AN FÈT an 1934. Fanmi an mwen, Frèd é Èdna Molohan té ja Étidyan a Labib (Témwen a Jéova) dépi 20 lanné. An kontan toubònman yo aprann-mwen enmé Jéova. Nou té ka rété Pawsòns, on ti vil o sidwès a Kannsas. Adan kongrégasyon an nou i té ni près yenki krétyen wen. Nou toujou té kay an réinyon é an prédikasyon. Nou té ni labitid ay préché an lari lé sanmdi aprémidi. Déparfwa nou té ka las, men papa toujou té ka achté on ti glas ban nou lè nou té fin.

Ti kongrégasyon an nou té ni on gran téritwa. Adan téritwa-la té ni plizyè ti vil é onlo èsplwatasyon agrikòl. Olyé sé moun a èsplwatasyon-la ban-nou lajan pou sé piblikasyon-la nou ba-yo la, yo té ka ban nou légim, zé toufré, oben poul si pyé. É sa té ka byen sèvi-nou pou manjé pas pap’an mwen pa té ni onlo lajan é i té ja péyé sé piblikasyon-la.

Fanmi an mwen prokiré-yo on toundis èvè pòtvwa é yo té ka itilizé-y pou yo préché. An té two piti pou sèvi èvè-y, men an té enmé édé-yo pasé diskou à frè Ritèwfòwd lè yo té ka viré vwè on moun oben lè yo té ka fè étid biblik.

Papa té ni on Fòwd 1936. I maré on gwo pòtvwa asi twa a vwati-la, kifè vwati an nou vin on vwati a opawlè. Sété on bon mwayen pou toutmoun tann palé dè Wayòm-la. Nou té ni labitid koumansé pa jouwé tibwen mizik pou atiré atansyon a sé moun-la, é aprésa nou té ka jouwé on diskou biblik. Lè diskou-la té fin, nou té ka lésé on lèkti ba moun ki té entérésé.

 On dimanch, Papa té ka woulé èvè vwati-la adan on pawk ki té ka touvé-y a Tchérivèl, on ti vil Kannsas. Lapolis di-y pa rété la, pas onlo moun té ka vin la pou yo té pé rèpozé-yo. Men i té pé mété-y andèwò a pawk-la. Alò Papa mèt vwati-la an lari-la owa pawk-la, konsa moun ki té an pawk-la té pé tann mésaj-la kanmenm. Sa té ka fè-mwen plézi pasé sé ti moman-lasa èvè pap’an mwen é gran frè an mwen Jéri.

Tibwen avan 1940, nou ay préché dé koté té ni onlo opozisyon. Kon an té ka di-zòt talè-la, nou té ka lévé anmitan lannuit é nou té ka mèt trak oben bwochi andous anba pòt a sé kaz-la. Aprésa nou té kay jwenn lézòt andèwò a vil-la pou vwè si lapolis pa té arété ponyonn adan nou.

Nou té enmé préché ondòt jan ankò. Nou té ka défilé adan sé vil-la èvè afich nou té ka pòté anlè nou. Nou té ka maché andan onlo vil pou fè sé moun-la konnèt Wayòm-la. An ka sonjé on jou, sé frè-la té vin an vil an nou èvè afich ki té maké : « Rèlijyon sé on pyèj é on konmès a lajan ». Yo pati dèpi kaz an nou, yo maché pannan apépré dé kilomèt adan vil-la, é yo viré akaz. Érèzman, ponmoun pa chèché-yo pwoblèm, okontrè, onlo moun té byen kontan gadé-yo maché konsa.

Asé souvan, fanmi an nou té ka pati o Tèksas pou nou ay lasanblé. Papa té ka travay pou konpani a chimendfè-la, kifè nou pa té ni ayen a péyé pou vwayajé. Safè, nou té pé ay lasanblé oben ay vwè dòt fanmi. Gran frè a manman, Frèd Wismar, é madanm a-y, Élali, té ka rété Tanp, o Tèksas. Tonton Frèd vin konnèt lavérité lè i té jenn. Sété tibwen apré 1900. I mété-y ka palé dè sa i té ka aprann ba tout frè é sè a-y é sé konsa manman tann osi. Sé frè-la ki té ka viv anmitan Tèksas té konnèt Tonton Frèd byen pas onlè i té sèwvitè a zòn (sèwvitè a siwkonskripsyon) koté-lasa. Sété on moun janti, toujou kontan, é i té enmé préché. I té vréman on bon ègzanp pou mwen.

An 1941, fanmi an nou pran tren-la pou nou ay adan on gran lasanblé a Senlwi o Misouri. Yo mandé tout sé jenn-la sizé ansanm toupré lèstrad-la pou yo kouté on diskou frè Ritèwfòwd té kay fè pou yo. Tèm a diskou-lasa sété « Timoun a Wa-la ». Lè diskou-la fin, on bèl kado té ka atann-nou : Frè Ritèwfòwd é sé frè-la ki té ka édé-y la, ba chak timoun on nouvo liv. Non a liv-la sété Timoun (angl.). Jou-lasa té ni pliski 15 000 timoun !

An avril 1943, nou ay lasanblé a Kofivil o Kannsas, tèm-la sété « An-nou pòté mannèv ».  Nou pa té onlo, men jousalè nou ka sonjé lasanblé-lasa. Sé la yo di-nou kè on nouvo lékòl té ké fèt adan tout sé kongrégasyon-la. Non a lékòl-lasa sété Lékòl pou ministè téokratik. Yo ban-nou osi on ti bwochi ki té ni 52 lèson adan-y, pou nou sèvi èvè-y pannan lékòl-la. Sé lanné-lasa an fè prèmyé sijé an mwen. Lasanblé-lasa té èspésyal ban mwen osi, pas sé la an pran batèm, ansanm èvè dòt frè é sè. Yo batizé-nou adan ma a on èsplwatasyon agrikòl ki té toupré. Dlo-la té fwèt !

Lè an fin lékòl an 1951, fò an té désidé ka an ké fè dè vi an mwen. Sa an té pli anvi sété travay an Bétèl-la, kon frè an mwen Jéri té fè. Sé pousa an voyé on dèmand onfwa-onfwa pou mwen té antré o Bétèl. Adan on ti moman yo té ja réponn-mwen é an koumansé travay an Bétèl-la lè 10 maws 1952. Sété vréman on bon désizyon pas sa édé-mwen sèvi Bondyé afon.

An té tèlman anvi travay la yo té ka enprimé liv é piblikasyon ! Men sa pa fèt. Olyé dè sa, yo voyé-mwen sèvi an sal a manjé é aprésa yo mèt-mwen an kuizin. An té byen enmé sé sèwvis-lasa é sa aprann-mwen onlo biten. Sé lè-la an té ka travay la té ka pèwmèt-mwen ni tan lib pannan lajouné pou étidyé an bibliotèk a Bétèl-la. Sa fè fwa an mwen vin pli fò, é lanmityé an mwen èvè Jéova vin pli solid ankò. É grasa sa, an té pi anvi sèvi Jéova ankò an Bétèl-la. É an té vlé fè-y toutotan an té pé. Jéri kité Bétèl-la an 1949 é i mayé èvè Patrisya. Men yo pa té ka rété two lwen, yo té Brouklin menm. Yo toujou édé-mwen é yo toujou ban-mwen kouraj lè an té toufré antré o Bétèl.

Lè an té sòti rivé an Bétèl-la, yo koumansé chèché frè pou yo té mété-yo asi on lis a frè kè Bétèl-la té ka voyé fè diskou. Sé frè-la yo té ka chwazi la té dwèt vizité plizyè kongrégasyon adan on lanné. O pli lwen yo té pé ay sé a 300 kilomèt dè Brouklin. Fò yo té fè on diskou é préché èvè kongrégasyon-la. Yo chwazi-mwen osi pou fè sa. Lè an bay prèmyé diskou an mwen a pa ti pè an té pè ! An tan-lasa diskou-la té ka diré inèdtan. An jénéral an té ka pran tren-la pou ay vwè sé kongrégasyon-la. An ka sonjé on dimanch aprémidi an 1954, té ni bon fwadi. An té pran on tren pou rètouné Nouyòk é an té sipozé rivé an Bétèl-la avan sétèdswa. Men on gwo tanpèt rivé èvè onlo onlo van é on bon enpé nèj. Akòz dè tan-la tout motè élèktrik a tren-la pran pann. Tren-la fin pa rivé Nouyòk lèlandèmen a senkèdmaten ! Rivé Nouyòk, an pran métro-la pou menné-mwen Brouklin, é an ay travay dirèktèman an kuizin-la. An té ni tibwen rèta é an té las toubònman pas an pa té dòmi pannan lannuit. Men tout sé problèm-lasa pa té ayen parapòt a lakontantman an té ka rèsanti lè an té ka sèvi sé kongrégasyon-la é lè an té ka kontré tousa frè é sè.

Odépa lè an rivé o Bétèl, chak simenn an té adan on émisyon ki té ka pasé asi radyo an nou. Non a radyo-la sété WBBR. Sé istidio a radyo-la té ka touvé-yo o dézyèm étaj a batiman-la ki té o 124 Kolonbya Hayts. An té ka jouwé wòl a on moun ka étidyé Labib. Souvan, frè Alèksandè Makmilàn, ki té ja o Bétèl dèpi lontan, té ka pawtisipé adan sé émisyon-lasa. Nou té ka kriyé-y frè Mak. I té vréman on bon ègzanp pou nou ki té dé jenn bétélit, pas i rété fidèl magré i jwenn onlo difikilté.

An 1958, an chanjé sèwvis, é an koumansé travay èvè frè é sè ki té ni diplòm a Lékòl a Galaad. Fò an té édé-yo ni viza a yo, é fò an té òwganizé vwayaj a sé frè é sè lasa ki té ka pòté bon mannèv an prédikasyon-la. Konm an tan-lasa vwayajé òbò aviyon té chè toubònman, sé misyonè-la plito té ka pati an bato pou ay an Afrik é an Azi. Déotwa lanné apré, lè pri a sé biyé la désann, sé misyonè-la vwayajé òbò avyon.

An 1960, yo mandé-mwen louwé aviyon pou délégé ki ka sòti o Zétazini ay an Éwòp. Konsa yo té’é pé ay adan sé lasanblé entèwnasyonal la ki té kay fèt an 1961. Mwen menm vwayajé òbò sila ki té kay Anbou an Almagn. Lè lasanblé-la fin, mwen é twa bétélit, nou louwé on vwati é nou travèsé Lalmagn pou ay an Itali. Nou vizité Bétèl-la a Ròm. Aprésa nou ay an Frans, nou travèsé sé montangn-la yo ka kriyé Lépiréné, é nou rivé an Èspangn, on péyi prédikasyon-la té entèwdi. Nou ba sé frè Bawsèlòn la piblikasyon nou té vlopé adan papyé kado pou sa pasé andous. A pa ti kontan nou té kontan vwè yo ! Aprésa nou roulé jis Amstèwdam pou nou té pran aviyon pou rantré Nouyòk.

An 1962 yo mandé-mwen òwganizé vwayaj a 583 frè é sè pou yo té pé sa alé adan plizyè lasanblé entèwnasyonal ki té ké fèt toupatou si latè. Sété lasanblé a 1963. Tèm a-y sété « Bon nouvèl étèwnèl la ». Sé délégé-la ay adan lasanblé an Éwòp, an Azi, an Pasifik di Sid, yo rivé jis Onolili a Away, é yo fin a Pasadéna an Kalifòwni. Yo vizité osi péyi kon Lèliban é Lajòwdani, koté Labib ka palé. Adan sèwvis-la an té yé la, nou té ka òwganizé sé vwayaj an aviyon la, nou té ka rézèwvé sé lotèl-la, é nou té ka chèché a ni sé viza-la.

Lanné 1963 té on lanné èspésyal ban mwen pou ondòt rézon ankò : an mayé èvè Lila Wòdjèrs lè 29 jen. I té sòti Misouri, é i té ja bétélit dépi twa lanné. On simenn apré nou mayé, mwen é Lila nou pati fè tou di mond la Bétèl-la té òwganizé la é ki té ja koumansé. Nou vizité Lagrès, Léjipt, é Lèliban. Nou kité Béwout an aviyon pou nou ay an Jòwdani. An péyi-lasa gouvènman-la té ka frenné aktivité an nou é yo pa té ka ba Témwen a Jéova viza pou yo antré an péyi-la. Kifè nou té ka mandé-nou ka ki ké pasé lè nou ké rivé. A pa ti kontan nou té kontan lè nou vwè on pakèt frè é sè doubout laréopò èvè on gran afich ki té maké : « Témwen a Jéova, nou kontan vwè-zòt ! » Nou vizité koté Abraam, Izaak é Jakòb té viv, é dòt koté Jézi èvè apòt a-y préché. Nou vizité osi koté larèlijyon krétyèn koumansé avan i répann-li toupatou si latè (Akt 13:47). Ti vizit-lasa té byen menm !

Sa ja ka fè 55 lanné kè Lila toujou ka soutyenn-mwen adan tout travay yo ban-mwen. Nou ay an Èspangn é o Pòwtigal plizyè fwa, an moman yo té ka défann-nou préché adan sé péyi-lasa. Nou té ka ankourajé sé frè é sè la é nou té ka pòté piblikasyon ba yo é dòt biten ankò yo té bizwen. Nou menm réyisi vwè  déotwa frè ki té lajòl Kadiks an Èspangn. A pa ti kontan an té kontan ba-yo fòs grasa on diskou an fè pou yo !

Dépi 1963, an òwganizé vwayaj pou lasanblé entèwnasyonal an Afrik, an Òstrali, an Amérik santral, an Amérik di Sid, an Éwòp, an Èstrèmoriyan, a Away, an Nouvèlzéland, é a Pòwtoriko. Mwen é Lila, nou ay adan anpil lasanblé nou pé’é jen oubliyé, kon tala ki fèt Vawsovi an Pològn an 1989. Onlo frè é sè ki té sòti Risi rivé vin adan gran lasanblé-lasa. Sété prèmyé fwa an vi a yo yo té ka vin adan on lasanblé ! Nou kontré onlo adan yo ki té fè lajòl parapòt a fwa a yo.

On dòt aktivité an vréman aprésyé, sété lè nou té kay adan sé Bétél-la toupatou si latè pou ankourajé sé frè é sè la é sé misyonè-la. Dènyé vizit nou fè konsa sété an Koré di Sid. Nou réyisi vwè 50 frè an nou ki té lajòl Siwòn. Sé frè-la té pozitif, é onsèl biten yo té ka mandé sé rèkomansé préché. Kontré sé frè-lasa ankourajé-nou onpil ! (Wom. 1:11, 12).

An vwè kijan pèp a Jéova grosi toubònman grasa bénédisyon a-y. Lè an pran batèm an 1943, nou té 100 000 pwoklamatè. Konnyéla nou plis ki 8 000 000 é nou adan 240 péyi é téritwa. Frè é sè ki fè Galaad pòté bon mannèv pousa. An té vréman kontan travay ansanm ansanm èvè tousa misyonè ! Sété on plézi édé-yo alé la yo té ka voyé-yo la !

A pa ti kontan an kontan an ba Jéova vi an mwen pannan jennès an mwen pou mwen té pé sèvi-y an Bétèl-la ! Jéova ban-mwen onlo bénédisyon toutolon a vi an mwen. Anplisdisa, mwen é Lila nou té enmé préché èvè sé kongrégasyon Brouklin la. Nou fè sa pannan plis ki 50 lanné é nou vin ni onlo bon zanmi.

An ka kontinyé travay o Bétèl é Lila ka soutyenn-mwen touléjou. Menmsi an ni 84 lanné si tèt an mwen, an kontan pas an pé toujou fè on travay ki itil, pa ègzanp an ka travay an sèwvis-la ki ka okipé-y dè sé lèt-la.

Sèvi Jéova adan òwganizasyon a-y sé on bèl biten toubònman ! Nou ka konprann plibyen sa ki maké adan Malaki 3:18 : « Zò ké vwè ankò diférans-la ant on moun ki jis é on moun ki méchan, ant on moun ki ka sèvi Bondyé é on moun ki pa ka sèvi-y. » Touléjou nou ka vwè jan mond a Satan ka dégrenné. Moun alantou an nou pa ni èspwa é pa ni kè-kontan. Pawkont, moun ki enmé Jéova é ki ka sèvi-y ka menné on bèl vi menmsi tan-la difisil. Anplisdisa yo ni on èspwa sèten pou dèmen. Préché bon nouvèl-la sé on gran lonnè ! (Mat. 24:14). Talè Wayòm a Bondyé ké détwi vyé mond-lasa é i ké fè latè vin on Paradi. Nou ka atann jou-lasa rivé menm ! Alò, toutmoun si latè ké ni on santé pawfè, yo ké ni kè-kontan é yo ké viv pou touttan.