1, 2. ა) მუჭო შილებე ქრისტიანწკუმა იმოქმედას ველუნ ფერ ცვლილებეფქ? (ქოძირით სურათ თე გვერდის). ბ) მუჭოთ 131-ა ფსალმუნი იჩიებუნ, მუ მიმეხვარებნა ვა ვოდინუათ შინაგან სიმშვიდე?

მუჟამსით ლოიდიქ დო ალექსანდრაქ ქიგეგეს, ნამდა დანიშნულებაქ დათირეს, გურქ დოჭყორდეს. თინეფ 25 წანაშ უმოსის მსახურენდეს ბეთელს. ლოიდი იჩიებ: „ბეთელს მსახურება ჩქიმ ცხოვრებაშ ნაწილო მიმორჩქუდ. მესმებუდ, მუ რდუ თე ცვლილებეფიშ მიზეზ, მარა მარეფიშ დო თუთეფიშ დინახალე, დუც იშენით მეტებულო ბგინაფლენდჷ. ართ წუთის ჯგირო ვორდჷ, მაჟია წუთის — გლახათ“.

² მუჟამსით ჩქინ ცხოვრება ვეველუთინ თეშ ითირუნ, შილებე დოფშკურდათ დო სტრესის ქინვოლათ, მუშენდა ბრელ მუთუნ მაჸინა ოთირალ (იგავ. 12:25). შილებე გამჭირდან თე ცვლილებეფშა მერჩქვანაქ. მუჭო შემლებნა თე დროს სიმშვიდე ვა ვოდინუათ? (წეკითხით ფსალმუნი 131:1—3). * მორთ, გუვარჩუათ მუსხირენ ბიბლიურ პერსონაჟიშ დო იეჰოვაშ თანამედროვე მსახურიშ მაგალით,  სოვრეშეთ ქობძირუნთ, მუჭო შემლებნა სირთულეეფიშ დროს ვა ვოდინუათ შინაგან სიმშვიდე.

3. მუს სირთულეეფს შეხვად იოსებიქ?

³ იოსები სოდგარენ 17 წანერ რდუ, მუჟამსით მუშ ჯიმალეფქ მონათ გეგმოჩეს, მუშენდა ონჯარდეს თიშ. თეშ მიზეზ თინა რდუ, ნამდა იოსებ მუშ მუმას შხვა სქუალეფშე გიშართილ აფუდ (დაბ. 37:2—4, 23—28). სოდგარენ 13 წანას იოსები მუშ მუმაშე შორს, ეგვიპტეს მონა რდუ დო ციხეს ხოლო ხედჷ. მუქ მეხვარ თის, ვადინუკო იმენდ დო ვეგეჟღამკო?

4. ა) მუშა აფუდ იოსების ყურადღება გინოღალირ, მუჟამსით ციხეს ხედ? ბ) მუჭო უპასუხ იეჰოვაქ იოსებიშ ლოცვეფს?

⁴ მუჟამსით იოსები ციხეს იტანჯებუდ, მთელ ყურადღება თიშა აფუდ გინოღალირ, მუჭო ოხვარუდ იეჰოვა (დაბ. 39:21; ფსალმ. 105:17—19). შილებე თინა ახალგაზრდობას ნაძირეფ წინასწარმეტყველურ მნიშვნელობა უღუდუნ ფერ სიზმარეფშო ხოლო ფიქრენდკო, ნამუთ არწმუნენდჷ, ნამდა იეჰოვა ირიათო ელურდჷ (დაბ. 37:5—11). იოსები ალბათ ხშირას ლოცულენდჷ დო იეჰოვას მუშ გაჭირებაშენ ეჩიებუდ (ფსალმ. 145:18). იეჰოვაქ ქუპასუხ თიშ ლოცვეფს დო დარწმუნ, ნამდა დღას ვემიოტალენდჷ განსაცდელეფიშ დროს (საქ. 7:9, 10). *

5. მუჭო მიმეხვარებნა „ღორონთიშ მშვიდობა“, დუდ ვადვანებათ დო ქიმვოჭირინუათ სულიერ მიზნეფს?

⁵ მუდგა რთულ მდგომარეობას ვა ვორდათინ, ჩქი ხოლო შემლებნა იბგინათ „ღორონთიშ მშვიდობა“, ნამუთ თხილანს ჩქინ გონებას (წეკითხით ფილიპელები 4:6, 7). * თეგვარო, პრობლემეფიშ დროს იეჰოვას ქოფთხუათ მოხვარა დო თინა ქომჩანა მშვიდობას, ნამუთ ქიმმეხვარებნა დუდ ვადვანებათ დო ქიმვოჭირინუათ სულიერ მიზნეფს. მორთ, გუვარჩუათ თეშ მუსხირენ თანამედროვე მაგალითი.

6, 7. მუჭო მიმეხვარებნა კონკრეტულ ლოცვეფ, დიფრთინუათ შინაგან სიმშვიდე? ქიმიჸონით მაგალით.

⁶ მუჟამსით რაიანქ დო ჯულიეტაქ ქიგეგეს, ნამდა სპეცალურ პიონერო მსახურება აფდეს მიოტებელინ, გურქ ქალაჭვეს. რაიან იჩიებ: „ჩქი ხეთეშე ქიბლოცით დო იეჰოვას გურ გეგნუფაჩით. მიჩქდეს, ნამდა თენა რდუ განსაკუთრებულ შესაძლებლობა, გეგმომრჩქინუდესკო იეჰოვაშ ნდობა. ჩქინ კრებას ბრელ ახალ ნანათა რდუ. ათეშენ იეჰოვას მოხვარას ფთხინდით, თინეფშა რწმენაშ ჯგირ მაგალით ქიმემჩამდესკო“.

⁷ მუჭო უპასუხ იეჰოვაქ თინეფიშ ლოცვას? რაიან გეუძინანს: „ლოცვა გუვათეთინ, ხეთეშე მემდინეს უარყოფით გრძნობეფქ დო ფიქრეფქ, ნამუთ მაწუხენდეს. ღორონთიშ მშვიდობაქ დოთხილუ ჩქინ გურ დო გონება. ქიმეფხვადით, ნამდა სწორ თვალსაზრის ქუმაღვენუდეს-და, იეჰოვა კინ გეგმომრინუანდეს მუშ საქმეშო“.

8—10. ა) მუჭო შეულებ ღორონთიშ წმინდა შურს ქიმმეხვარან, გავურზათ პრობლემეფს? ბ) მუჭო აკურთხენს იეჰოვა ჩქინ მონდომას, ნამდა ვა ვოდინუათ სულიერ თვალსაზრის?

⁸ სიმშვიდეწკუმა ართო, ღორონთიშ წმინდა შურს შეულებ ჩქინ ყურადღება გეგნიღას თიცალ ბიბლიურ მუხლეფშა, ნამუთ მიმეხვარებნა, სულიერ პირველ ადგილს ქიგვორინუათ (წეკითხით იოანე 14:26, 27). * გუვარჩუათ ართ წყვილიშ, ფილიპი დო მერიშ მაგალით; თინეფ სოდგარენ 25 წანას მსახურენდეს ბეთელს. ოთხ  თუთაშ დინახალე, ჟირხოლოს დიდალეფქ დო ხოლო ართ ნათესექ დუღურეს. თინეფს მერიშ მუმაშა ხოლო აფდეს მიკალუაფარ, ნამუსით დემენცია უღუდ.

⁹ ფილიპი გეუძინანს: «ფიფქრენდჷ, პრობლემას ვორუდ, მარა სინამდვილეს თაშ ვარდჷ. „გინაჯინალ კოშკიშ“ ართ-ართ სტატიას კოლოსელეფიშ 1:11-ა მუხლი რდუ გარჩიებულ, სოვრეშეთ ქიმეფხვად, ნამდა ბოლოშა ვეგმიფრჩქინანდჷ მოთვინებას. საჭირო რდუ ბოლოშა ქუგვურზიკო პრობლემას მოთვინებათ დო ხიოლით. თე მუხლიქ ქუმოძირუ, ნამდა ხიოლ ჩქიმ მდგომარეობაშა ვარინ, თიშა რე დამოკიდებულ, მუჭო მოქმედენს ღორონთიშ წმინდა შურ ჩქინ ცხოვრებას».

¹⁰ იეჰოვაქ აკურთხ ფილიპი დო მერი, მუშენდა ვადინუეს სულიერ ხედვა. ბეთელშე მიდართესინ, ხეთეშე ბიბლიაშ გურაფა ქიდიჭყეს თიცალ პიროვნებეფწკუმა, მით სულიერო წიმი მიშეს დო მარაშე ართიშ მეტშა ოკოდეს ბიბლიაშ გურაფა. მუჟამსით ულირს იშინანს, მერი იჩიებ: „ბიბლიაშ გურაფეფს ჩქინდა ხიოლ მოუღუდ დო თეგვარო იეჰოვა მარწმუნენდეს, ნამდა ირფელ ჯგირო იჸუაფუდ“.

11, 12. ა) მუჭო მეჩ იოსებიქ ღორონც თიშ საშვალება, ნამდა აკურთხუკო? ბ) მუჭო აკურთხ იეჰოვაქ იოსებ მოთვინებაშენ?

¹¹ მუჟამსით ჩქინ მდგომარეობა ვეველუთინ თეშ ითირუნ, შილებე მთელ ყურადღება ხვალე პრობლემეფშა გეგნიბღათ დო შხვა მუთუნშე ვეფიფქრათ. თაშ შილებე იოსებიქ ხოლო მიქცუკო, მარა თიქ გინოჭყვიდ, მუშ სიტუაციას უხუჯანდუნ თეშ მიქცუკო დო დანარჩენ იეჰოვას მიანდჷ. მუჭოთ ფოტიფარიშ ჸუდეს თეშ, ციხეს ხოლო იოსები ირნერ დავალებას ასრულენდჷ, მუდგას ციხეშ ზედამხედველ არზენდჷ (დაბ. 39:21—23).

¹² ართშა, ციხეშ ზედამხედველქ იოსების ქუდავალ, ქიზრუნკო ჟირ პატიმარშე, მიდგას თეიშახ ფარაონიშ სასახლეს დიდ თანამდებობა უკინებუდ. იოსებ ჯგირო ოქცუდ თინეფს, ათეშენ თე კოჩეფქ გურ გეგნუფაჩეს დო წოხოლენ სერს ნაძირეფ სიზმარ ხოლო ქეჩუეს (დაბ. 40:5—8). თიმ დროს იოსების ვა უჩქუდ, ნამდა თინეფწკუმა რაგადის თიშ ციხეშე განთავისუფლება მაჸუნუდ. თეშ უკულ თინა ხოლო ჟირ წანას ხედ ციხეს, მარა საბოლათ განთავისუფლეს დო ზუსტას თიმ დღას ფარაონიშ უკულ მაჟია კოჩო ქუდარინეს (დაბ. 41:1, 14—16, 39—41).

13. მუჭო შემლებნა საშვალება ქიმეფჩათ იეჰოვას, მაკურთხან?

¹³ იოსებცალო, ჩქი ხოლო შილებე ქიპჸუათ თიცალ სიტუაციას, მუჟამსით ბრელ მუთუნ ვა მათირენა. მარა, მუჟამსით მოთვინებას გეგმიფრჩქინანთ დო მუთ შემლებნა, ირფელს გუვაკეთენთინ, იეჰოვას საშვალებას ქიმეფჩანთ, მაკურთხან (ფსალმ. 37:5). მართალ რე, მინშა შილებე დიდ ოწუხებელ მიღდან, მარა მუჭოთ მოციქულ პავლექ თქუ, „მუთუნ ვემიხვარებენ ფერ მდგომარეობას ვა ვორეთ“ (2 კორ. 4:8). თე სიტყვეფ ჩქინწკუმა ხოლო შისრულებ, განსაკუთრებულო თიწკუმა, მუჟამსით მთელ ყურადღებას მსახურებაშა გეგნიბღანთ.

14—16. სიტუაციაშ თირუაშ უმკუჯინუო, მუჭო შეიალებუ მახარობელ ფილიპეს მთელ ყურადღება მსახურებაშა გეგნიღკო?

¹⁴ მახარობელ ფილიპე თიშ ჯგირ მაგალითის მარზენა, მუჭო შილებე სირთულეეფიშ უმკუჯინუო, მთელ ყურადღება მსახურებაშა გეგნიბღათ. ფილიპეს ახალ დავალება აფუდ მეღებულ, მარა ჭიჭე ხანშა სიტუაციაქ დითირ (საქ. 6:1—6). იერუსალიმს ქრისტიანეფიშ თხოზინქ ქიდიჭყჷ, მუ დროსით სტეფანე ქუალეფით დოჸვილეს. * ქრისტიანეფქ ინტეს იერუსალიმშე დო შხვადოშხვა მხარეს ეკიფაჩეს. ფილიპეს მსახურებაშ გაგრძელება ოკოდ, ათეშენ ქალაქ სამარიაშა მიდართ, სოდეთ ბრელს ვაფუდ მორჩქილაფირ სახიოლო ამბე (მათ. 10:5; საქ. 8:1, 5).

¹⁵ თინა მზათ რდუ მიდართკო ირდიხაშა, სოდეთ ღორონთიშ შურ უხემძღვანელენდჷ, ათეშენ იეჰოვაქ თიცალ ადგილეფშა მიდაშკვჷ, სოდეთ სახიოლო ამბე ვა რდუ ნაქადაქებ. ბრელ იუდეველ მუთუნო ვემირჩქინანდჷ სამარიელეფს, მარა ფილიპე არძას უგშუგორუო უქადაქუდ დო შედეგო თინეფ „მთელ ყურადღებათ“ ურჩქილედეს (საქ. 8:6—8).

¹⁶ თეშ უკულ, ღორონთიშ წმინდა შურქ ფილიპე ჟირ დიდ ქალაქშა, აშდოდი დო კესარეაშა მიდეჸონ, სოდეთ ხალხიშ უმენტაშ შხვაშთურეფ რდეს (საქ. 8:39, 40). სამარიას მსახურებაშე სოდგარენ 20 წანაშ უკულ, თიშ სიტუაციაქ კინ დითირ. თის უკვე ოჯახ ჸუნდჷ, მარა მთელ ყურადღება იშენით მსახურებაშა აფუდ გინოღალირ. შედეგო, იეჰოვაქ აკურთხჷ ფილიპე დო მუშ ოჯახი (საქ. 21:8, 9).

17, 18. მუჭო მიმეხვარებნა მსახურებაშა ყურადღებაშ გინოღალა, სიტუაციაშ თირუაშ დროს ვა ვოდინუათ სულიერ წონასწორობა?

¹⁷ ბრელ სრულ დროთ მსახურს შეულებ თამამას თქუას, ნამდა მსახურებაშა ყურადღებაშ გინოღალაქ მეხვარ, სიტუაციაშ თირუაშ უმკუჯინუო, ვა უდინუაფდესკო სულიერ წონასწორობა. მუჟამსით ართ სამხრეთ აფრიკელ წყვილს, ოსბორნი დო პოლიტის ბეთელქ აჸუეს დატებელქინ, თინეფ ფიქრენდეს, სამუშას დო ოცხოვრებელ ადგილს მალას ქიშინდეს. ოსბორნი იჩიებ: „სანარღოთ, სამუშაქ ხეთეშე ვა მაშის“. თიშ ოსურ, პოლიტი იშინანს: „სამუშაქ სუმ თუთას ვამაგორეს დო დანაზოგ ხოლო ვამღუდეს. თენა დასურო დიდ პრობლემა რდუ“.

¹⁸ მუქ მეხვარ თინეფს თეცალ სიტუაციას? ოსბორნი იჩიებ: „კრებაშ წევრეფწკუმა მსახურებაქ მანგარო მიმეხვარეს, ვამდინუაფდესკო დადებით განწყობა. თიშ მანგიორო, ნამდა  ჸუდეს დომხუნდესკო დო იბწუხითკო, გეგნობჭყვიდით მთელ ყურადღება ქადაქებაშა გეგნიბღითკო, მუდგას დიდ ხიოლ მოუღუდ. ეშობას ვაგრძელენდით სამუშაშ გორუას დო საბოლათ დობგორით.

19—21. ა) მუ მიმეხვარებნა ვა ვოდინუათ შინაგან სიმშვიდე? ბ) მუ ჯგირობუა შილებე მომღან მდგომარეობაშ თირუაქ?

¹⁹ თე მაგალითეფშე ქობძირით, ნამდა მუდგაქ ვამოხვადასინ, ბოლოშა ოკო მივენდათ იეჰოვას. თენა მიმეხვარებნა, ვა ვოდინუათ შინაგან სიმშვიდე (წეკითხით მიქა 7:7). * დრო ხანიშ უკულ, შილებე ქობძირათ, ნამდა მდგომარეობაშ თირუაქ უმოსო დუმაახლოვეს იეჰოვაწკუმა. ჟიშე მოშინაფილ პოლიტი იჩიებ: „შხვა დანიშნულებაშ მეღებაქ ქუდმოგურუ, მუს ნიშნენს იეჰოვაშ მენდება თიმწკუმა ხოლო, მუჟამსით ირფელ რთულო იძირე. იეჰოვას უმოსო დევეახლოვ“.

²⁰ ჟიშე მოშინაფილ მერი ამდღა ხოლო ულუანს მოხუცებულ მუმას დო თეწკუმა ართო პიონერო მსახურენს. თინა იჩიებ: „ქიმეფხვად, ნამდა მუჟამსით ოწუხებელ მიღუნ, ოკო გაფჩენდე, იბლოცე დო მიფსვანჯე. არძაშ უდიდაშ გაკვეთილ, მუთ დიბგურენ, თინა რე, ნამდა იეჰოვას მივანდე ჩქიმ ოწუხებელ დო გინოჭყვიდილ მაფჷ ირიათო თაშ მიფქცუე“.

²¹ სტატიაშ დაჭყაფუს მოშინაფილ ლოიდი დო ალექსანდრაქ თქუეს, ნამდა სიტუაციაშ თირუაქ შხვადოშხვანერო გეგმოცად თინეფიშ რწმენა. თინეფ იჩიებნა: „განსაცდელეფიშ დროს გიმორჩქინდუ, მუსხით მანგარ რე ჩქინ რწმენა, მუთ აუცილებერ რე სირთულეეფიშ დროს. სინამდვილეს, ჩქი უმოსო გემემანგარეს რწმენაქ დო უჯგუშ პიროვნებეფ ვორეთ“.

22. მუშა შემლებნა ვორდათ დარწმუნებულ, მუჟამსით ირნერო ქივეცადებუთ ირფელიშ კეთებას?

²² ამდღარ ქიანას ვა რე გამორიცხულ, ჩქინ მდგომარეობაქ უცფას დითირას. შილებე ახალ დანიშნულება მიბღათ იეჰოვაშ მსახურებას, ჯამრთელობაშ პრობლემეფქ ქუმაშუან ვარდა ოჯახიშ წევრეფშა მაჸუან მიკაჯინალქ. მარა ჩქინ მდგომარეობაქ მუჭოდგა ვეთირასინ, შემლებნა დარწმუნებულ ვორდათ, იეჰოვა ვემმოტალენა დო ქიმმეხვარებნა მუშ დროს (ებრ. 4:16; 1 პეტ. 5:6, 7). ეშობას, ირნერო ქივეცადათ, მუთ შემლებნან, ირფელ გუვაკეთათ. დევეახლოვათ ზეციერ მუმას ლოცვათ დო მივანდათ თის ჩქინ ოწუხებელ. თეგვარო, შემალებენა ვა ვოდინუათ შინაგან სიმშვიდე, მუჟამსით ჩქინ მდგომარეობა ვეველუთინ თეშ ითირუ.