1, 2. (a) Issi Kiristtaanee qoppennan A deˈoy laamettiyoogee A waatana danddayii? (Doomettan deˈiya misiliyaa xeella.) (b) Mazamure 131 yootiyoogaadan, nuuni sarotettan deˈanawu maaddana danddayiya eeshshay aybee?

LOYDINNE Aligzandira Beeteeleppe kiyidi haggaazanaadan maddabettidoogaa siyido wode, koyro azzanidosona. Eti Beeteelen 25⁠ppe dariya layttaa haggaazidosona. Loydi hagaadan giis: “Beeteeleenne ta oosoy tana dummayidi erissiyaabadan tawu kase siyettees. Taani he laamee koshshido gaasuwaa akeekaas, shin hegaappe simmin deˈiya saaminttatuuninne aginatun tana shenehoo giidobadan daroto tawu siyettiis.” Laamettidabaa Loydi issitoo loˈˈobadan xeellees; yaani simmidi sohuwaara unˈˈettees.

² Qoppennan nu deˈoy laamettiyoogee nuuni hirgganaadaaninne unˈˈettanaadan oottana danddayees. (Lee. 12:25) He laamettidabay ammananawu nuna metana danddayees. Hegaa mala hanotatun, nuuni waanidi ‘coˈˈu gaananne woppu gaana’ danddayiyoo? (Mazamure 131:1-3 nabbaba.) Geeshsha Maxaafan etabay odettidoogeetuppenne ha wodiyan Yihoowawu haggaaziyaageetuppe amaridaageeti hanotay laamettikkonne sarotettan waanidi deˈidaakko ane beˈoos.

3. Yooseefa deˈoy qoppennan waani laamettidee?

³ Yooseefa ishantti A qanaatidi aylletettawu bayzzido wode, ayyo layttay 17 heera. Hegaappe kase, Yooseefa A aaway A ishanttuppe aaruwan siiqees. (Doo. 37:2-4, 23-28) Yooseefi siiqiya ba aawaa Yaaqoobappe haahosan Gibxxen, 13 laytta gidiyaagaa aylletettaaninne qasho keettan genccana koshshiis. Yooseefi hidootaa qanxxennaadaaninne yiillotennaadan aybi maaddidee?

4. (a) Yooseefi qashuwan deˈiyo wode ubbatoo ay qoppidee? (b) Yooseefa woosaa Yihooway waati zaaridee?

⁴ Yooseefi qashuwan waayettiiddi, Yihooway A anjjidobaa ubbatoo qoppennan aggenna. (Doo. 39:21; Maz. 105:17-19) Yooseefi sinttappe hananabaa naatettan aymuwan beˈidobay Yihooway A nashshiyoogaa ammanettanaadankka oottennan waayi aggana. (Doo. 37:5-11) I ba metuwaa Yihoowawu zaari zaaridi yootennan aggenna. (Maz. 145:18) Yooseefi ba waaye ubban Yihooway ‘banaara issippe’ deˈiyoogaa ba wozanan ammananaadan oottiyoogan, I wozanappe woossido woosaa Yihooway zaariis.—Oos. 7:9, 10. *

5. “Xoossaa sarotettai” nuuni Yihoowawu haggaazanawu keehi murttanaadan waati maaddana danddayii?

⁵ Metiyaabay deˈishinkka, ha wodiyan nu qofaa naagiya “Xoossaa sarotettai” nuna woppissiyoogaa beˈana danddayoos. (Piliphphisiyuusa 4:6, 7 nabbaba.) Yaatiyo gishshawu, nuuni hirggaa maashiyo wode Yihoowa woossikko, Xoossaa sarotettay nuuni ayyaanaabaa halchchuwaa polanawu yaa murttanaadan oottananne hidootaa qanxxennaadan naagana danddayees. Hegaa qonccissiya ha wodiyan deˈiya amarida asatu hanotaa ane beˈoos.

6, 7. Nuuni koshshiyaabaa qonccissidi woossiyoogee sarotettaa zaarettidi demmanaadan waati maaddana danddayii? Leemisuwaa yoota.

⁶ Riyaninne Juleeta guutta wodiyawu dumma aqinye gididi haggaaziyoogaa agganaadan odettido wode, azzanidosona. Riyani hagaadan giis: “Nuuni hegaa Yihoowayyo woosan yootida. Nuuni an ammanettiyoogaa ha sohuwan bessana danddayiyoogaa eroos. Nu gubaaˈiyan deˈiya daroti ooratta gidiyo gishshawu, nuuni ammanuwan loˈˈo leemiso gidanaadan Yihooway nuna maaddana mala woossida.”

⁷ Yihooway eta woosaa waati zaaridee? Riyani hagaadan giis: “Woossi simmin, nuuni qoppiyo iita qofaynne hirggay sohuwaara xayiis. Xoossaa sarotettay nu wozanaanne qofaa naagiis. Nu xeelay ubbatoo suure gidikko, Yihooway nunan goˈettiyoogeeta gididi deˈana danddayiyoogaa akeekida.”

8-10. (a) Nuuni hirggissiyaaban genccanaadan Xoossaa ayyaanay nuna waati maaddana danddayii? (b) Nuuni aggennan Yihoowayyo haggaaziyo wode I nuna waati maaddanee?

⁸ Xoossaa ayyaanay nuuni woppu gaanaadan oottiyoogaa bolli, ayyaanaabaa sinttayanaadan maaddiya xiqiseta hassayanaadan oottees. (Yohaannisa 14:26, 27 nabbaba.) Beeteelen 25 gidiya layttaa haggaazida Pilipanne Mero giyo azinaanne machchee hanotaa qoppa. Oyddu agina giddon, eta naaˈˈaa aayotinne hara dabboy hayqqidosona; qassi Meri aaway dimenshiya giyo guuggiyaa sahuwaa sahettiyaagaa harggissiyoogaa doommidosona.

 ⁹ Pilipi hagaadan giis: “Taani guutta genccidabadan qoppaas, shin attidabay deˈees. Wochiyo Keelan kiyida xannaˈiyo issi huuphe yohuwan Qolasiyaasa 1:11 beˈaas. Taani he wode gencciyoogee tuma; shin ubbaban genccabeykke. Taani ‘ubbaban ufayssan genccananne danddayana’ koshshiis. Taani deˈuwan ufayttanaadan oottiyay ta hanotaa gidennan, Xoossaa ayyaanaa maaduwaa gidiyoogaa hassayanaadan tana he xiqisee maaddiis.”

¹⁰ Pilipinne Mera Yihoowayyo haggaaziyoogaa aggennan takkido gishshawu, I eta daro ogiyan anjjiis. Eti Beeteeleppe kiyidi daro takkennan, Geeshsha Maxaafaaban dicciya saaminttan issi gallassaappe daruwaa xannaˈanawu koyiya xinaateta demmidosona. Kasebaa hassayada Mera, “Eti nuussi ufayssa, qassi ubbabay loˈˈanaagaa Yihooway nuussi odiyo ogeti eta” yaagaasu.

11, 12. (a) Yooseefi Yihoowa anjjuwaa demissiyaabaa waati oottidee? (b) Yooseefi genccido gishshawu waani anjjettidee?

¹¹ Nu hanotay qoppennan laamettiyo wode, keehi hirggidi nu meto xallaa qoppana danddayoos. Yooseefi hegaadan qoppana danddayees. SHin, I ba hanotaa danddayettida keenan loyttanawu kuuyidoogee qoncce; yaatiyoogan Yihoowa anjjuwaa demissiyaabaa oottiis. Yooseefi qashuwan deˈikkonne, halaqay ayyo immido ay oosonne, PHoxiifaarawu oottidoogaadan minnidi oottiis.—Doo. 39:21-23.

¹² Kase Paaroona son suntta gididi oottiya naaˈˈu asata xeellanaadan issi gallassi Yooseefawu aawatettay imettiis. Yooseefa kehatettan ammanettidi, he naaˈˈu asati bantta metuwaanne kase qammi aymottido banttana hirggissida aymuwaa assi yootidosona. (Doo. 40:5-8) Yooseefi akeekana xayikkonne, he haasayay ayyo ufayssiyaabay hananaadan oottana. I hara naaˈˈu layttaa qasho keettan genccikkonne, wurssettan birshshettiis; qassi Paaroonappe kaallidi haariyaagaa gididi he galla sunttettiis.—Doo. 41:1, 14-16, 39-41.

13. Nu hanotay ayba gidikkonne, nuuni Yihoowa anjjuwaa demissiyaabaa waati oottana danddayiyoo?

¹³ Yooseefaagaadan, nuuni aybanne oottana danddayenna hanotay nuna gakkana danddayees. SHin nuuni danddayanchcha gidikko, qassi nu hanotaa loyttanawu danddayettida keenan minnidi oottikko, Yihoowa anjjuwaa demissiyaabaa oottana. (Maz. 37:5) Issi issitoo nuuni ‘sirana’ danddayiyoogee tuma; shin nuuni kiitettida PHawuloosi yootidoogaadan mule ‘aggi bayana gookko.’ (2 Qor. 4:8) Nuuni aggennan haggaazikko, Yihooway nunaara gidana.

14-16. Wonggeliyaa mishiraachchuwaa yootiya Piliphphoosa hanotay laamettikkonne I waanidi aggennan haggaazidee?

¹⁴ Hanotay laamettikkonne aggennan haggaaziyoogan, wonggeliyaa mishiraachchuwaa yootiya Piliphphoosi loˈˈo leemiso gidees. Yerusalaamen wolqqaama yedetay denddin Isxxifaanoosi hayqqiis. * He wode, Piliphphoosi ooratta haggaazo maataa demmiis. (Oos. 6:1-6) SHin Kiristtoosa kaalliyaageeti laalettido wode, Piliphphoosi aynne oottennan coo uttidi naaganawu koyibeenna. He wode, dariya baggan mishiraachchoy odettibeenna Samaariyaa kataman sabbakanawu I biis.—Maa. 10:5; Oos. 8:1, 5.

¹⁵ Piliphphoosi Xoossaa ayyaanay A kaalettiyo soho awanne baanawu eeno giido gishshawu, asay mishiraachchuwaa siyibeenna heeran sabbakanaadan Yihooway A goˈettiis. Daro Ayhudati Samaariyaa asaa karidosonanne maara oyqqibookkonna. SHin Piliphphoosi eta lagibeenna; qassi etassi mishiraachchuwaa mishettidi yootiis. I ‘yootidobaa daro asay keehi akeekidi siyidoogee’ garamissiyaaba gidenna.—Oos. 8:6-8.

¹⁶ Guyyeppe, Xoossaa ayyaanay Piliphphoosa Ayhuda gidenna daro asay deˈiyo naaˈˈu katamata, hegeetikka Azooxoosanne Qiisaariyaa kaalettiis. (Oos. 8:39, 40) I Samaariyan koyro sabbakoosappe 20 layttay aadhdhi simmin, Piliphphoosa hanotay haranttuwaa laamettiis. I aawa gidiyoogaadan, issi heeran uttidi sabbakiis. Ayyo hanotay laamettikkonne, Piliphphoosi aggennan haggaazido gishshawu, anne A soo asaa Yihooway keehi anjjiis.—Oos. 21:8, 9.

17, 18. Nu hanotay laamettiyo wode, aggennan sabbakiyoogee waati maaddana danddayii?

¹⁷ Ubba wode haggaaziya daroti eta hanotay laamettiyo wodekka, aggennan haggaaziyoogee eti ufayttiyaageetanne loˈˈo xeelay deˈiyoogeeta gidanaadan maaddiyoogaa yootoosona. Azborninne Palito giyo azinaynne machchiyaa Tohossa Afirkka Beeteeleppe kiyido wode, eti sohuwaara amarida saatiyawu oottiyo oosonne deˈiyo keettaa demmana giidi qoppidosona. Azborni, “Nuuni qoppidoogaadan oosuwaa sohuwaara demmibeennaagee azzanttiyaaba” yaagiis. Qassi A machchiyaa Palita, “Nuuni heezzu agina gakkanaassi ooso demmibookko; qassi minjjido miishshi baawa. Hegee keehippe metiyaaba” yaagaasu.

¹⁸ Metiya hanotaa genccanaadan eta aybi maaddidee? Azborni hagaadan giis: “Gubaaˈiyaara  issippe sabbakiyoogee loˈˈobaa qoppanaadan nuna maaddiis. Utti bayidi hirggiyoogaappe nuuni ubbatoo sabbakanawu murttidoogee nuna keehi ufayssiis. Nuuni darosan oosuwaa koyidi, wurssettan demmida.”

19-21. (a) Sarotettan deˈanawu nuna aybi maaddanee? (b) Nuuni ooratta hanotaara meezetiyoogee nuna aybin maaddana danddayii?

¹⁹ Nuuni qommoora beˈidoogaadan, danddayettida keenan nu hanotaa loyttikko, qassi ammanettidi Yihoowa naagikko nuuni sarotettan deˈana. (Mikiyaasa 7:7 nabbaba.) Ooratta hanotaara meezetiyoogee ayyaanaaban keehi maaddiyoogaakka nuuni akeekana danddayoos. Palita deˈoy keehi deexxiyaaba milatikkonne Beeteeleppe kiyidi haggaazanaadan maddabettiyoogee A Yihoowan ammanettanaadan tamaarissidoogaa yootaasu. A, “Yihoowaara ta dabbotay minniis” yaagaasu.

²⁰ Qommoora ibaa denttido, Mera aqinye gidada haggaazaydda cimidi ba aawaa heemmawusu. A hagaadan gaasu: “Taani unˈˈettiyo wode, hegaa aggana, woossananne allaxxana koshshiyoogaa akeekaas. Issibaa Yihooway giigissanaadan aggiyoogee taani hanno gakkanawu tamaaridobaappe aadhdhiyaaba gidennan aggenna; qassi hegee sinttappe keehi koshshiyaaba.”

²¹ Doomettan etabaa denttido Loydinne Aligzandira, bantta hanotay laamettidoogee eti qoppibeenna ogiyan eta ammanoy paacettanaadan oottidoogaa yootidosona. SHin eti hagaadan giidosona: “Ammanoy paacettiyoogee nu ammanoy tumakko qonccissees; qassi meto wodiyan nuna maaddeesinne minttees. Nuuni kaseegaappe loˈˈo asa gidida.”

22. Nuuni nu hanotaadan nuussi danddayettida ubbabaa oottikko, ay ammanettana danddayiyoo?

²² Ha alamiyan nu deˈoy qoppennan laamettana danddayees. Nuuyyo Yihoowa haggaazuwan ooratta oosoy immettana danddayees, nuuni sahettana danddayoos, woy nu soo asawu koshshiyaabaa kunttana bessees. SHin aybi gakkikkonne, Yihooway neessi koshshiyaabaa kunttanaagaanne bessiya wodiyan nena maaddanaagaa ammanetta. (Ibr. 4:16; 1 PHe. 5:6, 7) He wode gakkanaassi, ne hanotaa loyttanawu danddayettida ubbabaa oottanawu baaxeta. Ne Aawaa Yihoowa woossa; qassi kumetta wozanappe an zemppiyoogaa tamaara. Yaatiyoogan, hanotay laamettikkonne, neenikka sarotettan deˈana.