1, 2. (a) Yesuusi heeshshosi giddo illachishinohu hiikkonni loosi aanaati? Mayira? (b) “Maganu ledo” loonseemmore ikkinoommo daafira, loosinkenni dancha guma afiˈrate maa assa hasiissannonke?

YESUUSI KIRISTOOSI uullate aana noo yannara hanaatsicha ikke loosino, hattono manna rosiisino. (Maq. 6:3, NW; Yoh. 13:13) Isi lamenka looso seekke loosino. Yesuusi hanaatsichu heeˈre, babbaxxinoha hanaatsete uduunne horoonsiˈre haqqa bonce biifado uduunne loonsanni gara rosino. Qoleno isi rosiisaancho ikke, batinyu manni Maganu Qaali halaale wodanchanno gede kaaˈlinonsa; isi tenne assi yannara Qullaawu Maxaafi egennosi seekke horoonsiˈrino. (Mat. 7:28; Luq. 24:32, 45) Yesuusi 30 diro ikkisita, hanaatsimmate looso agure rosiisa hanafino; isi hatto assinohu kuni loosi wolu baalunkunni roore hasiisannoha ikkinota afino daafiraati. Isi Maganu uullara soyinosi korkaati giddo mittu Maganu Mangisteha dancha duduwo duduwate ikkinota coyiˈrino. (Mat. 20:28; Luq. 3:23; 4:43) Yesuusi heeshshosi giddo roore illachishinohu sabbakate loosi aanaati, qoleno wolootu hatto assitara hasiˈrino.—Mat. 9:35-38.

² Ninke hanaatse ikka hoongammora dandiineemmo; ikkollana ninke baalunku Maganu Mangisteha dancha duduwo dudumbeemmoreeti. Kuni loosi lowo geeshsha hasiisannoha ikkino daafira, Maganu ledonke loosanno; konnira ninke “Maganu ledo loonseemmoreeti.” (1 Qor. 3:9; 2 Qor. 6:4) Yihowa ‘qaali woˈmunni woˈma halaale’ ikkinota dihuluullammeemmo. (Far. 119:159, 160) Soqqammeemmo woyite, ‘halaalu qaale taashshine’ rosiinseemmohu iseraati. (2 Ximootewoosi 2:15 nabbawi.) Konni daafira, Qullaawa Maxaafanna  wole borruwanke horoonsiˈne mannaho Yihowa, Yesuusinna Maganu Mangiste daafira halaale rosiisate, kuri uduunnicho horoonsiˈnanni gara seekkine rosa hasiissannonke. Soqqanshonkenni dancha guma afiˈneemmo gede, Yihowa dirijjite babbaxxino uduunnicho qixxeessitinonke. Konne uduunne Rosiisate Horoonsiˈneemmo Borruwa yine woshshineemmo.

3. Soqqammeemmo woyite mayi aana illachisha hasiissannonke? Soqqamaasinete Looso 13:48 kultanno garinni ayeoo hasa hasiissannonke?

³ ‘Sabbakate Horoonsiˈneemmo Borruwa yaa agurre Rosiisate Horoonsiˈneemmo Borruwa yinoonnihu mayiraati?’ yite hedattoha ikkara dandaanno. “Sabbakate” yaa sokka duduwate; “rosiisate” yaa kayinni mittu manchi rosino rosi garinni heeˈranno gede hatte sokka surresiranna wodanisira qaˈmidhanno gede seekke xawisate. Tini alame baˈanno yanna gambissino daafira, manna Qullaawu Maxaafi xiinxallo hanafisiisatenna halaale rosiisate aana illachisha hasiissannonke. Hatto yaa, “hegere heeshsho afiˈrate gara ikkitinoti wodanu dooˈˈo” noonsare diinaggaambe hanseemmo yaate.—Soqqamaasinete Looso 13:48 (NW) nabbawi. *

4. “Hegere heeshsho afiˈrate gara ikkitinoti wodanu dooˈˈo” noonsare afa dandiineemmohu hiittoonniiti?

⁴ “Hegere heeshsho afiˈrate gara ikkitinoti wodanu dooˈˈo” noonsare afa dandiineemmohu hiittoonniiti? Umi xibbi dirinte gede togoo manna afa dandiineemmo doogo, insara farciˈrate. Konni daafira, Yesuusi, “Martinanni katamira woy qachira sokka macciishsha hasiissannosi mancho hasse” yee hajajinonke hajajo harunsineemmo. (Mat. 10:11, NW) Suwashshu wodani noonsakkihu woy ayyaanaamittete coye baxannokki manni dancha duduwo macciishsha baxanno yine dihendeemmo. Ninke ammanaminoha, umonsa heeshshi assannohanna halaale gooˈrino manna hanseemmo. Yesuusi hanaatsicha ikke loosanno yannara mini uduunne, saanqa, qambara woy wole uduunne seekkate subbino haqqe hasinoha ikkara dandaanno. Isi dancha haqqe afiˈri gedensaanni, uduunnichosinna ogimmasi horoonsiˈre uduunne seekkanno. Ninkeno balanxe suwashshu wodani noonsa manna hanseemmo; hakkiinni noonke uduunnenna ogimmanke horoonsiˈne Yesuusi rosaano ikkitanno gede kaaˈlineemmonsa.—Mat. 28:19, 20.

5. Rosiisate Horoonsiˈneemmo Borruwanke daafira maa afa hasiissannonke? Lawishsha kuli. (Hanafote noo misilla lai.)

⁵ Hanaatse horoonsidhanno uduunni addi addi horo afiˈrino. Lawishshaho hanni Yesuusi hanaatsicha ikke heeˈre horoonsiˈrino uduunne hedi. * Isira haqqe bikkatenna masimara fushshate, haqqe darate, xulluwanna akeeka fushshate hattono mitteenni xaadisate babbaxxino uduunni hasiisinosi. Hatteente gede mitte mittenti Rosiisate Horoonsiˈneemmo Borruwa horo afidhinote. Hanni konne lowo geeshsha kaaˈlanno uduunnicho horoonsiˈra dandiineemmohu hiittoonniitiro laˈno.

6, 7. (a) jw.org egensiissanno kaarde ma garinni horoonsirootto? (b) Songote gambooshshihu koyishshu woraqati maaho kaaˈlanno?

⁶ JW.ORG Egensiissanno Kaarde. Tini kaarde shiima ikkiturono mannu ayimmanke afanno gedenna webisayitenke horoonsiˈranno gede jawaachishshanno. Insa webisayitenke aana ninke daafira ledde affaranna Qullaawa Maxaafa xiinxallinsanninsa gede nafa xaˈmidhara dandiitanno. Xaa geeshsha 400,000 saˈˈanno manni jw.org widoonni Qullaawa Maxaafa xiinxallinsanninsa gede xaˈmirino; lowo xibbe ikkanno manni barru baala Qullaawa Maxaafa xiinxallinsanninsa gede xaˈmiˈranno. Atino faro afiˈratto yannara farciˈra dandaatto gede, mitowa haˈratto woyite boode kaarde adhite haˈra dandaatto.

⁷ Koyishshu Woraqata. Kuni woraqati haammata hoˈro afiˈrino. Konni woraqati aana togo yitanno hedo no: “Qullaawa Maxaafa ninke Yihowa Farciˈraasine ledo xiinxallattora koyinsoommohe.” Hakkiinni Qullaawa Maxaafa “baalunku  gamba yaannowa” “woy xiinxallisannohe manchi ledo” xiinxalla dandaatto yaanno doorshi no. Konni daafira kuni uduunnichi, ninke ayimma xawisannoha calla ikkikki, “ayyaanaamittete coye goodhinori” ninke ledo Qullaawa Maxaafa xiinxallitanno gede koyisanno. (Mat. 5:3, NW) Qullaawa Maxaafa xinxallannokki mannino gambooshshenke daa dandaanno. Insa gambooshshenke dayiro, Qullaawu Maxaafinni lowore rosa dandaannota wodanchanno.

8. Mannu ajayi ajeenna mitte hige gambooshshenke daansa kaaˈlitannonsahu hiittoonniiti? Lawishsha kuli.

⁸ Mannu ajayi ajeenna mitte hige gambooshshenke daanno gede hexxo mudhinummokkinni koyisa hasiissannonke. Mayira? Korkaatuno insa gambooshshenke dagganno woyite Yihowa manni mereero noota ayyaanaamittete jironna Bayira Baabiloone giddo noota ayyaanaamittete gatto huwatanno. (Isa. 65:13) Ameerikaho heeˈrannori Rayinna Linda yinanni minaanninna minaama shiimu diri albaanni tenne huwatino. Insa beetekiristaane haˈrate hedino. Insa Magano ammananno, hattono isi daafira rosa hasiˈrino; konni daafira katamu giddo noo beetekiristaanna baala haˈrino. Hakkiicho batinye beetekiristaanna no. Kuri minaanninna minaama mitte beetekiristaane miila ikkate hatte beetekiristaanewiinni afiˈra hasiˈrannoha lame coye murino. Umihunni, beetekiristaanenniwa mito roso rosa hasiissannonsa; layinkihunni beetekiristaanete miilla Magano magansiˈranno manni uddiˈranno garinni uddiˈra hasiissannonsa. Insa lowo diro katamu giddo noo beetekiristaanna baala haˈrinoha ikkirono, mittoreno diafiˈrino. Qoleno rosinori dino; beetekiristaane haˈranno mannino ayirrinye baino garinni uddiˈranno. Mitto barra insa jeefote beetekiristaane haˈri gedensaanni Linda loosoho hadhino; minaannise Rayi kayinni minira higino. Isi minira higanni heeˈre Yihowa Farciˈraasineta Gambooshshu Addaraashe laiti hakkira mare ma assinanni heeˈnoonniro afate hedino. Isi hakkiicho wole beetekiristaanera assinannirinni baxxinore laino! Gambooshshu Addaraashera noo manni baalu faasiiqahonna amanyootunni uddiˈrinoho. Rayi Gambooshshu Addaraashe giddo albaanni ofollino; qoleno rosinore baasa baxino. Soqqamaasinchu Phaawuloosi konni albaanni gambooshshe daye egenninokki manchi gambooshshe daanno woyite “Halaalinta Maganu ledoˈne no” yee coyiˈrannota xawisino; Rayi woˈnaalshi tenne qaangeemmo gede assannonke. (1 Qor. 14:23-25) Rayi hakkuyi gedensaanni Sambatu kiiro gambooshshe dihosanno; hakkiinni lamalate mereero assinanni gambooshshe daa hanafino. Lindano gambooshshe daa hanaffino; hakkiinni insa 70 diri balla ikke heeˈreennansa Qullaawa Maxaafa xiinxalle cuuamino.

9, 10. (a) Tiraaktuwanke horoonsiˈrate injiitannote yineemmohu mayiraati? (b) Maganu Mangiste Maati? yitanno tiraakte horoonsiˈra dandiinanni gara xawisi.

⁹ Tiraaktuwa. Horoonsiˈrate injiitannotinna hasaawa hanafate kaaˈlitannoti sette tiraaktuwa noonke. Kuri tiraaktuwa 2013nni fultu kawa, onte biliyoone ikkitannota attammoonni! Kuri tiraaktuwa qixxeessinoonnihu mittu garinniiti. Konni daafira mitte tiraakte horoonsiˈneemmo gara anfummoro, baalanta hakko garinni horoonsiˈra dandiineemmo. Tenne tiraakte horoonsidhe hasaawa hanafa dandaattohu hiittoonniiti?

¹⁰ Lawishshaho, hanni Maganu Mangiste Maati? yitanno tiraakte ela hasiˈrootto yine hendo. Hasaawisatto manchira tiraaktete albiidi qoolira noo xaˈmo leellishitto gedensaanni togo yite xaˈmi: “‘Maganu Mangiste maati?’ yite hedde egennootto?” Hakkiinni sasente dawaro giddo hiittenne qolannoro xaˈmi. Qolino dawaro garaho woy digaraho yaa agurte, tiraaktete giddiidi qoolira “Qullaawu Maxaafi Togo Yaanno” yaannoha fante hakko qoolira noota Daanieeli 2:44 nna Isayaasi 9:6 nabbawi. Hasaawu jeefora, badhiidi qoolira “Hanni Konne Coye Hedi” yaanno birxichi hunda “Maganu Mangiste gashshooti yannara mannu hiittoo heeshsho heeˈranno?” yitanno xaˈmo xaˈmi. Hatto assakki hakko manchi ledo wole woyite xaadde hasaawatto faro fantannohe. Wole woyite xaaddinanni yannara, Maganuwiinni Dayinoha  Dancha Duduwo! yitanno birosherera nooha 7^ki roso leellisha dandaatto; rosiisate horoonsiˈneemmo borruwanke giddo mitte tenne biroshereeti.

11. Metseettanke qixxeessinannihu ma garinniiti? Tenne metseetta daafira maa afa hasiissannonke?

¹¹ Metseetta. Alamete aana Agarooshshu Shaenna Baqqi Yiiyye! yinanni metseete geeshsha tuqinsoonnitinna lowo afiira qolle tirroonniti wole metseete dino. Alamete doyichora tenne metseete batinyu manni nabbawanno daafira, aaniidi qoolira noo birxicho manna baala baxisanno garinni qixxeessinanni. Kuri metseetta horoonsiˈne mannu xaa yannara heeshshonsa giddo roore hasiisanno coyi maatiro rosanno gede kaaˈla hasiissannonke. Ikkollana kuri metseetta garunni horoonsiˈra dandiineemmo gede hiittenne metseete hiittoo mannira qixxeessinoonniro afa hasiissannonke.

12. (a) Baqqi Yiiyye! yinanni metseete qixxeessinoonnihu ayeoo hendeeti? (b) Tenne metseete horoonsidhe muli yannara mayi guma afiˈrootto?

¹² Baqqi Yiiyye! yinanni metseete qixxeessinannihu gariti Qullaawu Maxaafi egenno noonsakki manna hendeeti. Kuni manni Kiristaanu rosi daafira afinokkiha, ammaˈno addaxxannokkiha, woy Qullaawu Maxaafi heeshshonsa giddo kaaˈlannonsa gara afinokkiha ikkara dandaanno. Baqqi Yiiyye! yinanni metseete qixxeessinannihu qaru korkaati mannu Maganu noota ammananno gedeeti. (Rom. 1:20; Ibi. 11:6) Qoleno tini metseete mannu Qullaawu Maxaafi “Maganu Qaale” ikkinota addaxxanno gede kaaˈlitanno. (1 Tes. 2:13) Baqqi Yiiyye! yinanni metseeteti 2018nniti sase ittime togo yaanno birxicho afidhino: “Hagiirraamo Ikka Dandaattohu Hiittoonniiti?”, Maate Hagiirraame Assiˈrate Kaaˈlannoha 12 Coye,” nna “Xissiisidhinore Sheshifachishannonsari Maati?” *

13. (a) Ellannita Agarooshshu Shae qixxeessinannihu ayeoo hendeeti? (b) Muli yannara tenne metseete horoonsidhe afiˈrootto gumi no?

¹³ Mannaho ellanniti Agarooshshu Shae ittime Maganonna Qaalesi ayirrisanno manni aana illachishshanno. Insara Qullaawu Maxaafi egenno noonsaha ikkirono, garunni huwatinoha ikka hoogara dandaanno. (Rom. 10:2; 1 Xim. 2:3, 4) Agarooshshu Shae metseeteti 2018nniti sase ittime aante noo xaˈmuwara dawaro qoltanno: “Qullaawu Maxaafi Yannankera Kaaˈlannori No?,” “Albillitte Heeshsho Hiittoota Ikkitanno?” nna “Maganu Ate Daafira Hedanno?”

14. (a) Rosiisate Horoonsiˈneemmo Borruwa wido ikkitinoti shoole viidiyubba qixxeessinoonnihu mayiraati? (b) Kuri viidiyubba leellishshe mayi guma afiˈrootto?

¹⁴ Viidiyubba. Yesuusi yannara, hanaatsete angatenni horoonsiˈnanni uduunni calla noonsa. Yannankera noo hanaatse kayinni korreentetenni loosanno uduunne lawishshaho korreentete magaazenna haqqe dartanno maashine horoonsidhanno. Attammanni borrono agurranna mannaho leellinsheemmoti kaajja viidiyubba noonke; rosiisate horoonsiˈneemmo viidiyubba giddo shoole aante noote: Qullaawa Maxaafa Xiinxalla Hasiissannohu Mayiraati?, Qullaawa Maxaafa Xiinxallinseemmohu Hiittoonniiti?, Mangistete Addaraashenkera Maa Maa Assinanni?, hattono Yihowa Farciˈraasine Hiittoo Mannaati? Lamu daqiiqi woro ikkitanno viidiyubba manna umo hasaawinsanni woyitira baasa kaaˈlitanno. Seeda viidiyubba kayinni galagalle marre hasaawinseemmo woyitenna loosu batiˈrinonsakkirira leellishate kaaˈlitannonke. Kuri uduunni mannu Qullaawa Maxaafa xiinxalla hasiˈrannonna gambooshshuwanke daanno gede kakkayisara dandaanno.

15. Mannaho uminsa afiinni viidiyo leellisha mayi guma abbitannoro lawishshunni kuli.

¹⁵ Lawishshaho mitte rodoo Mayikironeezhiyunni daggino manchora afoo dadhitinohu Yappesi yinanni qaalinni Qullaawa Maxaafa Xiinxalla Hasiissannohu Mayiraati? yitanno viidiyo leellishshinose. Hatti mancho, rodoo viidiyo fantuta togo yitino: “Kuni ani coyiˈreemma qaaleeti. Dhaggete! Viidiyote giddo coyiˈranno manchi coyiˈranno gari, ani heeˈreemma giddichonni dayinota leellishanno. Isi ane afoo coyiˈrannoho!”  Hakkunni gedensaanni, jw.org aana umise qaalinni borronke nabbabbannotanna viidiyubba laˈannota coyidhino. (Soqqamaasinete Looso 2:8, 11 ledo heewisiisi.) Hanni wole woˈnaalsha laˈno. Mitte Ameerikaho heedhanno rodoo wole gobbara heeˈrannohu rodiise beettira Qullaawa Maxaafa Xiinxalla Hasiissannohu Mayiraati? yitanno viidiyowa massitanno linke sokkinosi. Isi tenne viidiyo umisi afiinni lai gedensaanni togo yee imeeletenni sokka borreessino: “Roorenkanni tenne viidiyo giddo alame gashshinohu daafira kultanno hedo dhagge ikkitinoe! Qoleno Qullaawa Maxaafa xiinxallinsannie gede xaˈmiˈroommo.” Isi heeˈrannohu loosonke agamboonni gobbaraati!

16. Aante noo birosherubba qixxeessinoonnihu mayiraatiro xawisi: (a) Maganu Yaannore Macciishshite Hegerera Heeˈri. (b) Maganuwiinni Dayinoha Dancha Duduwo! (c) Xaa Yannara Yihowa Fajjo Assitanni Noori Ayeooti?

¹⁶ Biroosherubba. Gari geeshsha nabbawa dandaannokkihura woy umisi afiinni qixxeessinoonni borro nookki manchira halaale rosiisa dandaattohu hiittoonniiti? Maganu Yaannore Macciishshite Hegerera Heeˈri yitanno biroshere tennera kaaˈlitannonke. * Maganuwiinni Dayinoha Dancha Duduwo! yitanno biroshere xiinxallo hanafisiisate kaaˈlitannote kaajja borrooti. Tenne birosherera badhiidi qoolira noota 14 birxichuwa leellishitto gedensaanni roore afa hasiˈranno birxicho xaˈma dandaatto. Hakkiinni hakkonne birxicho horoonsidhe xiinxallisa hanafi. Manna galagalte marte hasaawisatto woyite tenne hayyo horoonsidhe egennootto? Xaa Yannara Yihowa Fajjo Assitanni Noori Ayeooti? yitanno biroshereno Rosiisate Horoonsiˈneemmo Borruwa widooti. Tenne biroshere qixxeessinoonnihu Qullaawu Maxaafi rosaano Yihowa dirijjite daafira affanno gedeeti. Qullaawa Maxaafa xiinxallisatto kiiro tenne biroshere horoonsiˈra dandaatto gara afate, Badheessa 2017nnita Kiristaanu Heeshshonna Soqqansho—Xiinxallote Maxaaficho lai.

17. (a) Mitto mittonka xiinxallote maxaafa qixxeessinoonnihu mayiraati? (b) Haaruuddu cuuantu gedensaannino maa assa hasiissannonsa? Mayira?

¹⁷ Maxaaffa. Biroosherubba horoonsidhe xiinxallisa hanafitto gedensaanni, hasiˈritto yannara Qullaawu Maxaafinni Maa Ronseemmo? yaanno maxaafa hanafisiisa dandaatto. Kuni maxaafi xinta ikkitinota Qullaawu Maxaafi egenno afiˈrate kaaˈlanno. Konne maxaafa xiinxallisse guditto gedensaanni rosaanchu ayyaanaamittetenni lophanni nooha ikkiro, Maganu Baxilli Giddo Heedhe yaanno maxaafa hanafisiisa dandaatto. Kuni maxaafi heeshshosi giddo barru baala Qullaawu Maxaafiha xintu seera harunsa dandaanno gara rosate kaaˈlannosi. Mittu rosaanchi cuuami gedensaannino, lamenta maxaaffa guda geeshsha xiinxalla hasiissannosita deˈooti. Hatto assansa halaale seekkite cuˈmidhanno gede kaaˈlitannonsa.—Qolasiyaasi Sokka 2:6, 7 nabbawi.

 18. (a) Umi Ximootewoosi 4:16 maa assineemmo gede jawaachishshannonke? Tini mayi guma abbitanno? (b) Rosiisate Horoonsiˈneemmo Borruwa horoonsiˈneemmo woyite mixonke maa ikka hasiissannose?

¹⁸ Yihowa Farciˈraasine ikkankenni mannu hegere heeshsho afiˈranno gede kaaˈlannoha ‘halaalu qaale’ rosiisate qeechi noonke. (Qol. 1:5; 1 Ximootewoosi 4:16 nabbawi.) Tennera kaaˈlitannonketa Rosiisate Horoonsiˈneemmo Borruwa qixxeessinoonninke. (“ Rosiisate Horoonsiˈneemmo Borruwa” yaanno birxicho lai.) Dandaaminke deerrinni konne uduunne danchu garinni horoonsiˈrate sharrammo. Mittu mittunku halashshaanchi tenne borro giddonni mamootenna hiittenne horoonsiˈrannoro doodha dandaanno. Ikkollana mixonke borro ela calla diˈˈikkitino; qoleno sokkanke macciishshate hasatto noonsakki mannira borronke mulaaginse haˈra dihasiissannonke. Mixonke ammanaminohu, umonsa heeshshi assannohunna ayyaanaamittete sagale hudiˈrinohu, hattono “hegere heeshsho afiˈrate gara ikkitinoti wodanu dooˈˈo noonsa” manni Yesuusi rosaano ikkanno gede kaaˈlate.—Soq. 13:48, NW; Mat. 28:19, 20.