1, 2. Муса пејғәмбәрин өлүмүндән сонра Јушә һансы чәтинликләрлә үзләшди?

ЈЕҺОВАНЫН сөзләри һәлә дә Јушәнин гулағында сәсләнирди: «Артыг гулум Муса јохдур. Инди сән галх, халгла бирликдә Иордан чајыны кеч, онлара, Исраил халгына вердијим торпаға ҝет» (Јуш. 1:1, 2). Тәхминән 40 ил Муса пејғәмбәрин хидмәтчиси олмуш Јушә үчүн бу, ҝөзләнилмәз дәјишиклик иди.

² Муса пејғәмбәр узун илләр Исраил халгына рәһбәрлик етмишди. Чох ҝүман ки, Јушә халгын ону јени рәһбәр кими гәбул едиб-етмәјәҹәјинә ҝөрә нараһат иди (Ган. 34:8, 10—12). Мүгәддәс Китаб үзрә бир елми мәнбәдә Јушә 1:1, 2 ајәләри һагда јазылыб: «Һакимијјәтин бир нәфәрдән о бирисинә кечмәси истәр гәдимдә, истәрсә дә мүасир дөврдә өлкәнин әмин-аманлығы үчүн ән тәһлүкәли вә кешмәкешли дөврләрдән бири һесаб олунур».

3, 4. Һарадан билирик ки, Аллаһ Јушәнин етимадыны гаршылыгсыз гојмады? Биздә һансы суал јарана биләр?

³ Јушәнин нараһатчылығы әсассыз дејилди. Бунунла белә, о, бир нечә ҝүнүн ичиндә гәти аддым атды (Јуш. 1:9—11). Аллаһ онун етимадыны гаршылыгсыз гојмады. Мүгәддәс Китабда да дејилдији кими, Јеһова мәләји васитәсилә Јушәјә вә Исраил халгына рәһбәрлик  етди. Чох јәгин ки, һәмин мәләк Сөз, јәни Аллаһын илкин Оғлу иди (Чых. 23:20—23; Јәһ. 1:1).

⁴ Јеһованын көмәјилә Исраил халгы рәһбәрлијин Мусадан Јушәјә кечмәсинә тез ујғунлашды. Биз дә бөјүк дәјишикликләрин баш вердији бир дөврдә јашајырыг. Дүшүнә биләрик: «Аллаһын тәшкилатынын сүрәтлә ирәлиләдији бир вахтда Рәһбәримизә, Иса Мәсиһә етибар етмәк үчүн һансы сәбәбләримиз вар?» (Мәтта 23:10 ајәсини охујун.) Бу суала ҹаваб тапмаг үчүн ҝәлин кечмишдә баш верән дәјишикликләрә нәзәр салаг вә ҝөрәк Јеһова бу заман халгына неҹә етибарлы рәһбәрлик тәгдим едирди.

5. Јушә Әриһа јахынлығында нә илә үзләшди? (Мәгаләнин әввәлиндәки шәклә бахын.)

⁵ Исраиллиләр Иордан чајыны кечәндән гыса мүддәт сонра Јушә ҝөзләнилмәз бир вәзијјәтлә үзләшди. Әриһанын јахынлығында о, әлиндә сијирмә гылынҹы олан бир нәфәрлә гаршылашыр. Јушә онун танымајыб сорушур: «Сән биздәнсән, јохса дүшмән тәрәфдән?» Онун ким олдуғуну биләндә Јушәни һејрәт бүрүјүр. Сән демә, о, халгы мүдафиә етмәјә ҝәлән «Јеһованын ордусунун әмири» имиш. (Јушә 5:13—15 ајәләрини охујун.) Бу һадисәнин тәсвир олундуғу башга ајәләрдә Јушә илә Јеһованын данышдығы дејилсә дә, шүбһә јохдур ки, кечмишдә олдуғу кими, бу дәфә дә Јеһова мәләји васитәсилә данышмышды (Чых. 3:2—4; Јуш. 4:1, 15; 5:2, 9; Һәв. 7:38; Гал. 3:19).

6—8. а) Нәјә ҝөрә Јеһованын вердији бәзи ҝөстәришләр инсана гәрибә ҝәлә биләр? б) Јеһованын ҝөстәришләринин һәм һикмәтли, һәм дә заманында олдуғуну нә ҝөстәрир? (Һәмчинин һашијәјә бахын.)

⁶ Мәләк Јушәјә Әриһаны зәбт етмәк үчүн нә етмәли олдуғуна даир ајдын ҝөстәришләр верди. Әввәл-әввәл бу ҝөстәришләрин бәзиләри һеч дә ағлабатан ҝөрүнмәјә биләрди. Мисал үчүн, Јеһова әмр етмишди ки, бүтүн кишиләр сүннәт олунсун. Бу исә онларын бир нечә ҝүн дөјүшә билмәјәҹәји демәк иди. Сүннәт олунмаг үчүн бу, нә дәрәҹәдә мүнасиб вахт иди? (Јар. 34:24, 25; Јуш. 5:2, 8).

⁷ Јәгин Исраил дөјүшчүләри мүәјјән нараһатлыг кечирирди. Бәлкә дә, дүшүнүрдүләр: «Бирдән дүшмән дүшәрҝәјә һүҹум етсә, аиләмизи неҹә горујаҹағыг?» Амма ҝөзләнилмәз бир шеј баш верир. Дүшмән нәинки исраиллиләрә һүҹум етмир, һәтта горхудан Әриһанын дарвазаларыны бәрк-бәрк бағлајыр (Јуш. 6:1). Чох јәгин ки, вәзијјәтин бу ҹүр дәјишмәси онларын Аллаһдан ҝәлән ҝөстәришләрә етибарыны бирә-беш артырмышды.

⁸ Бундан әлавә, исраиллиләрә бујрулур ки, Әриһаја һүҹум етмәсинләр, шәһәрин әтрафына алты ҝүн әрзиндә ҝүндә бир дәфә, једдинҹи ҝүн исә једди дәфә долансынлар. Бәлкә дә, бәзи әсҝәрләр бунун вахты вә ҝүҹү бош јерә сәрф етмәкдән башга бир шеј олмадығыны дүшүнүрдүләр. Амма исраиллиләрә рәһбәрлик едән Јеһова нә етдијини јахшы билирди! Бу дөјүш стратеҝијасы исраиллиләрин иманыны мөһкәмләндирди, үстәлик, Әриһанын ҝүҹлү ҹәнҝавәрләри илә дөјүшмәјә еһтијаҹ галмады (Јуш. 6:2—5; Ибр. 11:30) *.

9. Аллаһын тәшкилатындан алдығымыз ҝөстәришләрә нә үчүн әмәл етмәлијик? Нүмунә чәкин.

⁹ Бу һадисәдән нә өјрәнирик? Бәзән тәшкилатымызда едилән мүәјјән јениликләрин сәбәбини там анлаја билмирик. Мәсәлән, ола билсин, әввәл-әввәл фәрди мүталиә заманы, хидмәтдә вә јығынҹагда електрон ҹиһазлардан истифадә етмәјин о гәдәр дә  мүнасиб олмадығыны дүшүнүрдүк. Амма инди ҝөрүрүк ки, имкан дахилиндә онлардан истифадә етмәк олдугҹа фајдалыдыр. Илк реаксијамызын неҹә олмасындан асылы олмајараг, бу ҹүр дәјишикликләрин мүсбәт нәтиҹә вердијини ҝөрәндә шүбһәсиз ки, иманымыз вә арамыздакы бирлик мөһкәмләнир.

10. Рәһбәрлик шурасынын Јерусәлимдә кечирдији мүһүм ҝөрүшү әслиндә ким идарә едирди?

¹⁰ Сүннәт олунмамыш Корнилинин мәсиһилији гәбул етмәсиндән тәхминән 13 ил кечсә дә, бәзи јәһуди мәсиһиләр һәлә дә сүннәтин ваҹиб олдуғуну сөјләјирдиләр (Һәв. 15:1, 2). Бу мөвзу илә бағлы Антакјада мүбаһисә дүшәндә гардашлар гәрара алдылар ки, мәсәләни рәһбәрлик шурасына чатдырмаг үчүн һәвари Булусу Јерусәлимә ҝөндәрсинләр. Бәс һадисәләрин ҝедишатына ким рәһбәрлик едирди? Булус демишди: «Мән вәһј алдығыма ҝөрә ора ҝетмишдим». Ајдындыр ки, проблемин рәһбәрлик шурасы тәрәфиндән һәлл олунмасы үчүн вәзијјәти идарә едән Мәсиһин өзү иди (Гал. 2:1—3).

11. а) Бәзи јәһуди мәсиһиләр сүннәтлә бағлы һәлә дә һансы мөвгедә идиләр? б) Һәвари Булусун Јерусәлимдәки ағсаггаллара итаәткарлығы неҹә сынанмышды? (Һәмчинин һашијәјә бахын.)

¹¹ Рәһбәрлик шурасы Мәсиһин идарәчилији алтында гәрар верир ки, гејри-јәһудиләрин сүннәт олунмасына еһтијаҹ јохдур (Һәв. 15:19, 20). Амма бу гәрарын үстүндән узун илләр кечсә дә, бир чох јәһуди мәсиһиләр оғулларыны сүннәт етмәјә давам едирдиләр. Јерусәлимдәки ағсаггалларын гулағына чатыр ки, Булусун Мусанын Ганунуна һөрмәт етмәдији илә бағлы сөз-сөһбәт ҝәзир. Буна ҝөрә дә онлар Булуса ҝөзләмәдији бир ҝөстәриш верирләр * (Һәв. 21:20—26). Она дејирләр ки, Гануна риајәт етдијини һамынын ҝөрмәси үчүн дөрд нәфәр дә ҝөтүрүб мәбәдә ҝетсин. Булус бунун мәнтигә сығмадығыны, әслиндә проблемин сүннәт мәсәләсини ајдын баша дүшмәјән јәһуди мәсиһиләрдә олдуғуну дејә биләрди. Амма о баша дүшүрдү ки, ағсаггалларын мәгсәди мәсиһиләр  арасында бирлик јаратмаг иди, буна ҝөрә дә тәвазөкарлыг ҝөстәриб онларын дедији кими едир. Биздә белә бир суал јарана биләр: «Мәсиһ өлүмү илә Мусанын Ганунуну ләғв етдији һалда, нәјә ҝөрә о, проблемин бу гәдәр вахт әрзиндә һәлл олунмамыш галмасына јол верди?» (Кол. 2:13, 14).

12. Мәсиһ проблемин бу гәдәр вахт әрзиндә һәлл олунмамыш галмасына нә үчүн изин вермиш ола биләрди?

¹² Бәзиләринин јени изаһата өјрәшмәси үчүн вахт лазымдыр. Јәһуди мәсиһиләрин арасында да беләләри аз дејилди. Онларын артыг Мусанын Гануну алтында олмадыгларыны дәрк етмәләри үчүн мүәјјән вахт кечмәли иди (Јәһ. 16:12). Јәһудиләр сүннәтин Аллаһла хүсуси мүнасибәтләрин рәмзи олдуғу фикринә өјрәшмишдиләр (Јар. 17:9—12). Бир башгалары тәгиб олунаҹагларындан горхараг јәһуди ҹәмијјәтиндән фәргләнмәк истәмирди (Гал. 6:12). Амма мүәјјән мүддәт сонра Мәсиһ һәвари Булусун јаздығы мәктублар васитәсилә әлавә ҝөстәришләр верди (Ром. 2:28, 29; Гал. 3:23—25).

13. Мәсиһин рәһбәрлијини дәстәкләмәјә бизә нә көмәк едә биләр?

¹³ Тәшкилатымызын етдији бәзи дәјишикликләри там анламајанда јахшы олар ки, Мәсиһин кечмишдә Аллаһын халгына неҹә рәһбәрлик етмәси үзәриндә дүшүнәк. Истәр Јушәнин јашадығы дөвр олсун, истәрсә дә һәвариләрин, Мәсиһ Аллаһын халгыны мүдафиә етмәк, иманыны мөһкәмләндирмәк вә араларындакы бирлији горумаг үчүн һәмишә һикмәтли рәһбәрлик вериб (Ибр. 13:8).

14—16. Иса Мәсиһин бизим руһани ҹәһәтдән мөһкәм олмағымызы истәдији «садиг вә ағыллы нөкәр»ин вердији ҝөстәришләрдән неҹә ҝөрүнүр?

¹⁴ «Садиг вә ағыллы нөкәр»ин вердији ҝөстәришләрдән ајдын ҝөрүнүр ки, Мәсиһ бизим руһани ҹәһәтдән мөһкәм олмағымызы истәјир (Мәт. 24:45). Дөрд ушаг атасы олан Марк гардаш дејир: «Шејтан аиләләрә һүҹум едәрәк јығынҹағы зәифләтмәјә чалышыр. Инди һәр һәфтә аиләви ибадәт кечирмәјә тәшвиг олунмаг аилә башчыларына бир исмарыҹдыр ки, аиләләрини горусунлар!»

¹⁵ Мәсиһин неҹә рәһбәрлик етдијини ҝөрәндә баша дүшүрүк ки, бизим руһани инкишафымыз онун үчүн ваҹибдир. Ағсаггал кими хидмәт едән Патрик гардаш дејир: «Тәблиғ ҝөрүшләринин һәфтәсонлары кичик групларла кечириләҹәји һагда ешидәндә әввәл-әввәл бәзиләри пис олмушду». Амма гардаш һесаб едир ки, бу дәјишиклик Исанын јығынҹағын һәр бир үзвү илә марагландығыны ҝөстәрир. Бунун сајәсиндә утанҹаг вә елә дә актив олмајан баҹы-гардашлар инди өзләрини даһа јарарлы һисс едирләр. Бу, онлары хидмәтдә даһа чох иштирак етмәјә тәшвиг едир.

¹⁶ Мәсиһ һәмчинин бизә көмәк едир ки, диггәтимизи бу ҝүн јер үзүндә апарылан ән мүһүм ишә ҹәмләјәк. (Марк 13:10 ајәсини охујун.) Бу јахынларда ағсаггал тәјин олунан Андре гардаш һәмишә чалышыр ки, Аллаһын тәшкилатында баш верән дәјишикликләрә риајәт етсин. О дејир: «Филиалларда кадрларын сајынын азалдылмасы бизә вахтын ҝөзләмәдијини вә ҝүҹүмүзү тәблиғ фәалијјәтинә ҹәмләмәли олдуғумузу хатырладыр».

17, 18. Нә үчүн сон илләрдә баш верән дәјишикликләрә ујғунлашмағымызын фајдасы һагда дүшүнмәлијик?

¹⁷ Тахтда отуран Падшаһымызын, Мәсиһин вердији рәһбәрликдән ҝөрүрүк ки, о, диггәтини ҝәләҹәјә ҹәмләјиб. Буна ҝөрә дә ҝәлин дәјишикликләрә ујғунлашмағын ҝәтирдији ҝөзәл бәһрәләр һагда дүшүнәк. Аиләви ибадәт заманы һәфтәлик ҝөрүшләрлә вә хидмәтлә бағлы дәјишикликләрин аиләнизә  һансы фајданы ҝәтирдијини мүзакирә етмәк сизи чох руһландыраҹаг.

¹⁸ Јеһованын тәшкилатындан алдығымыз ҝөстәришләрин мәгсәди вә онларын бизә хејри һагда дүшүнсәк, чох еһтимал ки, онлара даһа севә-севә табе олаҹағыг. Мәсәлән, чап олунан нәшрләрин сајынын азалдылмасы сајәсиндә пула гәнаәт олунур вә јени технолоҝијаларын истифадәси Падшаһлыг ишинин бүтүн дүнјада јајылмасына шәраит јарадыр. Буну нәзәрә алараг, ҝәлин нәшрләримизин електрон форматындан вә аудио-видео вәсаитләрдән имкан дахилиндә даһа ҝениш истифадә едәк. Беләҹә, ҝөстәрәҹәјик ки, Мәсиһ кими, биз дә тәшкилатын вәсаитләринин сәмәрәли истифадә олунмасыны истәјирик.

19. Нә үчүн Мәсиһин рәһбәрлијинә табе олмалыјыг?

¹⁹ Мәсиһин рәһбәрлијинә вар ҝүҹүмүзлә табе олмаға чалышсаг, башгаларынын иманыны мөһкәмләндирәҹәк, һәмчинин бирлијә төһфә верәҹәјик. Андре гардаш Бејтел аиләси үзвләринин сајынын азалдылмасы илә бағлы едилән дәјишиклик барәдә гејд едир: «Кечмиш бејтеллиләрин бу дәјишиклијә ујғунлашараг ҝөстәрдији ҝөзәл әһвал-руһијјә Мәсиһин рәһбәрлијинә етибарымы, бу баҹы-гардашлара исә һөрмәтими бирә-беш артырды. Онлар алдыглары истәнилән тәјинатдан севинҹ дујмагла Јеһованын арабасы илә ајаглашырлар».

20, 21. а) Рәһбәримиз Мәсиһә нә үчүн етибар едә биләрик? б) Нөвбәти мәгаләдә һансы суалын ҹавабыны тапаҹағыг?

²⁰ Тәјин олунмуш Рәһбәримиз Иса Мәсиһ чох јахын заманда гәләбәсини баша вураҹаг вә һејбәтли ишләр ҝөрәҹәк (Вәһј 6:2; Зәб. 45:4). О вахта гәдәр исә, Мәсиһ Аллаһын халгыны јени дүнјаја һазырлајыр. Орада һәр биримиз дириләнләрә тәлим верәҹәк вә дүнјаны ҹәннәтә чевирәҹәјик.

²¹ Һәр нә вәзијјәтлә үзләшириксә үзләшәк, Падшаһымыза етибар етсәк, о, әбәди һәјата апаран јолда бизә ахыра кими бәләдчилик едәҹәк. (Зәбур 46:1—3 ајәләрини охујун.) Һәрдән дәјишикликләрә ујғунлашмаг әсл мүбаризә ола биләр, хүсусилә дә бу, ҝөзләмәдијимиз дәјишикликдирсә. Бәс белә һалларда Јеһоваја етибарымызы вә гәлб раһатлығымызы неҹә горуја биләрик? Нөвбәти мәгаләдә бу суалын ҹавабы ачыгланыр.