1, 2. 1) ¿Ti tuungë Jesus ojts tmëwiin tmëjotë mä jyukyˈäjtën, ets tiko? 2) ¿Ti tsojkëp nduˈunëm parë oy mëdë Dios nduunmujkëm?

JESUKRISTË yëˈë tyuunkˈäjtë tsajts jëˈtk ets nan Yaˈëxpëjk (Mar. 6:3; Fwank. 13:13). Ets yajxon ttuunyë tyäˈädë majtsk pëkypyë tuunk. Extëm nˈokpëjtakëm, yajxon ttukjäjty dyajtunët ja tuumbajn mä ojts tsyetsy jyëëty. Ets nan yajxon dyajtuuny ja wijyˈäjtën diˈibë myëdäjt mä Diosë yˈAyuk parë ttukniˈˈijxë jäˈäy ets tjaygyukëdët yajxon ja tëyˈäjtën (Mat. 7:28; Luk. 24:32, 45). Ko tmëdäjtyë jyëmëjt 30, ta tmastuty ja tsajts jëˈtk parë dyajtuuny ja jyukyˈäjtënë mä tnimaytyaˈaky ja Diosë Kyutujkën. Nyijäˈäwëbë nety ko yëˈë tyäˈädë tuunk diˈib mas jëjpˈam, pes jyënany ko päätyë Dios kyajxë yä Naxwiiny (Mat. 20:28; Luk. 3:23; 4:43). Yëˈë diˈib ojts tmëwiin tmëjotë mä jyukyˈäjtën ets tsyojk parë nanduˈun ttundëdë wiinkpë (Mat. 9:35-38).

² Kyaj niˈamukë njäjtëmë tsajts jëˈtk, per niˈamukë ngäjpxwäˈkxëm ja oybyë ayuk. Jantsy jëjpˈamë tyäˈädë tuunk, pes axtë Dios mëët nduˈunëm. Biiblyë jyënaˈany “ko yëˈë mëët nduunmujkëmë Dios” (1 Cor. 3:9, TNM; 2 Kor. 6:4). Ets nanduˈun njënäˈänëm extëm jyënany niduˈuk diˈib jyaayë Salmo: “Mä ja mˈaaw mˈayuk yajpataˈay ja tëyajtën” (Sal. 119:159, 160, TY). Pääty tsojkëp nˈijxëm pën yajxon ndukniˈˈijxëmë jäˈäy “ja ayukë tëyˈäjtënbë” (käjpxë 2 Timotee 2:15). Oy ko nduˈunëmë mëjääw parë yajxon nyajtuˈunëmë Biiblyë, pes yëˈë tuˈugë tuumbajn diˈib jëjpˈam  nyajtuˈunëm parë jäˈäy ndukniˈˈijxëm pënën Jyobaa, Jesus ets ja Anaˈam Kutujkën. Parë oy nduˈunëmë tyäˈädë tuunk, të yajwinˈixy kanäägë tuumbajn diˈib tsojkëp nnijäˈäwëm wiˈix tyuny diˈib yajtijp kit de enseñanza o tuumbajn parë jäˈäy nyaˈëxpëjkëm.

3. 1) ¿Mä mbäät nbëjtakëmë winmäˈäny nuˈun yˈakwëˈëmyë tyäˈädë jukyˈäjtën? 2) Extëm jyënaˈanyë Hechos 13:48, ¿pënaty mbäät nˈëxtäˈäyëm?

³ ¿Tiko yajtijy tuumbajn parë jäˈäy nyaˈëxpëjkëm ets kyaj tuumbajn parë ngäjpxwäˈkxëm? Yëˈko ko ngäjpxwäˈkxëm, jeˈeyë ko jäˈäy ndukmëdoˈowëm ja oybyë ayuk, per ko nyaˈëxpëjkëm, yëˈë ko nnimaytyakëm parë jäˈäy tjaygyukët extëm mbäät tpaduny diˈib yajtukniˈˈijxëp. Nuˈun yˈakwëˈëmyë tyäˈädë jukyˈäjtën, oy ko nbëjtakëmë winmäˈäny parë jäˈäy nyaˈëxpëjktsondakëm ets ndukniˈˈijxëm ja tëyˈäjtën. Tyäˈädë yëˈë yˈandijpy ets mëktaˈaky nˈëxtäˈäyëm pënaty nyijawëyandëp ja tëyˈäjtën parë jyukyˈattët winë xëëw ets tmëdundëdë Jyobaa (käjpxë Apostʉlʉty 13:44-47, etsë bersikulo 48 ixë notë). *

4. ¿Wiˈix mbäät nbatëm pënaty “jënandëp ja yˈääw jyot ko kyupëkandëp ja tëyˈäjtën parë jyukyˈattët winë xëëw”?

⁴ ¿Wiˈix mbäät nbatëm pënaty “jënandëp ja yˈääw jyot ko kyupëkandëp ja tëyˈäjtën parë jyukyˈattët winë xëëw”? Ko ngäjpxwäˈkxëm extëm ttuundë mä primer siiglë. Pääty, tsojkëp nbanëjkxëm extëmë Jesus jyënany: “Oy diˈibë siudad o käjpn mnëjkxët, ëxtäˈäytyë axtë ko xypyäättët pën diˈib nitëjkëp” (Mat. 10:11). Nnijäˈäwëm ko kyaj tˈaxäjëyäˈändë ja oybyë ayuk pënaty amëj agëjxm, pënaty kyaj ttsojkënyëˈattë ets pënaty kyaj jyënäˈändë yˈääw jyot. Yëˈë nˈëxtäˈäyëmë jäˈäy diˈib yujy tudaˈaky, diˈib jyantsy nyijawëyaambyë tëyˈäjtën ets jënäämp ja yˈääw jyot. Nˈokpëjtakëm tuˈugë ijxpajtën. Ko Jesus ojts tsyetsy jyëëty, seguurë ko yëˈë yˈëxtääyë oybyë kepy diˈib mbäät tyuny parë dyaˈoyët ja siyë, meesë, tëjkˈagäj ets ja yuubë kyukapë. Ets ko ijty tpääty ja oybyë kepy, ta yajxon dyajtuunkpääty ja tyuumbajn diˈib myëdäjtypy parë dyaˈoyë. Nanduˈun jyaty mët ëtsäjtëm, tsojkëp jawyiin nˈëxtäˈäyëm ja jäˈäy diˈib oyë jyot kyorasoon, ta net nyajtuˈunëm yajxon ja tuumbajn diˈib nmëdäjtëm parë nbudëjkëm ets tyëkët ëxpëjkpë (Mat. 28:19, 20).

5. Nimaytyäˈäk mët tuˈugë ijxpajtën ti tsojkëp nnijäˈäwëm mä tuˈuk tuˈuk ja tuumbajn parë jäˈäy nyaˈëxpëjkëm (ixë dibujë mä tsyondaˈaky).

⁵ Tuˈuk tuˈugë tuumbajn ak tam mä tyuunkpääty. Nˈokwinmäˈäyëm ja tuumbajn diˈibë Jesus yajtuun. Tam ijty diˈib yajtuumpy parë tkijpxy ja kepy, parë tˈajäˈäy, diˈib tyukjëˈtujkypy, diˈib mëët twiˈtjuty, tmoˈoyë yˈijxën, nan tam diˈib mëët dyajkijpxyë ja kepy o diˈib mëët tˈawojpmuky. Nanduˈun jyaty mët ja tuumbajn parë jäˈäy nyaˈëxpëjkëm, ak tam mä tyuny. Pääty, min nˈokˈijxëm wiˈix mbäät nyajtuˈunëm, pes jëjpˈam tuˈuk tuˈuk.

6, 7. 1) ¿Wiˈix mijts të xyyajtunyë tarjetë parë jäˈäy tyëkët mä jw? 2) ¿Wiˈix majtsk pëky tyunyë inbitasyonk diˈib nyajtuˈunëm ko jäˈäy nwoˈowëm reunyonk?

⁶ Tarjetë parë jäˈäy tyëkët mä jw. Tyäˈädë tuumbajn mutskatyëty, per jantsy tuump parë jäˈäy xyˈixyˈäjtëm ets tyëkëdët mä sitio jw. Jap mbäät niˈigyë tnijawëdë pënën ëtsäjtëm ets axtë mbäät tˈamdowdë parë pën yaˈëxpëkëdët. Ja kujkë jäˈäy tˈamdowdë parë tˈëxpëkäˈändë Biiblyë naxy 400,000. ¡Ets tuˈuk tuˈugë xëëw mëgoˈpxˈam tˈamdoowˈadëˈëtstë! Pääty, oy ko xëmë nmëjëdijtëmë tyäˈädë tarjetë, duˈun mbäädë jäˈäy nmëtmaytyakëm oy mä nyaˈijx nyajpatëm.

⁷ Inbitasyonk. Yëˈë diˈib nyajtuˈunëm ko jäˈäy nwoˈowëm reunyonk, ets majtsk pëky  tyuny, tuk pëky tˈanëëmë jäˈäy: “Oyxyëp ko xyˈëxpëkyë Biiblyë mëdë Jyobaa tyestiigëty”, ta net tˈanëëmë ko mbäät duˈun ttuny ko nyëjkxët reunyonk o ko tˈëxpëkëdë Biiblyë mët tuˈugë Testiigë. Perë tyäˈädë tuumbajn kyaj jeˈeyë tyuny parë jäˈäy xyˈixyˈäjtëm, nanduˈunën parë nˈanmäˈäyëm “pënaty jyäˈäwëdëp ko yajtëgoyˈäjttëbë Dios” ets tˈëxpëktëdë Biiblyë mët ëtsäjtëm (Mat. 5:3, TNM). Niˈamukë jäˈäy oy yaˈˈagëˈë yaˈˈaxäjëdë mä reunyonk, oy tkakupëkynyëm pën yaˈëxpëkëdët. Ko yoˈoyët reunyonk, ta tpëkäˈänyë kuentë ko mëjwiin kajaa tnijawëyaˈanyë Biiblyë.

8. ¿Tiko jyëjpˈamëty etsë jäˈäy nyëjkxët mä nduˈukmujkëm oy jeˈeyë tuk tëgok? Pëjtäˈäk tuˈugë ijxpajtën.

⁸ Jëjpˈam etsë jäˈäy nwoˈowëm mä nduˈukmujkëm, oy jeˈeyë nyëjkxët tëgok. ¿Tiko? Jaˈko duˈun tˈixtët wiˈix tyëgatsyëtyë relijyonk diˈib kyaj tyëyˈäjtënëty mëdë Jyobaa tyestiigëty, pes yëˈë ndukniˈˈijxëm ja tëyˈäjtën diˈib mä Biiblyë ets nbudëjkëmë jäˈäy parë tˈixyˈattëdë Dios (Is. 65:13). Duˈun jyajtyë Ray mëdë Linda, tuˈugë kasäädë jäˈäy diˈib Estados Unidos. Myëbëjktëbë netyë Dios ets nëjkxandëbë nety tsäjptëgoty parë niˈigyë tˈixyˈatäˈändë. Ojts ttuknibëjtäägëdë ko nyëjkxäˈändë mä tuˈuk tuˈuk ja tsäjptëjk diˈib japˈäjtp mä tsyëënëdë. Jantsy mayë nety jap ja tsäjptëjk ets jantsy mayë relijyonk. Ko ogäˈän ojts nyëjkxtë, ta ojts nyaygyäjpxëdë ko parë wyëˈëmdët mä tuˈugë tsäjptëjk, tsojkëbë nety jap ti tjattët ets ja jäˈäyëty nyaywyit nyayxyoxëdet extëmë Dios mëduumbë. Ko nyajxy kanäk jëmëjt, të nety dyoˈoyˈabëtsëmdë ja tsäjptëjk diˈib yajpatp mä tadë siudad, ets jantsy axëëk nyayjyäˈäwëdë mët ko nitii nety të tkajattë ets nipënë nety kyanayxyoxëdë tsuj yajxon. Ko pyëtsëëmdë mä ja tim okpë tsäjptëjk, ta Linda ojts nyijkxy tuumbë etsë Ray mä tyëjk. Tuˈääy ta Ray tˈixy tuˈugë Tëjk mä yˈëxpëktë Jyobaa tyestiigëty, ta wyinmääy: “¿Tikots yä ngatëkë parëts nˈixtët ti tyuundëp?”. Ray ta tyëjkë ets jantsy oy jap nyayjyäˈäwë. Niˈamukë tˈijxy ko jantsy ajiiky amëguˈugëty ets ko oy nyaywyit nyayxyoxëdë. Ray tim jëjpˈam nyaxweˈtsy ets jyantsy yˈoymyëdoow tijaty jyäjt. Duˈun jyajty extëm ja ijxpajtën diˈibë apostëlë Pablo myaytyak ko ja jäˈäy tim jawyiin nyijkxy mä ja tuˈukmujkën ets jyënaˈany ko jantsy yajpatp ja Dios mët ëtsäjtëm (1 Kor. 14:23-25). Desde jaa, ta Ray tyëjkë yeˈebyë reunyonk domingë domingë ets ok, ta sëmäängujky. Linda ta nanduˈun tyëjkë yeˈebyë. Ets mä jyëmëjt të nyäjxnëdë 70, ta tyëjkëdë ëxpëjkpë ets nyëbajttë.

9, 10. 1) ¿Tiko kyaj tsyiptaˈaky nyajtuˈunëmë trataadë? 2) Nimaytyäˈäk wiˈix mbäät nyajtuˈunëmë trataadë ¿Ti yˈandijpy Diosë yˈAnaˈam Kyutujkën?

⁹ Trataadë. Ja nmëdäjtëm tuktujkë trataadë diˈib xypyudëjkëm parë pojënë nyajtsondakëmë maytyaˈaky. Desde ko ogäˈän pyëtsëëmy 2013, ja kujk kyojy naa 5 mil miyongën. Ko njäjtëm wiˈix ogäˈän tuˈuk ngëyäjkëm, mbäädë net nanduˈun ngëyäjkëmë wiinkpë, pes tuˈugyë myiny. ¿Wiˈix mbäät nyajtuˈunëm ko nyajtsondakëmë maytyaˈaky?

¹⁰ Nˈokpëjtakëm ko yëˈë nyajtunäˈänëmë trataadë ¿Ti yˈandijpy Diosë yˈAnaˈam Kyutujkën? Mbäät ndukˈijxëmë jäˈäy diˈib miimp winduuy ets nˈanmäˈäyëm: “¿Të näˈä mnayajtëyëty ti yˈandijpy Diosë yˈAnaˈam Kyutujkën? ¿Diˈibë mwinˈixëp mä tyäˈädë tëgëk pëkypyë?”. Oy wiˈix ja jäˈäy yˈatsowët, mbäädë net nyaˈpëmbijtëm ja trataadë ets ndukˈijxëm mä wiˈixë “Biiblyë jyënaˈany”, ets ta ngäjpxëmë Daniel 2:44 etsë Diˈibʉ Jatanʉp 11:15 diˈib jap miimp. Pën mbäät, ta nˈakˈyajnëjkxëm ja maytyaˈaky. Ets ok, ta ndukˈijxëm ja yajtëˈëwën diˈib miimp ëxkëˈëy, mä jyënaˈany “Nayajtëwëdë”: “¿Wiˈix yˈixˈatäˈänyë jukyˈäjtën ko myinëdë Diosë yˈAnaˈam Kyutujkën?”. Net yëˈë nˈatsoˈowëmbijtëm ko  jatëgok nnijëmbijtëm, ets mbäädë net jaa ndukˈijxëmë foyetë Oybyë ayuk diˈib tsoˈomp mä Dios, ëxpëjkën 7. Tyäˈädë yëˈë tuˈugë tuumbajn diˈib nmëdäjtëm parë jäˈäy nyaˈëxpëjktsondakëm.

11. ¿Pënaty yajtuknigojë rebistë, ets ti tsojkëp nnijäˈäwëm mä kyajnëm ngëyäjkëm?

¹¹ Rebistë. Yëˈë rebistë La Atalaya diˈibë jäˈäy yajmoopy etsë ¡Despertad!, yëˈë diˈib niˈigyë yajkäjpxnäjxp kanäk ayuk ets diˈib niˈigyë wäˈkxp abëtsemy nyaxwinyëdë. Kom kanäk paˈisë jäˈäy tkäjpxtë, pääty yajxon yajwinˈixyë temë diˈib mbäädë jäˈäy tˈoymyëdowdë oy mä tsyëënëdët. Oy ko yëˈë nyajtuˈunëm parë jäˈäy ndukˈijxëm diˈib tyam nyijawëyandëp o myëmääy myëdäjtëp. Ets parë kyaj oypyënëty nmoˈoyëm, tsojkëp jawyiin nˈijxëm pën të yajtuknigojë tuˈuk tuˈugë rebistë.

12. 1) ¿Pën të yajtuknigojë rebistë ¡Despertad!, ets wiˈixë jäˈäy tpudëkë? 2) Oknimaytyäˈägë eksperiensyë diˈib mijts të xymyëdaty mëdë tyäˈädë tuumbajn.

¹² Yëˈë rebistë ¡Despertad!, të yajtuknigojë jäˈäy diˈib wanaty nyijäˈäwëdë Biiblyë o diˈib kyaj ttimnijawëdë. Waˈan kyaj tnijawëdë tijatyë Biiblyë tukniˈˈijxëp, kyaj nëgoo ttukjotkujkˈattë relijyonk o waˈan kyaj tnijawëdë ko Biiblyë myëmiimbyë käjpxwijënë diˈib mbäät pyudëkëdë. Tuk pëky wiˈixë tyäˈädë rebistë tpudëkë jäˈäy, yëˈë ets tmëbëkët ko jantsy tamë Dios (Rom. 1:20; Eb. 11:6). Nan pyudëjkëp ets tmëbëkët ko Biiblyë jantsy yëˈë Diosë yˈAyuk (1 Tes. 2:13). Mä jëmëjt 2018, ja të pyëtsëmy tëgëëgë rebistë diˈib të tmëminyë temë: “El camino de la felicidad”, “12 claves para una familia feliz” etsë “Ayuda para quienes están de duelo”.

13. 1) ¿Pënaty të yajtuknigojë La Atalaya diˈibë jäˈäy yajmoopy? 2) Oknimaytyäˈägë eksperiensyë diˈib mijts të xymyëdaty mëdë tyäˈädë tuumbajn.

¹³ La Atalaya diˈibë jäˈäy yajmoopy, yëˈë nyimaytyakypy ja tëyˈäjtënë diˈib yajpatp mä Biiblyë ets yëˈë parë jäˈäy diˈib myëjˈijxypyë Dios etsë Biiblyë. Waˈan tnijawëdë wanatyë Biiblyë, per kyaj tjaygyukëdë yajxon ti tukniˈˈijxëp (Rom. 10:2; 1 Tim. 2:3, 4). Mä jëmëjt 2018, ja të pyëtsëmy tëgëëgë rebistë diˈib të tˈatsoowëmbityë tyäˈädë yajtëˈëwën: “¿Sigue siendo útil la Biblia?”, “¿Qué encierra el futuro?” ets “¿Piensa Dios en usted?”.

14. 1) ¿Wiˈix mbäät nyajtuˈunëm tëgëëgë bideo diˈib tëjkëp mä ja tuumbajn parë jäˈäy nyaˈëxpëjkëm? 2) Oknimaytyäˈägë eksperiensyë diˈib mijts të xymyëdaty mëdë tyäˈädë tuumbajn.

¹⁴ Bideo. Ja tiempë mä Jesus jyukyˈajty, ja tsajts jëˈtpë ak këˈam ijty ja tyuumbajn, per tyam, ta tuumbajnë jëënmëëtpë, extëmë jëˈtn, talaadrë, diˈibë kepy yajtëˈxkëp ets diˈibë klääbës yajtëjkëp. Nanduˈun tyam, kyaj jeˈeyë nekymyëdäjtëmë ëxpëjkpajn diˈib nekyëjxy, nanduˈunën nmëdäjtëmë bideo jantsy oyatypyë. Tëgëëgë tyäˈädë bideo yëˈë diˈib tëjkëp mä ja tuumbajn parë jäˈäy nyaˈëxpëjkëm: ¿Tiko xyˈëxpëkëdë Biiblyë?, ¿Wiˈixë jäˈäy tˈëxpëkyë Biiblyë?, ¿Ti yajtuump mä ja Tëjk mä yˈëxpëktë Jyobaa tyestiigëty? etsë ¿Quiénes somos los testigos de Jehová? Diˈib jajkp naa majtsk minutën, mbäät nyajtuˈunëm ko tim ogäˈänë jäˈäy nmëtmaytyakëm. Ets diˈib jajkp niˈigyë, mbäät nyajtuˈunëm ko jatëgokë jäˈäy nnijëmbijtëm ets ko tiempë dyakët. Tyäˈädë tuumbajn mbäät pyudëkëty ja jäˈäy parë tkupëkët tuˈugë ëxpëjkën o nyëjkxët mä nduˈukmujkëm.

15. Oknimaytyäˈäk tuˈugë ijxpajtën wiˈixë jäˈäy pyudëkëdë bideo ko tˈixtë mä yˈayuk.

¹⁵ Min nˈokˈijxëm wiˈixë jäˈäy pyudëkëdë bideo. Tuˈugë nmëguˈukˈäjtëm pyat tuˈugë toxytyëjk diˈib tsoˈomp Micronesia, ta ttukˈijxyë bideo mä yˈayuk yapés ¿Tiko xyˈëxpëkëdë Biiblyë? Ko ja bideo tsyondaky, ta ja toxytyëjk jyënany: “¡Kyajtsëgaˈa nmëbëkäˈäny, yëˈëtsëgaˈa nˈayuk! Tadë yetyëjk diˈib  jap käjpxp duˈun kyajpxy extëmëts ngäjpxtë. ¡Yëˈë kyajpxypyëtsë nˈayuk!”. Ta net jyënany ko yˈijxtäˈäyaampy ets kyäjpxtäˈäyaampy tijaty miimp mä jw.org mä ayuk yapés (ix nanduˈunë Apostʉlʉty 2:8, 11). Tuˈugë nmëguˈukˈäjtëm diˈib Estados Unidos, nan tyuknigajxë tsyojkmäänk diˈib tsënaapy wiink paˈis, tuˈugë link mä myinyë tyäˈädë bideo parë tˈixët mä yˈayuk. Ko tˈijxtääy, ta yˈanmääyë mä tuˈugë correo electrónico: “Diˈibëts mas të nˈoymyëdoy, yëˈë mä tnimaytyaˈaky ko Mëjkuˈu yëˈë kyëˈamˈäjtypyë naxwinyëdë, kumëjääw ets axëkjäˈäy. Tëts nˈamdoy parëts nˈëxpëkäˈänyë Biiblyë”. Tyäˈädë tsyojkmäänk jap tsyëënë mä tuˈugë paˈis mä kyubokyë Diosë tyuunk.

16. Nimaytyäˈäk wiˈix tyuny tuˈuk tuˈugë tyäˈädë foyetë 1) Mëdow ko Dios mmëgajpxyëty ets mjukyˈatët winë xëë. 2) Oybyë ayuk diˈib tsoˈomp mä Dios. 3) ¿Pënaty tyam tyuundëp ti Jyobaa tsyejpy?

¹⁶ Foyetë. ¿Wiˈix mbäät ndukniˈˈijxëmë tëyˈäjtën tuˈugë jäˈäy diˈib kyaj oy nyekykyajpxy o kyaj ti ëxpëjkpajn mä yˈayuk? Wenë, nmëdäjtëm tuˈugë oybyë tuumbajn: yëˈë foyetë Mëdow ko Dios mmëgajpxyëty ets mjukyˈatët winë xëë. * Jatuˈugë oybyë tuumbajn parë nyaˈëxpëjktsondakëmë jäˈäy, yëˈë foyetë Oybyë ayuk diˈib tsoˈomp mä Dios. Mbäät ndukˈijxëm foyetë ëxkëˈëy mä myiny 14 temë, ets nyajtëˈëwëm diˈibë nyijawëyaampy, ta net yëˈë mëët nˈëxpëjktsondakëm. ¿Të duˈun xyˈijxmatsy ko xynyijëmbity tuˈugë jäˈäy? Myëdëgëëkpë foyetë parë jäˈäy nyaˈëxpëjkëm, yëˈë ¿Pënaty tyam tyuundëp ti Jyobaa tsyejpy? Tyäˈädë foyetë të yajtuknibëjtäägë ets pënaty nyaˈëxpëjkëm ndukˈixyˈäjtëmë Diosë kyäjpn. Parë nnijäˈäwëm wiˈix nyajtuˈunëm, mbäät nˈijxëm mä Wiˈix njukyˈäjtëm ets nDiosmëduˈunëm: Tijaty yaˈëxpëkäämp ets yajtukjayëyäämp, diˈib marsë 2017.

17. 1) ¿Wiˈix tpudëkë jäˈäy tuˈuk tuˈugë liibrë diˈib nyajtuˈunëm parë nyaˈëxpëjkëm? 2) ¿Ti mbäät ttundë niˈamukë pënaty nëbajttëp, ets tiko?

¹⁷ Liibrë. Pën nyaˈëxpëjktsondakëm tuˈugë jäˈäy mëdë foyetë, mbäät oy tyim näˈäjëty mëët nˈëxpëjktsondakëmë liibrë ¿Ti tëyˈäjtën tukniˈˈijxëbë Biiblyë? Mëdë tyäˈädë liibrë mbäät niˈigyë tnijawë tijatyën jëjpˈam tukniˈˈijxëbë Biiblyë. Ets pën yajkejxypy ets nˈijxëm ko wimbajtp, ta net mëët nˈëxpëjkëmë liibrë “Nayaˈitëdë xëmë mä ja Diosë tsyojkën”. Tyäˈädë liibrë pudëkëyanëp parë tpadunëdë Biiblyë kyäjpxwijën tuˈuk tuˈugë xëëw. Nˈokjamyajtsëm ko niˈamukë pënaty nyaˈëxpëjkëm, tsojkëp dyajkëxtëdë tyäˈädë majtskpë liibrë oyë nety të jyanëbajnëdë. Duˈuntsoo yˈitët mëk ja yˈääts tyikts mä ja tëyˈäjtën (käjpxë Kolosʉ 2:6, 7).

18. 1) Extëm jyënaˈanyë 1 Timotee 4:16, ¿ti tsojkëp nduˈunëm, ets wiˈix wyimbëtsëmäˈäny? 2) ¿Ti mbäät nyaˈijtëm winmäˈänyoty ko nyajtuˈunëm ja tuumbajn parë jäˈäy nyaˈëxpëjkëm?

¹⁸ Jyobaa tyestiigëty, nikëjxmˈäjtëm ets ndukniˈˈijxëmë jäˈäy ja oybyë ayuk parë tpäättët ja jukyˈäjtënë winë xëëw winë tiempë (Kol. 1:5; käjpxë 1 Timotee 4:16). Parë duˈun nduˈunëm, të nyajmoˈoyëmë tuumbajn parë jäˈäy nyaˈëxpëjkëm (ixë rekuäädrë “ Tuumbajn parë jäˈäy nyaˈëxpëjkëm”). Nˈokˈyajtuunkpatëm yajxon. Niduˈuk niduˈuk mbäät nˈijxëm ti tuumbajn nyajtunäˈänëm ets näˈä nyajtunäˈänëm. Per nˈokˈyaˈijtëm winmäˈänyoty ko kyaj jeˈeyë ngoonwäˈkxëmë ëxpëjkpajn o nmoˈoyëmë jäˈäy diˈib ni tkatsojkënyëˈattë Diosë yˈayuk. Yëˈë duˈun nbäädäˈänëmë jäˈäy diˈib pyanëjkxaambyë Jesus diˈib jënäämp ja “yˈääw jyot ko kyupëkandëp ja tëyˈäjtën parë jyukyˈattët winë xëëw”, diˈib yujy tudaˈaky ets diˈib jyantsy nyijawëyaampy ja tëyˈäjtën (Hech. 13:48, TNM; Mat. 28:19, 20).