1, 2. a) ¿Ndáaña ke̱ʼé ta̱ Jesús tá ni̱xi̱yora nu̱ú ñuʼú yóʼo ta nda̱chun ke̱ʼéraña? b) ¿Ndáaña xíniñúʼu keʼéyó ña̱ va̱ʼaka kachíñuyó xíʼin Ndióxi̱?

TA̱ JESÚS xi̱kuura carpintero ta saátu sa̱náʼa̱ra na̱ yiví xa̱ʼa Ndióxi̱ (Mar. 6:3; Rom. 15:8). Va̱ʼaníva ke̱ʼéra u̱vi̱ saá chiñu yóʼo. Sa̱kuaʼara kuniñúʼura ña̱ʼa ña̱ xi̱xiniñúʼu na̱ carpintero. Ta saátu va̱ʼaní xi̱niñúʼura ña̱ sa̱kuaʼara nu̱ú Biblia ña̱ va̱ʼa sanáʼa̱ra na̱ yiví ña̱ nda̱a̱ xa̱ʼa Ndióxi̱ (Mat. 7:28; Luc. 24:32, 45). Tá xi̱kuumiíra 30 ku̱i̱ya̱ sa̱ndákoora chiñu ña̱ xi̱kuura carpintero ña̱ va̱ʼa ku̱ʼu̱nra sanáʼa̱ra na̱ yiví xa̱ʼa reino Ndióxi̱. Xi̱kunda̱a̱-inira ña̱ ndáyáʼviní keʼéra ña̱yóʼo chi ni̱ka̱ʼa̱nra, xa̱ʼa ña̱kán kúú ña̱ chi̱ndaʼá Ndióxi̱ miíra ña̱ ki̱xira ñuʼú yóʼo (Mat. 20:28; Luc. 3:23; 4:43). Ña̱ xi̱ndayáʼvika nu̱úra kúú ña̱ sanáʼa̱ra na̱ yiví xa̱ʼa Ndióxi̱, ta saátu xi̱kuni̱ra ná keʼé inkana ña̱yóʼo (Mat. 9:35-38).

² Su̱ví ndiʼiyó kúú carpintero tiempo vitin soo ndiʼiyó sánáʼa̱ xa̱ʼa Ndióxi̱. Ndáyáʼviní ña̱yóʼo, ta nda̱a̱ Jehová chíndeétáʼan xíʼinyó. Biblia káʼa̱nña ña̱ kúúyó na̱ káchíñu xíʼin Ndióxi̱ (1 Cor. 3:9; 2 Cor. 6:4). Xa̱a̱ xíni̱yó ña̱ tu̱ʼun Ndióxi̱ kúú mií ña̱ nda̱a̱ (Sal. 119:159, 160). Xa̱ʼa ña̱yóʼo chíka̱a̱yó ndée ña̱ va̱ʼa kuniñúʼuyó tu̱ʼun Ndióxi̱ tá ku̱a̱ʼa̱nyó sánáʼa̱yó na̱ yiví (kaʼvi 2 Timoteo 2:15). * Xa̱ʼa ña̱yóʼo xíniñúʼu chika̱a̱yó ndée ña̱ va̱ʼaníka kuniñúʼuyó Biblia chi ña̱yóʼo  kúú ña̱ chíndeétáʼan xíʼinyó ña̱ va̱ʼa sanáʼa̱yó ña̱ nda̱a̱ xa̱ʼa Jehová, xa̱ʼa ta̱ Jesús, saátu xa̱ʼa reinora. Ña̱ va̱ʼaníka sanáʼa̱yó na̱ yiví, na̱ ñuu Ndióxi̱ táxina ña̱ kivi kuniñúʼuyó, soo xíniñúʼu sakuaʼayó ña̱ kuniñúʼu va̱ʼayóña, ta ña̱yóʼo kúú nu̱ú va̱xi tutu ña̱ xíniñúʼuyó tá sánáʼa̱yó na̱ yiví.

3. a) ¿Ndáaña xíniñúʼu kundayáʼvika nu̱úyó, xa̱ʼa ña̱ si̱lóʼo tiempo kúma̱ní ña̱ ndiʼi xa̱ʼa ñuyǐví yóʼo? b) Nda̱a̱ táki̱ʼva káchi Hechos 13:48 ¿Nda̱ana xíniñúʼu nandukúyó?

³ Sana ndákanixi̱níyó nda̱chun naní ña̱yóʼo nu̱ú va̱xi tutu ña̱ xíniñúʼuyó tá sánáʼa̱yó, ta va̱ása naníña nu̱ú va̱xi tutu ña̱ xíniñúʼuyó predicación. Tá káʼa̱nyó xa̱ʼa predicación, káʼa̱nyó xa̱ʼa ña̱ nátúʼunyó xíʼin na̱ yiví. Soo tá káʼa̱nyó xa̱ʼa ña̱ sánáʼa̱yó, káʼa̱nyó xa̱ʼa ña̱ chíndeétáʼanyó xíʼinna ña̱ va̱ʼa ná kunda̱a̱-inina ña̱ nda̱a̱ xa̱ʼa Ndióxi̱ ta keʼéna ña̱ kúni̱ra. Xa̱a̱ si̱lóʼo tiempo kúma̱ní ña̱ ndiʼi-xa̱ʼa ñuyǐví yóʼo, ña̱kán xíniñúʼu chika̱a̱yó ndée ña̱ va̱ʼa kaʼviyó xíʼin na̱ yiví ta sanáʼa̱yóna ña̱ nda̱a̱. Ña̱yóʼo kúni̱ kachiña ña̱ xíniñúʼu chika̱a̱níyó ndée ña̱ nandukúyó na̱ ndinuʼu-ini kúni̱ kutaku ndiʼi tiempo, ta ná chindeétáʼanyó xíʼinna ña̱ va̱ʼa xa̱a̱na ndasakáʼnuna Jehová (kaʼvi Hechos 13:44-48). *

4. ¿Nda̱saa kivi ndani̱ʼíyó “na̱ ndinuʼu-ini kúni̱ kutaku ndiʼi tiempo”?

⁴ ¿Nda̱saa kivi ndani̱ʼíyó na̱ ndinuʼu-ini kúni̱ kutaku ndiʼi tiempo? Táki̱ʼva ke̱ʼéna tá siglo nu̱ú, ña̱ kivi keʼéyó kúú ña̱ ku̱ʼu̱nyó sanáʼa̱yó na̱ yiví. Ña̱kán xíniñúʼu kundiku̱nyó ña̱ ni̱ka̱ʼa̱n ta̱ Jesús: “Ndáaka mií ñuu xa̱a̱ndó ni ñuu válí á ñuu náʼnu, nandukú va̱ʼandó nda̱a̱ ndani̱ʼíndó na̱ yiví na̱ kúni̱ sakuaʼa xa̱ʼa Ndióxi̱, ta koondó kán xíʼinna nda̱a̱ ki̱vi̱ keendó veʼena” (Mat. 10:11). Xa̱a̱ xíni̱yó ña̱ va̱ása kándíxa sava na̱ yiví sakuaʼana xa̱ʼa Ndióxi̱ chi ni̱nu kúni̱na. Soo nándukúyó na̱ vitá-ini na̱ kúni̱ sakuaʼa xa̱ʼa ña̱ nda̱a̱. Ná káʼa̱nyó xa̱ʼa iin ejemplo. Tá xi̱kuu ta̱ Jesús carpintero, sana xi̱nandukúra yitu̱n tú va̱ʼa ña̱ va̱ʼa keʼéra tú mueble, á yéʼé, á yugo. Tá xi̱ndani̱ʼíranu va̱ʼaní xi̱xiniñúʼuranú, ña̱ va̱ʼa keʼéra tú mueble. Saátu miíyó: siʼna xíniñúʼu nandukúyó na̱ yiví na̱ ndinuʼu-ini kúni̱ sakuaʼa xa̱ʼa Ndióxi̱, saá kivi kuniñúʼuyó ña̱ táxi na̱ ñuu Ndióxi̱ ndaʼa̱yó tasaá va̱ʼaní sanáʼa̱yó na̱ yiví ta xa̱a̱na ndasakáʼnunara (Mat. 28:19, 20).

5. Ka̱ʼa̱n xa̱ʼa iin ejemplo, ña̱ náʼa̱ nu̱úyó ndáaña kivi keʼéyó tasaá va̱ʼa kuniñúʼuyó ña̱ʼa tá sanáʼa̱yó na̱ yiví (koto na̱ʼná ña̱ va̱xi chí xa̱ʼa).

⁵ Iin iin ña̱ʼa xa̱a̱ íyo chiñu kivi keʼéyó xíʼinña. Ná ndakanixi̱níyó xa̱ʼa ña̱ʼa ña̱ xi̱xiniñúʼu ta̱ Jesús tá xi̱kuura carpintero. Iin ña̱ʼa xi̱taváña ki̱ʼva xíʼin tú yitu̱n, inkaña xi̱xaʼndanú ta inka ña̱ʼa xi̱ndachitáʼannú. Saátu xa̱a̱ íyo chiñu xa̱ʼa ña̱ kée tutu ña̱ xíniñúʼuyó tá sánáʼa̱yó. Ndáyáʼviní ndiʼiña, ña̱kán xíniñúʼu sakuaʼayó nda̱saa kivi kuniñúʼuyóña.

6, 7. a) ¿Nda̱saa xíniñúʼu miíún ña̱ tarjeta ña̱ ki̱ʼvina jw.org? b) ¿Nda̱saa chíndeétáʼan ña̱ invitación xíʼinyó ña̱ va̱ʼa kanayó na̱ yiví ña̱ ku̱ʼu̱nna reunión?

⁶ Ña̱ tarjeta ña̱ ki̱ʼvina jw.org. Ni loʼo ña̱yóʼo soo va̱ʼaní chíndeétáʼanña xíʼinyó ña̱ va̱ʼa kunda̱a̱-ini na̱ yiví ndáana kúúyó, ta saátu kivi ki̱ʼvina nu̱ú sitio ña̱ Internet. Kán kivi ndani̱ʼína ku̱a̱ʼáka ña̱ káʼa̱n xa̱ʼayó, ta kivi ndukúna na̱ sanáʼa̱-ña̱ʼa xa̱ʼa Biblia. Nda̱a̱ vitin xa̱a̱ yáʼaka 400,000 na̱ yiví ndúku ña̱ ná sanáʼa̱nana xa̱ʼa Biblia nu̱ú sitio ña̱ Internet jw.org. Ndiʼi ki̱vi̱ ku̱a̱ʼáka na̱ yiví ndukú ña̱yóʼo ¿Á kivi ku̱ʼu̱n  tarjeta yóʼo xíʼinyó ndiʼi tiempo? Saá kúú ña̱ kivi sanáʼa̱yó na̱ yiví, nda̱a̱ ndáaka nu̱ú ku̱a̱ʼa̱nyó.

⁷ Ña̱ invitación. Xíʼin tutu yóʼo kánayó na̱ yiví ña̱ ku̱ʼu̱nna reunión ta va̱ʼaní chíndeétáʼanña xíʼinyó. Káʼa̱nña xíʼin na̱ yiví ña̱yóʼo: “Káʼa̱nndi̱ xíʼún ña̱ ná kaʼviún Biblia xíʼin na̱ testigo Jehová”. Tándi̱ʼi káʼa̱nña xíʼinna ña̱ kivi keʼéna ña̱yóʼo tá ná ku̱ʼu̱nna reunión á tá ná kaʼvi iinna xíʼinna. Ña̱yóʼo su̱ví ña̱ káʼa̱n kuití xa̱ʼayó kúúña, chi chíndeétáʼanña xíʼin na̱ kúnda̱a̱-ini ña̱ ‘xíniñúʼu sakuaʼana xa̱ʼa Ndióxi̱ʼ tasaá va̱ʼa kaʼvina Biblia xíʼinyó (Mat. 5:3). Ndiʼi na̱ yiví va̱ʼa ku̱ʼu̱n reuniónyó ni tá kǒo káʼvi iinna xíʼinna. Tá ná ku̱ʼu̱nna reunión, kotona ña̱ ku̱a̱ʼání ña̱ʼa kivi sakuaʼana xa̱ʼa Biblia.

8. ¿Nda̱chun ndáyáʼviní ña̱ ku̱ʼu̱n na̱ yiví iin reunión? Ka̱ʼa̱n xa̱ʼa iin ejemplo.

⁸ Ndáyáʼviní ña̱ kanayó na̱ yiví ña̱ ku̱ʼu̱nna reuniónyó. ¿Nda̱chun? Chi saá kunda̱a̱-inina ña̱ síín íyoyó nu̱ú na̱ veʼe-ñu̱ʼu vatá, chi miíyó na̱ Testigo sánáʼa̱yó ña̱ nda̱a̱ xa̱ʼa Biblia ta chíndeétáʼanyó xíʼin na̱ yiví ña̱ va̱ʼa sakuaʼana ña̱ nda̱a̱ xa̱ʼa Ndióxi̱ (Is. 65:13). Ña̱yóʼo kúú ña̱ ndo̱ʼo ta̱ Ray xíʼin ñá Linda iin matrimonio na̱ íyo chí Estados Unidos. Xi̱kandíxana Ndióxi̱ ta xi̱kuni̱na ku̱ʼu̱nna veʼe-ñu̱ʼu ña̱ va̱ʼa kunda̱a̱ va̱ʼaka inina xa̱ʼa Ndióxi̱. Ña̱kán chi̱ka̱a̱-inina ña̱ ku̱ʼu̱nna iin iin veʼe-ñu̱ʼu ña̱ íyo ñuu nu̱ú ndóona. Ku̱a̱ʼání veʼe-ñu̱ʼu ni̱xi̱yo kán, ta saátu ku̱a̱ʼání religión ni̱xi̱yo. Ni̱ka̱ʼa̱nna ña̱ kindo̱ona veʼe-ñu̱ʼu tá ná kotona u̱vi̱ ña̱ʼa. Ña̱ nu̱ú, tá ná sakuaʼana ñá kúni̱na kunda̱a̱-inina xa̱ʼa Biblia ti̱xin veʼe-ñu̱ʼu kán. Ña̱ u̱vi̱, xíniñúʼu va̱ʼa kundixi na̱ ku̱a̱ʼa̱n veʼe-ñu̱ʼu kán. Tá ni̱ya̱ʼa ku̱i̱ya̱ ku̱a̱ʼání veʼe-ñu̱ʼu ni̱xa̱ʼa̱nna, ta ndakava-inina chi nda̱a̱ ni iin ña̱ʼa kǒo nísakuaʼana ta saátu va̱ása va̱ʼa ndíxi na̱ xi̱xa̱ʼa̱n veʼe-ñu̱ʼu kán. Tá ke̱ena nu̱ú ña̱ so̱ndíʼi veʼe-ñu̱ʼu ña̱ ka̱ʼyína nu̱ú lista ña̱ ke̱ʼéna, ñá Linda ku̱a̱ʼa̱nñá kachíñuñá, ta ta̱ Ray nda̱ndikóra veʼera. Tá ku̱a̱ʼa̱nra, ni̱ya̱ʼara nu̱ú íyo iin Salón nu̱ú ndátaka na̱ Testigo ta nda̱kanixi̱níra: “¿Á va̱ʼa ki̱ʼvii̱ ta kotoi̱ ndáaña kéʼéna?”. Ku̱si̱íníva-inira tá ni̱ki̱ʼvira. Ndiʼina va̱ʼaní nda̱kiʼinnara ta va̱ʼaní ndíxi ndiʼina. Nda̱a̱ chí nu̱ú ni̱xi̱yo ta̱ Ray ta ku̱si̱íní-inira xíʼin ña̱ sa̱kuaʼara. Ndo̱ʼora táki̱ʼva ni̱ka̱ʼa̱n ta̱ apóstol Pablo xa̱ʼa iin na̱ yiví na̱ xáʼa̱n ña̱ nu̱ú yichi̱ iin reunión, ta ni̱ka̱ʼa̱nra: “Mií ña̱ ndixava íyo Ndióxi̱ xíʼinndó” (1 Cor. 14:23-25). Saá ki̱xaʼá ta̱ Ray xáʼa̱nra reunión ndiʼi ki̱vi̱ domingo, ta so̱ndíʼi ki̱xaʼára xáʼa̱nra ndiʼi reunión ña̱ xíyo ma̱ʼñú semana. Ki̱xaʼátu ñá Linda xáʼa̱nñá xíʼinra. Ni xa̱a̱ kúúmií na̱yóʼo yáʼaka 70 ku̱i̱ya̱, u̱vi̱ saána ki̱xaʼána káʼvina Biblia ta nda̱kuchina.

9, 10. a) ¿Nda̱chun va̱ása yo̱ʼvi̱ kuniñúʼuyó ña̱ tratado? b) Ka̱ʼa̱n nda̱saa kivi kuniñúʼuyó tratado ¿Ndáaña kúú Reino Ndióxi̱?

⁹ Ña̱ tratado. U̱na̱ kúú tratado ña̱ íyo nu̱úyó, ta va̱ʼaní chíndeétáʼan ña̱yóʼo xíʼinyó ña̱ va̱ʼa kixaʼáyó ka̱ʼa̱nyó xíʼin na̱ yiví. Nda̱a̱ tá ki̱xaʼá ta̱vána ña̱yóʼo tá ku̱i̱ya̱ 2013 xa̱a̱ ta̱vána u̱ʼu̱n mil millón ña̱yóʼo. Ña̱ va̱ʼaní kúúmií ña̱yóʼo kúú, tá xa̱a̱ sa̱kuaʼayó kuniñúʼuyó iin ña̱yóʼo kivi kuniñúʼuyó inkakaña chi inkáchi íyo ndiʼiña. ¿Nda̱saa kivi kuniñúʼuyóña ña̱ va̱ʼa kixaʼáyó ka̱ʼa̱nyó xíʼin na̱ yiví?

¹⁰ Ná kachiyó ña̱ kúni̱yó kuniñúʼuyó tratado ¿Ndáaña kúú Reino Ndióxi̱? Kivi sanáʼa̱yó nu̱ú kíxaʼáña ta ka̱ʼa̱nyó xíʼinna: “¿Á xa̱a̱ ndáka̱tu̱ʼún xíʼin miíún ndáaña kúú Reino Ndióxi̱? ¿Ndáaña ndakuiiún?”. Va̱ása ka̱ʼa̱nyó xíʼinna á va̱ʼa nda̱kuiinna á va̱ása va̱ʼa níndakuiinna, ná ndakunayó tratado, ta ná ka̱ʼa̱nyó xíʼinna xa̱ʼa: “Ña̱ káʼa̱n Biblia” ta ná kaʼviyó Daniel 2:44 xíʼin Isaías 9:6 ña̱ xa̱a̱ ni̱ka̱ʼyi̱ nu̱ú tratado. Va̱ʼaníka tá ná ka̱ʼa̱nkayó xíʼinna. Tá xa̱a̱ ku̱ʼu̱nyó ná na̱ʼa̱yó nu̱úna pregunta ña̱ va̱xi chí sa̱tá ña̱  káchi “Ndakanixi̱ní xa̱ʼa ña̱yóʼo”: “¿Nda̱saa va̱ʼa kundooyó tá ná kixa̱a̱ Reino Ndióxi̱?”. Saá va̱ʼa ndikóyó inka yichi̱ ta ka̱ʼa̱nkayó xíʼinna. Tá ná ndikóyó, ka̱ʼa̱nyó xíʼinna xa̱ʼa ña̱ lección 7 ña̱ folleto Ndióxi̱ káʼa̱nra tu̱ʼun va̱ʼa xíʼinyó, ta kivi kuniñúʼuyó ña̱yóʼo ña̱ va̱ʼa kixaʼáyó kaʼviyó xíʼinna.

11. ¿Nda̱chun kána ña̱ revista, ta ndáaña xíniñúʼu kunda̱a̱-iniyó xa̱ʼa ña̱yóʼo?

¹¹ Ña̱ revista. Tutu Ña̱ Nátúʼun xíʼinyó xíʼin ña̱ ¡Despertad! ña̱yóʼo kúú u̱vi̱ revista ña̱ kána nu̱ú ku̱a̱ʼá tu̱ʼun, ta ku̱a̱ʼání ñuu kána ña̱yóʼo iníísaá ñuyǐví. Xa̱ʼa ña̱ ku̱a̱ʼání ñuu kánaña, viíní ndákaxi̱nna tema nu̱ú kíxaʼá ña̱yóʼo ña̱kán va̱ʼa kutóo na̱ yiví kaʼvinaña. Xíniñúʼu kuniñúʼuyóña ña̱ va̱ʼa sakuaʼa na̱ yiví xa̱ʼa ña̱ ndáyáʼvika tiempo vitin. Soo ña̱ va̱ʼa kaʼvinaña xíniñúʼu kunda̱a̱-iniyó ndáaña ndákanixi̱ní iin iin na̱ yiví.

12. a) ¿Ndáana yiví xíniñúʼu kaʼvi ña̱ revista ¡Despertad!, ta nda̱chun kánaña? b) ¿Nda̱saa xíniñúʼún ña̱yóʼo xíʼin na̱ yiví?

¹² Ña̱ revista ¡Despertad! kánaña xa̱ʼa na̱ yiví na̱ xíni̱ loʼo á na̱ va̱ása xíni̱ xa̱ʼa Biblia. Sana kǒo kúnda̱a̱-inina xa̱ʼa ña̱ sánáʼa̱ Biblia á sana kǒo kándíxana na̱ veʼe-ñu̱ʼu, á sava kǒo kúnda̱a̱-inina ña̱ va̱xi consejo nu̱ú Biblia ña̱ kivi chindeétáʼan xíʼinna. Iin xa̱ʼa ña̱ kána revista yóʼo kúú ña̱ va̱ʼa kunda̱a̱-ini na̱ yiví ña̱ íyo Ndióxi̱ (Rom. 1:20; Heb. 11:6). Saátu chíndeétáʼanña xíʼinna ña̱ va̱ʼa kandíxana ña̱ Biblia kúú tu̱ʼun Ndióxi̱ (1 Tes. 2:13). U̱ni̱ título ña̱ va̱xi nu̱ú kíxaʼáña ña̱ ku̱i̱ya̱ 2018 káchiña “El camino de la felicidad”, “12 claves para una familia feliz” xíʼin “Ayuda para quienes están de duelo”.

13. a) ¿Nda̱chun kána Tutu Ña̱ Nátúʼun xíʼinyó ña̱ káʼvi ndiʼi na̱ yiví? b) ¿Nda̱saa xíniñúʼu miíún ña̱yóʼo?

¹³ Tutu Ña̱ Nátúʼun xíʼinyó ña̱ káʼvi ndiʼi na̱ yiví sánáʼa̱ña miína ña̱ ixato̱ʼóna Ndióxi̱ xíʼin tu̱ʼunra. Sana xa̱a̱ xíni̱ loʼona xa̱ʼa Biblia soo va̱ása kúnda̱a̱ va̱ʼa inina xa̱ʼa ña̱ sánáʼa̱ña (Rom. 10:2; 1 Tim. 2:3, 4). U̱ni̱ título ña̱ va̱xi nu̱úña ku̱i̱ya̱ 2018 kúúmiíña pregunta yóʼo: “¿Sigue siendo útil la Biblia?”, “¿Qué encierra el futuro?” xíʼin “¿Piensa Dios en usted?”.

14. a) ¿Nda̱saa chíndeétáʼan ku̱mí video yóʼo xíʼinyó ña̱ ku̱a̱ʼa̱nyó sánáʼa̱yó na̱ yiví? b) ¿Nda̱saa xíniñúʼu miíún ña̱yóʼo?

¹⁴ Ña̱ video. Tá tiempo ta̱ Jesús na̱ xi̱kuu carpintero ña̱ xi̱keʼéna iin ña̱ʼa, ndaʼa̱na xi̱xiniñúʼuna, soo vitin íyo inka ña̱ʼa ña̱ xíniñúʼuna tá kúú ña̱ sierra mecánica, ña̱ taladro, ña̱ lijadora xíʼin ña̱ clavadora. Saátu miíyó, vitin íyo tutu ña̱ xíniñúʼuyó xíʼin video. Ku̱mí ña̱yóʼo kúúña: ¿Nda̱chun kaʼviyó Biblia?, ¿Ndáa ki̱ʼva sánáʼa̱ na̱ testigo Jehová na̱ yiví?, ¿Ndáaña kéʼé na̱ testigo Jehová nu̱ú ndátakana? xíʼin ¿Ndáana kúú ndi̱ʼi̱ na̱ testigo Jehová? Video ña̱ kána loʼo tiempo, kivi kuniñúʼuyó tá káʼa̱nyó ña̱ yichi̱ nu̱ú xíʼinna. Ta ña̱ kána ku̱a̱ʼáka tiempo kivi kuniñúʼuyó ña̱ va̱ʼa keʼéyó revisita á na̱ʼa̱yóña nu̱ú na̱ íyoka tiempo nu̱ú. Tá ná kuniñúʼuyó ña̱yóʼo saá va̱ʼaka kutóo na̱ yiví kaʼvina ta ku̱ʼu̱nna reunión.

15. Ka̱ʼa̱n xa̱ʼa iin ejemplo ña̱ náʼa̱ nu̱úyó xa̱ʼa ña̱ ndóʼo na̱ yiví tá xítona video tu̱ʼun miína.

¹⁵ Ná kotoyó nda̱saa chíndeétáʼan video yóʼo xíʼin na̱ yiví. Iin ñá hermana, nda̱ni̱ʼíñá iin ñá nána ñá íyo chí ñuu Micronesia ta ni̱na̱ʼa̱ñá nu̱úñá iin video ña̱ ka̱na tu̱ʼun ña̱ yapés, ña̱ naní ¿Nda̱chun kaʼviyó Biblia? Tá xi̱niñá video iin nda̱kanda̱-iniñá ta ni̱ka̱ʼa̱nñá: “¿Á ndixaví íyoña tu̱ʼun miíi̱? Ta̱ táta ta̱ káʼa̱n nu̱ú video káʼa̱nra táki̱ʼva káʼa̱n na̱ ñuui̱. Káʼa̱nra tu̱ʼun miíi̱”. Tándi̱ʼi ni̱ka̱ʼa̱nñá ña̱ kaʼviñá ta kotoñá ndiʼi ña̱ va̱xi nu̱ú jw.org ña̱ ka̱na tu̱ʼun yapés (chitáʼanña xíʼin Hechos 2:8, 11). Saátu iin ñá  hermana ñá íyo chí Estados Unidos, chi̱ndeétáʼanñá xíʼin xa̱xi̱ñá ta̱ íyo inka ñuu ña̱ ná kotora iin video ña̱ ka̱na tu̱ʼun miíra. Tándi̱ʼi xi̱tora video yóʼo, chi̱ndaʼára iin correo electrónico nu̱úñá ta ni̱ka̱ʼa̱nra xíʼinñá: “Ña̱ nda̱kanda̱ní-inii̱ xíʼin kúú ña̱ káʼa̱n xa̱ʼa ta̱ Ndi̱va̱ʼa, ña̱ kúúra ta̱ xáʼndachíñu ñuyǐví yóʼo ta íyoní ndéera. Xa̱a̱ ndu̱kúi̱ iin na̱ sanáʼa̱ yi̱ʼi̱”. Ta̱yóʼo íyora iin ñuu nu̱ú va̱ása táxi na̱ chíñu ña̱ ndasakáʼnuyó Ndióxi̱.

16. Ka̱ʼa̱n nda̱saa chíndeétáʼan folleto yóʼo xíʼinyó ña̱ sánáʼa̱yó na̱ yiví: a) Kuniso̱ʼo ña̱ káʼa̱n Ndióxi̱ ta kutiakuún ndisaá tíempo. b) Ndióxi̱ káʼa̱nra tu̱ʼun va̱ʼa xíʼinyó. c) ¿Ndáana kéʼé ña̱ kúni̱ Jehová tíempo vitin?

¹⁶ Ña̱ folleto. Tá iin na̱ yiví va̱ása xíni̱na kaʼvi va̱ʼana á tá kǒo íyo tutu ña̱ káʼa̱n xa̱ʼa Ndióxi̱ tu̱ʼun miína, ¿nda̱saa kivi sanáʼa̱yóna ña̱ nda̱a̱? Íyo iin ña̱ kivi chindeétáʼan xíʼinyó: ña̱ folleto Kuniso̱ʼo ña̱ káʼa̱n Ndióxi̱ ta kutiakuún ndisaá tíempo. * Inka ña̱ kivi chindeétáʼan xíʼinyó ña̱ sanáʼa̱yó na̱ yiví kúú folleto Ndióxi̱ káʼa̱nra tu̱ʼun va̱ʼa xíʼinyó. Kivi na̱ʼa̱yó nu̱ú na̱ yiví 14 tema ña̱ va̱xi nu̱ú página ña̱ so̱ndíʼi ta nda̱ka̱tu̱ʼunyóna ndáa ña̱ kúni̱na kunda̱a̱-inina xa̱ʼa, tasaá kixaʼáyó kaʼviyó xíʼinna ¿Á xa̱a̱ xíniñúʼún ña̱yóʼo tá ndíkoún nu̱ú na̱ yiví? Folleto ña̱ u̱ni̱ kúú ¿Ndáana kéʼé ña̱ kúni̱ Jehová tíempo vitin? Ña̱yóʼo chindeétáʼan xíʼinyó ña̱ va̱ʼa kunda̱a̱-ini na̱ káʼviyó xíʼin, ndáaña kéʼé na̱ ñuu Ndióxi̱. Ña̱ va̱ʼa sakuaʼayó kuniñúʼuyó ña̱yóʼo xíniñúʼu kaʼviyó tutu Ña̱ Kéʼé na̱ Ndásakáʼnu Ndióxi̱ Tutu nu̱ú Va̱xi ña̱ Keʼéyó Reunión, ña̱ yo̱o̱ marzo ña̱ ku̱i̱ya̱ 2017.

17. a) ¿Ndáa xa̱ʼa kúú ña̱ íyo libro ña̱ káʼviyó xíʼin na̱ yiví? b) ¿Ndáaña xíniñúʼu keʼé ndiʼi na̱ xa̱a̱ nda̱kuchi, ta nda̱chun?

¹⁷ Ña̱ libro. Tá kíxaʼáyó káʼviyó xíʼin na̱ yiví iin folleto kivi nasa̱mayó ña̱ káʼviyó xíʼinna ta kixaʼáyó kaʼviyó libro ¿Ndáaña kúú míí ña̱ ndixa sánáʼa̱ Biblia? Xíʼin libro yóʼo kivi kunda̱a̱-ini na̱ yiví xa̱ʼa ña̱ sánáʼa̱ Biblia. Tá xa̱a̱ sa̱ndíʼiyó ka̱ʼviyó xíʼinna libro yóʼo, soo tá chíka̱a̱kana ndée ña̱ kéʼéna ña̱ kúni̱ Ndióxi̱, kivi ya̱ʼayó kaʼviyó xíʼinna ña̱ libro Mantenganse en el amor de Dios. Xíʼin ña̱yóʼo sakuaʼana keʼéna ña̱ kúni̱ Ndióxi̱. * Va̱ása nandosóyó chi xíniñúʼu sandiʼi na̱ káʼviyó xíʼin, ña̱ kaʼvina u̱vi̱ libro yóʼo ni tá xa̱a̱ nda̱kuchina. Saá nda̱kúka koo inina xíʼin ña̱ nda̱a̱ ña̱ sákuaʼana xa̱ʼa Ndióxi̱ (kaʼvi Colosenses 2:6, 7). *

18. a) Táki̱ʼva káchi 1 Timoteo 4:16, ¿ndáaña xíniñúʼu keʼéyó, ta ndáaña ndakiʼinyó xa̱ʼa ña̱yóʼo? b) ¿Nda̱chun xíniñúʼu kuniñúʼuyó ndiʼi ña̱ táxi na̱ ñuu Ndióxi̱ ndaʼa̱yó?

¹⁸ Na̱ testigo Jehová xíniñúʼu sanáʼa̱yó na̱ yiví ña̱ nda̱a̱ xa̱ʼa Ndióxi̱, chi saá kivi xa̱a̱na kutakuna ndiʼi tiempo (Col. 1:5; kaʼvi 1 Timoteo 4:16). * Ña̱ va̱ʼa keʼéyó ña̱yóʼo íyo ña̱ xíniñúʼuyó tá sánáʼa̱yó na̱ yiví (koto recuadro “ Nu̱ú va̱xi tutu ña̱ xíniñúʼuyó”). Viíní ná kuniñúʼuyó ña̱yóʼo. Iin iin na̱ publicador kivi ndaka̱xin ndáaña kuniñúʼuna, ta ama kuniñúʼunaña. Soo ná ndakaʼányó chi su̱ví kuití xíniñúʼu xaxayó tutu ña̱ káʼa̱n xa̱ʼa Ndióxi̱. Saátu va̱ása sandákooyóña ndaʼa̱ na̱ yiví na̱ va̱ása kúni̱ kuniso̱ʼo ña̱ sánáʼa̱yó. Ña̱ kúni̱yó kúú ña̱, ‘na̱ yiví na̱ ndinuʼu-ini kúni̱ kutaku ndiʼi tiempoʼ, na̱ vitá-ini, xíʼin na̱ ndixa kúni̱ sakuaʼa ña̱ nda̱a̱, ná xa̱a̱na koona discípulo ta̱ Jesús (Hech. 13:48; Mat. 28:19, 20).