全心信赖领导紧我哋嘅耶稣基督
“你哋嘅‘领袖’只有一位，就系基督。”——马太福音23:10
1,2． 摩西去世之后，约书亚面对乜嘢挑战？
耶和华讲嘅话一直喺约书亚嘅耳边回响：“我嘅仆人摩西已死。而家你同呢群人要起程，过呢条约旦河，去我要赐俾佢哋以色列人嘅地。”（约书亚记1:1,2）对做咗摩西助手差唔多40年嘅约书亚嚟讲，呢个真系一个好突然嘅改变！
2 长期以来，都系摩西带领以色列人嘅，不过而家就由约书亚嚟做领袖。约书亚可能会谂：”上帝嘅子民会唔会接受我呢个领袖呢？”（申命记34:8,10-12）一本圣经参考书提到约书亚记1:1,2话：“无论古代定系现代，领导权嘅过渡时期都系一个国家最唔稳定嘅时候。”
3,4． 耶和华因为约书亚有信心就点样祝福佢？我哋可能会谂到乜嘢问题？
3 约书亚肯定好担心，不过佢信赖耶和华，几日之内就采取行动嘞。（约书亚记1:9-11）圣经记载表明，因为约书亚有信心，耶和华就通过天使引导佢同以色列人。我哋有理由相信，呢个天使就系上帝嘅头生子，圣经称佢为“话语”。（出埃及记23:20-23；约翰福音1:1）
4 喺耶和华嘅帮助下，领导权过渡得好顺利，以色列人接受咗约书亚做佢哋嘅新领袖。今日，我哋亦都面对好多重大嘅改变。可能我哋会谂：“上帝嘅组织正迅速前进，而耶稣系呢个组织嘅领袖，点解我哋可以全心信赖佢呢？”（请读马太福音23:10）我哋会分析一下，过去发生变化嘅时候，耶和华点样带领佢嘅子民。
带领上帝嘅子民进入迦南地
5． 约书亚行近耶利哥城嘅时候遇到乜嘢事？（请睇吓课文开头嘅图片）
5 以色列人渡过约旦河之后冇几耐，约书亚就遇到一件意想唔到嘅事。佢行近耶利哥城嘅时候，见到一个手上攞住把剑嘅人。约书亚唔认识呢个陌生人，就问：“你系帮助我哋嘅，定系帮助我哋敌人嘅？”令约书亚惊讶嘅系，呢个战士随即表明身份，话自己系“耶和华手下大军嘅元帅”，随时准备好保护上帝嘅子民。（请读约书亚记5:13-15）虽然我哋从其他记载睇到，系耶和华直接同约书亚讲话，不过佢其实系通过天使发言嘅，就好似佢以往经常做嘅噉。（出埃及记3:2-4；约书亚记4:1,15；5:2,9；使徒行传7:38；加拉太书3:19）
6-8． （甲）点解喺人睇嚟，耶和华嘅一啲指示似乎有啲奇怪？（乙）我哋点知道呢啲指示好有智慧，而且好适时？（另外请睇脚注）
6 关于点样攻陷耶利哥城，约书亚从呢位天使得到明确嘅指示。有啲指示一开始睇嚟似乎唔系乜嘢好策略，例如耶和华命令所有男子要行割礼，噉会令佢哋有好几日都觉得好难受。呢啲男子身体健壮，要佢哋喺呢个时候行割礼系咪真系明智嘅呢？（创世记34:24,25；约书亚记5:2,8）
7 嗰啲接受割礼之后毫无反击之力嘅以色列士兵可能会谂：“如果敌人喺呢阵时攻入营地，我点样保护自己嘅家人呢？”不过，跟住就发生咗令人意外嘅事！耶利哥人唔单止冇攻击以色列人，反而仲怕咗佢哋。圣经话：“耶利哥嘅城门因为以色列人而紧紧关闭”。（约书亚记6:1）呢个消息一定令以色列人更加信赖耶和华，愿意按照佢嘅指示去做。
8 另外，上帝冇命令以色列人攻击耶利哥城，而系吩咐佢哋一连六日，每日一次绕城而行，然后喺第七日要绕城七次。可能有啲士兵会谂：“噉样简直就系浪费时间同精力！”不过以色列人嘅领袖耶和华清楚知道自己做紧乜嘢。佢嘅策略唔单止强化咗以色列人嘅信心，亦都使以色列人避免同耶利哥强大嘅士兵直接对抗。（约书亚记6:2-5；希伯来书11:30） *
9． 点解我哋应该跟从上帝组织嘅指示？请举例。
9 我哋从呢个记载可以学到乜嘢？有时我哋可能会唔理解耶和华嘅组织所用嘅新方法。例如，我哋一开始可能觉得做个人研读以及传道同聚会嗰时使用电子产品唔系咁好。不过，而家我哋已经睇出噉样做系有益处嘅。即使我哋对呢啲新方法有所怀疑，不过采用之后见到有好嘅结果，自己嘅信心就受到强化，我哋同弟兄姊妹亦都更加团结。
基督点样带领早期嘅基督徒
10． 系边个喺背后指引耶路撒冷嘅中央长老团解决割礼嘅争议？
10 大约喺哥尼流成为基督徒13年之后，一啲犹太裔信徒仲系认为有必要行割礼。（使徒行传15:1,2）喺安提阿发生割礼嘅争论嗰时，保罗就受委派将呢件事提交俾耶路撒冷嘅中央长老团。不过，喺背后提供指引嘅其实系边个呢？保罗话：“我系由于得到启示先上去嘅。”显然，系基督喺度指引事态，使中央长老团最终能够解决呢个问题。（加拉太书2:1-3）
基督系早期基督徒会众嘅领袖（请睇第10、11段）
11． （甲）有啲犹太裔基督徒喺割礼嘅问题上有乜嘢睇法？（乙）保罗点样表明自己谦卑噉支持耶路撒冷嘅长老团？（另外请参考脚注）
11 喺基督嘅指引下，中央长老团明白到非犹太裔基督徒唔需要受割礼。（使徒行传15:19,20）不过喺作出呢个决定多年之后，好多犹太裔信徒仲系为佢哋嘅仔行割礼。后来，耶路撒冷嘅长老听到有谣言话保罗冇遵守摩西律法，就俾咗保罗一个意想唔到嘅指示。 *（使徒行传21:20-26）佢哋叫保罗带四个男子到圣殿，噉啲人就会认为保罗系“遵守律法”嘅。保罗可能会话：“点解我要噉做？冇道理㖞！系嗰啲犹太裔基督徒嘅错，系佢哋唔明白割礼嘅问题啫。”不过，保罗知道长老团希望所有信徒同工保持和睦，所以佢谦卑噉听从佢哋嘅指示。我哋可能会谂：“耶稣嘅死已经废除咗摩西律法，点解耶稣容许呢个问题喺佢去世之后咁长嘅时间仲未解决呢？”（歌罗西书2:13,14）
12． 点解基督容许割礼嘅问题喺一段时间之后先至完全解决？
12 适应新嘅理解系需要时间嘅。有啲犹太裔基督徒要过一段时间先至可以调整佢哋嘅观点。（约翰福音16:12）佢哋一直认为，割礼标志住佢哋同上帝有特别嘅关系。而家唔再需要割礼，佢哋就觉得好难接受。（创世记17:9-12）而其他喺犹太社会生活嘅信徒就可能担心，如果自己冇遵守传统会受到迫害。（加拉太书6:12）不过，后来耶稣通过保罗嘅书信提供咗更多指示。（罗马书2:28,29；加拉太书3:23-25）
基督仍然带领紧佢嘅会众
13． 今日乜嘢可以帮助我哋支持基督嘅领导？
13 我哋如果唔系好理解组织所作嘅一啲调整，最好嘅做法就系沉思基督过去系点样带领上帝子民嘅。无论喺约书亚嘅日子定系公元1世纪，基督始终提供明智嘅指引，喺整体上保护上帝嘅子民，强化佢哋嘅信心，帮助佢哋保持团结。（希伯来书13:8）
14-16． “忠信睿智嘅奴隶”提供嘅指引点样清楚表明基督关心我哋嘅属灵需要？
14 耶稣基督通过“忠信睿智嘅奴隶”喺适当嘅时候俾我哋指引，呢个证明佢好关心我哋嘅属灵情况。（马太福音24:45）马克系四个细路嘅爸爸，佢话：“撒但试图通过攻击家庭嚟削弱会众。而家，组织鼓励家主每个星期都举行家庭崇拜。呢个清楚表明，家主要保护自己嘅家庭！”
15 我哋留意基督点样领导我哋，就会明白佢好想帮助我哋保持坚强嘅信心。帕特里克系一个长老，佢话：“周末传道系以小组形式举行嘅，起初有啲传道员见人数唔多就觉得好难得到鼓励。” 不过佢话，呢个安排表明，耶稣关心会众嘅每一个人。例如，有啲比较怕丑或者唔系咁积极嘅弟兄姊妹，而家受到更多赏识，觉得自己喺大家当中更加有价值。结果，佢哋嘅灵性更加成熟。
16 除咗关心我哋嘅属灵需要，基督亦都帮助我哋喺今日最重要嘅工作上保持专注。（请读马可福音13:10）安德烈系一个新近被委任嘅长老，佢一直都好留意上帝组织嘅方向有乜嘢改变。佢话：“分部办事处缩减人手，提醒我哋时间紧迫，要将精力集中喺传道工作上。”
忠贞支持基督嘅指引
17,18． 点解我哋要留意，自己根据组织嘅新指引作出调整之后所得到嘅益处？
17 已经登基作王嘅耶稣基督俾我哋嘅指引，无论而家定系未来，都对我哋有帮助。我哋好开心组织最近作咗一啲改变，因为我哋按照新嘅指引作出调整之后都有所得益。喺家庭崇拜嗰时你可以同家人一齐讨论吓，聚会或者传道方面嘅一啲改变点样使你哋得益。
你系咪正帮助紧自己嘅家人同其他人适应耶和华组织嘅改变？（请睇第17、18段）
18 如果我哋领悟上帝组织嘅指引背后有乜嘢原因以及为我哋带嚟乜嘢益处，就会乐意跟从呢啲指引。我哋好高兴组织通过减少印刷嚟节约金钱，同埋使用新科技使我哋可以喺世界各地扩展王国工作。明白呢一点，我哋就会愿意更加广泛噉使用电子出版物以及录音同影片。我哋噉样做，就系善用组织嘅资源，表明我哋支持耶稣基督嘅领导。
19． 点解我哋应该支持基督嘅领导？
19 我哋支持基督嘅领导，就可以强化其他人嘅信心，促进团结。安德烈沉思全球伯特利家庭缩小规模呢个调整之后，评论话：“伯特利家庭成员乐意接受任何委派，同耶和华嘅战车保持步调一致。佢哋表现出乐意合作嘅精神，使我深深尊敬佢哋同埋更加信赖耶稣基督嘅领导。”
全心信赖我哋嘅领袖
20,21． （甲）点解我哋可以信任我哋嘅领袖耶稣基督？（乙）下一篇课文会讨论乜嘢问题？
20 我哋嘅领袖耶稣基督好快就会完全得胜，亦都会施行可畏嘅事。（启示录6:2；诗篇45:4）而家，耶稣正帮助上帝嘅子民为新世界嘅生活同工作做好准备。到时，我哋有好多建筑工作要做，亦都要教导好多复活咗嘅人。
21 即使情况不断改变，只要我哋完全信赖我哋嘅受膏君王，佢就一定会带领我哋进入新世界。（请读诗篇46:1-3）有时我哋作出调整可能要付出唔少嘅努力，特别系遇到一啲突如其来嘅改变嗰时，就更加唔容易。我哋可以点样保持内心平静，对耶和华保持十足嘅信心呢？下一篇课文会讨论呢个问题。
^ 8段 考古学家喺耶利哥城遗址发现咗大量嘅谷物，表明呢个城市冇被长期围攻，食物供应并冇耗尽。虽然上帝唔准以色列人攞耶利哥城嘅财物，不过佢哋进入呢个地区嗰阵，啱啱好系收割嘅季节。所以，佢哋可以从田地得到丰富嘅食物。（约书亚记5:10-12）
^ 11段 请睇《守望台》2003年3月15日刊24页嘅附栏“保罗谦卑地接受考验”。
