STEFANO ubenwang’ere i wang’ jupoklembe 71, ma gitimo i ot pido ma malu mi Juyahudi ma julwong’o Sanedrini. Gin zoo gikwiny man gitie ku copo ma lee dit. Ng’atu m’ucoko dhoggi ke utie Kayafa ma Jalam ma dit. En re ma dwi moko i wang’e, etelo wi pido ma jung’olo ie tho iwi Yesu. (Mat. 26:57, 59; Tic. 6:8-12) Kinde ma gibewotho lwong’o jumulembe mi ndra lip lip, gineno lembe moko m’uwang’u igi lii: gineno wang’ Stefano udoko ve “wang’ malaika.”​—Tic. 6:13-15.

Ang’o m’ukonyo Stefano kara kume kud umiel i wang’ lembe m’ubogre rukeno? Ma fodi jutere ngo i wang’ Sanedrini, nwang’u ebino timo tic mi lembanyong’a kud amora, ma ke tipo pa Mungu re m’ubino telo wiye. (Tic. 6:3-7) Saa ma dong’ eni wang’ pido, tipo ma rom eno re m’utielo cwinye, man upoyo wiye i kum lembe m’elar eng’eyo. (Yoh. 14:16) Pieno, kinde ma Stefano ubekoro ku tegocwinye, wec ma tin eni jugoro i Tic mi Jukwenda thek 7, tipo maleng’ uketho epoi i kum giragora ma kadhu 20 ma nwang’ere i Lembagora mi Juebrania. (Yoh. 14:26) Re yioyic pa Stefano ulund udoko tek magwei kinde m’eneno Yesu ucungo yo ku cing’ Mungu ma yor acwic i ginmawokiwang’.​—Tic. 7:54-56, 59, 60.

Saa moko wan de jucopo sendowa man junyayu ragedo i kumwa. (Yoh. 15:20) Ka wabeponjo lembe pa Mungu kubang’ ceng’, man waberweyo lembanyong’a wang’ ma pol, nwang’u wabeweko tipo pa Mungu utel wiwa. Bende wabinwang’u tego ma bikonyowa nicungo ma tek i wang’ ragedo man wabibedo ku kwiocwiny mir adunde.​—1 Pet. 4:12-14.