MAPASALAMATON ko nga gipadako ko sa Kristohanong mga ginikanan, si Fred ug Edna Molohan, nga nagtudlo nako sa paghigugma kang Jehova. Dihang gipanganak ko niadtong 1934, sila aktibo nang mga Estudyante sa Bibliya (Saksi ni Jehova) sa 20 ka tuig. Ang among pamilya nagpuyo sa Parsons, usa ka gamayng lungsod sa habagatan sidlakang Kansas. Didto, halos mga dinihogan ang membro sa among kongregasyon. Ang among pamilya malipayon sa among naandang pagtambong sa mga tigom ug pagsangyaw. Sa Sabado sa hapon, sagad magsangyaw mi sa dalan nga gitawag karon ug publikong pagsangyaw. Usahay kapoyon mi, pero pirme ming tagaag ice cream ni Papa inigkahuman.

Ang among gamayng kongregasyon may dakong teritoryo nga nag-apil sa pipila ka gagmayng lungsod ug daghang umahan. Dihang mobisita mi sa mga mag-uuma, sagad among pabayloan ang among literatura ug mga utanon, itlog (nga gikan pa sa pugaran), o buhing mga manok. Kay miamot na daan si Papa para sa mga literatura, mahimo namong konsumo kini nga mga pagkaon.

May ponograpo si Papa ug Mama nga ilang gigamit sa pagsangyaw. Kay gamay pa ko kaayo, dili ko kaoperit ini, pero nalingaw ko sa pagtabang nila samtang ilang patokaron ang girekord nga mga pakigpulong ni Brader Rutherford diha sa ilang mga balikduaw ug Bible study.

Ang among 1936 Ford nga kotse gihimo ni Papa nga sound car, kotse nga gitaoran ug dakong speaker sa atop. Epektibo kaayo ni nga paagi sa pagsangyaw. Sagad, magpatokar unâ ug musika aron makuha ang atensiyon sa mga tawo, ug dayon magpatokar ug narekord nga pakigpulong sa Bibliya. Inigkahuman sa maong  rekording, tanyagan namog literatura ang mga interesado.

Sa gamayng lungsod sa Cherryvale, Kansas, gisultihan si Papa sa polis nga dili puwedeng mopuwesto ang sound car diha sa parke sa lungsod, diin daghan ang magrelaks kada Dominggo. Pero gitugtan ming mopuwesto sa gawas sa parke. Wala na mosupak si Papa. Iyang gibalhin ang kotse sa karsada atbang sa parke aron madunggan gihapon ang mensahe, ug gipadayon niya ang programa. Nianang mga panahona, eksayting kaayong makig-uban kang Papa ug sa akong kuya, si Jerry.

Sa hinapos sa katuigan sa 1930, miapil mi sa espesyal nga kampanya aron paspas nga sangyawan ang teritoryong daghag magsusupak. Mobangon mi una mohayag (sama sa among gihimo sa Joplin, Missouri) ug sekreto namong butangag mga tract o booklet ang ilawom sa pultahan sa mga balay. Human ani, magkita mi sa gawas sa siyudad aron mahibaloan kon duna bay nasakpan ug nadakpan sa polis.

Nianang mga tuiga, ang laing eksayting nga bahin sa among ministeryo mao ang gitawag ug information march. Aron isangyaw ang Gingharian, magsul-ob mig mga plakard ug magmartsa sa tibuok siyudad. Nahinumdom ko sa usa niana nga mga martsa sa among lungsod diin ang mga igsoon nagsul-ob ug plakard nga nag-ingon, “Ang Relihiyon Usa ka Lit-ag ug Panglimbong.” Nagbaktas silag mga 1.6 kilometros libot sa lungsod ug dayon mibalik sa among balay. Maayo na lang kay walay mibalda sa ilang pagmartsa, hinuon daghan ang nainteres sa ilang gibuhat.

Ang among pamilya sagad mobiyahe gikan sa Kansas ngadto sa Texas aron motambong sa mga kombensiyon. Kay nagtrabaho man si Papa sa Missouri-Kansas-Texas Railroad (nga nailhan pod ingong M-K-T, o Katy, Railroad), makasakay mi sa tren gamit ang iyang pases sa empleyado. Tungod ani, makabisita mi sa among mga paryente ug magkaubag tambong sa mga kombensiyon. Ang kuya ni Mama, si Fred Wismar, ug ang iyang asawa, si Eulalie, nagpuyo sa Temple, Texas. Batan-on pa si Uncle Fred dihang nakat-onan niya ang kamatuoran sa sayong katuigan sa 1900. Nagpabawtismo siya ug gisulti niya ang iyang nakat-onan sa iyang mga igsoon, apil kang Mama. Ilado siya sa mga igsoon sa tibuok central Texas, diin alagad siya sa sona kaniadto (karon nailhan ingong tigdumala sa sirkito). Siya mahinatagon, malipayon, ug makalingawng ikauban. Dasig kaayo siya, ug maayo gyod siyang impluwensiya nako sa batan-on pa ko.

Niadtong 1941, ang among pamilya misakayg tren padulong sa St. Louis, Missouri, para sa usa ka dakong kombensiyon. Ang tanang batan-on gipalingkod sa usa ka bahin sa estadyum aron maminaw sa pakigpulong ni Brader Rutherford nga nag-ulohang, “Mga Anak sa Hari.” Sa konklusyon sa iyang pakigpulong, ang matag usa namo nasorpresa sa regalong libro nga Children, nga gipanghatag ni Brader Rutherford ug sa iyang mga asistant. Kapig 15,000 ka batan-on ang nalipay niining espirituwal nga panalangin.

Niadtong Abril 1943, malipayon ming nanambong sa gamay pero nindot nga asembliya sa Coffeyville,  Kansas. Kini may temang “Awhag sa Paglihok.” Gipahibalo ang bag-ong eskuylahan​—ang Teokratikanhong Tunghaan sa Ministeryo—​nga himoon sa tanang kongregasyon. Ug gamiton niini ang gi-release nga booklet nga may 52 ka leksiyon. Sa ulahing bahin nianang tuiga, gihatag nako ang akong unang bahin. Espesyal pod to nga asembliya para nako kay ako ug ang duha pa nabawtismohan sa usa ka bugnaw, gamayng linaw sa duol nga uma.

Nahuman kog hayskul niadtong 1951 ug kinahanglan kong modesisyon bahin sa akong kaugmaon. Gusto gyod nakong mag-alagad sa Bethel, diin si Kuya Jerry nag-alagad kaniadto, maong nagpadala kog aplikasyon sa opisina sa Brooklyn. Nakapalig-on gyod sa akong espirituwalidad ang maong desisyon. Wala madugay, natawag ko sa Bethel ug nagsugod niadtong Marso 10, 1952.

Gusto unta nakong motrabaho sa imprentahan aron makatabang sa paghimog mga magasin ug literatura. Pero, giasayn ko ingong weyter ug sa ulahi, sa kosina. Nalingaw ko niini ug daghan kog nakat-onan. Busa wala gyod ko makatrabaho sa imprentahan. Bisan pa niana, kay pulipuli man ang among eskedyul sa kosina, usahay wala koy trabaho sa adlaw maong maka-personal study ko diha sa dakong librarya sa Bethel. Nakatabang ni nako nga mouswag sa espirituwal ug molig-on ang pagtuo. Nakadasig pod ni nako nga moalagad gyod kang Jehova sa Bethel kutob sa akong maarangan. Si Kuya Jerry migawas sa Bethel niadtong 1949 ug nagminyo kang Patricia, pero sa Brooklyn ra gihapon sila nagpuyo. Nakatabang ug nakadasig gyod sila nako dihang bag-ohan pa ko sa Bethel.

Wala madugay human sa akong pag-abot sa Bethel, may awdisyon aron dugangan ang listahan sa kuwalipikadong mga mamumulong sa Bethel. Ang mga brader nga nalista mobisita sa mga kongregasyon nga 322 kilometros gikan sa Brooklyn. Sila mopakigpulong ug mosangyaw uban sa kongregasyon. Pribilehiyo nakong maapil sa listahan. Bisag gikulbaan, gihatag nako ang akong unang pakigpulong, nga kaniadto tag-usa ka oras. Sagad magtren ko padulong sa mga kongregasyon. Nahinumdom ko sa usa ka tugnawng Dominggo sa hapon niadtong 1954. Misakay kog tren pabalik sa New York ug makaabot unta ko sa Bethel sayo sa gabii. Pero, nagbagyo nga nagdalag kusog nga hangin ug snow. Namatay ang dekoryenteng mga makina sa tren. Sa ulahi, nakaabot ra ang tren sa New York City mga alas singko sa buntag, pagka-Lunes. Gikan didto, misakay ko sa subwey paingon sa Brooklyn ug mideretsog trabaho sa kosina. Naulahi kog gamay ug gikapoy kaayo kay tibuok gabii kong walay tulog sa naaberya nga tren. Pero ang maong mga kalisdanan balewala ra sa kalipay nga makaalagad ug makailailag daghang igsoon niining espesyal nga weekend sa pag-alagad.

Sa unang mga tuig nako sa Bethel, gipaapil ko sa mga broadcast sa atong estasyon sa radyo, ang WBBR. Kaniadto, ang mga estudio naa sa ikaduhang andana sa 124 Columbia Heights nga bilding. Apil ko sa usa ka programa sa pagtuon sa Bibliya nga i-broadcast kada semana. Si Brader A. H. Macmillan, nga dugay nang membro sa pamilyang Bethel, pirmeng makigbahin niini nga mga programa sa radyo. Tawgon namo siyang Brader Mac. Maayo kaayo siyang sulondan namong batabatang Bethelite kay malahutayon siya sa pag-alagad kang Jehova.

Niadtong 1958, gidapit ko nga motrabaho sa Gilead School. Akong tabangan ang mga migraduwar sa pagkuhag mga visa ug akoy mohikay sa biyahe niining dasig nga mga igsoon. Mahal kaayo ang plete sa eroplano niadtong mga tuiga, maong pipila ra sa mga migraduwar ang mag-eroplano. Ang kadaghanan nga mibiyahe ngadto sa Africa ug Far East magsakay lang sa kargahanang mga barko. Dihang nagsugod ang pasaheroang mga eroplano, mibarato na ang plete ug wala madugay, kadaghanan sa mga misyonaryo mag-eroplano na.

Nadugangan ang akong trabaho niadtong 1960 dihang gihikay ang pagpakyaw ug mga eroplano gikan sa United States ngadto sa Europe para sa 1961 nga internasyonal nga mga kombensiyon. Misakay  ko sa biyahe gikan sa New York paingon sa Hamburg, Germany, para sa maong kombensiyon. Human sa kombensiyon, ako ug ang tulo ka Bethelite nangabang ug kotse ug mibiyahe gikan sa Germany ngadto sa Italy, ug mibisita sa sangang buhatan sa Rome. Gikan didto, miadto mi sa France, latas sa Pyrenees Mountains, ug ngadto sa Spain, diin gidili ang pagsangyaw. Nakadala mig pipila ka literatura, nga regalo kunohay, ngadto sa atong mga igsoon sa Barcelona. Lipay kaayo ming mailaila sila! Nagdrayb mi paingon sa Amsterdam, ug misakayg eroplano balik sa New York.

Mga usa ka tuig sa ulahi, apil sa akong asaynment sa Bethel ang paghikay ug mga biyahe para sa napiling mga delegado nga motambong sa espesyal nga serye sa internasyonal nga mga kombensiyon sa tibuok kalibotan. Kini mao ang “Walay Kataposang Maayong Balita” nga Asembliya niadtong 1963. Gihimo ang mga kahikayan para sa 583 ka delegado nga motambong sa mga kombensiyon sa Europe, Asia, ug South Pacific, dayon sa Honolulu, Hawaii, ug Pasadena, California. Apil sa ilang adtoon ang Lebanon ug Jordan para sa espesyal nga mga tour bahin sa kayutaan diha sa Bibliya. Gawas sa pag-eskedyul ug mga biyahe ug pag-book ug mga hotel, ang among departamento mao ang mokuha sa gikinahanglang mga visa.

Importante kaayo nako ang 1963 tungod sa laing nindot nga rason. Pagka-Hunyo 29, nagminyo mi ni Lila Rogers nga taga-Missouri, ug membro sa pamilyang Bethel sukad niadtong 1960. Usa ka semana human sa among kasal, kami ni Lila miapil sa tibuok kalibotang tour ug mibisita sa Greece, Egypt, ug Lebanon. Mibiyahe mi gikan sa Beirut ngadto sa usa ka gamayng erport sa Jordan. Kay gidili ang buluhaton didto ug gisultian mi nga dili hatagag visa ang mga Saksi ni Jehova, naghunahuna mi kon unsay mahitabo inig-abot namo didto. Pag-abot namo, nasorpresa kaayo ming makita ang grupo sa mga igsoon didto sa taas sa terminal nga may banner nga nag-ingon, “Malipayong Pag-abot mga Saksi ni Jehova”! Ug eksayting kaayong makita mismo ang kayutaan nga gihisgotan sa Bibliya! Gibisita namo ang mga lugar nga gipuy-an sa mga patriarka kaniadto, gisangyawan ni Jesus ug sa iyang mga apostoles, ug diin nagsugod ang pagkaylap sa Kristiyanidad hangtod sa kinatumyan sa yuta.​—Buh. 13:47.

Sa 55 ka tuig, maunongon nakong partner si Lila sa tanan namong asaynment. Kadaghan namong nabisita ang Spain ug Portugal dihang gidili pa ang buluhaton didto. Nadasig namo ang mga igsoon ug nakadala mig mga literatura ug ubang butang nga ilang gikinahanglan. Nabisita pa gani namo ang pipila ka igsoon nga napriso sa karaang kampo sa militar sa Cádiz, Spain. Nalipay kaayo ko sa pagdasig nila pinaagig pakigpulong.

Sukad niadtong 1963, pribilehiyo nako ang pagtabang sa paghimog mga kahikayan sa pagbiyahe para sa internasyonal nga mga kombensiyon sa Africa, Australia, Central ug South America, Europe, Far East, Hawaii, New Zealand, ug Puerto Rico. Dili gyod namo malimtan ni Lila ang among natambongang  mga kombensiyon, apil ang sa Warsaw, Poland niadtong 1989. Daghang igsoon gikan sa Russia ang nakatambong nianang dakong kombensiyon​—ang ilang unang higayon! Ubay-ubay sa among nakailang mga igsoon ang napriso sa Soviet Union sa daghang tuig tungod sa ilang pagtuo.

Makapalipay kaayo nga pribilehiyo ang pagbisita sa sangang buhatan sa lainlaing bahin sa kalibotan aron palig-onon ug dasigon ang mga pamilyang Bethel ug misyonaryo. Ang kataposan namong gibisita mao ang sangang buhatan sa South Korea. Didto nailaila namo ang 50 ka brader nga napriso sa Suwon. Sila positibo ug naglaom nga makaalagad pag-usab nga walay restriksiyon. Nakapadasig kaayo namo ang pag-ilaila nila!​—Roma 1:11, 12.

Nakita nako ang panalangin ni Jehova sa pag-uswag sa iyang katawhan sa milabayng mga tuig. Dihang nabawtismohan ko niadtong 1943, may mga 100,000 lang ka magmamantala, pero karon duna nay kapig 8,000,000 nga nag-alagad kang Jehova diha sa 240 ka kayutaan. Dakog natabang niini nga pag-uswag ang mga migraduwar sa Gilead. Makapalipay gyod ang pagtrabaho uban sa daghan niini nga mga misyonaryo sa milabayng katuigan ug pagtabang nila sa pagbiyahe paingon sa ilang asaynment!

Mapasalamaton ko nga sa batan-on pa ko nakadesisyon ko sa pagpauswag sa akong pag-alagad pinaagi sa pag-aplay sa Bethel. Gipanalanginan gyod ko ni Jehova. Nakapalipay gyod namo ni Lila ang pag-alagad sa Bethel. Gawas ana, sulod sa daghang katuigan nakapalipay namo ang pagsangyaw uban sa mga kongregasyon sa Brooklyn, diin daghan mig nasuod.

Padayon kong nag-alagad sa Bethel uban sa tabang ni Lila. Bisag kapin na ko sa 84 anyos, malipayon gihapon ko sa akong trabaho​—ang pagtabang sa pag-atiman sa mga sulat sa sangang buhatan.

Makapalipay kaayo nga mahimong bahin sa talagsaong organisasyon ni Jehova ug makita ang dakong kalainan tali niadtong nag-alagad niya ug niadtong wala. Mas masabtan nato ang giingon sa Malaquias 3:18: “Kamo makakita gayod pag-usab sa kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.” Matag adlaw nga molabay, makita nato ang anam-anam nga pagkahugno sa sistema ni Satanas, nga puno sa mga tawong walay paglaom ug dili tinuod nga malipayon. Pero ang nahigugma ug nag-alagad kang Jehova nagmalipayon​—bisan niining malisod nga panahon​—ug may seguradong paglaom sa umaabot. Pribilehiyo gyod nato ang pagsangyaw sa mensahe sa Gingharian! (Mat. 24:14) Hapit nang laglagon sa Gingharian sa Diyos kining daang kalibotan ug ilisag bag-ong kalibotan nga punog panalangin​—apil ang maayong panglawas ug kinabuhing walay kataposan. Nagpaabot gyod ta anang adlawa. Dayon, ang matinumanong mga alagad ni Jehova magmalipayon ug mabuhi sa walay kataposan.