1, 2. (a) Owian ọgo yọ mai ghanren uvuẹn akpenyerẹn i Jesu, mesoriẹ? (b) Me ye ne vi ru na sabu fikparobọ uvuẹn owian re “lele Osolobrugwẹ wian kugbe”?

JESU KRISTI ọ wian owian ikapita jeghwai ghwoghwo. (Mark 6:3; Rom. 15:8) Ọ dabu tẹn ona ewian eva enana. Ro rhiẹ ikapita na, o yono oborẹ a ha ekwakwa ruiruo neneyo ọ ha erhan ruẹ ekwakwa irhorhomu. Ọke ro ghwoghwo iyẹnrẹn esiri na, ọ ha irherhe i Baibol ro vwori yono ihworho kpekpa neneyo aye i vwẹruọ Ẹmro Osolobrugwẹ. (Matt. 7:28; Luke 24:32, 45) Ọke i Jesu o te ẹgbukpe 30, nọ dobọ owian ikapita ji fọkime o rheri taghene owian aghwoghwo na yọ mai ghanren. Ọ tare taghene owian aghwoghwo na ọ ha usuẹn oborẹ ọsoriẹ Osolobrugwẹ o dje yi rhiẹ otọrakpọ na. (Matt. 20:28; Luke 3:23; 4:43) Owian aghwoghwo na yẹ oborẹ ọ mai ghanren uvuẹn akpenyerẹn i Jesu, ọ ji guọlọ nẹ awọrọ i kwomakugbe yi wian owian ọnana.—Matt. 9:35-38.

² Dedevwo ọwan e rhiẹ ikapita-a, ọrẹn, ọwan e ghwoghwo iyẹnrẹn esiri na. Owian ọnana ọ ghanranren omamọ te erhirhiẹ Osolobrugwẹ ọ ji hobọtua owian na; fọkime e serẹ ọwan ihworho re “lele Osolobrugwẹ wian.” (1 Cor. 3:9; 2 Cor. 6:4) Ọwan i rheri taghene “oborẹ a vi bọn ẹmro [i Jehova] kpahen yẹ urhomẹmro.” (Ps. 119:159, 160) Ọnana yẹ ọsoriẹ o fo na dabu  ha Ẹmro Osolobrugwẹ ruiruo izede ro serhọ. (Se 2 Timothy 2:15.) Omarana, ọwan ne yono oborẹ ene ru dabu ha i Baibol na ro rhiẹ izede rọ mai ghanren re yono ihworho kpahen i Jehova, Jesu ọrhẹ Uvie na ruiruo vuọnvuọn. Na sabu fikparobọ uvuẹn owian aghwoghwo na, ukoko i Jehova o tiobọnu ekwakwa erọrọ rẹn ọwan ne, no fori na dabu rienrian oma ọwan rhẹ ekwakwa enana. E se ekwakwa enana, Ekwakwa ra ha Yono Ihworho.

3. Me yo fori na tẹnrovi uvuẹn ibiọke rọ hẹrhẹre re ne ghwoghwo na, sekpahen Acts 13:48 aruẹ ihworho ego ya na guọlọ?

³ Wu na sabu rhe roro oborẹ ọsoriẹ e se yi Ekwakwa ra ha Yono Ihworho ukperẹ ono rhiẹ Ekwakwa ra ha Ghwoghwo. Ne “ghwoghwo,” o mevirhọ ọrẹ a ta rẹn ohworho kpahen iyẹnrẹn; ọrẹn ne “yono” o mevirhọ ọrẹ ana lẹrhẹ iyẹnrẹn na te ọmudu ohworho na neneyo ọ sabu ha iyẹnrẹn na ruiruo. Oba na ọnọ ki rhe, o fori na tẹnroviẹ owian ra na ha uyono i Baibol na mwu rẹn ihworho jeghwai yono aye urhomẹmro na. Ọnana o mevirhọ taghene ana vi guọlọ “ihworho ri vwo omamọ ẹhẹn,” nẹ aye i sabu mwuovwan arhọ i bẹmẹdẹ.—Se Acts 13:44-48.

4. Marhẹ ene ru rhe “ihworho ri vwo omamọ ẹhẹn”?

⁴ Marhẹ ene ru rhe “ihworho ri vwo omamọ ẹhẹn”? Jerẹ ọke inyikọ na, izede owu ọvo re ne ru rhe aye, yẹ ọrẹ ene ghwoghwo. Omarana, o fori ne ru oborẹ i Jesu ọ tare: “Are i rha ruẹ amwa yanghene ọko, are i guọlọ ihworho ri vwo omwemẹ.” (Matt. 10:11) Ọwan i vwe fiẹrorhọ taghene ihworho ri vwe mwuovwan, ihworho ra kparoma yanghene ihworho ri vwe vwo ọdamẹ kpahen urhomẹmro na ina kpahenrhọ iyẹnrẹn esiri na-a. A guọlọ ihworho ri vwo omeriotọre, ra ta urhomẹmro ri jeghwai guọlọ yono. Ana sabu ha owian ọnana dje oborẹ i Jesu ro rhiẹ ikapita o ruru, ọke ọ guọlọ aruẹ orhan rọ mai rhomu rọ nọ ha ruẹ ighwe, ega, orhan ọven, yanghene ekwakwa erọrọ. Ogege ọ mẹrẹn orhan ro serhọ, nọ ha ekwakwa owian yen, jeghwai ha ona jarẹ oborẹ ọ guọlọ ru. Omaran ene ji ru inyenana, o fori ne kiki guọlọ ihworho ri guọlọ kerhọ, na ki sabu ha ekwakwa re tiobọnu na ha yono aye rhiẹ idibo i Kristi.—Matt. 28:19, 20.

5. Me yo fori ne rhe kpahen Ekwakwa ra ha Yono Ihworho? Dje udje yi. (Ni ifoto rọ ha uvuẹn ọtonrhọ uyono na.)

⁵ Ọsoso ekwakwa rẹ ikapita ọ ha ruiruo, i vwo owian kirighwo. Jerẹ udje, roro kpahen ekwakwa i Jesu ọ ha wian owian ikapita yen. * Ọ guọlọ ekwakwa rọ nọ sabu ha vwanvwọn orhan, djokarhọ ye; jariẹ, se ophiọ rhọ ye; riẹnriẹn yen jeghwai kanren erhan eva kugbe. Omaran Ekwakwa ra ha Yono Ihworho na, i ji vwo ewian kirighwo. Omarana, jene yono kpahen ekwakwa enana ọrhẹ oborẹ ana ha aye ruiruo lele.

6, 7. (a) Marhẹ wu ha ikadi jw.org na ruiruo lele ne? (b) Ewian eva ego yẹ ọbe use na ọ wian?

⁶ Ikadi jw.org. Enana ikadi ekokamo ra lẹrhẹ ihworho rhe kpahen ọwan ọrhẹ iwẹbsaiti ọwan, rẹ aye ina sabu yono kpahen ọwan jeghwai nekpẹn uyono i Baibol. Ihworho ri te 400,000 yi nyoma itanẹti nekpẹn uyono i Baibol uvuẹn i jw.org ne, ihworho uzusionrin buebun erọrọ a ji nekpẹn yen kẹdẹkẹdẹ! Wu na sabu sẹrorẹ ikadi ezẹko neneyo wu sabu ha aye ruiruo uphẹn na orho rhie firhọ kẹdẹkẹdẹ.

⁷ Ọbe use. Ọbe use ọnana o vwo ewian eva. Ọ tare: “Ariẹn Abọ Use Vwo Ne Wu Lele Iseri Jehova Yono I Baibol Na.” Nọ tare taghene wu na sabu yono uvuẹn “ekete ame erhe yono,” “yanghene wẹwẹ rhẹ oyono ọnọ.” Omarana, ọbe use  ọnana ọ vwọ ghwai dje ọwan rẹn ihworho ọvo-o, ọrẹn ọ ji ha use rẹn “ihworho ri vwo ọdamẹ aye ine yono kpahen Osolobrugwẹ” nẹ aye i yono i Baibol na. (Matt. 5:3) Itiọrurhomẹmro, o fori na ha use rẹn ihworho ephian nẹ aye i rhiẹ uyono, sẹ e lele aye yono yanghene e vwe lele aye yono-o. Aye i rha rhe, aye ine rhon jeghwai mẹrẹn oborẹ uyono i Baibol o ghini mevirhọ.

8. Mesoriẹ ọ ghanren na ha use rẹn ihworho nẹ aye i rhiẹ uyono ọwan? Dje udje yi.

⁸ O rhiẹ oborẹ ọ ghanranren na rha ha use rẹn ihworho rhiẹ uyono ọrhọ tobọ rhiẹ ukwọgbọ. Mesoriẹ? Fọkime aye ina mẹrẹn ovẹnẹ rọ ha uvwre iyono ri vuọnren rhẹ erere ọrhẹ iyono efian re yono uvuẹn ẹga efian. (Isa. 65:13) Esa ọrhẹ ane re se Ray ọrhẹ Linda obẹ United States, i djokarhọ ọnana ẹgbukpe ezẹko ri vrẹnren na. Aye ni tare taghene o fori nẹ aye i tuẹn ishọshi ẹnya rhọ. O mwuru aye ẹro taghene Osolobrugwẹ ọ havwiẹ, aye ni ji guọlọ yono kpahiẹn, omarana aye ne riẹ ishọshi ri ha amwa na owuowu. Ọrẹn, ẹga i bunrun omamọ. Omarana, esa ọrhẹ ane na ni tare taghene ekwakwa eva ọvo yi na sabu djephia sẹ aye ine kwomakugbe ishọshi yanghene aye i kwomakugbe yi-i. Ọrukaro, aye i rhe riẹ ishọshi na, aye i guọlọ yono emru ọkpokpọ, ọreva ye, ihworho ri ha uvuẹn ishọshi na ine vi dje oma aye rhẹ ihworho ra ghini ga Osolobrugwẹ. Ẹgbukpe ezẹko a vrẹn, aye ni riẹ ọsoso ishọshi na, ọrẹn, aye a mẹrẹn emru owuorowu-u. Aye e yono emru ọkpokpọ owuorowu-u, habaye, itu ishọshi na i vwa sẹ osẹme ri serhọ-ọ. Ọke aye e nẹ ishọshi rọ kẹta uvuẹn amwa na, Linda nọ ghwẹrioma riẹ iruo yi, Ray no riẹ oghwa. Ọke i Ray o rie, nọ mẹrẹn Aghwẹlẹ Uvie owu, no roro, ‘Ono ji rhomu ni mi ye ni oborẹ aye e ruẹ avwaye.’ Itiọrurhomẹmro, oborẹ o rhiẹromẹrẹn o jerie omamọ! Ọsoso ihworho uvuẹn Aghwẹlẹ Uvie na i dabu sẹ osẹme ro serhọ, aye ni jeghwai rhiabọ dedie sasasa. Ray no siyẹ aga rọ ha obaro na, oborẹ o yonorin no terie ẹhẹn! Nọ ghwai serhọ rhẹ oborẹ ọnyikọ Paul ọ tare kpahen ohworho rọ rhiẹ uyono ukoko na obọ, rọ tare: “Osolobrugwẹ ọ ghini ha uvwre are.” (1 Cor. 14:23-25) Ray no riẹ uyono ki Sọnde ki Sọnde; ọke oru no ji riẹ uyono re ruẹ uvuẹn ọkprughwre na. Linda nọ ji tuẹn uyono ẹnya rhọ, aye awanva ni rhiabọ dede uyono i Baibol jeghwai bromarhame dedevwo aye i vrẹn ẹgbukpe 70 ne.

9, 10. (a) Mesoriẹ itrati na a phẹrẹ ẹha ruiruo? (b) Dje oborẹ ene ru ha itrati na Me ọyẹ Uvie Osolobrugwẹ? ruiruo.

⁹ Itrati. E vwo itrati ẹrẹnren ra phẹrẹ ẹha ruiruo ọke re ghwoghwo rẹn ihworho. Avwọke e tiobọnu itrati enana uvuẹn ẹgbukpe 2013, e fomu iduduru 5,000 phia ne! Itrati enana i rhomurun fọkime wu rha dabu yono oborẹ a ha owu ruiruo lele, wu na sabu ha eri hẹrhẹre na ruiruo, fọkime izede owu ọvo ye ruru aye lele. Marhẹ ene ru ha itrati na tuẹn ẹmro eghwoghwo rhọ?

¹⁰ Wu na sabu ha itrati na Me ọyẹ Uvie Osolobrugwẹ? ruiruo. Dje onọ obaro na rẹn ohworho na, ne wu nọ yen: “Wu ha ẹhẹn roro oborẹ Uvie Osolobrugwẹ ọ havwọ dẹ ne? Wu na sabu ta taghene ọye . . . ?” Orho ru gba nọ yen ẹkpahenrhọ rọ nọ djẹ usuẹn ẹkpahenrhọ esa na. Wu vwa ta riẹn sẹ ẹkpahenrhọ na ọ gbare yanghene ọ gba-a, ukpomaran, rhie riẹ “Oborẹ i Baibol ọ Tare” rọ ha uvuẹn itrati na, ne wu se ekete i Baibol na, Daniel 2:44 ọrhẹ Isaiah 9:6. Orho vwo uphẹn, tẹmro na riaro rhọ. Ọrọkẹta, nọ ọravwọ onọ rọ ha oberhumu itrati na rọ ha otọre urhomu-ẹmro na “Gbe Roro Kpahẹn Emru Enana”: “Marhẹ enyerẹn akpọ ono rhirhiẹ uvuẹn otọre usuon Uvie Osolobrugwẹ?” Ọrana ye wu na ha tuẹn ẹmro rhọ ẹdẹ  ọrọrọ rhẹ ohworho na. Wu rha rharhumu bru ọravwọ, wu na sabu riẹ uyono 7 uvuẹn ọbe na Iyẹnrẹn Esiri ro nẹ Obẹ Osolobrugwẹ Rhe! rọ ji ha usuẹn ekwakwa ra ha tuẹn uyono i Baibol rhọ.

11. Mesoriẹ e ruẹ imagazini na, me yo fori ne rhe kpahen aye?

¹¹ Imagazini. Oghwa Odẹrẹ ọrhẹ Awake! yẹ ẹbe ra mai fomẹ phia jeghwai rhian uvuẹn akpọ na! Fọkime ihworho sansan ri ha akpọ na ephian ye se aye, ne ruẹ irhomu-ẹmro na ni je ihworho sansan. O fori na ha aye ruiruo na lẹrhẹ ihworho vwo omwemẹ kpahen ekwakwa ri mai ghanren inyenana. Neneyo a sabu ha imagazini enana ruiruo vuọnvuọn, o fori ne rhe aruẹ ihworho ra fọkiẹ ruẹ aruẹ imagazini ezẹko, na jeghwai ha aye rẹn aruẹ ihworho erana.

12. (a) Fọkiẹ aruẹ ihworho ego ye ruẹ Awake!, mesoriẹ e ruie? (b) Erere ego ye wu mẹrẹn nẹ Awake! ẹha ruiruo ne?

¹² E ru Awake! fọkiẹ ihworho ri vwo ibiẹ irherhe i Baibol na ọrhẹ eri vwe vwo irherhe i Baibol na. Ọkezẹko, aye e rhe emru owuorowu kpahen iyono Ilele Kristi-i, yanghene aye e vwo esegburhomẹmro kpahen ẹga ọrhẹ oborẹ iyono i Baibol na, ine ru sabu ha userhumu rẹn aye uvuẹn akpenyerẹn kẹdẹkẹdẹ-ẹ. Emru ukaro rọ soriẹ e fomu Awake! na phia, ya na ha userhumu rẹn ihworho vwo ekwerhọ taghene Osolobrugwẹ o nyerẹn. (Rom. 1:20; Heb. 11:⁠6) E ji ruie nọ ha userhumu rẹn ihworho vwo imwẹro taghene i Baibol na ghini “ẹmro Osolobrugwẹ.” (1 Thess. 2:13) Awake! esa re fomu phia uvuẹn 2018 yẹ: “The Way of Happiness,” “12 Secrets of Successful Families,” ọrhẹ “Help for Those Who Grieve.”

13. (a) Fọkiẹ aruẹ ihworho ego ye ruẹ Oghwa Odẹrẹ re fiẹ rhẹ ada na? (b) Erere ego ye wu mẹrẹn nẹ Oghwa Odẹrẹ na ẹha ruiruo ne?

¹³ Oghwa Odẹrẹ, re fiẹ rhẹ ada o dje iyono i Baibol na fiotọre rẹn ihworho ra họghọ rẹn Osolobrugwẹ ọrhẹ i Baibol na. Dedevwo aye i vwo ibiẹ irherhe i Baibol na, ọrẹn aye a dabu vwẹruọ iyono yi fiotọre-e. (Rom. 10:2; 1 Tim. 2:3, 4) Oghwa Odẹrẹ esa re fiẹ rhẹ ada re fomu phia uvuẹn 2018 yẹ: “Is the Bible Still Relevant Today?,” “What Does the Future Hold?,” ọrhẹ “Does God Care About You?”

14. (a) Owian ọgo yẹ ividio ẹne ra ha yono ihworho na a wian? (b) Erere ego ye wu mẹrẹn nẹ ividio na ẹha ruiruo ne?

¹⁴ Ividio. Uvuẹn ẹdẹ i Jesu, ekwakwa ra ha obọ mọrọn ọvo yẹ ikapita a ha ruiruo. Ọrẹn, inyenana, ikapita i vwo ekwakwa sansan ra ha ukpẹ ẹlẹtriki ruiruo, jerẹ ekwakwa ra ha se ophiọ jeghwai kpe upẹrẹ rhẹ erhan kugbe erọrọ. Haba ẹbe re fomẹ phia, e vwo ividio imemerhen re dje rẹn ihworho, ẹne usuẹn aye ri ha usuẹn Ekwakwa ra ha Yono Ihworho na yẹ: Mesoriẹ Ene Yono i Baibol Na?, Marhẹ Uyono i Baibol ọ Havwọ?, Me Ọye ruẹ Uvuẹn Aghwẹlẹ Uvie?, ọrhẹ Jehovah’s Witnesses—Who Are We? Ividio na e seri te iminiti eva-a, omarana ana sabu ha aye ruiruo uvuẹn aghwoghwo. Ana sabu ha ividio iseseri ruiruo uvuẹn ẹrharhumu bru ọrhẹ ọke re ghwoghwo rẹn ihworho ri yẹre ọwan ọke buebun. Ekwakwa irhorhomu enana ina sabu mwu ihworho yono i Baibol na jeghwai lẹrhẹ aye rhiẹ iyono ukoko.

15. Dje udje oborẹ ividio owu uvuẹn edjadjẹ ihworho o ru hobọte aye.

¹⁵ Jerẹ udje, ọke omizu ọmase owu ọ mẹrẹn ọmase rọ djẹ edjadjẹ i Yapese rọ kwa nẹ Micronesia rhe, omizu na no dje ividio na Mesoriẹ Ene Yono i Baibol Na? riẹn uvuẹn edjadjẹ i Yapese. Ọke o kporo ividio na, ọmase na nọ tare: “Ọnana edjadjẹ mẹ. O gberi mẹ unu! Sekpahen oborẹ ohworho na ọ tẹmro lele uvuẹn ividio na, o mwuru  mẹ ẹro taghene amwa owu yẹ ame i nurhe. Ọ djẹ edjadjẹ mẹ!” Ọke oru, ọmase na nọ tare taghene ono se jeghwai ni kemru kemru re fomu phia uvuẹn edjadjẹ ye ri ha i jw.org. (Haye vwanvwọn Acts 2:8, 11.) Roro kpahen udje ọrọrọ. Omizu ọmase owu ro rhirhiẹ United States o dje ekete rẹ ọmọ omizie ọhworhare ono ru sabu danlodu ividio na Mesoriẹ Ene Yono I Baibol Na? uvuẹn edjadjẹ ye. Ọmọ omizie na no ni ividio na, jeghwai nyoma ikọmputa dje urhomu vwe yi, nọ tare: “Ekete rọ ta kpahen ọvwọkon ro suẹn akpọ na o jeri mẹ omamọ. Vwana, e leli mẹ yono i Baibol na ne.” Ọye o rhirhiẹ ẹkwotọre ra dobọ owian ukoko na ji!

16. Dje oborẹ ọsoriẹ e ruẹ ibroshọ na: (a) Kerhọ Osolobrugwẹ Neneyo Wu Nyerien Bẹmẹdẹ. (b) Iyẹnrẹn Esiri ro nẹ Obẹ Osolobrugwẹ Rhe! (c) Ayọmo Ye Ruẹ Ọhọre I Jehova Inyenana?

¹⁶ Ibroshọ. Marhẹ wu ne ru sabu yono ohworho ro rhe oborẹ e se ẹbe ibiesuọn ọrhẹ eri vwe vwo ẹbe ukoko na uvuẹn edjadjẹ aye? Ibroshọ na Kerhọ Osolobrugwẹ Neneyo Wu Nyerien Bẹmẹdẹ * o serhọ rẹn aruẹ ihworho erana. Ana sabu ha ọbe na Iyẹnrẹn Esiri ro nẹ Obẹ Osolobrugwẹ Rhe! tuẹn uyono i Baibol rhọ rẹn ihworho. Wu na sabu dje irhomu-ẹmro 14 ri ha oberhumu ọbe na rẹn ọravwọ jeghwai ta riẹn nọ djẹ ọrọ mai je yi. Gba ha ọrọ djẹre na tuẹn uyono na rhọ. Wu damẹ ona ọnana uvuẹn ẹrharhumu bru ne? Ibroshọ na Ayọmo Ye Ruẹ Ọhọre I Jehova Inyenana? yẹ ibroshọ ọresa ra na sabu ha yono ihworho. E rurie neneyo a sabu haye kpọ ẹhẹn ihworho ra ha i Baibol yono riẹ ukoko na. Ne yono oborẹ ana sabu haye ruiruo lele, se Akpenyerẹn Ọwan Ilele Kristi Ọrhẹ Iruo Uvie Na—Ọbe-Owian Uyono ọrẹ March 2017.

17. (a) Mesoriẹ e ruẹ ẹbe owuowu ra ha yono ihworho na? (b) Me ya guọlọ mie ọsoso ihworho ri yono te erhirhiẹ omebrurhame ne, mesoriẹ?

¹⁷ Ẹbe. We rhe lele ohworho yono ibroshọ owu, wu na sabu wene riẹ ọbe na Me yi Baibol na Ọnọ Sabu Yono Ọwan? Ọbe ọnana ọnọ lẹrhẹ ọravwọ rhe kpahen iyono i Baibol kirighwo. Orho yonie hin, wu rha ji mẹrẹnvwrurhe taghene o ruẹ riaro, gbe lelie yono How to Remain in God’s Love. Ọbe ọnana ọnọ ha userhumu riẹn ha iruemru-urhi Baibol ruiruo uvuẹn akpenyerẹn yen kẹdẹkẹdẹ. Karorhọ taghene ọrhọ tobọ bromarhame hin ne, o fori no yono ẹbe eva enana hin. Ọnana ọnọ ha userhumu riẹn sabu mevigbanhon uvuẹn urhomẹmro na.—Se Colossians 2:​6, 7.

18. (a) Me yi 1 Timothy 4:16 ọ ha urhebro rẹn ọwan ne ru, erere ego ya na mẹrẹn? (b) Me yo fori no rhiẹ owian ọwan erhe yono ihworho urhomẹmro na?

¹⁸ Re rhiẹ Iseri Jehova na, a yẹrẹ ọwan “aghwoghwo urhomẹmro ọrẹ iyẹnrẹn esiri na,” rọ nọ sabu lẹrhẹ ihworho vwo arhọ i bẹmẹdẹ. (Col. 1:5; se 1 Timothy 4:16.) Fọkiẹ ọnana ya yẹ ọwan Ekwakwa ra ha Yono Ihworho rọ vuọnren rhẹ oborẹ a guọlọre. (Ni ekpeti na “ Ekwakwa ra ha Yono Ihworho.”) Omarana, no fori na ha ekwakwa enana ruiruo vuọnvuọn. Oghwoghwẹmro owuowu ọnọ sabu brorhiẹn ọbe rọ guọlọ ha ruiruo ọrhẹ ọke rọ nọ haye ruiruo. Ọrẹn, owian ọwan o rhiẹ ọrẹ ana ghalẹ ẹbe ọvo-o; habaye, e vwe tiobọnie rẹn ihworho ri vwe vwo omamerhomẹ kpahiẹ-ẹn. Ukpomaran, owian ọwan ọrẹ ene ruẹ idibo ri vwo omeriotọre ọrhẹ ihworho orhọmo urhomẹmro na o kpe, nọyẹ “ihworho ri vwo omamọ ẹhẹn ri ne vwo arhọ i bẹmẹdẹ.”—Acts 13:48; Matt. 28:19, 20.