1, 2. (a) Nĩ wĩra ũrĩkũ Jesu oonaga ũrĩ wa bata makĩria ũtũũro-inĩ wake, na nĩkĩ? (b) Nĩ ũndũ ũrĩkũ tũrabatara gwĩka nĩgetha tũgĩe na moimĩrĩro mega tũrĩ “arutithania wĩra hamwe na Ngai”?

JESU KRISTO aarĩ bundi wa mbaũ na mũrutani. (Mar. 6:3; Joh. 13:13) Nĩ aagĩte na ũũgĩ biũ maũndũ-inĩ macio merĩ. Arĩ bundi wa mbaũ nĩ eerutĩte kũhũthĩra indo cia gũtura, gũthondeka mbaũ igatuĩka indo ingĩhũthĩka. Arĩ mũrutani wa ũhoro ũrĩa mwega, nĩ aahũthagĩra na njĩra njega ũmenyo ũrĩa aarĩ naguo wa Maandĩko gũteithia andũ a kĩrathi gĩa thĩ mataũkĩrũo nĩ ma cia Kiugo kĩa Ngai. (Mat. 7:28; Luk. 24:32, 45) Jesu arĩ na mĩaka 30, nĩ aatiganire na ũbundi wa mbaũ tondũ nĩ aamenyaga atĩ wĩra ũrĩa wa bata mũno nĩ wa kũrutana. Ooigire atĩ wĩra wa kũhunjia ũhoro ũrĩa mwega wa Ũthamaki wa Ngai warĩ gĩtũmi kĩmwe kĩrĩa gĩatũmĩte Ngai amũtũme gũkũ thĩ. (Mat. 20:28; Luk. 3:23; 4:43) Jesu aatuire ũtungata wĩra ũrĩa wa bata makĩria ũtũũro-inĩ wake, na nĩ eendaga arĩa angĩ manyitanĩre nake wĩra-inĩ ũcio.—Mat. 9:35-38.

² No tũkorũo tũtarĩ mabundi a mbaũ ta Jesu, ĩndĩ tũrĩ arutani a ũhoro ũrĩa mwega. Wĩra ũcio nĩ wa bata mũno tondũ nĩ ũhutanĩtie na Ngai. O na twĩtagwo “arutithania wĩra hamwe na Ngai.” (1 Kor. 3:9; 2 Kor. 6:4) Nĩ twĩtĩkĩtie atĩ ‘ũhoro wothe ũrĩa Jehova oigĩte, mũigana waguo no ma.’ (Thab. 119:159, 160) Nĩkĩo tũngĩenda gũtigĩrĩra atĩ nĩ ‘tũrahũthĩra wega kiugo kĩa ũhoro ũrĩa wa ma’ ũtungata-inĩ witũ. (Thoma 2 Timotheo 2:15.) Gũkĩrĩ ũguo-rĩ, tũikaraga tũkĩnooraga ũhoti witũ wa kũhũthĩra Bibilia, tondũ nĩyo  kĩndũ kĩrĩa kĩnene tũhũthagĩra kũrutana ũhoro wa ma wĩgiĩ Jehova, Jesu, na Ũthamaki. Nĩgetha tũgĩe na moimĩrĩro mega ũtungata-inĩ, ithondeka rĩa Jehova nĩ rĩthondekete indo ingĩ cia bata na nĩ tũrabatara kũmenya gũcihũthĩra wega. Indo icio ikoragwo thĩinĩ wa Gathandũkũ Gaitũ ka Indo cia Kũrutana.

3. Muoroto witũ wagĩrĩire gũkorũo ũrĩ ũrĩkũ ihinda-inĩ rĩrĩa tũtigarĩtie rĩa kũruta ũira? Atũmwo 13:48 ĩtũteithagia atĩa gwĩka ũguo?

³ No gũkorũo nĩ ũrigagwo nĩkĩ getagwo Gathandũkũ ka Indo cia Kũrutana handũ ha Gathandũkũ ka Indo cia Kũhunjia. “Kũhunjia” nĩ kũheana ndũmĩrĩri, no “kũrutana” nĩ gũtigĩrĩra atĩ ndũmĩrĩri ĩyo nĩ yarikĩra meciria-inĩ na ngoro-inĩ ya mũndũ, ũũ atĩ nĩ egũtindĩkwo gwĩka kũringana na ũrĩa areruta. Ihinda rĩrĩa tũtigarĩtie rĩa kũruta ũira, muoroto witũ wagĩrĩire gũkorũo ũrĩ kwambĩrĩria kwĩruta Bibilia na andũ na kũruta andũ ũhoro wa ma. Ũguo nĩ kuuga tũcarie na kĩyo arĩa othe marĩ na “mwerekera ũrĩa wagĩrĩire wa kũheo muoyo wa tene na tene” na tũmateithie matuĩke etĩkia.—Thoma Atũmwo 13:44-48.

4. Tũngĩhota atĩa kũmenya arĩa marĩ na “mwerekera ũrĩa wagĩrĩire wa kũheo muoyo wa tene na tene”? Tũngĩmona atĩa?

⁴ Tũngĩhota atĩa kũmenya arĩa marĩ na “mwerekera ũrĩa wagĩrĩire wa kũheo muoyo wa tene na tene”? O ta ũrĩa gwatariĩ thĩinĩ wa karine ya mbere, njĩra ĩrĩa tu tũngĩmamenya nayo nĩ kũgerera kũhunjia. Nĩ ũndũ ũcio, tũrabatara gwĩka o ta ũrĩa Jesu aathanire: “Taũni o yothe mũrĩtonya kana itũũra, cariai mũndũ ũrĩa ũrĩ kuo wagĩrĩire.” (Mat. 10:11) Tũtiĩrĩgagĩrĩra andũ marĩ na ũhinga, andũ matarĩ enyihia, kana andũ matendete maũndũ ma kĩĩroho maamũkĩre ũhoro mwega na njĩra njega. Tũcaragia andũ arĩa matarĩ ũhinga, enyihia, na manyoteire ũhoro wa ma. Gũcaria kũu no tũkũringithanie na ũrĩa Jesu, arĩ bundi wa mbaũ angĩkorũo eekaga agĩcaria mbaũ iria ciagĩrĩire cia gũthondeka indo ta mĩrango, macoki, kana indo ingĩ. Arĩkia kuona mbaũ iria ciagĩrĩire, akoya gathandũkũ gake ka indo cia gwaka, akahũthĩra ũũgĩ wake, na agathondeka kĩndũ kĩrĩa arenda. O na ithuĩ no mũhaka twĩke o ta ũguo rĩrĩa tũrerutanĩria gũcaria andũ arĩa marĩ na ngoro njega tũmatue arutwo.—Mat. 28:19, 20.

5. Tũrabatara kũmenya ũndũ ũrĩkũ wĩgiĩ indo iria irĩ Gathandũkũ-inĩ Gaitũ ka Indo cia Kũrutana? Heana ngerekano. (Rora mbica kĩambĩrĩria-inĩ gĩa gĩcunjĩ gĩkĩ.)

⁵ Kĩndũ o gĩothe thĩinĩ wa gathandũkũ ka indo cia gwaka nĩ kĩrĩ wĩra wakĩo. Kwa ngerekano-rĩ, ta wĩcirie indo iria Jesu angĩkorũo aahũthagĩra arĩ bundi wa mbaũ. * Aabataraga indo cia gũthima, gũkurura, gũtinia, gũtũra marima, na gũconga mbaũ, o hamwe na cia kũiganania na kũnyitithania icunjĩ. Ũndũ ũmwe na ũcio, o kĩndũ thĩinĩ wa Gathandũkũ Gaitũ ka Indo cia Kũrutana nĩ kĩrĩ wĩra wakĩo. Rĩu tũkwarĩrĩria gathandũkũ gaitũ tuone ũrĩa tũngĩhũthĩra indo cia bata iria tũheetwo.

6, 7. (a) Hihi ũhotete kũhũthĩra tũkandi atĩa? (b) Tũratathi twa kũnyita andũ ũgeni mĩcemanio-inĩ tũhingagia maũndũ marĩkũ merĩ?

⁶ Tũkandi twa jw.org. Tũkoragwo tũrĩ tũnini, ĩndĩ nĩ twa bata mũno harĩ kwĩmenyithania kũrĩ andũ na kũmateithia maingĩre thĩinĩ wa website itũ. Maingĩra thĩinĩ wa website ĩyo, no merute ũhoro witũ makĩria na o na mahoe wĩruti wa Bibilia. Gũkinyĩria rĩu, makĩria ma andũ 400,000 nĩ mahoete wĩruti wa Bibilia kũgerera website itũ, na angĩ aingĩ nĩ mekaga ũguo o mũthenya! O nawe no ũkuuage tũkandi tũigana ũna nĩguo ũkahũthĩra mweke o wothe ũngĩĩyumĩria kũhunjia o ũgĩthiaga na mbere na mĩhang’o yaku ya o mũthenya.

⁷ Tũratathi twa Kũnyita Andũ Ũgeni. Karatathi ga kũnyita andũ ũgeni mĩcemanio-inĩ kahingagia maũndũ merĩ. Koigaga ũũ: “Nĩ ũranyitwo ũgeni wĩrute Bibilia na Aira a Jehova.”  Gagacoka gagateithia mũndũ, ũrĩa angĩka ũguo “mĩcemanio-inĩ iitũ” ‘kana agĩteithĩrĩrio nĩ mũndũ.’ Karatathi kau nĩ gatũmenyithanagia kũrĩ andũ na gakanyita ũgeni “arĩa marũmbũyagia mabataro mao ma kĩĩroho” merute Bibilia hamwe na ithuĩ. (Mat. 5:3) Andũ nĩ makoragwo manyitĩtwo ũgeni mĩcemanio-inĩ itũ gũtekũmakania kana nĩ mareruta Bibilia kana matireruta. Mangĩũka mĩcemanio, no mone na merute maũndũ maingĩ megiĩ Bibilia.

8. Nĩ ũguni ũrĩkũ ũngiumana na andũ gũka na arĩ mũcemanio-inĩ ũmwe? Heana ngerekano.

⁸ Nĩ harĩ bata tũthiĩ na mbere kũnyita andũ ũgeni moke na arĩ mũcemanio-inĩ ũmwe. Nĩkĩ? Tondũ moka nĩ mekwĩyonera atĩ Aira a Jehova marutanaga ũhoro wa ma kuuma Bibilia-inĩ na magateithia andũ mamenye Ngai, ũndũ ũrĩa ndini cia maheeni itekaga. (Isa. 65:13) Ray na mũtumia wake Linda thĩinĩ wa Amerika (US) nĩ meeyoneire ũndũ ũcio mĩaka ĩigana ũna mĩhĩtũku. Nĩ maatuire itua rĩa kwambĩrĩria gũthiĩ kanitha. Nĩ meetĩkĩtie Ngai na nĩ maaiguaga marĩ na nyota wa kĩĩroho, kwoguo makĩambĩrĩria gũthiĩ kanitha ciothe iria ciarĩ taũni-inĩ yao, ĩmwe thutha wa ĩrĩa ĩngĩ. Maathiũrũrũkĩirio nĩ kanitha nyingĩ mũno. Kuuma o kĩambĩrĩria-inĩ, Ray na Linda meeigĩire maũndũ merĩ marĩa mangĩarorire nĩgetha mamenye kanitha ĩrĩa marĩthiaga. Ũndũ wa mbere, kanitha ĩrĩa mangĩathire, meendaga moime merutĩte ũndũ mũna, wa kerĩ, andũ a kanitha ĩyo makorũo mehumbĩte ta andũ maroiga nĩ maratungatĩra Ngai. Thutha wa mĩaka ĩigana ũna, nĩ maathiĩte kanitha ciothe taũni-inĩ ĩyo, ĩndĩ nĩ maakuĩte ngoro. Matirĩ ũndũ meerutĩte, naguo mwĩhumbĩre wa andũ kanitha-inĩ icio ndwarĩ wa gĩtĩo. Thutha wa kuuma kanitha ya mũico harĩ iria maabangĩte, Linda aathiire wĩra nake Ray akĩinũka. Ray arĩ njĩra, akĩhĩtũkĩra handũ haarĩ na Nyũmba ya Ũthamaki na akĩĩra, ‘Githĩ to nyingĩre gũkũ nyone ũrĩa gũtariĩ?’ Nĩ aakeneire ũndũ ũcio mũno! Andũ othe thĩinĩ wa Nyũmba ya Ũthamaki maamwamũkĩrire wega na ũrata na meehumbĩte na njĩra njega. Ray aaikarire itĩ cia mbere na nĩ aakenirio nĩ maũndũ marĩa eerutire! Gwathiire o ta ũrĩa mũtũmwo Paulo ooigire igũrũ rĩgiĩ mũndũ ũũkĩte mĩcemanio-inĩ ya Gĩkristiano riita rĩa mbere na akoiga: “Hatarĩ nganja Ngai arĩ gatagatĩ-inĩ kanyu.” (1 Kor. 14:23-25) Thutha ũcio Ray akĩambĩrĩria gũthiĩ mĩcemanio ya Kiumia ategũtĩrĩria; agĩcoka akĩambĩrĩria gũthiĩ Mũcemanio wa Ũtũũro na Ũtungata ategũtĩrĩria. Linda o nake nĩ aambĩrĩirie gũthiĩ mĩcemanio, na o na marĩ mĩaka-inĩ ya 70, nĩ meetĩkĩrire kwĩruta Bibilia na makĩbatithio.

9, 10. (a) Nĩkĩ nĩ ũndũ mũhũthũ kũhũthĩra trakti citũ? (b) Taarĩria ũrĩa mũndũ angĩhũthĩra trakti ya Ũthamaki wa Ngai nĩ Kĩĩ?

⁹ Trakti. Tũkoragwo na trakti inyanya hũthũ kũhũthĩra, na nĩ ikoragwo irĩ indo njega cia kwambĩrĩria ndeereti. Kuuma rĩrĩa trakti icio ciambĩrĩirie kũrutwo mwaka wa 2013, kobĩ bilioni ithano nĩ icabĩtwo! Ũndũ ũrĩa mwega harĩ trakti ici nĩ atĩ wamenya kũhũthĩra ĩmwe, nĩ ũndũ mũhũthũ kũhũthĩra icio ingĩ ciothe tondũ ikoragwo ibangĩtwo ũndũ ũmwe. Ũngĩhota atĩa kũhũthĩra trakti kwambĩrĩria ndeereti?

¹⁰ No ũthuure kũhũthĩra trakti Ũthamaki wa Ngai nĩ Kĩĩ? Onia mũndũ kĩũria kĩrĩa kĩrĩ mbere na ũmũũrie: “Hihi nĩ ũrĩ weyũria Ũthamaki wa Ngai nĩ Kĩĩ? Hihi ũngiuga nĩ . . . ?” Ũcoke ũmũũrie angĩthuura ũndũ ũrĩkũ harĩ macokio macio matatũ maheanĩtwo hau. Ũtekũmwĩra kana nĩ amenya kana ndanamenya, humbũria mwena wa thĩinĩ gacunjĩ ka “Ũrĩa Bibilia Yugaga,” na ũmuonie maandĩko macio monanĩtio ho, Danieli 2:44 na Isaia 9:6. Kũngĩhoteka no ũtwarithie ndeereti na mbere. Ũkĩrĩkĩrĩria, gweta kĩũria kĩrĩa kĩrĩ mwena wa thutha rungu rwa kĩongo, “Ta Wĩyũrie”: “Ũtũũro ũgaakorũo ũhaana atĩa hĩndĩ ya wathani wa Ũthamaki wa Ngai?” Kĩũria kĩu no gĩkorũo kĩrĩ mũthingi wa ndeereti yanyu na mũndũ ũcio wacoka.  Mwacemania rĩngĩ, no ũhũthĩre gĩcunjĩ kĩa 7 kĩa broshua ya Ũhoro Mwega Kuuma Kũrĩ Ngai!, ĩrĩa nĩ kĩndũ kĩmwe kĩa iria tũhũthagĩra kwambĩrĩria kwĩruta Bibilia hamwe na andũ.

11. Ngathĩti citũ ikoragwo ihaarĩirio ihingie ũndũ ũrĩkũ, no nĩ ũndũ ũrĩkũ tũrabatara kũmenya ũciĩgiĩ?

¹¹ Ngathĩti. Ngathĩti cia Mũrangĩri na Amkeni! nĩcio ngathĩti iria icabagwo na igataũrũo na njĩra nene thĩinĩ wa thĩ! Tondũ ngathĩti icio ithomagwo nĩ andũ kuuma kũndũ gũtiganĩte thĩinĩ wa thĩ, ũhoro ũrĩa ũkoragwo ngothi-inĩ ciacio ũkoragwo ũhaarĩirio ũndũ ũngĩgucĩrĩria andũ kũndũ guothe. Twagĩrĩirũo gũcihũthĩra kwarahũra wendi wa mũndũ kwerekera maũndũ marĩa ma bata mũno ũtũũro-inĩ. O na kũrĩ ũguo, nĩgetha tũtigĩrĩre atĩ nĩ twaheana ngathĩti ici kũrĩ andũ arĩa magĩrĩire, nĩ tũrabatara kũmenya o ngathĩti yagĩrĩire kũheo andũ arĩkũ.

12. (a) Amkeni! ĩkoragwo ĩhaarĩirio nĩ ũndũ wa andũ arĩkũ, na muoroto wayo nĩ ũrĩkũ? (b) Nĩ moimĩrĩro marĩkũ mega ũgĩte namo ica ikuhĩ ũkĩhũthĩra ngathĩti ĩyo?

¹² Amkeni! ĩhaarĩirio nĩ ũndũ wa athomi arĩa mangĩkorũo matoĩ Bibilia kana marĩ na ũmenyo mũnini ũmĩgiĩ. No makorũo matiũĩ ũndũ o na ũmwe wĩgiĩ morutani ma Gĩkristiano, makorũo matiendete ndini, kana makorũo matoĩ atĩ Bibilia nĩ ĩrĩ ũguni. Muoroto ũmwe mũnene wa Amkeni! nĩ gũteithia mũthomi agĩe na ũũma biũ atĩ Ngai arĩ kuo. (Rom. 1:20; Ahib. 11:6) Muoroto ũngĩ wayo nĩ gũteithia mũthomi gwaka wĩtĩkio mũrũmu harĩ Bibilia atĩ ‘kũna nĩ kiugo kĩa Ngai.’ (1 Thes. 2:13) Ciongo cia ngathĩti ithatũ cia 2018 nĩ: “Njia Ya Maisha Inayoleta Furaha,” “Siri 12 Za Mafanikio Katika Familia,” na “Kukabiliana na Huzuni ya Kufiwa.”

13. (a) Mũrangĩri wa riuma rĩa andũ othe ũkoragwo ũhaarĩirio nĩ ũndũ wa andũ arĩkũ? (b) Nĩ moimĩrĩro marĩkũ mega ũgĩte namo ica ikuhĩ ũkĩhũthĩra ngathĩti ĩyo?

¹³ Mũrangĩri wa riuma rĩa andũ othe ũhaarĩirio kũrũmbũiya mabataro ma kĩĩroho ma andũ arĩa makoragwo na gĩtĩo gĩkĩro kĩna harĩ Ngai na harĩ Kiugo gĩake. O na gũtuĩka no makorũo na ũmenyo mũna wĩgiĩ Bibilia, no makorũo matarĩ na ũmenyo wa ma wĩgiĩ morutani mayo. (Rom. 10:2; 1 Tim. 2:3, 4) Ngathĩti ithatũ cia 2018 icoketie ciũria ici: ““Bibilia nĩ Yagĩrĩire Gũtũtongoria Matukũ-inĩ Maya?,” “Mahinda Mokĩte Magaakorũo Mahaana Atĩa?,” na “Hihi Ngai nĩ Agwĩciragia?”

14. (a) Video inya iria irĩ Gathandũkũ-inĩ Gaitũ ka Indo cia Kũrutana ihingagia muoroto ũrĩkũ? (b) Nĩ moimĩrĩro marĩkũ mega ũgĩte namo ũkĩonania video icio?

¹⁴ Video. Matukũ-inĩ ma Jesu, bundi wa mbaũ aahũthagĩra o indo cia moko. No matukũ maya, mabundi a mbaũ nĩ makoragwo na macini cia gũtinia, gũtũra marima, kũnyorokia, kũhũũrĩra mĩcumarĩ, na ingĩ nyingĩ. Makĩria ma gũkorũo na mabuku macabe, tũrĩ na video thaka cia kuonia andũ, na inya ciacio irĩ thĩinĩ wa gathandũkũ gaitũ: Wagĩrĩirũo Kwĩruta Bibilia Nĩkĩ?, Wĩruti wa Bibilia Wĩkagwo Atĩa?, Nĩ Maũndũ Marĩkũ Mekagwo Nyũmba-inĩ ya Ũthamaki?, na Aira a Jehova​—Nĩ Ithuĩ A? Video iria itakĩrĩtie ndagĩka igĩrĩ nĩ irĩ moimĩrĩro mega tũkĩhunjĩria mũndũ rĩa mbere. No tũhũthĩre iria ndaihandaihu tũgĩcokera andũ, na harĩ andũ arĩa marĩ na mahinda makĩria. Video icio no ciĩkĩre andũ ngoro merute Bibilia na moke mĩcemanio-inĩ itũ.

15. Heana ngerekano ironania ũrĩa kwĩrorera video citũ kũngĩhutia andũ mangĩciona na thiomi ciao.

¹⁵ Kwa ngerekano, mwarĩ wa Ithe witũ ũmwe nĩ aacemanirie na mũtumia ũmwe wathamĩte kuuma Micronesia na aaragia rũthiomi rwa Yapese, na akĩmuonia video ya Wagĩrĩirũo Kwĩruta Bibilia Nĩkĩ? ya rũthiomi rũu. Rĩrĩa video ĩyo yaambĩrĩirie gũthaka, mũtumia ũcio akiuga: “Rũu nĩ rũthiomi rwakwa. Ndiretĩkia! Kũringana na ũrĩa araria nĩ ndĩraigua oimĩte gĩcigĩrĩra-inĩ gĩa gwitũ. Araria rũthiomi rwakwa!” Thutha ũcio mũtumia ũcio akiuga atĩ nĩ egũthoma  na erorere indo ciothe cia rũthiomi rwake thĩinĩ wa jw.org. (Ringithania Atũmwo 2:8, 11.) Wĩcirie ũhoro wa ngerekano ĩngĩ. Mwarĩ wa Ithe witũ thĩinĩ wa Amerika (US) nĩ aatũmĩire mwanake wa mũrũ wa nyina warĩ bũrũri ũngĩ video o ĩyo na rũthiomi rwake. Mwanake ũcio nĩ aamĩĩroreire na akĩmwandĩkĩra ndũmĩrĩri akĩmwĩra ũũ: “Gacunjĩ kau ka atĩ nĩ kũrĩ kĩũmbe kĩũru gĩtongoragia thĩ nĩ kaangucĩrĩirie. Nĩ ndĩrahoire ndũmĩrũo mũndũ andute Bibilia.” Mwanake ũcio aikaraga bũrũri-inĩ wĩra witũ ũgirĩtio!

16. Taarĩria muoroto wa broshua ici: (a) Thikĩrĩria Ngai na Ũtũũre Tene na Tene. (b) Ũhoro Mwega Kuuma Kũrĩ Ngai! (c) Nĩa Mareka Wendi wa Jehova Ũmũthĩ?

¹⁶ Broshua. Ũngĩhota atĩa kũrutana ũhoro wa ma harĩ mũndũ ũtoĩ gũthoma wega kana mũndũ ũtangĩona mabuku ma rũthiomi rwao? Broshua ya Thikĩrĩria Ngai na Ũtũũre Tene na Tene no ĩtũteithie kũruta mũndũ ta ũcio. *Nayo broshua ya Ũhoro Mwega Kuuma Kũrĩ Ngai! nĩ njega mũno harĩ kwambĩrĩria kũruta mũndũ Bibilia. No wonie mũndũ mathomo marĩa 14 monanĩtio ngothi-inĩ ya thutha ya broshua ĩyo ũreke akwĩre ithomo rĩrĩa angĩenda mwarĩrĩrie. Ũcoke wambĩrĩrie kũmũruta ũkĩhũthĩra ithomo rĩu. Hihi ũgĩcokera andũ nĩ ũgeretie njĩra ĩyo? Broshua ya gatatũ thĩinĩ wa gathandũkũ gaitũ nĩ, Nĩa Mareka Wendi wa Jehova Ũmũthĩ? Muoroto wayo nĩ kwerekeria arutwo ithondeka-inĩ rĩa Jehova. Nĩguo ũmenye ũrĩa ũngĩmĩhũthĩra hĩndĩ ciothe ũkĩĩruta Bibilia na mũndũ, rora Kabuku Ka Mũcemanio wa Ũtũũro na Ũtungata Witũ wa Gĩkristiano ka Machi 2017.

17. (a) Muoroto wa o ibuku rĩa wĩruti nĩ ũrĩkũ? (b) Andũ arĩa othe merutĩte magakinya kũbatithio marabatara gwĩka atĩa, na nĩkĩ?

¹⁷ Mabuku. Thutha wa kwambĩrĩria wĩruti wa Bibilia mũkĩhũthĩra broshua, hĩndĩ o yothe no mũcenjie mwambĩrĩrie gũthoma ibuku rĩa Bibilia Ĩtũrutaga Atĩa? Ibuku rĩu nĩ rĩkuongongerera ũmenyo wa mũndũ wĩgiĩ morutani ma mũthingi ma Bibilia. Mwarĩkia ibuku rĩu na mũrutwo akorũo no arathiĩ na mbere kĩĩroho, mwagĩrĩirũo kwĩruta ibuku rĩa Ũrĩa Ũngĩtũũra Wendo-inĩ wa Ngai. Ibuku rĩu nĩ rĩgũteithia mũrutwo kũhũthĩra motaaro ma Bibilia ũtũũro-inĩ wake wa o mũthenya. Ririkana atĩ, o na thutha wa mũrutwo kũbatithio, agĩrĩirũo gũthiĩ na mbere kwĩruta, o nginya arĩkie mabuku macio merĩ. Ũndũ ũcio nĩ ũkũmũteithia kũgĩa na mũthingi mũrũmu ũhoro-inĩ wa ma.—Thoma Akolosai 2:6, 7.

18. (a) Rĩandĩko rĩa 1 Timotheo 4:16 rĩtwĩkĩraga ngoro twĩke atĩa tũrĩ arutani a ũhoro ũrĩa wa ma, na moimĩrĩro nĩ marĩkũ? (b) Muoroto witũ wagĩrĩirũo gũkorũo ũrĩ ũrĩkũ tũkĩhũthĩra Gathandũkũ Gaitũ ka Indo cia Kũrutana?

¹⁸ Tũrĩ Aira a Jehova, nĩ twĩhokeirũo “ndũmĩrĩri ya ma ya ũhoro ũrĩa mwega” ĩrĩa ĩtongoragia andũ muoyo-inĩ wa tene na tene. (Kol. 1:5; thoma 1 Timotheo 4:16.) Nĩ ũndũ ũcio, nĩ tũheetwo Gathandũkũ ka Indo cia Kũrutana karĩa gakoragwo na indo iria tũbataraga. (Rora “ Gathandũkũ ka Indo cia Kũrutana.”) Rekei tũhũthagĩre indo icio na njĩra ĩrĩa yagĩrĩire biũ. Mũhunjia nĩwe wagĩrĩirũo gũtua nĩ kĩndũ kĩrĩkũ gathandũkũ-inĩ kau ekũhũthĩra harĩ mũndũ ũrakenio nĩ ndũmĩrĩri itũ na nĩ rĩ angĩka ũguo. No muoroto witũ to gũtigĩra andũ mabuku; ningĩ tũtiagĩrĩirũo gũtigĩra andũ matarakenio nĩ ndũmĩrĩri itũ mabuku. Muoroto witũ nĩ gũcaria andũ arĩa matarĩ ũhinga, enyihia, na manyoteire ũhoro wa ma tũmatue arutwo, na acio nĩ andũ arĩa marĩ na “mwerekera ũrĩa wagĩrĩire wa kũheo muoyo wa tene na tene.”—Atũm. 13:48; Mat. 28:19, 20.