1, 2. Ang’o ma Joshua ne nyaka nyagrego bang’ ka Musa nosetho?

JOSHUA nobedo jakony Musa kuom higni ma hawo 40. Ka Musa nosetho, Jehova nonyiso Joshua weche moko ma noloko kit ngimane apoya nono. Nonyise niya: ‘Musa jatichna osetho; e momiyo koro a malo, iidh loka Jordan, in kod jogi duto, udonj e pinyno ma amiyo nyithind Israel.’ (Jos. 1:1, 2) Joshua nosiko ka paro wechego!

² Nikech Musa nosebedo ka tayo Jo-Israel kuom higni mang’eny, nyaka bed ni Joshua ne parore ni to jo Nyasaye ne dhi rwako nade yo ma nodhi tayogigo. (Rap. 34:8, 10-12) Buk moro ma lero weche Muma wuoyo kuom ndiko mar Joshua 1:1, 2 kowacho kama: “Chakre kinde machon nyaka sani, sa asaya ma owil jatelo e piny moro amora, weche mag arita kue e pinyno bedoga e akerekeke.”

3, 4. Ere kaka wang’eyo ni geno ma Joshua nogenogo kuom Nyasaye ne ni kare, to en penjo mane ma wanyalo penjore?

³ Kuom adier, nitie gik ma ne nyalo miyo Joshua luoro, kata kamano, bang’ ndalo manok, nokawo okang’ ma ne dwarore. (Jos.  1:9-11) Geno ma nogenogo kuom Nyasaye ne ni kare. Muma lero ni Jehova notiyo gi malaika moro e tayo Joshua gi Jo-Israel. Nenore maler ni malaikano ne en Wuod Nyasaye makayo, miluongo bende ni Wach.​—Wuok 23:20-23; Joh. 1:1.

⁴ Jehova nokonyo Jo-Israel e yo maber mi kinde mar loko jatelo okalo mayom, kendo ji noyie gi Joshua. Wan be wadak e kinde ma lokruok timore mang’eny, omiyo, seche moko wanyaloga penjore ni, ‘Nikech riwruok mar oganda Jehova ringo ng’wech kendo lokruok timore mang’eny, ang’o ma nyalo konyowa bedo gadier ni Yesu Kristo tayowa maber?’ (Som Mathayo 23:10.) Ne ane yo ma Jehova notiyogo e tayo joge e kinde mokalo e seche ma lokruok madongo ne timore.

5. Ang’o ma notimore ne Joshua ka ne en but Jeriko? (Ne picha manie chak sulani.)

⁵ Mapiyo bang’ ka Jo-Israel noseng’ado Aora Jordan, Joshua nopo korodhno gi ng’at moro but Jeriko. Ng’atno noting’o ligangla mosewuodh chuth. Nikech Joshua nokiae, Joshua nopenje kama: “In jakorwa, koso in jakor jowasikwa?” Joshua nohum ahinya ka ne ng’atno ofulorene. Kare ng’atno ne en “jaduong’ oganda [lweny] mar Jehova” kendo noikore kedo ne jo Nyasaye. (Som Joshua 5:13-15.) Kidhi nyime somo siganano, ibiro fwenyo ni kuonde moko nenore ka gima Jehova ne wuoyo gi Joshua achiel kachiel, kata kamano, Jehova notiyo gi malaikane e wuoyo kode, mana kaka nosetimo gi jotichne mamoko e kinde ma nosekalo.​—Wuok 3:2-4; Jos. 4:1, 15; 5:2, 9; Tich 7:38; Gal. 3:19.

6-8. (a) Ang’o momiyo moko kuom gik ma Jehova nonyiso Jo-Israel ni otim, ne nyalo nenore ka gik ma nono gi pach dhano? (b) Ang’o ma nyiso ni paro ma ne Jehova ochiwo ne en paro ma riek kendo ma nobiro e sa mowinjore? (Ne bende weche moler piny.)

⁶ Jehova nosebedo ka nyiso Joshua weche ma nonego oluw mondo gikaw taon mar Jeriko. Moko kuom gik ma nonyise ni otim ne ok nenre ka gik ma ne nyalo konyo. Kuom ranyisi, Jehova nogolo chik mondo ter chwo duto nyange, ma en gima ne dhi miyo chwogo ok nyal kedo kuom ndalo buora. Be mano gima ne onego otim sama ne weche tek kamano adier?​—Cha. 34:24, 25; Jos. 5:2, 8.

⁷ Ka noseter chwo duto nyange moriwo nyaka jokedo mag Israel, nyaka bed ni jokedogo ne parore kaka ne gidhi geng’o ne joodgi masira ka po ni jowasigu omonjogi. Kata kamano, apoya nono, ne giyudo ripot ni joma nodak Jeriko nolorore matek e i taondno nikech ne giluoro Jo-Israel. (Jos. 6:1) Onge kiawa ni luwo kaka Nyasaye nonyisogi kendo neno kaka weche nodhi nyamonge nomiyo gimedo bedo gi geno kuome!

⁸ Gima chielo ma ne onyis Jo-Israel en ni kik gimonj Jeriko achiel kachiel, to kar mano, gilwor dalano dichiel pile pile kuom odiechienge auchiel, kae to e odiechieng’ mar abiriyo gilwore dibiriyo. Samoro jokedo moko nowacho e chunygi ni, ‘Mae ketho sa gi muya manadeni!’ Kata kamano, Jatelo sie-sie ma ne tayo Jo-Israel nong’eyo gima notimo. Paro ma nochiwono notiyo maber ahinya kendo notego yie mar Jo-Israel. Jokedo be chunygi noyueyo nikech koro ne ok gikedo gi jolweny mag Jeriko ma ne roteke ahinya.​—Jos. 6:2-5; Hib. 11:30. *

9. Ang’o momiyo onego waluw gik ma riwruok mar oganda Jehova nyisowa ni watim? Chiw ane ranyisi.

⁹ Ang’o ma wapuonjore? Nitie kinde ma wanyalo hum nono gi lokruok moko ma  riwruok mar oganda Jehova timo kata weche ma inyisowa ni waluw. Kuom ranyisi, ka ne ochak yienwa tiyo gi simu, tablet, kata kompyuta mag lwedo e puonjruok, e lendo, kod e chokruok, nyalo bedo ni ne wawuoro awuora kuma riwruok mar oganda Jehova ochomo kodwa. Sani to koro waneno ber mar tiyo gi gigo. Sama wafwenyo ber ma lokruogego kelo kata ka po ni ne wakwongo wahum matin, yiewa medo bedo motegno kendo wasiko e winjruok achiel kaka jo Jehova.

10. En ng’a ma notayo weche mondo oter wach nyange ir bura matayo ma ne ni Jerusalem?

¹⁰ Gimoro higni 13 bang’ ka Kornelio nosebedo Jakristo, Jo-Yahudi moko pod nokaso jopuonjre gi wach nyange. (Tich 15:1, 2) Ka ne ywaruok obetie Antiokia, ne otim chenro mondo Paulo oter wachno ir bura matayo ma ne ni Jerusalem. To chutho-chutho, ng’a ma notimo chenrono? Paulo nowacho kama: “Ne aidho kuno nikech fweny moro ma nobirona.” Mano nyiso maler ni Kristo e ma notayo weche mondo oter wachno ir bura matayo.​—Gal. 2:1-3.

11. (a) Wach tero ji nyange nodhi nyime kelo chandruok mage e kind Jokriso ma Jo-Yahudi? (b) Ang’o ma notimore ma noketo Paulo e tem mar yiero ka be ne odhi winjo jodongo ma ne ni Jerusalem kata ooyo? (Ne bende sula monyis e weche moler piny.)

¹¹ Kristo notayo burano mi ong’ad ni ne onge tiende mondo oter Jokristo ma ok Jo-Yahudi nyange. (Tich 15:19, 20) Kata kamano, higni mang’eny bang’e, Jokristo mang’eny ma Jo-Yahudi pod ne tero nyithindgi nyange. Ka ne jodongo ma ne ni Jerusalem owinjo kaka nikuodho Paulo ni ok noluw Chike Musa e wach nyange, ne ginyise mondo otim gimoro ma nyalo kawowa gi wuoro. * (Tich 21:20-26) Ne ginyise ni odhi gi chwo ang’wen e hekalu kendo gipwodhre kanyo, mondo ji one ni Paulo ‘bende ne rito Chik.’ Paulo ne nyalo yiero tamore dhi kowacho ni Jokristo ma Jo-Yahudigo e ma nonego  orie, nikech pod ne ok giwinj adiera ma nosepuonjgi e wach nyange. Kata kamano, Paulo nong’eyo ni jodongogo ne dwaro ni otim kamano mondo kue gi winjruok obed e kind Jokristo, omiyo, notimo kaka ne ginyise. Samoro wanyalo penjore ni, ‘Ang’o momiyo Yesu noweyo mondo wach tero ji nyange okel ywaruok kuom kinde malach kata obedo ni thone nosetieko Chike Musa?’​—Kol. 2:13, 14.

12. Nyalo bedo ni ang’o momiyo Kristo noweyo mondo kinde malach okal ka pod wach nyange kelo ywaruok e kanyakla?

¹² Nitie joma nyalo kawo kinde malach ka pok girwako yo manyien molergo puonj moro. Jokristo ma Jo-Yahudi ne dwaro thuolo malach mondo e ka gilok pachgi. (Joh. 16:12) Moko kuomgi noyudo ka teknegi yie ni nyange koro ne ok nyis ni ng’ato nigi winjruok gi Nyasaye. (Cha. 17:9-12) Moko bende noluoro sand, e momiyo ne ok gidwar timo gik moko e yo mopogore gi Jo-Yahudi ma ne pok orwako yie. (Gal. 6:12) Mosmos, Kristo nomedo konyogi kokalo kuom barupe ma Paulo ne ndikonegi.​—Rumi 2:28, 29; Gal. 3:23-25.

13. Mondo waluw yo ma Kristo tayowago e kindewagi, ang’o monego wapar?

¹³ Sa asaya ma wayudo ka ok yotnwa winjo gimomiyo itimo lokruok moko e riwruok mar oganda Jehova, onego wapar kaka Kristo notayo jo Nyasaye e kinde mokalo. E kinde Joshua kod e kinde Jokristo mokwongo, Kristo nosiko ka tayo jo Nyasaye e yo mariek mondo oritgi kaka oganda, oteg yiegi, kendo omi gisik ka gin gi kue kod winjruok.​—Hib. 13:8.

14-16. Ere kaka siso ma Yesu nigo mar konyowa rito winjruokwa gi Nyasaye nenore e weche ma “jatich mogen kendo mariek” nyisowaga kinde ka kinde?

¹⁴ Siso ma Yesu nigo mar konyowa rito winjruokwa gi Nyasaye nenore maler e weche ma “jatich mogen kendo mariek” nyisowaga kinde ka kinde. (Mat. 24:45) Marc ma en wuoro ma nigi nyithindo ang’wen wacho kama: “Satan temo matek mondo odwok kanyakla chien, to yo motiyogo en monjo joot. To nikech sani ijiwowa mondo wabed gi lamo mar joot juma ka juma, wiye udi ong’eyo gima nyaka gitim, ma en konyo joodgi mondo Satan kik hinygi.”

¹⁵ Sama wafwenyo kaka Kristo tayo weche, wabedo gadier ni ogombo ahinya konyowa. Patrick ma en jaduong’-kanyakla wacho kama: “Ka ne ochak chenro mar bedo gi grube matindo tindo mag tij lendo, nitie joma ne ok omor ahinya gi wachno. Kata kamano, chenrono nyiso maler ni Yesu dewo jolupne duto. Owete gi nyimine ma ngimagi ni piny kod ma yande ok dhiga lendo nyading’eny neno ni odewgi kendo ohergi, nikech koro ok ochuno ni gilend mabor gi kuonde ma gidakie e giko juma. Mano osemiyo gimedo sudo machiegni gi Jehova.”

¹⁶ Mopogore gi konyowa loso winjruokwa gi Jehova, Kristo konyowa bende mondo waket pachwa e tich maduong’ ma nyaka tim e piny ngima. (Som Mariko 13:10.) André ma nyocha obedo jaduong’-kanyakla machiegnini, osebedo ka luworega machiegni ahinya gi lokruok ma riwruok mar oganda Jehova timoga. Owacho kama: “Bedo ni nodwok kwan mar jo Bethel piny paronwa ni wadak e kinde ma dwarore ni wagud pachwa gi tekowa te e tij lendo.”

17, 18. Ang’o momiyo ber paro matut kuom ber ma waseyudo nikech lokruok ma riwruokwa timo?

¹⁷ Yo ma Ruodhwa Yesu Kristo tayowago nyiso maler ni oneno nyime. Kuom mano, wasikuru ka wamor gi lokruok ma dhi nyime, nikech gikelo mana ber lilo. Donge e lamo mar joot ma luwo unyalo wuoyo kuom ber  museyudo nikech lokruok moko mosetim e chokruok ma kor juma kata e tij lendo?

¹⁸ Ka watimo kinda mondo wapar matut kuom gimomiyo itimo lokruok moko kod ber ma lokruogego kelo, biro bedo ma yot mondo wamor kodgi. Waseneno maler kaka dwoko piny kwan mag buge migoyo e otas osekonyo riwruogwa e kungo pesa; bende, tiyo gi teknoloji ma nyasani osekonyo e medo lando wach Pinyruoth e piny mangima. Ng’eyo mano chwalowa mondo ka nyalore to thothne wati gi buge ma dijitol gi vidio bende. Sama watimo kamano, wanyiso ni wan karachiel gi Kristo sama otemo matek mondo oti maber gi mwandu ma riwruogwa nigo.

19. Ang’o momiyo onego waluw machiegni yo ma Kristo tayowago?

¹⁹ Sama waluwo machiegni yo ma Kristo tayowago, watego yie mar jowetewa kendo wamiyo kue gi winjruok betie e kindwa. André wuoyo maber kuom kaka nodwok kwan mar jo Bethel piny e ofisewa te, kowacho kama: “Yo ma owete gi nyimine ma nowuok Bethel norwakogo lokruogno jiwa mondo agen kuom yo ma Kristo tayowago, kendo achiw luor matut ne owete gi nyiminego. Jo Bethel ma chon-go ringo kanyachiel gi gach Jehova, kendo gimor gi migawo moro amora ma omigi gie sani.”

20, 21. (a) Ang’o momiyo onego wagen kuom Kristo Ruodhwa kendo Jatendwa? (b) En penjo mane ma wabiro nono e sula ma luwo?

²⁰ Machiegnini, Jatendwa Yesu Kristo biro ‘tieko lochone’ kendo obiro ‘timo gik madongo miwuoro.’ (Fwe. 6:2; Zab. 45:4, NW) Sama orito timo mano, oiko jo Nyasaye ne dak e piny manyien. E piny manyienno, ng’ato ka ng’ato kuomwa biro bedo gi migawo e loso piny obed paradiso, kendo puonjo joma ibiro chier ng’eyo yore Nyasaye.

²¹ Ruodhwa biro tayowa ma wadonj e piny manyien, tek mana ni wasiko ka wageno kuome kata weche lokre ma chalo nade. (Som Zaburi 46:1-3.) Seche moko, lokruok nyaloga kelonwa pek moko, to ahinya-ahinya ka weche ok odhi kaka ne waparo. Kare ang’o ma wanyalo timo mondo wasik ka wan gi chuny mokue kendo wadhi nyime geno kuom Jehova? Wabiro nono penjono e sula ma luwo.