情況改變但仍然保持内心平靜
“我已經使自己嘅心平和安靜”——詩篇131:2
1,2． （甲）一個基督徒遇到一啲意外改變嗰時有乜嘢感受？（請睇吓課文開頭嘅圖片）（乙）詩篇131篇提到乜嘢特質可以幫助我哋保持内心平靜？
勞埃德同亞歷山德拉已經喺伯特利服務咗超過25年，佢哋啱啱知道自己會被委派去地區嘅時候，覺得好傷心。勞埃德話：“我覺得伯特利嘅工作就係我一生嘅委派。雖然我明白點解要調整，亦都覺得調整係好嘅，不過喺之後好多個星期，甚至好多個月嘅時間入面，我一直都有一種被遺棄嘅感覺。我嘅情緒好似坐過山車噉，有好大嘅起伏。前一分鐘，我覺得可以積極面對；但後一分鐘，我又覺得好失落。”
2 我哋面對人生當中一啲意外嘅轉變嗰陣，可能會憂慮不安，喺感情上受到好大嘅壓力。（箴言12:25）我哋甚至覺得好難接受呢啲改變。喺噉嘅情況下，我哋點樣可以“使自己嘅心平和安靜”呢？（請讀詩篇131:1-3）等我哋嚟討論吓，一啲聖經人物同耶和華嘅現代忠僕面對不斷變化嘅情況嗰陣點樣保持内心平靜。
體驗上帝所賜嘅平安
3． 約瑟嘅生活突然發生乜嘢轉變？
3 約瑟嘅哥哥見父親雅各特别痛錫約瑟，就心生妒忌。後來，喺約瑟大約17歲嘅時候，佢哋就將約瑟當奴隸賣咗。（創世記37:2-4,23-28）結果，約瑟不得不遠離自己心愛嘅父親，有成13年嘅時間喺埃及被迫成為奴隸同受囚禁。乜嘢幫助約瑟不致因為陷入絶望而向困苦低頭屈服？
4． （甲）約瑟喺監獄嘅時候細心留意乜嘢？（乙）耶和華點樣回應約瑟嘅禱告？
4 約瑟喺監獄受苦嘅時候，一定細心留意耶和華點樣賜福俾佢。（創世記39:21；詩篇105:17-19）佢年輕嗰時所作嘅一啲預示未來嘅夢，亦都使佢確信自己受到耶和華嘅悦納。（創世記37:5-11）可能佢唔只一次向耶和華傾訴自己嘅痛苦。（詩篇145:18）耶和華回應約瑟衷心嘅禱告，使約瑟深信遭遇一切患難嘅時候耶和華都“與佢同在”。（使徒行傳7:9,10） *
5． 耶和華所賜嘅平安點樣幫助我哋更加堅定噉事奉佢？
5 無論面對乜嘢困難，上帝所賜嘅平安都會保護我哋嘅頭腦，幫助我哋保持内心平靜。（請讀腓立比書4:6,7）我哋覺得自己就快俾憂慮壓倒嘅時候，只要向耶和華尋求幫助，佢所賜嘅平安就會强化我哋達到屬靈目標嘅決心，而且幫助我哋抵抗内心任何想放棄嘅念頭。現代嘅一啲例子可以説明呢一點。
懇求耶和華幫助你重獲内心平靜
6,7． 具體嘅禱告可以點樣幫助我哋重獲内心平靜？請舉例。
6 瑞安同朱麗葉得知佢哋唔再係臨時特别先驅嗰時，覺得好灰心。瑞安話：“我哋向耶和華禱告，直接講出自己嘅感受。我哋明白到，而家係一個特别嘅機會去表明自己信賴耶和華。我哋會衆嘅好多人喺真理嘅時間唔長，所以我哋祈求耶和華幫助我哋喺信心方面立下榜樣。”
7 耶和華點樣回應佢哋嘅禱告？瑞安回憶話：“我哋禱告之後，最初嗰啲負面情緒同憂慮就冇晒嘞。上帝所賜嘅平安保護我哋嘅内心同頭腦。我哋知道，只要保持正確嘅態度，我哋就可以繼續為耶和華服務。”
8-10． （甲）聖靈點樣幫助我哋克服憂慮？（乙）只要我哋努力喺屬靈方面保持專注，耶和華就可能會點樣幫助我哋？
8 上帝嘅聖靈唔單止有助於我哋平復情緒，仲可以使我哋留意一啲關鍵嘅經文，幫助我哋將屬靈嘅事放喺首位。（請讀約翰福音14:26,27）菲利普同瑪麗係夫婦，佢哋喺伯特利服務咗差唔多25年。四個月之内，佢哋都失去咗各自嘅媽媽同其他親人，亦都要照顧瑪麗患有痴呆症嘅爸爸。
9 菲利普回憶話：“我覺得，喺某程度嚟講，我已經應付得幾好，但仲係少咗啲嘢。我偶然喺一篇《守望台》研讀文章留意到歌羅西書1:11嘅經文。我發覺，雖然我的確保持堅忍，但做得仲未够，我需要嘅係‘懷住喜樂同耐心’。呢節經文提醒我，喜樂唔係取決於自己所處嘅環境，而係在於聖靈喺我自己嘅生活中發揮作用。”
10 菲利普同瑪麗一直專注於事奉耶和華，結果喺好多方面都得到耶和華嘅賜福。佢哋離開伯特利之後冇幾耐，兩個人都揾到聖經學生。聖經學生唔單止進步良好，甚至仲話一個星期學習一次唔够。瑪麗話：“佢哋係我哋嘅喜樂，耶和華亦都通過佢哋話俾我哋知，喺一切事上佢都會幫助我哋。”
使耶和華有理由賜福俾你
無論喺乜嘢情況下，我哋都可以點樣效法約瑟嘅榜樣？（請睇第11-13段）
11,12． （甲）約瑟點樣做，使耶和華有理由賜福俾佢？（乙）約瑟保持忍耐，結果耶和華點樣獎賞佢？
11 我哋面對一啲突然嘅變化嗰時，好容易會過度憂慮將來嘅事，導致我哋除咗成日諗住自己嘅難題就乜嘢都唔想做。約瑟都有可能會噉樣。不過，佢決心喺當時嘅情況下盡力做自己做到嘅事，使耶和華有理由賜福俾佢。雖然身處監獄，約瑟仲係辛勤工作，努力完成監獄長交俾佢嘅任務，就好似佢為波提乏做嘅噉。（創世記39:21-23）
12 有一日，約瑟得到一個任務，要照顧兩個曾經喺法老嘅宮廷擔任要職嘅人。約瑟仁慈對待佢哋，所以兩個人就將佢哋嘅憂慮同前一晚佢哋所作嘅令人費解嘅夢話俾約瑟知。（創世記40:5-8）約瑟當時並唔知道，呢次交談會使佢得到自由。兩年之後，佢獲得釋放，而且當日就成為地位僅次於法老嘅高官。（創世記41:1,14-16,39-41）
13． 無論喺乜嘢情況下，我哋可以點樣使耶和華有理由賜福俾我哋？
13 我哋可能會好似約瑟噉，身處於自己完全無法控制嘅情況。不過，只要我哋保持耐心，喺當前嘅環境下盡力做能够做嘅事，噉耶和華就有理由賜福俾我哋。（詩篇37:5）冇錯，可能我哋有時會感到“心裏迷惘”，但正如使徒保羅所講，我哋唔會永遠“陷於絶境”。（哥林多後書4:8）我哋繼續專注於傳道工作，耶和華就會與我哋同在。
繼續專注於傳道工作
14-16． 雖然情況不斷改變，傳福音者腓力點樣喺傳道工作方面保持專注？
14 無論情況點樣改變，傳福音者腓力依然專注於自己嘅傳道工作，為我哋立下優良嘅榜樣。有一段時間，佢喺耶路撒冷喜樂噉執行自己嘅新委派。（使徒行傳6:1-6）不過，情況突然之間完全唔同晒。司提反殉道之後，基督徒隨即受到猛烈嘅迫害。 *不過，當基督嘅門徒四散嗰時，腓力仲係好想事奉上帝，於是去撒馬利亞傳道，因為當時嗰度有好多人都未接觸過上帝王國嘅好消息。（馬太福音10:5；使徒行傳8:1,5）
15 腓力願意跟從聖靈嘅指引去任何地方，所以耶和華運用佢開闢新嘅傳道地區。好多猶太人鄙視撒馬利亞人，用唔好嘅態度對待佢哋。不過腓力對撒馬利亞人冇偏見，而且好渴望同佢哋分享好消息。所以，好多撒馬利亞人“齊心一意”聽佢講話。（使徒行傳8:6-8）
16 後來，聖靈引導腓力去亞實突同凱撒里亞呢兩座有好多外邦人居住嘅城市。（使徒行傳8:39,40）喺撒馬利亞傳道大約20年之後，腓力嘅情況再次發生改變。而家，佢建立咗家庭，亦都喺自己嘅傳道地區定居落嚟。雖然情況不斷改變，但係腓力始終專注於做傳道工作。結果，佢同家人都得到耶和華豐厚嘅賜福。（使徒行傳21:8,9）
17,18． 生活發生改變嘅時候，專注做傳道工作可以點樣幫助我哋？
17 好多全時僕人都話，就算情況不斷改變，專注做傳道工作可以幫助佢哋喺各方面保持平衡。奧斯本同波利特係南非嘅一對夫婦。離開伯特利嗰陣，佢哋以為好快就可以揾到住嘅地方同埋一份部分時間嘅工作。奧斯本回憶話：“不幸嘅係，同我哋諗嘅唔一樣，我哋唔係即刻可以揾到世俗工作。” 太太波利特話：“我哋三個月都揾唔到工做，而且又冇積蓄，當時真係唔容易。”
18 乜嘢幫助佢哋應付咁大嘅壓力呢？奧斯本話：“同會衆一齊傳道大大幫助我哋保持思想積極，專注於屬靈嘅事。我哋決心唔係坐喺度憂慮，而係專心傳道。噉樣做真係帶俾我哋好大嘅喜樂。我哋亦都努力到處揾工，終於俾我哋揾到咗。”
耐心等候耶和華
19-21． （甲）乜嘢幫助我哋保持内心平靜？（乙）適應新嘅情況為我哋帶嚟乜嘢益處？
19 以上嘅例子表明，如果我哋盡量善用自己嘅環境，懷住信心等候耶和華，我哋就可以保持内心平靜。（請讀彌迦書7:7）我哋甚至會發現，適應新嘅情況可能會喺屬靈上為我哋帶嚟好多益處。波利特根據自己以上提到嘅經歷，話：“新嘅委派教識我，喺極其不利嘅情況下仰賴耶和華嘅真正意義係乜嘢。而家我同耶和華有更深厚嘅關係。”
20 上文提到嘅瑪麗一邊繼續照顧佢年老嘅爸爸，一邊做先驅。佢話：“我已經學識，每當感到憂慮，就要停低、禱告同埋放鬆一下。要將事情交俾耶和華，呢個可能係我學到最寶貴嘅一課。將來我都要噉樣做。”
21 課文開頭提到嘅勞埃德同亞歷山德拉承認，冇諗到自己嘅信心會喺情況改變之下受到考驗。不過佢哋話：“當難題出現嘅時候，我哋嘅信心會受到考驗，到時我哋就知道自己有冇真正嘅信心，同埋我哋嘅信心係咪俾到自己支持同安慰。我哋都成為咗更成熟嘅人。”
意外嘅變化可以帶嚟意想唔到嘅福分！（請睇第19-21段）
22． 我哋喺逆境之下盡力而為，就可以確信乜嘢？
22 如果你嘅生活發生一啲意外嘅轉變，無論係有新嘅委派、有健康問題抑或係有新嘅家庭責任，都要確信耶和華會照顧你，喺適當嘅時候幫助你。（希伯來書4:16；彼得前書5:6,7）同時，要喺逆境之下盡力而為。通過禱告親近天父，學識全心仰賴佢。噉樣，任憑情況點樣改變，你都可以使自己繼續享有平和安靜嘅心。
