N NASE na anu 1934. Nha pai ku nha mai txomaba Fred i Edna Molohan. Dja tinha 20 anu ki es éra Studantis di Bíblia (Tistimunhas di Jeová). N sta kontenti pamodi es inxina-m ama Jeová. Nu ta moraba na Parsons, un sidadi pikinoti na Kansas. Kuazi tudu irmons na nos kongregason éra kristons skodjedu ku spritu santu. Nos família sénpri ta baba runion i pregason. Tudu sábadu di tardi nu ta fazeba pregason na rua. Oji nu ta txoma-l di tistimunhu pa públiku. Alvês nu ta fikaba kansadu, má dipôs di pregason nha pai ta lebaba nos pa nu ba kumeba jeladu.

Nos kongregason éra pikinoti, má el tinha un tiritóriu grandi ki ta inkluiba txeu sidadi pikinoti i tanbê txeu lugar di plantason. Óras ki nu ta ba pregaba na kes lugar di plantason, kes algen sénpri ta trokaba publikason ku verdura, ovu frésku (ki panhadu kel óra na ninhu) ô ti galinha bibu. Nha pai dja fazeba kontribuison pa kes publikason. Pur isu, nu ta fikaba ku kes kumida.

Nha pai ku nha mai ranja un fonógrafu pa nu uzaba na pregason. Ami éra pikinoti dimás pa uzaba el. Má N gostaba di djudaba nha pai ku nha mai óras ki es ta poba diskursu di irmon Rutherford na revizitas i na studus di Bíblia.

Nha pai poi un altifalanti riba di nos karu. Asi el bira un karu di son. Kel-la éra un bon manera di spadja notísias sábi di Reinu. Primeru nu ta poba un múzika pa txomaba pesoas atenson. Dipôs nu ta poba un diskursu di Bíblia. Óras ki diskursu findaba nu ta ofereseba publikason pa kes algen ki mostra interesi.

Na Cherryvale un sidadi pikinoti di Kansas, nha pai para karu di son déntu di un parki, undi txeu algen ta ba divirtiba na dumingu. Nton pulísia bai na nha pai i el fla-l ma el pode  uza karu má fóra di parki. Sen reklama nha pai leba karu di son pa un rua ki ta fikaba frenti di parki. Asi tudu algen ki staba déntu di parki konsigi obi dikursu. N gostaba txeu di kes momentu ki N ta staba djuntu ku nha pai i ku Jerry, nha irmon más grandi.

Na fin di anus 30, nu faze kanpanhas spesial di pregason na kes tiritóriu ki tinha txeu opozison. Nu ta labantaba di madrugada (sima nu ta fazeba na Joplin, na Missouri ) i sen faze barudju nu ta poba folhetus baxu pórta di kes kaza. Dipôs nu ta bai nkontraba fóra di sidadi pa odja si pulísia ka pega ningen.

Un otu fórma di pregason ki éra sábi na kel ténpu éra tistimunhu ku kartás na rua. Nu ta bistiba kes kartás i nu ta andaba na fila pa sidadi interu ta aviza sobri Reinu. N ta lenbra un di kes marxa ki irmons faze i es tinha un kartás ki ta flaba “A Religião É Laço e Extorsão”. Es anda más di 1,5 km na sidadi i dipôs es volta pa kaza. Inda ben ki ningen ka tenta inpidi kel marxa, má el txoma atenson di txeu algen ki mostra interesi.

Nhas família txeu bês ta viajaba di Kansas pa Texas pa bai sisti kongrésus. Nha pai ta trabadjaba na un enpréza di konboiu. Pur isu, nu ta viajaba di grasa óras ki nu ta ba vizitaba nos família i sisti kongrésu djuntu ku es. Kel irmon más grandi di nha mai ki txomaba Fred Wismar i se mudjer, Eulalie, ta moraba na Temple na Texas. Tiu Fred prende verdadi na komésu di anus 1900, kantu el éra jóven. El batiza i el prega pa tudu se irmons, i pa nha mai tanbê. El éra enkaregadu di grupu di kongregason (ki na kel ténpu éra sérvu di zóna). Pur isu, kes irmon ki ta moraba na zónas di séntru di Texas konxeba el dretu. Tiu Fred éra un bon ómi, el éra kontenti i divirtidu. El ta amaba verdadi i el foi un bon izénplu pa mi kantu N staba jóven.

Na anu 1941, nos família viaja na konboiu pa St. Louis, un sidadi ki ta fikaba na Missouri, pa ba sisti un grandi kongrésu. Tudu jóven konvidadu pa bai xinta djuntu na un lugar pértu di palku ki guardadu pa es. Éra más di 15 mil jóven! Dipôs, irmon Rutherford faze diskursu ku téma: “Filhos do Rei”. Na fin di se diskursu tudu kes jóven dadu un prezenti, un novu livru ku téma: Filhos. Rutherford i otus irmon da kada un di nos un livru.

Na abril di 1943, nu sisti un asenbleia ku téma: “Chamada à Ação”, na sidadi di Coffeyville, na Kansas. Na kel asenbleia, avizadu ma Escola do Ministério Teocrático ta kumesa ta fazedu na tudu kongregason. Tanbê lansadu un livru pikinoti di 52 lison pa uzaba na kel skóla. Na kel mésmu anu, N faze nha  primeru diskursu di studanti. Kel asenbleia tanbê foi spesial pa mi, pamodi mi ku más alguns publikador, nu batizadu na un agu friu dimás na un lagu di un lugar di plantason ki ta fikaba pértu di kel lugar di asenbleia.

N finda skóla na anu 1951 i N tinha ki pensaba dretu kuzê ki N ta fazeba ku nha vida. Nha irmon Jerry dja sirbiba na Betel. Ami tanbê N tinha gana di sirbiba na Betel. Nton N prenxe un pitison i N manda pa skritóriu na Brooklyn. Lógu dipôs N konvidadu pa Betel i N kumesa ta trabadja dia 10 di marsu di 1952. Kel-li foi un bon disizon ki N toma pamodi el djuda-m sirbi Jeová más midjór.

N krê ba trabadjaba na lugar di inprimi nos revista i otus publikason. Má nunka N ka faze kel trabadju la. Nton N mandadu ba trabadja na lugar di kume i dipôs na kuzinha. N gostaba txeu di es trabadju i N prende un monti kuza. Nu ta trabadjaba pa turnu i sénpri N tinha algun ténpu duránti dia. Pur isu N ta ba studaba na kel bibliotéka grandi di Betel. Kel-li djuda-m ten un fé más fórti i ser más amigu di Jeová. I tanbê N fika ku más vontadi di kontinua ta sirbi na Betel pa ténpu ki daba. Jerry sai di Betel na anu 1949 i el kaza ku Patricia, má es ta moraba pértu di Betel na Brooklyn. Es djuda-m i es da-m txeu forsa duránti kes primeru anu na Betel.

Lógu dipôs ki N txiga Betel, kumesa ta djobedu más algen pa entra na lista di kes irmon ki ta faze diskursu na Betel. Es ta mandaba kes irmon pa vizitaba kongregasons ki ta fikaba uns 320 km di Brooklyn. Es ta fazeba un diskursu pa públiku i es ta saíba na pregason djuntu ku kongregason. Ami éra un di kes ki skodjedu pa faze kel-li. N ta fikaba nervozu óras ki N ta fazeba kes vizita i kes diskursu pa públiku. Na kel ténpu diskursu ta duraba un óra. Normalmenti N ta baba kongregason di konboiu. N ta lenbra dretu, un dumingu di tardi, na invérnu di 1954, N panha un konboiu pa N torna volta pa Nova York i N pensa ma N ta txigaba antis fika noti. Má kontise un tenporal txeu fórti di béntu ku névi. Konboiu para di funsiona i sô el konsigi txiga Nova York sugunda-fera 5 óra di palmanhan. N dixi di konboiu N torna panha otu konboiu ti Brooklyn i N bai dirétu pa trabadju na kuzinha. N staba un poku atrazadu i txeu kansadu pamodi N ka durmi nada kel noti. Má bale péna faze kalker sakrifisiu pa djuda kongregasons i konxe txeu novu irmon.

Na kes primeru anu na Betel, N konvidadu pa N partisipa na prugrama di rádiu WBBR. Kes lugar di gravason ta fikaba na sugundu andar di prédiu nunbru 124 di Columbia. Un di kes prugrama di rádiu éra studu di Bíblia ki es ta daba tudu simana. Ami éra un di kes partisipanti. Irmon A. H. Macmillan ki éra un menbru antigu di família di Betel, tanbê ta partisipaba na kes prugrama di rádiu. Es ta txomaba el irmon Mac, el foi un algen ki aguenta firmi na sirvisu di Jeová. El foi un bon izénplu pa nos ki éra kes más jóven na família di Betel.

Na 1958 N konvidadu pa trabadja ku alguns asuntu ligadu ku Skóla di Jiliádi. N tinha ki djudaba kes alunu konsigi vistu i pasaji pa es bai pa ses diziginason. Na kel ténpu pasaji di avion éra karu dimás. Sô alguns alunu ki ta baba di avion. Kuazi tudu kes alunu ki mandadu pa Áfrika ô pa Orienti, ta baba na barku di karga. Dipôs di alguns anu, kantu pasaji fika más baratu, kuazi tudu misionárius fika ta bai di avion pa ses diziginason.

Na 1960, nha trabadju ta nvolveba djobe pasajis di Mérka pa Europa pa kongrésus internasional di 1961. N pruveta un di kes viaji N bai sisti kongrésu na Hamburg, Alimanha. Dipôs di kongrésu, mi ku más três betelita nu luga un karu i nu bai di Alimanha pa Itália, i nu vizita sédi na Roma. Dipôs ki nu sai di la, nu bai Fransa, nu pasa pa kes montanha di Pireneus i nu entra na Spanha. Na kel ténpu, trabadju di Tistimunhas di Jeová staba proibidu na Spanha. Nu nkontra ku alguns irmon na Barsilona i nu da-s txeu publikason inbrudjadu na papel di prezenti pa ka dadu kónta. Nu fika txeu kontenti di odja-s! Di la, nu bai Amsterdã, nu panha avion i nu volta pa Nova York.

Na 1962 N diziginadu pa kuida di viaji di irmons ki sta ba sistiba un grupu di kongrésus internasional na txeu país. Éra asenbleia ku téma: “Boas Novas Eternas”, di 1963. Skodjedu 583 irmon pa bai sisti kongrésu na Europa, Ázia, na Pasífiku Sul, dipôs es ta findaba viaji na Honolulu, Havaí i na Pasadena, Califórnia. Na kel viaji li, es ta paraba na Líbanu i na Jurdon pa es vizitaba kes téra ki Bíblia ta pâpia di es. Alén di kuidaba di viaji i di lugar pa fika na otel, nos dipartamentu na Betel konsigi vistu pa tudu kes país ki nos irmons ta pasaba.

Anu di 1963, foi txeu inportanti pa mi pamodi kontise un kuza bon dimás. Na dia 29 di junhu N kaza ku Lila Roger ki éra di Missouri. Dja el tinha três anu na Betel. Un simana dipôs ki nu kaza, nu viaja djuntu ku un grupu di irmons ki bai sisti kongrésu i ki dipôs sta ta vizitaba otus país. Nu pasa pa Grésia, Ijitu i Líbanu. Nu faze un viaji kurtu di Beiruti i nu dixi na aeroportu di Jurdon. Nos irmon tinha poku liberdadi la i es fla ma Tistimunhas di Jeová ka ta podu vistu pa entra na kel país. Má nu fika dimiradu kantu nu odja un grupu di irmons na aeroportu ku kartás ki ta fla: “Nu sta kontenti di resebe nhos, Tistimunhas di Jeová”! Nu fika txeu kontenti di odja di pértu kes téra ki Bíblia ta pâpia di el. Nu pasa pa kes lugar undi Abraon, Izaki i Jakó vive. I tanbê undi ki Jizus i se apóstlus pregaba i undi ki kristons kumesa ta spadja ‘pa tudu kantu di mundu.’ — Atus 13:47, BPK.

Dja ten 55 anu ki Lila, nha kunpanhera lial, sta ta kunpanha-m na tudu nhas diziginason. Nu vizita Spanha i Purtugal, na ténpu ki nos óbra staba proibidu. Nu konsigi nkoraja irmons ku irmans, nu da-s publikason i otus kuza ki es mesteba. Tanbê nu konsigi vizita alguns irmon ki staba prézu na Cádiz, na  Spanha. N fika txeu kontenti pamodi N konsigi faze un diskursu di Bíblia ki da-s koraji.

Désdi 1963, N tevi priviléjiu di djuda na organiza viaji pa kongrésus internasional. Na Áfrika, Austrália, Mérka Sentral, Mérka di Sul, Europa, Orienti, Havaí, Nova Zilândia i Portu Riku. Mi ku Lila, nu konsigi sisti txeu kongrésu ki ka ta da pa skese, sima kel di Varsóvia na Pulónia, na 1989. Txeu irmon di Rúsia konsigi sisti kel grandi kongrésu pa primeru bês na ses vida! Nu konxe txeu irmon ku irman di União Soviética ki pasa txeu ténpu na kadia pamodi ses fé.

Un otu diziginason ki da-m txeu alegria é vizita i nkoraja famílias di Betel i misionárius na txeu párti di mundu. Na nos últimu vizita na sédi di Koreia di Sul, nu konxe 50 irmon ki staba prézu. Tudu es staba animadu i ku gana di sai di kadia pa es torna sirbi Jeová. Kel runion ki nu faze ku es da-nu txeu koraji! — Rom. 1:11, 12.

N odja modi ki Jeová abênsua se povu duránti tudu kes anu li. Kantu N batiza na 1943, tinha uns 100 mil publikador. Oji ten más di 8 milhon di algen ta sirbi Jeová na 240 país. Kel trabadju duru ki kes irmon ki bai Skóla di Jiliádi faze, djuda txeu na kel omentu li. N ta fika txeu kontenti pamodi N trabadja djuntu ku txeu di kes misionáriu i N djuda-s txiga na ses diziginason!

N sta txeu kontenti pamodi N disidi prenxe pitison pa trabadja na Betel kantu mi éra jóven. Jeová abensua-m txeu duránti tudu kes anu li. Alén di alegria ki nu ta xinti di trabadja na Betel, mi ku Lila, nu fika kontenti di trabadja na pregason djuntu ku alguns kongregason na Brooklyn pa más di 50 anu. Nu ten grandis amigu la.

Ti inda N sta ta sirbi na Betel dia interu ku ajuda di Lila. N tene 84 anu, má N ta fika kontenti pamodi N ta konsigi trabadja i N ta djuda na kuida di e-mail ki ta mandadu pa Betel.

N sta txeu kontenti di faze párti di organizason bunitu di Jeová. Nu ta konsigi ntende más klaru palavras ki sta na Malaquias 3:18 : ‘Nhos ta torna ben odja diferénsa entri un algen justu i un algen mau, entri ken ki ta sirbi Deus i ken ki ka ta sirbi-l.’ Tudu dia nu sta ta odja ma mundu di Satanás sta bira kada bês más piór, pesoas ka tene speransa i es é ka filís. Má, kes ki ta ama Jeová i sta sirbi-l ten un vida filís sikrê nu sta ta vive na ténpu difísil. Nu ten un speransa pa futuru. Pur isu é un priviléjiu pâpia ku otus algen sobri notísias sábi! (Mat. 24:14) Ka ta dura, Reinu di Deus ta ben kaba ku kel mundu li, i Téra ta ben bira un paraízu. Fórti nu tene gana pa kel dia txiga! Tudu algen na Téra ta ben ten bon saúdi i es ta vive filís pa tudu ténpu.