1, 2. (a) Chipangi muka chapwile cha theho mu kuyoya kwa Yesu, cho mwafwa vika? (b) Vika vitukwatha ‘tupangele hamo na Njambi’?

YESU KILISITU wapwile muka-kushonga na mulongethi. (Mako 6:3; Loma 15:8) Wapwile chitongwe mu kulongetha na mu kushonga. Ha kupwa muka-kushonga, walilongethele mwa kupangethela vinoma mu kupanga vyuma vyavivwa. Ha kupwa mulongethi, wapangethele vyuma vyalilongethele mu Vithoneka mu kukwatha vanu vathzivithithe vuthunga vwa mu Lijwi lya Njambi. (Mateo 7:28; Luka 24:32, 45) Yesu mwakele na myaka 30 wechelele chipangi cha kushonga, mwafwa wathzivukile ngwendi chipangi chakama chethzilile chapwile cha kulongetha. Wendekele ngwendi Njambi wamutumine hano hathi mangana akwambulule muthzimbu wauvwa wa Vumwene vwa Njambi. (Mateo 20:28; Luka 3:23; 4:43) Yesu wapangele chipangi cha kwambulula na ntwima, cho washakele vanu vakumukwatha.—Mateo 9:35-38.

² Nameme kutwapwile vaka-kushonga, oloni twapwa vaka-kwambulula muthzimbu wauvwa. Echi chipangi chapwa cha theho manene mwafwa omwo tuchipanga, ‘tupangela hamo na Njambi.’ (1 Koli 3:9; 2 Koli 6:4) Tuthzivuka ngwetu “majwi [a Yehova] oshe apwa a vuthunga.” (Myatho 119:159, 160) Mukemwo tuketheka mutwathela mwoshe kulongetha ‘mwamuvwa lijwi lya Njambi’ ku vanu. (Tandeni 2 Timateo 2:15.) Tuli na kuvwethzelela ku vutongwe vwetu vwa  kupangetha Mbimbiliya, ije itukapangetha manene ha kulongetha vanu vya Yehova na Yesu na Vumwene vwendi. Munga ya Yehova inatwana vinoma vya kupangetha vije vitunapande kwithzilila kupangetha mangana twambulule mwamuvwa. Evi vyuma vikevyo vili mu Chikasha cha Vinoma vya Kupangetha mu Kulongetha.

3. Chuma muka chitunapande kwaka mu vithinganyeka omwo twambulula, cho mukanda wa Vilinga 13:48 utushongangeya vati kulinga ngocho?

³ Mwatha kulihula ngweni, vika vakachitumbwila Chikasha cha Vinoma vya Kupangetha mu Kwambulula kethi Chikasha cha Vinoma vya Kupangetha mu Kulongetha? Mwafwa “kwambulula” kwapwa lika kuleka munu muthzimbu. Oloni “kulongetha” kwapwa kukwatha munu athzivithithe uje muthzimbu na kupangetha vyalilongetha. Ha thimbu ino inathalako, chuma chakama chitunapande kulinga chinapu kushangumuka vilongetha vya Mbimbiliya na kulongetha vanu vuthunga. Ngechi, tunapande kulifwita kushakathzeka “vaka-vimbunge vyavivwa” na kuvakwatha vapwe vaka kukulahela.—Tandeni Vilinga 13:44-48, NWT.

4. Twatha kuthzivuka vati “vaka-vimbunge vyavivwa,” cho twatha kuvawana vati?

⁴ Twatha kuthzivuka vati “vaka-vimbunge vyavivwa”? Ngwe mukwafwile mu chita cha myaka cha kulivanga, twatha kuvawana nga twambulula. Ngechi, tunapande kulinga mwatushikilile Yesu. Washikile ngwendi: “Omwo mweta mu nganda nambe mwimbo, kovelenimo, cho theteleni munu uje napande.” (Mateo 10:11) Kutwapandele kuthinganyeka ngwetu vanu va kulyaletha vaje vathzinda vyuma vya ku sipilitu vatha kutambula muthzimbu wauvwa. Tunapande kushakethzeka vanu va vimbunge vyavivwa va kulikehetha vaje vashaka kulilongetha vuthunga. Twetheketheni oku kushakethzeka vanu ku vyuma vyalingile Yesu ha thimbu yakele na kushonga. Wakele na kushakethzeka viti vyavivwa mu kushonga mapito nambe mandauluwa nambe vyuma vyeka. Mwawanene viti vinapande, wambatele chikasha chendi cha vinoma na kushangumuka kushonga vyuma vyendi mu vutongwe. Mukemwo mutunapande kulingila omwo tulongetha vanu va vimbunge vyavivwa.—Mateo 28:19, 20.

5. Tunapande kuthzivuka vika ha vinoma vya mu Chikasha cha Vinoma vya Kupangetha mu Kulongetha? Endekeni Chakumwenako. (Kengeni chikupulo ha liputa 11.)

⁵ Chinoma na chinoma cha mu chikasha chakala na chipangi chacho. Achithinganyekeni ha vinoma vyapangethele Yesu mu kushonga. * Hamo wakele na vinoma vya kutheteketha, vya kuvatwitha, vya kushongetha na vya kulambetha na vya kutuvitha nevi vya kutokeketha mavaya. Mu ngila imo lika, chinoma na chinoma chili mu Chikasha cha Vinoma vya Kupangetha mu Kulongetha chili na chipangi chacho. Ngechi, tukengeni mu chikasha mangana tuthzivuke mwakupangethela vinoma vilimo.

6, 7. (a) Mukapangetha vati tu mapapelo twa kulanya vanu? (b) Vyuma muka vivali vitukapanga tumapapelo twa kulanya vanu?

⁶ Makadi Amwetha vya ha jw.org. Awa makadi apwa amandondo, oloni akakwatha manene vanu vatuthzivuke na kuvakwatha vaye ha wembusaiti yetu. Nga vaya ha wembusaiti yetu vatha kulilongethaho vyavingi, cho vatha kulomba chilongetha cha Mbimbiliya. Mu myaka inahu, vanu va kutuvakana 400,000 vanalombele kulilongetha Mbimbiliya ha jw.org, cho vavangi vanatwalelelaho kulinga ngocho. Mwatha kwambata ambata awa makadi mangana mwathe kwanako vanu vamuwana.

⁷ Tumapapelo twa Kulanya Vanu. Kalipapelo kakulanyela vanu ku viwano ka Silozi, kakapanga vyuma vivali. Kendeka ngwako: “Lilongetheni Mbimbiliya na Vakaleho va Yehova.” Cho  kanamwetha lalo ngwako mwatha kulinga ngocho ku “viwano” nambe “kulilongetha na Mukaleho ku njuvo yeni.” Aka kalipapelo kakakwatha vanu vatuthzivuke na kushongangeya vanu vaje “vali mu vujene vwa vyuma vya ku sipilitu” valilongethe Mbimbiliya. (Mateo 5:3, NWT) Vanu vatha kwija ku viwano vyetu nameme vavyana kulilongetha Mbimbiliya. Omwo vaija ku viwano, vakumona na kuthziva mutukalilongethelamo Mbimbiliya.

8. Vika kwapwila kwa theho kulanya vanu ku viwano vyetu nameme lumo lika? Endekeni chakumwenako.

⁸ Vika kwapwila kwa theho kulanya vanu ku viwano vyetu nameme lumo lika? Mwafwa muvaija ku viwano va kumona kulithethza kuli mukati ka vulombelo vwa vuthunga na vulombelo vwa makuli. (Isaya 65:13) Vaka-kulyambata vamo va ku America vamwene kulithethza kuli mukati ka vulombelo vwa vuthunga na vwa makuli. Va Ray na Linda, valiyongwele ngwavo vashangumuke kuya ku chechi. Vakulahelele Njambi, cho vathzemene vyuma vya ku sipilitu. Vashangumukile kuya ku machechi a kulithethzathethza. Mu nganda yavo mwakele machechi na vivunga vya vulombelo vyavingi. Va Ray na Linda vathimutwiyiye ha vyuma vivali vivashakele kumona mu vulombelo vuvangula kulikwatathana navwo. Cha kulivanga, vendekele ngwavo omwo vakakunguluka okwo ku chechi, vanapande kukalilongethako vimo. Cha mu chivali, vanu vomwo mu vulombelo vapandele kusholoka ngwavo vali na kwimanena Njambi. Oloni ku machechi kwoshe kuvaile, kuvamwene vije vivatondele. Kuvalilongetheleko vimo, cho sholwethi ya vanu vakwo kuyapwile yaivwa. Muvatundile ku chechi ya mamanethelelo ha chinoneko chivathonekele, Linda waile ku chipangi chendi, Ray cho welukile ku njuvo. Mwakele na kwiluka, wamwene Njuvo ya Vumwene, cho wathinganyekele ngwendi, ‘Tahi njikakovelemo njimone muvafwa vanu vacho.’ Wakamwene vyuma vije kamwene ku vulombelo vwoshe kwaile. Vandolome na vandokathzi ku Njuvo ya Vumwene vakele na ndthzathzu, cho vathzalele mwamuvwa. Ray wakatumbamenene ha chitwamo cha kulutwe, cho wathzemene vyuma vyalilongethele. Walithzivile ngwe munu yendekele kapositolo Paulu, uje wendekele ngwendi, “mwa vuthunga Njambi ali neni kuno” mwakungulukile ku viwano vya vaka-Kilisitu lwa kulivanga. (1 Koli 14:23-25) Ray watwaleleleho kukunguluka ku viwano vya lya chalumingo, cho munima washangumukile kuya ku viwano vya mukati ka chalumingo. Linda nendi washangumukile kukunguluka. Omwo vakele na myaka ya kutuvakana 70, vashangumukile kulilongetha Mbimbiliya, cho vavambwitikile.

9, 10. (a) Mwafwa vika awa matilakiti apwa amathi kuapangetha? (b) Lumbununeni mwakupangethela tilakiti ya Vumwene vwa Njambi Vwapwa Vuka?

⁹ Matilakiti. Tuli na matilakiti a kupwa 8 amathi kupangetha, aje atukwatha tushangumuke kuthimutwiya na vanu. Kushwa mu 2013, vanapulinta matilakiti a kutuvakana 5 bilyoni. Awa matilakiti apwa amavwa manene, mwafwa uchithzivuka lika mwakupangethela imo, cho na akwavo oshe watha kuapangetha. Mwatha kushangumuka vati kuthimutwiya na munu kupangetha tilakiti?

¹⁰ Mwatha kupangetha tilakiti ya Vumwene vwa Njambi vwapwa vuka? Mwetheni munu chihula chili helu ya tilakiti na kumwihula ngweni: “Muthinganyeka ngweni Vumwene vwa Njambi vwapwa vuka?” Mwathinganyeka ngweni . . . ?” Cho mulekeni anguleho chikumbululo. Thimbu kanda mumuleke ngweni chikumbululo chanangula chikecho nambe kethi chikecho, fukuleni mukati na kumumwetha ha mutwe wa “Viyendeka Mbimbiliya” na kutanda nendi mukanda wa Ndanyele 2:44 na Isaya 9:6. Nga chitava, twaleleleniho kuthimutwiya nendi. Cho mwihuleni chihula chili ha mutwe wa “Thinganyekeni ha Chihula Echi”: “Kuyoya kukafwa vati omwo Vumwene  vwa Njambi vukayula?” Echi chihula chikecho chimukathimutwiya ha vungendthzi vukwavo. Mumwakuliwana lalo, mwatha kuya ha chilongetha 7 mu mbuloshuwa ya Muthzimbu Wauvwa Wakutunda Kuli Njambi! ije itukapangetha mu kushangumuka vilongetha vya Mbimbiliya.

11. Mangazini etu vanawathonekela kulinga vika, cho vika vitunapande kwanuka?

¹¹ Mangazini. Kaposhi ka Kukengela na Toneni! vikevyo vikatuhuka manene, cho vakavinungulula mu miyati yaingi mu kaye. Mitwe ivakaka aha ha mangazini ikakwata vanu ku vimbunge mwafwa viñanda vyacho vikakundama vanu voshe. Tunapande kuapangetha mu kukwatha vanu vathzivuke vyuma vije vyapwa vya theho mu kuyoya kwavo. Oloni tunapande kuthzivuka chifwa cha mangazini itunapande kwana munu.

12. (a) Toneni! vakaithonekela veya, cho ikakwatha vati? (b) Vuvwa muka vumwawana mu kupangetha echi chinoma?

¹² Toneni! vakaithonekela vanu vaje kuvathzivuka na vaje vathzivuka kamandondo vya mu Mbimbiliya. Ava vanu kuvathzivuka vilongetha vya vaka-Kilisitu, nambe kuvashakele manene vya vulombelo, cho hamo kuvathzivuka ngwavo mu Mbimbiliya mwakala vinangulo vije vikwatha. Toneni! vakaithonekela ikwathe vanu vakulahele ngwavo Njambi kwakala. (Loma 1:20; Heve 11:6) Ikakwatha lalo vaje vaitanda vakulahele ngwavo Mbimbiliya yapwa “lijwi lya Njambi vene.” (1 Tesa 2:13) Mitwe itatu inakala ha mangazini ya Toneni! ya mu 2018 eyi: “Ngila ya Kupwilamo va Kuvwahelela” na “Vyuma 12 Vikwatha Nanga Ikale Mwamuvwa” na “Vika Vyatha Kukwatha Vaje Vanathsitha.”

13. (a) Kaposhi ka Kukengela ka mbunga vakakathonekela veya? (b) Vuvwa muka vumwawana mu kupangetha echi chinoma?

¹³ Kaposhi ka Kukengela ka mbunga kakathimutwiya manene ha vyuma vya ku sipilitu, cho kapwa ka vaje vakathingimika Njambi na Lijwi lyendi. Nameme vathzivuka vyuma vimo mu Mbimbiliya, oloni kuvethi kuthzivithitha mwamuvwa viyalongetha. (Loma 10:2; 1 Tima 2:3, 4) Mangazini atatu a Kaposhi ka Kukengela ka mbunga ka mu 2018 anakumbulwile evi vihula: “Mbimbiliya Ichili na Theho Ano Matangwa Ndi?” na “Kuyoya Kweni Kukafwa Vati Kulutwe?” na “Kuma Njambi Wamyaka Mbunge Ndi?”

14. (a) Mavindiyo awana ali mu Chikasha cha Vinoma vya Kupangetha mu Kulongetha akwatha vati? (b) Vuvwa muka vumunawana mu kumwetha vanu awa mavindiyo?

¹⁴ Mavindiyo. Ha thimbu yakele Yesu hano hathi, vaka-kushonga vapangethele lika vinoma vya kukwata na mavoko. Oloni ano matangwa kuli makina a kuvatwitha viti na a kutuvitha na a kulambetha mavaya nawa a kupateketha vimbambo na akwavo amangi. Netu ano matangwa kethi mavulu lika atuli nawo, oloni kuli lalo na . Mu chikasha chetu muli awana: Ki Kabakalañi ha lu Swanela ku Ituta Bibele? na Tuto ya Bibele I Eziwanga Cwañi? na Kiñi ze Ezahalanga Kwa Ndu ya Mubuso neyi ya Lipaki za Jehova—Ki Luna bo Mañi? Mavindiyo a minutu ivali na kwiluka mwithi akakwatha manene ha vungendthzi vwa kulivanga. Oloni mavindiyo amalaha kwakuvwa kuapangetha ha vungendthzi vwa kwilukila, nameme kuli vaje vali na thimbu. Awa mavindiyo atha kushongangeya vanu valilongethe Mbimbiliya na kwija ku viwano vyetu.

15. Vanu muvakakenge mavindiyo etu mu ndaka yavo vakalingi vati? Endekeni chakumwenako.

¹⁵ Chakumwenako, ndokathzi yetu umo mwaliwanene na munakathzi wa Kayapese uje watundile ku Micronesia wamumwethele vindiyo ya Vika Viunapande Kulilongethela Mbimbiliya? mu ndaka yendi. Ije vindiyo muyashangumukile kwimba, uje munakathzi wendekele ngwendi: “Eyi ikeyo vene ndaka yange. Ikeyo vene? Nameme endekethi yendi ithzivika vene ngwavo wa  kwimbo lyetu. Ndaka yange vene ali na kwendeka.” Munima ya kuyongola ije vindiyo wendekele ngwendi akatanda na kuyongola vyuma vyoshe vya mu ndaka yendi vije vili ha jw.org. (Etheketheni Vilinga 2:8, 11) Kuli chakumwenako chikwavo. Ndokathzi wa ku America watuminine muna ndolome yendi link ya kumutwala ha vindiyo eyi vene mu ndaka yendi. Waikengele na kuthonekela teñathzi yendi muthzimbu ngwendi: “Ñanda ije yendeka vya munu uje ali na kutwamenena kaye yanjikwata manene ku mbunge. Njalombo chilongetha cha Mbimbiliya.” Wakala mu lifuti muvanashoko chipangi chetu.

16. Lumbununeni mwakupangethela awa mambuloshuwa: (a) Tolilileni Kuli Njambi Mangana Mukayoye Myaka Yoshe. (b) Muthzimbu Wauvwa Wakutunda Kuli Njambi! (c) Veya Vali Nakulinga Cithzango cha Yehova Matangwa Ano?

¹⁶ Mambuloshuwa. Mwatha kulongetha vati vuthunga ku vanu vaje kuvathzivuka mwamuvwa kutanda nambe vaje kuvakele na mavulu mu ndaka yavo. Kuli chinoma chivakwatha manene. Mbuloshuwa ya Tolilileni Kuli Njambi Mangana Mukayoye Myaka Yoshe. * Chinoma chikwavo chitukwatha kushangumuka vilongetha chinapu mbuloshuwa ya Muthzimbu Wauvwa Wakutunda Kuli Njambi! Mwatha kumwetha munu mitwe ya viñanda ya kupwa 14, ije ili kunima ya mbuloshuwa, na kumuleka anguleho mutwe wa kuthimutwiya. Cho shangumukeni kulilongetha ha mutwe owo vene. Mwalingaho laja ngocho ha vungendthzi vwa kwilukila ndi? Mbuloshuwa ya Veya Vali Nakulinga Cithzango cha Yehova Matangwa Ano? ikeyo ya mu chitatu mu chikasha chetu. Ikeyo ikakwatha vanu vatukalilongetha navo vathzivuke munga yetu. Nga mushaka kuthzivuka mwakuipangethela, kengeni mukanda wa March 2017 wa Vuyoye Vwetu Vaka-Kilisitu na Chipangi Chetu Mukanda wa Viwano.

17. (a) Livulu na livulu lya kulilongetha lyakala na chipangi muka? (b) Vika vivanapande kulinga vaje vali muyehi na kuvambwitika, cho mwafwa vika?

¹⁷ Mavulu. Nga mwashangumuka kulilongetha na munu mu mbuloshuwa, mwatha kushangumuka kulilongetha nendi mu livulu lya Vika Viyitulongetha Mbimbiliya? hoshe hamumwena ngweni kunapande kulinga ngocho. Eli livulu likakwatha vanu vathzivuke vilongetha vya maputukilo vya mu Mbimbiliya. Nga munamanetha kulilongetha eli livulu, cho munu imukalilongetha nendi ali na kukola ku sipilitu, mwatha kulilongetha nendi mu livulu lya “Kaleni Mu Chithzemo Cha Njambi.” Echi chinoma chikwatha ndongethi athzivuke mwa kupangethela vinangulo vya mu Mbimbiliya. Anukeni lalo ngweni nga munu imukalilongetha nendi vanamumbwitika oku kanda mumanethe mavulu oshe avali, anga mwatha kutwalelelaho kulilongetha. Kulinga ngocho kukanyametha manene likulahelo lyendi.—Tandeni Kolose 2:6, 7.

18. (a) Ku 1 Timateo 4:16 vatushongangeya kulinga vika ha kupwa vaka-kulongetha vuthunga, cho vuvwa muka vutundamo? (b) Vika vitunapande kwanuka omwo tupangetha Chikasha cha Vinoma vya Kupangetha mu Kulongetha?

¹⁸ Ha kupwa tu Vakaleho va Yehova vanatwana chipangi cha kwambulula ‘viñanda vyavivwa vya vuthunga’ vije vikwatha vanu vakatambule mwonyo wa myaka yoshe. (Kolo 1:5; tandeni 1 Timateo 4:16.) Mukemwo vanatwana Chikasha cha Vinoma vya Kupangetha mu Kulongetha muje muli vyuma vitutonda (Kengeni “ Chikasha cha Vinoma vya Kupangetha mu Kulongetha.”) Tupangetheni evi vinoma mu vutongwe. Muka-kwambulula atha kwangula livulu lya kwana munu uje navwahelela. Oloni kutwapandele kwana lika mavulu nambe kuya na kuthethza mavulu ku vanu vaje kuvashaka vuthunga. Oloni tushaka ngwetu “vaka-vimbunge vyavivwa” na vaka-kulikehetha vaje vali mu vujene vwa ku sipilitu vapwe vandongethi.—Vili 13:48; Mateo 28:19, 20.