1, 2. Omashongo geni Josua a li a taalela konima yeso lyaMoses?

JOSUA okwa li natango ta dhimbulukwa oohapu ndhoka a lombwelwa kuJehova, tadhi ti: “Omuntu gwandje Moses okwa si. Ngashingeyi ilongekidha, ngoye noshigwana shalsrael, mu tokole omulonga Jordan, mu ye mevi ndyoka tandi ke li ya pa.” (Jos. 1:1, 2) Josua ngoka a kala omuyakuli gwaMoses uule womimvo 40 lwaampono, elunduluko ndyoka ka li e li tegelela.

² Molwaashoka Moses okwa kala omukwatelikomeho gwoshigwana shaIsraeli ethimbo ele, otashi vulika Josua a li ti ipula nkene sha li tashi ki inyenga, ngele okwa ningi omukwatelikomeho gwasho. (Deut. 34:8, 10-12) Embo limwe lyuuyelele wOmbiimbeli olya popi kombinga yaJosua 1:1, 2, tali ti: “Pethimbo lyonale nolyongashingeyi, uuna omukwatelikomeho ta pingenwa po, ihashi kala oshipu.”

3, 4. Otu shi shi ngiini kutya Josua ka li a kanitha einekelo muKalunga, nepulo lini tatu vulu okwiipula?

³ Josua oku na okukala a li a tila unene, ihe nonando ongawo, meni lyomasiku omashona okwa ningi etokolo lyopandunge. (Jos. 1:9-11) Ka li a kanitha einekelo lye muKalunga. Ngaashi Ombiimbeli ye shi ulika, Jehova okwa li a wilike Josua noshigwana She, Israeli, okupitila momuyengeli. Oshi li pandunge okuthika pehulithodhiladhilo kutya  omuyengeli nguka okwa li Ohapu, ano Omwana gwaKalunga gwotango. — Eks. 23:20-23; Joh. 1:1.

⁴ Kekwatho lyaJehova, Aaisraeli oya li ya taamba ko omukwatelikomeho omupe, Josua, ngoka a pingene po Moses. Natse momathimbo ngaka tu li, otamu ningwa omalunduluko ogendji. Onkene otashi vulika tu ipule tatu ti: ‘Sho ehangano lyaKalunga tali ende tali humu komeho, mbela otu na ngaa omatompelo omawanawa gokwiinekela muJesus, Omuwiliki gwetu ngoka a langekwa po?’ (Lesha Mateus 23:10.) Natu taleni nkene Jehova a wilike oshigwana she pethimbo lyonale, sho pwa li pwa ningwa omalunduluko.

5. Sho Josua a li popepi naJeriko, okwa mono shike shoka inaa mona nale? (Tala kethano lyopetameko.)

⁵ Nziya konima sho Aaisraeli ya taaguluka Jordan, opwa holoka oshinima shoka Josua kaa li a tegelela. Manga a li popepi naJeriko, okwa tsakanene nomulumentu e na egongamwele. Nonando Josua ka li e shi kutya omulumentu ngoka olye, okwa pula a ti: “Ngoye omukwiita omukwetu nenge ogwaatondi yetu?” Josua okwa li a kumwa, sho omulumentu ngoka i ipopi kutya oye lye. Okwa li “ondjayi yiita yOmuwa [Jehova]” nokwi ilongekidha okupopila oshigwana shaKalunga. (Lesha Josua 5:13-15.) Nonando ehokololo pomahala gamwe mOmbiimbeli olya ti kutya Jehova okwa popya naJosua shu ukilila, kapu na omalimbililo kutya okwa li a popi naye okupitila momuyengeli, ngaashi olundji a li e shi ningi monakuziwa. — Eks. 3:2-4; Jos. 4:1, 15; 5:2, 9; Iil. 7:38; Gal. 3:19.

6-8. (a) Pataloko lyopantu, omolwashike omalombwelo gamwe gaJehova tashi vulika ga li taga monika ga fa itaaga kwatha sha? (b) Omalombwelo oga ulike ngiini kutya ogopandunge noge li pethimbo? (Tala wo enyolo lyopevi.)

⁶ Josua okwa li a pewa omalombwelo ga yela komuyengeli Omuwiliki gankene e na okusinda oshilando Jeriko. Petameko, otashi vulika gamwe ga li taga monika ga fa kaage shi omawanawa. Pashiholelwa, Jehova okwa li a gandja elombwelo kutya aalumentu ayehe naya pitithwe etanda, shoka sha li tashi ke ya ningitha kaaya vule okukondja uule womasiku gontumba. Mbela ndyoka olya li ngaa shili ethimbo lyoku shi ninga? — Gen. 34:24, 25; Jos. 5:2, 8.

⁷ Aakwiita Aaisraeli mboka, otashi vulika ya li tayi ipula kutya otaya ka gamena ngiini omaukwanegumbo gawo, ngele aatondi oya ponokele ontanda yawo. Ohaluka, opwa holoka onkundana tayi ti kutya omiyelo dhaJeriko odha “patwa nodha langelwa, opo Aaisraeli ya keelelwe” kaaya ningwe sha. (Jos. 6:1) Mbela einekelo lyawo momalombwelo gaKalunga kalya li lya kolekwa kiiningwanima mbyoka ya holoka po inaashi tegelelwa?

⁸ Shimwe ishewe, Aaisraeli oya li ya lombwelwa kaaya ponokele Jeriko, ihe ye shi dhingoloke omasiku gahamano lumwe mesiku nosho wo iikando iheyali mesiku etiheyali. Aakwiita yamwe otashi vulika ya li taya dhiladhila taya ti: ‘Ndika emanopo lyethimbo nolyoonkondo!’ Ihe nonando ongawo, Omuwiliki gwaIsraeli ngoka ihaa monika, okwa li e shi lela shoka ta ningi. Oshinima shoka a ningi inashi koleka owala eitaalo lyAaisraeli, ihe oshe ya gamene wo kaaya kondjithe etangakwiita lyaJeriko enankondo. — Jos. 6:2-5; Heb. 11:30. *

9. Omolwashike tu na okulandula omalombwelo ngoka hatu pewa kehangano? Gandja oshiholelwa.

⁹ Oshike tatu ilongo mehokololo ndika? Otashi vulika omathimbo gamwe tu kale kaatu uvite ko omalunduluko ngoka taga ningwa mehangano. Pashiholelwa, petameko otashi vulika twa li tatu ipula kutya omolwashike tu na okulongitha iikwaelektronika sho tatu konakona Ombiimbeli paumwene, tu li muukalele naasho tu li pokugongala. Ihe ngashingeyi otu shi uuwanawa mboka hawu zi moku yi longitha. Uuna  tatu mono iizemo iiwanawa mbyoka hayi zi momalunduluko ngoka, nonando katwa li tu ga uvite ko petameko, ohashi tu kwathele tu kale neitaalo lya kola notwa hangana.

10. Olye a li ta wilike okugongala kwa simana hoka kwa Ii kwa ningwa kolutuwiliki muJerusalem?

¹⁰ Omimvo 13 lwaampono konima sho Kornelius a ningi Omukriste, Aajuda yamwe ooitaali oya li natango taya humitha komeho epitotanda. (Iil. 15:1, 2) Sho okwaauvathana kwa holoka muAntiokia, opwa ningwa elongekidho Paulus a fale oshinima shoka kolutuwiliki muJerusalem. Ewiliko ndyoka olya li lya zi kulye? Paulus okwa ti: “Ngame onda yi, oshoka onda lombwelwa kuKalunga, ndi ye ko.” Osha yela kutya Kristus oye a li ta wilike iinima, opo olutuwiliki lu kandule po oshinima shoka. — Gal. 2:1-3.

11. (a) Aajuda ooitaali oya li ye na uupyakadhi wuni kombinga yepitotanda? (b) Sho Paulus a li e na ehalo lyokwaambidhidha aakuluntugongalo muJerusalem, okwa li a taalela eshongo lini? (Tala wo enyolo lyopevi.)

¹¹ Kohi yewiliko lyaKristus, olutuwiliki olwe shi yelitha kutya Aakriste mboka kaaye shi Aajuda inaya pumbwa okupitithwa etanda. (Iil. 15:19, 20) Ihe uule womimvo konima yetokolo ndyoka, Aajuda oyendji ooitaali oya tsikile okupititha oyana etanda. Sho aakuluntugongalo muJerusalem yu uvu omutoto kombinga yaPaulus kutya ka li ta vulika kOmpango yaMoses, oye mu pe omalombwelo ngoka a li inaa tegelela. * (Iil. 21:20-26) Oye mu lombwele a kuthe aalumentu yamwe e te ya fala kotempeli, opo aantu ya vule okuthika pehulithodhiladhilo kutya Paulus okwa ‘dhiginina Ompango.’ Okwa li ta vulu oku ya pula kombinga yaashoka ye mu pula a ninge noku ya lombwela kutya Aakriste Aajuda oyo ye na uupyakadhi, oshoka oyo kaaya uvite ko nawa epitotanda. Ihe pehala lyaashono, oku ulike kutya ota ambidhidha edhiladhilo lyaakuluntugongalo lyokuhumitha komeho uukumwe mokati kooitaali. Okwi ifupipike e ta ningi shoka a lombwelwa. Nonando ongawo, otashi vulika tu ipule kutya: ‘Omolwashike Jesus a li e etha oshinima shika shi kale inaashi kandulwa po uule wethimbo ele, nonando eso lye olya hulitha po Ompango yaMoses?’ — Kol. 2:13, 14.

12. Omolwashike Kristus a li e etha pu pite ethimbo, opo nawa a kandula po oshinima shepitotanda?

 ¹² Kaantu yamwe, ohashi kutha ethimbo, opo ya uve ko uuyelele uupe. Aakriste Aajuda oya li ya pumbwa ethimbo lya gwana, opo ya lundulule etaloko lyawo. (Joh. 16:12) Kuyamwe osha li oshidhigu okutaamba ko kutya epitotanda kali shi we endhindhiliko lyekwatathano li ikalekelwa naKalunga. (Gen. 17:9-12) Yalwe oya li ya tila ya hepekwe kAajuda ooyakwawo, sho ya yooloka ko. (Gal. 6:12) Ihe mokweendela ko kwethimbo, Kristus okwa li a gandja ewiliko lya gwedhwa po okupitila moontumwafo dha nwethwa mo, ndhoka dha nyolwa kuPaulus. — Rom. 2:28, 29; Gal. 3:23-25.

13. Oshike tashi vulu oku tu kwathela tu kale twa pandula ewiliko lyaKristus kunena?

¹³ Uuna kaatu uvite ko thiluthilu omalunduluko gamwe ngoka taga ningwa mehangano, onawa tu tedhatedhe kunkene Kristus a li a wilike egongalo lyopaKriste pethimbo lyonale. Kutya nduno opethimbo lyaJosua nenge omethelemimvo lyotango, Kristus okwa kala ta gandja omalombwelo gopandunge nelalakano lyokugamena oshigwana shaKalunga, a koleke eitaalo lyasho noku shi kaleka sha hangana. — Heb. 13:8.

14-16. Ongiini okunakonasha kwaKristus kombinga yuupambepo wetu, kwi iwetikile momalombwelo ngoka “omupiya omudhiginini nomunandunge” ha gandja?

¹⁴ Okunakonasha kwopahole kwaJesus kombinga yuupambepo wetu, okwi iwetikile momalombwelo ngoka “omupiya omudhiginini nomunandunge” ha gandja pethimbo. (Mat. 24:45, yelekanitha NW.) Omumwatate Marc, ngoka e na aanona yane, ota ti: “Satana ota kambadhala okunkundipaleka egongalo, mokuponokela omaukwanegumbo. Molwaashono otatu ladhipikwa tu ninge Elongelokalunga lyUukwanegumbo oshiwike kehe, shoka osha yelela omitse dhomaukwanegumbo kutya odhi na okugamena aanegumbo lyawo.”

¹⁵ Uuna tatu tala nkene Kristus te tu wilike, ohashi tu kwathele tu mone kutya oku na ko nasha lela nokuhuma komeho kwetu pambepo. Omumwatate Patrick, ngoka e li omukuluntugongalo, ota ti: “Sho pwa ningwa elongekidho lyokutsakanena momahuliloshiwike moongundu oonshona dhokuya momapya, petameko yamwe kaya li ye na omukumo nasho. Ihe wumwe womuukwatya waJesus wa simanenena, ano okunakonasha naamboka ya nika uuthigwa, owi iwetikile thiluthilu melongekidho ndika. Onkee ano, aamwatate naamwameme mboka ya li ye na ohoni noihaya yi lela muukalele, shoka oshe ya ningitha ya kale yu uvite ye holike noye na oshilonga, naashoka osha koleke uupambepo wawo.”

¹⁶ Kakele kokunakonasha nuupambepo wetu, Kristus ohe tu kwathele wo tu kale tatu gandja eitulomo kiilonga ya simanenena, mbyoka tayi longwa kombanda yevi kunena. (Lesha Markus 13:10.) Omumwatate André, ngoka opo a langekwa po e li omukuluntugongalo, okwa kala aluhe ha landula omalunduluko ngoka taga ningwa mehangano. Ota ti: “Elunduluko ndyoka lya ningwa moshitayimbelewa lyokutumina aantu yamwe momapya, otali tu dhimbulukitha kutya ethimbo otali endelele notwa pumbwa okugandja eitulomo kiilonga yokuuvitha.”

17, 18. Omolwashike shi li pandunge okudhiladhila komauwanawa ngoka twa mona, sho twa landula omalunduluko ngoka opo ga ningwa?

¹⁷ Ewiliko ndyoka hatu pewa kuJesus Kristus, Omukwaniilwa gwetu ngoka a langekwa po, otali tu kwathele ngashingeyi nosho wo monakuyiwa. Onkee ano, natu nyanyukilwe uuwanawa mboka hawu zi momalunduluko ngoka opo ga ningwa omathimbo ga zi ko. Otashi ka kala shi li nawa mu kundathane pElongelokalunga lyUukwanegumbo weni, nkene mwa mona uuwanawa momalunduluko ngoka ga ningwa mokugongala kwomokati koshiwike nenge miilonga yokuuvitha.

¹⁸ Ngele otwa kala hatu taamba ko omalombwelo  okuza kehangano lyaJehova nosho wo uuwanawa mboka hatu mono mo, otashi ke tu kwathela tu landule ewiliko ndyoka nenyanyu. Otwa pandula shili sho iileshomwa ihaayi pilintwa we oyindji, oshoka osha kwathela kaapu longithwe oshimaliwa oshindji. Okulongitha omikalo omipe dhuuteknolohi, okwe tu kwathela tu humithe komeho iilonga yUukwaniilwa kongonga yevi alihe. Ngele oshinima shoka otwe shi kaleke momadhiladhilo, otatu ka vula okulongitha iileshomwa yopaelektronika nuuvidio ngaashi tashi vulika. Momukalo gwa tya ngaaka, otatu ka ulika okunakonasha kwaKristus mokulongitha pandunge iiniwe yehangano.

19. Omolwashike tu na okuvulika kewiliko lyaKristus?

¹⁹ Uuna tatu vulika komalombwelo gaKristus, kungawo otatu koleke eitaalo lyayalwe notatu humitha komeho uukumwe. Sho omumwatate André a dhiladhila kelunduluko ndyoka lya ningwa muuyuni awuhe momaukwanegumbo gaBetel, okwa ti: “Ombepo ndjoka ya ulikwa kwaamboka ya li nale Aabetel naasho ya taamba ko omalunduluko, osha kwathela ndje ndi kale ndi na einekelo nesimaneko. Ohaya endele pamwe netemba lyaJehova nohaya kala ya nyanyukilwa iilonga kehe taya pewa.”

20, 21. (a) Omolwashike tatu vulu okukala twi inekela mOmuwiliki gwetu, Kristus? (b) Epulo lini tatu ka kundathana moshitopolwa tashi landula?

²⁰ Omuwiliki gwetu ngoka a langekwa po, Jesus Kristus, masiku ota ka ‘sindana’ thiluthilu notali ka kala “esindano ekumithi,” nenge tu tye ota ka longa iilongankondo. (Eh. 6:2; Eps. 45:4) Ngashingeyi, ote tu longekidha tu ka kale muuyuni uupe, moka kehe gumwe gwomutse ta ka vula okukutha ombinga miilonga yokulonga aantu noyokutunga, mbyoka tayi ka longwa pethimbo aantu taya ka yumudhwa.

²¹ Omukwaniilwa gwetu ngoka a langekwa po, ota ka pondola moku tu fala muuyuni uupe. Onkee ano, natu kale neinekelo kutya ote ke shi ninga kutya nduno onkalo oyi kale ya fa peni. (Lesha Episalomi 46:1-3.) Omathimbo gamwe, otashi vulika shi kale oshidhigu okutaamba ko omalunduluko, unene tuu ngele oge tu guma momukalo ngoka kaatwa li twa tegelela. Ongiini nduno tatu vulu okumona ombili yokomwenyo nokukala tu na eitaalo thiluthilu muJehova? Epulo ndyoka olyo tatu ka kundathana moshitopolwa tashi landula.