1, 2. (a) Ku cinca ka swiyimo loku nga languteriwangiki ku nga n’wi khumba njhani Mukreste? (Vona xifaniso lexi nga eku sunguleni) (b) Ku ya hi Pisalema 131, i yini lexi nga ta hi pfuna leswaku hi tshama hi ri ni ku rhula ka miehleketo?

LOKO Lloyd na Alexandra lava tirheke eBethele ku tlula malembe ya 25, va kuma xiavelo xo ya ensin’wini va ve ni gome eku sunguleni. Lloyd u ri: A ndzi twa onge se ndzi tiveka hi ku va eBethele ku katsa ni ntirho lowu a ndzi wu endla. Hambileswi a ndzi nga swi twisisi swivangelo swa ku cinca koloko kambe eka mavhiki ni tin’hweti leti landzeleke a ndzi tshamela ku titwa ndzi nga pfuni nchumu. A ndzi pfilunganyekile.”

² Loko ku cinca ko karhi ku hi khumba hi ku kongoma, hi nga ha titwa hi pfilunganyekile. (Swiv. 12:25) Swi nga ha hi tikela ku amukela ku cinca ko tano. Eka swiyimo swo tano hi nga ‘khongotela ni ku miyeta’ moya-xiviri wa hina hi ndlela yihi? (Hlaya Pisalema 131:1-3.) A hi kambisiseni leswaku i yini leswi pfuneke malandza ya Yehovha ya le Bibeleni ni ya manguva lawa leswaku ma tshama ma ri ni ku rhula ka miehleketo hambiloko swiyimo swi cinca.

3. Yosefa u tikume a ri eka xiyimo xa njhani?

³ Loko Yosefa a ri ni malembe ya 17, vabuti wa yena lava a va ri ni mavondzo va n’wi xavisile leswaku a ya va hlonga. Yosefa a ri Xirhandzwa eka tata wakwe. (Gen. 37:2-4, 23-28) Yosefa u ve hlonga a tlhela a va mukhotsiwa eEgipta ku ringana malembe ya kwalomu ka 13, a ri ekule ni tata wakwe Yakobe loyi a n’wi rhandza. I yini lexi pfuneke Yosefa leswaku a nga heli matimba hambi ku ri ku va ni xikhomela?

4. (a) I yini lexi Yosefa a nga ha vaka a xi xiyile loko a ri ekhotsweni? (b) Xana Yehovha u swi hlamule njhani swikhongelo swa Yosefa?

⁴ Loko Yosefa a ri karhi a xaniseka ekhotsweni, u fanele a swi xiyile leswaku Yehovha a a n’wi katekisa. (Gen. 39:21; Ps. 105:17-19) Milorho leyi Yosefa a veke na yona loko a ha ri ntsongo, na yona yi fanele yi n’wi tiyisekisile leswaku Yehovha wa n’wi seketela. (Gen. 37:5-11) Swi nga endleka maxangu yakwe a ma phofulele Yehovha ko tala. (Ps. 145:18) Yehovha u hlamule swikhongelo swa Yosefa leswi humaka embilwini, hi ku n’wi tiyisekisa leswaku u “na yena” eka maxangu yakwe hinkwawo.—Mint. 7:9, 10. *

5. Xana “ku rhula ka Xikwembu” ku nga hi pfuna njhani leswaku hi fikelela tipakani ta hina entirhweni wa Yehovha?

⁵ Ku nga khathariseki swiyimo swo tika leswi hi langutanaka na swona, na hina hi nga ha vona vuyelo bya “ku rhula ka Xikwembu” loku rindzaka matimba ya hina ya miehleketo. (Hlaya Vafilipiya 4:6, 7.) Hikwalaho, loko hi lahlela ku vilela ka hina eka Yehovha, ku rhula ka Xikwembu ku nga hi pfuna leswaku hi fikelela tipakani ta hina ni ku tlhela ku hi pfuna leswaku hi nga karhali. Leswaku hi twisisa mhaka leyi a hi kambisiseni swikombiso swin’wana swa manguva lawa.

6, 7. Xana swikhongelo swi nga hi pfuna njhani leswaku hi va ni ku rhula ka miehleketo? Vula xikombiso.

⁶ Loko Ryan na Juliette va byeriwa leswaku xiavelo xa vona xo tirha tanihi maphayona yo hlawuleka yo pfuneta xi fike emakumu, va titwe va hele matimba. Ryan u ri: “Hi nambe hi khongela eka Yehovha. A ku ri nkarhi lowunene wo kombisa leswaku ha n’wi tshemba Yehovha. Leswi vo tala evandlheni a va ha ku va Timbhoni, hi khongele eka Yehovha leswaku a hi pfuna hi va vekela xikombiso lexinene xa ripfumelo.”

⁷ Xana Yehovha u swi hlamule njhani swikhongelo swa vona? Ryan u ri: “Loko hi heta ku khongela, ku vilela loku a hi ri na kona ku nyamalarile. Ku rhula ka Xikwembu ku rindze timbilu ta hina ni matimba ya hina ya miehleketo. Hi xiye leswaku Yehovha u ta hambeta a hi tirhisa loko hi ri ni langutelo lerinene.”

8-10. (a) Xana moya wa Yehovha wu nga hi pfuna njhani leswaku hi langutana ni ku vilela? (b) Yehovha a nga hi pfuna njhani loko hi ri karhi hi endla matshalatshala yo tshama hi ri ni langutelo lerinene?

⁸ Moya wa Xikwembu a wu hi pfuni leswaku hi va ni ku rhula ntsena, kambe wu tlhela wu hi kongomisa eka Matsalwa lama nga ta hi pfuna leswaku hi tiva swilo swa nkoka. (Hlaya Yohane 14:26, 27.) Anakanya hi vatekani van’wana, ku nga Philip na Mary, lava tirheke eBethele kwalomu ka malembe ya 25. Havumbirhi bya vona va feriwe hi vamana wa vona ni xaka ra vona ku nga si hela tin’hweti ta mune naswona va boheke ku ya khathalela tata wa Mary loyi a a ri ni vuvabyi bya miehleketo.

⁹ Philip u ri: “A ndzi ehleketa leswaku ndza swi kota ku langutana ni xiyimo lexi kambe a swi nga ri tano. Ndzi hlaye Vakolosa 1:11 eka xihloko xa Xihondzo xo Rindza lexi a xi dyondziwa  evandlheni. A ndzi tiyisela kambe ku nga ri hilaha ku heleleke. A ndzi fanele ndzi ‘tiyisela hi ku helela ni ku va ni mbilu yo leha ni ntsako.’ Ndzimana yoleyo yi ndzi tsundzuxe leswaku ntsako wa mina a wu titsheganga hi swiyimo kambe wu titshege hi moya wa Xikwembu.”

¹⁰ Yehovha u katekise Philip na Mary hi tindlela to tala hikwalaho ka leswi va tshameke va ri ni langutelo lerinene. Loko va ha ku suka eBethele, havumbirhi bya vona va kume tidyondzo ta Bibele leti endlaka nhluvuko, leti lavaka ku dyondza Bibele ku tlula kan’we hi vhiki. Sweswi Mary u ri: “A va endla leswaku hi tsaka naswona a ku ri ndlela leyi Yehovha a yi tirhisa ku hi byela leswaku swilo hinkwaswo swi ta famba kahle.”

11, 12. (a) Xana Yehovha u ma katekise njhani matshalatshala ya Yosefa loko a ha ri ekhotsweni? (b) Xana Yosefa u katekisiwe njhani hikwalaho ka ku tiyisela kakwe?

¹¹ Loko hi langutana ni ku cinca loku hi nga ku langutelangiki, hi nga ha pfumelela ku vilela ku hi heta matimba. Leswi a swi ta va swi endlekile eka Yosefa. Ematshan’wini ya sweswo, swi tikomba a tirhe hi matimba eka xiyimo lexi a ri eka xona, leswi endleke leswaku Yehovha a n’wi katekisa. Hambileswi a khotsiwile u tirhe hi matimba ku hetisisa xiavelo xin’wana ni xin’wana lexi a nyikiwe xona hi ndhunankulu, hilaha a endleke hakona loko a tirhela Potifaro.—Gen. 39:21-23.

¹² Yosefa u byarhisiwe vutihlamuleri byo langutela vavanuna vambirhi lava a va ri ni swikhundlha swo hlawuleka endlwini ya Faro loko va nga si khotsiwa. Leswi Yosefa a a va khome hi musa, vavanuna lava va n’wi byele swiphiqo swa vona ni milorho leyi va karhateke leyi a va ha ku va na yona hi xa tolo xa kona. (Gen. 40:5-8) Yosefa a nga swi xiyanga leswaku bulo rero a ri ta endla leswaku ku va ni vuyelo lebyi tsakisaka. Hambileswi a ha ta tshama ekhotsweni malembe mambirhi, eku heteleleni u ntshunxiwile naswona hi siku rero u vekiwe ku va mufumi wa vumbirhi eka Faro.—Gen. 41:1, 14-16, 39-41.

13. Loko hi ri eka xiyimo xo tika, i yini lexi hi nga xi endlaka leswaku Yehovha a hi katekisa?

¹³ Ku fana na Yosefa, na hina hi nga tikuma hi ri eka xiyimo xo tika. Hambiswiritano, loko hi lehisa mbilu hi tlhela hi tirha hi matimba eka xiyimo xo tano, Yehovha u ta hi katekisa. (Ps. 37:5) I ntiyiso leswaku hi nga ha titwa hi “pfilunganyekile,” kambe hilaha muapostola Pawulo a vuleke hakona “a hi yi pfumali hi ku helela ndlela yo huma.” (2 Kor. 4:8) Marito ya Pawulo ma ta hetiseka eka swiyimo swa hina, ngopfungopfu loko hi tshama hi khomekile hi ntirho wa hina wa nsimu.

14-16. Xana Filipi lowa muevhangeli u swi kotise ku yini ku tshama a khomekile hi ntirho wo chumayela hambiloko swiyimo swakwe swi cinca?

¹⁴ Filipi, lowa muevhangeli, u hi vekele xikombiso lexinene xo tshama hi khomekile entirhweni wo chumayela hambiloko swiyimo swi cinca. EYerusalema ku pfuke nxaniso endzhaku ka ku dlayiwa ka Stefano. * Hi nkarhi wolowo, Filipi a ha ku nyikiwa lunghelo ro karhi. (Mint. 6:1-6) Loko valandzeri va Kreste va sungule ku hangalasiwa, Filipi a nga khondlanga mavoko. U ye a ya chumayela eSamariya, ku nga muti lowu a ku nga si tshama ku chumayeriwa mahungu lamanene eka wona.—Mat. 10:5; Mint. 8:1, 5.

¹⁵ Filipi a a tiyimisele ku ya kun’wana ni kun’wana laha moya wa Xikwembu a wu n’wi kongomisa kona, kutani Yehovha u n’wi tirhisile leswaku a ya chumayela etindhawini leti nga si tshamaka ti chumayeriwa. Leswi Filipi a nga ri na xihlawuhlawu, Vasamariya a va n’wi rhandza hikuva a va tolovele ku nyefuriwa hi Vayuda. A swi hlamarisi leswi mintshungu a yi n’wi yingisela “hi mianakanyo yin’we.”—Mint. 8:6-8.

¹⁶ Filipi u kongomisiwe hi moya wa Xikwembu leswaku a ya eAxidodo ni le Khezariya, ku nga miti leyi taleriweke hi Vamatiko. (Mint. 8:39, 40) Kwalomu ka malembe ya 20 endzhaku ka loko Filipi a sungule ku chumayela Vasamariya, swiyimo swakwe swi tlhele swi cinca. Leswi se a ri ni ndyangu, u boheke ku tshama endhawini leyi a chumayela eka yona. Hambileswi swiyimo swa Filipi swi cinceke, u tshame a khomekile hi ntirho wakwe wo chumayela, naswona sweswo swi endle leswaku Yehovha a n’wi katekisa swin’we ni ndyangu wakwe.—Mint. 21:8, 9.

17, 18. Xana ku tshama hi khomekile hi ntirho wo chumayela swi nga hi pfuna njhani leswaku hi va ni langutelo lerinene loko swiyimo swi cinca?

¹⁷ Vo tala lava nga eka ntirho wa nkarhi hinkwawo va vula leswaku ku tshama va khomekile hi ntirho wo chumayela swi va pfunile leswaku va tshama va ri ni langutelo lerinene hambiloko swiyimo swa vona swi cinca. Osborne na Polite, vatekani va laha Afrika-dzonga lava a va ri eBethele, a va ehleketa leswaku va ta hatla va kuma ndhawu yo tshama ni ntirho lowu a wu ta va pfumelela ku tirha masiku yo karhi ntsena evhikini. Osborne u ri: “Khombo ra kona swi hi tekele nkarhi leswaku hi kuma ntirho wa ku tihanyisa.” Nsati wakwe Polite u ri: “Hi hete tin’hweti tinharhu hi nga si kuma ntirho naswona a hi nga ha ri na mali. A swi tika.”

 ¹⁸ I yini lexi va pfuneke enkarhini lowu wo tika? Loko Osborne a hlamula u ri: “Ku chumayela swin’we ni vandlha swi hi pfunile leswaku hi tshama hi ri ni langutelo lerinene. Hi hlawule ku khomeka hi ntirho wo chumayela ematshan’weni yo tshama ekaya hi tiputa vusiwana naswona sweswo swi endle leswaku hi va ni ntsako. Hi ye ehansi ni le henhla hi lava ntirho naswona hi kale hi wu kuma.”

19-21. (a) I yini lexi nga ta hi pfuna leswaku hi tshama hi ri ni ku rhula ka miehleketo? (b) Hi vuyeriwa njhani loko hi fambisana ni ku cinca ka swiyimo?

¹⁹ Hilaha hi swi voneke hakona eka swikombiso leswi, loko hi tirha hi matimba eka swiyimo leswi hi nga eka swona ni ku rindzela Yehovha, hi ta tshama hi ri ni ku rhula ka miehleketo. (Hlaya Mikiya 7:7.) Hi nga ha tlhela hi xiya leswaku ripfumelo ra hina ri tiyile hileswi hi fambisanaka ni ku cinca ka swiyimo. Polite loyi hi buleke ha yena, u ri: “Ku kuma xiavelo lexintshwa swi ndzi dyondzise ku titshega hi Yehovha hambiloko swiyimo swi tika. Vuxaka bya mina na Yehovha byi tiyile swinene.”

²⁰ Mary, loyi a tshahiweke eku sunguleni, u ya emahlweni a khathalela tata wakwe loyi a dyuhaleke a ri karhi a phayona. U ri: “Ndzi dyondze leswaku loko ndzi vilela, ndzi fanele ndzi khongela naswona endzhaku ka sweswo ndzi titwa ndzi antswa. Nchumu wa nkoka lowu ndzi wu dyondzeke lowu nga ta ndzi pfuna ni le nkarhini lowu taka hileswaku ndzi fanele ndzi rindzela Yehovha.”

²¹ Lloyd na Alexandra, lava hi buleke ha vona eku sunguleni, va vula leswaku ku cinca ka swiyimo swa vona ku ringe ripfumelo ra vona hi tindlela leti a va nga ti rindzelanga. Va ri: “Sweswi ha swi tiva leswaku ripfumelo ra hina ri tiyile lerova ri nga hi chavelela ni ku hi seketela hi mikarhi yo tika. Vuxaka bya hina na Yehovha byi tiyile.”

22. Loko hi tikarhatela ku tirha hi matimba eka swiyimo leswi hi nga eka swona, i yini leswi hi nga tiyisekaka ha swona?

²² Loko ku cinca ko karhi ku hi khumba hi ku kongoma, kumbexana hi kume xiavelo lexintshwa, mavabyi kumbe vutihlamuleri bya ndyangu, hi nga tiyiseka leswaku Yehovha u ta hi khathalela a tlhela a hi pfuna hi nkarhi lowu faneleke. (Hev. 4:16; 1 Pet. 5:6, 7) Hambiswiritano, sweswi tirha hi matimba eka xiyimo lexi u nga eka xona. Tshinela ekusuhi ni Tata wa wena wa le tilweni hi xikhongelo naswona u dyondza ku titshega hi yena. Loko u endla tano, na wena u ta tshama u ri ni ku rhula ka miehleketo hambiloko swiyimo swa wena swi cinca.