1, 2. Anong mga kadipisilan an napaatubang ki Josue pagkagadan ni Moises?

INIISIP-ISIP ni Josue an sinabi pa sana ni Jehova sa saiya: ‘An [lingkod] kong si Moises gadan na. Kaya ngunyan, bangon, magbalyo ka sa Jordan, ika saka an bilog na banwaan na ini, pasiring sa daga na itatao ko sa mga Israelita.’ (Jos. 1:1, 2, An Banal na Biblia) Bigla nanggad an pagbabagong ini para ki Josue na katabang ni Moises nin haros 40 taon!

² Haloy na panahon na nagin lider kan Israel si Moises, kaya tibaad inisip-isip ni Josue kun ano an magigin reaksiyon kan banwaan sa saiyang panginginot. (Deut. 34:8, 10-12) Mapadapit sa Josue 1:1, 2, nagsambit an sarong reperensiya sa Bibliya: “Kan suanoy asin sa modernong panahon, an pagsalida nin nanginginot an saro sa pinakadelikadong mga panahon kun dapit sa seguridad nin sarong estado.”

3, 4. Paano ta masasabi na dai napasala si Josue sa pagtitiwala sa Diyos, asin ano an tibaad ihapot niyato?

³ May rasonableng mga dahilan si Josue na mahadit, pero naggibo tulos siya nin desididong aksiyon. (Jos. 1:9-11) Dai siya napasala sa pagtitiwala niya sa Diyos. Arog kan ipinapahiling sa pagkasaysay sa Bibliya, talagang giniyahan ni Jehova si Josue asin an Saiyang banwaan na Israel  paagi sa sarong representanteng anghel. Rasonable sanang isipon na an anghel na ini iyo an Tataramon, an panganay na Aki nin Diyos.—Ex. 23:20-23; Juan 1:1.

⁴ Sa tabang ni Jehova, nagin madali para sa mga Israelita na akuon an mga pagbabago kan pagsalida ni Josue ki Moises bilang lider. Nabubuhay man kita sa panahon na dakul nin mahalagang pagbabago, kaya tibaad ihapot niyato, ‘Mantang marikas na naghihiro an organisasyon nin Diyos, may marahay daw kitang mga dahilan na magtiwala ki Jesus bilang ninombrahan na Lider niyato?’ (Basahon an Mateo 23:10.) Mapadapit diyan, estudyaran ta kun paano pinanginutan ni Jehova an saiyang banwaan kaidto sa mga panahon nin pagbabago.

5. Anong pambihirang pangyayari an naeksperyensiyahan ni Josue kan harani na siya sa Jerico? (Hilingon an ritrato sa kapinunan kan artikulo.)

⁵ Dai nahaloy pakabalyo kan Israel sa Jordan, may pambihirang pangyayaring naeksperyensiyahan si Josue. Kan harani na siya sa Jerico, may nasabat siyang lalaki na may kapot na espada. Dai bisto ni Josue an lalaki, kaya hinapot niya ini: ‘Sa samuya ka o sa mga kaiwal mi?’ Nasurpresa si Josue kan magpamidbid ini. Siya mayong iba kundi an ‘[pamayo] kan hukbo ni Jehova’ na andam na protektaran an banwaan nin Diyos. (Basahon an Josue 5:13-15.) Sinasabi sa iba pang mga teksto kan iyo man sanang pagkasaysay na direktang nakipag-ulay si Jehova ki Josue, alagad mayong duda na nagtaram an Diyos paagi sa saiyang representanteng anghel arog kan parati niyang ginigibo kaidto.—Ex. 3:2-4; Jos. 4:1, 15; 5:2, 9; Gibo 7:38; Gal. 3:19.

6-8. (a) Taano ta garo baga bakong marahay sa paghiling nin tawo an pira sa mga instruksiyon ni Jehova? (b) Paano napatunayan na madunong asin tama sa panahon an mga instruksiyon na idto? (Hilingon man an nota sa ibaba.)

⁶ Tinawan kan anghel na Lider nin malinaw na mga instruksiyon si Josue kun paano sasakupon an siyudad nin Jerico. Kun hihilingon, garo baga bakong marahay na estratehiya an pira sa mga instruksiyon. Halimbawa, ipinagbuot ni Jehova na turion an gabos na lalaki kaya siguradong mayo sinda sa kondisyon na makilaban sa laog nin pirang aldaw. Iyan daw talaga an tamang panahon na turion an mga lalaking iyan?—Gen. 34:24, 25; Jos. 5:2, 8.

⁷ Posibleng inisip-isip kan mga suldados na Israelita kun paano ninda mapoprotektaran an saindang pamilya kun sakyadahon kan kalaban an kampo ninda. Dangan, bigla nindang nabaretaan na an Jerico ‘pinintuan na marhay huli sa mga Israelita.’ (Jos. 6:1) Bako daw na napakusog kan dai inaasahan na pangyayaring iyan an pagtitiwala ninda sa paggiya nin Diyos?

⁸ Saro pa, ipinagbuot sa mga Israelita na dai salakayon an Jerico kundi magmartsa sa palibot kan siyudad nin sarong beses kada aldaw sa laog nin anom na aldaw asin nin pitong beses sa ikapitong aldaw. Tibaad naisip kan ibang mga suldados, ‘Sayang sana an panahon asin kusog!’ Alagad aram na marhay kan dai nahihiling na Lider kan Israel an ginigibo niya. Huli sa estratehiya niyang ini, napakusog an pagtubod kan mga Israelita asin nailikay sinda kaiyan sa direktang pakikilaban sa makusog na mga parapakilaban kan Jerico.—Jos. 6:2-5; Heb. 11:30. *

9. Taano ta dapat niyatong sunudon an mga itinataong instruksiyon kan organisasyon nin Diyos? Magtao nin halimbawa.

⁹ Ano an manunudan ta sa istoryang ini? Tibaad dai niyato kun minsan lubos na nasasabutan an mga dahilan kan organisasyon sa mga pagbabagong ginigibo kaiyan. Halimbawa, tibaad kinuwestiyon niyato kan inot an paggamit nin mga gadyet sa personal na pag-adal, sa ministeryo, asin mga pagtiripon. Pero ngunyan, posibleng marhay na nahihiling na niyato an mga pakinabang kan  paggamit kaiyan kun posible. Kan inot tibaad may pagduda kita, alagad pag nahihiling ta na an marahay na mga resulta kan siring na mga pagbabago, nagkukusog an satong pagtubod asin lalo kitang nagkakasararo.

10. Siisay an nagdirehir kan mga bagay-bagay tanganing maisagibo kan namamahalang grupo an mahalagang miting sa Jerusalem?

¹⁰ Mga 13 taon pagkatapos na makumbertir si Cornelio, may mga Judiong Kristiyano pa man giraray na naniniwalang kahagadan an pagturi. (Gibo 15:1, 2) Kan magkaigwa nin dai pagkauruyon sa Antioquia, iinareglo na darahon ni Pablo sa namamahalang grupo sa Jerusalem an isyung iyan. Pero siisay an nagtao kan instruksiyon na iyan? Sinabi ni Pablo: “Nagduman ako huli sa sarong kapahayagan na itinao sa sako.” Malinaw na si Cristo an nagdirehir sa mga bagay-bagay tanganing resolberan kan namamahalang grupo an isyu.—Gal. 2:1-3.

11. (a) Dakul na taon pagkatapos na madesisyunan an isyu dapit sa pagturi, ano an padagos pa man giraray na ginibo kan dakul na Kristiyanong Judio? (b) Paano nabalo an pagigin andam ni Pablo na suportaran an kamagurangan sa Jerusalem? (Hilingon man an nota sa ibaba.)

¹¹ Sa paggiya ni Cristo, klinaro kan namamahalang grupo na bakong kahagadan sa mga Kristiyanong bakong Judio an pagpaturi. (Gibo 15:19, 20) Pero dakul na taon pagkatapos na madesisyunan iyan, dakul na Kristiyanong Judio an padagos na tinuturi an saindang mga aki. Kan madangog kan kamagurangan sa Jerusalem an naglalakop na uruistorya na si Pablo dai daa nagsusunod sa Katugunan ni Moises, tinawan ninda siya nin dai inaasahan na mga instruksiyon. * (Gibo 21:20-26) Sinabi ninda sa saiya na mag-iba nin apat na lalaki pasiring sa templo tanganing masabi kan mga tawo na ‘nag-uutob man kan Katugunan si Pablo.’ Puwede kutang kuwestiyunon ni Pablo kun taano man ta ipinapagibo ninda idto saiya asin idahilan na an problema yaon talaga sa mga Kristiyanong Judio na dai gayong nasasabutan an isyu dapit sa pagturi. Pero tanganing suportaran an kamawutan kan kamagurangan na magkasararo an mga tugang, mapakumbabang nagsunod si Pablo sa mga instruksiyon sa saiya. Alagad tibaad ihapot niyato, ‘Tinapos na kan kagadanan ni Jesus an Katugunan ni Moises, kaya taano ta tinugutan ni Jesus na magdanay an isyung ini sa halawig na panahon?’—Col. 2:13, 14.

12. Ano daw an posibleng dahilan kaya pinalihis ni Jesus an panahon bago resolberan an isyu dapit sa pagturi?

 ¹² An nagkapira kaipuhan nin panahon tanganing maako an paglilinaw sa pakasabot. Kinaipuhan kan mga Kristiyanong Judio nin igong panahon na mabago an saindang pagmansay. (Juan 16:12) May mga nadipisilan na akuon na bako nang tanda nin espesyal na relasyon sa Diyos an pagturi. (Gen. 17:9-12) An iba man natatakot na persegiron kaya nagduduwa-duwa sinda na mapalain sa saindang Judiong komunidad. (Gal. 6:12) Pero sa paglihis nin panahon, nagtao si Cristo nin dagdag na mga instruksiyon paagi sa ipinasabong na mga surat ni Pablo.—Roma 2:28, 29; Gal. 3:23-25.

13. Ano an makakatabang sa sato na masabutan an panginginot ni Cristo ngunyan?

¹³ Pag dai niyato lubos na nasasabutan an mga dahilan sa likod kan pirang mga pagbabago sa organisasyon, marahay na hurop-hurupon niyato kun paano si Cristo nanginot kaidto. Kan panahon ni Josue o maski kan inot na siglo, pirming nagtatao si Cristo nin madunong na paggiya tanganing protektaran an bilog na banwaan nin Diyos, pakusugon an saindang pagtubod, asin pagdanayon an pagkasararo kan mga lingkod nin Diyos.—Heb. 13:8.

14-16. Paano malinaw na nahihiling sa paggiyang itinatao kan “maimbod asin mapagmansay na uripon” an pagmalasakit ni Cristo sa satong espirituwalidad?

¹⁴ An mamumuton na pagmalasakit ni Jesus sa satong espirituwalidad malinaw na nahihiling sa napapanahon na paggiya na itinatao kan “maimbod asin mapagmansay na uripon.” (Mat. 24:45) Si Marc na may apat na aki nagsabi: “Pinupurbaran ni Satanas na paluyahon an mga kongregasyon paagi sa pag-atake sa mga pamilya. Ngunyan na dinadagka kita na magkondukta nin pampamilyang pagsamba kada semana, malinaw an mensahe sa mga payo nin pamilya—protektaran nindo an saindong pamilya!”

¹⁵ Pag nahihiling ta kun paano kita ginigiyahan ni Cristo, namamatian ta na interesado siyang marhay sa pag-uswag niyato sa espirituwal. Sinabi ni Patrick na naglilingkod bilang elder: “Kan primero, para sa iba nakakapangluya na magtiripon bilang sadit na grupo sa pagluwas sa langtad pag Sabado asin Domingo. Pero malinaw na nahihiling sa areglong ini an saro sa panginot na kuwalidad ni Jesus—an saiyang interes sa mga maluya. Mas namamatian kan mga masusupgon o kan bako gayong aktibong mga tugang na pinapahalagahan asin nakakatabang sinda, kaya nag-uswag sinda sa espirituwal.”

¹⁶ Apuwera sa pag-asikaso sa satong espirituwal na mga pangangaipo, tinatabangan man kita ni Cristo na magdanay na nakapokus sa pinakamahalagang gibuhon ngunyan sa daga. (Basahon an Marcos 13:10.) Pirming listo si André, na bagong nombrahan na elder, sa mga pagbabago sa laog kan organisasyon nin Diyos. Sinabi niya: “Ipinapagirumdom sa sato kan pagbawas sa mga naglilingkod sa sangang opisina an pagigin apurado kan satong panahon asin na kaipuhan niyatong gamiton an bilog tang kusog sa paghuhulit.”

17, 18. Taano ta marahay na hurop-hurupon an mga pakinabang kan pagsunod sa dai pa sana nahahaloy na mga pagbabago?

¹⁷ Arog kan ipinapahiling kan saiyang aktibong pagdirehir, an pinatukaw nang Hadi niyatong si Jesu-Cristo siyertong nag-aandam para sa maabot na panahon. Kaya, mag-ugma kita sa mga bendisyon na nakakamtan ta huli sa pagsunod sa dai pa sana nahahaloy na mga pagbabago. Puwedeng makapakusog kun pag-uulayan nindo sa saindong pampamilyang pagsamba kun paano kamo nakinabang sa mga pagbabago sa semanal na mga pagtiripon o sa ministeryo.

¹⁸ Kun nasasabutan niyato an pinakakatuyuhan kan itinatao sa satong mga instruksiyon hali sa organisasyon ni Jehova asin an mga pakinabang ta diyan, posibleng marhay na susunudon ta nin may kagaya-gayahan an paggiyang iyan. Siguradong  ikinakaugma niyato na nakakatipid kita nin pondo sa pagbawas sa iniimprentang mga literatura; asin nakakatabang sa sato an paggamit nin bagong teknolohiya na mapalakop an gibuhon na pang-Kahadian sa bilog na daga. Nakakatabang man iyan sa sato sa pagpalakop kan gibuhon na pang-Kahadian sa bilog na daga. Kaya tibaad mas marahay kun urog niyatong gagamiton an mga elektronikong publikasyon asin mga video saka audio rekording kun posible. Paagi kaiyan, maipapahiling ta an kaisipan ni Cristo dapit sa madunong na paggamit kan pondo kan organisasyon.

19. Taano ta dapat niyatong suportaran an paggiya ni Cristo?

¹⁹ Kun maigot niyatong sinusuportaran an paggiya ni Cristo, napapakusog ta an pagtubod kan iba asin nakakatabang kita sa pagkasararo. Sa paghurop-hurop dapit sa pagbawas sa mga miyembro kan pamilyang Bethel sa bilog na kinaban, sinabi ni André: “Huli sa marahay na sabuot na ipinapahiling kan mga dating Bethelite na nagsunod sa siring na mga pagbabago, nakakamati ako nin pagtitiwala sa panginginot ni Cristo asin paggalang sa sainda. Nakikisabay sinda sa karwahe ni Jehova paagi sa pagigin magaya-gaya sa ano man na asignasyon na itao sa sainda.”

20, 21. (a) Taano ta makakapagtiwala kita ki Cristo, an satong Lider? (b) Anong hapot an pag-uulayan ta sa sunod na artikulo?

²⁰ An ninombrahan na Lider niyato na si Jesu-Cristo madali nang “lubuson an saiyang pandadaog” asin “[gumibo] nin makangangalas na mga bagay.” (Kap. 6:2; Sal. 45:4, NW) Miyentras tanto, inaandam niya an banwaan nin Diyos para sa panahon pagkalihis kan sistemang ini nin mga bagay pag an lambang saro sa sato makikikabtang na sa dakulaon na gibuhon na pagtutukdo asin pagtugdok na mangyayari sa panahon kan pagbuhay liwat.

²¹ Magigin mapanggana an satong linahidan na Hadi sa panginginot sa sato pasiring sa bagong kinaban kun papagdanayon niyatong bilog an satong tiwala sa saiya sa ibong kan mga pagbabago sa satong kamugtakan. (Basahon an Salmo 46:1-3.) Kun minsan, tibaad masakitan kita sa mga pagbabago lalo na pag biglang nagbago an satong kamugtakan. Kun mangyari iyan, paano niyato mapapagdanay an satong panglaog na katuninungan asin bilog na pagtitiwala ki Jehova? An hapot na ini an pag-uulayan ta sa sunod na artikulo.