1, 2. Sang mapatay si Moises, ano nga mabudlay nga hilikuton ang dapat himuon ni Josue?

SI Jehova nagsiling kay Josue: “Patay na ang akon alagad nga si Moises. Maghanda ka kag magtabok sa Jordan upod ang tanan nga katawhan sang Israel kag magkadto kamo sa duta nga ihatag ko sa ila.” (Jos. 1:1, 2) Hinali lang nga nagbag-o ang kabuhi ni Josue, nga alagad anay ni Moises sing halos 40 ka tuig!

² Bangod malawig nga tion nga nangin lider sang Israel si Moises, mahimo ginapamensar ni Josue kon ano ang mangin reaksion sang katawhan sa iya pagpanguna. (Deut. 34:8, 10-12) Amo ini ang ginsiling sang isa ka reperensia sa Biblia parte sa Josue 1:1, 2: “Halin sang una asta subong, ang pagbulos sang bag-o nga lider ang isa sa pinakamabudlay kag pinakadelikado nga tion sang pungsod.”

3, 4. Ngaa masiling naton nga husto gid nga nagsalig si Josue sa Dios, kag ano ang mahimo naton ipamangkot?

³ May rason si Josue nga mabalaka. Pero pagligad sang pila lang ka adlaw, gintuman niya ang sugo ni Jehova. (Jos. 1:9-11) Husto gid nga nagsalig sia kay Jehova. Suno sa rekord sang Biblia, gintuytuyan  ni Jehova si Josue kag ang Iya katawhan, ang Israel, paagi sa isa ka anghel. Mahimo gid nga ini nga anghel amo ang Pulong, ang panganay nga Anak sang Dios.—Ex. 23:20-23; Juan 1:1.

⁴ Paagi sa bulig ni Jehova, ginbaton sang Israel si Josue bilang ila bag-o nga lider. Sa aton tion subong, madamo man nga pagbag-o ang ginahimo. Gani mahimo maghunahuna kita, ‘Samtang madasig nga nagauswag ang organisasyon sang Dios, may maayo gid bala nga mga rason para magsalig kita kay Jesus bilang aton Lider?’ (Basaha ang Mateo 23:10.) Para masabat ini, binagbinagon naton kon paano ginpangunahan ni Jehova ang iya katawhan sang una sang tion nga may mga pagbag-o.

5. Sang malapit na si Josue sa Jerico, ano ang natabo? (Tan-awa ang piktyur sa umpisa sini nga artikulo.)

⁵ Wala madugay pagkatapos makatabok ang Israel sa Jordan, may natabo nga wala ginapaabot ni Josue. Sang malapit na sia sa Jerico, may nasugata sia nga isa ka lalaki nga nagauyat sing espada. Indi niya kilala ang lalaki, gani ginpamangkot niya sia: “Dampig ka bala sa amon ukon sa amon mga kaaway?” Nakibot si Josue sang ginsugid sa iya sang lalaki kon sin-o sia. Sia ang “pangulo sang kasuldadusan ni Jehova,” kag handa sia nga amligan ang katawhan sang Dios. (Basaha ang Josue 5:13-15.) Bisan pa nga ang iban nga teksto sa Biblia nagsiling nga si Jehova ang nagpakighambal kay Josue, pat-od gid nga naghambal ang Dios paagi sa iya anghel, nga ginhimo man niya sang una.—Ex. 3:2-4; Jos. 4:1, 15; 5:2, 9; Binu. 7:38; Gal. 3:19.

6-8. (a) Ngaa ang pila ka instruksion ni Jehova daw indi maayo sa pagtamod sang mga tawo? (b) Ngaa masiling naton nga maalamon kag suno gid sa tion ang mga instruksion sang Dios? (Tan-awa man ang footnote.)

⁶ Maathag ang instruksion sang anghel kay Josue kon paano pierdihon ang siudad sang Jerico. Sa umpisa, ang pila ka instruksion daw indi maayo nga estratehiya sa inaway. Halimbawa, nagsugo si Jehova nga tulion ang tanan nga lalaki. Pero kon matuli na sila, indi sila makapakig-away sing pila ka adlaw. Amo gid bala ini ang pinakamaayo nga tion para tulion ini nga mga lalaki?—Gen. 34:24, 25; Jos. 5:2, 8.

⁷ Mahimo gid nga nagpalibog ang mga soldado sang Israel kon paano nila amligan ang ila pamilya kon salakayon sila sang ila mga kaaway. Pero hinali lang nga nabalitaan nila nga “ginsirhan sing maayo ang Jerico bangod sang mga Israelinhon.” (Jos. 6:1) Bangod sa sining wala ginapaabot nga hitabo, naglig-on pa gid ang ila pagsalig sa pagtuytoy sang Dios.

⁸ Ginsugo man ang mga Israelinhon nga indi pagsalakayon ang Jerico. Sa baylo, libuton nila ang siudad sing makaisa kada adlaw sa sulod sang anom ka adlaw, kag sing pito ka beses sa ikapito nga adlaw. Ang pila ka soldado mahimo naghunahuna, ‘Uyang lang ini sing tion kag kusog!’ Pero si Jehova nga Lider sang Israel kabalo gid sang iya ginahimo. Bangod sang iya estratehiya, naglig-on ang pagtuo sang mga Israelinhon kag nalikawan nila nga magpakig-away sa isganan nga mga soldado sang Jerico.—Jos. 6:2-5; Heb. 11:30. *

9. Ngaa dapat naton sundon ang mga instruksion halin sa organisasyon sang Dios? Maghatag sing halimbawa.

⁹ Ano ang matun-an naton sa sini? Mahimo nga kon kaisa wala naton nahangpan sing bug-os ang mga rason sa ginahimo nga mga pagbag-o sa organisasyon. Halimbawa, mahimo nagabatyag kita sang una nga indi maayo nga gamiton ang mga gadyet para sa personal nga pagtuon, sa ministeryo, kag sa mga miting. Pero subong, nakita naton ang mga bentaha sini. Kon makita naton ang mga benepisyo  sang mga pagbag-o, nagabakod ang aton pagtuo kag paghiusa.

10. Sin-o ang nagpaposible nga matabo ang importante nga miting sang nagadumala nga hubon sa Jerusalem?

¹⁰ Pagligad sang mga 13 ka tuig pagkatapos makumbertir si Cornelio, ang pila ka Judiyo nga mga Cristiano nagainsister gihapon nga kinahanglan ang pagpatuli. (Binu. 15:1, 2) Sa siudad sang Antioquia, nagbaisay ang mga kauturan parte sa sini. Gani ginpakadto si Pablo sa nagadumala nga hubon sa Jerusalem. Pero ngaa? Si Pablo nagsiling: “Ginhimo ko ini kay ginpahayag sa akon paagi sa bugna nga mataklad ako didto.” Maathag nga ang Cristo amo ang nagpaposible nga dalhon ini nga isyu sa nagadumala nga hubon para sila ang magsolbar sini.—Gal. 2:1-3.

11. (a) Ano ang ginainsister sang Judiyo nga mga Cristiano parte sa pagpatuli? (b) Paano natilawan ang kahanda ni Pablo nga sakdagon ang mga gulang sa Jerusalem? (Tan-awa man ang footnote.)

¹¹ Gintuytuyan sang Cristo ang nagadumala nga hubon para athagon nga indi na kinahanglan tulion ang indi Judiyo nga mga Cristiano. (Binu. 15:19, 20) Pero pagligad sang pila ka tuig, madamo nga Judiyo nga mga Cristiano ang nagatuli gihapon sa ila kabataan. Sang nabatian sang mga gulang sa Jerusalem ang huringhuring nga wala kuno ginatuman ni Pablo ang Mosaikong Kasuguan, may ginpahimo sila kay Pablo nga wala niya ginapaabot. * (Binu. 21:20-26) Ginsilingan nila si Pablo nga updon ang apat ka lalaki sa templo. Dayon tinluan nila ang ila kaugalingon paagi sa seremonya para makita sang mga tawo nga “ginatuman [niya] ang Kasuguan.” Puede kuntani kuestyunon ni Pablo ang ila desisyon, kag mahimo niya isiling nga ang may problema amo ang Judiyo nga mga Cristiano kay wala nila mahangpan sing maayo ang isyu parte sa pagpatuli. Pero, ginsakdag ni Pablo ang handum sang mga gulang nga maghiusa ang mga kauturan, gani mapainubuson niya nga gintuman ang ginpahimo sa iya. Mahimo magpalibog kita, ‘Ngaa gintugutan ni Jesus  nga magdugay ini nga isyu bisan pa wala na ginpatuman ang Mosaikong Kasuguan sang napatay sia?’—Col. 2:13, 14.

12. Ano ang posible nga mga rason kon ngaa gintugutan sang Cristo nga magligad ang tion antes solbaron ang isyu sa pagpatuli?

¹² May pila nga nagakinahanglan sing tion para batunon ang bag-o nga mga paghangop. Ang Judiyo nga mga Cristiano nagkinahanglan sing tion para bag-uhon ang ila pagtamod. (Juan 16:12) Ang pila nabudlayan sa pagbaton nga ang pagtuli indi na isa ka tanda sang maayo nga kaangtanan sa Dios. (Gen. 17:9-12) Ang iban nahadlok nga basi hingabuton sila kon tuhay ang ila panindugan sa iban nga mga Judiyo. (Gal. 6:12) Pero pagligad sang tion, naghatag ang Cristo sing dugang nga panuytoy paagi sa mga sulat ni Pablo.—Roma 2:28, 29; Gal. 3:23-25.

13. Ano ang makabulig sa aton para sakdagon naton ang pagpanguna sang Cristo subong?

¹³ Kon wala naton nahangpan sing bug-os ang mga rason sa mga pagbag-o sa organisasyon, maayo gid nga pamalandungan naton kon paano ginpangunahan sang Cristo ang katawhan sang Dios sang una. Sang panahon ni Josue kag sang unang siglo, ang Cristo nagahatag pirme sing maalamon nga panuytoy para amligan ang katawhan sang Dios, para pabakuron ang ila pagtuo, kag para mahuptan ang ila paghiusa.—Heb. 13:8.

14-16. Paano ang mga panuytoy sang “matutom kag mainandamon nga ulipon” nagapamatuod nga nagaulikid ang Cristo sa aton espirituwalidad?

¹⁴ Ginaulikdan gid ni Jesus ang aton espirituwalidad, kag makita ini sa suno sa tion nga mga panuytoy sang “matutom kag mainandamon nga ulipon.” (Mat. 24:45) Si Marc, nga may apat ka bata, nagsiling: “Para magluya ang kongregasyon, ginasalakay ni Satanas ang mga pamilya. Gani ginapalig-on gid ang paghiwat sang pangpamilya nga pagsimba kada semana, kag maathag nga ginapahanumdom sini ang mga ulo sang pamilya nga amligan gid ang ila pamilya!”

¹⁵ Kon makita naton kon paano kita ginatuytuyan sang Cristo, mahangpan naton nga luyag niya nga mag-uswag kita sa espirituwal. Si Patrick, nga isa ka gulang, nagsiling: “Sa umpisa, ang iban wala nanamian nga magtipon bilang gamay nga grupo kon Sabado kag Domingo para magbantala. Pero makita sa sini nga kahimusan ang isa ka maayo nga kinaiya ni Jesus nga amo ang pag-ulikid sa mga kubos. Ang mahuluy-on kag indi masyado aktibo nga mga kauturan nakabatyag nga may mahimo sila kag mabulig, gani nag-uswag sila.”

¹⁶ Magluwas sa pag-aman sang aton espirituwal nga mga kinahanglanon, ginabuligan man kita sang Cristo nga isentro ang aton kabuhi sa pinakaimportante nga hilikuton sa kalibutan subong. (Basaha ang Marcos 13:10.) Si André, nga isa ka bag-o nga gulang, nagatuman dayon sa bag-o nga mga panuytoy halin sa organisasyon sang Dios. Nagsiling sia: “Ang pagpang-iban sang mga boluntaryo sa mga sanga talatapan nagapahanumdom sa aton nga hilingagawon na gid ang tion kag dapat naton gamiton ang aton kusog sa pagbantala.”

17, 18. Paano makabulig sa aton ang pagpamalandong sa mga benepisyo sang ginsunod naton ang mga pagbag-o sa organisasyon?

¹⁷ Ang mga panuytoy sang aton Hari, si Jesucristo, makabulig sa aton subong kag sa palaabuton. Gani, dapat kita malipay sa mga benepisyo sang ginsunod naton ang mga pagbag-o sa organisasyon. Sa inyo pangpamilya nga pagsimba, mapalig-on gid kamo kon binagbinagon ninyo ang mga benepisyo sang mga pagbag-o nga ginhimo sa aton mga miting kag ministeryo.

 ¹⁸ Kon mahangpan naton ang rason sa mga instruksion halin sa organisasyon ni Jehova kag makita naton ang benepisyo sini, mahimo gid nga malipay kita nga sundon ini. Halimbawa, pat-od gid nga nalipay kita nga nakakinot kita sang kuarta bangod gin-ibanan naton ang kadamuon sang aton ginaimprinta nga mga literatura; kag ginagamit naton ang bag-o nga mga teknolohiya para mapalapnag ang hilikuton sang Ginharian sa bilog nga kalibutan. Kon pamalandungan naton ini, mahimo mapalig-on kita nga maggamit sing gadyet para sa aton mga publikasyon, mga video, kag mga audio recording kon posible. Paagi sini, masakdag naton ang Cristo sa maalamon nga paggamit sang pondo sang organisasyon.

19. Ngaa dapat naton sakdagon ang panuytoy sang Cristo?

¹⁹ Kon ginasakdag gid naton ang panuytoy sang Cristo, ginapabakod naton ang pagtuo sang iban kag ang aton paghiusa. Ginpamalandungan ni André ang pagpang-iban sang mga Bethelite sa bilog nga kalibutan, kag nagsiling sia: “Nagadayaw gid ako sa maayo nga panimuot sang mga Bethelite anay sa sini nga mga pagbag-o kag nagpalig-on ini sang akon pagsalig. Nagadungan sila sa kangga ni Jehova kag nalipay sila sa bisan ano nga asaynment nga ihatag sa ila.”

20, 21. (a) Ngaa makasalig kita sa Cristo nga aton Lider? (b) Ano nga pamangkot ang binagbinagon naton sa masunod nga artikulo?

²⁰ Sa indi madugay, si Jesucristo nga aton Lider ‘magalutos sing bug-os sa iya mga kaaway’ kag ‘magahimo sia sing makahalawhaw nga mga buhat.’ (Bug. 6:2; Sal. 45:4) Pero subong pa lang, ginahanda na niya ang katawhan sang Dios para sa kabuhi sa bag-ong kalibutan kag para himuon ang mga hilikuton didto, nga amo ang pagtudlo sa mga pagabanhawon kag paghimo sang duta nga paraiso.

²¹ Kon nagasalig gid kita sa aton Hari bisan pa sang mga pagbag-o, buligan niya kita nga makasulod sa bag-ong kalibutan. (Basaha ang Salmo 46:1-3.) Kon kaisa, mahimo nabudlayan kita sa mga pagbag-o, ilabi na kon wala naton ini ginapaabot. Kon matabo ini, paano naton mahuptan ang kalinong sa hunahuna kag mabakod nga pagsalig kay Jehova? Binagbinagon naton ini nga pamangkot sa masunod nga artikulo.