1, 2. (a) Zyiimo zichincha maKristu kabatayeeyeli zipa kuti balimvwe biyeni? (Langa chifanikisyo chili kumatalikilo achiiyo.) (b) Intembauzyo 131 itondeezya kuti ngaali maboneno aakonzya kutugwasya kuti tukkale katuli aluumuno mumoyo?

CHIINDI Lloyd aAlexandra nibakabuzigwa kuti bachinche mulimu wabo aaBbeteli akuyooba mapayona, zyakabamana manguzu. Bakali baba aminyaka yiinda ku25 kababelekela aaBbeteli. Lloyd wakati: “Bantu biingi bakalizi kuti ndibelekela aaBbeteli. Nikuba kuti kumasaangunino ndakali kutumvwisisisya twaambo twakapede kuti ndichinchwe pesi nikwakayinda mviki amyeezi, ndakalimvwa kuti ndalekelezegwa.” Chimwi chiindi Lloyd wakali kuba amaboneno aalikabotu pesi chimwi chiindi, zintu taakali kuzibona munzila iili kabotu.

² Kuti kwaba kumwi kuchincha nkututayeeyeli mubuumi, tulakonzya kukataazikana akulilya mumoyo. (Tus. 12:25) Chimwi chiindi kulakonzya kutuyumina kutambula kuchincha kuli boobo. Muzyiimo zili boobo, niinzi chikonzya kutugwasya ‘kuumuna akuba batontozi’? (Bala Intembauzyo 131:1-3.) Atulange-lange bakombi baJehova baambidwe muBbayibbele abamazubaano mbubakazumanana  kuba aluumuno mumoyo nikuba zyiimo nizyakachincha mubuumi bwabo.

3. Josefa wakaswaana chiimo chili biyeni?

³ Josefa wakali aminyaka iili 17, chiindi bakulana bakwe nibakamuuzya mubuzike akaambo kakuti bakamuchitila bbivwe. Kazitanachitika eezi, Josefa wakali aamoyo kuli wisi. (Matl. 37:2-4, 23-28) Kwaminyaka iili 13, Josefa wakalisimya mubuzike amujele kuEgepita kule akwakali kukkala wisi wakali kumuyanda loko, Jakkobo. Niinzi chakagwasya Josefa kuti akkale kali abulangilizi akuti atanyemi?

4. (a) Josefa wakali kuyeeyesesya atalaanzi naakali mujele? (b) Jehova wakazisandula biyeni nkombyo zyaJosefa?

⁴ Kulakonzeka kuti naakali mujele, Josefa wakali kuyeeyesesya Jehova mbaakali kumulongezya. (Matl. 39:21; Int. 105:17-19) Ziloto zyabusinsimi nzyaakalotede kachili muniini, zyakamugwasya kubona kuti Jehova wakali anguwe. (Matl. 37:5-11) Kulakonzeka kuti wakakomba kuli Jehova kwaziindi zyiingi, kamubuzya mbaakali kulimvwa. (Int. 145:18) Jehova wakasandula nkombyo zyaJosefa kwiinda mukumugwasya kuti abe achoonzyo chakuti “wakali awe” muzyiimo zyoonse.​—Inc. 7:9, 10. *

5. Kujana “luumuno lwaLeza” lwatugwasya biyeni kuti tuzumanane kukomba Jehova?

⁵ Nikuba kuti twaswaana zyiimo ziyumu, tulakonzya kuba achoonzyo chakuti “luumuno lwa-Leza” luyookwabilila mizeezo yesu. (Bala BaFilipi 4:6, 7.) Chiindi nitukataazikene, tweelede kusyoma Jehova, kuchita oobo kuyoopa kuti luumuno lwaLeza lutugwasye kuzumanana kukomba Jehova akuti tulisimye. Nkinkaako, atulange-lange zikozyano zyabakombi baLeza bamazubaano bakaswaana zyiimo zili boobu.

6, 7. Kwaamba zitukataazya munkombyo, kutugwasya biyeni kuti tube aluumuno lwamumoyo? Amba chikozyano.

⁶ Ryan aJuliette nibakayimikizigwa kuba mapayona aayandikana kwachiindi chifwiifwi, bakalimvwa kuti balekelezegwa. Ryan wakati: “Twakakomba kuli Jehova mpawaawo. Twakabona kuti ooyu wakali mweenya wakutondeezya kuti tulamusyoma Jehova amoyo woonse. Biingi mumbungano yesu bakachili bapya nkinkaako twakaakombela makani aaya kuti Jehova atugwasye kuti tube chikozyano chibotu chakutondeezya kuti tulasyomeka kuli nguwe.”

⁷ Jehova wakayisandula biyeni nkombyo yabo? Ryan wakati: “Mbutwakamaninsya biyo kukomba, maboneno aatali kabotu ngitwakali aawo akukataazikana koonse, zyakamana mpawaawo. Luumuno lwaLeza lwakali kukwabilila myoyo amizeezo yesu. Twakabona kuti tulakonzya kuzumanana kubelekela Jehova, kuti twaba amaboneno aali kabotu.”

8-10. (a) Muuya uusalala utugwasya biyeni kuti tulisimye nitukataazikene? (b) Jehova utugwasya biyeni kuti tukkale katusimide mubukombi?

⁸ Muuya uusalala ulakonzya kutugwasya kuti tube abutontozi bwamumoyo akuyeeya magwalo aakonzya kutugwasya kuti tubikke zintu zyabukombi mubusena bwakusaanguna. (Bala Johane 14:26, 27.) Atuyeeyesesye atala achikozyano chaPhilip amukayintu wakwe Mary bakabelekela kuBbeteli kwaminyaka iisika ku25. Mumyeezi iili 4 banyina aPhilip abayina aMary bakazanga alubo imwi nzubo yaPhilip yakafwa, kuzwa aawo bakasaanguna kulangania wisi aMary wakali kuchiswa bulwazi bwaboongo.

 ⁹ Philip wakati: “Ndakali kuyeeya kuti ndilikulisimya pesi ndakazoobona kuti kuli chimwi chintu nchindakatali kuchita kabotu. Ndakajana BaKolose 1:11 muchiiyo chaNgaziyakulinda yakwiiya. Ndakali kulisimya pesi kutali chakumaninina pe. Ndakeelede kulisimya ‘akukkazika moyo alubo kandibotelwa.’ Lugwalo oolu lyakandiyeezya kuti kubotelwa kwangu takuyeeme azyiimo nzindiswaana mubuumi pesi kuyeeme munzila muuya uusalala mbuundigwasya mubuumi.”

¹⁰ Jehova wakalongezya Philip aMary munzila zisiyene-siyene nkaambo bakakkala kabasimide mubukombi nikuba kuti bakali muchiimo chiyumu. Nikwakiinda chiindi chifwiifwi kabali bazwa aaBbeteli, bakajana bantu bayanda kwiiya Bbayibbele kwamazuba miingi mumviki. Kayeeya zyakachitika chiindi, Mary wakati: “Bantu aaba bakali kupa kuti tubotelwe alubo njiinzila Jehova njaakali kutubuzyaayo kuti zintu ziyoobota.”

11, 12. (a) Nchiichili chintu Josefa nchaakachita chakapa kuti Jehova amulongezye? (b) Josefa wakalongezegwa biyeni akaambo kakulisimya?

¹¹ Kuti zintu zyachincha mubuumi katutayeeyeli, zipa kuti tukataazikane akuti tubikkile maanu kubuyumu-yumu mbutuswaana. Josefa wakali kukonzya kuba amaboneno aali boobu. Pesi wakasala kuchita zintu zibotu muchiimo nchaakabede alubo kuchita oobo kwakatondeezya kuti wakachita chintu chipa kuti Jehova amulongezye. Nikuba kachili mujele, Josefa wakali kwiibeleka changuzu milimu njaakali kupegwa amupati wajele mbuuli mbaakali kuchita kachibelekela Potifara.​—Matl. 39:21-23.

¹² Limwi zuba, mupati wajele wakasala Josefa kuti abe mupati wabaalumi babili mbaakali aabo mujele, bakali azyuuno zili ajulu munkuta yaFaro chiindi. Baalumi aabo bakabona kuti Josefa wakali aluzyalo nkinkaako bakamubuzya zyakali kubakataazya aziloto nzibakalotede mubusiku bwakiinda. (Matl. 40:5-8) Kwaambuuzyania nkubakachita kwakali kuyoopa kuti kube mpindu mbotu nikuba kuti taakali kuyeeyela pe. Nikuba kuti wakachili aminyaka iibili njakacheelede kulisimya mujele pesi mubuzuba mbwaakaangununwa, wakapegwa chuuno chakuba wachibili mubwaami bwaFaro.​—Matl. 41:1, 14-16, 39-41.

13. Kujana twamupa biyeni chimwi chintu Jehova kuti atulongezye nikuba katuli muchiimo chiyumu?

¹³ Mbuuli Josefa, andiswe tulakonzya kuba muchiimo nchitutakonzyi kuchincha. Pesi kuti twaba amoyo mulamfu akubeleka changuzu tunooli tulikupa Jehova chimwi chintu chakuti atulongezye. (Int. 37:5) Chimwi chiindi, tulakonzya kulimvwa kuti “tulizyingidwe” pesi kutali “cakubula bulangizi” mbuuli mbakaamba mwaapostolo Pawulu. (2 Kor. 4:8, NW, makani  aamunsi) Majwi aaya akaambwa aPawulu ayoozuzikizigwa kulindiswe kuti twazumanana kuubikkila maanu mulimu wakukambawuka.

14-16. Mukambawusi Filipi wakuubikkila biyeni maanu mulimu wakukambawuka nikuba zyiimo zyakwe nizyakali kuchincha?

¹⁴ Mukambawusi Filipi, nchikozyano chibotu chitondeezya mbaakawubikkila maanu mulimu wakukambawuka nikuba zyiimo nizyachincha. KuJerusalemu maKristu bakali kupenzegwa zyakapa kuti Stefani ajayigwe. * Kuchiindi eecho, Filipi wakali kubotelwa achilongezyo chakukambawukila kubusena bupya. (Inc. 6:1-6) Filipi taakakkala maboko pe chiindi batobeli baKristu nibakamwayikila kumasena aasiyene-siyene. Wakayinka kuSamariya kuti akakambawukile nkuko nkaambo kubusena oobu bantu teebakayina kambawukilwa pe.​—Mt. 10:5; Inc. 8:1, 5.

¹⁵ Filipi wakalilipedelede kwiinka kufumbwa muuya uusalala nkuwakamubuzya kuti ayinke, nkinkaako Jehova wakamubelesya kuti akakambawukile kumasena mapya. Kutasaluula nkwaakatondeezya kumaSamariya kwakabasungwaazya mubukombi nkaambo maJuda biingi bakali kubalangilaansi. Naakabakambawukila bantu biingi “bakaswiilila amoyo omwe”!​—Inc. 8:6-8.

¹⁶ Kuzwa waawo, Filipi wakazulwidwa amuuya uusalala kuti ayinke kuAsidodi akuKkayisareya alubo mumyuunzi eeyi iibili kwakavulide bantu bakatali maJuda. (Inc. 8:39, 40) Nikwakiinda minyaka iili 20 Filipi kakambawukilide kuSamariya, zyiimo zyakwe zyakachincha lubo. Wakali waba ampuli alubo wakali wabuzibila busena mbwaakali kukambawukila. Nikuba kuti zyiimo zyakwe zyakali zyachincha pesi wakakkala kawubikkila maanu mulimu wakukambawuka alubo eezi zyakapa kuti Jehova amulongezye ampuli yakwe.​—Inc. 21:8, 9.

17, 18. Kubikkila maanu mumulimu wakukambawuka kutugwasya biyeni kuti tube amaboneno aalikabotu zyiimo nizyachincha?

¹⁷ MaKristu biingi bali mumulimu wachiindi choonse bakabona kuti kuubikkila maanu mulimu wakukambawuka kulagwasya nikuba zyiimo nizyachincha. Mukwesu Osborne amukayintu wakwe Polite bakuSouth Africa bakali kubonaanga balafwambaana kujana mulimu abusena bwakukkala nibakazwa aaBbeteli. Osborne wakati: “Teetwakafwambaana kujana mulimu mbuuli mbutwakali kuyeeyela.” Mukayintu wakwe wakati: “Kwakiinda myeezi iitatu pesi teetwakawujana pe mulimu alubo teetwakali amali pe. Buumi bwakatuyumina.”

¹⁸ Niinzi chakabagwasya kuti balisimye muchiimo eechi chiyumu? Osborne wakati: “Kukambawukaamwi abamumbungano kwakatugwasya kuti tukkale  katuli amaboneno aalikabotu. Twakasala kubeleka changuzu mumulimu wakukambawuka kutali kuyeeyesesya atala achiimo chesu alubo eezi zyakapa kuti tubotelwe. Twakawuyanduula mulimu mumasena aasiyene-siyene mpawo twakazoowujana.”

19-21. (a) Niinzi chiyootugwasya kuti tube aluumuno mumoyo? (b) Nziizili zilongezyo nzitujana kuti twaba amaboneno aalikabotu zyiimo nizyachincha?

¹⁹ Mbuuli mbutwabona muzikozyano eezi, kusyoma Jehova amoyo woonse nituli muzyiimo ziyumu, kupa kuti tube aluumuno mumoyo. (Bala Mika 7:7.) Kuba amaboneno aalikabotu zyiimo nizyachincha kupa kuti tusime mubukombi. Naakali kwaamba zyakamuchitikila muchizi Polite waambwa ajulu wakati: “Kuzwa aaBbeteli kwakapa kuti ndisyome Jehova nikuba zyiimo nizili ziyumu. Lino ndili abweenzuma busimide aJehova.”

²⁰ Mary waambwa aajulu, uchilangania wisi wakakomena kumwi kapayona. Wakati: “Ndakayiya kuti, chiindi nindikataazikene ndeelede kwiimikila, ndikombe akulyiiba. Alubo ndakayiya kuti ndeelede kuwaala makataazyo oonse kuli Jehova akuti ndeelede kuzumanana kuchita oobo muchiindi chili kunembo.”

²¹ Lloyd aAlexandra baambwa kumatalikilo bakati, kuchincha kwazyiimo kwakasunka lusyomo lwabo munzila njibakatali kuyeeyela pe. Bakati: “Kusunkwa mulusyomo kupa kuti tutondeezye kuti lusyomo lwesu ndwachoonzyo na akuti lulakonzya na kutuumbulizya muchiindi chamapenzi. Alubo kupa kuti tube bantu bali kabotu.”

22. Kukkala katuli amaboneno aalikabotu zyiimo nizyachincha kutugwasya kuti tube achoonzyo chanzi?

²² Kuti buumi bwesu bwachincha akaambo kamabambe mapya aalikuchitika mumbunga, kuchiswa naakuti kuba amikuli mipya mumpuli, tweelede kuba achoonzyo chakuti Jehova unootulangania akuti uyootugwasya achiindi cheelede. (Heb. 4:16; 1 Pet. 5:6, 7) Muchiindi eecho, weelede kubeleka changuzu muchiimo nchubede. Swena afwiifwi aTaata wesu wakujulu kwiinda mukukomba kulinguwe akuwaala makataazyo aako woonse mumaboko aakwe. Kuchita oobo kukugwasya kuti ukkale kuli aluumuno mumoyo nikuba zyiimo nizyachincha.