1, 2. Ikor mapatay ci Mosi, misiˈayaway ci Yosuwa to maanan a sapalifet?

PASOWALAN ni Yihofa ci Yosuwa: “Mapatayto ko matayalay Ako ci Mosi, pipatala kiso imatini, keriden ko polong no finawlan no Israil a milacal to Yortan a ˈalo a tayra i sapafeli Ako i tamowanan a sera.” (Yosuwa 1: 1, 2) Malo dama ni Mosi ci Yosuwa maedeng 40 mihaca, o hatiniay a kafalic pakayra cingraanan, tada o kafahalan.

² Samanen halafinayto malo ˈaˈideman no Israil tamdaw ci Mosi, saka fanaˈaw ci Yosuwa to samaanay ko pinengneng no Israil tamdaw to pikerid ningra haratek. (Limoˈot 34:8, 10-12) O cecay taˈarawan to Fangcalay Cudad a cudad, milengo to Yosuwa 1:1, 2, sanay ko sowal: “Ano litenganto, aninito, mafalic ko sapikerid a fadangalan mifekaday to fodifod no lekakawa.”

3, 4. (1) Mitiˈeray ci Yosuwa to Kawas, mihaenay samaanan no Kawas padama cingra hani? (2) Alatek iraay ko maanan a salicay no roma tamdaw hani?

³ Calemcem ci Yosuwa o pinangan koni, kawra mitiˈeray cingra ci Yihofaan, mansa matatodong ko demak. (Yosuwa 1:9-11) Paihkalay ko Fangcalay Cudad, pakaynian ni Yihofa i coyoh, mikayat ci Yosuwa ato Israil tamdaw, onini a coyoh, o feseniˈan a wawa no Kawas, oya “Sowal,” sanay.​—Yohani 1:1; Kasadakan 23:20-23.

 ⁴ Padamaan ni Yihofa ko Israil tamdaw, mahererek ko pikerid ni Mosi cangraanan, ikor i, ngaˈay mananam to faelohay a ˈaˈideman ci Yosuwa. Anini, misiˈayaway kita to adihayay taˈangayay noka falic. Wa saan ko harateng no roma tamdaw, “Padotoc a macakat ko likakawa no Kawas, wa kamayan kako ngaˈay mitiˈer to pikerid no ˈaˈideman ci Yis han? (ˈOsien ko Matay 23:10.) Sapacaˈof toniya salicay, wa nengnengen ita, tahalifa to kafalic ko finawlan no Kawas i, samaanay ci Yihofa mikayat cangranan.

5. Itini ingata no Yiriko, malifaay ni Yosuwa ko maanan a pakayraan? (Nengnengen ko satapangan coka.)

⁵ Mitaˈlif ko Israil tamdaw to Yortan ˈAlo, caka halafin, malifaay ni Yosuwa ko cecay pakayraan. Itini cingra ingata no Yiriko, malitemohay ko mitatoyay to fonus a faˈinayan, cowa ka fanaˈ ci Yosuwa to cima koniya tamdaw. Milicay cingranan: “O mipadangay kiso i tamiyanan haw? Ano eca i, o mipadangay kiso to ˈada niyam haw?” Kafahkaˈan ni Yosuwa i, o pipasowal noya faˈinayan to saaroˈan, “o mikomoday a sofitay no Tapang a Kawas kako,” sanay, maharekayto misaday, mamidipot to finawlan no Kawas. (ˈOsien ko Yosuwa 5:13-15.) Oniya maˈoningay soˈlin milengoay to pasowalan ni Yihofa ci Yosuwa, kawra pakaynian ni Yihofa i coyoh a pasowal ci Yosuwaan, mahecad ko nanodemak Ningra isalakat.​—Kasadakan 3:2-4; Yosuwa 4:1, 15; 5:2, 9; Dmak 7:38; Kalatiya 3:19.

6-8. (1) O sapafeli ni Yihofa to Israil tamdaw a sakayat, ano tengilen hano cowa ko ngaˈayay a halaka hani? (2) Oniya sakayat hano citanengay a matatodongay hani? (Nengnengen ko ilaenoay safanaˈ.)

⁶ Ihkalay ko safanaˈ no coyoh ci Yosuwaan, padama cingranan sasamaan a milood to Yiriko a niyaroˈ. Nikawrira, tengilen toniya safanaˈ, hato cowa ko ngaˈayay a halaka, tinakoen, pakaynian ni Yihofa i coyoh palimoˈot ko polong a faˈinayan micada to kerit, oniya demak o saka pahanhan nangra to pina romiˈad, ho caka ngaˈay a milood. Toniya toki, papicadaen ko faˈinayan no Israil to kerit, o ngaˈayay a demak ha?​—Satapangan 34:24, 25; Yosuwa 5:2, 8.

⁷ Oya awaay ko ˈicel a sofitay no Israil wa saan a miharateng, “Ano fahal sa ko adaˈ miˈodis i, wa samaan kami midipot to paro no lomaˈ hani?” Dotoc i, mifekaday ko kafahkaˈan a demak! Matalaway ko Yiriko a tamdaw to Israil tamdaw, mihaenay, “o sakacaaw picomod no Israil saka, masongilaˈ a maˈdef ko ˈadawang no Yiriko.” (Yosuwa 6:1) Ira ko hatiniay a kafalic no demak, maedeng matongalay ko pitiˈer no Israil tamdaw to sakayat no Kawas.

⁸ Cowa konini aca, cowa ka piocor ko coyoh to Israil tamdaw milood to Yiriko a niyaroˈ, misaaliay cangranan to romiˈamiˈad, kina cecay mitaliyok toniya niyaroˈ. Hanaca padotoc enem a romiˈad, mihaen to demak. Saka pito romiˈad, kina pito a mitaliyok to niyaroˈ. Harateng no roma sofitay, tada mipalakay to toki ato ˈicel konini, kawraan, o mikeriday to Israil tamdaw ci Yihofa, ihkalay mafanaˈ sasamaan to demak, tooren no Israil tamdaw ko sakayat a midemak, teloc to, cowa ko paˈicel aca to pakasoˈlin to falocoˈ, maliyasay ko sapisiˈayaw to sofitay no Yiriko a malalood.​—Yosuwa 6:2-5; Hipray 11:30. *

9. Hano tooren ita a mihakelong ko sakayat no likakawa no Kawas hani? Tinakoen hena.

⁹ Mikitini toniya maˈoningay, mananamay ita ko maanan hani? Latekay, cowa ka cipinang kita to samaanay, hano misalof ko likakawa to cecay demak anca iraay ko faelohay a limasmas. Tinakoen, o roma tamdaw misatapang misaka dademak to soci pingpan, micekiw, mitosil ato masaˈopo, iraay ko sasa no harateng. Kawra, ikor to mahapinangay misaka dademak to no wangcan a lalakaw, adihayay ko epoc. Ano maˈaraw ita, to  ngaˈayay minaroˈan i noka falic, pakayni faelohay a limasmas malahdaway ko sasa no falocoˈ, matongalay ko tanektek no pakasoˈlin no mita, hanaca, matongalay ko makelecay falocoˈ no salikaka.

10. O cima ko mikayatay i Yirusalim a kasacefang no mikayatay to malohemay malitengay milimasmas to saˈopo?

¹⁰ Malo Krisciyang ci Koniliu (Kornilius) ikor no 13 miheca, o roma Yutaya Krisciyang kamayan a pacieci to tamdaw papicada to kerit. (Dmak 15:1, 2) Itini i Antiok, padotocay ko tamdaw malacongis toniya demak, mansa milimasmas ko salikaka ci Pawloan tayra i Yirusalim milicay to kasacefang no mikayatay to malohemay malitengay, to sasamaan a misaysay. Hano ira ko hatiniay a kalingad no demak? Sanay ko sowal ni Pawlo: “O nano nipaˈarawan no Tapang ko sakatayra ako.” Mahapinangay, ci Kristo ko mikayatay toniya demak, padama to mikayatay to malohemay malitengay misaysay toniya lacongis.​—Kalatiya 2:1-3.

11. (1) O Yutaya Krisciyang kamayanayho ira ko samaanay a pinengneng to kerit? (2) Samaanay ko demak ni Pawlo, paihkal to misapoeneray a midama to malohemay malitengay i Yirusalim? (Nengnengen ko ilaenoay safanaˈ.)

¹¹ Itini i pikayat ni Kristo, ihkalay a mifanaˈ ko kasacefang no mikayatay to malohemay malitengay, o ˈalafang a Krisciyang cowa ko mamicada to kerit. (Dmak 15:19, 20) Kawra, mataˈlifayto ko pina miheca, ˈalomanay a Yutaya Krisciyang kamayanay mikerit to wawa, no ikor matengilay no Yirusalim a malohemay malitengay ko sowal to cowa pidofdof ci Pawlo to Sarikec ni Mosi, misaaliay ci Pawloan midemak to roma demak. Kawra, oniya demak mataˈlifay ko maharatengay ni Pawlo. * (Dmak 21:20-26) Papiˈorongan no malohemay malitengay ci Pawlo to sepat tamdaw tayra i fangcalay sefi, mihaen wa mahapinang no tamdaw to soˈlinay ci Pawlo midofdof to Sarikec. Na ngangaˈay ci Pawlo pasowal to malohemay malitengay, oniya pasangaray mikitiniay i cowa ka tatodong a pinengneng no Yutaya  a Krisciyang to mikeritay a demak. Kawra, mahapinangay ni Pawlo, wa pakayni toniya demak ko malohemay malitengay mitongal to kakelec no salikaka, mihaenay misapoeneray ko falocoˈ a mihakelong to sakayat, nikawrira, wa cisasa kita halatek, “Ano mapalahdawayto ko Sarikec ni Mosi pakayni noka patay ni Yis, misamaanay hano hayenho ni Yis halafin ko lacongis pakayni i mikeritay a demak hani?​—Kolosay 2:13, 14.

12. Misamaanay hano hayenho ni Kristo halafin ko lacongis pakayni i mikeritay a demak hani?

¹² Sapicadaaw to faelohay a pinengneng misaaliay to toki, mihaenay o roma Yutaya a Krisciyang misaaliay to adihayay a toki misalof to noka pinengneng. (Yohani 16:12) O roma nangra pasangaray micada, sakairaaw no ngaˈayay kalalaˈed ato Kawas, cowato ko kalimlaan ko kerit. (Satapangan 17:9-12) O roma tamdaw matalaway ano caka hecad ko demak no niyah to Yutaya tamdaw, wa tahacada to sapalak. (Kalatiya 6:12) Ikor to pakaynian ni Kristo ci Pawloan patilid to tikami, mikayat to itiyaay a Krisciyang.​—Loma 2:28, 29; Kalatiya 3:23-25.

13. Samaan ko demak ita ngaˈ, ngaˈay midama to pikayat ni Kristo hani?

¹³ Ano samisi ko kacipinang ita to pisalof ato faelohay a limasmas no likakawa i, ngaˈay haratengen to samaanay ci Kristo mikayat to finawlan no Kawas isalakat. Ano itiniay to i romiˈad ni Yosuwa anca i saka 1 hahekalan, sahtoay o ngaˈayay a sakayat ko sapafeli ni Kristo to finawlan no Kawas, pakayni ko pidipot cangranan, patanektek to pakasoˈlin no falocoˈ nangra, makelec a midoko to Kawas.​—Hipray 13:8.

14-16. Mikitini i sakayat no ‘madimadiay inanengay a koli’, wa samaan mahapinang ita to ciharatengay ci Yis to noˈadingoan a pakayraan ita hani?

¹⁴ Ciharatengay ci Yis to noˈadingoan ita, mihaenay pakaynian ningra ‘madimadiay citanengay koli’ itini matatodongay a toki pafelito sakayat kitaanan. (Matay 24:45) Ci Marko iraay ko sasepatay a wawa, sowal ningra: “Ci Satan pakayniay pilood to paro no lomaˈ a mipalak to pakasoˈlinay falocoˈ no salikaka. O likakawa no Kawas pakalalokay kitaanan lipalipay mirienang to pakalomaˈay pidoko, pakayni i tawki no lomaˈ, ihkalay ko lihaf no likakawa, dipoten ko paro no lomaˈ no niyah!”

¹⁵ Ano mahapinang ita to mikayatay ci Kristo kitaanan, wa mafanaˈto ciharatengay cingra to kacakat ita i noˈadingoan. Ci Pateriko o malohemay maritengay cingra, sanay ko sowal: “Tiya falicen ko limasmas no mitosilay, ano edeng malacafay to niyah a kapot mitosil, hato matoleday cangra, kawra, oniya limasmas paihkalay to kalimlaan a capeling ni Yis, o miharatengay to sasafaay a tamdaw. Oya kalingodoay ato cowa ka rarid mitosil a salikaka, mihaenay macadaay nangra to o misaaliay ko salikaka cangraanan, o iraay ko sadama no niyah sanay ko harateng nangra, telocto, matongalay ko katenes nangra i noˈadingoan.”

¹⁶ Cowa ko pisinanot aca ni Kristo to saali ita, i noˈadingoan, padamaayho kitaanan misamacayto kalimlaan a demak i fafekang no sera. (ˈOsien ko Marko 13:10.) Ci Ateri o faelohay nilnilen a malohemay malitengay, padotocay cingra misinanot to sakayat no likakawa no Kawas, sowal ningra: “O limasmas milowanto matayalay i Pitil, pahapinangay takowanan cowato ka hakowa ko toki, oha sakadademaken ko ˈicel i mitosilay a demak.”

17, 18. Misamaanay hano haratengen ita ko malifokay no niyah a epoc mikitini i faelohay a limasamas hani?

¹⁷ Aninito anca noikor, o sakayat no Hongti ci Yis Kristo wa ngaˈay padama kitaanan. Ngaˈayay haratengen ita mikitini faelohay limasmas malifokay no niyah ko maanan a epoc. Itini pakalomaˈay a pidoko i, ngaˈayay kiso milengo to malifokay no niyah a epoc, mikitini kafalic no saˈopo  ato pitosil, wa mahapinang iso, mihaen to demak ngaˈayay pakalalok to niyah, ngaˈayho pakalalok to paro no lomaˈ.

¹⁸ Ano cipinang kita to araaw noniya sakayat ato haepoc kitanan, wa makahito a mihakelong. Cipinangay kita, lowanen no likakawa ko mitepangan a cudad ngaˈayay mahoped ko adihayay payci, saka dademaken ko soci, pingpan wa ngaˈay padama to ˈalomanay tamdaw mitengil to ngaˈayay lihaf. Ano haratengen ita konini, wa misaˈicel a misakadademak to mitepangan a lalakaw i wangcan. Mitokelay ci Kristo kitaanan, misongilaˈ a misakadademak to dafong no likakawa no Kawas, mihaen ko demak ita, o midamaay ci Kristoan.

19. Hano midopo kita to sakayat ni Kristo hani?

¹⁹ Misarocod kita midopo to sakayat ni Kristo, wa ngaˈay paˈicel to pakasoˈlinay falocoˈ no tao, wa ngaˈayho micowat to kakelec i kalalaˈed. Malengoay ni Ateri ko pilowan to matayalay i Pitil a limasmas, sanay ko sowal: “Oniya miliyasay to Pitil a salikaka minanamay to noka falic, o paihkalan nangra a makapahay waywayan, tada masemeray kako, paˈicelay pakasoˈlin ako. Ano maan ko demak nangra, lipahakay a midemak, misawacay to mikelecay ko niyah a mikotod to sapilood a paliding ni Yihofa.

20, 21. (1) Hano ngaˈay kita mitiˈer to ˈaˈideman ci Kristoan hani? (2) Dotoc a lalakaw, wa milengo to maanan a salicay?

²⁰ Cato ka halafin, wa ‘masongilaˈ to malowid’ no ˈaˈideman ita ci Yis Kristo ko ˈada, midemak to kasapaan a demak. (Paˈarawan 6:2; ˈOlic 45:4) Nohatini, padamaay ci Yis kitaanan misaday to sakaˈoripaw i faelohay a hekal. Maraod ko toki, wa pasifanaˈ kita to patikolay a maˈorip a tamdaw, halo pala makapahay a lakoing toniya cikiw.

²¹ Ano samaanto ko noka falic no pakayraan, o tatiˈeren ita ko Hongti ci Kristo, wa keriden ningra kita micomod i faelohay a hekal. (ˈOsien ko ˈOlic 46:1-3.) Nolatekay, pasangaray kita minanam to noka falic, hanaca ano caka harateng ita to mamalifa ko hatiniay a noka falic, wa matongal ko pasangar a minanam. Ano mifekad ko noka falic i, wa samaan kita mitafo to rihadayay a falocoˈ, padotoc a misarocod mitiˈer ci Yihofaan hani? Dotoc a lalakaw, wa milengo toniya salicay.