1, 2. (a) Sirugana musinke ga tulire Jesus muhowo meparu lyendi ntani morwasinke? (b) Yisinke natu rugana yipo yi tu tompoke kukara “varugani kumwe naKarunga”?

JESUS KRISTUSA kwa kere muhongi goyikungu ntani murongi. (Mar. 6:3; Joh. 13:13) Age kwa divire yirugana nayinye oyo. Ngomuhongi goyikungu age ga divire kuhonga yipirangi yi kare yiruganeso yoyiwa. Ano ngomurongi gombudi zongwa, ga divire kuruganesa Matjangwa mokuronga vantu yipo va kwate egano Nonkango daKarunga. (Mat. 7:28; Ruk. 24:32, 45) Jesus kwa hagekere sirugana sendi sokuhonga apa ga ya kere nonomvhura 30, morwa ga yi divire asi kukara murongi mulyo unene. Age kwa tente asi kuzuvhisa mbudi zoUhompa waKarunga yizo konda ga mu tuminine Karunga pevhu. (Mat. 20:28; Ruk. 3:23; 4:43) Age kwa tulire muhowo sirugana sokuzuvhisa meparu lyendi, ntani ga here wopeke va rugane sirugana oso.—Mat. 9:35-38.

² Kuvhura tu dire kukara vahongi woyikungu, nye natuvenye vazuvhisi wombudi zongwa. Sirugana esi mulyo morwa Karunga kutukwatesa ko. Eyi yiyo ava tu tumbwire asi: “Varugani kumwe naKarunga.” (1 Kol. 3:9; 2 Kol. 6:4) Ose kuyikwatesa ko asi, Nonkango daKarunga ndi ‘Veta zendi usili.’ (Epis. 119:159, 160) Eyi yiyo tuna harere ‘kutoona nawa nonkango daKarunga  dousili’ mokuzuvhisa. (Resa 2 Timoteusa 2:15.) Yipo nye, ose kukondja tu dive kuruganesa nawa Bibeli, siruganeso setu sosinene mokuronga vantu kuhamena Jehova naJesus ntani Uhompa. Mokututompoka mokuzuvhisa, mbunga zaJehova kwa tu pa yiruganeso yimwe eyi twa hepa kudiva nawa yipo tu yiruganese. Ayo kuyitumbura asi yiruganeso yetu.

3. Sitambo musinke natu kara naso ngesi, ntani ngapi etjangwa lyomoYirugana 13:48 ali tu vatere tu yi rugane oyo?

³ Nampo kuvhura o lipure asi morwasinke ava yi tumbwire asi yiruganeso yokurongesesa nye kapisi yiruganeso yokuzuvhisisa. Nkango “kuzuvhisa” kutanta asi kudivisa, nye “kuronga” kutanta asi kufaturura mbudi yipo muntu azi kwate egano nokutura po marunduruko. Siruwo esi sosisupi sina hupu ko, sitambo setu si kare sokutameka malirongo goBibeli nokuronga vantu usili womoBibeli. Eyi kutanta asi twa hepa kupapara ava “gwa tumbukira mwenyo gwanarunye” nokuvavatera va ya kare vapuli.—Resa Yirugana 13:44-48.

4. Ngapi natu gwana ava “gwa tumbukira mwenyo gwanarunye”?

⁴ Ngapi natu gwana vantu ava “gwa tumbukira mwenyo gwanarunye”? Ngwendi Vakriste womosiruwo sanare, mokugwana vantu owo, ntudi twa hepa kugava umbangi. Twa hepa kurugana eyi ga tente Jesus asi: “Mwankenye sitata ndi mukunda ogu ngomu za, pulideni mo muntu gomuwa.” (Mat. 10:11) Ose twa yi diva asi vantu wokulinenepeka nava va dira kuhara Karunga kapi tava tambura mbudi zendi. Yipo nye, tuna hara kupapara vantu wokuuyunga usili nava wokulinunupika ntani ava va kara nonzara zoNonkango daKarunga. Eyi kuvhura tu yi fanekese kweyi nga rugana Jesus ngomuhongi, age nampo nga papara yitji yoyiwa a honge nomuvero nonondjoko nayimwe hena ngoso. Apa nga gwana yitji oyo, age nga gusa yiruganeso yendi nokuruganesa udivi wendi yipo a honge. Nose twa hepa kurugana yokulifana yipo tu vatere vantu va ya kare varongwa vaJesus.—Mat. 28:19, 20.

5. Yisinke twa hepa kudiva kuhamena yiruganeso yetu? Yi fanekesa. (Tara mafano pepenuno 11.)

⁵ Nkenye siruganeso kwa kara nositambo saso. Gazadara ko yiruganeso eyi ga ruganesere Jesus. * Age ga hepere yiruganeso yokumetesa, yokutetesa, yokutjokwesa, yokuhongesa ntani yokumangesa. Mokulifana, nkenye siruganeso setu kwa kara nositambo saso. Tu zeni tu ka tare omu natu ruganesa yiruganeso eyi va tu pa.

6, 7. (a) Ngapi omu wa ruganesa tukarata? (b) Sitambo musinke soyimbapira yezigido yokomapongo?

⁶ Tukarata. Ato tununu, nye ato turuganeso totuwa otu natu ruganesa mokulidivisa nyamwetu kovantu nokuvalikida Intaneta zetu jw.org. Apa tara ko, awo kudiva yoyinzi yokutuhamena ntani kuvhura va ture mo ehundiro lyelirongo lyoBibeli. Vantu wokupitakana po-400 000 kwa hundira elirongo lyoBibeli kupitira koIntaneta zetu ntani nkenye ezuva vantu wovanzi simpe kuna kuyirugana. Yipo nye, kara nkenye apa notukarata yipo o tu ruganese kovantu ava no ligwana nawo nkenye ezuva.

⁷ Yimbapira yezigido. Ayo kuyitumbura asi yimbapira yezigido yokomapongo. Poyimbapira oyo kwa tjanga po asi: “Tuna ku zigida o ya lironge Bibeli noNombangi  daJehova.” Apo kwa uyunga po hena asi kuvhura o yi rugane “komapongo getu” ndi “nagumwe gwetu.” Siruganeso esi kapi tupu asi divisa asi ose vantu musinke, nye hena kuzigida vamwe ava “va hepa Karunga” yipo va lironge Bibeli. (Mat. 5:3, NW) Nkenye gumwe kuvhura a wize komapongo getu yi kare asi age kulironga Bibeli ndi hawe. Apa vantu ava wiza komapongo getu, awo kuyadimburura omu atu rugana elirongo lyoBibeli.

8. Morwasinke ya karera nomulyo asi vantu va wize komapongo getu nampili rumwe? Gava sihonena.

⁸ Ayo mulyo tu zigide vantu va ya kare momapongo getu nampili rumwe. Morwasinke? Awo ngava mona elisigo lyenene kuhamena omu atu rongo Bibeli kupitakana omu ava yi rugana momaukarelikarunga goyimpempa. (Jes. 65:13) Ray namukadendi Linda ava va tunga moAmerika kwa dimbwilire elisigo eli. Awo kwa tokwere kuza nkenye apa kongereka. Awo kwa pulire mwaKarunga, ntani kwa here va mu dive unene, makura yipo va tamekere kuza konongereka nadinye domositata sawo zimwe nazimwe. Mongereka ezi va here kukara, awo kwa paparere mo yininke yivali. Sokuhova, va hepere kulironga yuma yongandi mongereka ozo, ntani sauvali, womongereka ozo va hepere kudwara ngwendi vantu ava ava karere Karunga. Konyima zonomvhura dongandi apa va mene kudingura nongereka nadinye, awo kwa guvire morwa kwato eyi va lirongere ntani vantu womonongereka odo kapi ngava dwara ngwendi Vakriste. Apa va mene kudingura ngereka zokuhulilira, Linda kwa zire koyirugana yendi ano Ray kwa zire kembo. Pokutengura, Ray ta mono Sinyanga soUhompa nokulipura asi: ‘Morwasinke nina kudilira kuza ni ka tare omu mwa fana?’ Olyo kwa kere ezuva lyewa sili! Navenye ava va wizire koSinyanga kwa dwere nawa ntani kwa mu tambwire nawa. Ray kwa hingilire koyipundi yokomeho ntani ga haferere eyi ga lirongere. Ayo kwa fene ngwendi moomu mupositoli Paurusa ga tente kuhamena muntu ogu a wiza komapongo sikando sokuhova nokutanta asi: “Yosili Karunga mweli mokatji keni!” (1 Kol. 14:23-25) Ray nga pongo nkenye Sondaha, ano konyima ga ya tamekere kuponga epongo lyomosivike. Linda nage ga ya tamekere kuponga ntani apa va ya kere nonomvhura 70 yikandwise, yipo va ya tamekere kulironga Bibeli nokuyagwana ekuho.

9, 10. (a) Morwasinke yitratate ya karera ureru mokutameka nzogera novantu? (b) Faturura omu natu ruganesa sitratate Yisinke Uhompa waKarunga?

⁹ Yitratate. Twa kara noyitratate ntantatu eyi ayi tu rerupire kutameka nzogera nomuntu. Kutunda apa va tameka kuyipwagesa mo-2013, yitratate mabiliyona gatano kwa yi nduruka. Nsene o diva kuruganesa po simwe, ayo ngayi ku karera ureru kuruganesa nayinye, morwa ayo kwa yi tjanga monkedi zokulifana. Ngapi omu no ruganesa sitratate mokutameka nzogera nomuntu?

¹⁰ Nampo kuvhura o horowore sitratate Yisinke Uhompa waKarunga? Likida muntu epuro lyopontunda ngomu ono kumu pura asi: “Wa li pura rumwe asi Yisinke Uhompa waKarunga? Ngapi ono kugazara . . . ?” Makura mu pura a horowore po limwe pomalimbururo gatatu. Mevango lyokumutantera nsene elimbururo lyendi mouhunga ndi mepuko, penuna monda omu likide ruha “Eyi azi uyunga Bibeli” nokuruganesa Matjangwa va tura mo, Ehororo 11:15 ntani Rukasa 1:32, 33. Nsene hepero kuvhura mu twikire hena nonzogera. Sokuhulilira, mu sigira epuro eli lya  kara konyima koruha “Gazadara ko” pokumupura asi: “Ngapi ngali ka fana eparu apa ngau ka pangera Uhompa waKarunga?” Kuvhura kuyalilimburura sikando sokukwama ko. Apa ngo ka tengwira ko, kuvhura ngo ya mu likide sirongwa 7 esi sa kara mombapira Mbudi zongwa zokutunda kwaKarunga!, aso siruganeso simwe atu ruganesa mokutameka elirongo lyoBibeli novantu.

11. Sitambo musinke soyifo yetu, nye yisinke twa hepa kudiva kuhamena yifo oyo?

¹¹ Yifo. Ruhungu ntani Awake! kuna kara yifo eyi va pwagesa nokutoroka po unene mouzuni. Mokumona asi vanzi ava yi resa, ntunda zoyifo oyo kwa zi wapaika nawa mokutumangeda vantu wokomavango gokulisiga-siga va hafere kuyiresa. Twa hepa kuruganesa yifo oyo mokupindura elituromo lyovantu yipo va demenene kweyi yomulyo po meparu. Nye, pomuhowo twa hepa kudiva asi sifo musinke sa wapera komuntu gongandi.

12. (a) Wolye va si tjangera sifo soAwake! ntani nositambo musinke? (b) Simwitira ko eyi wa limonena pokuruganesa Awake!

¹² Awake! kwa zi wapaikira vantu ava va kara nediwo lyesesu lyoBibeli ndi ava va dira kuzidiva. Awo nampo kapi va diva marongo goSikriste ndi nampo kapi va hara maukarelikarunga ndi kapi va diva asi Bibeli mulyo. Sitambo sosinene soAwake!, kuna kara mokuvatera varesi va dive asi Karunga yipo ga kara. (Rom. 1:20; Heb. 11:6) Aso hena kuvatera varesi va dimburure asi Bibeli kuna kara ‘Nonkango daKarunga.’ (1 Tes. 2:13) Yiparatjangwa yoAwake! yomo-2018, kuna kara “Omu no gwana ruhafo,” “Yininke 12 ayi reta ruhafo mepata,” ntani “Ehengagwido kwava wokuguva.”

13. (a) Kwalye rwa demenena Ruhungu rokuhanesa? (b) Simwitira ko eyi wa limonena pokuruganesa Ruhungu.

¹³ Ruhungu, rokuhanesa kwa demenena kovantu ava va fumadeka Karunga noNonkango dendi, Bibeli. Nampili ngomu va diva ko yoyisesu kuhamena Bibeli, awo kapi ava kwata nawa egano marongo gazo. (Rom. 10:2; 1 Tim. 2:3, 4) Yifo yitatu yomo-2018 kwa limburura mapuro aga: “Twa hepa simpe Bibeli naina ndi?,” “Yisinke ngayi horokera vantu komeho?” ntani “Karunga kukupakera mbili ndi?”

14. (a) Sitambo musinke sonovidiyo detu ne? (b) Simwitira ko eyi wa limonena pokuruganesa novidiyo odo.

¹⁴ Novidiyo. Mosiruwo saJesus, muhongi goyikungu kapi nga ruganesa yiruganeso yokomarutjeno. Nye, momazuva getu vahongi kuruganesa yiruganeso yokomarutjeno, ngwendi ehina lyokusahesa nehina lyokutomwesa ekuma neli lyokutulisa nombohwa ntani nayimwe. Kugusa ko yimbapiratjangwa, twa kara nonovidiyo ne edi atu ruganesa mokuzuvhisa, ado kuna kara: ​Morwasinke natu lirongera Bibeli?, Ngapi ava rugana elirongo lyoBibeli?, Yisinke atu rugana ko koSinyanga soUhompa? ntani Wolye Nombangi daJehova? Novidiyo dononsupi kuvatera unene nsene kuna kudilikida posikando sokuhova. Ano dononde kuvhura kudiruganesa petengwiroko ntani kovantu ava ava kara nosiruwo. Yiruganeso eyi kuvhura kutumangeda vantu va lironge Bibeli nokuwiza komapongo.

15. Simwitira omu ayi va kundama vantu apa ava tarere novidiyo meraka lyawo.

¹⁵ Munazinyetu gumwe gomukadi kwa ligwene nomukadi ogu ga tundire koMicronesia ogu nga uyunga Ruyapese makura munazinyetu  ogo ta mu likida vidiyo zemeraka lyawo, Morwasinke natu lirongera Bibeli? Apa za tamekere vidiyo kudana, mukadi ta tanta asi: “Eli eraka lyange. Kapi nina kuyipura! Muntu ogu ana kuuyunga gokosirudi setu. Age kuuyunga eraka lyetu!” Kutunda opo mukadi ogo ta tanta asi ta ka resa nokutarera nayinye yemeraka lyawo eyi ya kara ko-jw.org. (Hetakanesa Yirugana 2:8, 11.) Tarurura sihorokwa simwe hena. Munazinyetu gomukadi gomoAmerika kwa tuminine munwa mukurwendi ruha rokoIntaneta yipo a ka tarere vidiyo ozo meraka lyawo. Konyima zokuzitarera yipo ga tjangerere munazinyetu ogo asi: “Nina hafere sitwa esi vana tumbura asi Satana yige ana kupangera uzuni ou. Nina tura mo ehundiro lyokulironga Bibeli.” Age kwa tunga mosirongo esi va silika sirugana setu.

16. Faturura sitambo sonombapira edi: (a) Purakena kwaKarunga ngo paruke narunye. (b) Mbudi zongwa zokutunda kwaKarunga! (c) Wolye vana kurugana mpango zaJehova?

¹⁶ Nombapira. Ngapi omu no ronga Bibeli muntu ogu ga dira kudiva kuresa nawa ndi ogu ga dira kukara noyimbapiratjangwa yetu meraka lyawo? Twa kara nombapira ezi natu ruganesa, Purakena kwaKarunga ngo paruke narunye. * Ano siruganeso sosiwa sokutameka kulironga nomuntu kuna kara, Mbudi zongwa zokutunda kwaKarunga! Kuvhura o likide muntu ogo yirongwa 14 eyi ya kara konyima yipo a horowore po esi ana hara makura ngomu ya si zogere. Wa heteka nkedi ozo komatengwiro ko goge ndi? Siruganeso sautatu kuna kara mbapira Wolye vana kurugana mpango zaJehova? Aso kuvatera varongwa va dive mbunga zaJehova. Mokudiva ko yoyinzi omu no siruganesa pwankenye elirongo lyoBibeli, tara mbapira zekepongo Eparu lyetu noyirugana yokuzuvhisa mwaNsinano 2017.

17. (a) Sitambo musinke sonobuke odo mbali vana tumbura? (b) Yisinke nava rugana navenye ava va gwana ekuho ntani morwasinke?

¹⁷ Nobuke. Nampili kapi mwa mana kulironga monombapira edi atu tamekesa elirongo kuvhura simpe mu rundurukire mobuke Yisinke azi rongo Bibeli? Siruganeso esi ngasi mu vatera a dive madi gomoBibeli. Konyima zokumana buke ozo, nsene murongwa kuna kutura po ezokomeho, twikira nendi mobuke Omu kare meharo lyaKarunga. Azo ngazi mu vatera a dive omu na tura pasirugana nompango domoBibeli nkenye ezuva. Diworoka asi, nampili konyima zekuho, wovape va hepa kutwikira kulironga dogoro va mane nobuke odo. Ayo ngayi va vatera va kare vana koro mousili.—Resa Vakorosi 2:6, 7.

18. (a) Yisinke ava tu korangeda mwa-1 Timoteusa 4:16 tu rugane ntani yitundwamo musinke nga yi kara? (b) Sitambo musinke natu kara naso ngomu tuna kuruganesa yiruganeso yetu?

¹⁸ NgoNombangi daJehova, ose kwa tu pa situmbukira sokuronga “vantu mbudi zongwa zosili” ezi ngazi va vatera va ka gwane mwenyo gwanarunye. (Koros. 1:5; resa 1 Timoteusa 4:16.) Mokututompoka, twa kara noyiruganeso eyi va tu pa. (Tara “ Yiruganeso yetu.”) Yipo nye, tu ruganeseni yiruganeso eyi paapa twa hulira. Nkenye muzuvhisi kuvhura a horowore yiruganeso eyi na ruganesa ntani nosiruwo esi na yi rugana. Nye sitambo setu kapisi sokugavera tupu yimbapiratjangwa ndi tu yi gave kovantu ava ava dili kulikida elituromo. Sitambo setu kuna kara sokutulisa po varongwa ava va linunupika ndi vantu wonzara zopampepo ava gwa “tumbukira mwenyo gwanarunye.”—Yirug. 13:48; Mat. 28:19, 20.