1, 2. I ng’ei tho pa Musa, Mungu umio tic ma kani ni Yocuwa?

I NG’EI tho pa Musa, Yehova uyero ni Yocuwa kumae: “Musa ma jatic para tho; ka kumeno kawono ai malu, kadh loka Yordan maeni, in, ku dhanu maeni ceke, ba ng’om m’amio igi.” (Yoc. 1:1, 2) Eno ubino alokaloka ma lee dit ni Yocuwa, pilembe pi oro ma romo 40, ebino jakony pa Musa!

² Musa utelo wi thek mir Israel pi rundi ma dupa, ento kawoni Yocuwa re m’ubecidoko jatelwic migi. Pieno, saa moko nyo epenjere ka nyo andha thek maeno biyio ebed jatelwic migi. (Poi. 34:8, 10-12) Jararieko moko ma koro i Biblia uwacu pi Yocuwa 1:1, 2 nia, ugambre con nitundo tin, ka juwilo jatelwic mi thek moko, eno bedo igi saa ma rac man mir ariti ma lee.

3, 4. Mungu umio mugisa ma kani ni Yocuwa pilembe ejengere i wie, man wacopo penjara ku penji ma kani?

³ Yocuwa ubino ku lworo dre. Re ejengere iwi Yehova man elubo telowic pare. (Yoc. 1:9-11) Pieno, Mungu umio ire mugisa, man eoro malaika utel wie karacelo ku nyithindho mir Israel. Wacopo paru ma jiji mbe nia malaika maeno ubino Lembe, niwacu Wod Mungu ma kayu.​—Ai 23:20-23; Yoh. 1:1.

 ⁴ Yehova ukonyo nyithindho mir Israel kara gitund ning’iyo kud alokaloka ma ginwang’iri ko kinde ma Yocuwa udoko jatela migi ma nyen. Tin eni de, alokaloka ma dongo ubetimere i dilo pa Mungu. Dong’ wacopo penjara kumae: ‘Calu ma dilo pa Mungu ubecidho i wang’e, pirang’o wacikara nibedo ku genogen iwi Yesu ma en e Jatelwic mwa?’ (Som Matayo 23:10.) Pi nidwoko wang’ penji maeno, wabing’io kite ma Yehova utelo ko wi dhanu pare i rundi ma con i saa mir alokaloka.

5. Yocuwa unwang’ere ku lembe ma kani mir udu ceng’ini kud adhura mi Yeriko? (Nen cal mir acaki.)

⁵ Nyanok i ng’ei ma nyithindho mir Israel gikadhu kulo Yordan, Yocuwa unwang’ere i wang’ udu moko. Erombo ku ng’atu moko m’umaku palamularu i cinge ceng’ini kud adhura mi Yeriko. Yocuwa ugam upenje kumae: “In i jabang’wa, kadi i jaba judegi mwa?” Edwoko ni Yocuwa nia en e “jaditmawijo mir udul pa Yehova,” niwacu malaika m’ubino ayika nikiedo pi dhanu pa Yehova. Dwokowang’ lembe maeno uwang’u i Yocuwa lii. (Som Yocuwa 5:13-15.) Kadok nwang’u i verse moko juyero nia Yehova re m’ubino weco i bang’ Yocuwa de, re ubenen nia eweco kude nikadhu kud i bang’ malaika moko, calu m’ebed etimo yor i wang’e.​—Ai 3:2-4; Yoc. 4:1, 15; 5:2, 9; Tic. 7:38; Gal. 3:19.

6-8. (a) Pirang’o telowic moko ma malaika umio ukeunen ni lembe ma winjere ngo? (b) Ang’o m’unyutho nia telowic maeno ubino telowic mi rieko, man etundo i saane? (Nen korolembe m’i there.)

⁶ Malaika ukoro tap tap lembe ma Yocuwa ucikere nitimo pi ninyotho adhura mi Yeriko. Copere telowicne moko ukeunen ni lembe ma winjere ngo. Ku lapor, malaika uwacu ni Yocuwa nia etim yaa i kum juaskari pet. Eno nyutho nia gibibedo mbe ku copo mi kiedo lwiny pi nindo moko. Nyo eno ubino saa ma cuu mi timo yaa i kum juaskari?​—Tha. 34:24, 25; Yoc. 5:2, 8.

⁷ Saa moko nyo juaskari de gipenjiri kumae: ‘Wabigwoko juruot mwa nenedi ka judegi bicoro i wiwa?’ Re lembe ma rek ugam uwok! Kakare nitugo lwiny i dhu nyithindho mir Israel, akpal re m’ung’oi i dhanu mi Yeriko. Biblia uwacu kumae: “Adhura Yeriko twire ndhu ni kum nyithindho mir Israel: ng’atu moko mbe m’uwok woko, ng’atu moko mbe de m’umondo i ie.” (Yoc. 6:1) Kinde ma Juisrael giwinjo lembuno, ma jiji mbe gigeno telowic pa Mungu dong’ nisagu!

⁸ Malaika uwacu bende ni Yocuwa nia nyithindho mir Israel kud gitug lwiny i dhu dhanu mi Yeriko. Ento gidhok adhura adhoka wang’ acel kubang’ nindo, man gitim kumeno pi nindo abiro. Nwang’u juaskari gicopo paru nia, ‘lwiny tie lwiny, utie dhoko adhura ngo!’ Nwang’u gicopo paru bende nia, ‘wabecibayu saa ku kero mwa mananu!’ Ento Jatelwic migi ma Yehova ugam ung’eyo cuu dit thelembe m’uketho emio telowic maeno. Calu ma nyithindho mir Israel gilubo telowicne, yioyic migi udoko tek. Bende gidong’ gikiedo ngo i dhu juaskari mi Yeriko.​—Yoc. 6:2-5; Ebr. 11:30. *

9. Pirang’o wacikara nilubo telowic moko ci ma dilo pa Mungu bemio? Kemii macal moko.

⁹ Lembakora maeni ubeponjowa ku lembang’o? Saa moko dilo pa Yehova copo caku timo lembe i ayi ma nyen, man wacopo nyang’ ungo i thelembene. Ku macal, saa moko nyo i wang’e, ibed iparu ngo pi bero mi tio ku jamtic mir elektronik, calu ve  telefon kunoke tablette pi ponji peri ma segi, i lembanyong’a, man i coko mwa. Re cicopere nia kawoni ibeneno berone. Ka wabeparu iwi adwogi ma beco mir alokaloka ma kumeno, yioyic mwa doko tek man kindwa doko ceng’ini magwei kud umego ku nyimego mwa.

10. I rundi ma kwong’a, ng’a m’utelo wi lembe kara guriri m’utelowic re m’uyik lembe m’unyol iwi timo yaa?

¹⁰ Kago oro 13 i ng’ei ma Kornelio m’ubino ng’atu mi thekdhanumange ma jutimo ngo yaa i kume udoko Jakristu, Jukristu moko ma Juyahudi gibino yero asu nia timo yaa pire tie tek. (Tic. 15:1, 2) Ku lapor, umego mir adhura mir Antiokia gibino winjiri ngo i kindgi pi lembe maeno. Pieno, judong cokiri gimaku yub nia jakwenda Paulo uter lembene i wang’ guriri m’utelowic i Yerusalem. Re i andha ca ng’a m’ucwale nicidho? Paulo ukoro kumae: “Aidho ni kum nyuth ma Mungu nyutho.” M’umbe jiji, Kristu re m’utelo wi lembe, kara guriri m’utelowic re m’uyik lembe m’unyol iwi timo yaa.​—Gal. 2:1-3.

11. (a) Jukristu moko ma gi Juyahudi gibino ku nen ma kani iwi timo yaa? (b) Paulo utimang’o pi ninyutho nia ediko cinge ku judong cokiri mi Yerusalem? (Nen korolembe m’i there.)

¹¹ Kristu ukonyo guriri m’utelowic nikoro terere nia, pire tie tek ungo ni Jukristu ma Juyahudi ngo nia gitim yaa kokoro. (Tic. 15:19, 20) Asu oro moko i ng’eye, Jukristu ma pol ma gi Juyahudi gimediri nitimo yaa i kum awiya migi ma co. I kind saa maeca, judong cokiri m’ubino i Yerusalem giwinjo woi moko nia Paulo ubeworo ngo Cik pa Musa. Pieno, gikwayu Paulo utim lembe moko ma binyutho nia ebeworo Cik pa Musa. * (Tic. 21:20-26) Giwacu nia eter jumaco ang’wen i hekalu kara dhanu ginen nia ebeworo Cik. Nwang’u Paulo copo yero kumae: ‘Eni ke tie paru ma nenedi! Pirang’o atim lembe ma kumeno? Ka Jukristu moko  ma Juyahudi gibenyang’ ungo i kum lembe mi yaa, eca uneno gin!’ Ento Paulo unyang’ nia judong cokiri gibemito nia Jukristu ceke gibed i acel. Pieno, ejwigere man elubo telowic migi. Re wacopo penjara nia, pirang’o Yesu uweko lembe mi yaa ukel anyobanyoba asu asu i cokiri, ma ke nwang’u dong’ Cik pa Musa ujik ugambre i kum tho pare e?​—Kol. 2:13, 14.

12. Thelembe ma kani ma saa moko uketho Kristu uweko lembe mi yaa ukel anyobanyoba i cokiri?

¹² Ecopo ting’o nindo ma lee kara wang’ii ku der ma nyen m’uwok iwi lembe moko. I rundi ma kwong’a, egam eting’o nindo ma lee kara Jukristu moko ma Juyahudi giyii nia dong’ gimbe i the Cik pa Musa. (Yoh. 16:12) I wang’e, gibed giparu nia timo yaa re ma nyutho nia gitie ku winjiri ma segi ku Mungu. (Tha. 17:9-12) Jukristune mange ke gibed gilworo nia Juyahudi wagi binyayu ragedo i kumgi tek gitimo tung’. (Gal. 6:12) Re nok nok, Kristu umio igi telowic dupa nikadhu kud i bang’ jakwenda Paulo.​—Rum. 2:28, 29; Gal. 3:23-25.

13. Tin eni ang’o ma copo konyowa nijolo telowic ma Kristu ubemio?

¹³ Tin de, asu Kristu re m’ubetelo wi cokiri mi Jukristu. Pieno, ka dilo pa Mungu utimo alokaloka moko m’inyang’ ungo i ie, poi i kum kite ma Kristu ugam utelo ko wi dhanu pa Mungu con. I rundi pa Yocuwa kud i rundi mi jukwenda bende, Kristu ubed umio telowic mi rieko pi nigwoko dhanu pa Mungu; eno uketho yioyic migi ubedo tek man gimediri nibedo i acel.​—Ebr. 13:8.

14-16. Telowic m’uai i bang’ ‘jamiru mandha man ma riek’ ubenyutho nenedi nia Kristu ubemito wabed ku yioyic ma tek?

¹⁴ Tin, ‘jamiru mandha man ma riek’ ubemio iwa telowic ma watie ku yenyne tap i saane. (Mat. 24:45) Telowic maeno nyutho nia Yesu ubedieng’ piwa. Umego Marc, ma tie kud awiya ang’wen uwacu kumae: “Pi nidaru tego mi cokiri, Sitani ubejebo lembe i kind juruot. Re kawoni, kite ma jubemio ko amora i kumwa nia watim thier mi juruot kubang’ yenga, ubekonyo weg udi nineno ngbeng’ nia gicikiri nigwoko juruot migi!”

¹⁵ Ka wabeparu cuu kite ma Kristu ubetelo ko wiwa, wabinyang’ kamaleng’ nia ebemito yioyic mwa udok tek. Ku lapor, jadit cokiri moko ma nyinge Patrick uyero kumae: “I wang’e, jumoko gibed gifoyo ngo nitimo coko mi lembanyong’a i thum pa yenga i ungu mi lembanyong’a.” Re emedo nia alokaloka maeno unyutho nia andha Yesu ubedieng’ pi ng’atuman acel acel i cokiri. Ku macal, umego ku nyimego moko ma nwang’u giweg lewic man ma nwang’u gibed girweyo ngo akeca, ginwang’u nia karaman pigi tek, man kakagi nuti. Yub maeno utielo yioyic migi.

¹⁶ Kristu ubekonyowa bende kara gin moko ci kud uwing wiwa i kum tic mi rweyo lembanyong’a. (Som Marko 13:10.) Umego André, m’udoko jadit cokiri nindo ma ceng’ini eni betimo kero saa ceke nilubo telowic ma nyen ma dilo pa Yehova umio. Ewacu kumae: “Wend dhanu ma jujwigo nindo ma ceng’ini eni i Bethel upoyo wiwa nia wabekwo i dong nindo, man ubekwayu wawodhara zoo i tic mi rweyo lembanyong’a.”

17, 18. Pirang’o ubekwayu waketh wiwa akeca iwi bero ma wanwang’u ka wabelubo telowic ma nyen?

¹⁷ Telowic ma Rwoth mwa Kristu ubemio iwa tin eni bikonyowa i nindo m’ubino bende. Pieno, kepim niparu iwi bero moko m’idaru nwang’u i kind nindo m’ukadhu ceng’ini eni, pilembe ilubo telowic moko ma nyen m’uwok. I saa mi thier mwu mi juruot, wucopo koro kite m’alokaloka m’utimere pi  coko man pi rweyo lembanyong’a utuc nikonyo kowu.

¹⁸ Nilubo telowic ma dilo pa Yehova ubemio kelo adwogi ma ber. Ka wabepoi i kum lembuno, wabilubo telowicne yot yot, man wabibedo ku mutoro. Ku lapor, wabewodho ngo girasoma akeca iwi karatasi calu m’i wang’e, eno uketho sente ubegwokere. Bende, calu ma wabetio ku bodho ma dongong’om ubekelo, wabetundo nirweyo ni dhanu dupa. Nyo icopo ii nitio akeca ku girasoma mir elektronik man video? Eno tie ayi acel ma wadiko ko cingwa ku Kristu, pilembe ebemito watii ku mali mi dilo ku rieko.

19. Pirang’o wacikara nidiko cingwa i kum telowic pa Kristu?

¹⁹ Ka wabediko cingwa i kum telowic pa Kristu, wabikonyo umego ku nyimego kara gibed ku yioyic ma tek man kara gigwok bedo i acel. Pi wend dhanu ma jujwigo nindo m’ukadhu eni i Bethel mi ng’om zoo, umego André uwacu kumae: “Umego ma gilar gibino i Bethel gijolo alokaloka maeno ku pidoic ma ber; eno uketho ageno Yehova nisagu man aworo umego maeno. Pi ninyutho nia gibewotho karacelo ku dilo pa Yehova, giyio nitimo tic moko ci ma jumio igi.”

20, 21. (a) Pirang’o ubekwayu wagen Jatelwic mwa ma en e Kristu? (b) Wabidwoko wang’ penji ma kani i thiwiwec m’ulubo?

²⁰ Ceng’ini eni, Yesu Kristu ma Jatelwic mwa bidaru ‘aloci’ pare man ebitimo “gin ma ng’oyo ndiri.” (Nyu. 6:2; Zab. 45:4) Re ma fodi nindone k’uromo ngo, ebeyikowa pi kwo i ng’om ma nyen, man pi tic ma wabitimo kuca, niwacu tic mi ponjo ju ma gibicer, man mi dwoko ng’om udok ni paradiso.

²¹ Ka wageno Jatelwic man Ubimo mwa kadok i wang’ lembang’o, ebimedere nitelo wiwa nitundo i ng’om ma nyen. (Som Zaburi 46:1-3.) I andha, alokaloka tie lembe ma yot ungo, asagane kan etundo i wiwa rek. Saa maeno, wacopo medara nenedi nibedo ku kwiocwiny man ku yioyic ma tek i Yehova? Wabidwoko wang’ penji maeno i thiwiwec m’ulubo.