全心信賴領導緊我哋嘅耶穌基督
“你哋嘅‘領袖’只有一位,就係基督。”——馬太福音23:10
1,2. 摩西去世之後,約書亞面對乜嘢挑戰?
耶和華講嘅話一直喺約書亞嘅耳邊迴響:“我嘅僕人摩西已死。而家你同呢群人要起程,過呢條約旦河,去我要賜俾佢哋以色列人嘅地。”(約書亞記1:1,2)對做咗摩西助手差唔多40年嘅約書亞嚟講,呢個真係一個好突然嘅改變!
2 長期以來,都係摩西帶領以色列人嘅,不過而家就由約書亞嚟做領袖。約書亞可能會諗:”上帝嘅子民會唔會接受我呢個領袖呢?”(申命記34:8,10-12)一本聖經參考書提到約書亞記1:1,2話:“無論古代定係現代,領導權嘅過渡時期都係一個國家最唔穩定嘅時候。”
3,4. 耶和華因為約書亞有信心就點樣祝福佢?我哋可能會諗到乜嘢問題?
3 約書亞肯定好擔心,不過佢信賴耶和華,幾日之内就採取行動嘞。(約書亞記1:9-11)聖經記載表明,因為約書亞有信心,耶和華就通過天使引導佢同以色列人。我哋 有理由相信,呢個天使就係上帝嘅頭生子,聖經稱佢為“話語”。(出埃及記23:20-23;約翰福音1:1)
4 喺耶和華嘅幫助下,領導權過渡得好順利,以色列人接受咗約書亞做佢哋嘅新領袖。今日,我哋亦都面對好多重大嘅改變。可能我哋會諗:“上帝嘅組織正迅速前進,而耶穌係呢個組織嘅領袖,點解我哋可以全心信賴佢呢?”(請讀馬太福音23:10)我哋會分析一下,過去發生變化嘅時候,耶和華點樣帶領佢嘅子民。
帶領上帝嘅子民進入迦南地
5. 約書亞行近耶利哥城嘅時候遇到乜嘢事?(請睇吓課文開頭嘅圖片)
5 以色列人渡過約旦河之後冇幾耐,約書亞就遇到一件意想唔到嘅事。佢行近耶利哥城嘅時候,見到一個手上攞住把劍嘅人。約書亞唔認識呢個陌生人,就問:“你係幫助我哋嘅,定係幫助我哋敵人嘅?”令約書亞驚訝嘅係,呢個戰士隨即表明身份,話自己係“耶和華手下大軍嘅元帥”,隨時準備好保護上帝嘅子民。(請讀約書亞記5:13-15)雖然我哋從其他記載睇到,係耶和華直接同約書亞講話,不過佢其實係通過天使發言嘅,就好似佢以往經常做嘅噉。(出埃及記3:2-4;約書亞記4:1,15;5:2,9;使徒行傳7:38;加拉太書3:19)
6-8. (甲)點解喺人睇嚟,耶和華嘅一啲指示似乎有啲奇怪?(乙)我哋點知道呢啲指示好有智慧,而且好適時?(另外請睇腳注)
6 關於點樣攻陷耶利哥城,約書亞從呢位天使得到明確嘅指示。有啲指示一開始睇嚟似乎唔係乜嘢好策略,例如耶和華命令所有男子要行割禮,噉會令佢哋有好幾日都覺得好難受。呢啲男子身體健壯,要佢哋喺呢個時候行割禮係咪真係明智嘅呢?(創世記34:24,25;約書亞記5:2,8)
7 嗰啲接受割禮之後毫無反擊之力嘅以色列士兵可能會諗:“如果敵人喺呢陣時攻入營地,我點樣保護自己嘅家人呢?”不過,跟住就發生咗令人意外嘅事!耶利哥人唔單止冇攻擊以色列人,反而仲怕咗佢哋。聖經話:“耶利哥嘅城門因為以色列人而緊緊關閉”。(約書亞記6:1)呢個消息一定令以色列人更加信賴耶和華,願意按照佢嘅指示去做。
8 另外,上帝冇命令以色列人攻擊耶利哥城,而係吩咐佢哋一連六日,每日一次繞城而行,然後喺第七日要繞城七次。可能有啲士兵會諗:“噉樣簡直就係浪費時間同精力!”不過以色列人嘅領袖耶和華清楚知道自己做緊乜嘢。佢嘅策略唔單止强化咗以色列人嘅信心,亦都使以色列人避免同耶利哥强大嘅士兵直接對抗。(約書亞記6:2-5;希伯來書11:30) *
9. 點解我哋應該跟從上帝組織嘅指示?請舉例。
9 我哋從呢個記載可以學到乜嘢?有時我哋可能會唔理解耶和華嘅組織所用嘅新方法。例如,我哋一開始可能覺得做個人研讀以及傳道同聚會嗰時使用電子産品唔係咁好。不過,而家我哋已經睇出噉樣做係有益處嘅。即使我哋對呢啲新方法有所懷疑,不過採用之後見到有好嘅結果,自己嘅信心就受到强化,我哋同弟兄姊妹亦都更加團結。
基督點樣帶領早期嘅基督徒
10. 係邊個喺背後指引耶路撒冷嘅中央長老團解決割禮嘅爭議?
10 大約喺哥尼流成為基督徒13年之後,一啲猶太裔信徒仲係認為有必要行割禮。(使徒行傳15:1,2)喺安提阿發生割禮嘅爭論嗰時,保羅就受委派將呢件事提交俾耶路撒冷嘅中央長老團。不過,喺背後提供指引嘅其實係邊個呢?保羅話:“我係由於得到啟示先上去嘅。”顯然,係基督喺度指引事態,使中央長老團最終能够解決呢個問題。(加拉太書2:1-3)
11. (甲)有啲猶太裔基督徒喺割禮嘅問題上有乜嘢睇法?(乙)保羅點樣表明自己謙卑噉支持耶路撒冷嘅長老團?(另外請參考腳注)
11 喺基督嘅指引下,中央長老團明白到非猶太裔基督徒唔需要受割禮。(使徒行傳15:19,20)不過喺作出呢個決定多年之後,好多猶太裔信徒仲係為佢哋嘅仔行割禮。後來,耶路撒冷嘅長老聽到有謠言話保羅冇遵守摩西律法,就俾咗保羅一個意想唔到嘅指示。 *(使徒行傳21:20-26)佢哋叫保羅 帶四個男子到聖殿,噉啲人就會認為保羅係“遵守律法”嘅。保羅可能會話:“點解我要噉做?冇道理喎!係嗰啲猶太裔基督徒嘅錯,係佢哋唔明白割禮嘅問題啫。”不過,保羅知道長老團希望所有信徒同工保持和睦,所以佢謙卑噉聽從佢哋嘅指示。我哋可能會諗:“耶穌嘅死已經廢除咗摩西律法,點解耶穌容許呢個問題喺佢去世之後咁長嘅時間仲未解決呢?”(歌羅西書2:13,14)
12. 點解基督容許割禮嘅問題喺一段時間之後先至完全解決?
12 適應新嘅理解係需要時間嘅。有啲猶太裔基督徒要過一段時間先至可以調整佢哋嘅觀點。(約翰福音16:12)佢哋一直認為,割禮標誌住佢哋同上帝有特别嘅關係。而家唔再需要割禮,佢哋就覺得好難接受。(創世記17:9-12)而其他喺猶太社會生活嘅信徒就可能擔心,如果自己冇遵守傳統會受到迫害。(加拉太書6:12)不過,後來耶穌通過保羅嘅書信提供咗更多指示。(羅馬書2:28,29;加拉太書3:23-25)
基督仍然帶領緊佢嘅會衆
13. 今日乜嘢可以幫助我哋支持基督嘅領導?
13 我哋如果唔係好理解組織所作嘅一啲調整,最好嘅做法就係沉思基督過去係點樣帶領上帝子民嘅。無論喺約書亞嘅日子定係公元1世紀,基督始終提供明智嘅指引,喺整體上保護上帝嘅子民,强化佢哋嘅信心,幫助佢哋保持團結。(希伯來書13:8)
14-16. “忠信睿智嘅奴隸”提供嘅指引點樣清楚表明基督關心我哋嘅屬靈需要?
14 耶穌基督通過“忠信睿智嘅奴隸”喺適當嘅時候俾我哋指引,呢個證明佢好關心我哋嘅屬靈情況。(馬太福音24:45)馬克係四個細路嘅爸爸,佢話:“撒但試圖通過攻擊家庭嚟削弱會衆。而家,組織鼓勵家主每個星期都舉行家庭崇拜。呢個清楚表明,家主要保護自己嘅家庭!”
15 我哋留意基督點樣領導我哋,就會明白佢好想幫助我哋保持堅强嘅信心。帕特里克係一個長老,佢話:“週末傳道係以小組形式舉行嘅,起初有啲傳道員見人數唔多就覺得好難得到鼓勵。” 不過佢話,呢個安排表明,耶穌關心會衆嘅每一個人。例如,有啲比較怕醜或者唔係咁積極嘅弟兄姊妹,而家受到更多賞識,覺得自己喺大家當中更加有價值。結果,佢哋嘅靈性更加成熟。
16 除咗關心我哋嘅屬靈需要,基督亦都幫助我哋喺今日最重要嘅工作上保持專注。(請讀馬可福音13:10)安德烈係一個新近被委任嘅長老,佢一直都好留意上帝組織嘅方向有乜嘢改變。佢話:“分部辦事處縮減人手,提醒我哋時間緊迫,要將精力集中喺傳道工作上。”
忠貞支持基督嘅指引
17,18. 點解我哋要留意,自己根據組織嘅新指引作出調整之後所得到嘅益處?
17 已經登基作王嘅耶穌基督俾我哋嘅指引,無論而家定係未來,都對我
哋有幫助。我哋好開心組織最近作咗一啲改變,因為我哋按照新嘅指引作出調整之後都有所得益。喺家庭崇拜嗰時你可以同家人一齊討論吓,聚會或者傳道方面嘅一啲改變點樣使你哋得益。18 如果我哋領悟上帝組織嘅指引背後有乜嘢原因以及為我哋帶嚟乜嘢益處,就會樂意跟從呢啲指引。我哋好高興組織通過減少印刷嚟節約金錢,同埋使用新科技使我哋可以喺世界各地擴展王國工作。明白呢一點,我哋就會願意更加廣泛噉使用電子出版物以及錄音同影片。我哋噉樣做,就係善用組織嘅資源,表明我哋支持耶穌基督嘅領導。
19. 點解我哋應該支持基督嘅領導?
19 我哋支持基督嘅領導,就可以强化其他人嘅信心,促進團結。安德烈沉思全球伯特利家庭縮小規模呢個調整之後,評論話:“伯特利家庭成員樂意接受任何委派,同耶和華嘅戰車保持步調一致。佢哋表現出樂意合作嘅精神,使我深深尊敬佢哋同埋更加信賴耶穌基督嘅領導。”
全心信賴我哋嘅領袖
20,21. (甲)點解我哋可以信任我哋嘅領袖耶穌基督?(乙)下一篇課文會討論乜嘢問題?
20 我哋嘅領袖耶穌基督好快就會完全得勝,亦都會施行可畏嘅事。(啟示錄6:2;詩篇45:4)而家,耶穌正幫助上帝嘅子民為新世界嘅生活同工作做好準備。到時,我哋有好多建築工作要做,亦都要教導好多復活咗嘅人。
21 即使情況不斷改變,只要我哋完全信賴我哋嘅受膏君王,佢就一定會帶領我哋進入新世界。(請讀詩篇46:1-3)有時我哋作出調整可能要付出唔少嘅努力,特别係遇到一啲突如其來嘅改變嗰時,就更加唔容易。我哋可以點樣保持内心平靜,對耶和華保持十足嘅信心呢?下一篇課文會討論呢個問題。
^ 8段 考古學家喺耶利哥城遺址發現咗大量嘅穀物,表明呢個城市冇被長期圍攻,食物供應並冇耗盡。雖然上帝唔准以色列人攞耶利哥城嘅財物,不過佢哋進入呢個地區嗰陣,啱啱好係收割嘅季節。所以,佢哋可以從田地得到豐富嘅食物。(約書亞記5:10-12)
^ 11段 請睇《守望台》2003年3月15日刊24頁嘅附欄“保羅謙卑地接受考驗”。