1, 2. (a) Iesu ena mauri ai edena ḡaukara e atoa guna, bona dahaka dainai? (b) ‘Dirava ida baita ḡaukara hebou’ totona dahaka baita kara na namo?

IESU KERISO na kapenta bona Dirava ena hesiai tauna. (Mar. 6:3; Roma 15:8) Unu ḡaukara ruaosi na e dibadia namonamo. Ia na kapenta dainai, tulu iḡaukaralaidia daladia e diba bona au amo kohu namodia e karava. Danu, ia na sivarai namona ihahedibalaina tauna dainai, Buka Helaḡa ai e diba herevadia amo taunimanima e durudiava hereva momokani na bae lalopararalaia. (Mat. 7:28; Luka 24:32, 45) Laḡanina 30 e abia neganai, iena kapenta ḡaukarana e rakatania unu amo Dirava isiaina baine lao heni, badina mai dibana una na iena ḡaukara badana. Ia na eto, Dirava ese tanobada e siaia badina ta na, Basileia sivaraina namona baine harorolaia. (Mat. 20:28; Luka 3:23; 4:43) Ena mauri ai haroro ḡaukara e atoa gunava, bona e urava haida danu ia ida una ḡaukara bae karaia.​—Mat. 9:35-38.

² Ita na dia kapenta tauda, to sivarai namona iharorolaina tauda. Una ḡaukara na mai anina bada, badina ‘Dirava ida ta ḡaukara heboumu.’ (1 Kor. 3:9; 2 Kor. 6:4) Ta dibamu Iehova ena “hereva iboudiai anidia na momokani.” (Sal. 119:159, 160) Una dainai haroro ḡaukara ai ‘hereva momokani igwaurai-ḡoevana taudia’ ai baitala. (2 Timoteo 2:15 ba duahia.) Una baine vara totona, Baibul baita ḡaukaralaia namonamo daladia baita diba, badina una tulu badana amo Iehova, Iesu, bona Basileia na  taunimanima ediai ta herevalaiamu. Iseda hesiai ḡaukara baita haḡuḡurua totona, Iehova na ena orea amo tulu haida e halasimu bona namona na iḡaukaralaidia daladia baita manadalai. Unu tulu na eda Hahediba Mauana lalonai.

3. Ina nega kwadoḡina lalonai, iseda ḡaukara badana be dahaka, bona Kara 13:48 ese ede e duruda tomamu?

³ Reana bo laloamu, ‘dahaka dainai ta gwaumu Hahediba Mauana, dia Haroro Mauana?’ “Haroro” anina na sivarai ta ba halasia; a “hahediba” anina be una sivarai na ta enai ba herevalaia namonamo bena darana bona kudouna ai baine vareai, unu amo e dibaiamu ḡauna baine badinaia. Ina nega kwadoḡina lalonai, iseda ḡaukara badana na Baibul stadi baita hamatama bona hereva momokani na taunimanima baita hadibadia. Anina na baita hekwarahi “e abidia hidi mauri hanaihanai bae abia taudia iboudiai” baita tahudia bona baita durudia Dirava bae hesiai henia.​—Kara 13:44-48 ba duahi.

4. Ede baita diba tomamu daidia be “e abidia hidi mauri hanaihanai bae abia taudia,” bona ede baita davaridia toma?

⁴ To, ede baita diba tomamu daidia be “e abidia hidi mauri hanaihanai bae abia taudia”? Kristen ginigunadia edia negai, haroro ḡaukara ai taunimanima unu bamodia e davaridiava. Una dainai, Iesu ena hereva baita badinaia na namo, eto: “Hanua maraḡina ta ai eiava hanua badana ta ai ba kau negana ai, gaiho namo tauna ta ba tahua.” (Mat. 10:11) Baita helalotao, haroro ḡaukara ai ta davaridiamu taudia haida na e koikoimu eiava e hekokorokumu, eiava asie uramu Dirava bae dibaia. Ta tahudiamu taudia na e kara momokanimu taudia, e manaumu bona hereva momokani e uramu bae diba taudia. Una hetahu karana na Iesu, kapenta tauna, ena kara ida baita haheḡereḡerea, ia ese au maorona e tahua gunava unu amo sea, iduara, maduna ihuadia audia, eiava ḡau ma haida baine kara. Au maorona e davariava neganai, ena tulu mauana e abiava bona ena diba e ḡaukaralaiava ḡau ta baine karaia totona. Namona na unu baita kara toma kudou namo taudia na hahediba ai baita halaodia.​—Mat. 28:19, 20.

5. Hahediba Mauana lalonai tulu idauidau be ede baita lalodia toma? Haheitalai mani a gwauraia. (Rau 11 ai laulau ba itaia.)

⁵ Tulu mauadia lalodiai, tulu ta ta na mai edia ḡaukara. Heḡereḡere, Iesu ese e ḡaukaralai tuludia haida mani aita lalo. * Iena tulu haida amo au baine makadia, baine utudia, matudia baine kara bona baine beudia maoro, a tulu haida be au edia bada bona lata baine haheḡereḡeredia bona baine kokodia. Una heḡereḡerena, eda Hahediba Mauana lalonai tulu ta ta na mai edia ḡaukara. Mani unu tulu ta ta baita ḡaukaralai daladia aita herevalai.

6, 7. (a) Kontek kadi be ede o ḡaukaralaia tomamu? (b) Kongrigeisen hebou ena invateisen pepana ena ḡaukara be dahaka?

⁶ Kontek Kadi. Ena be una na tulu maraḡina to ia amo taunimanima e dibamu ita be daidia bona eda websait baela diba, unu amo ḡau ma haida bae diba bona Baibul stadi totona bae noinoi diba. Taunimanima 400,000 mai kahana na jw.org amo Baibul bae stadilaia totona e noinoimu, bona dina ta ta momo na dounu stadi totona e noinoimu! Kontek kadi haida bavabi loa unu amo dina ta ta ai dala e hekomu negadiai taunimanima ba henidia diba.

⁷ Invateisen. Kongrigeisen hebouna ena invateisen pepana na ini e gwau tomamu: “A vavemumu Iehova ena Witnes ida Baibul ba stadilaia.” Bena kamonai tauna ese una baine karaia daladia rua e hahedinarai:  (1) “Eda kongrigeisen heboudia” ai eiava (2) “hahediba tauna ta ida.” Una tulu amo taunimanima na e dibamu ita be daidia bona Dirava e uramu bae dibaia taudia e vavediamu Baibul bae stadilaia. (Mat. 5:3, NWT) Momokani, taunimanima na eda hebou baema diba ena be Baibul bae stadilaia eiava lasi. Eda hebou be maimu neganai, ḡau momo na Baibul amo be dibamu.

8. Dahaka dainai taunimanima baema eda hebou na mai anina bada? Haheitalai ta mani a gwauraia.

⁸ Taunimanima na dounu baita vavedia baema eda hebou na mai anina bada. Dahaka dainai? Unu amo bae itaia, ita na Baibul ena hereva momokani ta hahedibalaiamu, to tomadiho koikoidia na unu na asie kara tomamu. (Isa. 65:13) United States ai e nohomu headava taudia Ray bona Linda na laḡani haida gunadiai e itaia ḡau haida na e idau. Idia na lalodia e hadai dubu baela. E abia daeva Dirava na e nohomu bona e urava ia bae dibaia dainai, dubu ta ta e vadivadidia. Edia gabu ai dubu na idauidau bona momo herea. Una nega amo, edia ura badana na dubu ai ḡau rua bae ita. Ginigunana be, dubu ai ḡau ta bae dibaia, bona iharuana be, namona na dubu taudia edia kara bona hereva ese bae hahedinaraia idia na Dirava e matauraiamu taudia. Laḡani momo muridiai, dubu momo e laova to asie moaleva. Badina ḡau ta se dibaiava bona dubu taudia na dia hemataurai dabuadia e hahedokilaiva. Dubu ginigabena amo e raka lasi murinai, Linda be eha ḡaukara, a Ray be ruma ela. Ray na motuka amo e laova lalonai, Kingdom Hall ta e itaia bena e lalo, ‘Mani aina vareai bona baina ita idia be dahaka e karamu?’ Momokani, ela neganai e moale! Kingdom Hall ai iboudiai ese mai moaledia ida e hedavari henia bona idia na hemataurai dabuadia e hahedokilai. Ray na vaira kahana ai e helai bona e diba ḡaudia na e moalelai! Ia na aposetolo Paulo ese e herevalaia tauna heḡereḡerena, nega ginigunana Kristen hebouna ela bena ini e gwau toma: “Momokani, Dirava na umui bogaraḡimui ai.” (1 Kor. 14:23-25) Una nega amo Ray na Sunday bona pura ta ta heboudia iboudiai e laova, Linda danu hebou ela matama. Idia na laḡanidia 70 lalodiai, Baibul e stadilaia bona e bapatiso.

9, 10. (a) Dahaka dainai ai pepapepa iḡaukaralaidia na dia auka? (b) O Laloamu Dirava Ena Basileia be Dahaka? pepapepana iḡaukaralaina dalana mani ba herevalaia.

⁹ Pepapepa. Herevahereva ihamatamadia pepapepadia na 8. Laḡani 2013 ai unu pepapepa e halasidia negana amo ema bona hari, 5 bilion mai kahana vada e printi! Pepapepa ta iḡaukaralaina dalana bo dibamu neganai, unu haida iḡaukaralaidia na be haraḡamu badina e toredia daladia na heḡereḡere. Ta ida o herevaherevamu neganai, edena dala ai pepapepa ta ba ḡaukaralaia diba?

¹⁰ Reana o uramu ina pepapepa, O Laloamu Dirava Ena Basileia be Dahaka? ba ḡaukaralaia. Vairanai e hetore henanadaina ba hahedinaraia bena bao gwa: “O laloamu Dirava ena Basileia be dahaka? Ia be . . . ?” Bena ba noia haere toi amo ta baine abia hidi. Ena be haere maorona e abia hidi eiava lasi, to pepa lalonai ina kaha “Baibel Na E Tomamu” ba hahedinaraia bona e hetore siridia Daniel 2:44 bona Isaia 9:6 ba herevalai. Bema heḡereḡere, emui herevahereva ba halataia diba. Emui herevahereva dokonai, pepa murinai ina kaha “Mani A Laloa” henunai e hetore henanadaina “Dirava Ena Basileia henunai mauri be ede be hetomu?” ba rakatania. Ba lou neganai una ba herevalaia. Gabeai, o loumu neganai, buklet ladana Sivarai Namodia Dirava Amo! ena lesen 7 ba herevalaia, una na Baibul stadi baita hamatamaia tuluna ta.

11. Eda magasin ese taunimanima be ede baine durudia toma, bona dahaka baita kara be namo?

¹¹ Magasin. Watchtower bona Awake! na tanobada heḡeḡemadai gado momo ai e hahanaimu bona e halasimu! Iseda magasin na taunimanima idauidau ese e duahimu, una dainai hereva kwaradia na taunimanima lalodia bae veri dalanai e tore. Unu magasin amo taunimanima baita durudia bena bae laloparara dahaka be mai anina bada. To, namona na ta uramu baita durua tauna ena lalohadai baita diba unu amo magasin maorona baita henia.

12. (a) Awake! magasin be daidia idurudia totona e tore, bona e karaia badina badana be dahaka? (b) Awake! o ḡaukaralaia neganai dahaka ekspiriens o davari?

¹² Awake! magasin e karaia badina na Baibul asi dibadia namonamo taudia baine durudia. Reana Iesu ena hahediba herevadia na asi dibadia, tomadiho se abia daemu, eiava asi dibadia Baibul na mai ena namo. Awake! magasin e karaia badina badana na iduahina tauna baine durua bena baine abia dae Dirava na e nohomu. (Roma 1:20; Heb. 11:6) Danu, baine hamomokania Baibul na “Dirava ena hereva.” (1 Tes. 2:13) Laḡani 2018 ai e halasi Awake! magasin toi sinadodia bini: “The Way of Happiness,” “12 Secrets of Successful Families,” bona “Help for Those Who Grieve.”

13. (a) Pablik Gima Kohorona be daidia idurudia totona e tore? (b) Una magasin o ḡaukaralaia neganai dahaka ekspiriens o davari?

¹³ Pablik Watchtower e karaia badina na Dirava bona ena Hereva e matauraiamu taudia baine durudia lauma ḡaudia bae lalo bada totona. Ena be Baibul na mai dibadia, to ena hahediba herevadia na se lalopararalai namonamomu. (Roma 10:2; 1 Tim. 2:3, 4) Laḡani 2018 ai e halasi Watchtower magasin toi sinadodia bini: “Is the Bible Still Relevant Today?,” “What Does the Future Hold?,” bona “Does God Care About You?”

14. (a) Eda Hahediba Mauana ai vidio hani e kara badidia be dahaka? (b) Ini vidio amo dahaka ekspiriens namodia o davari?

¹⁴ Vidio. Iesu ena negai, kapenta tauna na ima ai e ḡaukaralaiva tuludia mo e ḡaukaralaiva. To, hari ina negai, kapenta taudia ese paoa tuludia e ḡaukaralaimu, heḡereḡere iri (saw), drill, sander, nailer, bona ma haida. Haroro ḡaukara ai, ita na e prinitidia pablikeisen mo asita hariharilaimu, to vidio namodia na taunimanima ediai ta hahedinaraimu​—eda hahediba mauana ai unu vidio hani bini: Dahaka Dainai Baibul Ba Stadilaia?, Baibul Stadi ai be Dahaka E Karamu?, Kingdom Hall ai be Dahaka E Karamu?, bona Jehovah’s Witnesses​—Who Are We? Vidio kwadoḡidia na miniti rua lalonai ba halasi bona haroro ginigunana ai ba ḡaukaralai diba. Vidio latadia be lou henia ai bona edia nega na heḡereḡere taudia ediai ba ḡaukaralai diba. Ini tulu namodia ese taunimanima bae hagoadadia Baibul bae stadilaia bona eda hebou baema.

15. Haida na edia gado ai eda vidio e ita neganai dahaka namo e davari? Haheitalai a gwauraia.

¹⁵ Haheitalai ta bina, taihu ta ese hahine ta e hedavari henia, una hahine na Micronesia amo bona ena gado ginigunana na Yapese. Taihu ese una hahine ena gado ai Dahaka Dainai Baibul Ba Stadilaia? vidiona e hahedinaraia. Una vidio e halasia matama neganai, una hahine na eto: “Ina na egu gado. Na moalemu! Ina tau ena hereva dalana amo na dibamu ia na egu motumotu tauna ta. Badina egu gado ai e herevamu!” Una murinai, una hahine na e gwa jw.org ai ena gado pablikeisen baine duahidia bona vidiodia baine ita. (Kara 2:8, 11 ba itaia.) Mani ekspiriens ma ta a laloa. United States ai, taihu ta ese ena gado ai una vidio ena link na taihuna natuna  merona e siai henia. Mero ese una vidio e itaia murinai, lalana enai e-mail e siaia, eto: “Dika tauna ta ese tanobada e biaguamu kahana na na ura henia. Lau na Baibul stadi totona fom na hahonua.” Una mero na eda ḡaukara e taravatua tanona ta ai e nohomu.

16. Mani ini buklet ta ta e kara badidia a herevalai: (a) Dirava Ba Kamonai Henia Bena Ba Mauri Hanaihanai. (b) Sivarai Namodia Dirava Amo! (c) Ina Negai Iehova Ena Ura E Karaiamu Taudia be Daidia?

¹⁶ Buklet. Bema ta na se duahiduahi namonamomu eiava ena gado pablikeisen na lasi, edena dala ai hereva momokani baita hadibaia diba? Baita durudia diba tuluna ta na, buklet ladana Dirava Ba Kamonai Henia Bena Ba Mauri Hanaihanai. * Baibul stadi baita hamatamaia tulu namona ta na, buklet ladana Sivarai Namodia Dirava Amo! Ta enai una buklet murina kahanai topik idauidau 14 ba hahedinarai bona ba nanadaia edena topik e uramu baine dibaia. Bena una lesen amo stadi ba hamatamaia. Emu lou henia ai ina dala vada o tohoa, a? Hahediba mauana ai buklet ihatoina bina, Ina Negai Iehova Ena Ura E Karaiamu Taudia be Daidia? Ina buklet ese stiuden baine durudia eda orea ena heau dalana bae dibaia. Baibul stadi ta ta ai una buklet iḡaukaralaina daladia ba diba totona, March 2017 Eda Kristen Mauri Bona Hesiai Ḡaukara​—Hebou Pepana ba itaia.

17. (a) Stadi bukadia ta ta e kara badidia be dahaka? (b) Bapatiso e abi taudia be dahaka bae kara na namo, bona dahaka dainai?

¹⁷ Buka. Buklet ai stadi ta o hamatamaia murinai, ina buka, What Can the Bible Teach Us? ba ḡaukaralaia diba. Una buka ese stiuden ena diba Baibul ena hahediba hereva badadia ai baine habadaia. Stiuden ida una buka ba stadilaia ore bona bema ia na lauma dalanai e goada e laomu, How to Remain in God’s Love bukana ba stadilaia diba. * Ina buka ese stiuden baine hadibaia edena dala ai ena mauri lalonai Baibul ena hahekau herevadia baine badina. Ba helalotao, stiuden bae bapatiso murinai, unu buka ruaosi na dounu ba stadilai ela bona ba haoredia. Una ese baine durudia hereva momokani ai bae gini tutuka-tutuka.​—Kolose 2:6, 7 ba duahi.

18. (a) Timoteo Ginigunana 4:16 ese e hagoadadamu dahaka baita kara, bona una ese dahaka baine havaraia? (b) Hahediba Mauana ta ḡaukaralaiamu neganai, eda ura badana be dahaka?

¹⁸ Ita na Iehova ena Witnes tauda dainai, eda maduna na taunimanima ediai “sivarai namo ena hereva momokani” baita hadibadia unu amo mauri hanaihanai bae abia diba. (Kol. 1:5; 1 Timoteo 4:16 ba duahia.) Una baita karaia totona, eda Hahediba Mauana ai baita ḡaukaralai tuludia na momo herea. (“ Hahediba Mauana” ba itaia.) Namona na unu tulu idauidau baita ḡaukaralai namonamo. Pablisa ta ta ese abi hidi bae kara edena pablikeisen be kamonai tauna enai bae herevalaia bona edena negai bae ḡaukaralaia. Namona na eda pablikeisen baita hariharilaidia, to se uramu bae kamonai taudia na basita henidia kava. Iseda ura badana na e kara momokanimu, e manaumu, bona hereva momokani e uramu bae diba taudia na hahediba ai baita halaodia​—idia na “mauri hanaihanai” e uramu bae abia kudou namo taudia.​—Kara 13:48; Mat. 28:19, 20.