1, 2. 1) ¿Baʼax meyajil tu tsʼaatáantaj Jesús, yéetel baʼaxten? 2) ¿Baʼax unaj k-beetik utiaʼal k-múul meyaj yéetel Dios?

JESUCRISTOEʼ carpintero kaʼachi yéetel tu kʼaʼaytaj le maʼalob péektsiloʼ (Mar. 6:3; Rom. 15:8). Tu kaʼapʼéelal tu beetaj jach tubeel. Tu kanaj meyaj tubeel yéetel le jejeláas nuʼukuloʼob ku meyaj tiʼ juntúul carpinterooʼ. Tsʼoʼoleʼ meyajnajtiʼ maʼalob le Kiliʼich Tsʼíiboʼob utiaʼal u yáantik le máakoʼob u kanoʼob u jaajiloʼ (Mat. 7:28; Luc. 24:32, 45). Ka tu tsʼáaj 30 años tiʼeʼ, tu pʼataj u beetik u carpinteroil utiaʼal u kʼaʼaytik u maʼalob péektsilil le Reinooʼ. U yojel letiʼe meyaj maas kʼaʼanaʼanoʼ, tumen tu yaʼaleʼ letiʼe baʼax túuxtaʼab u beet tumen Dios way Luʼumoʼ (Mat. 20:28; Luc. 3:23; 4:43). Tu tsʼáaj táanil ichil u kuxtal le kʼaʼaytajoʼ yéetel tu yaʼalaj tiʼ uláakʼ máakoʼob ka u beetoʼob xan beyoʼ (Mat. 9:35-38).

² U maas yaʼabil tiʼ toʼoneʼ maʼ carpinteroʼoniʼ, baʼaleʼ tuláakloʼon k-kʼaʼaytik le maʼalob péektsiloʼ. Lelaʼ junpʼéel meyaj jach unaj u beetaʼal, tumen tak Dios ku yáantaj utiaʼal u beetaʼal. Le oʼolal le Bibliaoʼ ku yaʼalikeʼ «toʼoneʼ u yéet meyajoʼon Dios» (1 Cor. 3:9; 2 Cor. 6:4). K-ojel tuláakal le baʼax ku yaʼalik u Tʼaan Diosoʼ u jaajil (Sal. 119:159, 160). Le oʼolal unaj k-ilik ‹k-kaʼansik yéetel k-tsolik tubeel u tʼaaniloʼob le jaaj› kéen kʼaʼaytajnakoʼonoʼ (xok 2 Timoteo 2:15). Unaj k-ilik u meyajtoʼon tubeel le Biblia kéen kʼaʼaytajnakoʼonoʼ, tumen letiʼe baʼax ku meyajtoʼon utiaʼal k-kaʼansik u jaajil yoʼolal Jéeoba, Jesús yéetel le Reinooʼ. Utiaʼal k-kaʼansaj tubeeleʼ, u kaajal  Jéeobaeʼ tsʼoʼok u tsʼáaik jejeláas nuʼukuloʼob. Jach maʼalob ka k-kʼaj óoltoʼob tubeel.

3. 1) ¿Baʼax unaj k-beetik teʼ tu tsʼook kʼiinoʼob pʼaatal tiʼ le kʼasaʼan yóokʼol kaabaʼ? 2) Jeʼex u yaʼalik Baʼaxoʼob 13:48, ¿máaxoʼob unaj k-kaxtik?

³ Maʼ xaaneʼ k-tuklik baʼaxten ku yaʼalaʼaltiʼ u nuʼukuliloʼob kaʼansaj, maʼ u nuʼukuliloʼob kʼaʼaytajiʼ. Tumen kéen kʼaʼaytajnakoʼoneʼ chéen k-tsʼáaik ojéeltbil baʼax ku yaʼalik le Bibliaoʼ. Baʼaleʼ kéen kaʼansajnakoʼoneʼ k-tsolik baʼax ku yaʼalik le Biblia utiaʼal ka naʼataʼak tumen le máakoʼoboʼ yéetel ka u tsʼáaʼob ichil u kuxtaloʼob. Teʼ tu tsʼook kʼiinoʼob pʼaatal tiʼ le kʼasaʼan yóokʼol kaabaʼ, unaj k-ilik k-tsʼáaik xook tiʼ le máakoʼob utiaʼal k-kaʼansiktiʼob u jaajiloʼ. Le oʼolal unaj k-ilik k-tsʼáaik k-óol k-kaxt tuláakal le máaxoʼob jach tu jaajil u kʼáatoʼob ka yanak kuxtal minaʼan u xuul tiʼoboʼ yéetel k-áantkoʼob utiaʼal ka u meyajtoʼob Jéeoba (xok Baʼaxoʼob 13:44-48).

4. ¿Bix jeʼel k-kaxtik «le máaxoʼob jach tu jaajil u kʼáatoʼob ka yanak kuxtal minaʼan u xuul tiʼoboʼ»?

⁴ ¿Bix jeʼel k-kaxtik «le máaxoʼob jach tu jaajil u kʼáatoʼob ka yanak kuxtal minaʼan u xuul tiʼoboʼ»? Jeʼex teʼ yáax siglooʼ, kʼaʼabéet xan k-jóokʼol kʼaʼaytaj. Le oʼolal unaj k-beetik le baʼax tu yaʼalaj Jesusaʼ: «Tiʼ jeʼel baʼalak kaajil wa chan kajtalil ka ookkeʼexeʼ, kaxteʼex máax ku náajmatik u yuʼubik le baʼax ken a kʼaʼayteʼexoʼ» (Mat. 10:11). K-ojel le máaxoʼob maʼ uts u puksiʼikʼaloʼob, kaʼanal u yichoʼob yéetel maʼ u kʼáat u meyajtoʼob Diosoʼ maʼ ken u kʼamoʼob le maʼalob péektsiloʼ. Le oʼolaleʼ k-kaxtik le máaxoʼob kabal u yóoloʼob yéetel taak u kankoʼob u jaajiloʼ. Tuukulnakoʼon tiʼ le táan u beetik u carpinteroil Jesusoʼ. Maʼ xaaneʼ ku kaxtik le cheʼ maas maʼalob utiaʼal u beetik mesaʼob, joonajoʼob wa le cheʼ ku meyaj utiaʼal u bisaʼal kuuchoʼ. Kéen u kaxt le cheʼoʼ ku meyajtiʼ maʼalob le nuʼukuloʼob yaantiʼ utiaʼal u beetkoʼ. Toʼon xaneʼ bey unaj k-beetkoʼ, yáaxeʼ unaj k-kaxtik le máaxoʼob uts u puksiʼikʼaloʼoboʼ, tsʼoʼoleʼ unaj u meyajtoʼon maʼalob le nuʼukuloʼob yaantoʼon utiaʼal k-áantkoʼob u kʼaj óoltoʼob Diosoʼ (Mat. 28:19, 20).

5. ¿Bix jeʼel u páajtal k-ketik le bix unaj u meyajtoʼon le nuʼukuloʼob tsʼaʼantoʼon utiaʼal k-kaʼansajoʼ? (Ilawil le fotoʼob yaan tu káajbal le xookaʼ.)

⁵ Cada junpʼéel nuʼukul tsʼaʼantoʼoneʼ yaan baʼax u biilal. Jeʼex le nuʼukuloʼob ku meyaj kaʼach tiʼ Jesús utiaʼal u póolik le cheʼoboʼ. * Yanoʼobeʼ ku meyaj utiaʼal u pʼiʼisil le cheʼoʼ, utiaʼal u xoʼotol, utiaʼal u poʼotol wa utiaʼal u póolaʼal, yanoʼob xaneʼ utiaʼal u táaxkuntaʼal, u tojkíintaʼal wa utiaʼal u taʼakʼal. Bey túun xanoʼ, cada junpʼéel tiʼ le nuʼukuloʼob tsʼaʼantoʼon utiaʼal k-kaʼansajoʼ yaan baʼax u biilaloʼob. Tumen láaj kʼaʼanaʼaneʼ unaj k-kanik bix u meyaj cada junpʼéel.

6, 7. 1) ¿Bix tsʼoʼok u meyajtech le tarjetaʼoboʼ? 2) ¿Tiʼ baʼax ku yáantaj u invitacionil le muchʼtáambaloʼoboʼ?

⁶ U tarjetailoʼob jw.org. Le nuʼukuloʼobaʼ mejentak, baʼaleʼ jach ku yáantaj utiaʼal k-kʼaj óoltaʼal yéetel ka kaxtaʼak le sitio yaantoʼon ich Internetoʼ. Teʼ sitiooʼ jeʼel u páajtal u yojéeltaʼal u maasil t-oʼolaleʼ bey xan u kʼáatik máak ka tsʼaʼabak xook tiʼ. Tak bejlaʼeʼ maas tiʼ cuatrocientos mil máakoʼob tsʼoʼok u kʼáatkoʼob teʼ sitio jw.org ka tsʼaʼabak xook tiʼob yéetel le Bibliaoʼ. Tsʼoʼoleʼ sáamsamaleʼ u cientosil uláakʼ máakoʼob ku kʼáatkoʼob xan. Le oʼolaleʼ unaj k-bisik wa jaypʼéel mantatsʼiʼ. Beyoʼ jeʼel u páajtal k-tsʼáaik tiʼ wa máax jeʼel baʼalak súutukileʼ.

⁷ Invitacionoʼob. Le invitacionoʼob utiaʼal le muchʼtáambaloʼoboʼ ku meyaj utiaʼal kaʼapʼéel baʼal. Yáaxeʼ ku yaʼalik tiʼ le máakoʼoboʼ: «K-invitartikech utiaʼal a xokik le Biblia yéetel le testigos tiʼ Jéeobaoʼ». Kéen tsʼoʼokkeʼ ku yaʼalik jeʼel u páajtal u kanik le baʼax ku yaʼalik le Biblia teʼ muchʼtáambaloʼoboʼ bey xan wa ka xiʼik  kaʼansbil tu yotoch. Bey túunoʼ, le nuʼukulaʼ maʼ chéen ku meyaj utiaʼal ka ojéeltaʼak máaxoʼoniʼ, baʼaxeʼ utiaʼal ka k-invitart u xook le Biblia t-éetel «le máaxoʼob wiʼijoʼob tiʼ tuláakal le baʼaxoʼob ku tsʼáaik Diosoʼ» (Mat. 5:3). U jaajileʼ tuláakal máak ku kʼaʼamal teʼ muchʼtáambaloʼob, kex maʼatech u tsʼaʼabal xook tiʼob tu yotochoʼoboʼ. Wa ku bin teʼ muchʼtáambaloʼ yaan u yilik yaʼab baʼax jeʼel u kanik tiʼ le Bibliaoʼ.

8. ¿Baʼaxten jach kʼaʼabéet u bin kex chéen juntéen le máakoʼob teʼ muchʼtáambaloʼ? Tʼaanen tiʼ junpʼéel baʼax uchaʼan.

⁸ Maʼ unaj u xuʼulul k-invitartik le máakoʼob teʼ muchʼtáambaloʼ. ¿Baʼaxten? Tumen kex chéen juntéen ka xiʼikoʼobeʼ yaan u yilkoʼobeʼ, toʼoneʼ k-kaʼansik u jaajil yaan teʼ Bibliaoʼ yéetel k-áantik uláakʼ máakoʼob u kʼaj óoltoʼob Dios. Ku yilkoʼobeʼ maʼ beyoʼon jeʼex u maasil religionoʼob maʼatech u kaʼanskoʼob u jaajiloʼ (Isa. 65:13). Lelaʼ letiʼe baʼax úuch tiʼ Ray yéetel Linda, u yatanoʼ, letiʼobeʼ tiʼ kajaʼanoʼob Estados Unidoseʼ. Ku creertikoʼob Dios yéetel ku yuʼubikoʼob kʼaʼabéet u binoʼob iglesia utiaʼal u maas kʼaj óoltikoʼob. Le oʼolal tu chʼaʼtukloʼob u binoʼob tiʼ cada junpʼéel tiʼ le iglesiaʼob yanoʼob teʼ tuʼux kajaʼanoʼoboʼ. Yaʼab iglesiaʼob yaniʼ bey xan u jejeláasil religionoʼob. Desde tu káajbaleʼ tu yaʼaloʼobeʼ utiaʼal ka pʼáatkoʼob tiʼ junpʼéel religioneʼ kʼaʼabéet u yilkoʼob kaʼapʼéel baʼaliʼ. Yáaxeʼ, kʼaʼabéet u kankoʼob junpʼéel baʼax túumben kéen xiʼikoʼobiʼ. U kaʼapʼéeleʼ, le máaxoʼob u muchʼmubaʼoboʼ kʼaʼabéet u vestirmubaʼob jeʼex uts tu tʼaan Dioseʼ. Máan wa jaypʼéel años utiaʼal u binoʼob tiʼ tuláakal le iglesiaʼob yanoʼob tu kaajaloʼoboʼ, baʼaleʼ jach lúub u yóoloʼob, tumen mix baʼal tu kanoʼobiʼ yéetel tu yiloʼobeʼ maʼ maʼalob bix u vestirmiluba le máaxoʼob ku binoʼoboʼ. Ka jóokʼoʼob teʼ tu tsʼook iglesia binoʼoboʼ, Lindaeʼ bin meyaj, Rayeʼ joʼopʼ u suut tu yotoch. Le táan u binoʼ máan tu jool junpʼéel u Najil Reinoeʼ ka tu tuklaj: «¿Kux túun ka okoken utiaʼal in wilik baʼax ku beetkoʼobiʼ?». Ka ookeʼ utschaj tu yich baʼax tu yiliʼ. Tuláakal le máaxoʼob yanoʼoboʼ jach utsoʼob yéetel maʼalob u vestirmilubaʼob. Rayeʼ táanil kulaji, jach jatsʼuts tu yilil le baʼax kaʼansaʼaboʼ. Úuch tiʼ letiʼ le baʼax tu yaʼalaj apóstol Pablo kéen yáax xiʼik máak teʼ muchʼtáambaloʼ, ku yaʼalik: «Dioseʼ jach tu jaajil tiʼ yaan ichileʼexeʼ» (1 Cor. 14:23-25). Desde teʼ kʼiin jeʼeloʼ Rayeʼ joʼopʼ u bin tiʼ tuláakal domingosiʼ, tsʼoʼoleʼ ka joʼopʼ u bin tiʼ le ku beetaʼal tu yáam semanaoʼ. Lindaeʼ joʼopʼ u bin xan tu yéetel. Kex tsʼoʼok maas tiʼ 70 años tiʼobeʼ, káaj u xokikoʼob le Bibliaoʼ yéetel okjaʼanajoʼob.

9, 10. 1) ¿Baʼaxten chéen chʼaʼabil u meyaj tiʼ máak le tratadoʼoboʼ? 2) ¿Bix jeʼel u meyajtech le tratado ¿Baʼax u Reino Dios?, tsʼaʼantoʼon utiaʼal k-kaʼansajoʼ?

⁹ Tratadoʼob. Yaantoʼon ocho tratadoʼob maʼ talam jeʼel u meyajtoʼon utiaʼal k-káajsik k-tsikbal yéetel wa máaxeʼ. Desde ka jóoʼsaʼaboʼob tu añoil 2013, tsʼoʼok u imprimirtaʼal cinco mil millones u pʼéelaliʼ. U maʼalobileʼ kéen k-kan kʼaʼaytaj yéetel junpʼéeleʼ k-kanik bix jeʼel k-kʼaʼaytik u maasiloʼ, tumen junpʼéeliliʼ bix tsʼaʼanil u joʼol xookiloʼob. ¿Bix jeʼel k-káajsik k-tsikbal utiaʼal k-kʼaʼaytikoʼobeʼ?

¹⁰ Koʼox aʼalikeʼ yaan u meyajtoʼon le tratado ¿Baʼax u Reino Dios? Jeʼel u páajtal k-eʼesik tiʼ u yuumil naj le yáax táan juʼunoʼ, tsʼoʼoleʼ k-aʼaliktiʼ: «¿A wojel wa baʼax u Reino Dios? Tiʼ le óoxpʼéel baʼax ku yaʼalaʼal teʼelaʼ, ¿máakalmáak ka tuklik u jaajiliʼ?». Toʼoneʼ maʼ unaj k-aʼalik wa maʼalob bey xan wa maʼ maʼalob le baʼax tu núukoʼ, baʼaxeʼ jeʼel u páajtal k-eʼesiktiʼ uláakʼ táan juʼun, teʼ jaatsʼ «Le Bibliaoʼ ku yaʼalik», tsʼoʼoleʼ k-xokik u yuʼub baʼax ku yaʼalik Daniel 2:44 yéetel Isaías 9:6, tsʼaʼan teʼ tratadooʼ. Wa ku páajtaleʼ k-maas tsolik. Tu tsʼookeʼ jeʼel u páajtal k-eʼesiktiʼ le kʼáatchiʼ ku chíikpajal tu paach le tratado, tuʼux ku yaʼalik «Tukulte»: «¿Bix wal kun kuxtal máak yáanal u Reino Dioseʼ?». Beyoʼ k-pʼatik tiʼ baʼax ken k-tsikbal kéen suunakoʼon k-xíimbalte. Kéen kaʼa tsikbalnakoʼon tu yéeteleʼ, jeʼel u páajtal k-eʼesiktiʼ  le xook 7 tiʼ le folleto U maʼalob péektsiloʼob Dios, táakaʼan ichil le nuʼukuloʼob tsʼaʼantoʼon utiaʼal k-tsʼáaik xook tiʼ le máakoʼoboʼ.

11. ¿Bix beetaʼanil le revistaʼob k-kʼaʼaytikoʼ, yéetel baʼax unaj k-kanik tu yoʼolaloʼob?

¹¹ Revistaʼob. Le revistaʼob maas yaʼab u jóoʼsaʼal ich yaʼab idiomaʼob tiʼ tuláakal yóokʼol kaaboʼ U Pʼíich Tulumil Kanan yéetel ¡Despertad! Tumen ku xoʼokol tiʼ yaʼab luʼumiloʼobeʼ, ku tʼaanoʼob tiʼ baʼaloʼob taak u yojéeltik u máakiloʼob tuláakal yóokʼol kaab. Le oʼolaleʼ unaj k-ilik k-beetik u taaktal u xoʼokol tumen le máakoʼob utiaʼal u yilkoʼob le baʼaxoʼob maas kʼaʼanaʼantak teʼ kʼiinoʼobaʼ. Baʼaleʼ utiaʼal u béeytal k-pʼatik tiʼ le máakoʼoboʼ unaj k-kanik k-il tiʼ máaxoʼob jeʼel u páajtal k-pʼatkeʼ.

12. 1) ¿Utiaʼal máaxoʼob beetaʼan le revista ¡Despertad! ku jóoʼsaʼaloʼ, yéetel baʼax u biilal? 2) ¿Baʼaxoʼob jatsʼutstak uchaʼantech ikil a kʼaʼaytaj yéetel le revistaaʼ?

¹² U revistail ¡Despertad! ku jóoʼsaʼaloʼ beetaʼan utiaʼal le máaxoʼob óoliʼ mix baʼal u yojloʼob tiʼ le Bibliaoʼ. Maʼ xaaneʼ maʼ u yojloʼob mix baʼal tiʼ u kaʼansajoʼob Cristoiʼ, sajak u tuʼusloʼob tumen le religionoʼoboʼ wa maʼ u yojloʼob wa maʼalob le tsolnuʼukoʼob ku tsʼáaik le Bibliaoʼ. Junpʼéel tiʼ le baʼax oʼolal ku jóoʼsaʼal le revistaaʼ utiaʼal u yáantik le máax xokik u creert jach tu jaajil yaan Diosoʼ (Rom. 1:20; Heb. 11:6). Ku yáantik xan u creerteʼ le baʼax ku yaʼalik le Bibliaoʼ u Tʼaan Dios (1 Tes. 2:13). Le óoxpʼéel revista kun jóokʼol tu añoil 2018, ku kʼaabaʼtik «El camino de la felicidad», «12 claves para una familia feliz» yéetel «Al perder a un ser querido».

13. 1) ¿Utiaʼal máaxoʼob beetaʼan U Pʼíich Tulumil Kanan utiaʼal kʼaʼaytajoʼ? 2) ¿Baʼaxoʼob jatsʼutstak uchaʼantech ikil a kʼaʼaytaj yéetel le revistaaʼ?

¹³ Le U Pʼíich Tulumil Kanan utiaʼal kʼaʼaytajoʼ ku beetaʼal utiaʼal u yáantaʼal le máaxoʼob ku creertikoʼob Diosoʼ bey xan le Bibliaoʼ. Maʼ xaaneʼ yaan baʼax u yojloʼob ku kaʼansik le Bibliaoʼ, baʼaleʼ maʼ tu jach naʼatkoʼob baʼax u kʼáat u yaʼaleʼ (Rom. 10:2; 1 Tim. 2:3, 4). Le óoxpʼéel revista kun jóokʼol tu añoil 2018, ku taasik le kʼáatchiʼobaʼ: «¿Láayliʼ wa ku yáantaj le Bibliaoʼ?», «¿Baʼax ku taal u kʼiin u yúuchul?» yéetel «¿Ku yilik wa Dios baʼax ku yúuchultech?».

14. 1) ¿Baʼax u biilal le kanpʼéel videoʼob táakaʼanoʼob ichil le u nuʼukuliloʼob kaʼansajoʼ? 2) ¿Baʼaxoʼob jatsʼutstak uchaʼantech ikil a kʼaʼaytaj yéetel le videoʼoboʼ?

¹⁴ Videoʼob. Tu kʼiiniloʼob Jesuseʼ maʼatech u meyaj tiʼ le carpinteroʼob nuʼukuloʼob ku meyajoʼob yéetel corrienteoʼ. Baʼaleʼ teʼ kʼiinoʼobaʼ ku meyaj le sierra mecanicaoʼ, le taladrooʼ, le lijadoraoʼ bey xan le clavadoraoʼ. Bey túun xanoʼ, bejlaʼeʼ maʼ chéen ku imprimirtaʼal publicacionoʼobiʼ, baʼaxeʼ yaantoʼon videoʼob jatsʼutstak. Kanpʼéel tiʼ leloʼobaʼ táakaʼanoʼob ichil le nuʼukuloʼob utiaʼal kaʼansajoʼ: ¿Baʼaxten unaj a xokik le Bibliaoʼ?, ¿Bix u kaʼansaʼal máak yéetel le Bibliaoʼ?, ¿Bix le muchʼtáambaloʼob ku beetaʼal teʼ Najil Reinooʼ? yéetel ¿Máax u j-jaajkunajoʼob Jéeoba? Le ku xáantal chéen óoliʼ kaʼapʼéel minutooʼ jeʼel u meyajtoʼon kéen yáax tsikbalnakoʼon yéetel u yuumil najeʼ. Le ku xáantal junpʼíit maasoʼ jeʼel u páajtal u meyajtoʼon kéen xiʼikoʼon k-kaʼa xíimbalt u yuumil najeʼ bey xan kéen tsikbalnakoʼon yéetel le máaxoʼob maas yaan tiempo tiʼoboʼ. Le videoʼobaʼ jeʼel u yáantik le máakoʼob u yóotoʼob ka tsʼaʼabak xook tiʼoboʼ yéetel ka xiʼikoʼob muchʼtáambal.

15. Tsikbalt bix u yáantaj le videoʼob yanoʼob ichil u idioma máakoʼ.

¹⁵ Koʼoneʼex ilik bix áantaʼabik juntúul koʼolel tumen le videoʼoboʼ. Juntúul kiikeʼ tʼaanaj yéetel juntúul koʼolel kajaʼan kaʼach Micronesia, ka tu yeʼesajtiʼ le video ¿Baʼaxten unaj a xokik le Bibliaoʼ? Le videoaʼ tiaʼan ichil le idioma yapés ku tʼankoʼ. Ka káaj le videooʼ, le koʼoleloʼ tu yaʼalaj: «¡Maʼ tu páajtal in creertik, ichil in idioma  yaan! Le máakoʼ ku tʼaan jeʼex u tʼaan u kajnáaliloʼob le isla tuʼux in taaloʼ». Ka tsʼoʼokeʼ tu yaʼalaj yaan u xokik yéetel yaan u chaʼantik le baʼaxoʼob ku chíikpajal teʼ sitio jw.org yaan ichil le idioma yapesoʼ (ket yéetel Baʼaxoʼob 2:8, 11). Lelaʼ bey úuchik xan tiʼ juntúul kiik kajaʼan Estados Unidos, letiʼeʼ tu túuxtaj tiʼ u sobrino kajaʼan táanxel luʼumil u direccionil le video ¿Baʼaxten unaj a xokik le Bibliaoʼ? Lelaʼ tiaʼan ichil le idioma ku tʼankoʼ. Ka tsʼoʼok u chaʼantikeʼ tu yaʼalaj tiʼ u tía teʼ correooʼ: «Le baʼax maas péeks in wóoloʼ, letiʼe jaats tuʼux tu yaʼalik letiʼe Kʼaasilbaʼal nuʼuktik le yóokʼol kaabaʼ. Yaan in kʼáatik ka tsʼaʼabakten xook». Letiʼeʼ kajaʼan tiʼ junpʼéel luʼumil prohibirtaʼan le kʼaʼaytajoʼ.

16. Tsol baʼax u biilal cada junpʼéel tiʼ le folletoʼobaʼ: 1) Uʼuy u tʼaan Dios utiaʼal a kuxtal minaʼan u xuul. 2) U maʼalob péektsiloʼob Dios. 3) ¿Máaxoʼob beetik baʼax u kʼáat Jéeoba bejlaʼeʼ?

¹⁶ Folletoʼob. Wa juntúul máak maʼ jach u yojel xook bey xan wa minaʼan mix junpʼéel publicación ichil le idioma ku tʼankoʼ, ¿bix jeʼel u páajtal k-kaʼansik u jaajil tiʼeʼ? Yaantoʼon junpʼéel nuʼukul jach maʼalob, letiʼe folleto Uʼuy u tʼaan Dios utiaʼal a kuxtal minaʼan u xuul. * Uláakʼ nuʼukul jach jeʼel u meyaj utiaʼal u káajsaʼal xookoʼobeʼ letiʼe folleto U maʼalob péektsiloʼob Dios. Jeʼel u páajtal k-eʼesik tiʼ le máakoʼob u kʼaabaʼ le 14 xookoʼob ku taasik le u tsʼook táan juʼunoʼ, k-kʼáatiktiʼ máakalmáak taak u xokikiʼ ka k-xakʼalt tu yéetel. ¿Tsʼoʼok wa k-beetik bey kéen suunakoʼon k-kaʼa xíimbalt wa máaxoʼ? Le u yóoxpʼéel folleto táakaʼan ichil u nuʼukul kaʼansajoʼ ku kʼaabaʼtik ¿Máaxoʼob beetik baʼax u kʼáat Jéeoba bejlaʼeʼ? Lelaʼ beetaʼan utiaʼal k-áantik le j-xoknáaloʼob u kʼaj óoltoʼob u kaajal Diosoʼ. Utiaʼal k-kanik bix jeʼel u meyajtoʼoneʼ jeʼel u páajtal k-ilik U juʼunil xook utiaʼal u muchʼtáambalil Kuxtal yéetel meyaj jeʼex Cristoeʼ tiʼ marzo tiʼ 2017.

17. 1) ¿Baʼax u biilal cada junpʼéel tiʼ le libroʼob ku meyajtoʼonoʼ? 2) ¿Baʼax unaj u beetik tuláakal le máaxoʼob ku yokjaʼoboʼ, yéetel baʼaxten?

¹⁷ Libroʼob. Wa ku meyajtoʼon junpʼéel folleto utiaʼal k-káajsik k-xook yéetel wa máaxeʼ, kéen k-il jeʼel u páajtaleʼ, k-káajsik k-xokik tu yéetel le libro ¿Baʼax jach tu jaajil ku kaʼansik le Bibliaoʼ? Le libroaʼ yaan u yáantik le j-xoknáal u kan le baʼaxoʼob maas kʼaʼanaʼantak ku kaʼansik le Bibliaoʼ. Wa le j-xoknáal ku láaj xokik le libro yéetel táan u tsʼáaik ichil u kuxtal le baʼax ku kanikoʼ jeʼel u páajtal k-xokik tu yéetel le libro «Pʼáateneʼex tiʼ u yaakunaj Jajal Dios». Le libroaʼ yaan u kaʼansiktiʼ bix jeʼel u meyajtiʼ le baʼaxoʼob ku yaʼalik le Biblia utiaʼal u nuʼuktik u kuxtaloʼ. Kʼaʼajaktoʼoneʼ tuláakal le j-xoknáaloʼoboʼ unaj u láaj xokikoʼob le kaʼapʼéel libroʼob kex ka okjaʼanakoʼob táanil tiʼ u tsʼoʼoksikoʼoboʼ. Beyoʼ maas yaan u jeetsʼel pʼáatloʼob ichil u jaajiloʼ (xok Colosasiloʼob 2:6, 7).

18. 1) Jeʼex u yaʼalik Yáax tiʼ Timoteo 4:16, ¿baʼax unaj k-beetik, yéetel baʼax utsil jeʼel u taaskeʼ? 2) ¿Baʼaxten unaj u meyajtoʼon le nuʼukuloʼob utiaʼal kaʼansajoʼ?

¹⁸ Toʼon, u j-jaajkunajoʼon Jéeobaeʼ, unaj k-kʼaʼaytik u jaajil tiʼ le máakoʼob utiaʼal ka yanaktiʼob le kuxtal minaʼan u xuuloʼ (Col. 1:5; xok 1 Timoteo 4:16). Utiaʼal k-beetkeʼ tsʼaʼantoʼon le nuʼukuloʼob utiaʼal k-kaʼansajoʼ (ilawil le cuadro « Nuʼukuloʼob utiaʼal kaʼansaj»). Unaj k-ilik u meyajtoʼon u maas maʼalobil ku páajtal. Cada juntúul j-kʼaʼaytaj kun tuklik máakalmáak nuʼukulil kun meyajtiʼ tiʼ tuláakal súutukil. Baʼaleʼ kʼaʼajaktoʼoneʼ maʼ chéen unaj k-tʼoxik publicacionoʼobiʼ. Mix xan unaj k-pʼatik tiʼ le máakoʼob maʼatech u yuʼubikoʼob le maʼalob péektsiloʼ. Le baʼax k-kaxtikoʼ «ka yanak kuxtal minaʼan u xuul tiʼ» le máaxoʼob u kʼáat u kanoʼob u jaajil yéetel kabal u yóoloʼob utiaʼal ka kʼuchuk u beetubaʼob disipuloil tiʼ Cristooʼ (Bax. 13:48; Mat. 28:19, 20).