1, 2. Ano nga pagsari an gin-atubang ni Josue kamatay ni Moises?

KLARO pa ha hunahuna ni Josue an ginsiring ni Jehova: “Hi Moises nga akon sorogoon patay na; busa yana tumindog ka, tabok hinin Jordan, ikaw, ngan ini ngatanan nga katawohan, ngadto ha tuna nga akon ihahatag ha ira.” (Jos. 1:1, 2) Daku gud ini nga pagbag-o para kan Josue, nga nagin surugoon ni Moises hin haros 40 ka tuig!

² Tungod kay maiha nga nagin lider hi Moises han mga Israelita, posible nga nabaraka hi Josue kon ano an magigin reaksyon han katawohan han Dios ha iya pagpanguna. (Deut. 34:8, 10-12) Usa nga reperensya nga naghihisgot mahitungod han Josue 1:1, 2 nagsiring nga ha kadaan ngan ha moderno nga panahon, an pagsaliwan hin lider usa han pinakamakuri ngan peligroso nga panahon ha usa nga nasud.

3, 4. Paonan-o ginbendisyonan hi Josue tungod han iya pagsarig ha Dios, ngan ano an bangin ipakiana naton ha aton kalugaringon?

³ May makatadunganon nga rason hi Josue nga mabaraka, pero paglabay hin pipira ka adlaw, ginios hiya uyon ha iginsugo ha iya. (Jos. 1:9-11) Ginbendisyonan hiya tungod han iya pagsarig ha Dios. Sugad la ha mababasa ha Biblia, gin-giyahan gud ni Jehova hi Josue ngan an Iya  katawohan, an Israel, pinaagi hin anghel. Angayan la an paghunahuna nga ini nga anghel amo an Pulong, an suhag nga Anak han Dios.​—Eks. 23:20-23; Juan 1:1.

⁴ Pinaagi han bulig ni Jehova, malampuson nga nakapahiuyon an mga Israelita ha mga pagbag-o han hi Josue na an nagin lider kasaliwan kan Moises. Nagkikinabuhi liwat kita ha panahon diin nahitatabo an dagku nga mga pagbag-o, ngan bangin mahunahuna naton, ‘Samtang madagmit nga nag-uuswag an organisasyon han Dios, may makatadunganon ba kita nga rason nga sumarig kan Jesus sugad nga lider nga pinili han Dios?’ (Basaha an Mateo 23:10.) Basi mabaton ini, usisahon naton kon paonan-o gin-giyahan ni Jehova an iya katawohan ha naglabay durante han mga pagbag-o.

5. Ano an naeksperyensyahan ni Josue han hirani na hiya ha Jerico? (Kitaa an retrato ha tinikangan hini nga artikulo.)

⁵ Waray pag-iha katapos makatabok ha Jordan an mga Israelita, nakaeksperyensya hi Josue hin diri ginlalaoman nga panhitabo. Han hirani na hiya ha Jerico, may nakatapo hiya nga lalaki nga may kapot nga espada. Tungod kay diri hiya nakilala hito nga lalaki, nagpakiana hi Josue: “Dapig ka ba ha amon o ha amon mga kaaway?” Nahipausa hi Josue han nagpakilala ha iya ito nga lalaki. Hiya ngay-an an “prinsipe han kasondalohan ni Jehova,” nga andam magprotektar ha katawohan han Dios. (Basaha an Josue 5:13-15.) Bisan kon an asoy han iba nga mga teksto nag-uunabi nga direkta nga nakiistorya hi Jehova kan Josue, sigurado nga nagyakan hi Jehova pinaagi hin anghel, sugad la han kasagaran nga ginbubuhat niya ha naglabay.​—Eks. 3:2-4; Jos. 4:1, 15; 5:2, 9; Buh. 7:38; Gal. 3:19.

6-8. (a) Ha panhunahuna han tawo, kay ano nga baga hin diri maaramon an pipira han mga instruksyon ni Jehova? (b) Paonan-o kita nakasiring nga maaramon ngan napapanahon ito nga mga instruksyon? (Kitaa liwat an footnote.)

⁶ Gintagan hi Josue han anghel nga Lider hin matin-aw nga mga instruksyon kon paonan-o sasakupon an syudad han Jerico. Ha tinikangan, baga hin diri maopay nga estratihiya an pipira han mga instruksyon. Pananglitan, nagsugo hi Jehova nga turion an ngatanan nga lalaki, nga tungod hito waray hira mahihimo ha sulod hin pipira ka adlaw. Ito gud ba an husto nga panahon para turion an magkusog nga kalalakin-an?​—Gen. 34:24, 25; Jos. 5:2, 8.

⁷ Posible nga inin waray mahihimo nga kasundalohan nga Israelita naghunahuna kon paonan-o nira mapapanalipdan an ira pamilya kon sulungon han mga kaaway an ira kampo. Pero waray pag-iha, hinbatian nira nga an Jerico “natakpan [o, ginsadhan] na hin maopay tungud han mga anak ni Israel.” (Jos. 6:1) Sigurado nga naparig-on an pagsarig han mga Israelita ha giya han Dios tungod hiton diri ginlalaoman nga pagbag-o han panhitabo!

⁸ Dugang pa, ginsugo an mga Israelita nga diri atakehon an Jerico, lugod magmartsa hira palibot han syudad usa ka beses kada adlaw ha sulod hin unom ka adlaw ngan pito ka beses durante han ikapito ka adlaw. An pipira nga sundalo bangin naghunahuna, ‘Pagkarag la ito hin panahon ngan kusog!’ Pero an diri nakikita nga Lider han Israel maaram gud kon ano an iya ginhihimo. Ini nga estratihiya nagparig-on han pagtoo han mga Israelita ngan nakabulig liwat ha ira nga malikyan an direkta nga pakig-away ha magkusog nga kasundalohan han Jerico.​—Jos. 6:2-5; Heb. 11:30. *

9. Kay ano nga sadang naton sundon an mga instruksyon nga iginhahatag ha aton han organisasyon han Dios? Paghatag hin ehemplo.

⁹ Ano an aton mahibabaroan tikang hini nga asoy? Usahay, bangin diri naton bug-os nga nasasabtan an mga hinungdan han bag-o nga mga pamaagi han organisasyon. Pananglitan, bangin  nagruhaduha kita hadto kon maopay ba nga ideya an paggamit han gadyet ha personal nga pag-aram, ha ministeryo, ngan ha mga katirok. Pero yana, posible nga nakikita na naton an kapulsanan han paggamit hito kon mahihimo. Kon nakikita naton an positibo nga mga resulta han sugad nga mga pagbag-o bisan kon may mga pagruhaduha kita hadto, nagririg-on an aton pagtoo ngan pagkaurosa.

10. Hin-o an naggiya han importante nga katirok han nagmamando nga lawas ha Jerusalem?

¹⁰ Mga 13 ka tuig an naglabay tikang han nakombirte hi Cornelio, igin-aaghat pa gihapon han pipira nga Judio nga mga Kristiano an pagturi. (Buh. 15:1, 2) Han nagkabahin-bahin an kabugtoan ha Antiokia, nadesisyonan nga pakadtoon hi Pablo ha Jerusalem basi ikonsulta an isyu ha nagmamando nga lawas. Pero hin-o an naggiya hito nga desisyon? Hi Pablo nagsiring: “Kinadto ako tungod kay iginpahayag ha akon nga kumadto ako.” Matin-aw nga an Kristo an naggiya hito basi masulbad han nagmamando nga lawas an isyu.​—Gal. 2:1-3.

11. (a) Ano an padayon nga gintotoohan han pipira nga Judio nga mga Kristiano mahitungod ha pagturi? (b) Paonan-o iginpakita ni Pablo nga andam hiya ha pagsuporta ha mga tigurang ha Jerusalem? (Kitaa liwat an footnote.)

¹¹ Pinaagi han paggiya han Kristo, iginpatin-aw han nagmamando nga lawas nga an diri Judio nga mga Kristiano diri na kinahanglan magpaturi. (Buh. 15:19, 20) Pero mga tuig katapos ipagawas ini nga desisyon, ginpapaturi pa gihapon han damu nga Judio nga mga Kristiano an ira mga anak. Han hinbaroan han mga tigurang ha Jerusalem an hurobhurob mahitungod kan Pablo, nga diri hiya nasunod ha Mosaiko nga Balaud, gintagan nira hi Pablo hin diri ginlalaoman nga mga instruksyon. * (Buh. 21:20-26) Ginsidngan nira hiya nga mag-upod hin upat nga lalaki ngadto ha templo basi makita han mga tawo nga “nagtutuman liwat [hiya] han Balaud.” Mahimo unta mangatadongan hi Pablo nga diri maaramon an ira iginpapabuhat ha iya ngan magsiring nga an may problema amo an mga Judio nga diri bug-os nga nakakasabot mahitungod ha isyu han pagturi.  Kondi basi ipakita an iya suporta ha hingyap han mga tigurang nga matipigan an pagkaurosa han mga Kristiano, mapainubsanon nga ginsunod ni Pablo an ira mga instruksyon. Pero bangin maghunahuna kita, ‘Kay ano nga gintugotan ni Jesus nga magpadayon ito nga isyu ha sulod hin maiha nga panahon nga natapos naman an Mosaiko nga Balaud pinaagi han iya kamatayon?’​—Col. 2:13, 14.

12. Ano an posible nga rason nga gintugotan han Kristo nga lumabay anay an pipira ka panahon antes sulbaron an isyu ha pagturi?

¹² An iba nagkikinahanglan hin panahon basi makapahiuyon ha usa nga bag-o nga pagsabot. An Judio nga mga Kristiano nagkinahanglan hin igo nga panahon basi mabag-o an ira panhunahuna. (Juan 16:12) An iba nakurian pagkarawat nga an pagturi diri na tigaman han pagkaada espesyal nga relasyon ha Dios. (Gen. 17:9-12) An pipira nag-aalang nga mapaiba ha komunidad han mga Judio kay bangin pagtimarauton hira. (Gal. 6:12) Pero ha paglabay han panahon, nagtagana an Kristo hin dugang nga mga instruksyon pinaagi han giniyahan nga mga surat ni Pablo.​—Roma 2:28, 29; Gal. 3:23-25.

13. Ano an makakabulig ha aton nga maapresyar an pagpanguna han Kristo yana?

¹³ Kon diri naton bug-os nga nasasabtan an pipira nga pagbag-o ha organisasyon, maopay nga pamalandungon naton kon paonan-o ginpangunahan han Kristo an katawohan han Dios ha naglabay. Ha panahon man ni Josue o ha siyahan nga siglo, pirme naghahatag an Kristo hin maaramon nga giya basi panalipdan an katawohan han Dios sugad nga grupo, parig-unon an ira pagtoo, ngan tipigan an pagkaurosa han mga surugoon han Dios.​—Heb. 13:8.

14-16. Paonan-o an pagtagad han Kristo ha aton espirituwal nga kaopayan klaro nga nakikita ha giya nga iginhahatag han “matinumanon ngan maaramon nga uripon”?

¹⁴ An gugma ngan pagtagad ni Jesus ha aton espirituwal nga kaopayan klaro nga nakikita ha napapanahon nga giya nga iginhahatag han “matinumanon ngan maaramon nga uripon.” (Mat. 24:45) Hi Marc, nga may upat nga anak, nagsiring: “Ginpapaluya ni Satanas an mga kongregasyon pinaagi ha pag-atake ha mga pamilya. Yana nga igin-aaghat an pagdumara hin pagsingba han pamilya kada semana, matin-aw an mensahe para ha mga ulo han pamilya​—panalipdi an iyo pamilya!”

¹⁵ Kon nakikita naton an paggiya han Kristo, inaabat naton an iya interes ha aton espirituwal nga pag-uswag. Hi Patrick, nga usa nga tigurang, nagsiring: “Ha tinikangan, nakakapanluya para ha iba an pagkatirok ha gutiay nga grupo para ha pagsangyaw ha kataposan han semana. Pero an usa han nangunguna nga mga kalidad ni Jesus​—an iya interes ha mga ubos—​klaro nga nakikita hini nga kahikayan. An kabugtoan nga awdanon o diri agsob makigbahin ha ministeryo naabat nga gin-aapresyar ngan may naibubulig hira, ngan sugad nga resulta, nag-uuswag hira ha espirituwal.”

¹⁶ Labot la ha pag-ataman han aton espirituwal nga panginahanglan, ginbubuligan liwat kita han Kristo nga matipigan an aton pokus ha pinakaimportante nga buruhaton nga ginhihimo ha kalibotan yana. (Basaha an Marcos 13:10.) Hi André, nga bag-o la nga tigurang, pirme nangangalimbasog nga sundon an bag-o nga giya han organisasyon han Dios. Hiya nagsiring: “An pag-iban hin mga personel ha mga sanga nga opisina nagpapahinumdom ha aton han pagkaapurado han panahon ngan han panginahanglan nga ipokus an aton kusog ha pagsangyaw nga buruhaton.”

17, 18. Kay ano nga maopay gud nga magpokus ha mga kapulsanan nga aton nakakarawat tungod han pagpahiuyon ha mga pagbag-o?

¹⁷ An giya nga aton nakakarawat tikang ha aton nagmamando na nga Hadi, hi Jesu-Kristo, makakabulig ha aton yana ngan ha tidaraon. Salit malipay kita ha mga kapulsanan nga aton nakakarawat tungod han aton pagpahiuyon ha mga pagbag-o. Ha iyo pagsingba han pamilya, mahimo niyo hisgotan kon paonan-o kamo nagpapahimulos ha mga  pagbag-o ha sinemana nga mga katirok o ha ministeryo.

¹⁸ Kon aton hihinumdoman nga an pagsunod ha mga instruksyon tikang ha organisasyon ni Jehova may damu nga mag-opay nga resulta, magigin mas masayon ha aton an pagsunod hito ngan magigin malipayon kita. Pananglitan, nalilipay kita nga nakakatipid kita tungod han pag-iban han inimprinta nga mga literatura; an paggamit hin bag-o nga mga teknolohiya nakakabulig nga mas mapauswag an buruhaton han Ginhadian ha bug-os nga kalibotan. Tungod hini, naaaghat kita nga gamiton hin mas agsob an elektroniko nga mga publikasyon ngan mga audio ngan video kon mahihimo. Hini nga paagi, maipapakita naton an aton suporta ha Kristo, nga karuyag gud nga gamiton naton hin maaramon an mga panag-iya han organisasyon.

19. Kay ano nga sadang naton sundon an giya han Kristo?

¹⁹ Kon ginsusunod naton an giya han Kristo, nabubuligan naton an kabugtoan nga magkaada mas marig-on nga pagtoo ngan mas magkaurosa. May kalabotan ha pag-iban han kadaku han pamilya han Bethel ha bug-os nga kalibotan, hi André nagsiring: “An maopay nga disposisyon han mga Bethelite hadto nga nagpahiuyon hito nga mga pagbag-o nakaaghat ha akon nga magkaada pagsarig ngan respeto. Nadungan hira ha karuwahe ni Jehova pinaagi ha pagin malipayon ha anoman nga toka nga iginhahatag ha ira.”

20, 21. (a) Kay ano nga makakasarig kita ha Kristo, an aton Lider? (b) Ano an aton hihisgotan ha sunod nga artikulo?

²⁰ Hi Jesu-Kristo, an aton Lider nga pinili han Dios, hirani na ‘magtapos han iya pakig-away’ ngan maghimo hin “magpakaharadluk [o, urusahon gud] nga mga butang.” (Pah. 6:2; Sal. 45:4) Samtang waray pa ito, iya igin-aandam an katawohan han Dios para ha pagkinabuhi ha bag-o nga kalibotan diin an tagsa ha aton makikigbahin ha daku nga buruhaton ha pagpanutdo ngan pagpanukod durante han pamanhaw.

²¹ Kon magpapabilin kita nga nasarig gud ha aton Hadi anoman an mahitabo nga mga pagbag-o, makakalaom kita nga gigiyahan kita niya ngadto ha bag-o nga kalibotan. (Basaha an Salmos 46:1-3.) Usahay, bangin nakukurian kita ha mga pagbag-o, labi na kon nakakaapekto ito ha aton ha diri ginlalaoman nga mga paagi. Ha sugad nga kahimtang, paonan-o naton matitipigan an murayaw nga hunahuna ngan marig-on nga pagtoo kan Jehova? Ito an aton hihisgotan ha sunod nga artikulo.