1, 2. (a) Kristen tauna ta ena mauri ai ḡau haida e idaumu neganai ena hemami be ede bamona? (Rau 27 ai laulau ba itaia.) (b) Salamo 131 ena hereva heḡereḡerena, dahaka ese baine duruda lalomaino baita abia?

LLOYD bona Alexandra na e hadibadia edia asainmen e haidaua neganai, matamanai e lalohisihisi. Idia na laḡani 25 mai kahana Betele ai e ḡaukara. Lloyd na eto: “Egu mauri ibounai lalonai lau na Betele ai na noho bona egu ḡaukara na na manadalaia. Emai asainmen e idau neganai una na na abia dae, to wiki haida o hua haida muridiai, na hemamiva ta ese se lalomaiva. Na daradarava, badina nega haida na moaleva, a nega haida be na lalohisihisiva.”

² Asita lalomu ḡaudia na eda mauri ai e varamu neganai, ta lalohekwarahimu eiava ta lalometaumu. (Her. 12:25) Bona nega haida unu baita abi dae na auka. Nega unu bamodiai, dahaka ese baine duruda basita lalohekwarahi? (Salamo 131:1-3 ba duahi.) Namona na Iehova ena hesiai taudia​—guna  bona hari​—edia noho daladia e idau neganai lalomaino e abia daladia aita herevalai.

3. Iosef enai be dahaka e vara?

³ Iosef laḡanina na 17 neganai, kakana veridia ese e mama henia dainai e hoihoilaia hesiai tauna ta na heto. Una do se vara ai, Iosef na tamana ese e lalokau henia bada merona. (Gen. 37:2-4, 23-28) Laḡani 13 bamona Iosef na tamana se itaia, badina Aigupto ai hesiai tauna ai ela bona dibura rumana ai e noho. Dahaka ese Iosef e durua dainai se lalomanoka bona se badu?

4. (a) Iosef ese dibura ruma ai e lalova ḡaudia haida be dahaka? (b) Iehova ese Iosef ena ḡuriḡuri be ede e haerelaia toma?

⁴ Iosef na dibura ruma ai nohova neganai, reana Iehova ese e hanamoava daladia e lalova. (Gen. 39:21; Sal. 105:17-19) Danu maraḡinai e abia nihina reana e laloa lou neganai, e diba momokani Iehova ese ia na e lalonamo henia. (Gen. 37:5-11) Nega momo ena lalohekwarahi na Iehova e hamaorolaiava. (Sal. 145:18) Iehova ese ena ḡuriḡuri e haerelaia dalana na, lalogoada e henia bona e hadibaia, baine davari hahetohodia lalodiai baine “bamoa.”​—Kara 7:9, 10. *

5. Edena dala ai “Dirava ena maino” ese e durudamu eda hesiai ḡaukara baita goadalaia?

⁵ Hari ina negai, ena be hekwakwanai idauidau baita davari, to “Dirava ena maino,” darada e gimaiamu mainona, baita abia diba. (Filipi 4:6, 7 ba duahi.) Una dainai, ta lalohekwarahimu neganai Dirava enai baita tabekau, unu amo ena maino ese baine hagoadada eda hesiai ḡaukara baita haḡuḡuru bona baine gimada basita hesiku. Mani hari ina negai tadikaka bona taihu haida edia sivarai aita herevalai.

6, 7. Edena dala ai ḡuriḡuri karana ese lalomaino baine henida diba? Haheitalai ta ba gwauraia.

⁶ Ryan bona Juliette na e hadibadia edia spesol painia asainmen na e haidaua neganai, e lalohisihisi. Ryan eto: “Maoromaoro Iehova a ḡuriḡuri henia. A diba una na nega namona emai abidadama ia enai baia hahedinaraia. Emai kongrigeisen ai momo na mamatamata hereva momokani ai, una dainai Iehova a noia baine durumai haheitalai namona baia hahedinaraia.”

⁷ Iehova ese edia ḡuriḡuri be ede e haerelaia toma? Ryan na eto: “A ḡuriḡuri murinai, haraḡa herea matamanai a abi lalohadai kereredia bona emai lalohekwarahi na e ore. Dirava ena maino ese lalomai bona daramai e gimadia. A laloparara Iehova na dounu baine ḡaukaralaimai diba bema lalohadai maorona baia abia.”

8-10. (a) Edena dala ai Dirava ena lauma ese baine duruda basita lalohekwarahi? (b) Iehova ihesiai henina ḡaukaradia baita lalo badamu neganai, ededia dala ai be durudamu?

⁸ Dirava ena lauma helaḡa ese lalomaino baine henida bona baine duruda Baibul siridia haida baita lalodia tao, unu amo eda mauri lalonai hesiai ḡaukaradia baita ato guna. (Ioane 14:26, 27 ba duahi.) Mani Philip bona adavana Mary aita lalodia, idia na laḡani 25 heḡereḡerena Betele ai e ḡaukara. Hua 4 lalodiai,  idia raruosi sinadia bona varavaradia ta e mase, bona Mary tamana ena gorere na e bada dainai e nariava.

⁹ Philip na eto: “Na tomava lau na heḡereḡere baina haheauka. Bena Gima Kohorona stadi atikol ta ai Kolose 1:11 na duahia. Momokani, na haheaukava, to dounu lalogu na e hekwarahiva. Na lalo namona na baina ‘haheauka bona baina boga auka mai moalegu ida.’ Ina siri amo na diba Dirava ena lauma helaḡa ena heduru dainai baina moale diba, dia egu noho dalana amo.”

¹⁰ Philip bona Mary na Iehova ihesiai henina ḡaukaradia e lalodia bada dainai, Iehova ese dala momo ai e hanamodia. Betele e rakatania bena se daudau, Baibul stadi namodia haida e davari, unu stadi taudia na e urava wiki ta lalonai dina rua o toi bae stadi. Mary na una e laloa lou neganai, eto: “Idia idurudia karana na a moalelaiava bona una dala amo Iehova na vaitani ai e hamaoromaiva ḡau iboudiai na be namomu.”

11, 12. (a) Edena dala ai Iosef na kara ta e karaia unu amo Iehova ese e hanamoa? (b) Iosef na e haheauka dainai dahaka hahenamo e abi?

¹¹ Mauri ai ḡau haida e idau haraḡamu neganai, reana ḡau momo ta lalohekwarahilaimu. Iosef enai una na bema vara diba. To, ia na ḡau haida e kara bena Iehova ese e hanamoa. Ena be ia na dibura ruma ai, to dibura rumana igimana tauna ese e heniava ḡaukaradia iboudiai e haḡuḡuruva, Potifara enai e ḡaukarava heḡereḡerena.​—Gen. 39:21-23.

¹² Dina ta, Iosef na e abia hidi, guna Farao ena ruma ai ḡaukarava taudia rarua baine naridia. Iosef ena kara namo dainai, unu tatau raruosi ese edia hekwakwanai bona edia nihi na ia enai e herevalai. (Gen. 40:5-8) Iosef na se diba, gabeai una ese ḡau namona ta baine havaraia. Ena be Iosef na laḡani rua heḡereḡerena dibura ruma ai e noho, to gabeai e ruhaia neganai Farao henunai lohia tauna iharuna ai ela.​—Gen. 41:1, 14-16, 39-41.

13. Ena be eda noho daladia bae idau to dahaka baita kara bena Iehova ese baine hanamoda?

¹³ Iosef heḡereḡerena, eda mauri ai e varamu ḡaudia na basita haidau dibamu. To, bema baita haheaukamu bona baita ḡaukara goadamu, Iehova ese be hanamodamu. (Sal. 37:5) Momokani, ena be nega haida baita ‘daradaramu,’ to aposetolo Paulo ena hereva heḡereḡerena, ‘darada na basine dokomu.’ (2 Kor. 4:8) Paulo ena hereva na edai baine ḡuḡuru, bema hanaihanai eda hesiai ḡaukara baita laloa bada.

14-16. Edena dala ai evanelia tauna Filipo na ena hesiai ḡaukara e laloa bada, ena be ena noho dalana e idau?

¹⁴ Evanelia tauna Filipo na haheitalai namona, ia na ena hesiai ḡaukara e laloa badava, ena be ena noho dalana e idau. Ierusalem ai, Stefano e mase neganai daḡedaḡe karana na e bada herea. * Una negai, Filipo na hesiai ḡaukara matamatana e moalelaiava. (Kara 6:1-6) Keriso murinai e rakava taudia e karoho rohoroho neganai, Filipo na se helai kava to kara ta e karaia. Ia na ela Samaria hanuana ai baine haroro, badina una neganai sivarai namona na una hanua ai do asie harorolaia.​—Mat. 10:5; Kara 8:1, 5.

¹⁵ Filipo na Dirava ena lauma ese e hakaua gabudia ela, una dainai Iehova ese e ḡaukaralaia teritori matamatadia ai baine haroro. Filipo ese Samaria taudia na e lalodia bada ena be Iuda taudia e inai henidiava. Una dainai, Samaria taudia momo na “mai lalodia tamona” ida ena hereva e kamonai.​—Kara 8:6-8.

¹⁶ Filipo na Dirava ena lauma ese e hakaua Asoto bona Kaisarea ela, unu hanua ruaosi ai Idau Bese taudia na momo herea. (Kara 8:39, 40) Filipo na Samaria ai e haroro matama bena laḡani 20 muridiai, ena noho dalana e idau. Ia na natuna e vara murinai, e harorova hanuana ai e noho. Ena be ena noho dalana e idau, to ena hesiai ḡaukara na dounu e laloa badava, una dainai ia bona ena bese na Iehova ese e hanamodia.​—Kara 21:8, 9.

17, 18. Eda noho daladia e idaumu neganai, edena dala ai haroro ḡaukara ese baine duruda?

¹⁷ Ful–taim hesiai taudia momo na e gwaumu, edia hesiai ḡaukaradia e ato gunamu dainai e moalemu, ena be noho daladia na e idaumu. South Africa ai, Osborne bona Polite na Betele e rakatania neganai, e laloava pat-taim moni ḡaukara bona noho gabudia na be davari haraḡamu. Osborne eto: “To, moni ḡaukara na asia davari haraḡa.” Adavana Polite ma eto: “Hua toi lalodiai ḡaukara ta asia davaria, bona emai moni danu e ore. Ai emai ai una na nega aukana.”

¹⁸ Dahaka ese e durudia bae haheauka? Osborne eto: “Kongrigeisen ida haroro hebou karana ese e durumai lalohadai  maorona baia abia. Lalomai a hadai basia helai kava to baia haroro goadagoada, una ese e hamoalemai. Gabu iboudiai a hetahu, bona gabeai moni ḡaukara ta a davaria.”

19-21. (a) Dahaka ese baine duruda lalomaino baita abia? (b) Eda noho daladia e idaumu neganai dahaka ese baine duruda?

¹⁹ Ini haheitalai ese e hahedinaraimu, ena be eda noho daladia na bae idau, to hanaihanai Iehova baita abidadama henia bona ia ese lalomaino baine henida. (Mika 7:7 ba duahia.) Bena baita lalopararamu eda mauri ai e idau ḡauna ta abia daemu neganai, eda hetura karana Dirava ida danu be hagoadaiamu. Polite, matamanai e herevalaia hahinena na enai e vara ḡauna e laloa lou neganai, ini e gwau toma: “Egu asainmen e idau neganai, na diba ḡauna na Iehova enai baina tabekau na mai anina bada, ena be hekwakwanai bae vara. Egu hetura karana Iehova ida na e goada.”

²⁰ Paragraf matamana ese e herevalaia hahinena, Mary, na dounu tamana e nariamu bona e painiamu. Ia na eto: “Na diba ḡauna badana bina, lalogu e hekwarahimu neganai, namona na maoromaoro Dirava enai baina ḡuriḡurilaia. Danu ḡau iboudiai Iehova imana ai baina ato, vaira negadiai danu unu baina kara toma.”

²¹ Lloyd bona Alexandra, matamanai ta herevalaidia taudia, edia mauri ai e idau ḡaudia ese edia abidadama e tohoa. To ini e gwau tomamu: “Una ese emai abidadama e hagoadaia bona a diba nega aukadiai emai abidadama karana ese baine durumai. Danu ḡau namodia momo a diba.”

22. Herevana eda noho dalana be edeheto, to dahaka baita kara?

²² Bema emu mauri lalonai ḡau haida e idaumu​—heḡereḡere emu asainmen e idaumu, eiava o goreremu eiava ruma bese madunadia o huamu​—namona na ba helalotao Iehova na oi e lalomu badamu bona nega maorona ai baine durumu. (Heb. 4:16; 1 Pet. 5:6, 7) Herevana emu noho dalana be edeheto, to ba haheauka. Tamamu guba ai, ba ḡuriḡuri henia, bona ḡau iboudiai na ia imana ai bavato. Una dala amo, lalomaino baine henimu, ena be emu noho dalana baine idau.