1, 2. a) ¿Ambe úpirini niárani pʼikuarherani erachiri ma enga imeri irekua mátirku mójtakurhiska? (Exe je fotuni enga uénakuarhu jaka). b) Seguni Salmo 131, ¿ambejtsïni jarhuataa méntkisï sési pʼikuarherani?

LLOYD KA ALEXANDRA beintisinku uéxurhinksï páxaptia marhuani Beteli. Ísï jimbo, uénani jámanksï kánikua kómu pʼikuarheraspti engaksï máteru asignasioni intsïnhapka. Lloyd uandasïndi: “Ambe engani uénga Beteli ka jima irekani, ambe máespti engani kánikua tsitienga. Kurhangusïrenga ambe enga jimbo úkuarhipka ajusti, peru engaksï nitamapkia semanecha ka mesicha, uáni xanhari ísï pʼikuarherasïrenga enajkijtsïni nóteru xénchenia. No nani máru pʼikuarherasïrenga. Ma repentkuni sési jarhasïrenga, peru ma ratu jimbojkuni ménderu no sési pʼikuarherani jarhania”.

² Enga juchari irekua ma repentku mójtakurhijka, no sésichi pʼikuarherasïnga ka uandanhiani (Prov. 12:25). Jamberi úkua jukaati pʼindeni ima ambe jingoni enga mójtakurhika. ¿Ambejtsïni jarhuata sési pʼikuarherantani ka no xáni uandanhiani engachi indeni ambe nitamanchaska? (arhinta je Salmo 131:1-3). Ju je exeni ambe engaksï  úpka máru ióntki anapu Tata Diosïri marhuaricha ka ístu iásï anapuecha paraksï seguirini sési pʼikuarherani nájkiruka imecheri irekuarhu mójtakurhipka ambe ma.

3. ¿Ambe úkuarhinchaspi Jose?

³ Komu Jakobu Joseni sánderu xénchenga, imeri ermanu jembechaksï enbidia jimbo íntspikuarhispti komu jántspiri ma enga ima 17 ísï jatiripka (Gén. 37:2-4, 23-28). Jatsispti para trese uéxurhini tekantani komu jántspiri ma ka ónhakata jarhani jini Ejiptu, enga iauani japka jima uératini enga tátemba irekapka. ¿Ambe jarhuataspi Joseni no ikiani ni kuatantani?

4. a) ¿Ambe miántasïreni Jose enga ónhakata japka? b) ¿Jeoba néna mókuntaspi imeri kómarhikuechani?

⁴ Enga Jose xáni no sési nitamakuarhini japka kárselirhu, seguru eska sánderu miáxapka eska Jeoba kuidarixapka (Gén. 39:21; Sal. 105:17-19). Ístu, imani profesiechani enga tsánharhiapka jiáni enga sánderu sapichuepka uinhaperantasptiksï imeri jakajkukuani (Gén. 37:5-11). Seguru eska uáni xanhari eiangukuarhispka Jeobani ambe enga xáni nitamakuarhini japka (Sal. 145:18). Ka Jeoba jarhuataspti para seguru jarhani eska imani jingoni japiringa ambe uéjki enga úkuarhipiringa (Uku. 7:9, 10). *

5. ¿Nénajtsïni uá jarhuatani ‘Tata Diosïri pínandikua’ parachi sánderu marhuakuni Jeobani?

⁵ Ini jurhiatikuecha jimbo, nájkirukachi no sési jásï ambe nitamakuarhini jauaka uákachi pʼikuarherani na enga ‘Tata Diosïri pínandikua’ kuájchakujka juchari eratsikuani (arhinta je Filipusʌ 4:6, 7). Ísï jimbo, ju je kurhakuni Jeobani jarhuajperata engachi no sési pʼikuarherani jauaka. Jiájkani, imeri pínandikuajtsïni jarhuataati parachi jánguarhintani sánderu marhuakuni Jeobani ka ístu parachi no kuatantani. Ju je exeani máru iásï anapu ejempluechani engaksï indeni ambe úka.

6, 7. ¿Nénajtsïni jarhuatasïni sési pʼikuarherantani engachi kómarhijka meru imani ambe jimbo engajtsïni uandanhiatani jauaka? Jatsiku je ejemplu ma.

⁶ Engaksï Ryan ka Juliette mítipka eska kʼamakurhispkia imecheri asignasioni komu prekursori espesialicha ma tiempueri, kánikuaksï no sési pʼikuarheraspti. Erachi uandantasïndi eskaksï jirejiresï kómarhispka. Uandasïndi: “Mítispkachi eska ima jindespka oportunidadi ma parachi xarhatani eskachi mintsikasïrenga Tata Diosïni. Uánikuaksï erachicha jimbanhispti kúnguarhikuarhu, jimbochisï kurhakupka Jeobani eskajtsïni jarhuatapiringa ambakiti ejemplu ma íntsaani paraksï imajtu mintsikani Jeobani”.

⁷ ¿Néna mókukuantaspi Jeoba? Ryan uandantasïndi: “Engachi na kʼamarapka kómarhini, méntkuchi nóteru uandanhiaxapkia ni kómu pʼikuarherani. Tata Diosïri pínandikua kuájchakuxapti juchari eratsikuani ka mintsitani. Kurhanguspkachi eskachi úpiringa seguirini marhuakuni Jeobani engachi ambakiti jángua ma jatsipiringa”.

8-10. a) ¿Nénajtsïni jarhuatasïni Tata Diosïri espiritu parachi orhepani uérani engachi uandanhiani jauaka? b) ¿Nénajtsïni jarhuatasïni Jeoba engachi jánguarhintajka marhuakuni?

⁸ Aparti dejtsïni Tata Diosïri espiritu sési pʼikuastantani, jarhuatasïndijtsïni exeantani bersikuluechani engajtsïni jarhuatajka exeni ambe enga sánderu jukaparhakueka juchari irekuarhu (arhinta je Juanu 14:26, 27). Ju je exeni ambe engaksï nitamakuarhipka Philip ka Mary, temungurhiri ma engaksï sáno beintisinku uéxurhini marhuapka Beteli. Tʼámu kutsï jimbojku, uarhirakuarhiasptiksï amambechani ka ístu uarhispti máteru familiari ma erachiri. Peru ístu, jatsisptiksï para Maryri tátembani uénani kuidarini, enga pʼamenchakua ma kámenga éjpurhu (demencia).

 ⁹ Philip uandantasïndi: “Ísï exesïrenga enajkini iámu ambe sési úni japi, nájkirukani uétarhinchani japka ambe ma. Ma xanhari engani artikulu ma arhintani japka rebisteri Aianhpiri enga estudiuerika, ískuni pakaraspka engani Kolosasi 1:11 arhintapka. Kuenta íntskukuarhispka eskani aguantarixapka peru no kʼamakʼamasï. I bersikulurini jarhuataspti exeni eskani jatsispka parani tekantskua ka tsípikua jingoni aguantarini. Ka i amberini miátantaspti eska tsípini pʼikuarherani no ima ambe jimboesïnga ambe engachi nitamakuarhini jauaka, sino jurajkuni eskarini Tata Diosïri espiritu jarhuataaka juchiti irekuarhu”.

¹⁰ Jimbokaksï Philip ka Mary jánguarhintaspka orheta peerani Tata Diosïri ambe, Jeoba uánikua ambe jingoni újchakuraaspti. Por ejemplu, ísï no ióni jimbo engaksï uéntapkia Beteli, tsimarhanksï exeantaspti kʼuiripuechani engaksï uékenga jorhenguarhini Bibliaeri ambe jukari ma uelta ma semana jimbo ka sóntkuksï progresarispti. Mary miántasïndi ambe enga nitamakuarhika ka uandasïndi: “Ambakiti ambechi nitamakuarhispka ka inde ambe jimbojtsïni Jeoba xarhatachespti eska iámu ambe sési uérapiringa”.

11, 12. a) ¿Ambe úspi Jose para Jeoba újchakurani? b) ¿Néna kóndintaspi Jeoba Joseni enga tekantapka?

¹¹ Enga juchari irekuarhu mójtakurhiska ambe ma, fásilisti eskachi chéaka ka no jánhaskani ambe úni. Inde ambe úpirindi úkuarhinchani Jose. Peru iámindu ambe xarhatasïndi eska ima erakuspka jánguarhintani xáni enga úpiringa paraka Jeoba újchakurapiringa. Ísï jimbo, jánguarhintaspti sési úni iámindu ambe enga ofisiali enkargaripka, ísï eska jiáni enga Potifarini ánchikuarhikuenga (Gén. 39:21-23).

¹² Ma xanhari, ofisiali arhispti Joseni eska atenderiuapiringa tsimani achatichani engaksï kʼérati puestuecharhu ánchikuarhikuenga faraonini. Komu Jose sési kaapka, imaksï uékaspti eianguni ambe enga uandanhiatauani japka ka engaksï no uénga kurhanguni ambe engaksï ma chúri antesi tsánharhipka (Gén. 40:5-8). Jose no mítispti eska ima uandontskuarhita enga jatsipka imani achaticha jingoni, úpiringa eska petanhantapiringa kárselirhu. Útasï tsimani uéxurhini nitamaspti, peru ima mísmu jurhiatikua enga Jose uéntapkia, niáraspti sáno májkueni kʼéri juramuti máeni paisirhu eska faraoni (Gén. 41:1, 14-16, 39-41).

13. No arhiparini ambe uéjkichi nitamanchani jarhani, ¿nénachi uá úni eskajtsïni Jeoba újchakuraaka?

¹³ Ísï eska Jose, jamberichi májkueni ambe nitamanchani jaka engachi uáka ambe ma úni o no ma ambe. Peru engachi tekantaska ka jánguarhintani úni ambe engachi xáni uáka, uákachi eskajtsïni Jeoba újchakuraaka (Sal. 37:5). Jamberichi ménisï no mítisïnga ambe úni, peru eska na uandapka apostuli Pablu, no méni niáraati eskachi no uá orhepani uerani (2 Kor. 4:8). Ka ísïuati engachi sánderu okupadu jarhaska eianhpikuarhu.

14-16. ¿Ambe úspi Felipi enga imeri situasioni mójtakurhipka?

¹⁴ Ju je exeni Felipiri ambe enga eianhpiripka, enga xarhataka ambe enga meru arhikuekajka okupadu jarhani eianhpikuarhu, nájkiruka mójtakurhijka ambe ma. Felipi jimbanhi responsabilidadi ma jatsisptia Jerusaleni anapu kúnguarhikuarhu (Uku. 6:1-6). Jimajkani, niáraspti kánikua no sési jásï ambe úkuarhini engaksï jamberi uándikupka Estebanini. * Enga Felipi exeapka máteru Jesusiri chúxapatichani sïpakuarhinksï jarhani Jerusaleni uératini, no ísku pakaraspti. Samaria niraspti eianhpini, ireta ma enga apenasi eianhpinhapka ambakiti ambe (Mat. 10:5; Uku. 8:1, 5).

¹⁵ Felipi listu jarhaspi para nirani nani enga Tata Diosïri espiritu pápiringa. Ísï jimbo, Jeoba úraspti para uénani aianhpini jimesïsï enga nótki aianhpinhenga ambakiti ambe. Imani tiempunisï, judiuechaksï no xénchaasïrendi samaritanuechani. Peru komu Felipi no ísï káuenga, seguru eskaksï imecha sési pʼikuarherenga imani jingoni. Xarharasïndi eskaksï kʼuiripuecha jimbosï kurhaapka ambe enga Felipini eianguapka (Uku. 8:6-8).

¹⁶ Jiájkani, espiritu santu úspti eska nipiringa Asdodi ka Sesarea, tsimani iretecha engaksï uánikua no judiuecha irekapka (Uku. 8:39, 40). Beinte uéxurhinisï tátsekua enga na uénapka Samaria eianhpini, peeka Felipiri situasioni ménderu mójtakurhipka. Iásï familia ma jatsisptia ka jima irekaxapti nani enga eianhpienga. Nájkiruka uánikua ambe mójtakurhipka imeri irekuarhu, méntkisï okupadu jarhaspti eianhpikuarhu ka indeni ambe jimbo, Jeoba uánikua kóntperatechani intsaaspti imani ka imeri familiani (Uku. 21:8, 9).

17, 18. ¿Nénajtsïni jarhuatasïni okupadu jarhani eianhpikuarhu jiáni enga mójtakurhijka ambe ma?

¹⁷ Uánikuecha engaksï tiempu kompletueri marhuani jaka uandasïndiksï eska okupadu jarhani eianhpikuarhu, jarhuataasïnga no xáni no sési pʼikuarherani enga mójtakurhijka ambe ma. Ju je exeni ambe engaksï úkuarhinchapka Osborne ka Polite, Sudáfrica anapu temungurhiri ma. Engaksï uéntapka Beteli, uandasptiksï eskaksï sóntku exentapiringa ánchikuarhita ma ka lugari ma para irekani. Peru ¿ambe úkuarhispi? Erachi uandasïndi: “Nochi exentasïrengia ánchikuarhita ma eskachi na uandapka”. Ka Polite uandasïndi: “Tanimu mesichi no jatsispka ánchikuarhita ka nochi patsarixapka tumina. Kánikua úkua jukaspti”.

¹⁸ ¿Ambe jarhuataaspi imani tiempuni engaksï xáni úkua jukanchapka? Osborne ísï uandasïndi: “Kúnguarhikua jingoni eianhpini kánikuajtsïni jarhuataspti para okupadu jarhani ka no no sési pʼikuarherani. Uandaspkachi eskachi sánderu okupadu  japiringa eianhpikuarhu, enbesi dechi ísku jarhani ka uandanhiani. I ambejtsïni kánikua sési pʼikuastaspti. Iápurisïchi jirinhaspka ánchikuarhita astakachi exentapka”.

19-21. a) ¿Ambejtsïni jarhuataa seguirini jarhani sési pʼikuarherani? b) ¿Nénajtsïni marhuachia pʼindeni máru jimbanhi situasionicha jingoni?

¹⁹ Eskaksï na xarhatajka i ejempluecha, engachi úska na engachi xáni uáka ka nani engachi jamberi uáka ka mintsikanchi Jeobani, seguirinchi jauaka sési pʼikuarherani (arhinta je Miqueas 7:7). Jamberichi kuenta íntskukuarhiaka eska pʼindeni jimbanhi asignasioni ma jingoni, kánikuajtsïni marhuachisïnga parachi seguirini jarhani marhuakuni Jeobani. Polite, arini ambe uandasïndi ambe enga xáni nitamakuarhikia: “Jiókuarhini jimbanhi asignasioni ma, jorhendastirini ambe enga meru arhikuekajka Jeobaeri jájki jimbo jarhani, asta enga iámindu ambe ísï xarharajka enajkirini no ma ambe sési uérachia. Sánderuni ambakiti pájperakua ma jatsiskia Jeoba jingoni”.

²⁰ Mary, engachi párrafu 8 jimbo uandaka, seguirixati kuidarini tátembani ka prekursoreni. Uandasïndi: “Jorhenguarhiska eska engani uandanhiani jauaka, jatsiska parani erokuarhini, kómarhini ka no uandanhiani. Ambe engani sánderu jorhenguarhika íri ambe, jindesti eskani jatsiska parani iámindu ambe Jeobani jurajkukuni. Ka indeni ambe úni, kánikua uétarhiati sánderu orhepani”.

²¹ Lloyd ka Alexandra engachi uénani jámani uandaaka, uandasïndiksï eska ambe engaksï xáni nitamakuarhika, úska eskaksï xarhatapiringa na enga xáni kʼéka imecheri jakajkukua. Uandasïndiksï: “Tsʼéjkukuechaksï úsïndi eskachi exeaka na enga xáni kʼéka juchari jakajkukua ka sintsïni jarhuataa ka sési pʼikuastantani jiáni engachi úkua jukanchaaka. Iásïchi sánderu ambakiti kʼuiripueskia”.

22. Seguni ambe engachi nitamakuarhini jaka iáiasï, ¿amberichi uá seguru jarhani engachi jánguarhintaska úni ambe ma na engachi xáni uáka?

²² Enga ma repentku mójtakurhiska juchari irekua —jimbokachi jimbanhi asignasioni ma intsïnhasïnga, pʼamenchakua ma jimbo o parachi iásï juchari familiani kuidarini— uákachi seguru jarhani eska Jeoba pendienti pásïnga juchantsïni jimbo ka eskajtsïni jarhuataaka na engachi jatini uétarhinchaaka (Ebr. 4:16; 1 Ped. 5:6, 7). Jimajkani, ju je úni na engachi xáni uáka. Ju je sánderu andarhierani juchari Táti auandarhu anapuni kómarhikua jimbo ka jurajkuni eskajtsïni ima kuidariuaka. Engachi ísï úska, seguirinchi jauaka sési pʼikuarherani nájkiruka juchari irekuarhu mójtakurhiska ambe ma.