1, 2. 1) ¿Toni tekit kitayekanaltij Jesús, uan keyej? 2) ¿Toni moneki tikchiuaskej tein techpaleuis maj kuali titekitikan iuan Dios?

JESUCRISTO katka koujxijxinkej uan no tamachtijkej (Mar. 6:3; Juan 13:13). Tel kuali kichiuak nejin ome tekit. Kemej koujxijxinkej, momachtij keniuj kitekitiltis manamikmej tein ika kichijchiuas seki taman ika kouit. Uan kemej tanojnotskej, kitekitiltij ueyi taixmatilis tein kipiaya uan ika kinpaleuij taltikpakneminij maj kiajsikamatinij tein melauak tein tamachtia iTajtol Dios (Mat. 7:28; Luc. 24:32, 45). Keman kipiaya 30 xiujmej, kikauak tekit kemej koujxijxinkej uan mochiuak tanojnotskej. Kimatia ke yejua tekit tein okachi monekia kichiuas, ta kijtoj ke katka se taman tein Dios yejua ika kiualtitanka (Mat. 20:28; Luc. 3:23; 4:43). Kitayekanaltij tanojnotsalis uan kinekia maj oksekin no ijkon kichiuanij (Mat. 9:35-38).

² Timiakej amo titekitij kemej koujxijximanij, sayoj ke tinochin titamachtiaj tein kichiuas iTekiuajyo Dios. Kemej nejin tekit motelneki, hasta Dios kichiua. Tein melauj, Biblia kijtoua ke titekitij iuan Dios (1 Cor. 3:9; 2 Cor. 6:4). Tikmatij ke iTajtol Dios yejua tein melauak (Sal. 119:159, 160). Yejua ika, tiknekij kuali tiktekitiltiskej itech tanojnotsalis (xikonixtajtolti 2 Timoteo 2:15). Yejua ika, timochikauaj okachi kuali tiktekitiltiskej Biblia, porin yejua tein okachi ika titamachtiaj keniuj tamati Jiova, Jesús uan tein kichiuas iTekiuajyo Dios. Kemej itech inechikol Jiova kinekij maj kuali techyoui itech tanojnotsalis, kiixpejpenanij okseki nepaleuilmej tein  moneki kuali tikinixmatiskej uan tein pouij itech tein tikixmatij kemej nepaleuilmej tein ika titamachtiaj.

3. 1) ¿Toni moneki tiktayekanaltiskej itech tanojnotsalis? 2) ¿Akonimej kijtoua Hechos 13:48 ke moneki tikintemoskej?

³ Xa timotajtaniaj keyej motokaytia nepaleuilmej tein ika titamachtiaj uan amo nepaleuilmej tein ika titanojnotsaj. Ijkon motokaytia porin se tanojnotsas kijtosneki se kimatiltis teisa se taltikpaknenkej. Sayoj ke se tamachtis kijtosneki se kimelauas tein se kiteixmatiltia uan ijkon taltikpaknenkej kiajsikamatis uan kiolinis maj kichiua tein momachtia. Amo uejkaua ixpoliuis tein amo kuali, yejua ika moneki tiktayekanaltiskej tikpeualtiskej nemachtilmej ika Biblia uan titamachtiskej tein melauak. Nejin kijtosneki ke moneki timochikauaskej tikintemoskej akin kinekij kiseliskej nemilis nochipaya uan tikinpaleuiskej maj mochiuakan itekitikauan Jiova (xikonixtajtolti Hechos 13:44-48, TNM).

4. ¿Keniuj uelis tikinajsiskej akin kinekij kiseliskej nemilis nochipaya?

⁴ ¿Keniuj uelis tikinajsiskej akin kinekij kiseliskej nemilis nochipaya? Ijkon kemej itech yekinika siglo, sayoj ika tanojnotsalis. Yejua ika, moneki tikchiuaskej nejin tein Jesús tanauatij: “Itech tein yeski xolal oso xolalkonet kampa nankalakiskej, xiktemokan hasta nankiajsiskej ompa akin kinamiki xikalpanokan” (Mat. 10:11, TNM). Tikmatij ke amo kikakiskej kuali tanauatilmej akin amo kipiaj kuali ininyolo, akin moueyinekij oso akin amo kinekij kiixmatiskej Dios. Tikintemouaj akin kipiaj kuali ininyolo uan yolyemankej, uan yekmelauj kinekij kiixmatiskej tein melauak. Kemej neskayot, keman Jesús tekitia kemej koujxijxinkej, yekinika kitemouaya kuali kouit tein ika kinchijchiuaskia puertas, yugos uan okseki taman. Keman kiajsia, kuali kitekitiltiaya manamikmej. Tejuan no yekinika moneki tikintemoskej akin kipiaj kuali ininyolo uan satepan uelis tiktekitiltiskej tein ika tikinpaleuiskej maj mochiuakan itatojtokakauan Cristo (Mat. 28:19, 20).

5. Xikonmelaua ika se neskayot toni moneki tikmatiskej ika sejse nepaleuil tein ika titamachtiaj (xikonita taixkopimej ipeujyan tamachtilis).

⁵ Sejse nepaleuil ixyetok itech toni se kitekitiltis. Kemej neskayot, maj titanemilikan itech manamikmej tein xa ika tekitia Jesús. * Seki ika kitamachiuaya kouit oso kinextiaya kanikauin kitekiskia; okseki ika kitejtekia, kikoyoniaya, kialaxouaya, uan okseki ika kiitaya maj amo chikotik uan tein ika kipepechouaya. No ijkon, sejse taman tein poui itech nepaleuilmej tein ika titamachtiaj ixyetok kemanian se kitekitiltis. Kemej nochin motelnekij, maj tikitakan keniuj uelis tikintekitiltiskej.

6, 7. 1) ¿Keniuj tikontekitiltiani tarjeta tein ika tikteixmatiltiaj jw.org? 2) ¿Itech toni ome taman tapaleuia amat tein ika tikinyoleuaj taltikpakneminij maj yakan nechikolmej?

⁶ Tarjeta tein ika tikteixmatiltiaj jw.org. Nejin amo ueyi, sayoj ke techtelpaleuia maj tikinmatiltikan taltikpakneminij tiakonimej uan maj ika tikinyoleuakan maj kitapokan jw.org. Ompa uelis kiajsiskej okachi taman tein kimelaua tiakonimej uan hasta uelis tajtaniskej se nemachtil ika Biblia. Hasta axkan, panoua cuatrocientos mil tajtaninij se nemachtil ika Biblia itech jw.org. ¡Uan mojmostaj tel miakejok tajtanij! ¿Uelis nochipa tikuikatinemiskej seki tarjetas? Ijkon uelis titanojnotsaskej nochipa kampa yeski timoajsiskej.

⁷ Tayoleualismej. Amat tein ika tikinyoleuaj taltikpakneminij maj yakan nechikolmej tapaleuia itech ome taman. Kiluia taltikpaknenkej: “Xionmomachti Biblia iniuan itaixpantijkauan Jiova”. Ompa, kimatiltia ke uelis momachtis itech tonechikoluan oso ika se nemachtil ika Biblia. Yejua ika, nejin tayoleualis  amo sayoj tapaleuia maj tikinmatiltikan taltikpakneminij tiakonimej, ta no maj ika tikinyoleuakan maj touan momachtikan Biblia “akin kimachiliaj ke moneki motokiskej iuan Dios” (Mat. 5:3, TNM). Melauak ke nochin kuali tikinseliaj itech tonechikoluan, maski amo kiselijkej se nemachtil ika Biblia. Komo youij, kiitaskej ke uelis momachtiskej miak taman itech Biblia.

8. ¿Keyej motelneki maj taltikpakneminij yakan nechikolmej maski sayoj sepa? Xikonijto se neskayot.

⁸ Motelneki maj tiksentokakan tikinyoleuakan taltikpakneminij maj yakan nechikolmej maski sayoj sepa. ¿Keyej? Porin ijkon kiitaskej ke tiitaixpantijkauan Jiova titamachtiaj tein yekmelauj tamachtia Biblia uan tikinpaleuiaj taltikpakneminij maj kiixmatikan Dios, amo kemej itech taneltokalismej tein amo melaujkej (Is. 65:13). Yejua nejon kinpanok seki xiujmej achto Ray uan Linda, seki namikuanij akin nemij Estados Unidos. Kineltokayaj Dios uan kinekiaj okachi kuali kiixmatiskej. Yejua ika kiixtalijkej yaskej itech nochi tataman tiopan tein onkak itech ininaltepeuj. Tel miakej katkaj. Yejuan kiixtalijkaj ke mokauaskiaj itech se tiopan komo panouaya ome taman. Yekinika, monekia momachtiskej teisa ompa. Uan ojpatika, akin monechikouayaj monekia motilmajtiskej kemej moneki kichiuaskej akin kijtouaj ke kiixnextiaj Dios. Kinuikilij miak xiujmej yaskej itech nochi taneltokalismej tein onkayaj itech ininxolal, sayoj ke amo teyi momachtijkej uan akin ompa monechikouayaj amo kuali motilmajtiayaj. Satepan ke yajkaj itech tiopan tein kinpolouaya, Linda tekitito uan Ray mokepak ichan. Keman yajtoya, Ray panok kampa ika moajsi se Kali kampa tiMosentiliaj uan kinemilij: “Kuali yeskia maj nikalaki uan maj nikita toni kichiuaj”. Tein melauj, kiteluelitak. Nochin tel kualtakamej katkaj uan inintilmaj kuali moitaya. Ray motalij taixpan uan kiteluelitak tein momachtij. Kipanok kemej kijtoj tatitanil Pablo ke kipanoua akin yekinika youi se nechikol uan kijtoua: “Ueyi melau ke Totajtsin Dios namouan yetinemi” (1 Cor. 14:23-25). Ray peuak youi nochi nechikolmej tein mochiuaj domingo uan satepan nochi nechikolmej tein mochiuaj itajkotian semana. Linda peuak youi iuan. Uan maski kipiayaj panoua 70 xiujmej, peujkej momachtiaj Biblia uan moauijkej.

9, 10. 1) ¿Keyej amo ouij se kintekitiltia tratados? 2) Xikonmelaua keniuj uelis tiktekitiltiskej tratado ¿Toni iTekiuajyo Dios?

⁹ Tratados. Tikinpiaj chikueyi tratados, tein amo ouij se kintekitiltia uan tel tapaleuiaj maj ika tipeuakan titanojnotsakan. Peuak mokixtiaj itech xiuit 2013, uan hasta axkan moamakixtianij kemej cinco mil millones. Nejin tratados sayoj se taman kemej chijchiujtokej. Keman tikmatij keniuj tiktekitiltiskej se, uelis tikintekitiltiskejya oksekin. ¿Keniuj uelis ika tipeuaskej titanojnotsaskej?

¹⁰ Maj tikijtokan ke tikixtaliaj tikuiskej tratado ¿Toni iTekiuajyo Dios? Uelis tiknextiliskej taltikpaknenkej ipeujyan tratado uan tikiluiskej: “¿Kemansa tionmotajtaniani toni iTekiuajyo Dios? Itech nejin eyi tanankililmej, ¿katiyejua tikonijtoskia ke melauak?”. Maj amo tikiluikan ox kuali tanankilij oso amo, ta maj tiknextilikan itech okse página taxelol “Tein kijtoua Biblia” uan maj tikixtajtoltilikan Daniel 2:44 uan Lucas 1:32, 33, tein ompa ijkuiliujtokej. Komo ueli, maj tiksentokakan iuan titajtokan. Satepan, maj tikitakan itamian tratado kampa kijtoua “Xionmotajtani” uan maj tiknextilikan netajtanil: “¿Keniuj tinemiskej keman itaixyekanalis Dios senkis tekititosya?”. Uelis tiknankiliskej nejin netajtanil okse tonal. Keman oksepa titajtoskej iuan, uelis tikuiskej tamachtilis 7 itech folleto Kuali tanauatilmej tein Dios kitemaka, tein poui itech nepaleuilmej tein ika tikpeualtiaj nemachtilmej ika Biblia.

11. ¿Keniuj tapaleuiaj revistas, uan toni moneki tikmatiskej ika sejse amaix?

¹¹ Revistas. Tanejmachtijkej uan ¡Despertad! yejua amaixmej tein okachi motajtolkepaj uan tein okachi momoyauaj itech nochi taltikpak. Kemej kiixtajtoltiaj akin nemij itech tataman altepemej, tamachtilismej tein kipiaj moixpejpena kemej kinyolnotsas nochin taltikpakneminij. Ika nejin amaixmej moneki tikinpaleuiskej taltikpakneminij maj kiitakan kani uelis kiajsiskej tein okachi kinpaleuis axkan. Sayoj ke yekinika moneki tikmatiskej akoni kijkuilouiliaj sejse amaix uan ijkon tikixejekoskej akoni okachi kipaleuis.

12. ¿Akonimej kinijkuilouiliaj amaix ¡Despertad!, uan toni motemoua?

¹² Amaix ¡Despertad! kinijkuilouiliaj akin amo semi kiixmatij Biblia oso nion tepitsin kiixmatij. Xa amo kimatij toni tamachtia, amo semi takuaujtamatij itech taneltokalis oso amo kimatij ke Biblia uelis kinpaleuis itech ininnemilis. Se taman tein motemoua ika nejin amaix yejua maj taixtajtoltijkej kineltoka ke Dios yekmelauj nemi (Rom. 1:20; Heb. 11:6). No motemoua maj kipaleui maj takuaujtamati ke Biblia yekmelauj iTajtol Dios (1 Tes. 2:13). Eyi amaixmej itech xiuit 2018 kipiaj nejin tamachtilis “El camino de la felicidad”, “12 claves para una familia feliz” uan “Ayuda para quienes están de duelo”.

13. 1) ¿Akonimej kinchijchiuiliaj amaix Tanejmachtijkej tein tiktemakaj itech tanojnotsalis? 2) ¿Toni tein kuali tikonpanouani yankuixtok ika nejin nepaleuil?

¹³ Amaix Tanejmachtijkej tein tiktemakaj itech tanojnotsalis kinmelauilia tein Biblia tamachtia akin kipoujkaitaj Dios uan iTajtol. Xa tepitsin kiixmatij tein kijtoua Biblia, sayoj ke amo kiyekajsikamatij tein tamachtia (Rom. 10:2; 1 Tim. 2:3, 4). Eyi amaixmej itech xiuit 2018 kinankiliaj nejin netajtanilmej: “¿Kisentoka tapaleuia Biblia?”, “¿Uelis tikmatiskej tein panos satepan?” uan “¿Kiita Dios tein tikonpanoua?”.

14. 1) ¿Keniuj tapaleuiaj naui videos tein pouij itech nepaleuilmej tein ika titamachtiaj? 2) ¿Toni tein kuali tikonpanouani keman tikontekitiltiani nejin videos?

¹⁴ Videos. Itech itonaluan Jesús, koujxijximanij kipiayaj manamikmej tein sayoj kitekitiltiayaj ika ininmay, sayoj ke axkan no onkakej tein motekitiltiaj ika tit, kemej sierra mecánica, taladro, lijadora uan clavadora. No ijkon, axkan amo sayoj tikpiaj amaixmej, ta no tikpiaj kualtsitsin videos. Naui pouij itech nepaleuilmej tein ika titamachtiaj: ¿Keyej moneki timomachtiskej Biblia?, ¿Keniuj mochiua se nemachtil ika Biblia?, ¿Keniuj tikchiuaj tonechikoluan? uan ¿Akonimej itaixpantijkauan Jiova? Tein amo kipanauiaj ome minuto uelis tiknextiliskej aksa keman yekinika tiknojnotsaskej. Uan tein uejkauaj okachi uelis tikuiskej keman taltikpakneminij kipiaskej okachi tiempo oso keman oksepa titakalpanoskej. Nejin nepaleuilmej uelis kinolinis taltikpakneminij maj kiselikan se nemachtil ika Biblia uan maj yakan nechikolmej.

15. Xikonijto se neskayot kampa moita keniuj kinyololinia taltikpakneminij videos itech inintajtol.

¹⁵ Maj tikitakan keniuj videos kinpaleuiani taltikpakneminij. Se tokniuj siuat kinojnotsak se siuat akin ualeuaya Micronesia uan kinextilij video ¿Keyej moneki timomachtiskej Biblia? itech itajtol, yapés. Keman video peuak, siuat kijtoj: “¡Amo ueli nikneltoka, yetok itech notajtol! Takat akin tajtoua itech video tajtoua kemej kampa nikayot. ¡Tajtoua notajtol!”. Satepan, kijtoj ke kiixtajtoltiskia uan kiitaskia nochi tein moajsi itech jw.org itech itajtol (no xikonita Hechos 2:8, 11). No moajsi ineskayo se tokniuj siuat kayot Estados Unidos akin kititanilij isobrino, akin nemi itech okse ueyi altepet, keniuj ueliskia kitapos  itech Internet nejon video itech itajtol. Satepan ke kiitak, isobrino kitajkuilouilij: “Tein okachi nechyolnotsak yejua kampa momelaua ke se aksa akin semi chikauak uan tel amo yolkuali taixyekantok nikan taltikpak. Nitajtanik se nemachtil ika Biblia”. Nemi itech se altepet kampa amo kinkauaj tokniuan maj kiueyichiuakan Jiova.

16. Xikonmelaua keniuj tapaleuiaj nejin folletos: 1) Maj tikakikan Dios uan tinemiskej nochipaya. 2) Kuali tanauatilmej tein Dios kitemaka. 3) ¿Akonimej kichiujtokej itanejnekilis Jiova itech nejin tonalmej?

¹⁶ Folletos. ¿Keniuj uelis tikmachtiskej tein melauak aksa komo amo yektaixtajtoltia oso amo moajsij amaixmej itech itajtol? Tikpiaj se tel kuali nepaleuil: folleto Maj tikakikan Dios uan tinemiskej nochipaya. * Okse tel kuali nepaleuil tein uelis ika tikpeualtiskej nemachtilmej yejua folleto Kuali tanauatilmej tein Dios kitemaka. Uelis tiknextiliskej taltikpaknenkej 14 tamachtilismej tein nesij itamian, tiktajtaniskej katiyejua kiuelitaskia maj tikitakan uan maj tipeuakan timomachtikan ompa. ¿Ijkon tikchiuanij keman oksepa titajtouanij iuan aksa? Expatika folleto yejua ¿Akonimej kichiujtokej itanejnekilis Jiova itech nejin tonalmej? Chijchiujtok kemej kinpaleuis akin momachtijtokej Biblia maj motokikan itech inechikol Dios. Uelis tikitaskej amaix Tein timomachtiaj itech nechikol Tonemilis uan toTanojnotsalis, marzo 2017, uan ijkon tikmatiskej keniuj tiktekitiltiskej nejin folleto.

17. 1) ¿Keniuj tapaleuia sejse amatajkuilol tein ika titamachtiaj? 2) ¿Toni moneki kichiuaskej nochin akin moauiaj, uan keyej?

¹⁷ Amatajkuilolmej. Komo peua tikmachtiaj aksa ika se folleto, keman yeski uelis tikpataskej ika amatajkuilol ¿Toni yekmelauj tamachtia Biblia? Nejin amatajkuilol uelis kipaleuis maj kiixmati tamachtilismej tein okachi tayekantokej itech Biblia. Komo motamimachtia amatajkuilol uan kichiujtok tein Biblia tamachtia, uelis tiksentokaskej tikmachtiskej ika amatajkuilol “Xiksentokakan itech inetasojtalis Dios”. * Nejin kimachtis keniuj kichiuas tein Biblia tamachtia uan tayolmajxitia. Maj tikelnamikikan ke nochin akin momachtijtokej Biblia moneki motamimachtiskej nejin ome amatajkuilolmej maski moauiskej achto ke matamiskej. Nejin kinpaleuis maj mochikaua inintakuaujtamatilis iuan Jiova uan maj nochipa kitakamatikan (xikonixtajtolti Colosenses 2:6, 7).

18. 1) Kemej kijtoua 1 Timoteo 4:16, ¿toni moneki tikchiuaskej, uan toni kiualkuis nejon? 2) ¿Toni moneki tiktemoskej keman tiktekitiltiskej nepaleuilmej tein ika titamachtiaj?

¹⁸ Tiitaixpantijkauan Jiova moneki tikteixmatiltiskej “melauak Tajtoltsin de Dios” tein uelis kichiuas maj taltikpakneminij kiselikan nemilis nochipaya (Col. 1:5; xikonixtajtolti 1 Timoteo 4:16). Nepaleuilmej tein ika titamachtiaj tein kipia nochi tein moneki, techpaleuis maj ueli tikchiuakan nejin (xikonita kampa kijtoua “ Nepaleuilmej tein ika titamachtiaj”). Maj timochikauakan kuali tikintekitiltiskej. Tisejsemej uelis tikixpejpenaskej katiyejua tikuiskej uan kemanian. Sayoj ke maj tikelnamikikan ke amo tiktemouaj tiktemajmakaskej amaixmej. Amo no moneki tikinkauiliskej akin nesi ke amo kinyolnotsa kimatiskej tein tikteixmatiltiaj. Tiktemouaj maj mochiuakan itatojtokakauan Cristo akin kiyolnejnekij “kiseliskej tein melauak tein kitemaka nemilis nochipaya”, akin kipiaj kuali ininyolo uan yolyemankej uan yekmelauj kinekij kiixmatiskej Dios (Hech. 13:48, TNM; Mat. 28:19, 20).