1-2. (a) Waut fa een Woakj wia fa Jesus daut ieeschte en sien Läwen? (b) Wuarom wia am daut soo wichtich? (c) Waut mott wie doonen toom “Gott siene [goode] Metoabeida” sennen?

JESUS CHRISTUS wia een Holtoabeida un een Liera (Mar. 6:3; Joh. 13:13). Hee lieed beides sea fein to doonen. Aus Holtoabeida lieed hee sien Jereetschoft fein to brucken toom veschiednet von Holt moaken. Un aus Liera von de goode Norecht brukt hee aul daut, waut hee ut de Schreft wist, om eefache Menschen to halpen, de Woarheit ut Gott sien Wuat to vestonen (Mat. 7:28; Luk. 24:32, 45). Aus Jesus 30 Joa wia, hieed hee opp met de Holtoabeit, wiels hee wist, daut et wichtja wia, aundre to lieren. Hee säd, eent wuarom Gott am no de Ieed schekjt, wia de goode Norecht von Gott sien Kjennichrikj bekaunttomoaken (Mat. 20:28; Luk. 3:23; 4:43). Fa Jesus wia de Deenst daut ieeschte en sien Läwen un hee wull haben, daut aundre uk bie dit Woakj metholpen (Mat. 9:35-38).

² Wie sent veleicht nich Holtoabeida, oba wie aula lieren aundre de goode Norecht. Dit Woakj es soo wichtich, daut Gott selfst doabie metmoakt, un wie sent “siene Metoabeida” (1. Kor. 3:9; 2. Kor. 6:4). Wie weeten: “[Jehova sien] Wuat es sest nuscht aus Woarheit” (Psa. 119:159-160). Doawäajen well wie secha moaken, daut wie em Deenst “daut Woarheits Wuat rajcht lieren” (läs 2. Timotäus 2:15). Toom daut doonen strenj wie ons aun, de  Schreft emma bäta to brucken. De Schreft es daut wichtichste Jereetschoft toom aundre de Woarheit äwa Jehova, Jesus un daut Kjennichrikj lieren. Oba Jehova siene Organisazion haft ons uk noch waut aundret jejäft, daut wie onsen Deenst fein doonen kjennen. Wie nanen daut “ons Jereetschoft fa dän Deenst” un wie motten lieren, daut fein to brucken.

3. No waut sell wie en onsen Deenst sträwen, un woo halpt Aposteljeschicht 13:48 ons, daut to doonen?

³ Ons Jereetschoft fa dän Deenst es toom aundre lieren. Lieren bediet, daut eena wäm waut soo utlajcht, daut dee daut vestonen kaun un daut dan uk nokomen well. Wäajen dise Welt boolt vejeit, mott wie de Tiet utnutzen toom Bibelstudiums aunfangen un aundre de Woarheit lieren. Daut bediet, daut wie opp iernst no deejanje sieekjen sellen, “waut to daut eewje Läwen rajcht enjestalt [sent]”, un dee halpen Jehova to deenen (läs Aposteljeschicht 13:44-47; 13:48, NW *).

4. Woo kjenn wie dee finjen, “waut to daut eewje Läwen rajcht enjestalt [sent]”?

⁴ Woo kjenn wie weeten, wäa “to daut eewje Läwen rajcht enjestalt [es]”? Krakjt soo aus en de Aposteltiet finj wie dee bloos, wan wie prädjen un daut doonen, waut Jesus säd: “Wan jie en eene Staut ooda Darp nenn komen, seet junt no wäm rom, dee daut wieet es” (Mat. 10:11). Wie räakjnen doa nich opp, daut stolte ooda onopprechtje Menschen no de goode Norecht horchen ooda soone, waut nich opp jeisteljet hoolen. Wie sieekjen no de Opprechtje un Deemootje, waut werkjlich de Woarheit weeten wellen. Daut es biejlikj soo aus daut, waut Jesus aus Holtoabeida doonen must. Ea hee eene Däa ooda een Joch ooda Meeblen moaken kunn, must hee daut rajchte Holt doatoo sieekjen. Dan kunn hee sien Jereetschoft brucken un daut Holt soo trajchtoabeiden, aus hee daut jelieet haud. Soo mott wie daut uk doonen. Ieescht mott wie de opprechtje Menschen sieekjen un dan kjenn wie ons Jereetschoft un daut, waut wie jelieet haben, brucken toom dee halpen Jesus notofoljen (Mat. 28:19-20).

5. (a) Waut mott wie äwa ons Jereetschoft fa dän Deenst weeten? (b) Met waut jeit daut to vejlikjen? (See de Bilda aum Aunfank.)

⁵ Soo aus bie daut Descha-Jereetschoft, waut Jesus woomäajlich brukt, haft uk bie ons jieda Jereetschoft siene ieejne Oabeit. * Jesus brukt biejlikj waut toom daut Holt mäten un tieekjnen, toom soagen, boaren, enwinkjlen, häwlen un toom de Stekja toopmoaken. Krakjt soo haft uk jieda Sach von ons Jereetschoft fa dän Deenst äare ieejne Oabeit. Well wie ons dit wichtje Jereetschoft mol beseenen un kjikjen, woo wie daut krakjt brucken kjennen.

6-7. (a) Woo hast du de JW.ORG-Koatjes mol jebrukt? (b) Wuarom bruck wie de Enlodungszadels fa de Toopkomes?

⁶ JW.ORG-Koatjes. Dee sent kjlien, oba sea fein to brucken toom onse Websied bekauntmoaken un de Menschen wiesen, wäa wie sent. Opp jw.org kjennen dee mea äwa ons lieren un mau rajcht no een Bibelstudium froagen. Äwa 400 000 Menschen haben doa aul no een Bibelstudium jefroacht un hundade froagen noch jieda Dach. Wie wudden kjennen emma een poa Koatjes bie ons haben toom dee Zeichnis jäwen, waut wie irjentwua bejäajnen.

⁷ Enlodungen. Opp de Enlodungszadels fa de Toopkomes sajcht daut: “Wurscht du wellen  met Jehova siene Zeijen toop de Schreft studieren?” Doa steit bowen, daut eena daut “bie onse Toopkomes” doonen kaun “ooda met eenen Bibelliera toop”. De Enlodunk wiest, wäa wie sent, un bitt soone een Bibelstudium aun, waut “sikj doaräwa em kloaren sent, daut an daut jeistelje fält” (Mat. 5:3, NW). De Menschen sent bie onse Toopkomes welkom, endoont aus dee de Bibel studieren ooda nich. Wan dee doa hankomen, woaren dee moakjen, woo väl dee doa von de Bibel lieren kjennen.

8. Wuarom sellen de Menschen weens eemol no onse Toopkomes komen? Jeff een Biespel.

⁸ Daut es wichtich, daut wie wieda de Menschen no onse Toopkomes kroagen, daut dee weens eemol doa hankomen. Wuarom? Doa woaren dee seenen, daut et doa gaunz sestwaut es aus bie daut groote Babel, wäajen daut bie ons äwajenuach jeisteljet Äten jeft (Jes. 65:13). Soo jinkj een Ehepoa en de Stäts daut een poa Joa trigj. Ray un Linda jleewden aun Gott un wullen am bäta kjanen lieren. Doawäajen worden see sikj eenich, no aul de veschiedne Kjoakjen en äare Staut to wanken. Doa wieren een deel Kjoakjen von veschiedne Gloowes. Von Aunfank aun neemen see sikj väa, bie jieda Kjoakj no twee Sachen to kjikjen, ea see wua biejinjen. Ieeschtens wullen see seenen, aus see doa waut lieren wudden, un tweedens, aus de Menschen sikj doa soo auntrocken, aus sikj daut fa Gott siene Deena jehieed. No een poa Joa wieren see bie jieda Kjoakj enne Staut jewast un feelden sikj sea enteischt. See hauden noch nuscht jelieet un de Menschen doa trocken sikj verheipts nich veninftich aun. Aus see dan ut de latste Kjoakj rutjinjen, wankt Linda no äare Oabeit un Ray no Hus. Oppem Trigjwajch fua Ray bie een Vesaumlungshus von Jehova siene Zeijen vebie un docht: “Wuarom doa nich mol nengonen un kjikjen, woo dee daut haben?” Waut hee doa beläwd, wia väl bäta aus bie aule aundre Kjoakjen. Aule wieren leeftolich un frintlich un sea fein aunjetrocken. Ray saut en de väaschte Rieej un jleicht daut sea, waut hee doa lieed. Daut wia krakjt soo, aus de Apostel Paulus von eenem säd, waut toom ieeschte Mol no de Vesaumlunk kjeem un bekjand: “Gott [es] werkjlich mank junt” (1. Kor. 14:23-25). Ray wankt dan jieda Sindach no daut Toopkomen un lota uk enne Wäakj. Linda funk uk aun mettokomen, un wan see uk aul enne 70 Joa wieren, studieeden see de Bibel un leeten sikj deepen.

9-10. (a) Wuarom sent de Zeichnisbläda leicht to brucken? (b) Laj daut ut, woo eena daut Zeichnisblaut Waut es Gott sien Rikj? brucken kaun.

⁹ Zeichnisbläda. Wie haben acht Zeichnisbläda, waut leicht to brucken sent un wua wie fein eene Vetal met aunfangen kjennen. Von 2013 aun, aus wie de ieeschte von dise Zeichnisbläda kjrieejen, bat nu sent doa aul soo bie 5 000 Millionen jedrekjt worden. Dee sent aula äwareen jemoakt. Wan wie eent von dee lieren to brucken, dan kjenn wie dee aula brucken! Woo kjenn wie met een Zeichnisblaut eene Vetal aunfangen?

¹⁰ Veleicht west du wäm daut Zeichnisblaut Waut es Gott sien Rikj? aunbeeden. Du wurscht dän kjennen de Froag opp de väaschte Sied wiesen un froagen: “Hast du mol äwa nojedocht, waut Gott sien Kjennichrikj es?” Dan kaust du de dree Auntwuaten läsen un dänjanjen froagen, woone dee utläsen wudd. Saj daut nich, aus siene Auntwuat rajcht ooda orrajcht es, oba moak daut Zeichnisblaut op un läs bie daut Poat “Waut de Schreft sajcht” de Bibelvarzh Daniel 2:44 un Jesaja 9:5. Wan daut mäajlich es, moak de Vetal wieda. Aum Enj kaust du dän dan de Froag wiesen, wua jie daut näakjste Mol äwa räden wellen. Dee es bie de Äwaschreft “Äwalaj mol”, wua daut sajcht: “Woo woat daut  Läwen unja de Harschoft von Gott sien Rikj sennen?” Wan du dan noch eemol met dänjanjen rätst, dan kaust du daut 7. Poat von daut Heft Eene goode Norecht von Gott brucken. Met dit Heft kaun eena fein Bibelstudiums aunfangen.

11. (a) To waut sent onse Tietschreften jemoakt? (b) Waut mott wie äwa dee weeten, daut wie dee rajcht brucken kjennen?

¹¹ Tietschreften. De Wachtturm un Erwachet! sent dee Tietschreften, waut oppe gaunze Welt opp de mieeschte Sproaken äwasat woaren un daut wietste vebreet woaren. Doawäajen woat aus Teema fa dee soont utjeläst, waut fa de Menschen aulawäajen intressaunt es. Dise Tietschreften sellen de Menschen halpen to vestonen, waut em Läwen daut ieeschte komen saul, oba toom dee rajcht brucken, mott wie weeten, fa wäm dee krakjt jemoakt sent.

12. (a) Fa wäm es daut Erwachet! jemoakt? (b) To waut saul daut deenen?

¹² Daut Erwachet! es fa soone jemoakt, waut weinich ooda nuscht von de Schreft weeten. Veleicht weeten dee nuscht von christelje Glooweslieren ooda hoolen nuscht von Kjoakjen ooda weeten nich, woo wieetvoll de Schreft fa äa Läwen es. Erwachet! es jemoakt toom de Läsa dietlich moaken, daut et werkjlich eenen Gott jeft (Reem. 1:20; Heb. 11:6). Daut saul dee uk halpen to jleewen, daut de Schreft “werkjlich Gott sien Wuat [es]” (1. Tess. 2:13). De dree Utgowen von Erwachet! fa 2018 haben de Teemasch: “Der Weg des Glücks”, “12 Tipps: Was Familien glücklich macht” un “Trauer – was helfen kann”.

13. (a) Fa wäm es de Wachtturm (Utgow fa aulemaun) jedocht? (b) Waut hast du de latste Tiet beläft, aus du soonen Wachtturm wajchjeefst?

¹³ De Wachtturm (Utgow fa aulemaun) deit biblische Lieren utlajen un es fa soone jedocht, waut aun Gott jleewen un sien Wuat respakjten. Veleicht kjanen dee de Schreft aul een jewesset, oba dee vestonen nich werkjlich, waut dee lieet (Reem. 10:2; 1. Tim. 2:3-4). De dree Utgowen von dän Wachtturm fa 2018 haben de Teemasch: “Ist die Bibel noch aktuell?”, “Was bringt die Zukunft?” un “Sind wir Gott wichtig?”

14. (a) Fa waut sent de vea Videos en ons Jereetschoft fa dän Deenst? (b) Waut fa feinet hast du met dise Videos beläft?

¹⁴ Videos. En Jesus siene Tiet hauden de Holtoabeida bloos Hauntjereetschoft. Oba nu haben dee uk ellektrischet Jereetschoft, biejlikj Soagen, Druwen, Schierasch un Winthomasch. Een bät soo es daut uk bie ons. Wie haben nich bloos jedrekjte Bieekja, oba uk wundascheene Videos mank ons Jereetschoft, waut wie de Menschen wiesen kjennen. Daut sent: Wuarom loont sikj daut, de Bibel studieren?, Woo schauft een Bibelstudium met Jehova siene Zeijen?, Woo es daut en de Vesaumlungshiesa von Jehova siene Zeijen? un Wäa sent Jehova siene Zeijen?. De Videos, waut kjarta aus twee Minuten sent, kaun eena fein bie de ieeschte Vetal brucken un de lenjre Videos kaun eena brucken bie Wadabesuchs un bie soone, waut mea Tiet haben. Daut es sea feinet Jereetschoft, daut de Menschen de Bibel studieren un no de Toopkomes komen.

15. Waut kaun daut bie wäm doonen, wan dee een Video opp siene Sproak sitt? Jeff Biespels.

¹⁵ Eene Sesta troff eene Fru von Mikroneesien un dee äare Muttasproak wia Japeesisch. De Sesta wees ar daut Video Wuarom loont sikj daut, de Bibel studieren? opp äare Sproak. Aus daut Video aunfunk, säd de Fru: “Daut es opp miene Sproak! Daut kaun ekj nich jleewen! Ekj kaun daut hieren, daut  dee, waut doa rät, krakjt von deeselwje Insel es waut ekj. Hee rät miene Sproak!” Un nodäm säd see, see wudd aules läsen un kjikjen, waut et opp jw.org opp äare Sproak jeef (see Apj. 2:8, 11). Un eene Sesta en de Stäts schekjt wäm von äa Frintschoft em Utlaunt eenen Link fa krakjt daut Video opp dän siene Sproak. Hee kjikjt daut un schreef ar dan trigj: “Daut Poat, wua daut doarom jeit, daut doa eene beese Macht äa Spell drift, foll mie besonda opp un ekj hab aul no een Bibelstudium jefroacht.” Hee wont en een Launt, wua ons Woakj nich en aule Stekjen frie es.

16. Fa waut sent dise Hefta jemoakt? (a) Horch no Gott un du kaust fa emma läwen (b) Eene goode Norecht von Gott (c) Wäa deit vondoag dän Dach Jehova sienen Wellen?

¹⁶ Hefta. Woo kaun eena wäm de Woarheit lieren, waut nich fein läsen kaun ooda waut eene Sproak rät, wua daut noch kjeene Bieekja jeft? Daut Heft Horch no Gott un du kaust fa emma läwen es krakjt daut rajchte Jereetschoft doatoo. * Un met daut Heft Eene goode Norecht von Gott kaun eena sea fein Bibelstudiums aunfangen. Du kaust de 14 Froagen opp de latste Sied wiesen un dan froagen, woone dän daut dolste intressieet, un met daut Poat jroz een Bibelstudium aunfangen. Hast du daut bie diene Wadabesuchs mol jeprooft? Wäa deit vondoag dän Dach Jehova sienen Wellen? es daut dredde Heft mank ons Jereetschoft fa dän Deenst. Daut saul de Bibelstudiums halpen, onse Organisazion kjanen to lieren. En daut Schoolheft fa ons christeljet Läwen un Deenst von Moaz 2017 kaun eena seenen, woo eena daut bie jieda Studium brucken kaun.

17. (a) To waut sent de beid Bieekja, waut wie met aundre studieren? (b) Waut motten aule doonen, wan dee sikj uk aul haben deepen loten? (c) Wuarom sellen dee daut doonen?

¹⁷ Bieekja. Wan du een Bibelstudium met een Heft aunjefongen hast, dan kaust du irjentwanea no daut Buak Waut lieet de Schreft werkjlich? wakjslen. Dit Buak kaun de Menschen halpen, mea äwa de Gruntlieren ut de Schreft to lieren. Wan dit Buak ieescht derch es un deejanja em jeisteljen veraunkjemt, dan kaust du met daut Buak “Blieft en Gott siene Leew” wiedastudieren. Daut woat dän halpen, jieda Dach no biblische Gruntsauzen to läwen. Hool em Denkj, daut Niee dise beid Bieekja sellen gaunz studieren, wan dee uk aul jedeept sent. Daut woat dee halpen, eenen stoakjen Gloowen to haben un Jehova tru to bliewen (läs Kolossa 2:6-7).

18. (a) Waut sell wie no 1. Timotäus 4:16 no doonen, wan wie aundre de Woarheit lieren? (b) Waut woat doabie rutkomen? (c) Opp waut sell wie schaufen, wan wie ons Jereetschoft fa dän Deenst brucken?

¹⁸ Aus Jehova siene Zeijen sell wie aundre “daut woare Wuat, daut Evangelium”, lieren, waut dee halpen kaun, daut eewje Läwen to kjrieen (Kol. 1:5; läs 1. Timotäus 4:16). Doawäajen hab wie ons Jereetschoft fa dän Deenst jekjräajen, wua aules bie es, waut wie doatoo brucken. (See dän Kausten “ Ons Jereetschoft fa dän Deenst”.) Wie sellen daut soo goot aus mäajlich brucken. Jieda Vekjindja kaun sikj utsieekjen, woon Jereetschoft dee em Deenst brucken well un wanea. Oba wie wellen nich eefach bloos Bieekja vedeelen ooda dee wäm jäwen, waut nich aun de goode Norecht intressieet es. Wie wellen Jinja moaken von soone Menschen, waut opprechtich un deemootich sent un werkjlich de Woarheit weeten wellen – wie sieekjen no dee, “waut to daut eewje Läwen rajcht enjestalt [sent]” (Apj. 13:48, NW; Mat. 28:19-20).