1, 2. а) Чахе әʹмьре мәда тьштәк ньшкева те гӧһастьне, әԝ йәк ча дькарә сәр мә һʹӧкӧм бә? (Бьньһерʹә шькле әʹԝльн.) б) Ль гора Зәбур 131, чь дькарә али мә бькә дьлрʹьһʹәт бьминьн?

ЛОИД у Александра 25 сала зедәтьр Бәйтʹәледа хьзмәт дькьрьн. Ле паше әԝана һатьнә кʹьфшкьрьне ча пешәнг. Чахе әԝана дәрһәԛа ԝе йәке пеһʹәсийан, пешийе гәләк бәрхԝә кʹәтьн. Лоид гьли дькә: «Мьн Бәйтʹәл у шьхӧле кӧ мьн ԝедәре дькьр ӧса зәʹф һʹьз дькьр, ԝәки мьн нә жи дьда бәр чʹәʹве хԝә кӧ әзе бей ве йәке бькарьбьм бьжим. Мьн фәʹм дькьр мәʹнийед ԝе гӧһастьне, ле чахе һʹәфти у мәһ дәрбаз дьбун, мьн гәләк щар хԝә ӧса тʹәхмин дькьр, кӧ те бежи әз һатьмә инкʹаркьрьне». Лоид тʹәвһәв дьбу, чьмки щара сәр ве гӧһастьне рʹаст дьньһерʹи, щара жи ньшкева дькʹәтә депресийе.

² Чахе әʹмьре мәда ньшкева тьштәк дьԛәԝьмә, дьбәкә тьрс дькʹәвә дьле мә у әм дькʹәвьнә стресе (Мәтʹлк. 12:25). Щара мәрʹа һәла һе жи чәтьн ә ԝан гӧһастьна ԛәбул кьн. Ле әм ча дькарьн ԝан дәрәщада дьлрʹьһʹәт бьминьн? (Бьхунә Зәбур 131:1-3.) Ԝәрә әм шеԝьр кьн, кӧ чаԝа хьзмәткʹаред бәре у йед иройин, нава гӧһастьнада дьлрʹьһʹәти хԝәй кьрьнә.

3. Чаԝа әʹмьре Усьв ньшкева һатә гӧһастьне?

³ Ԝәрә шеԝьр кьн сәрһатийа Усьв. Баве Усьв жь һʹәму кӧрʹед хԝә, гьшка зәʹфтьр ԝи һʹьз дькьр. Жь бо ве йәке бьред ԝи һʹәвсуди ԝи дькьрьн, у чахе әԝ ԝәкә 17 сали бу, ԝи дилти фьротьн (Дәстп. 37:2-4, 23-28). Ԝәкә 13 сала Усьв Мьсьреда хӧламтийеда у кәледа бу. Һьн жи әԝ жь баве хԝә гәләк дур бу, кʹижани әԝ зәʹф һʹьз дькьр. Ԝи һʹале хԝәда әԝи дькарьбу нета әʹмьре хԝә ӧнда кьра у бьбуйа йәки һерс. Ле чь али Усьв кьр, ԝәки нәбу йәки ӧса?

4. а) Чахе Усьв кәледа бу, әԝ дькарьбу дәрһәԛа чь бьфькьрийа? б) Йаһоԝа ча щаба дӧайед Усьв дьда?

⁴ Чахе Усьв кәледа бу, әԝ дьбәкә кʹур дьфькьри кӧ чаԝа Йаһоԝа али ԝи дькьр (Дәстп. 39:21; Зәб. 105:17-19). Дьԛәԝьмә әԝ ӧса жи дьфькьри сәр хәԝнед пʹехәмбәртийе, кʹижан кӧ әԝи щаһьлтийеда дитьбу. Әԝе йәке баԝәрийа ԝи ԛәԝи дькьр, кӧ Йаһоԝа ԝи ԛәбул дькә (Дәстп. 37:5-11). Ӧса жи әԝи дьбәкә гәләк дӧа дькьр у дьле хԝә Йаһоԝарʹа вәдькьр (Зәб. 145:18). Сәр дӧайед ԝийи дьлсах, Йаһоԝа щаба Усьв да сәва әԝ дӧдьли нәбә, ԝәки чь жи әʹмьре ԝида бьԛәԝьмә, Әԝ ԝе тʹьме «тʹәви ԝи» бә (Кʹар. Шанд. 7:9, 10). *

5. «Әʹдьлайийа Хԝәде» ча дькарә мә ԛәԝи кә, сәва бәрдәԝам кьн Хԝәдерʹа хьзмәт кьн?

⁵ Нава тәнгасийед гьранда әм дькарьн «әʹдьлайийа Хԝәде» бьстиньн, кʹижан кӧ һʹьш-аԛьле мә хԝәй дькә у мә дьлрʹьһʹәт дькә. (Бьхунә Филипи 4:6, 7.) Чахе әм дьлтәнг дьбьн у гәләк бәрхԝә дькʹәвьн, әʹдьлайа Хԝәде дькарә мә ԛәԝи кә, сәва әм дәсте хԝә сьст нәкьн у бәрдәԝам кьн Йаһоԝарʹа хьзмәт кьн. Ԝәрә әм ньһа чәнд сәрһатийед хушк-бьра шеԝьр кьн, йед кӧ әʹдьлайа Хԝәде сәр хԝә тʹәхмин кьрьнә.

6, 7. Дӧайед конкрет ча али мә дькьн, кӧ диса әʹдьлайе бьстиньн? Мәсәле биньн.

⁶ Чахе Райан у Щулийет пеһʹәсийан, ԝәки хьзмәтийа пешәнгтийа ԝанә мәхсус ида хьлаз бу, әԝана гәләк бәрхԝә кʹәтьн. Райан дьбежә: «Мә дәрберʹа Йаһоԝарʹа дӧа кьр. Мә заньбу, ԝәки әԝ дәрәщә мәщаләкә баш ә, сәва кӧ итʹбарийа хԝә һьндава Хԝәде бьдьнә кʹьфше. Щьвата мәда гәләк мәрьв һәбун, йед кӧ тʹәзә һатьбунә нава рʹастийе, ләма мә Йаһоԝарʹа дӧа дькьр, ԝәки али мә бькә сәва әм мәсәла баш бьн баԝәрийеда».

⁷ Ле Йаһоԝа ча щаба дӧайе ԝан да? Райан дьбежә: «Һәма паши дӧайе мә, фькьред нәбаш у дьлтәнги кӧ мә пешийе тʹәхмин дькьр, дәрбаз бун. Әʹдьлайа Хԝәде дьл у һʹьш-аԛьле мә хԝәй дькьр. Мә фәʹм дькьр, ԝәки әм дькарьн диса жи Йаһоԝарʹа хьзмәт кьн, һәрге ньһерʹандьна хԝә рʹаст хԝәй кьн».

8-10. а) Чаԝа ԝәʹде дьлтәнгбуне рʹӧһʹе Хԝәдейи пироз али мә дькә? б) Чаԝа Йаһоԝа али мә дькә әм хьзмәтийа ԝида хирәт бьминьн?

⁸ Рʹӧһʹе Хԝәдейи пироз дькарә һьн дьле мә рʹьһʹәт кә, һьн жи бинә бира мә ԝан рʹезед жь Кʹьтеба Пироз, кʹижан ԝе али мә бькьн кӧ әм фәʹм кьн әʹмьре мәда чь йа лапә фәрз ә. (Бьхунә Йуһʹәнна 14:26, 27.) Дина хԝә бьдьн мәсәла жьн-мерәки бь наве Филип у Мери, йед кӧ ԝәкә 25 сала Бәйтʹәледа хьзмәт дькьрьн. Нава чар мәһада һәрдӧ жи дайикед хԝә у диса мәрьвәки хԝәйи незик ӧнда кьрьн, у һьн жи мьԛати баве Мери дьбун, кʹижан кӧ һʹьшда нәхԝәш ә.

⁹ Филип тинә бира хԝә: «Мьн тʹьре мьн һеса тәйах дькьр, ле тьштәк кем бу. Щарәке,  готарәкә ‹Бьрща Ԛәрәԝьлийеда› чʹәʹве мьн чу сәр рʹеза Колоси 1:11. Мьн фәʹм кьр, ԝәки рʹаст ә мьн сәбьр дькьр, ле нә бь тʹәмами. Мьн гәрәке ‹бь думька дьреж› у ‹әшԛ› сәбьр кьра. Әве рʹезе ани бира мьн, ԝәки шабуна мьн нә кӧ дәрәщед мьва гьредайи йә, ле ԛәԝата рʹӧһʹе Хԝәдейи пирозва, кӧ сәр әʹмьре мьн һʹӧкӧм дькә».

¹⁰ Филип у Мери хьзмәтийа Йаһоԝада хирәта хԝә ӧнда нәкьрьн, у бона ве йәке Йаһоԝа ԝана бь гәләк щурʹа кʹәрәм кьр. Ԝәʹдә шунда чахе әԝана жь Бәйтʹәле чун, ԝана тʹәви чәнд мәрьва һинбуна Кʹьтеба Пироз дәстпекьр, йед кӧ рʹӧһʹанида зу пешда дьчун у һәла һе жи хԝәстьн, ԝәки һʹәфте чәнд щара һинбуне дәрбаз бьн. Мери тинә бира хԝә у дьбежә: «Әԝана шабуна мә бун, у Йаһоԝа бь ԝана мәрʹа дьгот, ԝәки һәр тьшт ԝе баш бә».

11, 12. а) Чаԝа Усьв мәщал да Йаһоԝа, ԝәки ԝи кʹәрәм кә? б) Чаԝа Усьв бона сәбьра хԝә һатә кʹәрәмкьрьне?

¹¹ Чахе әʹмьре мәда ньшкева тьштәк те гӧһастьне, әм дькарьн дәстпекьн бона ахьрийе гәләк бәрхԝә кʹәвьн у һʹьш-аԛьле хԝә педа бьдьнә сәр проблема хԝә. Әԝ йәк дькарьбу тʹәви Усьв жи бьԛәԝьмийа. Ле дәԝсе әԝи һәр тьшт дькьр, сәва һʹале хԝәда чьԛас дькарә сәбьр кә, у бь ве йәке әԝи мәщал да Йаһоԝа кӧ щәфе ԝи кʹәрәм кә. Чаԝа бал Потифар Усьв рʹьнд дьхәбьти, әԝи кәледа жи һәр шьхӧл кӧ сәрԝере кәле дьда ԝи, рʹьнд дьани сери (Дәстп. 39:21-23).

¹² Рʹожәке, Усьв щабдари станд, ԝәки пәй дӧ мера бьньһерʹә, йед кӧ бәре бәрдәстийед Фьрәԝьн бун. Щарәке Усьв дит кӧ кʹәсәр дьһатә ԝан у әԝана нәрʹьһʹәт бун бона хәԝнед кӧ ԝана дитьбу. Әԝи бь дьле хԝәйи сах ԝанрʹа гот, ԝәки дьле хԝә жерʹа вәкьн (Дәстп. 40:5-8). Усьв нә жи заньбу, ԝәки әԝ хәбәрдана ԝи тʹәви ԝан, ԝе ахьрийеда азайе жерʹа бинә. Рʹаст ә Усьв паши ве хәбәрдане диса дӧ сала кәледа бу, ле паше әԝ аза кьрьн, у һәма ве рʹоже әԝ бу мәрьве дӧда паши Фьрәԝьн (Дәстп. 41:1, 14-16, 39-41).

13. Чаԝа әм дькарьн мәщале бьдьнә Йаһоԝа, ԝәки мә кʹәрәм кә?

¹³ Мина Усьв, әм жи щара дәрәща хԝә нькарьн бьгӧһезьн йан жи әм нькарьн проблема хԝә сафи кьн. Ле йәкә һәрге әм сәбьр дькьн у ве дәрәщеда алийе хԝәда һәр тьшти дькьн, әм мәщале дьдьнә Йаһоԝа, ԝәки мә кʹәрәм кә (Зәб. 37:5). Бәле, щара әм сьст дьбьн у дьԝәстьн, ле әм тʹӧ щар бечʹарә наминьн (2 Корн. 4:8). Әԝ гьлийед Паԝлос жь ве рʹезе, ԝе сәр мә бенә сери, илаһи һәрге әм хьзмәтийеда хирәта хԝә ӧнда нәкьн.

14-16. Нава гӧһастьнада Филипойе мьзгиндар ча хьзмәтийа хԝәда хирәт ма?

¹⁴ Филипойе мьзгиндар мәсәләкә баш  һишт ве йәкеда, кӧ ԝәʹде гӧһастьна, хьзмәтийеда хирәта хԝә ӧнда нәкьр. Оршәлимеда әԝи щабдарийа тʹәзә станд, ле паше ньшкева тьштәк ԛәԝьми. Стәйфан * һатә кӧштьне, у паши ве йәке Оршәлимеда мьԛабьли Мәсиһийа зерандьнәкә гьран дәстпебу (Кʹар. Шанд. 6:1-6). Жь бо ве йәке, Мәсиһи жь ԝедәре рʹәвин у һәв бәла бун. Ле һʹьш-аԛьле Филипо диса жи сәр хьзмәтийе бу, ләма әԝ чу Самәрйайе, сәва мьзгинийе бәла кә ԝан мәрьварʹа, йед кӧ мьзгини һе нәбьһистьбун (Мәт. 10:5; Кʹар. Шанд. 8:1, 5).

¹⁵ Филипо һазьр бу һәрʹә һʹәму щийа, кʹидәре кӧ рʹӧһʹе Хԝәдейи пироз рʹебәри ԝи бькьра. Ләма Йаһоԝа ԝи да хәбате сәва ԝедәре мьзгинийе бәла кә, кʹидәре мәрьва һе нәбьһистьбун. Щьһу мәрьвед Самәри бәр тьштәкива һʹәсаб нәдькьрьн у һьндава ԝанда нәбаш бун. Ле Филипо фьрԛи нәдькьрә ортʹа мәрьва у әԝ йәк дьле Самәрийа дьһат. Кʹьтеба Пироз дьбежә, ԝәки әʹлаләте «бь дьл» гӧһ дьда Филипо (Кʹар. Шанд. 8:6-8).

¹⁶ Паши ве йәке, рʹӧһʹе Хԝәдейи пироз рʹебәри Филипо кьр, әԝ чу Ашдоде у Ԛәйсәрийайе, кʹидәре кӧ гәләк мәрьвед пʹутпʹарьст дьжитьн (Кʹар. Шанд. 8:39, 40). Ԝәкә 20 сала паши хьзмәтийа Самәрийайеда, ча те кʹьфше дәрәща ԝи диса һатә гӧһастьне. Малбәта ԝи ида һәбу, у әԝ ԝе мьһаледа дьжит, кʹидәре мьзгини бәла дькьр. Нава ԝан гӧһастьнада, Филипо йәкә хирәта хԝә ӧнда нәкьр, у ләма Йаһоԝа ԝи у малбәта ԝи гәләк кʹәрәм кьр (Кʹар. Шанд. 21:8, 9).

17, 18. Хьзмәти ча али мә дькә, чахе әʹмьре мәда тьштәк те гӧһастьне?

¹⁷ Гәләк хьзмәткʹаред һәртʹьм тʹәхмин кьрьн, кӧ чахе әԝана һʹьш-аԛьле хԝә датиньн сәр хьзмәтийе, әԝ йәк али ԝан дькә, ԝәʹде гӧһастьна шабуне ӧнда нәкьн у дьлрʹьһʹәт бьминьн. Мәсәлә, жьн у мер жь Африкайа Башуре, Полит у Осборн чахе жь Бәйтʹәле чун, әԝана бәрхԝә дькʹәтьн, чьмки гәрәке хԝәрʹа һьн хәбата лайиԛ бьдитана, һьн жи щи сәва бьжин. Осборн дьбежә: «Мә тʹьре әме зу хәбате хԝәрʹа бьвиньн, ле ӧса нәбу». Жьна ԝи, Полит тинә бира хԝә: «Мә се мәһа нькарьбу хәбат бьдита, у пʹәре мәйи зедә жи тʹӧнә бу. Әԝ рʹасти жи чәтьнайикә мәзьн бу».

¹⁸ Ле ве чәтьнайеда чь али ԝан кьр? Осборн гьли дькә: «Мә тʹәви щьвате хьзмәт дькьр, у һʹәчʹи зәʹф әве йәке али мә кьр, кӧ әм гәләк бәрхԝә нәдькʹәтьн у шабуна хԝә ӧнда нәдькьр. Мә хԝәрʹа  сафи кьр, ԝәки дәԝса кӧ әм рʹунен у бәрхԝә кʹәвьн, һе баш ә педа нав шьхӧле хьзмәтийеда бьн. Әԝе йәке мәрʹа шабунәкә мәзьн ани. Мә һʹәму щийа хәбат дьгәрʹийа, у ахьрийеда мә хԝәрʹа хәбат дит».

19-21. а) Чь ԝе али мә бькә дьлрʹьһʹәтийе хԝәй кьн? б) Әм чь кʹаре дькарьн бьстиньн чахе һини гӧһастьна дьбьн?

¹⁹ Чаԝа мәсәлед жоре нишан кьрьн, һәрге ԝәʹде гӧһастьна, әм алийе хԝәда һәр тьшти дькьн у бь сәбьр һивийа Йаһоԝа нә, әме дьлрʹьһʹәтийе ӧнда нәкьн. (Бьхунә Миха 7:7.) Һьнге әме фәʹм кьн, ԝәки чахе әм һини гӧһастьна дьбьн, һәләԛәтийа мә тʹәви Йаһоԝа ԛәԝи дьбә. Полит бәʹса кʹижане мә жоре кьр, дьбежә: «Гӧһастьна кʹьфшкьрьна мә, әз һин кьрьм, кӧ бь рʹасти чь те һʹәсабе итʹбарийа хԝә Йаһоԝа биньм, һәла һе жи гава проблемада те бежи чʹарәке навиньм. Достийа мьн тʹәви ԝи һе ԛәԝи бу».

²⁰ Мери бәʹса кʹижани мә жоре кьр, һʹәта ньһа мьԛати баве хԝәйи әʹмьрда мәзьн дьбә, у һьн жи пешәнг ә. Әԝ дьбежә: «Мьн фәʹм кьр, ԝәки чахе әз бәрхԝә дькʹәвьм, әз гәрәке дӧа бькьм у паше һеса бьм. Дәрсәкә мәзьн кӧ әз әʹмьре хԝәда һин бум, әԝ ә кӧ һʹәму дәрд у проблемед хԝә бьдьмә дәстед Йаһоԝа. Әԝ дәрс ԝе әʹсә ахьрийеда жи кери мьн бе».

²¹ Лоид у Александра, бәʹса кʹижани мә дәстпека готареда кьр, дьбежьн ԝәки гӧһастьна дәрәща ԝан, баԝәрийа ԝан ӧса щерʹьбанд, кӧ әԝана әʹщебмайи ман. У ԝана гот: «Әве щерʹьбандьне әшкәрә кьр, һәла баԝәрийа мә жь дьл ә йан на, у ӧса жи баԝәрийа мә дькарә ԝәʹде тәнгасийа мә ԛәԝи кә у дьлбинийе бьдә мә йан на. Әв дәрәщә сәр мә баш һʹӧкӧм бу у әм бунә мәрьвед һе баш».

22. Чахе ԝәʹде гӧһастьна чь дәсте мә те әм дькьн, һьнге чьда әм гәрәке дӧдьли нәбьн?

²² Һәрге әʹмьре ԝәда тьштәк ньшкева те гӧһастьне, мәсәлә, кʹьфшкьрьна ԝә, йан сьһʹәт-ԛәԝата ԝә, йан жи малда щабдарийед ԝәйи тʹәзә зедә дьбьн, дӧдьли нәбьн ԝәки Йаһоԝа ԝә һʹьз дькә у ԝе ԝәʹдәда али ԝә бькә (Ибрн. 4:16; 1 Пәт. 5:6, 7). Ԝи ԝәʹдәйи, алийе хԝәда чь дәсте ԝә те бькьн. Бь дӧа незики Баве хԝәйи әʹзмана бьн, у һин бьн хԝә бькьнә бьн пʹәрʹе ԝи. Бь ԝи щурʹәйи, чь жи бьԛәԝьмә у бе гӧһастьне, һуне дьлрʹьһʹәтийе ӧнда нәкьн.