1, 2. а) Христиандардыҥ јӱрӱми сакыбаган јанынаҥ солынып турза, олордо кандый сезимдер болордоҥ айабас? (Јӧрмӧлдиҥ бажындагы јурукты кӧрӱгер.) б) 131-чи Сарынла болзо, јӱрегистеги амырды јылыйтпаска не болужар?

ЛЛОЙД ЛО АЛЕКСАНДРА деп эш-нӧкӧрлӧр Бэт-Элде 25 јылдаҥ ажыра иштеген кийнинеҥ ижин артыргызар керек деп угуп ийеле, тыҥ санааркай берген. Ллойд мынайып айдат: «Меге Бэт-Элде иштебей тургам деп сананарга да кӱч болгон. Бу ишти нениҥ учун артыргызарга келишкенин оҥдоп то турган болзом, бойымды канча айдыҥ туркунына эш кереги јок кижи деп, сезип јӱргем. Оныҥ учун бир ӧйдӧ сӱӱнип те турзам, је бир ӧйдӧ ойто тыҥ кунугып туратам».

² Бӱгӱнги кӱнде јӱрӱмисте болуп турган солынталардаҥ улам бис те тыҥ кунугып, стресске кирердеҥ айабазыс (Укаа 12:25). Эмезе андый солынталарга эптежип болбой турган болорыс. Је андый сезимдерге  бастыртпаска, биске не болужар? (Сарын 131:1—3 кычырыгар *.) Эмди Иегованыҥ јебрен ӧйдӧги ле бӱгӱнги кӱндеги кезик ишчилериниҥ јӱрӱми солынып турарда, олор јӱрегиндеги амырын јылыйтпаска нени эткенин кӧрӱп ийектер.

3. Иосиф кандый јеҥил эмес айалгада болуп калган?

³ Иосифти адазы ӧскӧ уулдарына кӧрӧ, эҥ артык сӱӱген. Оныҥ учун кожо чыккан акалары, ого кӱйӱнип, 17 јаш кире карындажын кул эдип садып ийген (Баш. 37:2—4, 23—28). Мынаҥ улам Иосиф 13 јылдыҥ туркунына, сӱӱген адазынаҥ ыраакта, Египетте кулданышта болгон ло тӱрмеде отурган. Мындый айалгада чӧкӧбӧскӧ лӧ акаларына ачу тутпаска, Иосифке не болушкан?

4. а) Иосиф тӱрмеде болордо, не керегинде шӱӱп сананган болор? б) Иегова Иосифтиҥ мӱргӱӱлдерине кандый каруу берген?

⁴ Иосиф тӱрмеде болордо, Иегова ого канайып болужып турганын шӱӱп сананган болор (Баш. 39:21; Сар. 105:17—19). Анайда ок јиит тужында тӱш јеринде кӧргӧн судурлардаҥ Кудайдыҥ болужарын кӧргӧн болор (Баш. 37:5—11). Ол јӱрегинде не барын Иеговага јаҥыс катап куучындабаган (Сар. 145:18). Иегова оныҥ акту јӱрегинеҥ мӱргӱгенин угуп, кӱчтеринде «оныла кожо болор» деп бӱдӱмји берген (Ап. ижи 7:9, 10) *.

5. Иеговага иштеерге «Кудайдыҥ амыры» канайып болужат?

⁵ Уур-кӱчтер болуп турза, санаабысты корулап турган «Кудайдыҥ амырын» бистер де алар аргалу. (Филиппыдагыларга 4:6, 7 кычырыгар.) Оныҥ учун санааркап турзаас, Иегованаҥ болуш сураар керек. Ол тушта Кудай јӱрегиске амыр берер. Анайып бис уур-кӱчтерге бастырбай, Иеговага оноҥ ло ары эрчимдӱ иштеерис деп, Кудайдыҥ бӱгӱнги ишчилериниҥ темдери бӱдӱмјилейт.

6, 7. Иеговага мӱргӱгенис јӱрегисте амыр болзын деп канайып болужат? Тем куучындап беригер.

⁶ Райан ла Джульетт кыска ӧйгӧ специальный пионерлер болуп иштеген. Је олордыҥ ижи учына једип келерде, олор тыҥ санааркай берген. «Бис Иеговага мӱргӱп, бойыстыҥ сезимдеристи куучындап бергенис — деп, Райан куучындайт.— Иеговага бӱткӱлинче иженетен ӧй келди деп оҥдоп турдыс. Бистиҥ јуунда, бу јуукта сууга чӧҥӱрилген ака-эјелер кӧп болгон, оныҥ учун олорго тем болорго, Иегованаҥ болуш сураганыс».

 ⁷ Иегова олордыҥ мӱргӱӱлине кандый каруу берген? Райан мынайып айдат: «Мӱргӱген кийнинеҥ бастыра јаман сезимдерис ле санааркаштарыс јоголо берген. Анайып „Кудайдыҥ амыры“ јӱректеристи ле сагыжысты чеберлеп алган. Бис чын кӧрӱм-санаалу артсаас, Каандыктыҥ ижин оноҥ ары бӱдӱрер аргалу болорыс деп оҥдоп алганыс».

8—10. а) Кудайдыҥ агару тыны санааркаштарга бастыртпаска канайып болужат? б) Јарлаар ишти баштапкы јерге тургузып турзаас, Иегова биске канайып болужат?

⁸ Кудайдыҥ агару тыны јӱрегиске амыр берет, анайда ок Кудайга иштеерин баштапкы јерге тургузарга кӱӱнзедип турган библиялык ӱлгерлерди кӧрӱп ийерге болужат. (Иоанн 14:26, 27 кычырыгар.) Бет-Элде 25 кире јыл иштеген Филип ле Мэриде мындый уур-кӱчтер болгон. Олор Бет-Элдеги ижин артыргыскан кийнинеҥ, тӧрт лӧ айдыҥ туркунына энелерин ле база бир тӧрӧӧнин јылыйткан. Анайда ок тыҥ оорый берген Мэриниҥ адазын кичеер керек болгон.

⁹ Филип эске алат: «Мен јаҥы айалгага эптежип те турган болзом, је та не де јетпей турганын сезип туратам. „Каруулчы шибеедеги“ ӱренетен јӧрмӧлди кычырып јадала, Колоссыдагыларга 1:11-деги сӧстӧргӧ ајарып ийгем. Кӧрӧр болзо, мен турумкай болгом, је узак чыдажары ла сӱӱнчи меге јетпей турган эмтир. Бу ӱлгер, сӱӱнчи јӱрӱмниҥ айалгаларынаҥ эмес, је агару тынныҥ болужынаҥ камаанду деп, эске алындырган».

¹⁰ Филип ле Мэри Иеговага иштеерин баштапкы јерге тургусканы учун, Кудайдаҥ јаан алкыш алган. Бет-Элдеҥ јӱре берген кийнинеҥ, олор јаан удабай ла Агару Бичикти бир неделеде канча катап ӱренерге турган улусла ӱредӱлер баштаган. Ӧткӧн ӧйди сананып, Мэри айдат: «Бу ӱредӱлерди ӧткӱрип, јаан сӱӱнчи алганыс. Анайып Иегова ӱзе јакшы болор деп, бисти бӱдӱмјилеп салган».

11, 12. а) Иосиф Кудайдыҥ алкыжын аларга, нени эткен? б) Иегова Иосифке турумкайы учун кандый алкыш берген?

¹¹ Јӱрӱмисте сакыбаган јанынаҥ солынталар боло берзе, бис ал-санаага  тӱже берердеҥ айабазыс. Иосифте де мынайып болордоҥ айабас болгон, је ол бойыныҥ айалгазында канча кире аргазы бар, Иеговага иштеерге албаданган, оныҥ учун Иегова ого алкыжын берген. Иосифке тӱрмениҥ башчызы кандый ла иш берер болгон. Ол бу иштерди, Потифардыҥ туразында ла чылап, албаданып бӱдӱрген (Баш. 39:21—23).

¹² Бир катап Иосифке, тӱрмеге отурардаҥ озо фараонныҥ байзыҥында иштеген эки кижиге болушчы болзын деп, јакылта берилген. Бу улус, Иосифтиҥ јалакайын кӧрӱп, бойлорыныҥ санааркаштарын ла ӧткӧн тӱнде кӧргӧн кайкамчылу тӱштерин куучындап берген (Баш. 40:5—8). Бу куучын неге экелерин Иосиф билбеген де. Ол бу учуралдыҥ кийнинеҥ тӱрмеде база эки јыл отурган да болзо, тӱрменеҥ чыккан кийнинеҥ Египеттиҥ јамылу кижизи болуп калган. Оныҥ јамызынаҥ јӱк ле фараон бийик болгон (Баш. 41:1, 14—16, 39—41).

13. Кандый да айалгада болзоос, биске Иегованыҥ алкыжын аларга нени эдер керек?

¹³ Бӱгӱнги де кӱнде бистеҥ камаанду эмес айалгалар боло берердеҥ айабас. Је Иосиф чилеп чыдамкай болуп, канча кире кӱчис бар Иеговага иштеерге албаданып турзаас, алкыш аларыс (Сар. 37:5). Је кезикте бис санааркай да берзеес, элчи Павелдиҥ айтканыла «чӧкӧбӧйдис» (2 Кор. 4:8). Бис анчада ла Иеговага иштеерин баштапкы јерге тургуссаас, ол бисти качан да артыргыспас.

14—16. Филипптиҥ јӱрӱми солына да берерде, јарлаар ишти баштапкы јерге тургусканы недеҥ кӧрӱнет?

¹⁴ Јарчы Филипп, јӱрӱми солынып та турарда, Иеговага иштеерин токтотпогон. Бу биске сӱрекей јакшы тем болот. Ол аҥылу јакылта бӱдӱрген (Ап. ижи 6:1—6). Је кенетийин ӱзе солына берген. Стефанды ӧлтӱрген кийнинеҥ, Иерусалимдеги христиандарга истежӱ башталган *. Истежӱлердеҥ улам Христостыҥ ӱренчиктери јер-башка таркай берерде, Филипп Самарияныҥ улузына јарлап барган. Бу каланыҥ улузыныҥ кӧбизи сӱӱнчилӱ јарды укпаган болгон (Матф. 10:5; Ап. ижи 8:1, 5).

¹⁵ Филипп агару тынга башкартып, кандый ла јерде јарлаарга белен болгон, оныҥ учун Иегова оны Самариядӧӧн ийген. Иудейлерге јаман кӧрдӱрип јӱрген самаритяндар, Филипптиҥ олорго јакшы баштанганын кӧрӱп, оныҥ сӧстӧрин ајарып тыҥдаган (Ап. ижи 8:6—8).

¹⁶ Мыныҥ кийнинде Кудайдыҥ агару тыны Филиппти Азот ло Кесариядӧӧн ийген. Бу јерлерде еврей эмес улус кӧп болгон (Ап. ижи 8:39, 40). Филипптиҥ Самарияга келгенинеҥ бери 20 јыл кире ӧдӧ берерде, оныҥ јӱрӱми ойто ло солынды. Ол биле тӧзӧп, јарлаган јеринде јуртай берген. Оныҥ јӱрӱми мынайып солынып та каларда, јарлаар ишти баштапкы јерге тургускан. Оныҥ учун Иегова Филиппке де, оныҥ билезине де јаан алкыжын берген (Ап. ижи 21:8, 9).

17, 18. Јӱрӱмде солынталар болгон тушта јӱректе амырды кичееп аларга, эрчимдӱ јарлаганыс канайып болужат?

 ¹⁷ Ӧйин толо берип турган кӧп ишчилер, солынталар болгон ӧйдӧ јӱректеги амырды кичееп аларга, эрчимдӱ јарлаар керек деп айдыжат. ЮАР-дагы Озборн ло Полайт деп эш-нӧкӧрлӧргӧ Бет-Элдиҥ ижин токтодорго келишкен. Олор јадар јерди анайда ок ас ӧй иштейтен ишти таап аларга јеҥил деп бодогон. «Је иш табарга андый ла јеҥил эмес болгон» — деп, Озборн эске алат. Оныҥ ӱйи Полайт кожуп айдат: «Ӱч те ай ӧдӧ берерде, бисте иш те, акча да јок коркышту кӱч айалга болгон».

¹⁸ Мындый кӱч айалганы ӧдӧргӧ олорго не болушкан? Озборн мынайып куучындаган: «Биске чын кӧрӱмдӱ болорго, јуунла јарлаганыс болушкан. Кунугып отурардыҥ ордына, бастыра ийде-кӱчисти јарлаар ишке бергенистеҥ јаан сӱӱнчи алганыс. Учы-учында иш те табыла берген».

19—21. а) Јӱрегисте амырды кичееп аларга, биске не болужар? б) Јаҥы айалгаларга эптежип алганыс кандый туза экелет?

¹⁹ Бистер бойыстыҥ айалгабыста канча кире аргабыс бар Иеговага иштеерге албаданып, ого бӱткӱлинче иженип турзаас, јӱректе амырысты кичееп аларыс деп ӧрӧги темдердеҥ кӧрӱнип јат. (Михей 7:7 кычырыгар *.) Соондо јаҥы айалгаларга эптежип, Иеговала колбуларысты тыҥыдып алганыс деп кӧрӱп ийер болорыс. Ӧрӧги айдылган Полайт: «Бет-Элдеҥ јӱре берген  кийнинеҥ, не де келишпей турган деп билдирип те турза, Иеговага канайып иженерин оҥдоп алгам. Мынаҥ улам Иеговала колбуларым оноҥ бек болуп калган» — деп айдат.

²⁰ Ӧрӧги айдылган Мэри карып калган адазын эмдигенче кичееп, пионер болуп иштейт. Ол мынайып айдат: «Санааркап турзам, токтой тӱжӱп, мӱргӱп, токунаар керек деп оҥдоп алгам. Јӱрӱмниҥ кандый да айалгазында Иеговага иженери — меге эҥ јаан ӱредӱ болот. Келер ӧйдӧ бу меге сӱреен керектӱ болор».

²¹ Јӧрмӧлдиҥ бажында айдылган Ллойд ло Александра јӱрӱминиҥ солынталары олордыҥ бӱдерин сакыбаган јанынаҥ ченеген деп айдат. Андый да болзо, олор: «Келер ӧйдӧ болотон кӱчтерде Кудайга чындык артып болорыс па деп, бӱгӱнги кӱнниҥ ченелтелери кӧргӱзип јат. Ченелтелердеҥ бис кӧп немеге ӱренедис» — деп айдат.

22. Бойыстыҥ айалгаларыста канча кире аргабыс бар Иеговага иштеп турган болзоос, бис неде алаҥзыбас аргалу?

²² Бистиҥ јӱрӱмисте кандый ла солынталар болордоҥ айабас: биске теократиялык јаҥы јакылталар берилер болор эмезе биледеги молјуларыс солынар болор эмезе су-кадыгыс уйадар болор. Је не де болзо, бир де алаҥзыбагар: Иегова слерге керектӱ ӧйдӧ болужар ла слерди кичеер (Евр. 4:16; 1 Петр 5:6, 7). Је эм тургуза бойыгардыҥ айалгаарда канча кире аргагар бар Иеговага иштегер. Теҥеридеги адабысла колбугарды тыҥыдарга, ого мӱргӱп туругар ла ого јӱрӱмигердиҥ кандый да айалгазында иженерге ӱренигер. Анайып слер јӱрӱмигердиҥ солынталарынаҥ коркыбай, јӱрегеерде амырыгарды чеберлеп аларыгар.