1, 2. (a) O le ā le galuega na avea ma taulaʻiga o le olaga o Iesu, ma aiseā? (e) O le ā e tatau ona tatou faia ina ia taulau manuia ai o se “ʻaufaigaluega faatasi ma le Atua”?

SA AVEA Iesu Keriso ma kamuta ma aʻoaʻo. (Mare. 6:3; Ioa. 13:13) Sa matuā lelei le faatinoina e Iesu o nei galuega. I le avea ai o ia ma kamuta, na ia aʻoaʻoina le auala e faaaogā ai meafaigaluega e faia ai ni oloa mai i laupapa. I le avea ai foʻi o ia ma aʻoaʻo, na ia faaaogā lelei lona iloa o Tusitusiga Paia e fesoasoani ai i tagata ina ia malamalama i upu moni o le Afioga a le Atua. (Mata. 7:28; Luka 24:32, 45) Ina ua 30 tausaga o Iesu, na ia lē toe faaaogāina ai meafaigaluega faakamuta, ona sa ia iloa e sili atu ona tāua lana galuega o se aʻoaʻo. Na ia faapea mai o le faalauiloa atu o le tala lelei o le Malo o le Atua, o se tasi lea o māfuaaga na auina mai ai o ia i le lalolagi. (Mata. 20:28; Luka 3:23; 4:43) Na avea le faiva a Iesu ma taulaʻiga o lona olaga, ma na ia manaʻo foʻi e auai isi i lea galuega.​—Mata. 9:35-38.

² Atonu e lē o i tatou o ni kamuta, ae o i tatou o ē e talaʻia atu le tala lelei. E matuā tāua lea galuega ona e aofia ai le Atua, ma ua taʻua foʻi i tatou “o le ʻaufaigaluega faatasi ma le Atua.” (1 Kori. 3:9; 2 Kori. 6:4) E tatou te talitonu ʻe moni lava le afioga atoa a Ieova.’ (Sala. 119:159, 160) O le māfuaaga lea e tatou te mananaʻo ai e faamautinoa, o loo tatou “taulimaina ma le saʻo le upu moni” i la tatou faiva. (Faitau le 2 Timoteo 2:15.) O lea, e  tāua ai ona faaleleia pea o tatou tomai i le faaaogāina o le Tusi Paia, o le meafaigaluega autū lea o loo tatou aʻoaʻoina atu ai upu moni e faatatau iā Ieova, Iesu, ma le Malo. Ina ia tatou taulau i la tatou faiva, ua saunia mai ai e le faalapotopotoga a Ieova nisi o meafaigaluega tāua e manaʻomia ona tatou faamasani lelei i ai, lea ua taʻua o Meafaigaluega mo le Aʻoaʻo Atu.

3. O le ā e tatau ona tatou uaʻi i ai i lenei taimi o loo totoe, ma e faapefea ona fesoasoani mai le Galuega 13:48 ina ia tatou faia faapea?

³ Atonu e te taumānatu po o le ā le māfuaaga ua taʻua ai o Meafaigaluega mo le Aʻoaʻo Atu, ae e lē taʻua o Meafaigaluega mo le Talaʻiga. O le “talaʻi,” e uiga atu i le faalauiloa atu o se feʻau, ae o le “aʻoaʻo atu” e uiga atu i le tāmau o le feʻau i le mafaufau ma le loto o se tagata, ma faatatau ai mea ua ia aʻoaʻoina. I lenei la taimi o loo totoe, e tatau ona tatou uaʻi atu i le amataina o suʻesuʻega faale-Tusi Paia, ma aʻoaʻo tagata e faatatau i le upu moni. O lona uiga e tatau ona tatou matuā saʻili mo ē “ua saunia o latou loto mo le ola e faavavau,” ma fesoasoani e avea i latou ma ē e talitonu.​—Faitau le Galuega 13:44-48.

4. E faapefea ona tatou maua i latou “ua saunia o latou loto mo le ola e faavavau”?

⁴ E faapefea ona tatou iloa i latou “ua saunia o latou loto mo le ola e faavavau”? E pei o le uluaʻi senituri, e pau le auala e maua ai tagata faapena o le molimau atu iā i latou. O lea, e manaʻomia ai ona tatou usitaʻia le faatonuga lenei a Iesu: “O so o se aai po o se nuu tou te ō atu i ai, ia saʻili po o iai sē ua tatau i ai le feʻau.” (Mata. 10:11) E tatou te lē faatalitalia e talilelei mai i le tala lelei ē e lē lotofaamaoni, faamaualuluga, ma leai se naunau mo mea faaleagaga. Ae e tatou te saʻilia ē e faamaoni, lotomaulalo, ma naunau mo le upu moni. E tai pei lea vala o le galuega sa faia e Iesu a o avea ma kamuta, sa ia saʻilia se laupapa e fetaui lelei mo le faia o se meafale, faitotoʻa, amo, po o se isi mea sa manaʻo e fai. Pe a ia mauaina le laupapa talafeagai, ona ia faaaogā loa lea o meafaigaluega ma ona tomai, e fau ai lenā mea. O le mea foʻi lenā e tatau ona tatou faia, a o tatou taumafai e aʻoaʻo ē e lotofaamaoni ina ia avea ma soo.​—Mata. 28:19, 20.

5. O le ā e manaʻomia ona tatou iloaina e faatatau i a tatou Meafaigaluega mo le Aʻoaʻo Atu? Aumai se faataʻitaʻiga. (Tagaʻi i ata i luga aʻe o le matua.)

⁵ E tofu lava le meafaigaluega ma lona fuafuaga. O se faaaʻoaʻoga, seʻi mafaufau i meafaigaluega faakamuta na faaaogā e Iesu. * Sa ia manaʻomia meafaigaluega e fua ma maka ai laupapa; pe tipi, faapū, ma faia ia maua foliga o loo manaʻo ai; ma faatulaga, faasasaʻo, ma faapipii faatasi ai laupapa. I se tulaga talitutusa, e iai foʻi fuafuaga faapitoa o meafaigaluega taʻitasi mo le aʻoaʻo atu. Seʻi vaai la pe e faapefea ona tatou faaaogāina nei meafaigaluega tāua ua tatou mauaina.

6, 7. (a) O ā ni auala na e faaaogāina ai pepa o faamatalaga? (e) O ā fuafuaga e lua o le valaaulia mo le sauniga?

⁶ Pepa o Faamatalaga. O nei pepa e lāiti ae o ni meafaigaluega aogā e faailoa atu ai i tatou i tagata, ma tataʻi i latou i la tatou Upega tafaʻilagi, lea o le a latou aʻoaʻoina ai e faatatau iā i tatou, ma e mafai foʻi ona latou talosaga mo se suʻesuʻega faale-Tusi Paia. Ua silia i le 400,000 talosaga mo suʻesuʻega faale-Tusi Paia i la tatou Upega tafaʻilagi, ma le faitau selau o isi talosaga o loo maua i aso taʻitasi. O se mea lelei le iai o ni au pepa mo faamatalaga, ina ia mafai ai  ona e molimau atu a o faia au fuafuaga o le aso.

⁷ Valaaulia. E lua fuafuaga o le pepa e masani ona taʻua o le valaaulia mo le sauniga. O loo iai le faamatalaga: “E valaaulia oe e suʻesuʻe le Tusi Paia ma Molimau a Ieova,” ona tuu ai lea e filifili pe e fia suʻesuʻe “i a [tatou] sauniga mo le lautele,” pe e manaʻo e asiasi atu “se tasi e fesoasoani” iā te ia. O lea, o lenei meafaigaluega e lē gata ua faailoa atu ai i tatou, ae ua valaaulia ai foʻi isi “o ē e naunau i mea faaleagaga,” ina ia tatou suʻesuʻeina faatasi le Tusi Paia. (Mata. 5:3) O le mea moni, e tatou te valaaulia tagata i a tatou sauniga e tusa pe e latou te talia se suʻesuʻega faale-Tusi Paia pe leai. Pe a latou auai i a tatou sauniga, o le a latou vāai ma faalogo i le auala moni e aʻoaʻoina ai le Tusi Paia.

8. Aiseā e tāua ai le silia i le faatasi ona auai tagata i a tatou sauniga? Aumai se faataʻitaʻiga.

⁸ E tāua le silia i le faatasi ona valaaulia o tagata i a tatou sauniga. Aiseā? O le a mafai ai ona latou iloa le telē o le eseesega o le tamaoaiga faaleagaga o a tatou sauniga, ma le malapagā faaleagaga o loo iai Papelonia le Aai Tele. (Isa. 65:13) O le vala lenā na taʻua e se tasi o ulugalii i le Iunaite Setete. Na filifili Ray ma Linda e amata ona ō i se lotu. Sa la talitonu i le Atua ma mananaʻo e faamalie o la manaʻoga faaleagaga, ma amata loa ona auai i lotu taʻitasi. E tele lotu eseese i lea aai, ae e lua vala na uaʻi i ai le ulugalii a o auai i nei lotu. Muamua, e tatau ona la aʻoaʻoina se mea aogā pe a auai i se lotu. Lua, e tatau ona atagia mai i foliga o tagata lotu o i latou o tagata o le Atua. Ina ua mavae ni nai tausaga, sa la auai i lotu uma lava i le aai, ae e la te leʻi maua le fiafia. E leai se mea na la aʻoaʻoina mai i lotu, ma e matuā lē lelei foliga vaaia o tagata lotu. Ina ua la tuua le lotu mulimuli sa iai i le la lisi, ona alu lea o Linda e faigaluega, ae alu Ray i le fale. Sa tau atu Ray i se Maota mo Sauniga ma na ia mafaufau, ʻSeʻi oʻu afe e vaai pe e ā mai lea lotu.’ O le mea moni, o le tapuaʻiga sili lea ua ia auai ai. Sa māfana ma faaleuō tagata uma i le Maota mo Sauniga, ma na onomea o latou laʻei. Sa nofo Ray i le pito i luma, ma na ia fiafia i mea na ia aʻoaʻoina. Sa pei ona faalogona o le tagata na taʻua e le aposetolo o Paulo na auai i se sauniga faa-Kerisiano mo le taimi muamua ma faapea mai: “E moni, ua iā te outou le Atua.” (1 Kori. 14:23-25) Ina ua māeʻa lenā, ona amata lea ona auai Ray i sauniga i Aso Sa uma, ona sosoo lea ma sauniga amata o le vaiaso. Na amata foʻi ona auai Linda i sauniga, ma na la talia se suʻesuʻega faale-Tusi Paia ma papatiso e ui ua silia i le taʻi 70 o la tausaga.

9, 10. (a) Aiseā e faigofie ai ona faaaogā sāvali? (e) Faamatala le auala e faaaogā ai le sāvali O le ā le Malo o le Atua?

⁹ Sāvali. E valu a tatou sāvali ua faigofie ona amata ai talanoaga. Talu ona tatala nei sāvali i le 2013, ua pe ā ma le lima piliona kopi ua uma ona lolomiina. O le itu e lelei ai nei sāvali, o le taimi lava e te iloa ai faaaogā se sāvali se tasi, ua e iloa foʻi faaaogā isi sāvali uma ona e tutusa uma lava le auala e faatulaga ai. E faapefea ona e faaaogā se sāvali e amata ai se talanoaga?

¹⁰ Atonu e te filifili e faaaogā le sāvali O le ā le Malo o le Atua? Ia faaali i le tagata le fesili o loo i luma ma fesili i ai: “Pe e iai se taimi na e taumānatu ai po o le ā le Malo o le Atua? Pe e te faapea mai o . . . ?,” ona tuu ai lea po o lē fea o tali e tolu e na te filifilia. Nai lo o le fai atu e sesē pe saʻo lana tali, ia suʻe i le vaega “Manatu o le Tusi Paia,” ona talanoa lea i mau o loo iai, o le Tanielu 2:44 ma le Isaia 9:6. Pe a talafeagai, ia faaauau le  talanoaga. O le vala mulimuli, ia faasino i le tagata le fesili o loo i le pito i tua i lalo o le ulutala “Ia Mafaufau i Ai”: “E faapeʻī le olaga o le a iai i le pulega a le Malo o le Atua?” O le faavae lenā mo le isi lua talanoaga. Pe a e toe foʻi e asi o ia, e mafai ona faasino i le lesona e 7 o le polosiua Tala Lelei Mai i le Atua!, o se tasi lea o meafaigaluega e amata ai suʻesuʻega faale-Tusi Paia.

11. O le ā le fuafuaga o a tatou mekasini, ma o le ā e tatau ona tatou iloa e faatatau i nei mekasini?

¹¹ Mekasini. O Le Olomatamata ma le Ala Mai!, o lomiga ia ua aupito i tele lona lomiaina ma le faaliliuina i le lalolagi. Talu ai ua lauiloa nei lomiga i le tele o atunuu, ua fuafua ai la mataupu autū o nei mekasini ina ia tosina i ai tagata i so o se vaipanoa. E tatau ona tatou faaaogāina nei lomiga ina ia faatupu ai le naunau o tagata i mataupu e sili ona tāua i le olaga. Peitaʻi, ina ia tatou faaaogāina lelei nei meafaigaluega, e tatau ona tatou iloa po o ai na tusia faapitoa i ai nei lomiga.

12. (a) O ai ua saunia faapitoa i ai le Ala Mai!, ma o le ā lona fuafuaga? (e) O le ā se itu na e taulau talu ai nei i le faaaogāina o lea meafaigaluega?

¹² Ala Mai! Ua saunia faapitoa lenei mekasini mo tagata faitau e itiiti pe e leai so latou malamalama i le Tusi Paia. Atonu e latou te lē iloa aʻoaʻoga faa-Kerisiano, lē toe faatuatuaina lotu, pe e latou te lē iloa foʻi e tāua le Tusi Paia. O le fuafuaga autū o le Ala Mai!, o le faatalitonu lea o tagata o loo soifua le Atua. (Roma 1:20; Epe. 11:6) E fesoasoani foʻi i le tagata faitau e atiaʻe lona faatuatua i le Tusi Paia “o le mea moni, o le afioga a le Atua.” (1 Tesa. 2:13) O mataupu autū nei mo lomiga o le 2018: “Le Ala e Maua ai le Fiafia,” “Auala e 12 e Taulau ai Aiga,” ma le “Fesoasoani mo Ē e Faavauvau.”

13. (a) O ai ua saunia faapitoa i ai Le Olomatamata mo le lautele? (e) O le ā se itu na e taulau talu ai nei i le faaaogāina o lea meafaigaluega?

¹³ O Le Olomatamata mo le lautele, e uaʻi atu i mataupu faaleagaga mo i latou e faaaloalo i le Atua ma lana Afioga. E ui atonu e iai so latou malamalamaga i le Tusi Paia, ae e latou te lē o maua le poto saʻo e faatatau i aʻoaʻoga o le Tusi Paia. (Roma 10:2; 1 Timo. 2:3, 4) O mataupu autū mo lomiga o le 2018, e taliina ai fesili nei: “Po o Aogā Pea le Tusi Paia?,” “O le a Faapeʻī le Lumanaʻi?,” ma “Po o Manatu Mamafa Mai le Atua iā te Oe?”

14. (a) O le ā le fuafuaga o vitiō e fā mai i Meafaigaluega mo le Aʻoaʻo Atu? (e) O le ā se itu na e taulau ai i le faaaogāina o nei vitiō?

¹⁴ Vitiō. I aso o Iesu, e leʻi faaaogāina ni meafaigaluega faakamuta e alu i le uila. E ese mai i aso nei ua iai meafaigaluega e alu i le uila, e pei o ʻili, masini sanipepa, fana fao, ma le tele o isi meafaigaluega. I se tulaga talitutusa, e ese mai i lomiga ae ua iai foʻi ni vitiō matagofie se fā i a tatou Meafaigaluega mo le Aʻoaʻo atu: Aiseā e Suʻesuʻe ai le Tusi Paia?, O le ā e Faia i se Suʻesuʻega Faale-Tusi Paia?, O ā Mea o Loo Faia i se Maota mo Sauniga?, ma Molimau a Ieova—O ai i Matou? O vitiō e itiiti ifo ma le lua minute le uumi, e fetaui lelei mo uluaʻi asiasiga. Ae o vitiō uumi e mafai ona faaaogā i toe asiga ma i latou e lē o pisi. O nei meafaigaluega matagofie, e mafai ona uunaʻia ai tagata e suʻesuʻe le Tusi Paia ma auai i a tatou sauniga.

15. Faamatala ni faaaʻoaʻoga o le aafiaga o le matamata o le tagata i se vitiō i lana lava gagana.

¹⁵ O se faaaʻoaʻoga, sa feiloaʻi se tuafafine ma se fafine na siitia mai i Maikoronesia e tautala i le gagana Yapese, ma na ia faaali i le fafine le vitiō Aiseā e Suʻesuʻe ai le Tusi Paia? i lana gagana. Ina ua amata le vitiō, na  faapea mai le fafine: “Ou te lē talitonu o laʻu gagana lea. Ou te faalogo atu i le tautala a le tama lea e sau i le vitiō, e sau mai i le matou motu.” Ina ua māeʻa, na amata ona ia faitau ma matamata i mea uma e maua i lana gagana i le jw.org. (Faatusatusa i le Galuega 2:8, 11.) O se isi faaaʻoaʻoga, na lafo e se tuafafine i le Iunaite Setete i le atalii o lona tuagane, se link o lea vitiō i lana gagana. Ina ua uma ona ia matamata, na ia toe imeli i le tuafafine: “Na ou fiafia i le vaega lea o loo taʻua ai e iai le agaga o loo pulea le lalolagi. Ua uma ona ou talosaga mo se suʻesuʻega faale-Tusi Paia.” E nofo lenei alii i se atunuu o loo faasāsā ai le galuega.

16. Faamatala le fuafuaga autū o polosiua nei: (a) E te Ola e Faavavau pe a E Faalogo i le Atua. (e) Tala Lelei Mai i le Atua! (i) O Ai o Loo Faia le Finagalo o Ieova i Aso Nei?

¹⁶ Polosiua. E faapefea ona aʻoaʻo atu le upu moni i se tagata e lē lelei le faitau, pe e leai ni lomiga faale-Tusi Paia i lana gagana? Ua iai la tatou meafaigaluega mo lenā vaega, o le polosiua E te Ola e Faavavau pe a E Faalogo i le Atua. * O se tasi o meafaigaluega lelei e amata ai suʻesuʻega, o le Tala Lelei Mai i le Atua! E mafai ona e faaali i le tagata lesona e 14 i le pito i tua o le polosiua, ona tuu ai lea e na te filifilia se lesona e fiafia i ai, ma amata ai se suʻesuʻega i lenā lesona. Pe na e faataʻitaʻia lenā auala i sau toe asiga? O le polosiua lona tolu mai i a tatou Meafaigaluega mo le Aʻoaʻo Atu, O Ai o Loo Faia le Finagalo o Ieova i Aso Nei? Na fuafua lenei polosiua ina ia tataʻi ai tagata suʻesuʻe i le faalapotopotoga. Ina ia iloa le auala e faaaogā ai lenei polosiua i suʻesuʻega, tagaʻi i le polokalame o Mati 2017 i La Tatou Faiva ma le Olaga Faa-Kerisiano—Polokalame mo le Sauniga.

17. (a) O le ā le fuafuaga autū o tusi mo suʻesuʻega? (e) O le ā e manaʻomia ona fai e i latou o loo agaʻigaʻi i luma mo le papatisoga, ma aiseā?

¹⁷ Tusi. Pe a māeʻa ona amata le suʻesuʻega i se polosiua, e mafai ona sui i so o se taimi le suʻesuʻega i le tusi O ā Aʻoaʻoga Mai i le Tusi Paia? O lenei meafaigaluega o le a faalautele ai le malamalama o le tagata i aʻoaʻoga faavae o le Tusi Paia. Pe a māeʻa lenā tusi ma o loo agaʻigaʻi i luma faaleagaga le tagata suʻesuʻe, e mafai ona faaauau le suʻesuʻega i le tusi Auala e Tumau ai i le Alofa o le Atua. O lenei tusi o le a aʻoaʻoina ai le tagata suʻesuʻe i auala e faatatau ai mataupu silisili o le Tusi Paia i aso taʻitasi. Ia manatua, e tusa po ua uma ona papatiso se tagata suʻesuʻe, e manaʻomia ona faaauau pea lana suʻesuʻega seʻia māeʻa nei tusi e lua. E fesoasoani lea ina ia mauaa ai o ia i le upu moni.​—Faitau le Kolose 2:6, 7.

18. (a) I le avea o i tatou ma ē e aʻoaʻo atu le upu moni, o le ā ua faalaeiauina i tatou i le 1 Timoteo 4:16 e fai, ma o le ā le iʻuga? (e) O le ā lo tatou sini e tatau ona iai a o faaaogāina a tatou Meafaigaluega mo le Aʻoaʻo Atu?

¹⁸ I le avea ai o i tatou ma Molimau a Ieova, ua tuuina mai iā i tatou “le upu moni o le tala lelei,” lea e taʻitaʻia ai tagata i le ola e faavavau. (Kolo. 1:5; faitau le 1 Timoteo 4:16.) O lea, ua aumaia ai Meafaigaluega mo le Aʻoaʻo Atu e tatou te manaʻomia. (Tagaʻi i le pusa “ Meafaigaluega mo le Aʻoaʻo Atu.”) Tau ina ia tatou faaaogāina lelei nei meafaigaluega. E filifili lava e le tagata talaʻi le lomiga e ofoina atu i se tagata fiafia, ma le taimi e ofo ai. Peitaʻi, e lē tatau iā i tatou ona tau ina ofo atu lomiga, pe tuu foʻi i tagata e lē fiafia mai i la tatou feʻau. Ae o lo tatou sini, ia faia ma soo i latou e faamaoni, lotomaulalo, ma naunau mo le upu moni, lea “ua saunia o latou loto mo le ola e faavavau.”​—Galu. 13:48; Mata. 28:19, 20.