1, 2. (a) Panon ya nayarin naapektoan so sakey ya Kristiano ed saray ag-iilaloan ya nagawan pananguman ed bilay to? (Nengnengen so litratod gapo na artikulo.) (b) Base ed Salmo 131, antoy makatulong pian mansiansia tayon kalmado?

NEN naamtaan nen Lloyd tan Alexandra ya iyasain da la ra ed field, diad gapo et maermen ira. Lalo la ta masulok ya 25 taon la ran manlilingkor ed Bethel. Oniay imbaga nen Lloyd: “Nagmaliw lan parte na bilay ko so Bethel tan say trabahok ditan. Natatalosan ko ray rason na satan ya pananguman, pero kalabas na pigaran simba tan bulan, mabetbet kon nalilikna ya anggapo lay usar ko. Manguman-uman so naliliknak. No maminsan maliket ak; kabebekta maermen ak.”

² No walay biglan nagawa ya pananguman ed bilay tayo, nayarin napagaan tan naermenan itayo. (Pro. 12:25) Ompan mairap tayo ni ingen ya awaten itan ya pananguman. No nagawa itan, antoy gawaen tayo pian ‘onkalma tan ondeen’ so nonot tayo? (Basaen so Salmo 131:1-3.) Aralen tayo no panon ya nansiansian kalmado iray lingkor nen Jehova nensaman tan natan anggano wala ray agawan pananguman ed bilay da.

3. Anton pananguman so agawad bilay nen Jose?

³ Si Jose et manga 17 so taon to nen inlako na saray maimon ya agagi to pian magmaliw ya aripen. Antis na satan, si Jose so paborito nen ama to. (Gen. 37:2-4, 23-28) Diad loob na manga 13 ya taon, kaukolan nen Jose so mananos bilang sakey ya aripen tan priso ed Ehipto, ya arawi ed inar-aro ton ama ya si Jacob. Antoy akatulong ed si Jose pian agnaandian na ilalo tan agmanem-em na sakit na linawa?

4. (a) Legan ya walad prisoan si Jose, anto ray lanang ya ninonot to? (b) Panon ya inebatan nen Jehova iray pikakasi nen Jose?

⁴ Legan ya walad prisoan si Jose, seguradon lanang ton sankanonot iray ebidensya ya sikatoy bebendisyonan nen Jehova. (Gen. 39:21; Sal. 105:17-19) Nayarin akatulong met ed si Jose iray makabaliksan ya kugip to nen ugaw ni pian manmatalek ya walad sikatoy pabor nen Jehova. (Gen. 37:5-11) Seguradon aminpiga ton imbalikas ed si Jehova so ermen ya nalilikna to. (Sal. 145:18) Bilang ebat ed saray impapuson pikakasi to, pinaseguroan nen Jehova si Jose ya Sikatoy “walad sikato” diad amin ya subok ya dadalanen to.​—Gawa 7:9, 10. *

5. Panon itayon natulongan na “kareenan na Dios” pian nagawaan tayo iray espiritual a kalat tayo?

⁵ Anggano wala ray mairap ya dadalanen tayo natan, natulongan itayo met na “kareenan na Dios” ya manbantay ed saray nonot tayo. (Basaen so Filipos 4:6, 7.) Kanian no onasingger tayod si Jehova sano napapagaan tayo, say kareenan na Dios so mamabiskeg ed determinasyon tayon gawaen iray espiritual ya kalat tayo tan manprotekta ed sikatayo pian agtayo onsuko. Aralen tayo so pigaran alimbawa na saya diad panaon tayo.

6, 7. Panon ya makatulong so espisipikon pikakasi tayo pian magmaliw tayon kalmado? Mangiter na alimbawa.

⁶ Nen impaamta ed si Ryan tan Juliette ya manampot lay asainmin da bilang temporaryon espisyal payunir, naermenan ira. “Impikasi min tampol itan ed si Jehova,” so imbaga nen Ryan. “Amta min aya so pankanawnawa min ipanengneng ya talagan manmamatalek kami ed sikato. Dakel ed saray kakongregasyon mi so balo ni ed katuaan, kanian impikasi mi ed si Jehova ya tulongan to kamin mangipanengneng na maabig ya alimbawa na pananisia.”

⁷ Panon ya inebatan nen Jehova so pikakasi da? Nanonotan nen Ryan: “Kayari min nampikasi, saray negatibon nalilikna mi tan kapagaan mi diad gapo et tampol ya naandi. Say kareenan na Dios so manbabantay ed puso tan nonot mi. Atalosan mi ya usaren kami ni nen Jehova no mansiansia kamin positibo.”

8-10. (a) Panon itayon natulongan na espiritu na Dios pian agtayo magmaliw ya mapagpaga? (b) Diad anto ran paraan ya nayarin bendisyonan nen Jehova so pansasagpot tayon manpokus ed panaglingkor tayo?

⁸ Natulongan itayo na masanton espiritu na Dios ya aglabat mansiansian kalmado noagta ipanonot met na satan iray teksto ya makatulong pian agtayo napaulyanan so espiritualidad tayo. (Basaen so Juan 14:26, 27.) Imanoen pay eksperiensya na sanasawan si Philip tan Mary, ya ngalngali 25 taon iran nanlingkor ed Bethel. Diad loob na apat bulan, pareho iran inateyan na ina tan sakey ya kanayon, tan kaukolan nen Mary ya asikasoen so ama to ya kabaw la.

⁹ Oniay nanonotan nen Philip: “Say amtak et nasasarag ko, pero singa walay kulang. Abasak  so Colosas 1:11 diad sakey ya aaralen ya artikulo na Panag-bantayan. Tua, mansusungdo ak la, pero kulang ni manaya. Kaukolan koy ‘sigpot ya mansungdo a walaay anos tan liket.’ Impanonot na sayan teksto ed siak ya say liket ko et ag-akadepende ed kipapasen kod bilay, noagta lapud walad siak so espiritu na Dios.”

¹⁰ Lapud pansasagpotan nen Philip tan Mary ya mansiansian akapokus ed panaglingkor da anggano mairap so situasyon da, benendisyonan ira nen Jehova diad dakel ya paraan. Ag-abayag kayari ran pinmaway ed Bethel, pareho iran akalmo na saray progresibon iyaaralan na Biblia ya labay day manaral anggan maminpiga ed kada simba. Oniay nanonotan nen Mary, “Sikaray lapuan na liket mi tan panamegley da et singa ibabagad sikami nen Jehova ya anggapoy nepeg min pampagaan.”

11, 12. (a) Antoy ginawa nen Jose kanian sikatoy benendisyonan nen Jehova? (b) Panon ya abendisyonan si Jose lapud impansungdo to?

¹¹ No walay biglan nagawa ya pananguman ed bilay tayo, ompan magmaliw tayo lan mapagpaga tan atan lan naynay so sankanonot tayo. Nayarin ontan met komon so agawa ed si Jose. Balet mapatnag ya pinili toy manggawa na maabig anggano mairap so situasyon to, kanian benendisyonan nen Jehova. Anggano walad prisoan, si Jose et makulikuli tan sinumpal toy amin ya ipapagawa ed sikato na manunan opisyal na prisoan, ya singa ginawa to nen manlilingkor nid si Potifar.​—Gen. 39:21-23.

¹² Aminsan, impiyad si Jose so pangasikaso ed duaran lalaki ya datin walaan na atagey ya posisyon ed palasyo na Faraon. Lapud anengneng da ya maomaong si Jose, imbaga dad sikato iray problema da tan saray agda natalosan ya kugip da diad apalabas ya labi. (Gen. 40:5-8) Ag-inilaloan nen Jose ya diad sayan impitongtong tod sikara et magmaliw ya maliket so resulta parad sikato. Anggano kaukolan toy mananos na duay taon ni ed prisoan, sikatoy imbulos lanlamang, tan diad saman ya mismon agew et sikatoy tinuro bilang manuley ya onkokomadua ed Faraon.​—Gen. 41:1, 14-16, 39-41.

13. Panon itayon makapanggawa na bengatlan bendisyonan nen Jehova antokaman so situasyon tayo?

¹³ Singa si Jose, nayarin nipaarap itayo met ed sakey ya situasyon ya agtayo kontrolado. Balet no mansiansia tayon maanos tan makuli tan no manggawa tayoy maabig anggano mairap so situasyon tayo, manggagawa tayoy bengatlan bendisyonan nen Jehova. (Sal. 37:5) Tua, no maminsan et nayarin “nawewetwet” tayo, balet singa imbaga nen apostol Pablo, ag-itayon balot ‘napaulyan ya anggapoy ilalo.’ (2 Cor. 4:8; paimanod leksab.) Magmaliw ya tua ed sikatayo iratan ya imbaga nen Pablo, lalo la no mansiansia tayon akapokus ed ministeryo tayo.

14-16. Panon ya say ebanghelisador ya si Felipe et akapansiansian akapokus ed ministeryo to anggano anguman-uman so sirkumstansya to?

¹⁴ Angipanengneng na maabig ya alimbawa so ebanghelisador ya si Felipe no panon so pansiansian akapokus ed ministeryo anggano wala ray nagawan pananguman ed bilay. Diad Jerusalem, walay agawan graben panamasegsegang ya lapud satan et pinatey si Esteban. * Diad saman a panaon, panliliketan nen Felipe so balon asainmin to. (Gawa 6:1-6) Balet sanen nitaytayak iray papatumbok nen Kristo, agnasarag nen Felipe so manpareen labat tan anggapoy gawaen to. Sikatoy linman nampulong ed syudad na Samaria, ya maslak a totoo diad saman a panaon et agni akarengel na maong a balita.​—Mat. 10:5; Gawa 8:1, 5.

¹⁵ Mabulos si Felipe ya onla ed inerman a pangibakian ed sikato na espiritu na Dios, kanian sikatoy inusar nen Jehova pian pulongan iray teritoryan agni akimeyan. Seguradon aliketan iray Samaritano lapud anggapoy panangidumaduma tod sikara, ta nensaman et memelmelagen ira na saray Judio. Agla pankelawan ya saray totoo et “nankakasakey” ya dinmengel ed sikato!​—Gawa 8:6-8.

¹⁶ Insan inggiya na espiritu na Dios si Felipe ya onlad Asdod tan Cesarea, say duaran syudad ya maslak ed saray manaayam et aliwan Judio. (Gawa 8:39, 40) Manga 20 taon kayari na inmunan impanpulong nen Felipe ed Samaria, mapatnag ya anguman lamet so sirkumstansya to. Natan et sikatoy pamilyado la, kanian nansiansia lad teritorya ya pampupulongan to. Balet anggano anguman so sirkumstansya to, siansian nampokus si Felipe ed ministeryo to, kanian sikato tan say pamilya to et benendisyonan a maong nen Jehova.​—Gawa 21:8, 9.

17, 18. Panon ya say pampokus ed ministeryo et ontulong ed sikatayo ya mansiansian maliket tan positibo no manguman so sirkumstansya tayo?

¹⁷ Nibaga na dakel ya manlilingkor a full-time ya lapud manpopokus irad ministeryo, mansiasiansia ran maliket tan positibo anggano manguuman so sirkumstansya ra. Nen say sanasawan taga South Africa ya si Osborne tan Polite et anggapo lad Bethel, say amta ra et makalmo ran tampol na part-time ya trabaho tan panayaman. Oniay imbaga nen Osborne: “Makapaermen ta agkami akalmon tampol na trabaho ya singa ed iilaloan mi.” Nanonotan met nen asawa ton si Polite: “Taloy bulan ya anggapoy trabaho mi, tan anggapoy tipon mi. Talagan nairapan kami.”

¹⁸ Antoy akatulong ed sikara pian nasarag so mairap ya situasyon da? Oniay imbaga nen Osborne: “Say pampupulong mi kaiba ray agagi ed kongregasyon so baleg ya akatulong  pian mansiansia kamin akapokus tan positibo. Nandesisyon kamin magmaliw ya busy ed panagpulong imbes ya onyurong labat tan manpaga, tan lapud satan et malikeliket kami. Pero agkami tinmundan nananap na trabaho, tan akalmo kamin siansia.”

19-21. (a) Antoy makatulong pian mansiansia tayon kalmado? (b) Anto ray nagunggona tayo no mabulos tayon onadapta ed balo iran sirkumstansya tayo?

¹⁹ Nanengneng tayod sarayan alimbawa ya no manggawa tayoy maabig anggano mairap so situasyon tayo tan no matalek itayon manalagar ed si Jehova, mansiansia tayon kalmado. (Basaen Miqueas 7:7.) Ompan dakel ni ingen so nagunggona tayo ed espiritual no mabulos tayon onadapta ed balo iran sirkumstansya tayo. Makaaral tayod eksperiensya nen Polite ya abitla niman, ya oniay imbaga to: “Nen naikdan kami na balon asainmin, naaralan ko so sigpot ya manmatalek ed si Jehova sano nanairapan ak lan maong lapud situasyon mi. Talagan inmelet so relasyon kod sikato.”

²⁰ Si Mary, ya abitla niman, et siansia nin aasikasoen toy maedad lan ama to legan ya manpapayunir. Imbaga to: “Naaralan ko ya no napapagaan ak la, ontunda ak magano tan manpikasi ak, tan agak la manaburido. Nayarin say sankaimportantian ya naaralan ko et nepeg kon ipalima ed si Jehova so amin ya kapagaan ko, tan atan so lalon kakkaukolan tayon gawaen diad arapen.”

²¹ Inamin nen Lloyd tan Alexandra ya abitlad gapo ya lapud saray agawan pananguman ed bilay da et talagan asubok so pananisia da diad paraan ya agda inilaloan. Balet imbaga da: “No nasubok so pananisia tayo, ditan nanengneng no kasin tua tan mabiskeg itan pian natulongan tan naligliwa itayo na satan diad mair-irap iran panaon. Mas binmiskeg so pananisia mi.”

22. No pilien tayoy manggawa na maabig anggano mairap so situasyon tayo natan, antoy naseguro tayo?

²² No walay biglan nagawan pananguman ed bilay tayo—balanglan anguman so teokratikon asainmin tayo, nansakit tayo, odino walay balon responsabilidad tayod pamilya​—makaseguro itayo ya asikasoen itayo nen Jehova tan tulongan to itayo diad panaon ya kakkaukolan tayo. (Heb. 4:16; 1 Ped. 5:6, 7) Balet kaleganan to, manggawa tayoy maabig anggano mairap so situasyon tayo. Onasingger tayod si Jehova panamegley na pikakasi, tan ipiya tayoy bilay tayod panangasikaso to. No ontan so gawaen tayo, mansiansia itayo met ya kalmado anggano manguuman iray sirkumstansya tayo.