1, 2. Apré mò a Moyiz, ki misyon enpòwtan Bondyé ba Joziyé ?

JÉOVA té di Joziyé : « Sèwvitè an mwen Moyiz, mò. Kifè konnyéla, alé, travèsé Jouden-la, vou é tout pèp-la, é rantré adan péyi-la an ka ba-yo la » (Joz. 1:1, 2). Mi on chanjman pou Joziyé, ki rété bwadwat a Moyiz pannan prèskè 40 an !

² Konm Moyiz rété bon enpé tan ka dirijé Izrayèl, Joziyé dwèt té ka mandé-y si pèp-la té’é aksèpté-y antankè gid (Dét. 34:8, 10-12). On èspésyalis a Labib fè on rèmak asi sa ki maké an Joziyé 1:1, 2. I èspliké kè, ki sé an tan lontan, ki sé a épòk an nou, on moman ki pli danjéré é ki pli rèd pou on nasyon, sé lè dirijan-la ka chanjé.

3, 4. a) Joziyé fè Jéova konfyans. Ès i té ni rézon dè fè sa ? b) A ki kèsyon nou ké réponn ?

³ Joziyé dwèt té enkyèt é nou pé konprann sa. Men i fè Jéova konfyans é i pa tadé pou fè sa Jéova té mandé-y fè (Joz. 1:9-11). É konm i fè Jéova konfyans, Jéova béni-y é i sèvi èvè on zanj pou pé sa gidé-y é pou pé sa gidé pèp-la. Nou andwa dè pansé kè zanj-lasa sé sila yo ka kriyé Pawòl-la, prèmyé Gason a Bondyé (Ègz. 23:20-23 ; Jan 1:1).

 ⁴ Grasa Jéova, Izrayèl aksèpté kè Joziyé vin chèf an plas a Moyiz. A épòk an nou osi, ni onlo gwo chanjman ki ka fèt. Pétèt an tèt an nou, nou ka di : « A pa ti vit òwganizasyon a Jéova kay vit ! Ès nou pé ni konfyans adan dirèksyon-la kè chèf an nou, Jézikri, ka ban-nou ? » (li Matyé 23:10). Pou réponn a kèsyon-lasa, an-nou vwè kijan, an tan lontan, Jéova dirijé pèp a-y lè sété on péryòd a chanjman.

5. Kimoun Joziyé kontré toupré Jériko ? (gadé prèmyé imaj a awtik-la).

⁵ Apenn sé Izrayélit-la té travèsé Jouden-la, on biten ki pa ni labitid fèt rivé Joziyé. I té toupré Jériko é i enn vwè on nonm èvè on épé an men a-y. I ay owa a-y é i mandé-y : « Ou èvè nou oben ou èvè lènmi an nou ? » Lè boug-la di-y kè i sé « chèf a lawmé a Jéova », Joziyé rété sézi ! É i té paré pou i té défann pèp a Bondyé (li Joziyé 5:13-15 é li nòt-la). Bondyé sèvi èvè zanj-la pou i té palé ba Joziyé menmsi tibwen pli ho adan istwa-lasa, yo ka di kè sé Jéova ki té ka palé ba-y. É i ka sanm sa Bondyé sèvi èvè menm zanj-lasa pou palé ba-y dòt fwa ankò (Ègz. 3:2-4 ; Joz. 4:1, 15 ; 5:2, 9 ; Akt 7:38 ; Gal. 3:19).

6-8. a) Pétèt kè ni dé biten zanj-la mandé sé Izrayélit-la fè é ki parèt-yo étranj. Poukwa ? b) Sa zanj-la té mandé-yo fè la té plen sajès é sété méyè moman pou pran Jériko. Poukwa nou pé di sa ? (voyé on koudzyé asi nòt-la).

⁶ Zanj-la di Joziyé ègzaktèman ka pou i té fè pou i té pé sa pran Jériko. Adan on prèmyé tan, pétèt ni dé biten zanj-la di-y fè é kè i touvé on jan étranj. Pa ègzanp, zanj-la di Joziyé kè fò-y té siwkonsi tout sé sòlda-la. Sa ki té vlé di, kè pannan déotwa jou, yo pa té’é pé goumé. Ès sété vréman méyè moman-la pou siwkonsi sé sòlda-la ? (Jén. 34:24, 25 ; Joz. 5:2, 8).

⁷ Pétèt kè sé sòlda-la pozé-yo kèsyon-lasa : « Men si lènmi an nou ataké-nou, kijan nou ké fè pou pwotéjé fanmi an nou ? » Men olyé sé boug Jériko la ataké sé Izrayélit-la, yo touvé-yo pè. Mi sa nou ka li : « Akòz dè sé Izrayélit-la, pòt a Jériko té fèmé bon fèmé la menm ; ponmoun pa té ka sòti an vil-la é ponmoun pa té ka antré adan-y » (Joz. 6:1). Nouvèl-lasa dwèt ba sé Izrayélit-la plis konfyans ankò adan dirèksyon-la Bondyé té ka ba-yo la !

⁸ Anplisdisa, zanj-la té di sé Izrayélit-la pa ataké Jériko. Men fò-yo té fè lantou a vil-la on fwa pa jou pannan sis jou, é sétyèm jou-la, fò-yo té fè lantou a vil-la sèt fwa. Pétèt kè ni déotwa sòlda ki touvé kè sa té ka fè-yo pèd tan a yo é gaspiyé fòs a yo initilman. Men Chèf a Izrayèl, sila ponmoun pa té ka vwè la, té sav byen sa i té ka fè. Sé Izrayélit-la fè kon Jéova té di-yo fè. Non sèlman sa konsolidé fwa a yo, men anplisdisa, yo pa té ni a goumé èvè sé vayan sòlda la ki té Jériko la * (Joz. 6:2-5 ; Ébr. 11:30).

9. Poukwa fò-nou fè sa òwganizasyon-la ka mandé-nou fè ? Bay on ègzanp.

⁹ Ka istwa-lasa ka aprann-nou ? Pétèt kè défwa, ou pa’a konprann poukwa òwganizasyon-la ka pran tèl ou tèl désizyon. Pa ègzanp, lè yo té toufré di-nou kè nou té ké sèvi èvè zouti élèktronik pou étid pèwsonèl an nou, pou  prédikasyon an nou é pou sé réinyon-la, pétèt kè nou mandé-nou si sété vréman on bon lidé. Men jòdijou, nou ka konstaté kè sé zouti-lasa ka pòté on plis. Lè nou ka vwè bon rézilta chanjman-lasa ka pòté, sa ka konsolidé fwa an nou é nou ka pli soudé èvè frè é sè an nou.

10. Komité santral la fè on réinyon enpòwtan pou té réglé kèsyon a siwkonsizyon-la. An réyalité, kimoun ki jéré sitiyasyon-lasa ?

¹⁰ Trèz lanné apré Kòwnèy vin krétyen, ni dé frè Juif ki té ka kontinyé di kè fò tout sé krétyen-la siwkonsi (Akt 15:1, 2). Sé frè Antyòch-la pa té dakò ditou ditou yonn èvè lòt parapòt a kèsyon-lasa. Kifè, yo désidé kè Pòl té ké monté Jérizalèm pou pòté kèsyon-lasa douvan komité santral la. Men kimoun ki té dèyè do a désizyon-lasa ? Pòl ka ban-nou répons-la : « An monté pas Ségnè-la di-mwen on biten. » Sa té klè, sé Jézi ki té ka jéré sitiyasyon-la pou fè ansòt kè komité santral la rézoud pwoblèm-la (Gal. 2:1-3).

11. a) Ka sé krétyen juif la té ka kontinyé kwè anrapò èvè siwkonsizyon-la ? b) Kijan Pòl montré kè i té ka soutyenn sé ansyen Jérizalèm la ? (voyé on koudzyé asi nòt-la).

¹¹ Anba dirèksyon a Jézikri, komité santral la èspliké, on mannyè ki klè, kè on krétyen ki pa juif pa oblijé siwkonsi (Akt 15:19, 20). Magrésa, plizyè lanné apré, onlo krétyen ki té juif té ka kontinyé siwkonsi tigason a yo. Sé ansyen Jérizalèm la tann-di kè Pòl pa té ka suiv Lwa a Moyiz. Alò yo mandé-y fè on biten ki té ka montré kè i té ka rèspèkté Lwa-lasa * (Akt 21:20-26). Yo di-y pran kat boug èvè-y é ay an tanp-la, konsa sa té ké montré kè i té ka rèspèkté Lwa a Moyiz. Pétèt kè Pòl di : « Men sa pa ni pon sans ! A pa mwen ki ni on pwoblèm ! Sé plito sé krétyen juif la ki pa ka konprann kè siwkonsizyon-la pa nésésè ankò ! » Men Pòl byen konprann kè sa sé ansyen Jérizalèm la té vlé, sé kè tout  sé krétyen-la soudé. Alò, Pòl montré-y toupiti é i fè sa yo mandé-y. Men pétèt nou ka mandé-nou : « Poukwa Jézi pèwmèt kè pwoblèm-lasa diré tousa tan alòskè mò a-y aboli Lwa a Moyiz ? » (Kol. 2:13, 14).

12. Poukwa, pétèt, Jézikri lésé tan pasé avan i té réglé pwoblèm a siwkonsizyon-la ?

¹² Défwa, pou pé sa fè kò èvè on chanjman sa ka mandé on ti tan. Ni dé juif ki vin krétyen é ki té ni dimal a admèt kè yo pa té anba Lwa a Moyiz ankò (Jan 16:12). Pou yo, siwkonsizyon-la sété on sign ki té ka montré kè yo té ni on lanmityé èspésyal èvè Bondyé (Jén. 17:9-12). Ni sa ki té pè kè sé juif la pèwsékité-yo si yo pa té menm biten ki yo (Gal. 6:12). Men a bon moman-la, Jézikri sèvi èvè lèt a sé apòt-la pou ba-yo plis enstriksyon (Wom. 2:28, 29 ; Gal. 3:23-25).

13. Ka ki pé édé-nou aprésyé dirèksyon a Jézi jòdijou ?

¹³ Jòdijou osi, Jézikri sé Chèf a kongrégasyon-la. Sé pousa, lè ou pa’a konprann poukwa òwganizasyon-la ka fè tèl ou tèl chanjman, sa byen dè sonjé kijan Jézikri gidé pèp a Bondyé dan lèpasé. Ki sé an tan a Joziyé, ki sé o prèmyé syèk, Jézikri toujou gidé pèp a Bondyé pou pwotéjé-y, pou konsolidé fwa a-y é pou sèwvitè a Bondyé rété soudé (Ébr. 13:8).

14-16. Kijan désizyon a « èsklav fidèl é prévwayan la » ka montré kè Jézi vlé kè fwa an nou rété fò ?

¹⁴ Jòdijou, « èsklav fidèl é prévwayan la » ka ban-nou dirèksyon-la nou bizwen la a moman-la ki fo la (Mat. 24:45). Sa ka montré kè Jézi ka sousyé-y dè nou. Mi sa Mawk, ki ni kat timoun, ka di : « Pou Satan soukwé sé kongrégasyon-la, i ka ataké sé fanmi-la. Konnyéla, yo ka ankourajé sé fanmi-la étidyé Labib ansanm chak simenn. Mésaj-la klè : fò sé chèf a fanmi la pwotéjé fanmi a yo ! »

¹⁵ Lè nou ka vwè jan Jézi ka gidé-nou, nou ka santi kè sa i vlé sé kè fwa an nou rété fò. Mi sa Patrik, on ansyen, konstaté : « Odépa, lè yo di kè yo ké mété piti gwoup a prédikasyon an kongrégasyon-la, ni dé frè sa kasé dé bra a yo. » Men i di kè chanjman-lasa ka montré kijan Jézi ka pran swen a chakmoun an kongrégasyon-la. Pa ègzanp, ou ni dé frè é sè ki on tijan timid oben ki pa té ka gè sòti an prédikasyon é ki ka santi yo ni plis valè é yo pli itil konnyéla grasa chanjman-lasa. Sa ba-yo plis balan an prédikasyon-la.

¹⁶ Anplisdisa, Jézikri ka édé-nou rété konsantré si prédikasyon-la, ki sé travay pli enpòwtan la ki ka fèt asi latè jòdijou (li Mawk 13:10). André sé on frè ki toufré nonmé ansyen. I ka fè éfò pou i toujou okouran a sé désizyon-la òwganizasyon a Jéova ka pran la. I di konsa : « Yo désidé diminyé asi kantité moun ki ka travay adan sé bétèl-la. Sa ka fè-nou sonjé kè lafen toupré é kè fò-nou mèt tout fòs an nou adan travay a prédikasyon-la. »

17, 18. Ni dé chanjman ki fèt é nou fè kò èvè yo. Poukwa fò-nou pran on tan pou réfléchi si bon biten yo pòté ban nou ?

¹⁷ Jézi, ki sé Wa an nou, ka ban-nou on dirèksyon ki ka sèvi-nou dépi konnyéla é ki ka préparé-nou pou plita. Ni dé chanjman ki fèt dènyéman é ou fè kò èvè yo. Pran on tan pou-w réfléchi si bon biten yo ja pòté ba-w. Konnyéla,  sé réinyon-la é prédikasyon-la òwganizé ondòt jan. Ou pé palé dè jan sa édé fanmi a-w pannan étid familyal a-w.

¹⁸ Sa òwganizasyon a Jéova ka mandé-nou fè toujou ka pòté on plis pou nou. Si nou pa jen oubliyé sa, sa ké pli fasil pou nou apliké sa i ka di-nou é nou ké fè sa èvè tchè-kontan. Pa ègzanp, konnyéla nou ka sèvi èvè tablèt. Sèten nou kontan pas sa ka fè-nou itilizé mwens papyé, kifè òwganizasyon-la ka fè on bèl ékonomi. Grasa sa, prédikasyon a bon nouvèl la ka fè douvan. Ès ou té’é pé sèvi èvè sé piblikasyon élèktronik la plis ankò ? Lè ou ka fè sa, ou ka soutyenn Jézikri. I vlé pa nou gaspiyé sa lòwganizasyon ni.

19. Poukwa fò-nou suiv dirèksyon-la Jézi ka ban-nou la ?

¹⁹ Lè nou ka suiv dirèksyon-la Jézikri ka ban-nou la, nou ka édé frè é sè an nou konsolidé fwa a yo é nou ka édé-yo vin pli soudé. Yo diminyé asi kantité moun ki ka viv adan sé Bétèl-la é anrapò èvè sa, André di : « Sé frè é sè la ki kité Bétèl-la byen pran sa menm. Atitid a yo ban-mwen plis konfyans é plis rèspé. Yo ka avansé a menm vitès ki cha a Jéova é kèlkèswa sa ou ka mandé-yo fè, yo kontan fè-y. »

20, 21. a) Jézikri sé Chèf an nou. Poukwa nou pé fè-y konfyans ? b) A ki kèsyon nou ké réponn adan awtik-la ki ka vin la ?

²⁰ Talè, Chèf an nou Jézikri ké « fin gangné konba-la » é i ké « fè dé biten èstraòwdinè » (Rév. 6:2 ; Sòm 45:4). Men dépi konnyéla, i ka fòwmé-nou pou nou viv adan mond nouvo la é pou nou fè travay-la nou ké ni a fè la : anségné sé résisité-la é fè latè vin on paradi.

²¹ Kèlkèswa chanjman-la ki fèt la, si nou ka fè Wa an nou konfyans, i ké fè-nou rantré adan mond nouvo la (li Sòm 46:1-3). Lèwvwè ni chanjman, sa pé rivé kè nou ni dimal a fè kò èvè sé chanjman-lasa, siwtou si sa ka boulvèsé vi an nou. Lè nou ka touvé-nou adan on sitiyasyon konsa, ka nou pé fè pou lèspri an nou rété trankil é pou fwa an nou rété fò ? Nou ké réponn a kèsyon-lasa adan awtik-la ki ka vin la.