1, 2. Anton baleg a pananguman so inarap nen Josue kayari na impatey nen Moises?

SANKANONOT nin siansia nen Josue so imbaga nen Jehova: “Inatey lay Moises a lingkor ko. La ka natan, baliw kad Jordan, sika tan sarayan amin a totoo, tan la kayo ed dalin ya iter kod saray totoo na Israel.” (Jos. 1:1, 2) Seguradon ag-inilaloan itan nen Josue, say lingkor nen Moises ed loob na ngalngali 40 taon!

² Lapud si Moises so abaybayag ya lider na Israel, nayarin iisipen nen Josue no antoy reaksion na totoo na Dios no sikato lay magmaliw ya lider da. (Deu. 34:8, 10-12) Oniay imbaga na sakey a reperensya ed Biblia nipaakar ed Josue 1:1, 2: “Balanglan nensaman odino natan, say pansalat na lider so sankairapan tan sankamapeligroan a panaon ed sakey a bansa.”

3, 4. Panon tayon amta ya si Josue et sigpot a nanmatalek ed Dios, tan antoy nayarin itepet tayod sarili tayo?

³ Walay rason nen Josue ya manpaga, balet kayari pigaran agew, sikatoy kinmiwas. (Jos. 1:9-11) Sikatoy sigpot ya nanmatalek ed Dios. Nabasa tayo ed Biblia ya si Jehova a mismo so angigiya ed si Josue tan saray Israelita panamegley na sakey ya anghel. Duga labat ya isipen a sayan anghel et say Salita, say panguloan ya Anak na Dios.​—Exo. 23:20-23; Juan 1:1.

 ⁴ Tinulongan nen Jehova iray Israelita ya makapan-adjust ed agawan pananguman nen si Josue lay balon lider da. Mipadpara, manbibilay tayo met ed panaon ya dakel so nagagawan pananguman, tan nayarin isipen tayo, ‘Lapud mapmaples ya onaabante so organisasyon nen Jehova, wala kasi maabig ya rason tayo pian manmatalek ed tinuron Lider tayo, si Jesus?’ (Basaen so Mateo 23:10.) Isipen pa no panon ya indaulo nen Jehova iray totoo to nensaman legan ya wala ray nagagawan pananguman.

5. Siopay anengneng nen Josue nen sikatoy asingger lad Jerico? (Nengnengen so litratod gapo na artikulo.)

⁵ Ag-abayag, kabaliw na saray Israelita ed Jordan, walay ag-iilaloan ya anengneng nen Josue ed dalan. Nen sikatoy asingger lad Jerico, akasabat na sakey a laki ya walay sankabembenan ton espada. Agkabat nen Josue iyan laki, kanian intepet to: “Wala kad dapag mi odino ed saray kalaban mi?” Abigla si Josue ta impakabat na sayan lakin sundalo so sarili to. Sikato so “pangulo na armada nen Jehova,” ya akaparaan a mangidepensa ed totoo na Dios. (Basaen so Josue 5:13-15 tan paimanod leksab.) Anggaman ibabaga na kabiangan na salaysay ya direktan mitotongtong si Jehova ed si Josue, seguradon mitotongtong so Dios panamegley na sakey ya anghel, a singa naynay ton gagawaen diad apalabas.​—Exo. 3:2-4; Jos. 4:1, 15; 5:2, 9; Gawa 7:38; Gal. 3:19.

6-8. (a) Akin ya singa aliwan praktikal diad pakanengneng na too so arum ya instruksion nen Jehova? (b) Panon ya nibagan makabat tan nipanpanaon iray instruksion nen Jehova? (Nengnengen met so paimanod leksab.)

⁶ Akaawat na malinew iran instruksion si Josue manlapud Pangulo ya anghel no panon ya sakopen so syudad na Jerico. Diad gapo, singa aliwan praktikal so arum iran instruksion. Singa bilang, ingganggan nen Jehova ya manpasegat so amin ya lalaki, kanian pigay agew iran makapkapuy. Duga kasi ya segaten iray mabiskeg a lalaki diad saman ya panaon?​—Gen. 34:24, 25; Jos. 5:2, 8.

⁷ Nayarin inisip na saray agmakalaban ya sundalon Israelita no panon da kasin protektaan so pamilya da no onlusob ed kampo da iray kalaban. Balet biglan abalitaan da ya “malet a nikapot iray puerta na Jerico lapud saray Israelita.” (Jos. 6:1) Agta seguradon binmiskeg so talek dad panangigiya na Dios lapud saman ya ag-iilaloan ya agawa?

⁸ Sakey ni, ingganggan iray Israelita ya ag-atakien so Jerico noagta liberen da so interon syudad ya maminsan kada agew diad loob na anemiran agew tan maminpito dan liberen diad komapiton agew. Nayarin naisip na arum ya sundalo ya, ‘Sayang labat so panaon tan biskeg tayo!’ Balet say agnanengneng ya Lider na Israel et amta toy gagawaen to. Lapud sayan estratehiya to, aglabat binmiskeg so pananisia na saray Israelita noagta apaliisan da met so direktan pilaban ed saray mabibiskeg ya sundalo na Jerico.​—Jos. 6:2-5; Heb. 11:30. *

9. Akin et kaukolan tayon unoren iray instruksion ya manlalapud organisasyon na Dios? Mangiter na alimbawa.

⁹ Antoy naaralan tayod sayan salaysay? No maminsan et agtayo natalosan ya maong iray rason ed saray balon instruksion ya manlalapud organisasyon. Singa bilang, nayarin diad gapo et inisip tayon aliwan praktikal so pangusar na saray gadyet diad personal a panagaral, diad ministeryo, tan diad saray aral. Natan et nayarin nanenengneng tayo la iray gunggona diad pangusar ed saratan no posible. No nanenengneng tayo iray maabig a  resulta na saratan ya pananguman anggano nayarin manduaruwa tayo diad gapo, ombibiskeg so pananisia tan pankakasakey tayo.

10. Siopay walad benegan na importantin miting na mananguley ya ulop ya agawad Jerusalem?

¹⁰ Manga 13 taon kayarin akomberte si Cornelio, wala ray Judion Kristiano ya mangibabaga ya kaukolan nin siansia so panagsegat. (Gawa 15:1, 2) Nen linmesa itan ya problema diad Antioquia, imbaki si Pablo ya onlad mananguley ya ulop diad Jerusalem pian itongtong itan ya isyu. Balet siopay walad benegan na satan ya instruksion? Imbaga nen Pablo: “Linma ak diman lapud imparungtal itan ed siak na Katawan.” Malinew ya say Kristo so angigiya pian resolbien na mananguley ya ulop so problema.​—Gal. 2:1-3.

11. (a) Anton isyu nipaakar ed panagsegat so nantultuloy ed limog na saray Judion Kristiano? (b) Panon ya asubok si Pablo no kasin mabulos ton suportaan iray elder ed Jerusalem? (Nengnengen met so paimanod leksab.)

¹¹ Diad panangigiya nen Kristo, impalinew na mananguley ya ulop ya agla kaukolan ya segaten iray aliwan Judion Kristiano. (Gawa 15:19, 20) Balet pigaran taon so linmabas, siansia nin dakel ya Judion Kristiano so manesegat ed ananak da. Nen nadngelan na saray elder ed Jerusalem so onkakayat a balita nipaakar ed si Pablo, ya agto kuno uunoren so Mosaikon Ganggan, sikatoy inikdan da na saray instruksion ya agto iilaloan. * (Gawa 21:20-26) Ingganggan day Pablo ya mangitagar na apatiran lalaki ya onlad templo pian nanengneng na totoo ya “uunoren [to] met so Ganggan.” Nayarian komon nen Pablo ya kuestionen no kasin makabat imay pagagawa dad sikato, ya ibaga ton say talagan problema et saray Judion Kristiano ya agda natatalosan so isyun panagsegat. Balet pian nipanengneng nen Pablo ya susuportaan to iray elder a malabay ya niwalay kareenan ed saray Kristiano, mapaabeba ton inunor iray imbilin dad sikato. Pero nayarin isipen tayo, ‘Akin et inabuloyan nen Jesus ya onlabas ni andukey a panaon antis ya naresolbe so isyu anta  naandi lay Mosaikon Ganggan diad impatey to?’​—Col. 2:13, 14.

12. Akin et nayarin inabuloyan na Kristo ya onlabas ni panaon antis ya naresolbe so isyun panagsegat?

¹² Parad arum, kaukolan so panaon pian makapan-adjust ira ed sakey a balon pakatalos. Kaukolan na saray Judion Kristiano so magenap a panaon pian nauman day panagnonot da. (Juan 16:12) Mairap ya awaten na arum ya say panagsegat et aliwa lan pakabidbiran na espisyal a relasyon da ed Dios. (Gen. 17:9-12) Saray arum balet, lapud antakot day napasegsegang, agda labay so magmaliw ya duma ed karaklan ya Judio. (Gal. 6:12) Balet sinmabi panaon, angiter so Kristo na kaaruman ya panangigiya panamegley na pinuyanan iran sulat nen Pablo.​—Roma 2:28, 29; Gal. 3:23-25.

13. Antoy makatulong pian naapresya tayo so panangidaulo nen Kristo natan?

¹³ No agtayo sigpot ya natatalosan iray rason na pigaran pananguman ed organisasyon, maabig no dalepdepen tayo so paraan na panangidaulo nen Kristo nensaman. Balanglan diad panaon nen Josue odino nen inmunan siglo, naynay ya mangiiter so Kristo na makabat iran panangigiya pian protektaan so totoo na Dios bilang grupo, pian pabiskegen so pananisia da, tan pian pansiansiaen so pankakasakey da.​—Heb. 13:8.

14-16. Panon a sankapatnagan ya sankanonot nen Jesus so espiritual a pankaabigan tayo panamegley na instruksion na “matoor tan makabat ya aripen”?

¹⁴ Mapatpatnag ya sankanonot nen Jesus so espiritual ya pankaabigan tayo panamegley na nipanpanaon ya instruksion na “matoor tan makabat ya aripen.” (Mat. 24:45) Oniay imbaga nen Marc, ya apatiray anak to: “Labay nen Satanas ya pakapuyen iray kongregasyon kanian aatakien to iray pamilya. Natan ta ipapaseseg so sinimban pangikondukta na family worship, malinew so mensahe parad saray kaamaan​—protektaan yoy pamilya yo!”

¹⁵ No natebek tayo so panangigiya na Kristo, natalosan tayo ya sikatoy interesadon maong ed iyaligwas tayod espiritual. Oniay imbaga nen Patrick, a sakey ya elder: “Diad gapo, makapadismayad arum ya agagi so pantitipon na melag a grupo antis a manpulong kada weekend. Balet sankapatnagan ed sayan uksoyan so sakey ed saray manunan kualidad nen Jesus​—iimanoen to iramay abebay kipapasen da. Saray mabaing tan medyo aliwan aktibon agagi et alikna da ya napapabli tan mausausar ira kanian inmaligwas ira ed espiritual.”

¹⁶ Likud ed pangaasikaso nen Kristo ed espiritual iran pankaukolan tayo, tutulongan to tayon makapampokus ed sankaimportantian a kimey ya nagagawa natan diad dalin. (Basaen so Marcos 13:10.) Si André, ya balo ni labat ya elder, et maimano ed saray nagagawan pananguman ed organisasyon na Dios. Imbaga to: “Say impanbawas na personnel ed branch office so mangipapanonot ed sikatayo ya antiktikey lay panaon tan kaukolan tayon usaren so biskeg tayo ed kimey a panagpulong.”

17, 18. Akin et nagunggonaan tayo no dalepdepen tayo ray maabig ya epekto na itutulok tayod saray agano nin agawan pananguman?

¹⁷ Napatnagan ed aktibon panangigiya nen Jesu-Kristo, say nitronon Ari tayo, ya sikatoy talagan interesado ed arapen tayo. Kanian panliketan tayo iray gunggona ya nanaawat tayo lapud saray agano nin agawan pananguman. Nayarin napaseseg ka no aralen yod family worship yo no panon kan agunggonaan ed saray pananguman ed sinimban aral odino diad ministeryo.

¹⁸ No natatalosan tayo so gagala na saray instruksion ya manlalapud organisasyon nen Jehova tan say balibalin epekto na satan ed  sikatayo, seguradon maliket tayon unoren iratan. Talagan naapresya tayo ya lapud binawasan so bilang na literaturan iyiimprinta et makakatipid tayo, tan lapud panguusar tayod saray balon teknolohiya et mas napapalaknab so kimey na Panarian diad interon mundo. No nodnonoten tayo iya, napakiwas tayo ya mas lalon usaren no posible iray elektronikon publikasyon tan media. Diad onian paraan, nipatnag tayoy kanonotan nen Kristo ya usaren ed makabat a paraan iray pundo na organisasyon.

19. Akin et kaukolan tayon tuloken so panangigiya nen Kristo?

¹⁹ No matoor tayon tutuloken so panangigiya nen Kristo, napapabiskeg tayoy pananisia na arum tan niwala so pankakasakey. No nanonotan nen André so impanbawas na personnel ed pamilyan Bethel diad interon mundo, oniay nibaga to: “Lapud maong ya espiritu ya ipapanengneng na saray datin Bethelite ya nan-adjust ed saray pananguman, napapaseseg ak ya manmatalek tan nawalaan na respeto. Mibabansag ira ed karwahe nen Jehova tan panliliketan da so antokaman ya asainmin ya naawat da.”

20, 21. (a) Akin et makapanmatalek tayod si Kristo, say Lider tayo? (b) Antoy ebatan tayo diad ontumbok ya artikulo?

²⁰ Say tinuron Lider tayo, si Jesu-Kristo, et magano to lan “sumpalen so panatalo to” tan “manggawa na makapakelkelaw iran bengatla.” (Apo. 6:2; Sal. 45:4) Balet kaleganan to, ipaparaan to ray totoo na Dios parad arapen kayarin naderal iyan sistema na mundo ya no iner et kada sakey ed sikatayo so mibiang ed baleg a kimey ya panagbangat tan panagpaalagey legan ya papaolien iray inaatey.

²¹ Seguradon sarag itayon igiya na tinuron Ari tayo diad balon mundo, daput no tuloytuloy tayon ipanengneng so panagmatalek ed sikato antokaman iray nagawan pananguman. (Basaen so Salmo 46:1-3.) Balet no maminsan et mairap tayon awaten so pananguman, lalo la no agtayo iilaloan ya nagawa itan ed sikatayo. Kanian panon tayon makapansiansia ya kalmado tan sigpot ya manmatalek ed si Jehova? Naebatan itan ya tepet diad onsublay ya artikulo.