1, 2. (a) Ngumuphi umsebenti lobewubaluleke kakhulu kuJesu, futsi kungani? (b) Yini lesingayenta kute siphumelele ‘njengobe sitisebenti letikanye naNkulunkulu’?

JESU KHRISTU bekangumbati futsi ashumayela. (Mak. 6:3; Rom. 15:8) Kokubili bekakwenta kahle kakhulu. Njengembati, Jesu wafundza kuwasebentisa kahle emathuluzi kuze ente tintfo letinhle ngetingodvo. Njengemfundzisi wetindzaba letimnandzi, wasebentisa likhono lakhe lekwati imiBhalo kuze asite bantfu labavamile kutsi bacondze emaciniso laseVini laNkulunkulu. (Mat. 7:28; Luk. 24:32, 45) Nakaneminyaka lengu-30, Jesu wayekela kuba ngumbati ngoba bekati kutsi umsebenti lobaluleke kakhulu ngumsebenti wekushumayela. Watsi Nkulunkulu wamtfuma emhlabeni kuze ashumayele tindzaba letimnandzi teMbuso waNkulunkulu. (Mat. 20:28; Luk. 3:23; 4:43) Jesu wanaka kakhulu umsebenti wekushumayela futsi bekafuna kutsi nalabanye bente lokufanako.—Mat. 9:35-38.

² Labanyenti betfu abasibo babati, kodvwa sonkhe sishumayela tindzaba letimnandzi. Lomsebenti ubaluleke kakhulu ngoba sisebenta naNkulunkulu. LiBhayibheli lisibita ngekutsi “sitisebenti letikanye naNkulunkulu.” (1 Khor. 3:9; 2 Khor. 6:4) Siyati kutsi “umgomo welivi [laJehova] liciniso sibili.” (Hla. 119:159, 160) Kungako sifuna kuciniseka kutsi nasishumayela “siphatsa livi leliciniso ngendlela lefanele.” (Fundza 2 Thimothi 2:15.) Kungako  setama kutfutfukisa emakhono etfu ekusebentisa liBhayibheli lokulithuluzi lelibaluleke kakhulu lesilisebentisako kuze sifundzise labanye emaciniso ngaJehova, ngaJesu kanye nangeMbuso. Inhlangano yaJehova isentele emathuluzi latasisita siphumelele emsebentini wekushumayela futsi kufanele siwetayele. Lamathuluzi siwabita ngekutsi Ngemathuluzi Ekufundzisa.

3. Kulesikhatsi lesincane lesisele, yini lokufanele siyinakisise, futsi Imisebenti 13:48 ingasisita njani kutsi sente njalo?

³ Kungenteka uyatibuta kutsi kungani lamathuluzi abitwa ngekutsi Ngemathuluzi Ekufundzisa hhayi Emathuluzi Ekushumayela. “Kushumayela” kusho kutjela umuntfu umlayeto lotsite, kodvwa “kufundzisa” kusho kwenta umuntfu awucondze umlayeto lotsite futsi awutsandze bese uyakusebentisa loko lakufundzile. Kulesikhatsi lesincane lesisele kufanele sinake kakhulu kucalisa tifundvo teliBhayibheli siphindze sifundzise bantfu emaciniso. Loko kusho kufunisisa labo ‘labatimisele kutfola kuphila lokuphakadze’ futsi sibasite kutsi babe ngemakholwa.​—Fundza Imisebenti 13:44-48.

4. Singababona njani bantfu ‘labatimisele kutfola kuphila lokuphakadze,’ futsi singabatfola njani?

⁴ Singababona njani bantfu ‘labatimisele kutfola kuphila lokuphakadze’? Njengasekhulwini lekucala, kufanele sibashumayele kuze sibone kutsi batimisele yini kutfola kuphila lokuphakadze. Ngako kufanele sente njengobe Jesu asiyala nakatsi: “Kunobe nguliphi lidolobha nobe lidolobhana leningena kulo, funani bantfu labafanelekako.” (Mat. 10:11) Asikalindzeli kutsi bantfu labanetinhlitiyo letimbi, labatigabisako noma bantfu labangafuni kwati Nkulunkulu batilalele tindzaba letimnandzi. Sifuna bantfu labetsembekile, labatfobekile nalabalambele liciniso. Senta loko Jesu labengakwenta njengembati nakafuna tingodvo letikahle kuze ente ifenisha, tivalo, emajoko kanye naletinye tintfo. Nasekatfole tingodvo letikahle bekalandza emathuluzi akhe, asebentise emakhono lanawo kuze abate lokutsite. Kufanele sente lokufanako nangabe sifuna kwenta bantfu labanetinhlitiyo leticotfo babe bafundzi.​—Mat. 28:19, 20.

5. Yini lokufanele siyati Ngemathuluzi Ekufundzisa? Fanekisa. (Buka titfombe letisekucaleni kwalesihloko.)

⁵ Lithuluzi lenta umsebenti walo lokhetsekile. Cabanga ngemathuluzi Jesu labewasebentisa nakabata. * Bekadzinga emathuluzi ekukala, ekubekisa, ekujuba, ekubhobosa, ekubata kahle kanye newekuhlanganisa emapulango. Ngendlela lefanako, onkhe emathuluzi etfu ekufundzisa anemsebenti wawo lokhetsekile. Ngako kufanele siwati emathuluzi lesinawo kanye nendlela yekuwasebentisa.

6, 7. (a) Uwasebentise njani emakhadi e-jw.org? (b) Simemo semihlangano yelibandla sifeza tiphi tinjongo letimbili?

⁶ Emakhadi E-jw.org. Lawa ngemathuluzi lamancane lesingawasebentisa nasitetfula kubantfu futsi sibakhombise i-website yetfu lengabafundzisa lokunyenti ngatsi baphindze bacele nekuchutjelwa sifundvo seliBhayibheli. Kunebantfu labangetulu kwa-400 000 labasebentise i-jw.org kuze bacele kuchutjelwa tifundvo teliBhayibheli futsi kungeteka emakhulu ebantfu lilanga ngalinye. Nawe ungahlala uphetse emakhadi e-jw.org kuze ukhone kushumayela labanye nawenta imisebenti yakho yamalanga onkhe.

⁷ Timemo. Simemo semihlangano yelibandla sifeza tinjongo letimbili. Sitsi: “Uyamenywa kutsi utadishe liBhayibheli naBoFakazi BaJehova.” Sibese sitsi loko ungakwenta ngekutsi ube khona “emihlanganweni yetfu yelibandla” nobe kube “nemuntfu lotakufundzisa.” Lamathuluzi achaza kutsi sibobani aphindze ameme nalabanye “labanakisisa  tintfo letiphatselene naNkulunkulu” kutsi badadishe natsi liBhayibheli. (Mat. 5:3) Bonkhe bantfu bemukelekile emihlanganweni yetfu, kungaba ngulesifundza nabo liBhayibheli noma lesingafundzi nabo. Nangabe beta emihlanganweni batativela baphindze batibonele kutsi kunyenti labangakufundza eBhayibhelini.

8. Kubaluleke kangakanani kutsi bantfu bete lokungenani kanye emihlanganweni yetfu? Niketa sibonelo.

⁸ Kubalulekile kutsi sichubeke simema bantfu kutsi bete emihlanganweni yetfu, lokungenani kanye nje. Leni? Ngoba nabeta batawubona kutsi BoFakazi BaJehova bafundzisa liciniso leliseBhayibhelini futsi basita bantfu bafundze ngaNkulunkulu, lokuyintfo lengenteki etinkholweni temanga. (Isa. 65:13) Eminyakeni leyendlulile, Ray naLinda labashadene baseMelika bancuma kuya kuwo onkhe emasontfo lakhona. Bebakholelwa kuNkulunkulu futsi bafuna kwenetisa sidzingo sabo sekwati ngaNkulunkulu. Bawahamba onkhe emasontfo lamanyenti labekhona edolobheni lakubo. Kunetintfo letimbili labebafuna kutinaka esontfweni ngalinye. Kwekucala, bebatawubuka kutsi kukhona yini labatakufundza kuletinkonzo. Kwesibili, bebatawubuka kutsi emalunga elisontfo agcoke ngendlela lenesizotsa yini. Ngemuva kweminyaka lembalwa besebawahambe onkhe emasontfo lakulelidolobha, kodvwa kute lelanetisa tidzingo tabo. Kute lebebakufundzile futsi emalunga akhona bekangakagcoki ngendlela lenesizotsa. Nabaphuma esontfweni lekugcina, Linda waya emsebentini, Ray wabuyela ekhaya. Nakendlula eHholweni LeMbuso, Ray watibuta kutsi: ‘Yini ngingangeni ngibone kutsi kwentiwani lapha?’ Wakujabulela kakhulu kuba lapho. Bonkhe bantfu bebanemusa, banebungani futsi bagcoke kahle. Ray bekahleti phambili, futsi kwamjabulisa loko lakufundza. Kwenteka loko umphostoli Pawula lakusho ngebantfu labacala kuta emihlanganweni yebuKhristu, watsi: “Nembala Nkulunkulu unani.” (1 Khor. 14:23-25) Ngemuva kwaloko, Ray wacala kuya kuyo yonkhe imihlangano yelibandla yangeliSontfo, wabese sewuya nasemihlanganweni yasekhatsi neliviki. Linda wabese ucala kuhamba naye emihlanganweni futsi nabaseminyakeni yabo-70, bavuma kuchutjelwa sifundvo seliBhayibheli futsi babhajatiswa.

9, 10. (a) Kungani kumelula kusebentisa lamapheshana? (b) Chaza kutsi ungalisebentisa njani lipheshana lelitsi, Uyini UMbuso WaNkulunkulu?

⁹ Emapheshana. Sinemapheshana lasiphohlongo langemathuluzi lakahle ekucalisa tincociswano. Lamapheshana akhululwa nga-2013 futsi sekunyatseliswe langetulu kwetigidzigidzi letisihlanu. Lamapheshana ahlelwe ngendlela lefanako. Ngako kuba melula kuwasebentisa onkhe nangabe sewukhona kusebentisa linye lawo. Singalisebentisa njani lipheshana kuze sikhone kucalisa incociswano nemuntfu lesimtfolako?

¹⁰ Ase sitsi ukhetsa kusebentisa lipheshana lelitsi Uyini UMbuso WaNkulunkulu? Mkhombise umbuto losekucaleni kwalo, bese uyambuta: “Uke watibuta yini kutsi uyini uMbuso waNkulunkulu? Bewungaphendvula utsi . . . ?” Bese uyambuta kutsi nguyiphi imphendvulo layikhetsako. Kunekutsi umtjele kutsi imphendvulo yakhe ikahle noma cha, livule bese nibuka incenye letsi, “Loko Lokushiwo LiBhayibheli,” bese nifundza umBhalo waDanyela 2:44 na-Isaya 9:6. Nangabe ematfuba avuma, ningachubeka nicoca. Ekwephetseni, mbute umbuto lotsi: “Kutawuba njani kuphila nasekubusa uMbuso waNkulunkulu?” longemuva ngephasi kwencenye letsi “Longacabanga Ngako.” Ningawuphendvula lombuto nawuphindze ubuya. Naniphindze nibonana, ungamkhombisa sehluko 7 sencwajana letsi, Tindzaba Letimnandzi Letivela KuNkulunkulu, lengulenye yemathuluzi etfu ekucalisa tifundvo teliBhayibheli.

11. Iyini injongo yabomagazini betfu, futsi yini lokufanele siyati ngabo?

¹¹ Bomagazini. Sicongosekulindza ne-“Phaphama!” bomagazini labahunyushwe ngetilwimi letinyenti futsi basakatwa kakhulu emhlabeni wonkhe. Ngenca yekutsi bantfu labanyenti emaveni lehlukahlukene bayabafundza labomagazini, tihloko letisekhasini lekucala tibhalwe ngendlela yekutsi tikhange bonkhe bantfu. Kufanele sisebentise labomagazini kute sisite bantfu banakisise tintfo letibalulekile ekuphileni. Kodvwa kufanele sicale sati kutsi magazini ngamunye ubhalelwe luphi luhlobo lwebantfu.

12. (a) I-“Phaphama!” ibhalelwe bobani, futsi uyini umgomo wayo? (b) Ngukuphi lokuhle lokujabulele nawusebentisa lelithuluzi?

¹² I-“Phaphama!” ibhalelwe bantfu labanelwati loluncane ngeliBhayibheli noma labete sanhlobo. Kungenteka abati lutfo ngetimfundziso tebuKhristu futsi abayetsembi inkholo noma abati kutsi liBhayibheli lingabasita ekuphileni kwabo. Umgomo loyinhloko we-“Phaphama!” ukufundzisa bantfu kutsi Nkulunkulu ukhona. (Rom. 1:20; Heb. 11:6) Iphindze isite bantfu bakholelwe kutsi liBhayibheli “lingilo sibili . . . livi laNkulunkulu.” (1 Thes. 2:13) Tihloko letintsatfu te-Phaphama! ya-2018 titsi: “Indlela Yokuthola Injabulo,” “Izinto Ezingu-12 Ezenza Imindeni Iphumelele,” nalesitsi, “Help for Those Who Grieve.”

13. (a) Sicongosekulindza lesihanjiswako sibhalelwe bobani? (b) Ngumiphi imiphumela lemihle losandza kuyitfola nawusebentisa lelithuluzi?

¹³ Sicongosekulindza lesihanjiswako, sifundzisa bantfu labamhloniphako Nkulunkulu emaciniso laseVini lakhe. Ngisho noma banalo lwati loluseBhayibhelini, abakucondzi loko labakufundzako. (Rom. 10:2; 1 Thim. 2:3, 4) Sicongosekulindza lesihanjiswako sa-2018 siphendvula imibuto letsi: “LiBhayibheli Lisasebenta Yini?,” “Likusasa Lisiphatseleni?,” kanye nalotsi, “Nkulunkulu Unendzaba Yini Vele Natsi?”

14. (a) Ema-video lamane lesifundzisa ngawo entelwe yiphi injongo? (b) Ngukuphi lokuhle lokutfolile nawukhombisa labanye ema-video?

¹⁴ Ema-Video. Ngesikhatsi Jesu asemhlabeni, bantfu bebasebentisa emathuluzi ekubata lasetjentiswa ngesandla kuphela. Nanobe kunjalo, lamuhla babati basebentisa emathuluzi agesi lafaka ekhatsi ekujuba, ekubhobosa kanye newekubata kahle. Ngendlela lefanako, natsi asigcini ngekuba netincwadzi letishicilelwe kuphela, kepha sinema-video lamnandzi lesingawakhombisa bantfu. Afaka ekhatsi i-video letsi: Kungani Kufanele Sifundze LiBhayibheli?, Yini Leyentekako Nakuchutjwa Sifundvo SeliBhayibheli?, Yini Leyentekako EHholweni LeMbuso?, kanye neletsi, “OFakazi BakaJehova—Singobani?” letfolakala ngesiZulu. Ema-video lamafisha ladlala imizuzu lengaphasi kwalemibili akahle kakhulu nasicoca nemuntfu kwekucala. Ema-video lamadze singawasebentisa kubantfu labanesikhatsi noma nasibuyela kulesake sacoca nabo. Lamathuluzi angakhutsata bantfu kutsi batadishe natsi liBhayibheli, futsi baye emihlanganweni yetfu.

15. Shano tibonelo letikhombisa kutsi ema-video aba nemphumela lomuhle kubantfu nangabe angelulwimi lwabo.

¹⁵ Nasi sibonelo, lomunye dzadze wahlangana nalomunye sisi lowatfutsa eMicronesia, futsi lokhuluma lulwimi lwesiYapese. Lodzadze wamkhombisa i-video letsi Kungani Kufanele Sifundze LiBhayibheli? lebeyingelulwimi lwesiYapese. Nayicala kudlala le-video losisi watsi: “Lolu lulwimi lwami. Ngaze ngajabula! Nangilalela indlela lakhuluma ngayo ngivele ngibone kutsi usuka endzaweni bengihlala kuyo. Ulukhuluma kahle lulwimi lwami!” Ngemuva kwaloko, losisi watsi utawufundza tonkhe tincwadzi letibhalwe ngelulwimi lwakhe  letiku-jw.org aphindze abukele nema-video. (Catsanisa Imisebenti 2:8, 11.) Cabanga nganasi lesinye sibonelo. Lomunye dzadze waseMelika watfumelela umshana wakhe i-link ye-video lefanako. Lomshana wayibukela futsi watsi: “Ingimangalisile lencenye lekhuluma ngekutsi lelive lisemandleni alomubi. Ngifake sicelo sekufundzelwa liBhayibheli.” Loku kujabulisa kakhulu ngoba lomshana uhlala eveni lapho umsebenti wetfu uvinjelwe khona!

16. Chaza injongo yencwajana letsi: (a) Lalela Nkulunkulu Kute Uphile Phakadze. (b) Tindzaba Letimnandzi Letivela KuNkulunkulu (c) Bobani Labenta Intsandvo YaJehova Lamuhla?

¹⁶ Tincwajana. Singamfundzisa njani umuntfu longakhoni kufundza noma lote tincwadzi teliBhayibheli letitfolakala ngelulwimi lwakhe? Singasebentisa incwajana letsi, Lalela Nkulunkulu Kute Uphile Phakadze. * Incwajana letsi, Tindzaba Letimnandzi Letivela KuNkulunkulu ilithuluzi lelikahle lekucalisa tifundvo teliBhayibheli. Ungakhombisa umuntfu tihloko letingu-14 letisekhasini lelingemuva, futsi umcele akhetse sinye lafisa kwati lokunyenti ngaso bese nifundza sona. Uke wakuzama yini loku nawubuyela kubantfu lowake wacoca nabo? Lithuluzi lesitsatfu lesinalo yincwajana letsi, Bobani Labenta Intsandvo YaJehova Lamuhla? Lencwajana yentelwe kusita bantfu lesifundza nabo kutsi bafundze ngenhlangano yaNkulunkulu. Kuze utfole indlela yekusebentisa lencwajana nawuchuba sifundvo seliBhayibheli, buka incwajana letsi, Kuphila KwemaKhristu Nemsebenti Wawo—Incwajana Yekubhalela Emihlanganweni, ya-March 2017.

17. (a) Nguyiphi injongo yencwadzi ngayinye lesifundzisa ngayo? (b) Yini bantfu lababhajatisiwe lokufanele bayente, futsi kungani?

¹⁷ Tincwadzi. Ngemuva kwekucalisa sifundvo seliBhayibheli usebentisa incwajana, ungabese usebentisa incwadzi letsi, Lingasifundzisani LiBhayibheli? Lelithuluzi lentelwe kusita umuntfu ati lokunyenti ngetimfundziso teliBhayibheli letisisekelo. Nasenicedzile kufundza lencwadzi futsi lomuntfu achubeka atfutfuka, ningabese nifundza incwadzi letsi, How to Remain in God’s Love. * Lencwadzi itawufundzisa umfundzi indlela yekusebentisa timiso teliBhayibheli ekuphileni kwakhe. Khumbula kutsi bafundzi kufanele batifundze totimbili letincwadzi baze baticedze, ngisho noma sebabhajatisiwe. Loko kutawubasita kutsi babe nekukholwa lokucinile.​—Fundza Kholose 2:6, 7.

18. (a) Umbhalo wa-1 Thimothi 4:16 usikhutsata kutsi senteni nasifundzisa liciniso, futsi utawuba yini umphumela? (b) Kufanale ube yini umgomo wetfu nasisebentisa Emathuluzi Ekufundzisa?

¹⁸ Njengobe siBoFakazi BaJehova sinikwe umsebenti wekufundzisa bantfu “ngemlayeto weliciniso letindzaba letimnandzi” kuze batfole kuphila lokuphakadze. (Khol. 1:5; fundza 1 Thimothi 4:16.) Kuze sikhone kukwenta loko, sinikwe Emathuluzi Ekufundzisa lesiwadzingako. (Buka libhokisi lelitsi “ Emathuluzi Ekufundzisa.”) Shengatsi singachubeka siwasebentisa ngelikhono lamathuluzi. Sonkhe kufanele sincume kutsi nguliphi lithuluzi lesitalisebentisa futsi sitalisebentisa nini. Khumbula kutsi umgomo wetfu awusiwo kuhambisa tincwadzi, futsi tincwadzi tetfu asitiniki bantfu labete sifiso sekwati umlayeto lesiwuphetse. Umgomo wetfu kusita bantfu “labatimisele kutfola kuphila lokuphakadze,” labacotfo, labatfobekile kanye nalabafuna kwati Nkulunkulu kutsi babe bafundzi.​—Imis. 13:48; Mat. 28:19, 20.