MARAGSAKANAK ta dimmakkelak iti poder dagiti Kristiano a nagannakko, da Fred ken Edna Molohan, a nangimula iti pusok ti panagayat iti Dios. Idi nayanakak idi 1934, 20 a tawenen nga aktiboda nga Estudiante ti Biblia (Saksi ni Jehova). Aggigian ti pamiliami iti bassit nga ili ti Parsons, iti abagatan a daya a paset ti Kansas. Ti kongregasionmi sadiay ket dandani napulotan a Kristiano ti amin a miembrona. Maragragsakan ti pamiliami nga umatender iti gimong ken mangikasaba iti kinapudno iti Sao ti Dios. Kada malem ti Sabado, mangasabakami iti lansangan, kas awagmi idi iti publiko a panangasaba. Medio makabannog no dadduma, ngem agpa-ice cream ni Tatang no nalpasen ti panangasaba tapno mabang-arankami.

Dakkel ti teritoria ti bassit a kongregasionmi a buklen ti sumagmamano a babassit nga ili ken adu a kataltalonan kadagiti kaarruba a probinsia. No bisitaenmi dagiti mannalon, masansan nga isukatmi dagiti literaturami iti natnateng, itlog (kaal-ala iti pagitlogan), wenno uray manok. Gapu ta nakaiteden ni Tatang iti kontribusion para kadagiti literatura, kukuamin dagita a makan.

Nangala dagiti nagannakmi iti ponograpo, nga usarenda iti panangasaba. Bassitak pay idi isu a diak kabaelan nga usaren, ngem maragragsakanak a tumulong kada Tatang ken Nanang bayat nga ipatokarda dagiti nairekord a palawag ni Brother Rutherford kadagiti sarsarungkaran ken iyad-adalanda iti Biblia.

Pinagbalin ni Tatang ti luganmi a 1936 Ford kas sound car, nga adda dakkel nga ispiker iti ngatona. Epektibo daytoy a lugan iti panangiwaras iti mensahe ti Pagarian. Kaaduanna nga agpatokarkami nga umuna iti nairekord a musika tapno maalami ti atension dagiti tattao, sa ipatokarmi ti nairekord  a palawag maipapan iti Biblia. No nalpasen, ikkanmi dagiti interesado iti literatura.

Iti bassit nga ili ti Cherryvale, Kansas, imbaga dagiti polis ken Tatang a saan a maipalubos ti sound car iti uneg ti parke ti ili, a pagpalpaliwaan ti adu a tattao iti Domingo, ngem maipalubos iti ruar ti parke. Saan a nagreklamo ni Tatang ket inyakarna ti lugan iti kalsada a batog ti parke tapno mangngeg latta dagiti tattao iti parke ti mensahe ti Pagarian, sa intultuloyna ti agpatokar. Maragragsakanak a makikadua ken Tatang ken ni manongko a Jerry kadagita a gundaway.

Sakbay ti 1940, nangaramidkami iti espesial a kampania a napartak a panangwanas kadagiti teritoria nga adu ti bumusbusor. Agriingkami sakbay nga aglawag (kas iti inaramidmi idiay Joplin, Missouri) ken siuulimek nga agisuksokkami iti tract wenno bokleta iti sirok ti ridaw dagiti balay. Kalpasanna, agkikitakami iti ruar ti siudad tapno makita no adda tiniliw wenno inaresto dagiti polis.

Kadagidi a tawen, ti maysa pay a makapagagar a paset ti ministeriotayo ket ti aw-awagantayo iti mangimpormar a martsa. Tapno mayanunsio ti Pagarian, nangisuotkami kadagiti plakard sa nagliliniakami a nagmartsa iti siudad. Malagipko ti maysa kadagita a martsa iti ilimi bayat nga inusar dagiti kakabsat ti plakard a nakaisuratan ti “Religion Is a Snare and a Racket” (Ti Relihion ket Maysa a Silo ken Pananggundaway). Agarup maysa a milia (1.6 km) ti pinagnada iti tengnga ti ili sa nagsublida iti balaymi. Nasayaat ta awan ti bimmusor, no di ket adu nga interesado nga agpalpaliiw ti nasabatda.

Masansan nga agbiahe ti pamiliami manipud Kansas a mapan makikombension idiay Texas. Agtrabtrabaho idi ni Tatang iti Missouri-Kansas-Texas Railroad (pagaammo met kas M-K-T, wenno Katy, Railroad). Kas empleado, libre a makalugankami iti tren nga usarenmi ti pasesna, ket bisitaenmi dagiti kakabagianmi sa agkakaduakami a makikombension. Aggigian idi idiay Temple, Texas ni Angkel Fred Wismar, a manong ni Nanang, ken ti asawana a ni Anti Eulalie. Agtutubo ni Angkel Fred idi naammuanna ti kinapudno idi umuna a tawtawen ti 1900, nabautisaran, ken inranudna ti nasursurona kadagiti kakabsatna, a pakairamanan ni nanangko. Pagaammo isuna dagiti kakabsat iti intero a makintengnga a Texas, a nagserbianna idi kas zone servant (manangaywan iti sirkito itan). Nasingpet ken naragsak ket kanayon a makaparagsak ti makikadua kenkuana. Naregta para iti kinapudno, ken nasayaat ti impluensiana kaniak bayat ti kinaagtutubok.

Idi 1941, nagtren ti pamiliami a mapan idiay St. Louis, Missouri, para iti dakkel a kombension. Pinatugawda ti amin nga agtutubo iti espesial a seksion iti pasilidad tapno denggenda ti palawag ni Brother Rutherford a napauluan iti “Children of the King” (Annak ti Ari). Iti konklusion ti palawagna, nasorpresakami amin iti personal a regalo a baro a libro a Children, nga inyawat ni Brother Rutherford ken dagiti katulonganna. Nasurokkami a 15,000 nga agtutubo a nangtagiragsak iti daytoy a naespirituan a bendision.

 Idi Abril 1943, tinagiragsakmi ti bassit ngem makapabileg a “Call to Action” Assembly idiay Coffeyville, Kansas. Nayam-ammo ti baro a Teokratiko nga Eskuelaan ti Panagministro, a maaramid iti amin a kongregasion, sa nairuar ti bokleta nga addaan iti 52 a leksion a mausar iti dayta nga eskuelaan. Iti maudi a paset dayta a tawen, imparangko ti kaunaan a palawagko kas estudiante. Espesial kaniak dayta nga asamblea ta nabautisaranak a kaduak ti dadduma pay iti nalamiis a ban-aw iti asideg.

Nalpasko ti panageskuelak idi 1951 ket kasapulak ti agdesision para iti masanguanak. Tarigagayko ti agserbi iti Bethel, a dati a nagserbian ni manongko a Jerry, isu a dagus a naipatulod ti aplikasionko iti opisina idiay Brooklyn. Nagsayaat ti resulta daytoy a desisionko iti espiritualidadko. Alisto a naaprobaran ti aplikasionko, ket naawisak a mangrugi nga agserbi iti Bethel idi Marso 10, 1952.

Ekspektarek nga agtrabahoak iti printery tapno makiramanak iti panagaramid iti magasin ken literatura. Ngem waiter ti naited a trabahok ken naipanak idi agangay iti kosina, ket adu a banag ti nasursurok. Isu a diak pulos nakapagtrabaho iti printery. Ngem nagunggonaanak iti nabaliwan nga eskediul ti panagtrabaho iti kosina ta naaddaanak iti naulimek a gundaway iti aldaw a personal nga agadal iti dakkel a libraria ti Bethel. Timmulong daytoy iti naespirituan nga irarang-ayko ket timmibker ti pammatik. Bimmileg met ti determinasionko nga agserbi ken Jehova iti Bethel agingga a kabaelak. Rimmuar ni Manong Jerry iti Bethel idi 1949 ket nagasawada ken Patricia, ngem nagyanda iti lugar nga asideg ti Brooklyn. Kanayon a tultulongan ken parparegtaendak bayat ti immuna a tawtawen ti panagserbik iti Bethel.

Kalpasan unay ti isasangpetko iti Bethel, adda dagiti tryout tapno manayonan dagiti kakabsat a lallaki iti listaan dagiti pumapalawag a Bethelite. Nadutokan dagitoy a kakabsat nga agbisita iti kongregasion nga agingga iti 200 a milia (322 km) iti aglawlaw ti Brooklyn tapno mangipaayda iti palawag publiko ken mangasaba a kadua ti kongregasion. Maysaak kadagiti naikkan iti daytoy a pribilehio. Agnernerbiosak a nangipaay iti umuna a palawagko iti publiko, a maysa nga oras idi ti kapautna. Masansan nga agtrenak a mapan kadagiti kongregasion. Malagipko ti maysa a nalam-ek a malem ti Domingo idi 1954. Nagluganak iti tren nga agpa-New York ken ekspektarek a makasangpetak iti Bethel iti nasapa a rabii. Ngem nagbagyo iti nalamiis nga angin ken niebe. Nadadael dagiti makina ti tren. Ngem nakadanon met laeng ti tren iti estasion idiay New York City iti agarup alas singko ti bigat ti Lunes. Dagus a nag-subway-ak nga agpa-Brooklyn sa nagderetsoak a nagtrabaho iti kosina. Medio naladawak ken nabambannogak kalpasan ti agpatnag a panagtugawko iti naperdian a tren. Ngem bale awan dagita gapu iti ragsak ti panagserbi kadagiti kakabsat ken ti pannakaam-ammok iti nakaad-adu a gagayyem kadagitoy nga espesial a panagserbi iti ngudo ti lawas.

Bayat ti umuna a tawtawenko iti Bethel, naawisak a makipagtrabaho iti estasion ti radiotayo a WBBR. Adda idi dagiti estudiotayo iti maikadua a kadsaaran ti 124 Columbia Heights. Siak ti agakem iti maysa kadagiti karaman iti programa maipapan iti panagadal iti Biblia a linawas a maipatangatang. Regular a makiparpartisipar kadagitoy a programa ti radio ni Brother A. H. Macmillan, a nabayagen a miembro ti pamilia ti Bethel. Brother Mac ti nadungngo nga awag kenkuana, ket nakatulong kadakami nga ub-ubing a miembro ti pamilia ti Bethel ti ulidan ti panagibturna iti panagserbi ken Jehova.

Naawisak a makipagtrabaho iti Gilead School idi 1958. Tulongak dagiti naggraduar a mangala iti bisa ken iyurnosko ti panagbiahe dagitoy a nareregta a kakabsat a lallaki ken babbai. Nakanginngina idi ti plete iti eroplano, isu a sumagmamano laeng a naggraduar ti ageroplano. Barko a pangkargamento ti nagluganan ti kaaduan a nagbiahe iti Africa ken iti Makindaya nga Asia. Idi addan dagiti pangkomersial nga eroplano, limmaka ti plete ket idi agangay, kaaduanen a misionero ti ageroplano a mapan iti pakaibaonanda.

Nainayon a trabahok idi 1960 ti panangyurnos kadagiti panagbiahe iti eroplano manipud Estados Unidos nga agpa-Europa para kadagiti internasional a kombension idi 1961. Karamanak iti biahe manipud New York nga agpa-Hamburg, Germany, para iti dayta a kombension. Kalpasan ti kombension, nagrentakami iti lugan a kaduak ti tallo a Bethelite ket dimmalankami idiay Germany nga agturong idiay Italy. Bimmisitakami iti sanga nga opisina idiay Roma. Kalpasanna, nagturongkami idiay France, iti Kabambantayan ti Pyrenees, sa napankami idiay Spain, a pakaiparparitan idi ti trabahotayo. Nakaibatikami iti sumagmamano a literatura, a binungonmi kas regalo, para kadagiti kakabsat idiay Barcelona. Maragragsakanak a makaam-ammo kadakuada! Nagturongkami idiay Amsterdam, ket idiay a naglugankami iti eroplano nga agsubli idiay New York.

Agarup makatawen kalpasanna, karaman iti trabahok iti Bethel ti panangyurnos iti biahe dagiti napili a delegado kadagiti espesial a serye dagiti internasional a kombension iti intero a lubong. Daytoy ti “Agnanayon a Naimbag a Damag” nga Asamblea idi 1963. Nayurnos ti panagbiahe ti 583 a delegado tapno tabunuanda dagiti kombension idiay Europa, Asia, ken iti Abagatan a Pacifico, sa nagpatingga dayta idiay Honolulu, Hawaii, ken Pasadena, California. Karaman iti napananda ket ti Lebanon ken Jordan para iti educational tour kadagiti dagdaga ti Biblia. Inyeskediul ti departamentomi iti Bethel ti biaheda iti eroplano ken ti panagyanda iti hotel, kasta met ti panangala iti amin a bisa para iti idadagasda iti dadduma a pagilian.

Nakallalagip pay kaniak ti tawen 1963. Idi Hunio 29 dayta a tawen, nagkasarkami ken Lila Rogers a taga-Missouri, a tallo a tawen idin a miembro ti pamilia ti Bethel. Makalawas kalpasan ti kasarmi ken Lila, nag-tour-kami iti nadumaduma a nasion ket binisitami ti Greece, Egypt, ken Lebanon. Nageroplanokami manipud Beirut nga agturong iti bassit nga airport idiay Jordan. Gapu ta maiparit idi ti trabahotayo idiay Jordan ken naibaga kadakami a saan a maikkan iti bisa dagiti Saksi ni Jehova a sumrek iti dayta a pagilian, dimi ammo ti mapasamak inton makadanonkami. Naragsakankami ta idi simmangpetkami, adda grupo nga agur-uray iti ngato ti terminal ti airport a nakaiggem iti karatula a “Welcome Jehovah’s Witnesses”! Anian a makaparagsak a makita dagiti dagdaga ti Biblia! Binisitami dagiti lugar a nagnaedan idi dagiti patriarka, dagiti nangasabaan ni Jesus ken dagiti apostol, ken ti nangrugian ti Kristianidad a nagwaras agingga iti ungto ti daga.​—Ara. 13:47.

Ni Lila ti matalek a kaduak iti 55 a tawen iti amin nga annongek. Namin-adukami a nakapan idiay Spain ken Portugal idi maiparparit pay laeng ti trabahotayo kadagita a lugar. Pinaregtami dagiti gagayyem ken inikkanmi ida iti literatura ken dadduma pay a kasapulanda. Nabisitami pay dagiti naibalud a kakabsat iti daan a kampo ti militar idiay Cádiz, Spain. Nakaragragsakak ta naparegtak ida babaen ti palawag a naibatay iti Biblia.

 Manipud 1963, pribilehiok ti tumulong a mangyurnos iti panag-tour dagiti delegado kadagiti internasional a kombension idiay Africa, Australia, Sentral ken Abagatan nga America, Europa, Makindaya nga Asia, Hawaii, New Zealand, ken Puerto Rico. Natagiragsakmi ken Lila ti adu a nakallalagip a kombension, a pakairamanan ti naangay idiay Warsaw, Poland idi 1989. Dayta ti damo a kombension ti adu a kakabsat a Russian! Naam-ammomi ti sumagmamano a kakabsat a lallaki ken babbai a naibalud iti adu a tawen kadagiti pagbaludan iti Soviet gapu iti pammatida.

Maragragsakanak iti pribilehio a bumisita kadagiti sanga nga opisina iti intero a lubong tapno pabilgen ken paregtaen dagiti pamilia ti Bethel ken dagiti misionero. Iti maudi nga ibibisitami iti sangay iti South Korea, naam-ammomi ti 50 a kakabsattayo a nakabalud idiay Suwon. Positiboda ken magagaranda a makiraman manen iti ministerio. Makaparegta unay ti pannakaam-ammomi kadakuada!​—Roma 1:11, 12.

Napaliiwko no kasano a rimmang-ay ti ili ni Jehova gapu iti bendisionna iti panaglabas dagiti tawen, manipud agarup 100,000 nga agibumbunannag idi nabautisaranak idi 1943 agingga iti nasurok a 8,000,000 itan nga agserserbi ken Jehova iti 240 a dagdaga. Kangrunaanna a resulta daytoy ti trabaho a panangasaba nga indauluan dagiti naggraduar iti Gilead. Nakaragragsak ti makipagtrabaho iti adu kadagitoy a misionero ken tumulong kadakuada a mapan iti pagilian a nakaibaonanda!

Agyamyamanak iti desisionko a mangpalawa iti ministeriok idi agtutuboak babaen ti panangipasak iti aplikasion nga agserbi iti Bethel. Binendisionan ni Jehova ti tunggal addang nga inaramidko. Malaksid iti naragsak a panagserbimi ken Lila iti Bethel, adu a dekada a kaduami iti ministerio dagiti kongregasion iti Brooklyn, nga adu kadakuada ti gagayyemmi agingga ita.

Agtultuloy ti panagserbik iti Bethel iti inaldaw a suporta ni Lila. Uray no nasuroken nga 84 ti tawenko, maragragsakanak latta nga agtrabaho, a tumulong a mangasikaso kadagiti surat ti sangay.

Nakaragragsak ti agbalin a paset ti naisangsangayan nga organisasion ni Jehova ken ti makakita iti nagdakkel a nagdumaan dagiti agserserbi ken Jehova ken dagiti saan nga agserserbi kenkuana. Ad-adda a maawatantayo ti kuna ti Malakias 3:18: “Sigurado a makitayonto manen ti pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.” Iti tunggal aldaw nga aglabas, makitatayo nga agsisina ti sistema ni Satanas, a napno iti tattao nga awanan iti namnama ken saan a naragsak. Ngem naragsak ti biag dagidiay mangay-ayat ken agserserbi ken Jehova—uray kadagitoy napeggad a tiempo​—ken addaanda iti sigurado a namnama iti masanguanan. Nagsayaat a pribilehio nga ipakaammo ti naimbag a damag ti Pagarian! (Mat. 24:14) Ur-urayentayo ti aldaw, nga asidegen, inton pagpatinggaen ti Pagarian ti Dios daytoy daan a lubong ken iyegna ti baro a lubong a pakatungpalan dagiti inkarina a bendision, a pakairamanan ti perpekto a salun-at ken agnanayon a biag. Iti kasta, agbiagton nga agnanayon dagiti matalek nga adipen ni Jehova ditoy daga.