1, 2. (a) Mmudimo kinyi ubadi na muulo ukata mu muwa wa Yesu, na bwakinyi? (b) Abitungu tukite kinyi bwatudya kufuba kalolo nsaa ‘yatukwete kufuba pamune n’Efile Mukulu’?

KUMPALA Yesu Kidishitu badi afubu mudimo wa kusee mabaya, kunyima babangile kulungula mukandu wibuwa. (Maako 6:3; Beena-Looma 15:8) Badi mukite ino midimo yoso ibidi mu mushindo upwidikye. Pabadi asee mabaya, balongyele bya kufubisha bina mufubo bwadya kukita bintu bya mu nshibo ku bukwashi bwa mabaya. Pabadi alungula mukandu wibuwa namu, badi afubisha kiukilo kikata kya Bifundwe kibadi nakyo bwa kukwasha bantu boso mpa na bashi balongye bwabadya kupusha bya binyibinyi bya mu Eyi dy’Efile Mukulu. (Mateo 7:28; Luka 24:32, 45) Yesu pababalombeshe bipwa 30, balekyele mudimo wa kusee mabaya aye nkufika mulungudi a mukandu wibuwa mwanda badi auku’shi uno ngi mudimo wi na muulo ukata ubadi autuntu’shi afube. Bambile’shi kulungula mukandu wibuwa wa Bufumu bw’Efile Mukulu ngi kabingilo kamune kababadi bamutumine kwi Efile Mukulu bwadya kufika pano pa nsenga. (Mateo 20:28; Luka 3:23; 4:43) Mu muwa waye, Yesu badi mwipaane mu kulungula mukandu wibuwa, na badi akumina’shi bangi bantu bamwambule.—Mateo 9:35-38.

² Bantu bebungi ba kwatudi tabauku kusee mabaya nya, anka boso bwetu twi balungudi abalongyesha bangi bantu mukandu wibuwa. Uno mudimo wi na muulo ngofu ngi bwakinyi mpa n’Efile Mukulu kwete kufuba netu. Ngi bwakinyi abetwitanyina bu bantu ‘bakwete kufuba pamune n’Efile Mukulu.’ (1 Beena-Kodinda 3:9, EEM; 2 Beena-Kodinda 6:4) Atukumina ano mayi a mufundji a misambo bambile’shi: “Kìsha ky’eyi dyoobe nyi  mbiinyibiinyi.” (Misambo 119:159, 160) Eyi dya Yehowa ndya binyibinyi. Byabya, abitungu twikale bashinkamishe’shi ‘atuukisha na bululame mukandu wa binyibinyi’ nsaa yatudi mu bulungudi. (Badika 2 Timote 2:15.) Byabya abitungu tutungunukye na kwikitshisha bwa kunyisha kulongamisha mushindo watufubu na Bible, kina mudimo kikata kyatufubu nakyo bwa kulongyesha bangi bantu bwabadya kuuka Yehowa, Yesu, na Bufumu. Bwatudya kufuba mudimo wa bulungudi kalolo, ndumbulwilo a Yehowa mmwitupe bina mudimo bibuwa, na abitungu tuukye mushindo wa kwibifubisha kalolo. Bino bina mudimo bi mu Kasheete ka biina mudimo bya kulongyesha nabyo.

3. Patudi mu bulungudi abitungu twipane mu kukita kinyi, na mukanda wa Bikitshino 13:48 awitukwasha bwa kukita bino naminyi?

³ We mulombene kwiyipusha bwakinyi tukwete kwikayitanyina bu Kasheete ka biina mudimo bya kulongyesha nabyo. Atwiketanyina bino mwanda “kulungula” akupushisha kwakula mukandu, anka “kulongyesha” akupushisha kupatuula mwanda bwa’shi muntu ashinguule myanda yakwete kuteemesha kalolo na kunyima imutakule bwadya kwiyitumikila. Mu ano mafuku apeela abashala kumpala kwa’shi uno ndumbulwilo ashimine, abitungu twipaane mu kukimba bantu ba kubanga kulonga nabo Bible na kulongyesha bantu bya binyibinyi bwa’shi bamone bya kufika balongi ba Kidishitu. Bino abipushisha’shi abitungu tukimbe bantu boso “be na mashimba alombane bwa muuwa wa looso” na katshintshi na kwibakwasha bwabadya kubanga kufubila Yehowa.—Badika Bikitshino 13:44-48.

4. Mushindo kinyi watudi balombene kupeta bantu “be na mashimba alombane bwa muuwa wa looso”?

⁴ Twi kupeta bantu “be na mashimba alombane bwa muuwa wa looso” naminyi? Bwa bena Kidishitu ba kumpala, mushindo umune ubabadi nao bwa kupeta bano bantu nkulungula mukandu wibuwa. Yesu balungwile balongi baye’shi: “Mu kibalo sunga kibundji kampanda mwanutwele, [kimbaayi], bwa kuuka su kwi mulombeene.” (Mateo 10:11) N’atwe namu be lelo uno abitungu tukite bino. Byabya, su bantu ta be na mashimba e buwa, be na kwitatula, sunga’shi tabakumina kupusha myanda y’Efile Mukulu, ta twi balombene kwibakitshisha pabukopo bwabadya kuteemesha mukandu wibuwa nya. Atukimbi bantu be na mashimba ebuwa, be na kwiyisha, na be na lukalo lwa kuuka bya binyibinyi. Twi balombene kupwandikisha kukimba kwetu kwa bantu na mudimo ubabadi abakitshi kwi Yesu pabadi asee mabaya. Kumpala kwadya kupwa kintu kya mu nshibo, kiibi, kikumbo, sunga kingi kintu, badi abanda kukimba mutshi wibuwa. Kunyima badi aata kasheete kaye ka biina mufubo, bwa kufubisha binangu byaye, na kupwa kintu kyakumina. Mu mushindo umune, lelo uno twi na lukalo lwa kubanda kupeta bantu be na mashimba e buwa, kunyima tufubishe bina mufubo na binangu byetu bwa kwibakwasha bwabadya kufika balongi.—Mateo 28:19, 20.

5. Abitungu tuukye kinyi pabitale bina mudimo bi mu Kasheete ka biina mudimo bya kulongyesha nabyo? Tuusha kileshesho. (Tala kifwatulo ki ku mbangilo.)

⁵ Mu kasheete ka biina mudimo, kina mudimo kyoso ki na mudimo wakyo. Bu kileshesho, banda kwela binangu ku bina mudimo bibabadi abafubisha kwi Yesu pabadi asee mabaya. * Badi na lukalo lwa bina mudimo bya kupima, bya kwela nabyo mifunda, bya kutshiba, bya kutonkola, bya kusuula ebaaya, mpa na bya kubunga nabyo mabaya pamune na kukookola. Mu mushindo umune, kina mudimo kyoso ki mu Kasheete ka biina mudimo ki na mudimo wakyo. Byabya tubandeyi kutala mushindo watudi balombene kufubisha bino bina mudimo kalolo.

6, 7. (a) We mufubishe ma carte a jw naminyi? (b) Bwakinyi atufubaa na masaki a lwitanyino lwa ku bisangilo byetu?

⁶ Ma Carte a jw. Ano ma carte nyi mbina mudimo bipeela kadi bi na bukwashi bukata abikwasha bantu bwabadya kuuka kyatudi na kwibaludika mu site a jw.org. Mu site eetu, mbalombene kuuka myanda ibungi itutale mpa na kuteka bwabadya kulonga Bible. Bantu bakile pa 400 000 mbatekye kulonga kwa Bible kukiila mu jw.org na bangi bantu nkama na nkama bakwete kuteka bwa kulonga Bible lelo uno! We mulombene kulama ndambo ya ma  carte a jw pepi na kwiafubisha bwa kwisamba na bantu bofumankana nabo efuku dyoso.

⁷ Lwitanyino. Masaki a lwitanyino abadi batushe bwa kwitanyina bantu ku bisangilo byetu aamba’shi: “We mwitaminyibwe bwa kulonga Bible na ba Temwe ba Yehowa.” Na dingi aakula’shi we kukita bino “mu bisangilo byetu bya bantu booso” “sunga na yawa alongaa nobe Bible.” Byabya, esaki dya lwitanyino adilungula bantu kyatudi na dingi aditanyina “baaba abeuku abo banabeene’shi mbalanda mu [kikudi]” bwabadya kulonga netu Bible. (Mateo 5:3) Ngi bwakinyi, atukuukila bantu abafiki mu kutwela mu bisangilo byetu, abakumina kulonga Bible sunga abapele. Nsaa yabafiki ku bisangilo byetu, abamono mushindo wabadya kulonga myanda ya mu Bible.

8. Bwakinyi bi na muulo bwa’shi bantu bafikye ku bisangilo byetu sunga musango umune? Tusha kileshesho.

⁸ Kutungunuka na kwitanyina bantu bwabadya kutwela mu bisangilo byetu mususa su ngumune kwi na muulo. Bwakinyi? Mwanda nsaa yabafiki ku bisangilo, abamono ba Temwe ba Yehowa byabalongyeshaa bya binyibinyi bya mu Bible na kukwasha bantu bwabadya kuuka Efile Mukulu, aku namu mu bipwilo bya madimi tabakwete kukita bino nya. (Yeeshaya 65:13) Bu kileshesho, kumpala kwa bipwa bipeela, ungi mulume na mukashi ba mu États-Unis babetanyinaa bu Ray na Linda abamwene kuno kwilekena. Abadi abakumina’shi Efile Mukulu e kwanka na babadi na lukalo lwa kumuuka kalolo. Ngi bwakinyi babaatshile kitshibilo kya kutwela mu bipwilo byoso bya mu lupata lwabo na kwenda na kukimba bintu bibidi kumpala kwa kulamata mu kipwilo kimune. Kya kumpala, babadi na lukalo lwa kulonga mwanda upya mu kipwilo, na kya kabidi, abitungu bantu ba mu kyakya kipwilo bekale abafwala mu mushindo upwandikile bantu abafubila Efile Mukulu. Bibadi bibaate bipwa bibungi, mwanda mu lupata mwabo mubadi bipwilo bibungi. Anka babadi benyongole ngofu. Nta mbalongye mwanda upya su ngumune, na bena bipwilo babadi abafwala mu mushindo aulesha’shi tabanemeka bangi. Kunyima kwa’bo kutwela mu kipwilo kya nfudilo, Linda bayiile ku mufubo na Ray namu bayile kwabo ku nshibo. Pabadi mwishinda dya kwaye ku nshibo, badi mukidile peepi na Nshibo ya Bufumu. Beelele binangu’shi: ‘Mbande kwimutwela nkamone abikitshika mwanka.’ Uno ngi mwanda wibuwa ubakitshine! Bantu boso babadi ku Nshibo ya Bufumu babadi na kalolo na babadi na muloo na babadi bafwale kalolo. Ray badi mushale ku mulongo wa kumpala na badi mufule myanda ibalongyele! Bino abitutentekyesha mushindo ubadi Mpoolo mutumibwa mwakule pabitale muntu afiki mu bisangilo bwa mususa wa kumpala na kwamba’shi: “Efile Mukulu a binyibinyi e munkatshi mwenu.” (1 Beena-Kodinda 14:23-25) Kunyima kwa byabya, Ray babangile kufika mu bisangilo mu dya Lubingo dyoso. Akupu babangile kufika mu bisangilo byoso bya mu nkatshi mwa lubingo. Na Linda namu babangile kufika mu bisangilo, na dingi sunga mbibabadi na bipwa 70, abalongyele Bible abo nkubatshishibwa.

9, 10. (a) Bwakinyi ma trakte eetu ngabofule bwa kufuba nao? (b) Lesha mushindo wa kufubisha trakte amba’shi Bufumu bw’Efile Mukulu nkinyi?

⁹ Ma trakte. Mu kasheete ketu ka bina mufubo twi na ma trakte 8. Ngibofule kufuba nayo, na ikwete kukwasha bantu bebungi bwabadya kubanga mwisambo. Nsaa ibabadi batushe ano ma trakte a kumpala mu kipwa kya 2013, abadi batushe masaki a ano ma trakte afikye ku midiyo itaano! Ano ma trakte mbeatushe mu mushindo umune. Byabya su bolongo mushindo wa kufubisha umune a ku ino trakte, we mulombene kufubisha ingi yoso! We kufubisha trakte bwa kubanga kwisamba na muntu naminyi?

¹⁰ Pangi we kwikala na lukalo lwa kufubisha trakte amba’shi: Bufumu bw’Efile Mukulu nkinyi? Lesha muntu lukonko lwi ku esaki dya mbangilo na omwipushe’shi: “Tobandile kwiyipusha’shi Bufumu bw’Efile Mukulu nkinyi? We kwamba’shi nyi . . . ?” Akupu omwipushe lwaluulo lwadi mulombene kusangula ku ngaluulo isatu i kuushi. Pamutwe pa kwamba’shi lwalulo lwaye lwibuwa sunga’shi lwi bubi, buula nka penda trakte omuleshe pa mbalo i munda mw’esaki ifunde’shi: “Akyamba Bible” akupu omubadikile ma verse abadi baleshe, Ndanyele 2:44 na Yeeshaya 9:6. Kunyima kwa mwisambo, mwipushe lukonko lwi kunyima muushi mwa ka mutwe ka mwanda akamba’shi: “Bwa kunangushena”: “Mu Bufumu bw’Efile Mukulu nshalelo akyebe nkekala naminyi?” We  mulombene kwalula luno lukonko pokafiki mu kwisamba naye dingi. Nsaa ywemonena naye dimo, we kufuba na dilongyesha dya 7 dya mu broshire a Mukandu wibuwa w’Efile Mukulu!, na uno broshire mmwikale kimune kya ku bina mufubo akitukwasha bwa kubanga kulonga Bible na bantu.

11. Ma jurnale eetu mbeakite na kepatshila kinyi na abitungu tuukye myanda kinyi pabitale ano ma jurnale?

¹¹ Ma jurnale. Kitenta kya Mulami na Réveillez-vous ! ngi ma jurnale abadi baluule mu ndimi ibungi na kupalakasha ngofu kukila angi ma jurnale oso e mu nsenga ishima! Bu bi bantu ba mu maumbo elekene be na mushindo wa kubadika ano ma jurnale, mitwe ya mwanda ya ku kipusu mbeyikite mu mushindo wayidi ilombene kusankisha bantu ba mu ma mbalo oso. Twi balombene kufubisha ano ma jurnale bwa kukwasha bantu bwabadya kutula binangu byabo ku mwanda wi na muulo ngofu mu nshalelo aabo lelo uno. Anka kya kumpala, abitungu tubande kuuka’shi uno jurnale mbamufundile bantu ba mushindo kinyi.

12. (a) Jurnale a Réveillez-vous ! mbamukite bwa bantu kinyi, na e na kepatshila kinyi? (b) Mmyanda kinyi ibuwa yodi mumone mu mafuku ashale pabitale kino kina mufubo?

¹² Réveillez-vous ! mbamukite bwa bantu bashi’abauku sunga abauku myanda ipeela ya mu Bible. Mbalombene kukutwa kuuka malongyesha a bena Kidishitu, mbalombene kukutwa kukulupila mu bipwilo, sunga kukutwa kuuka’shi Bible mulombene kwibakwasha mu muwa wabo. Kepatshila kakata ka uno jurnale a Réveillez-vous ! nkushinkamiisha bantu abamubadika’shi Efile Mukulu e kwanka. (Beena-Looma 1:20; Beena-Ebelu 11:6) Akwasha dingi bantu abamubadika bwabadya kwikala na lukumino’shi Bible mwikale “binyibinyi Eyi dy’Efile Mukulu.” (1 Beena-Tesalonika 2:13) Jurnale isatu itukye bwa kipwa kya 2018 i na mitwe ya mwanda ayamba’shi: “Le chemin du bonheur,” “12 clés du bonheur familial,” na “Quand on perd quelqu’un qu’on aime.”

13. (a) Kitenta kya Mulami kya bantu boso mbekitushishe bantu kinyi? (b) Mmyanda kinyi ibuwa yodi mumone binobino pa kufubisha kino kina mudimo?

¹³ Kepatshila kakata ka Kitenta kya Mulami kya bantu boso nka kupatula malongyesha a mu Bible kwi bantu abatshinyi Efile Mukulu na abanemeka Bible. Mbalombene kuuka ndambo ya myanda ya mu Bible, anka tabeyiuku kalolo nya. (Beena-Looma 10:2; 1 Timote 2:3, 4) Jurnale isatu itukye bwa kipwa kya 2018 ayaluula ku ino nkonko: “Bible ki’nka na muulo lelo uno su?,” “Mmyanda kinyi ayitutengyela mu mafuku aafiki?,” na “Efile Mukulu kwete nkupasukila su?”

14. (a) Mma video kinyi ananka e mu Kasheete ketu ka bina mudimo abitukwasha bwa kulongyesha? (b) Mmyanda kinyi ibuwa yodi mumone nsaa yodi muleshe ano ma video?

¹⁴ Ma video. Mu mafuku a Yesu, bantu babadi abasee mabaya babadi nka na penda bina mufubo bya ku maasa. Anka binobino, ba nsendwe ba mabaya bakwete kufubisha mpa na bina mufubo abitumika na nsembwe, bu ma sii, mitonkolo, na ma rabot. Nsaa yatulungula mukandu wibuwa lelo uno, kunundu kwa mikanda yabadi batushe, twi na ma video e buwa bukile atudi balombene kulesha bantu. Munkatshi mwao mwi ananka e mu Kasheete ka biina mudimo. Aamba’shi: Bwakinyi abitungu kulonga Bible?, Kulonga kwa Bible akukitshikaa naminyi?, Nkinyi akikitshikaa ku Nshibo ya Bufumu? Na a Les Témoins de Jéhovah : Qui sommes-nous? Ano ma video eepi ngalombene kwata minite ishadile pa ibidi na akwete kukwasha bantu bebungi nsaa yabesamba na muntu bwa mususa wa kumpala. Ma video e bula namu twi balombene kwiafubisha nsaa yatwalukila mu kutala muntu na patufumankana na muntu e na nsaa ibungi. Ano ma video nyi mbina mufubo bibuwa mwanda ngalombene kutakula bantu bwabadya kukumina kulonga Bible na kufika ku bisangilo byetu.

15. Kubandila umune a ku ma video eetu mu ludimi lwa butandwa kwi na bukitshishi kinyi kwi bantu? Tusha bileshesho.

¹⁵ Bu kileshesho, ungi mukwetu mukashi badi mufumankane na mwana mukashi badi mukatukye mu eumbo dya Micronésie badi akula ludimi lwaye lwa butandwa lwabetanyinaa bu Yapese. Mukwetu mukashi bamulesheshe video a Bwakinyi abitungu kulonga Bible? mu ludimi lwa kina Yapese. Nsaa ibadi  ateemesha video, uno mwana mukashi bambile’shi: “Luno ngi ludimi lwande lwa butandwa. Uno video bankemesha ngofu! Muyile abyakula uno muntu ne kwamba’shi nga mu kisangi kyandi mutandikilwe. Akula ludimi lwande lwa butandwa binyibinyi!” Kunyima kwa byabya, bambile’shi ende akabadikye na kubandila bintu byoso bi mu jw.org mu ludimi lwabo. (Tala byabidi bipushene na Bikitshino 2:8, 11.) Kingi kileshesho nkya ungi mukwetu mukashi a mu États-Unis e na mwana a mukwabo mushale mu ungi continent. Badi mumutumine adrese ya ku Internete ayimutwala mu kubandila uno video umune mu ludimi lwabo lwa butandwa. Uno mwana a mukwabo badi mubandile uno video aye nkumutumina mesaje mu Internete aamba’shi: “Kipindji kya video akyamba’shi kwi bukome bwi bubi bukwete kukunkusha uno ndumbulwilo ngi kibankumu ngofu. Natekye bwa kulonga Bible.” Uno mwanda awitusankisha ngofu mwanda uno muntu e mu eumbo dyabadi bakandikye mudimo wetu!

16. Patuula kepatshila ka ino broshire ayilondo: (a) Pushisha Efile bwashi wekale na muwa wa looso. (b) Mukandu wibuwa w’Efile Mukulu! (c) Mbantu kinyi bakwete kukita akikyebe Yehowa lelo uno?

¹⁶ Ma broshire. Twi balombene kulongyesha bya binyibinyi kwi muntu shauku kubadika kalolo sunga atushii na mukanda wa mu ludimi lwaye lwauku naminyi? Twi balombene kufubisha broshire a Pushisha Efile bwashi wekale na muwa wa looso. * Kina mudimo kikile buwa kilombene kwitukwasha bwa kubanga kulonga na muntu nyi broshire a Mukandu wibuwa w’Efile Mukulu! We mulombene kulesha muntu mitwe ya mwanda 14 i kunyima kwa broshire na kumwipusha mutwe wa mwanda aumusankisha. Akupu nwi kubanga kulonga dyadya dilongyesha. Tobandile kutompa bino nsaa ywalukila mu kutala bantu su? Broshire a kasatu e mu Kasheete ka biina mudimo bya kulongyesha nabyo amba’shi Mbantu kinyi bakwete kukita akikyebe Yehowa lelo uno? Mbamukite bwa kulongyesha balongi ba Bible bwa’shi baukye ndumbulwilo eetu. Bwa kuuka mushindo wa kufubisha uno broshire kwi muntu oso atulongo naye Bible, tala esaki dya Bwina Kidishitu na mudimo wetu​ dya mu mweshi wa Kasatu 2017.

17. (a) Mikanda yoso ya kulonga i na kepatshila kinyi? (b) Bantu boso ababatshishibwa be na lukalo lwa kukita kinyi, na bwakinyi?

¹⁷ Mikanda. Kunyima kwa kubanga kulonga Bible na muntu ku bukwashi bwa broshire, kunyima we kutwela naye mu mukanda wa A nkinyi akitulongyesha Bible? Kino kina mufubo nkilombene kukwasha bantu bwabadya kulonga malongyesha a kitako a mu Bible. Su mulongi bapudisha uno mukanda na kwete kwenda kumpala, we kutungunuka na kulonga naye mukanda wa Bya kushaala mu kifulo ky’Efile Mukulu. Kino kina mudimo akilongyesha mulongi mushindo wadya kwikala atumikila mayi a kulonda a mu Bible mu nshalelo aaye a ku efuku n’efuku. Tentekyesha’shi, mpa na kunyima kwa kubatshishibwa, muntu mupya e nka na lukalo lwa kutungunuka na kulonga mpa na pakapudisha ino mikanda. Bino abimukwasha bwadya kwikala na lukumino lwi bukopo mwi Yehowa na kushala na lulamato kwadi.—Badika Beena-Kolose 2:6, 7.

18. (a) Mukanda wa 1 Timote 4:16 awitukankamika bwatudya kukita kinyi bwa kulongyesha bantu bya binyibinyi, na bino abitusha bipeta kinyi? (b) Nsaa yatufubisha Kasheete ka biina mudimo bya kulongyesha nabyo abitungu twikale na kepatshila kinyi?

¹⁸ Atwe ba Temwe ba Yehowa, twi na bushito bwa kulongyesha bantu ‘eyi dya binyibinyi dya mukandu wibuwa’ dilombene kwibapetesha muwa wa ikalaika. (Beena-Kolose 1:5; badika 1 Timote 4:16.) Bwa kwitukwasha bwatudya kulombasha uno mudimo, twi na Kasheete ka biina mudimo bya kulongyesha nabyo ke na bina mudimo byatudi nabyo lukalo. (Tala kashibo akamba’shi: “ Kasheete ka biina mudimo bya kulongyesha nabyo.”) Tufubisheyi bino bina midimo kalolo muyile ngobesha yatudi nayo. Muntu oso a kwatudi mulombene kusangula kina mufubo ki mu kashete ketu bwadya kwikifubisha na kusangula nsaa ya kwikifubisha. Anka tentekyesha’shi, kepatshila ketu ta nka kwabila penda mikanda nya, na dingi tatupeyaa bantu bashi’abakumina kuteemesha mukandu wetu mikanda yetu nya. Kepatshila ketu nka kwikasha bantu be na mashimba e buwa bu balongi, bantu be na kwiyisha, na abakumina binyibinyi kuuka myanda y’Efile Mukulu, na bantu “be na mashimba alombane bwa muuwa wa looso.”—Bikitshino 13:48, NWT; Mateo 28:19, 20.