbʼal ru li Yos re naq teʼxtzol qikʼin li Santil Hu (Mat. 5:3). Chixjunilebʼ kʼulbʼilebʼ chiʼus saʼebʼ li qachʼutam, usta inkʼaʼ naxkʼulubʼa xtzolbʼal li Santil Hu. Wi twulaq, tixkʼe reetal joʼnimal tixtzol chirix li Santil Hu.

8. Kʼaʼut aajel ru naq ebʼ li qas qiitzʼin teʼwulaq saʼebʼ li qachʼutam usta jun sut ajwiʼ? Kʼe jun li eetalil.

⁸ Kʼaʼut aajel ru naq inkʼaʼ tqakanabʼ bʼoqbʼalebʼ li qas qiitzʼin re naq teʼwulaq saʼebʼ li qachʼutam usta jun sut ajwiʼ? Xbʼaan naq chi joʼkan teʼxkʼe reetal naq ebʼ laj Testiiw re li Jehobʼa nekeʼxkʼut li yaal li wank saʼ li Santil Hu ut nekeʼxtenqʼa ebʼ li qas qiitzʼin chi xnawbʼal ru li Yos, abʼan, ebʼ li bʼalaqʼil paabʼal inkʼaʼ nekeʼxbʼaanu aʼin (Is. 65:13). Ut aʼin kixkʼul laj Ray ut li xLinda jun li sumal re Estados Unidos. Nekeʼxpaabʼ naq wank jun Yos ut nekeʼrataw xik saʼ li Iglees re xnawbʼal ru chiʼus. Joʼkan naq, xeʼok chi xik saʼ chixjunil li Iglees. Saʼ li tenamit aʼan wank chi lajeetq li Iglees ut naabʼal li paabʼal. Xeʼxye naq teʼkanaaq saʼ junaq li Iglees wi teʼril wiibʼ li chaabʼil naʼlebʼ. Xbʼeen, wi teʼxtzol junaq li naʼlebʼ naq wanqebʼ aran. Ut xkabʼ, wi chaabʼil teʼxtiqibʼ ribʼ li teʼwulaq aran. Saʼ xnumikebʼ li chihabʼ, ak xeʼwulatjeʼk saʼ chixjunil ebʼ li paabʼal ut inkʼaʼ sa nekeʼrekʼa ribʼ xbʼaan naq maakʼaʼ xeʼxtzol ut moko us ta tiqibʼanbʼilebʼ li wankebʼ saʼ li Iglees. Naq xeʼraqeʼk chi xyalbʼal chixjunil ebʼ li Iglees ut xeʼelk, li xLinda xkoho saʼ li xkʼanjel ut laj Ray xkoho saʼ rochoch. Yook chi xik laj Ray, naq kiril jun li Chʼutlebʼaal Kabʼl rehebʼ laj Testiiw re li Jehobʼa, tojaʼ naq kixkʼoxla: «Us raj naq tinʼoq ut twil kʼaru nekeʼxbʼaanu». Joʼ nakʼulmank rajlal, kʼajoʼ xwulak chiru! Li wankebʼ saʼ li chʼutam sa xeʼaatinak rikʼin ut chaabʼil tiqibʼanbʼilebʼ. Laj Ray kichunlaak toj chiru ut xwulak chiru li kixtzol. Kikʼulmank tzʼaqal joʼ kixye li Apostol Pablo chirixebʼ li nekeʼwulak saʼ li chʼutam xbʼeen sut: «Relik chi yaal li Yos wank saʼ eeyanq» (1 Cor. 14:23-25). Chalen aran, laj Ray inkʼaʼ kixkanabʼ wulak rajlal Domingo saʼ li chʼutam ut chirix chik aʼan saʼ chixjunil li chʼutam saʼ tiikil xamaan. Li xLinda kiʼok rochbʼeninkil. Usta naxqʼax 70 chihabʼ rehebʼ, xeʼxkʼulubʼa xtzolbʼal chirix li Santil Hu ut xeʼkubʼeek xhaʼ.

9, 10. a) Kʼaʼut moko chʼaʼaj ta roksinkil ebʼ li tratado? b) Chʼolobʼ chanru tooruuq roksinkil li tratado Kʼaru li Xnimajwal Awabʼejilal li Yos?

⁹ Ebʼ li tratado. Wank waqxaqibʼ li tratado ut moko chʼaʼaj ta roksinkil ut nokooʼeʼxtenqʼa re naq tqatikibʼ aatinak. Saʼ li chihabʼ 2013 xeʼxtikibʼ risinkil chi huhil ut xeʼrisi tana oobʼ mil miyon chi hu. Ut wi naqatzol roksinkil jun rehebʼ li hu aʼin, tooruuq roksinkil li waqxaqibʼ xbʼaan naq juntaqʼeet yiibʼanbʼilebʼ. Chanru tooruuq roksinkil ebʼ li hu aʼin re naq tqatikibʼ aatinak?

¹⁰ Qayehaq naq yooko xkʼoxlankil naq tqoksi li tratado, Kʼaru li Xnimajwal Awabʼejilal li Yos? Naru naqakʼut chiruhebʼ li qas qiitzʼin li naxye chiru li hu ut tqaye re: «Ma ak xaakʼoxla jun sutaq Kʼaru li Xnimajwal Awabʼejilal li Yos? Bʼar wank re li oxibʼ chi naʼlebʼ aʼin naru naqaye naq aʼan xsumenkil?». Miqaye re ma us malaj inkʼaʼ us xsumenk, toonumeʼq saʼ li jun chik perel ut tqakʼut chiru li tasal «Li Santil Hu naxye» ut tqayaabʼasi Daniel 2:44 ut Isaias 9:6 li wank chi tzʼiibʼanbʼil. Wi naruhank, tqakʼe xtzʼaqobʼ li esil. Ut re xraqbʼal, kʼut li patzʼom li wank chirix li hu li wank rubʼel li aatin «Kʼoxla li patzʼom aʼin»: «Chanruhaq li qayuʼam naq wanqo rubʼel Xʼawabʼejilal li Yos?». Chi joʼkan tqakanabʼ jun li patzʼom re xsumenkil saʼ jun sut chik.  Naq toowulaq chi rulaʼaninkil li qas qiitzʼin, naru naqakʼut chiru li tzolom 7 re li folleto Li Chaabʼil Esil li Nachalk Rikʼin li Yos, aʼin jun rehebʼ li kʼanjelobʼaal re xtzolbʼalebʼ li qas qiitzʼin.

11. Kʼaʼut kʼoxlanbʼil chiʼus ebʼ li qahu, ut kʼaru tento tqanaw chirix?

¹¹ Ebʼ li hu. La Atalaya ut li hu ¡Despertad! saʼ Español, aʼan ebʼ li hu li jalbʼil ru saʼ naabʼal chi aatinobʼaal ut yalaq bʼar re li Ruuchichʼochʼ nawulak. Saʼ xkʼabʼaʼ naq naʼilmank ru saʼ naabʼal chi tenamit, li naʼlebʼ li nakʼemank chiru li hu nasikʼmank chiʼus re xqʼunbʼesinkilebʼ li qas qiitzʼin re chixjunil li ruuchichʼochʼ. Tento tqoksi re xqʼunbʼesinkilebʼ li qas qiitzʼin re naq teʼxkʼe reetal kʼaru wank tzʼaqal xwankil saʼebʼ li qakutan. Abʼanan, re xnawbʼal ani xkʼulubʼ li qahu, tento tqanaw ani aj e yiibʼanbʼil li junjunq.

12. a) Choʼq re anihebʼ kʼubʼanbʼil li hu ¡Despertad! saʼ Español, ut kʼaru aj e? b) Kʼaru li chaabʼil naʼlebʼ xaawil naq xaawoksi li kʼanjelobʼaal aʼin?

¹² Li hu ¡Despertad! saʼ Español yiibʼanbʼil choʼq rehebʼ li nekeʼxnaw bʼayaq malaj maakʼaʼ chirix li Santil Hu. Maare maakʼaʼ nekeʼxnaw chirix li xkʼutum li Kriist, nekeʼok xkʼaʼuxl chirix li paabʼal malaj inkʼaʼ nekeʼxnaw naq saʼ li Santil Hu wank li naʼlebʼ li naru nekeʼxyuʼami. Jun rehebʼ li xnimal ru xyaalal naq yiibʼanbʼil li hu aʼin aʼan re xqʼunbʼesinkilebʼ li qas qiitzʼin re naq teʼxnaw naq wank jun Yos (Rom. 1:20; Heb. 11:6). Naxtenqʼa ajwiʼ li qas qiitzʼin chi xpaabʼankil naq li Santil Hu aʼan tzʼaqal li Raatin li Yos (1 Tes. 2:13). Li oxibʼ xjolomil li naʼlebʼ li tkʼemanq chiruhebʼ li qahu choʼq re li chihabʼ 2018 aʼan: «El camino de la felicidad», «12 claves para una familia feliz» ut «Ayuda para quienes están de duelo».

13. a) Choʼq re anihebʼ yiibʼanbʼil li hu La Atalaya li kʼubʼanbʼil re xyeechiʼinkil? b) Kʼaru li chaabʼil naʼlebʼ xaataw rikʼin roksinkil li kʼanjelobʼaal aʼin?

¹³ Li hu La Atalaya saʼ Español li kʼubʼanbʼil re xyeechiʼinkil naxchʼolobʼ li naxkʼut li Raatin li Yos chiruhebʼ li qas qiitzʼin li nekeʼroxloqʼi li Yos ut li Santil Hu. Maare nekeʼxnaw bʼayaq chirix li Santil Hu abʼan inkʼaʼ nekeʼxtaw ru chiʼus li naxkʼut (Rom. 10:2; 1 Tim. 2:3, 4). Li oxibʼ xjolomil li naʼlebʼ li tkʼemanq chiruhebʼ li qahu choʼq re li chihabʼ 2018 naxsume ebʼ li patzʼom aʼin: «¿Sigue siendo útil la Biblia?», «¿Qué encierra el futuro?» ut «¿Piensa Dios en usted?».

14. a) Chanru nakʼanjelak ebʼ li bʼideo li wank saʼ li kʼanjelobʼaal re kʼutuk? b) Kʼaru li chaabʼil naʼlebʼ xaawil naq xaawoksi ebʼ li bʼideo aʼin?

¹⁴ Ebʼ li bʼideo. Saʼ xkutankil li Jesus, ebʼ li xkʼanjelobʼaal ebʼ laj peechʼ kaʼajwiʼ wank saʼ uqʼej, abʼan saʼebʼ li qakutan wank ebʼ li kʼanjelobʼaal li nekeʼoksimank rikʼin lus joʼ li chʼiichʼ re yokʼok, re hopok, re jiʼok ut re tʼojok. Joʼkan ajwiʼ nakʼulmank rikʼinebʼ li kʼanjelobʼaal li wank chi huhil, anaqwan wank chik ebʼ li bʼideo li kʼajoʼ nekeʼtenqʼank. Saʼ xyanq li kʼanjelobʼaal re kʼutuk wank li bʼideo, Kʼaʼut us naq tattzoloq chirix li Santil Hu?, Chanru natzolmank li Santil Hu?, Kʼaru nabʼaanumank saʼebʼ li Chʼutlebʼaal Kabʼl rehebʼ laj Testiiw? ut, Aniho laj Testiiw re li Jehobʼa? Li inkʼaʼ naxqʼax wiibʼ kʼasal naru naʼoksimank saʼ li kʼanjel, raatinankil xbʼeen sut. Ut li najt bʼayaq roq naru naʼoksimank choʼq re li ulaʼanink ut choʼq rehebʼ li wankebʼ xhoonal re abʼink. Ebʼ li kʼanjelobʼaal aʼin naru naʼekʼasink rehebʼ li qas qiitzʼin re naq teʼraj xtzolbʼal li Santil Hu ut wulak saʼebʼ li chʼutam.

15. Yaabʼasi jun li eetalil bʼarwiʼ naxkʼut kʼaru nekeʼxye ebʼ li qas qiitzʼin naq nekeʼril li bʼideo saʼ li raatinobʼaal.

¹⁵ Qilaq kʼaru nekeʼxye ebʼ li qas qiitzʼin chirix ebʼ li bʼideo. Jun li qechpaabʼanel ixq kixtaw jun li qanaʼchin li xchalk chaq Micronesia ut li qechpaabʼanel kixkut chiru li bʼideo Kʼaʼut us naq tattzoloq chirix li Santil Hu?  saʼ Yapes li xbʼeen raatinobʼaal li qanaʼchin. Naq kitiklaak li bʼideo, li qanaʼchin kixye: «Inkʼaʼ ninpaabʼ, wank saʼ li waatinobʼaal! Li xyaabʼ xkux li winq li yook chi aatinak chanchan xyaabʼ xkuxebʼ li wankebʼ saʼ linteep. Naxnaw li waatinobʼaal!». Chirix chik aʼan, kixye naq tixyaabʼasi ut tril chixjunil li wank saʼ jw.org saʼ Yapes (juntaqʼeeta rikʼin Hechos 2:8, 11). Jun chik li eetalil chirix jun li qechpaabʼanel ixq re Estados Unidos li kixtaqla re li rikaqʼ li xjayalil li bʼideo aʼin li wank saʼ li raatinobʼaal re naq tril. Naq ak ril li bʼideo, li rikaqʼ kixtzʼiibʼa saʼ jun li korreo bʼarwiʼ kixye: «Li qʼaxal kiwulak chiwu aʼan bʼarwiʼ naxye naq jun li musiqʼej li wank xwankil ut xikʼ naʼilok, aʼan li najolomink re li ruuchichʼochʼ. Xinpatzʼ intzolbʼal chirix li Santil Hu». Li rikaqʼ wank saʼ jalan chik tenamit bʼarwiʼ ramro li qakʼanjel.

16. Chʼolobʼ chanru nekeʼkʼanjelak li junjunq chi folleto: a) Chaapaabʼ li Yos re naq Twanq Aayuʼam chi Junelik. b) Li Chaabʼil Esil li Nachalk Rikʼin li Yos. c) Anihebʼ Yookebʼ Xbʼaanunkil li Rajom li Jehobʼa saʼebʼ li Qakutan?

¹⁶ Ebʼ li folleto. Wi junaq li qas qiitzʼin inkʼaʼ naxnaw ilok hu chiʼus malaj maakʼaʼ ebʼ li hu chirix li Santil Hu saʼ li raatinobʼaal, chanru tooruuq xkʼutbʼal chiru li yaal? Wank jun li chaabʼil kʼanjelobʼaal: li folleto Chaapaabʼ li Yos re naq Twanq Aayuʼam chi Junelik. * Jun chik li kʼanjelobʼaal re naq tqatikibʼ xtzolbʼal junaq li qas qiitzʼin aʼan li folleto Li Chaabʼil Esil li Nachalk Rikʼin li Yos. Naru naqakʼut chiru li kaalaju chi naʼlebʼ li wank saʼ xraqik li hu, tqapatzʼ re bʼar wank nawulak chiru ut tooʼoq xtzʼilbʼal rix rikʼin. Ma ak xqabʼaanu aʼin rikʼin li naqulaʼanihebʼ? Li rox folleto li wank saʼ li kʼanjelobʼaal re kʼutuk aʼan Anihebʼ Yookebʼ Xbʼaanunkil li Rajom li Jehobʼa saʼebʼ li Qakutan? Li hu aʼin yiibʼanbʼil re naq ebʼ li tzolom teʼoq saʼ li xmolam li Yos. Re xnawbʼal chanru roksinkil, naru naqatzʼil rix li Xhuhil li qachʼutam Qayuʼam ut Qakʼanjel joʼ aj Paabʼanel re li po Marzo 2017.

17. a) Kʼaru xkʼanjel li junjunq chi tasal hu re tzolok? b) Kʼaru tento teʼxbʼaanu li nekeʼkubʼeek xhaʼ, ut kʼaʼut?

¹⁷ Ebʼ li tasal hu. Wi xqatikibʼ xtzolbʼal junaq li qas qiitzʼin rikʼin jun rehebʼ li folleto, naru naqanumsi saʼ li tasal hu Kʼaru tzʼaqal naxchʼolobʼ li Santil Hu? ut yalaq joqʼe naru naqabʼaanu aʼin. Saʼ xkʼabʼaʼ li kʼanjelobʼaal aʼin, laatzolom tixtzol chiʼus li xbʼeen naʼlebʼ li wank saʼ li Santil Hu. Wi li qatzolom xchoy li tasal hu ut yook chi kʼiik saʼ li xpaabʼal, tooʼoq xtzolbʼal rikʼin li hu Chexwanq junelik saʼ «xrahom li Yos». Li tasal hu aʼin tixkʼut chiru xyuʼaminkil wulaj wulaj li naʼlebʼ li naxkʼe li Santil Hu. Qajultikaq naq ebʼ li qatzolom tento teʼxchoy li wiibʼ chi hu aʼin usta ak xeʼkubʼeek xhaʼ. Chi joʼkan kaw xaqxoqebʼ saʼebʼ li xpaabʼal (taayaabʼasi Colosenses 2:6, 7).

18. a) Joʼ naxye saʼ 1 Timoteo 4:16, kʼaru tento tqabʼaanu, ut kʼaru rusilal tqataw? b) Kʼaru naqaj xtawbʼal rikʼin roksinkil li kʼanjelobʼaal re kʼutuk?

¹⁸ Ebʼ laj Testiiw re li Jehobʼa tento tqapuktesi li yaal li naru nakʼamok rehebʼ li qas qiitzʼin saʼ li junelik yuʼam (Col. 1:5; taayaabʼasi 1 Timoteo 4:16). Re naq tooruuq xbʼaanunkil aʼin, kʼebʼil qe li kʼanjelobʼaal re kʼutuk bʼarwiʼ wank chixjunil li nakʼanjelak chiqu (taawil li kaaxukuut « Li kʼanjelobʼaal re kʼutuk»). Qoqsihaq chiʼus li kʼanjelobʼaal aʼin. Yaal re li junjunq aj puktesinel kʼaru li kʼanjelobʼaal troksi ut joqʼe tixbʼaanu. Abʼan, misachk saʼ qachʼool naq li qakʼanjel maawaʼ jekʼink hu. Chi moko xkanabʼankil rehebʼ li inkʼaʼ nekeʼxkʼutbʼesi naq nekeʼwulak chiru li esil. Qajultikaq naq li naqaj aʼan naq li «xaqabʼanbʼilebʼ chi xtawbʼal li junelik yuʼam» teʼoq choʼq xtzolom li Kriist. Ebʼ li qas qiitzʼin aʼin aʼanebʼ li qʼunebʼ xchʼool ut inkʼaʼ nekeʼxnima xwankil, ut nekeʼchaqik re chi xsikʼbʼal li yaal (Hech. 13:48; Mat. 28:19, 20).